اولى طب بشرى....اجمع [الأرشيف] - بوابة الثانوية العامة المصرية

مشاهدة النسخة كاملة : اولى طب بشرى....اجمع

طبيب عالمى قادم

18-07-2009, 07:01 PM

سلام عليكم

منورين يا شباب.. http://www.bala6y.org/vb/images/smilies/smile.gif
دخول الجامعة بره إنه خطوة إنتقالية ممكن تبقى صعبة من الناحية الدراسية أو من الناحية النفسية - تغيير المكان و المعاملة و خلافه - فهو ممكن يبقى مشكلة من الناحية الإجتماعية..

إزاى أتعامل؟!!
إزاى أتصرف؟!!!
إزاى ألبس؟!!

مهمة الموضوع ده مش توجهيكم لتصرفات معينة.. مهمته يوجهكم لمناطق الخطر و الحفر اللى وقعنا فيها كلنا فى أول سنة أولى و عايزين نجنب الناس اللى جاية الوقوع فيها..
أنا كتبت موضوع كامل فعلاً عن نقاط مختلفة مهتمة فى أغلبيتها بالحياة الإجتماعية و هأنزله على فقرات..

لو أى حد مهتم يشارك فى الموضوع يتفضل بمقالات أو فقرات محددة و معنونة و محددة لموقف معين..

و هنبدأ...

طبيب عالمى قادم

18-07-2009, 07:03 PM

أسلوب التعامل

مع بعض (زمايل):

هتدخل مدرج فيه 200 طالب مثلاً إحتمال يكونوا مختلفين عنك.. و عندك رهبة من التعامل معاهم.. و يمكن رهبة من إحتمال إنك تبقى مرفوض أو مش محبوب.. فى ناس طبعاً مكتسحة لو أنت منهم نط الفقرة دى و اقلب على اللى بعدها :D

فى البداية دايماً..خير الأمور الوسط

مش لازم تتدلق على حد و تلزق له..و مش لازم تدى الناس الوش الخشب علشان يعرفوا إنك مكتفى ذاتياً و مش محتاج حد..

فى البداية خليك خفيف..دول معارف جداد.. ومتطلبش من حد معلومات كتيرة عن نفسه من أول مرة تشوفه فيها.. و ابعد و اكرر:ابعد عن سيرة مجموع الثانوية لإنك ممكن تلاقى حد جايب أعلى منك فأنت (برد فعل بشرى) تتضايق أو هو يطنطط عليك بيه.. و ممكن تكون أنت جايب أعلى منه فيتضايق منك و يكش.. طبعاً ده لايعنى إنك لما تتسأل جايب كام فى ثانوى تتوه أو تسيبه و تقوم!
بس حاول متفتحش الموضوع بنفسك.

حاول تقلل ردود الفعل البشرية http://www.bala6y.org/vb/images/smilies/biggrin.gif

حاجة كمان.. خليك متعاون بس مش متعاون أوى..بمعنى اللى يسألك سؤال أو يطلب منك طلب معقول جاوبه بدون تردد.. بس مثلاً مش توافق على إنك تسيب محاضرة و تصور لزميلك كتاب بره مثلاً لإنه عايز يتابع المحاضرة و مش لاقى وقت!
حاجة أخيرة..معارفك فى أول فترة مهمين لإنك هتعرفهم بقية سنين الكلية..بس حط فى دماغك إنك فى السنين الجاية هتعرف ناس أكتر..

***

مع بعض (بنات وولاد) :

لو كنت بنت أو ولد مدرستك كانت منفصلة..بنين بس أو بنات بس..موضوع التعامل ده ممكن يسبب لك حيرة..

الولاد داخلين كلية.. وفيها بنات! تخيل! هنعيش بقى يا ابنى بدل كتمة القعدة فى فصل كله خناشير!

البنات داخلين كلية.. وفيها ولاد! تخيلى! أكيد كلهم قلالات أدب و عايزين يعرفوا أى بنت وخلاص!

طبعاً العكس ممكن يبقى صحيح..بس أنا بأتكلم عن القاعدة..
و مش عايزة أحكى عن المواقف المحرجة اللى ممكن تنتج عن تفكيرين مختلفين بالطريقة دى..
التعامل كله بيتلخص فى الكلمتين دول:
إحترام..وضوح..حدود

مثال ظريف: لو قاعد/قاعدة فى المدرج ولقيت زميلتك/زميلك بيسألك الدكتور وقف لحد فين.. مش لازم تفترض تلقائى إنِك بتتعاكسى.. رد فعلك يبدأ من التصرف التانى اللى تحسى إنه ضايقك..غير كده ردك يبقى عادى جداً فى حدود إجابة السؤال..

هتتخرج فى يوم من الأيام - قريب..قريب http://www.bala6y.org/vb/images/smilies/tongue.gif - و تشتغل فى مستشفى و معاك زميل/زميلة .. أو فى عيادة خاصة و تعمل referance لدكتور/دكتورة زميلة أو لمعمل تحاليل..فى جميع الأحوال هيبقى فى علاقات زمالة و علاقات عمل بينك و بين الجانب الآخر.. خليها من دلوقتى مبنية على الإحترام و هتكسب كتير..

آسفة على الإستفاضة فى الجزء ده..بس هو بيشغل الكل فى بداية الكلية..

***

فاصل و نواصل http://www.bala6y.org/vb/images/smilies/smile.gif

__________________

طبيب عالمى قادم

18-07-2009, 07:06 PM

مع الدكاترة:

أول مرة تتعامل مع (دكتور جامعى)..فى ناس من الرهبة ممكن يقفوا أدام الدكتور من غير ما ينطقوا..أفتكر كده شكلك أدام نجم كبير أو كاتب مهم .. ده غلط طبعاً..الدكتور عايزك تعامله بإحترام..بس محتاجك تتكلم برضه.. بس متتكلمش أوى..سؤالك دايماً مختصر..أنا قلتلك خير الأمور الوسط.

المذاكرة:

أذاكر منين: هتبدأ تحضر فى أول السنة مجموعات الشرح فى العشيرة أو تبع أى أسرة.. و هيدوك ملخصات لذيذة..
هتبدأ تحضر محاضرات والدكتور يقولك تذاكر منين..
و هتقابل ناس بياخدوا دروس و هما كمان هيقولوا لك تذاكر منين..
افتكر دايماً المثل ده: " ما حك جلدك مثل ظفرك..فتول أنت جميع أمرك"
أكيد هتحتاج فى الأول تسمع لناس..هيقولوا لك المصادر و لطريقة..احكم أنت بنفسك إيه المناسب ليك..
فى ناس عندها ذاكرة فوتوغرافية..بيفتكروا شكل الصفحة فى الإمتحان و يمكن رقمها..ممكن الناس دى تفضل كتب القسم اللى بيكتبها رئيس القسم و أكبر أساتذته..
فى ناس إتعودت تذاكر من ملخصات..
فى ناس إتعودت على المعلومة المكثفة من ورق الدروس فى ثانوى.. تانى "فتول أنت جميع أمرك"

***

كل يوم:

زى ما غالباً قالوا لك أكتر من مرة: الإنجليزى مش هيبقى مشكلة بالنسبة لك إلا لمدة لاتزيد عن شهرين على الأكثر..
فى صفة عندنا مميزة لكليات القمة:الدكاترة بيبدأوا شرح من أول يوم..

إزاى بقى تبقى in good shape كل يوم بحيث تحافظ على تركيزك؟ لو معاد محاضرتك 8 الصبح هتتضطر تتخلى عن حياة السهر والعبث بتوع الأجازة..يا عابث! : )
المهم..تعرف الطريق بياخد منك أد إيه بالضبط و تزود عليه ربع ساعة.. تشرب قبل ما يجى أو فى الكلية كباية الشاى المتين.. و تنطلق!
هات ساندويتشات معاك لو من النوع اللى بيتقرف من أكل الكافيتريات.. و ملكش دعوة بالهبل بتاع محدش بيجيب ساندوتشات من بيتهم.. أختكم داخلة على رابعة و بأجيب معايا ساندوتشات.. ولايهمنى..
أى حكاوى عن طريقة شرح الدكاترة..انساها.. أجمل طريقة تتقبل بيها شرح الدكتور هى إنك تسمعه لأول مرة..هو مقدر إنك جديد فى اللعبة ومش هتحتاج تبقى محضر عنه و عن محاضرته تحريات..
السبب التانى اللى لازم علشانه تنسى الحكاوى دى إن مادتين من مواد السنة دى الأربعة: فسيولوجى (علم وظائف أعضاء) و بيو ( كيمياء حيوية) رؤساء الأقسام بتوعهم جداد نوفى..أول سنة ليهم فى رئاسة القسم..

__________________

طبيب عالمى قادم

18-07-2009, 07:07 PM

من أول يوم..إفتح مصدرك واختبر نفسك فى الإنجليزى..أنت بتقرا طب لأول مرة فى حياتك..استمتع ياعم!

***

الأنشطة:

الإستقبال هو أول نشاط هتسمع عنه فى الكلية.. الناس اللى بتقابلك لما تدخل ومستعدة تساعدك فى أى حاجة محتاجها..الاستقبال ده متعة مش هتحس بيها إلا لما تكبر سنة أو اتنين وتنزل إستقبال علشان تساعد الناس اللى فى أولى يتأقلموا مع الحياة فى الكلية!

الرحلات بتطلع لدريم بارك و لقرى سياحية و لأسكندرية و أحياناً للأقصر و أسوان..

القافلة: ببساطة: ناس فى قمة الفقر..قمة الحاجة..قمة المرض.. و أنت بتساعد........ بس!

دى الحاجات اللى كل الأسر مجتمعة عليها..فى حاجات مخصوصة لكل أسرة هتعرفها لما تحصل و يعلنوا عنها.. معارض ثقافية/فنية/ندوات/ جلسات مناقشة ثقافية/مجلات أدبية وعلمية.......

هتلاقى هنا فى الكلية مجموعة من أفضل النشاطات الطلابية اللى ممكن تسمع عنها من كليات تانية..

خد لك جولة فى الكلية و براها..و أنزل ميدان العباسية و كُل فى كافيتريا الإعتماد..بس متدعيش عليا.. عدى على فلفلة و كُل أحلى كريم كراميل فى حياتك..

و أوعى تسمع كلام حد يقولك تعال أوريك متحف التشريح!

_____

نورتوا واحدة من أعرق جامعات مصر و مهنة من أشرف مهن الأرض

طبيب عالمى قادم

18-07-2009, 07:11 PM

.........ارجو ما قد كتب قد حاز على اعجابكم واى استفسار يكون لى الشرف بان ارد عليه
وارجو كتابة الردود لنكون اسرة واحدة

خريف فى قلبى

19-07-2009, 08:18 PM

ما شاء الله مجهود رائع للامام دائما

marina2010

20-07-2009, 12:09 AM

لو فيه حد هنا من طب المنصورة يقدر يفيدنى طب احسن و لا صيدلة

heba 77

20-07-2009, 01:48 AM

ياريت حد يفيدنى طب طنطا ولا طب المنصوره؟؟؟؟

طبيب عالمى قادم

20-07-2009, 02:04 AM

ياريت حد يفيدنى طب طنطا ولا طب المنصوره؟؟؟؟
طب المنصورة احسن بكتيير من طب طنطا كمان طب المنصورة يوصف بانه عاصمة الطب فى مصر
انا عاوزك تدخل على جوجل وتكتب عاصمة الطب فى مصر شوف هتلاقى ايه اللى ظهرلك
اما لو انت عاوز طب المنصورة بجد لازم تكون قده لان تقدر تقول انه اصعب طب فى مصر

heba 77

20-07-2009, 02:10 AM

ماهو مشكله انه صعب دى بيقولوا التقديرات صعبه اوى وانا نفسى ابقى معيده بيقولوا صعب فى المنصوره

المتحري الخارق

20-07-2009, 02:24 AM

شـكــ وبارك الله فيك ـــراً لكِ يا دكتورة ...
موضوع مميز بالفعل لأنه عن تجربة
و استفدت منه كثيراً
و منتظرين مواضيـع أخرى كهذه
تحيــاتي

طبيب عالمى قادم

20-07-2009, 02:24 AM

ماهو مشكله انه صعب دى بيقولوا التقديرات صعبه اوى وانا نفسى ابقى معيده بيقولوا صعب فى المنصوره
انا عاوز اضيف ليكى حاجة يا هبه
الصعوبة عاوزة مذاكرة مش اكتر يعنى انا اعرف ناس فى طب المنصورة ومتعينين فى الكلية وفى اقسام كويسة زى الباطنة والجراحة والقلب
ولكن بالمذاكرة وصلوا ومن غير دروس كمان
الموضوع مش بالصعوبة اللى انتى متوقعاها ولكن الحل هو المذاكرة
وربنا يكرمك وتبقى معيدة ورئيسة قسم باذن الله

طبيب عالمى قادم

20-07-2009, 02:26 AM

شـكــ وبارك الله فيك ـــراً لكِ يا دكتورة ...

موضوع مميز بالفعل لأنه عن تجربة
و استفدت منه كثيراً
و منتظرين مواضيـع أخرى كهذه

تحيــاتي

تقصد بقى يا دكتور مش دكتورة
شكرا ليك انت
وشكرا على المرور وبارك الله فيك

المتحري الخارق

20-07-2009, 02:48 AM

تقصد بقى يا دكتور مش دكتورة
شكرا ليك انت
وشكرا على المرور وبارك الله فيك

عذراً يا دكتور لأنني قرأت ضمن الموضوع هذه الجملة أختكم داخلة على رابعة و بأجيب معايا ساندوتشات.. ولايهمنى.. و متأسف مرة أخرى ..

طبيب عالمى قادم

20-07-2009, 02:56 AM

عذراً يا دكتور لأنني قرأت ضمن الموضوع هذه الجملة و متأسف مرة أخرى ..
انا اقصد واحدة فى الكلية كمثال
وشكرا على اسلوبك وجزاك الله خيرا

FOUAAD08

22-07-2009, 08:05 AM

بصراحة موضوع جاااااااااااااامد جدا ربنا يهل و ادخل عين شمس
بس يعنى هو انا لو عاوز احضر حاجة من دلوقتى اقرا منين او اجيب ورق منين مش عاوز ادخل حمار يعنى

طبيب عالمى قادم

22-07-2009, 08:24 AM

بصراحة موضوع جاااااااااااااامد جدا ربنا يهل و ادخل عين شمس
بس يعنى هو انا لو عاوز احضر حاجة من دلوقتى اقرا منين او اجيب ورق منين مش عاوز ادخل حمار يعنى
السلام عليكم
شكرا على كلامك اولا
ثانيا انا عاوز اقولك انت لازم تقضى اجازتك كويس ومتشغلش بالك بالقراءة والتحضير لان انت ممكن تعقد نفسك من الوقتى ولكن ممكن تقرا حاجات بسيطة مثلا كتب عن الاسعافات الاولية ممكن تقرا عن الامراض او اي حاجة بسيطة مش لازم تعقد نفسك لان فى بداية السنة هتحس احساس عمرك ما حسيته ولا هتحسه فى الكلية
بالتوفيق ان شاء الله

شمس الدقهلية

23-07-2009, 12:38 PM

ممكن أجيب كتب عن الاسعافات الأولية والأمراض منين

طبيب عالمى قادم

23-07-2009, 01:22 PM

ممكن أجيب كتب عن الاسعافات الأولية والأمراض منين
يوجد فى المكتبات الطبية فى كليات الطب

خربتة

23-07-2009, 06:44 PM

طب طنطا وحش ليه؟

طبيب عالمى قادم

23-07-2009, 07:22 PM

طب طنطا وحش ليه؟
هو مش وحش لدرجة ان الناس مش تدخله ونسبة الممارسة العملية ليست بمستوى التعليم فى الجامعات الاخرى

شمس الدقهلية

23-07-2009, 07:32 PM

بيخوفونى من طب المنصورة وبينصحونى بالقاهرة أوعين شمس وانا محتارة وخصوصا أنا من الدقهلية

طبيب عالمى قادم

23-07-2009, 08:02 PM

بيخوفونى من طب المنصورة وبينصحونى بالقاهرة أوعين شمس وانا محتارة وخصوصا أنا من الدقهلية
ممكن تشوفى نظام الكلية فى المنصورة فى سنة اولى وبعدين تحولى بعد اولى لان انتى مش ممكن تروحى القاهرة لو كان مجموعك جايب المنصورة

sumasamy

23-07-2009, 11:06 PM

الف شكر ليك

sumasamy

23-07-2009, 11:07 PM

طيب ايه راى حضرتك فى طب بنها؟؟؟؟؟؟؟؟

طبيب عالمى قادم

23-07-2009, 11:50 PM

طيب ايه راى حضرتك فى طب بنها؟؟؟؟؟؟؟؟
طب بنها كويس جدا كمان التقديرات فيه عالية قوى

sumasamy

28-07-2009, 12:41 AM

طب بنها كويس جدا كمان التقديرات فيه عالية قوى
كويس دى كلمة عامة انا نفسى اعرف هل هى كلية حلوة زى عين شمس والقاهرة وحكاية التقديرات العالية دى اللى قلقانى لانى سمعت حد بيقول ان امتياز بنها يعادل مقبول عين شمس

طبيب عالمى قادم

28-07-2009, 12:50 AM

كويس دى كلمة عامة انا نفسى اعرف هل هى كلية حلوة زى عين شمس والقاهرة وحكاية التقديرات العالية دى اللى قلقانى لانى سمعت حد بيقول ان امتياز بنها يعادل مقبول عين شمس
السلام عليكم
بالنسبة للتقديرات والله عندنا فى عين شمس كتيير جدا جايب امتياز فى سنة اولى كمان اللى هى عقبة الطب كله

انا قلت قبل كده مش لازم التقديرات قد لزوم ان يكون الدكتور فاهم يعنى لازم تبصوا على الكلية اللى العملى فيها حلو والدكتور يطلع منها فاهم مش حافظ

Mystry

28-07-2009, 02:58 AM

شكررا يا دكتور (ة) على الموضوع الجميل

انا الحمد لله دخلت طب بنها

ربنا يستر

طالبة الغفران

28-07-2009, 05:46 AM

Franklin

28-07-2009, 11:26 AM

سارةابراهيم

28-07-2009, 03:10 PM

شكرا بجد على المعلومات ديه بس انا جالى طب عين شمس وعايزة احول طب بنها راى حضرتك ايه

سارة555

28-07-2009, 04:34 PM

انا عايزة اعرف هو الاشتراك فى الاسر والنشاطات دى اجبارى اصل انا مش بحب الانشطة والحاجات دى من يوم م اتولدت

منجد17

28-07-2009, 04:45 PM

طب شبين ( المنوفية ) اية النظام حلو ولا لأ

heba 77

28-07-2009, 05:29 PM

انا الحمد لله جالى طب منصوره ايه رأيك يا ريت كلام مشجع

البـراء

28-07-2009, 05:39 PM

الصبح هتتضطر تتخلى عن حياة السهر والعبث بتوع الأجازة..يا عابث! :

حاضر يا دكتور(ة)
والف شكر لموضوع حضرتك الجميل
بس كنت عايز أسال حضرتك سؤال
هل فعلا طب عين شمس صعب
والتقديرات العالية فيه غير متاحة
والتعيين فيه مستحيل
وكبيرنا نجيب مقبول
؟؟؟؟؟؟؟؟؟؟؟؟؟؟؟
سمعنا كده صح ؟؟

السلام عليكم ورحمة الله وبركاته

أولا معذرة
هدخل فى الموضوع
أنا وصلت هنا عن طريق محركات البحث
قدرا
السؤال مش موجه ليه بس هجاول
والأجر دعوات بظاهر الغيب

التقديرات ما شاء الله عالية وحضرتك ممكن تجيبى أمتيازات بكل سهولة
الحمد لله كنت بجيب أمتيازات بمجهود أقل
الأمر كله بيرجع لطريقة المذكرة وأزى تحصلى على الدرجات
دى درجات سنة أولى السنة الماضية ممكن تشوفى التقديرات فى عين شمس
نتيجة الفرقة الأولى طب عين شمس 2008 - 2009 (http://1aim.net/fourm/showthread.php?t=9470)

وحضرتك أهتمى بالمعلومات من اول السنة
وفى ميزة فى عين شمس التعين فى عين شمس بياخد عدد كبير
يعنى بيتعين لحد 235 طبيب مقيم منهم ناس بتتثبت وناس بتاخد المجاستير وتكمل بره
فى الكليات التانية العدد قليل جداا
مثال المنوفية بتاخد 35 طبيب مقيم فى المستشفى و 30 معيد فى الكلية
هناك فرق طبعا ملحوظ

شكرا بجد على المعلومات ديه بس انا جالى طب عين شمس وعايزة احول طب بنها راى حضرتك ايه

لو طب بنها قريب من حضرتك فى السكن ممكن تحولى علشان بهدلة الموصلات وخصوصا أن حضرتك مش هيبأه ليك مدينة جامعية علشان من بنها لو حضرتك فى بنها

غير كده
بنها تقدرتها أعلى من عين شمس
بس المستوى العلمى
عين شمس أعلى بكتير

طب شبين ( المنوفية ) اية النظام حلو ولا لأ

طب المنوفية
نصيحة خليك سنة أولى وتانية وتالته هناك وذاكر كويس وأرفع تقديرك
وحول من أول رابعة عين شمس أو القاهرة
هتلاقى نفسك ليك ترتيب كويس وكده تاخد السنين العملية فى القاهرة أو فى عين شمس وتقديرك كويس إن شاء الله

heba 77

29-07-2009, 01:08 AM

ya bra2 eh r2ik fe tb mansoura

Rymonda

29-07-2009, 03:03 AM

البـراء

29-07-2009, 07:09 AM

ya bra2 eh r2ik fe tb mansoura

معلومتى عن المنصورة أن أمتحانتها معقده شوية بس ده على الكل يعنى على الدفعة كلها
بدأت حاليا تبأه مشهوره على ميتوى الوطن العربى فى برنش أمراض الكلى

ماله يعني طب الزقازيق؟؟
الزقازيق والمنصوره تقريبا واحد ونفس الاسلوب كمان .. بس يمكن التقديرات في الزقازيق احسن شويه ..
وبعدين الاتنين من الكليات المعتمده .. انما بنها وطنطا تقريبا مش معتمدين .. والله اعلم ..

الزقازيق اسهل بكتييييير

بس من النهاية للبنات أقرب لكلية للبيت تبأه افضل شيئ لأن دولت 7 سنين

الطامحة للافضل

29-07-2009, 08:49 AM

من فضلك هو احنا امتى بالظبط بنودى ورقنا للكلية وماذا عن المصاريف والكشف الطبى؟

1aim.net staff

29-07-2009, 04:04 PM

السلام عليكم و رحمة الله و بركاته

عاملين ايه

أولا مبروك لكل الناس اللي داخله طب

مهنه عظيمة و أجرها عظيم بإذن الله بس أحسنوا النية لله

ربنا يعينكم

الموضوع ده بإذن الله مجمه أهم حاجات طالب الطب محتاجها

و دي من طلبة زمايلكم في طب عين شمس على المنتدى بتاعهم اسمه هدف واحد

من أولى الى النواب و بعد التخرج فاللي عنده استفسار في الطب و مواده و دراسته محدش هناك هيبخل عليه ان شاء الله لأن ده منتدى لبة طب عين شمس

www.1aim.net (http://www.1aim.net)

والموضوع المخصص لطلبة ثانوية عامة داخلين على الكلية على اللينك ده ان شاء الله
دليل الموضيع الهامه للفرقة الأولى♥ طالع من الثانوية ♥♥ داخل على الكلية♥♥إن شاء الله♥♥ (http://1aim.net/fourm/showthread.php?t=9655)

طبيب عالمى قادم

30-07-2009, 11:22 AM

طبيب عالمى قادم

30-07-2009, 11:24 AM

و انا كمان سمعت كده من دكاترة كتير و نصحونى بطب اسماعليه

قالولى انتى مستواكى كويس و بالمذاكرة و الصبر هتجيبى تقديرات عاليه و هتتعينى فى الكليه بسرعه

الله المستعان و ربنا يوفقنا كلنا للخير يا رب

ربنا يكرمكو كلكو فى اى كليه

اهم حاجه توفيق ربنا
السلام عليكم
طبعا كل شىء بالاجتهاد وتوفيق ربنا اول شىء طبعا ولكن الاسماعيلة طريقة دراستها مختلفة تماما عن باقى كليات الطب طبقا لنظام الجودة

طبيب عالمى قادم

30-07-2009, 11:27 AM

ماله يعني طب الزقازيق؟؟
الزقازيق والمنصوره تقريبا واحد ونفس الاسلوب كمان .. بس يمكن التقديرات في الزقازيق احسن شويه ..
وبعدين الاتنين من الكليات المعتمده .. انما بنها وطنطا تقريبا مش معتمدين .. والله اعلم ..
اه تقريبا المنصورة زى الزقازيق ولكن حكاية معتمدة دى صعبة لان لسه مفيش كليات طب اعتمدت عالميا فى مصر وعين شمس الان بتسعى للجودة

طبيب عالمى قادم

30-07-2009, 11:28 AM

شكرا بجد على المعلومات ديه بس انا جالى طب عين شمس وعايزة احول طب بنها راى حضرتك ايه
اولا مبروك عليكى كلية الطب
ثانيا انا عاوز اقول ان القاهرة مش بعيد قوى عن بنها ولكن انتى يجب ان تدورى على الاحسن فانا ارجح عين شمس من حيث الناحية العلمية والعملية

طبيب عالمى قادم

30-07-2009, 11:30 AM

انا عايزة اعرف هو الاشتراك فى الاسر والنشاطات دى اجبارى اصل انا مش بحب الانشطة والحاجات دى من يوم م اتولدت
لا مش شرط خالص

طبيب عالمى قادم

30-07-2009, 11:32 AM

من فضلك هو احنا امتى بالظبط بنودى ورقنا للكلية وماذا عن المصاريف والكشف الطبى؟
ان شاء الله الكلية بتعطى ميعاد من كذا لكذا التقديم
المصاريف مش شرط تتدفع فى اول السنة ولكن اخر ميعاد قبل الامتحان
الكشف الطبى مع التقديم

طبيب عالمى قادم

30-07-2009, 11:33 AM

اسف اللردود جاءت متاخرة لظروف خاصة

طبيبة مسلمة

30-07-2009, 04:20 PM

يا جماعة اللي عايز يجيب تقدير في أي حتة هيجيب
محدش بيجيب تقدير من غير مذاكرة
اتكلوا على الله وادخلوا الكليات القريبة منكم
واللي شاطر بجد هيثبت نفسه في أي مكان
ربنا معاكو

انا بس كنت عايزة تعلق على حاجة
انا في طب المنوفية والكلينيكال عندنا بقى احسن من قبل كدة
يعني عندنا احسن من بنها بكتيييييييييييييير
بنشوف حالات كتير كويسة

وكمان اساسا الاغلبية في خمسة وسادسة بياخدوا كورسات وغالبا بيبقوا الدكاترة من القصر العيني
وبيجيبوا حالات كتير برضه وزي اللي بيجيبوها لبتوع القصر العيني
يعني في الآخر كله تقريبا بيشوف زي بعض

سارة555

31-07-2009, 01:18 PM

عندى سؤال للدكاترة اللى اكبر مننا
هو احنا اللى بنختار القسم اللى احنا عايزين نخشه ولا ده بيبقى حسب المجموع ياريت حد يرد عليا

طبيبة مسلمة

02-08-2009, 02:18 AM

سارةابراهيم

02-08-2009, 04:44 PM

اولا مبروك عليكى كلية الطب
ثانيا انا عاوز اقول ان القاهرة مش بعيد قوى عن بنها ولكن انتى يجب ان تدورى على الاحسن فانا ارجح عين شمس من حيث الناحية العلمية والعملية
الله يبارك فى حضرتك وشكرا على الرد

طبيب عالمى قادم

05-08-2009, 12:23 AM

يا جماعة انا اسف على التاخير والله كان عندى مشكلة فى النت اى اسفسار انا تحت امركم

طبيب عالمى قادم

06-08-2009, 12:12 AM

قسم ايه يا حبيبتي:)

انتوا بتدرسوا كل حاجة ولما تتخرجوا ان شاء الله وعليكو خير تبقوا تاخدوا نيابات في التخصصات بقى
ودي بيبقى ليها تنسيق زي بتاع الثانوية كدة وزي بتاع التكليف:abdoog8:
ان شاء الله التخصص بيكون فى النهاية بعد ال6 سنين وبيكون ليه تنسيق حسب لبتقديرات

heba 77

06-08-2009, 12:35 AM

كنت عايزه اعرف اعمل ايه فى الاجازه عشان ما ابقاش داخله تايهه ومش فاهمه حاجه اول شهرين

طبيب عالمى قادم

06-08-2009, 01:03 AM

كنت عايزه اعرف اعمل ايه فى الاجازه عشان ما ابقاش داخله تايهه ومش فاهمه حاجه اول شهرين
ممكن تقراوا كتاب الانترودكشن بتاع الاناتومى

طبيب عالمى قادم

07-08-2009, 09:14 PM

يا جماعة انا عاوز اقول ان كلية الطب من الكليات العلمية اللى مش عاوزة حفظ كتيير عاوزة فهم اكتر لان الحفظ ما بيجيب نتيجة مع هذه الكلية كمان هى عاوزة انسان يحبها مش عاوزة انسان يكون مخنوق منها
صحيح هيكون هناك شىء بسيط من العسرة فى اول السنة فى اولى ولكن والله هتحبوها جدا بعدين

7abiby el-awlany

08-08-2009, 06:43 PM

طب طنطا حلو

كفاية اني هدخله

شكرا للنصايح دكتور

طبيب عالمى قادم

08-08-2009, 07:00 PM

طب طنطا حلو

كفاية اني هدخله

شكرا للنصايح دكتور
طبعا ان شاء الله احسن طب كفاية انك هتنوره
بارك الله فيك

سلمى سامى سليم

10-02-2010, 03:32 AM

جزاك الله كل خير

المؤمن الصغير

13-08-2011, 05:59 AM

موضوع رائع جداً. لك جزيل الشكر.

shereen ss

13-08-2011, 04:12 PM

بجد موضوع تححححححححححفة

Dr/sara

14-08-2011, 01:01 PM

الموضوع رائع بس يا ريت حد يقولى ايه هى مميزات طب الزقازيق

Dr.M!DO

14-08-2011, 01:33 PM

جزاك الله خيرا على هذا الموضوع الرائع
كنت عايز استفسر عن حاجه
كل الطلاب اللى داخلين طب ان شاء الله
خايفين تقابلهم مشكلة الانجليزى
ازاى نتغلب عليها؟
وازاى نستعد للكيله من دلوقتى؟

ومره تانية شكرا لحضرتك يا دكتور

shofolofo

03-09-2011, 01:36 AM

مش عايز أبقى متطفل بس حضرتك كنت بتتكلم بصيغة المؤنث لسبب واحد بس هو إن الموضوع مش أنت اللي كاتبه .. اللي كاتبه خطيبتي ندى من 2008 سنين على موقع بلاطي موقع كلية طب عين شمس ... حضرتك نقلته حرفيا وده مش مشكلة .. ومذكرتش المصدر وده برضه مش مشكلة ..

مشكلتي الحقيقية في إنك بتقول إن الموضوع بتاعك وإنت اللي كاتبه وبتبرر كمان ليه بتتكلم بصيغة المؤنث .

LoOoLy El Treikawya

08-09-2011, 08:57 AM

التوبيك جميل جزاك الله خير يا دكتور