السؤال الازلى هندسة القاهرة ولا عين شمس؟؟؟ [الأرشيف]

مشاهدة النسخة كاملة : السؤال الازلى هندسة القاهرة ولا عين شمس؟؟؟

cutie.gogo

23-07-2009, 01:02 PM

السلام عليكم و رحمة الله و بركاته

ياجماعة ارجوكم انا عايزة دراسة تفصيلية فى معرفة الفروق الجوهرية و السطحية ما بين هندسة القاهرة و هندسة عين شمس :d

لأنى لفيت فى كل المنتدى وقريت كل حاجة بس احتارت اكتر وذلك لأسباب عديدة منها:
اولا: إن هندسة عين شمس اصعب بكتير و فى نفس الوقت بس بياخدو حاجات اكتر و افيد و هو ده الصح يعنى ولا ايه
ثانياَ: حكاية الشغل ده و انهم بياخدو بتوع عين شمس الاول
ثالثاً: الشيخ زايد ده اللى فى اخر الدنيا مش عارفة فى مصر ده ولا السعودية بس اكيد ليه مواصلات بردو
رابعاَ: حكاية ان الدراسة فى اول سنة فى القاهرة عربى و بعد كده تقلب ودى لغبطة جداً يعنى
خامسا بقى و دى الاهم : اللى اعرفه ان فى اقسام فى دى مش موجوده فى دى طيب هى ايه اصلاً الاقسام اللى موجودة وانا هعرف ازاى انا هختار ايه قبل ما ادخل اعدادى ولا ادخل عين شمس اعدادى و بعدين لو عجبنى قسم فى القاهرة احول ولا ايه النظام
سادساً : معاملة الدكاترة بتفرق يعنى سمعت ان دول بيحترموا الطلبة ودول لأ و الحكاية دى عملالى ازمة نفسية لانى مش هطيق واحد يبصلى بأرف كده من غير ماأعمله حاجة:040vk0:

اه وبالمناسبة انا جايبة 393 يعنى 95.8%
بس كده ياريت تفيدونى و عشان محدش يزعق ويقول فى موضوعات مخصصة للاستفسارات انا دوخت من اللف فى المنتدى ده انى الاقى موضوع واحد ابداً ولاقيتش غير واحد وبيكلم اللى فى هندسة اصلاً:bosyht9:

KeMoZzAzZ

23-07-2009, 02:03 PM

لفيتى بضمير يعنى؟ :d
شوفتى ده ؟
http://www.thanwya.com/vb/showthread.php?t=137900&page=2
:d
(انا فى عين شمس عشان بس يتفهم كلام)
اولا هتلاقينى قايل فى الموضوع انها فعلا صعبه بس مش مستحيله يعنى ...مستحيله شويه :p
ثانيا فعلا انا بسمع كتييير ان بتوع عين شمس بيتخطفوا كده
بس عندهم حق لان دول اللى بيتمرمطوا وبيتبهدلوا فعشان كده بيبقى مهندس متبهدل :d
ثالثا الشيخ زايد اكيد ليها مواصلات ...انتى فى يوم انزلى الشيخ زايد وانزلى عين شمس وشوفى هتقدرى تروحى الشيخ زايد ولا لأ
رابعا الله اعلم :d
خامسا انتى شوفى انهى قسم اللى انتى عيزاه الاول
اللى انتى منمره عليه
لو بترول او طبية او طيران يبقى خشى القاهره بس ماتنسيش تعب المواصلات
غير كده شوفى بقى وحددى انهى افضلك وانهى هتشتغلى بيه احسن والحجات دى كلها (عين شمس يعنى ....لازم اشكر فى كليتى انتى فاهمه :d)
سادسا انا مش فاهم فين اللى معاملتهم وحشه؟؟
بس اكيد تقصدى عين شمس :d
بصى هو فعلا فيه ناس معاملتهم وحشه بس تلت تربع الكلية ناس محترمه جدا وصعب جدا تلاقى حد معاملته وحشه ولو لقتيه يبقى اكيد مش هيعاملك وحش الا لو انتى عملتى حاجه ضايقته
اه انا فى مره دكتور وقف هزقنى عشان كنت سرحان بغباء فى المحاضرة :d بس ده مايمنعش انه كان اه بيهزق بس بهزار
كان راجل زى العسل
انما مش فاكر حد كانت معاملته وحشه خالص بجد
انما كطرد من المحاضرة والسكاشن وبتاع فده هتلاقى منه كتيييييييييييييييييييييير جدا
بس طول مانتى ماشيه صح ماحدش هيكلمك ابدا ( عشان كده كانوا بيكلمونى كتير) :d

تصدقوا فعلا انا اكتشفت انى رغاى جدا!! :d
ومبروك على المجموع ;)

cutie.gogo

23-07-2009, 02:35 PM

على فكرة انا التوبيك ده فصصته قراية و بالذات المشاركة اللى هى 8 بتاعة حضرتك برغم الطول ده كله بس قريتها بتاع 5 مرات و كان نفسى حضرتك اللى ترد على الموضوع ده عشان انت اللى عملتلى المولد اللى فى دماغى ده و الدود اللى بياكلها ده كله :d
لان عين شمس دى ماكنتش فى دماغى اصلاً بس دلوقتى بفكر اكتر فى عين شمس و قولت اشوف فى تنسيق السنين اللى فاتت انهى اكتر الاقى الفرق بس نص درجة و اوقات عين شمس هى الاعلى بردو يعنى ما فيش فرق كبير بين الاتنين تقريباً
وانا كنت منمرة فعلاً على طيران بس ماعتقدش ان ليه شغل كتير و دلوقتى بفكر فى الكترونيات و حاسبات و اكيد القسم ده بيفقرق من جامعة لتانية فكده بردو مش عارفة انهى احسن !!!
وميرسى اوى على الرد
و سؤال معلش هو فعلاً لو عايزة احول من جامعة لتانية ما ينفعش احول غير فى الاقسام اللى مش موجودة فيها؟
و سؤال بردو لاى حد يعرف هى ايه حكاية حاجة كده بتتعمل بعد ما اخلص هندسة ابقى ظابط مهندس و حاجات كده

cutie.gogo

23-07-2009, 02:45 PM

والله انا شكلى كده هدورلى على وسطة و اخش طب بيطرى و خلاص :d

KeMoZzAzZ

23-07-2009, 02:53 PM

هههههههههههه :d
عشان تعرفوا بس ان الرغى لوه فوايده ...بقى قريتها 5 مرات ؟؟؟ حرام عليك ياراجل ده انا انتحر :d
ده انا نفسى ماقدرش اقرى كلامى اللى بكتبه اساسا لانى بتخنق منه :d
وبص لحوار التنسيق ده ماتحطهوش فى دماغك خالص فى مين ياخد اعلى ومين اقل فى التنسيق
ده عادى على فكره مالهوش دعوه بالموضوع
طب ما هندسة اسيوط بتاخد اعلى فى التنسيق على ما اعتقد يعنى
ليه ياترى ؟؟
كويس انك سألتنى ليه :D
لان فى المحافظه دى فيها ناس اكتر عايزه تخش هندسه وكاتبه فى الرغبات هندسة عشان كده بيزيد مجموعها فى التنسيق
فاهم الزتونه اللى اقصدها؟؟ لأ؟ طب كويس :d
واه لازم يبقى القسم مش موجوده فيها ولازم تبقى جايب تقدير معين مش فاكر جيد ولا جيد جدا حاجه كده (انا جايب جيد ..هع ) :d
بص حوار ظابط مهندس ده انا سمعته قبل كده بس مش قادر افتكر هو كان ازاى
بس خلص الاول وبعدين تبقى تفكر فى ظابط ولا مظبطش ده مش حوارنا دلوقتى :d
وكمان اللى سمعته انه مابيسفرش

بص ياسيدى
هو فعلا طيران مالهاش شغل
اكتر شغل تلاقيه فى مدنى وميكا ودول السوق بتاعهم واسع
وده اللى مخلينى متردد اخش عماره السنه دى :(
عموما ربنا يوفقنى للى فيه الخير ( طبعا مش عايز تعرف قصة حياتى انا عارف ) :d

بص هندسة عين شمس انا شايفها افضل فى حجات كتير
انما القاهرة افضل فى حته واحده
مش هتتعب زى عين شمس
بس اعتبر ان دول 5 سنين من عمرك هتبنى عليهم مستقبلك وبعدين فكر تانى
(انا هدخل كل المنتدى ده عين شمس ان شاء الله) :d

cutie.gogo

23-07-2009, 03:03 PM

:D اول حاجة كل اللى حضرتك بتقوله ده كويس بس نفسياً مش عارفة اقراه لانى بنت والكلام موجه لواحد تانى غيرى :D
تانى حاجة ان شاء الله ربنا يوفقك وتختار اللى يناسبك مع ان قصة حياتك والحيرة دى تقريباً وصلتلى من المنتدى و الردود و كده ( دى سلبيات العولمة :d ) و محتارة من دلوقتى فى الحيرة اللى انا كمان هبقى فيها
وانا ان شاء الله كده بنسبة كبيرة هدخل عين شمس ( من اول ضحاياك فى المنتدى اهوه ;D)

KeMoZzAzZ

23-07-2009, 03:22 PM

اولا كلمة ظابط مهندس اكيييد مش هتطلع الا من ولد ده المتوقع يعنى
فانا من فطنتى توقعت انك ولد على طول (مش بحب افكر عشان التفكير بيتعبنى فكسلت ابص على الاسم ) :d
والحمد لله كده فى ضحايا

عموما انا متابع برضه المنتدى ده لحد اما الناس ترسى كده ان شاء الله
وهو التنسيق هيخلص امتى بقى؟
عشان انا تعبت من الرغى بصراحه بتاعى ده :d

BaNZeR

23-07-2009, 03:56 PM

KeMoZzAzZ

23-07-2009, 04:00 PM

انا اقصد يعنى انها هندسة اقاليم مش فاكر كانت ايه ...مايبقاش قلبك اسود كده :d
وهو حتى لو انا فى عين شمس وحبيت احول القاهره برضه لازم اكون جايب جيد جدا ؟؟؟
اه انا مش هحول بس سؤال بيطرح نفسه يعنى :d

وهو واضح ان هى اساسا شكلها مش هتخش هندسه فى الاخر :d

cutie.gogo

23-07-2009, 04:17 PM

KeMoZzAzZ

23-07-2009, 04:56 PM

لا ماتخفيش من غير ماتقولى يعنى :d
اعتقد اللى تقصديه الكترونيكس :d
وده عباره عن كوكتيل زى ماقولتى وبتجبيه من اشرف فرغلى :d
لا بجد معرفش حوار الالكترونيكس لانه مش عندى فى الجامعه
بس هو فنية عسكرية دى لو دخلتيها مش هينفع تسافرى بره البلد ها
وانا اعرف انها بتاخد اقل من الهندسه العاديه بس دى بيبقى ليها اختبارات لياقه وبتاع (ده بالنسبه للولاد)
معرفش هو فيها بنات اساسا!! اول مره اعرف
بس وفنيه عسكريه تتخرجى تاخدى مرتب وش وتشتغلى تبع الجيش عن اللى اعرفه (أنا زهقت من ال نوليدج بتاعتى الكبيره دى ) :d

BaNZeR

23-07-2009, 05:13 PM

والله فكرة انا ممكن مادخلش هندسة :d بس ايه رأيكو طيب فى سياسة و اقتصاد لو مجموعى جابها مع انى مش بحب التاريخ اوى و بحب الرياضة ده غير انى اصلاً من زمان وانا عايزة اشتغل فى NASA :D فعلاً عشان كده عجبنى قسم طيران ده عشان فيه كلمة فضاء بس دلوقتى قريت كمان عن كوكتيل كده الكتروميكانيك او حاجة كده ميكانيك مع الكترونيات اتنين فى واحد دى بردو رأيكو ايه فيها وموجودة فى جامعات ايه
وسؤال تانى بقى بردو معلش ايه حكاية فنية عسكرية او هندسة حربية نظامهم ايه يعنى
وبجد شكرا على الاهتمام والرد انا لو مكانكو ماستحملنيش :d

يعني انتي من الآخر بتفكري تدخلي الجيش :d

او حتى لو رحنا تجارة انتساب بس انا عشان بحب القانون ممكن ادخل حقوق برده مش هي حلوة ولا ايه بس بيقولو في حاجة اسمها تخطيط عمراني او فنون جميلة اصل انا بحبها اوي

في وظايف تانية عايزاها :d

بالمناسبة انتي عايزة هندسة ماشي احنا اه في هندسة

الميكاترونكس ده تبعنا اه
هي قسم خاص وبفلوس وهي اتنين في واحد اه
ميكا = ميكانيكا
لكترونكس = الكترونيات

يعني ما بين كهربا وميكانيكا
بتدرسي حاجة بين الاتنين

اما سياسة واقتصاد وعلم نفس ده مش تبعنا هنا :d

cutie.gogo

23-07-2009, 05:29 PM

:D:D ايه اللى انا بقوله ده صح ده انا جبت كل الوظايف اللى فى الدنيا بس كنت ناسية الحقوق و التجارة خالص اه ده غير بفى الالسن و ممكن بردو اداب انجلش او المانى :d :d
خلاص كفاية كده عشان شكلى هلغبط الناس :d
انا ان شاء الله ادخل هندسة و حسب المواد اللى الواحد هيشوفها و هيمشى فيها صح ولا ايه
معلش بقى انا برغى من الصبح بس اصله اصلاً نظام فاشل بعيد عنكو

sooomaaa

23-07-2009, 09:09 PM

masterpeace

23-07-2009, 09:51 PM

awlan mabrouk 3ala elnaga7
ana talb fe handeset elkahera we lessa me5als e3dady
besara7a ana ma3a elkahera we dah besabab
1- elmawdou3 mesh bese3oubet elemte7anat elmawdou3 bl dema3' lazem elwa7ed yekoun tal3 men elkesm beta3ouh beyefham we e7na 3andena fe elkolia nas gaeba emteyaz we hia dema3'ha baloooza bema3na elkelma l2naha bete7faz
2-mawdou3 elshie5 zaid dah lazez gedan (awlan ente sakna fen?) elshie5 zaid leha buses men kol 7eta we hateshterky we kolh tamam we hat2ade fe elbus dah a7la zakrayat e3dady
3- elmeza ele fe 3ien shams en feha kesm mechatronics we dah kesm el3sr dah l2nouh beyegma3 ben mechanics we electronics we dah mofeed gedan l2n eletegah delwa2ti le t2lel el3emala we ele3temad 3ala el2alat
4- elkahera kaesm 3ali gedan
a3la kolia fe masr doun mounafes
we zay mou2lt elmawdou3 mesh belexams msh 3alsahn atl3 mouhandes lazem ashel mawd we at3ak sana wala sanaten l2 dema3'y hia ele tefre2 ma3aya ba3d keda fe elsho3'l we ba3den mafesh 7ad beshta3'l now ela belcourses we elsoft skills (y3ni ezay at3amel ma3a software programmes zay eloffice we elautocad we matlab we many other things)
hewar en awel sana bel3arabe fe elkahera 3adi (ana 3ala fekra kont lo3'at fe elmadrasa) we 3ade elsa3b hwa elmoustal7at fe elawel we dah fe awel month belkter awyyyy ba3d keda 3adi laken elequations we elarkam belenglish we ele 3ayez yeketb belenglish 3ade men 7a2ouh
eldr. bardh haysal7 elwar2a
i hope u get my point and good luck
sorry for writing in franco but i am slow at arabic

BaNZeR

24-07-2009, 02:28 AM

KeMoZzAzZ

24-07-2009, 03:40 AM

والله يا cutie انا زيك كنت محتاره جداااااااا
بس صليت صلاه استخاره
وبعدها قلت هادخل عين شمس والى يحصل يحصل
طيب هى ايه مميزات عين شمس
اولا ان اعدادى انجلش فده هيساعدنا اكتر السنين الى بعد كده
لو تفتكرى فيزياء اولى ثانوى لما كانت انجلش (اكيد مش فاكره حاجه) المهم يعنى ان ده ساعدنا فى فيزياء 3
ثانيا عين شمس اقرب وده هيوفر الوقت(ده على اعتبار اننا هنذاكر)
ثالثا بقى انك ركزى وشوفى القسم الى انتى عاوزة
وانا شايفه ان اقسام حلوه كتيره موجود فى عين شمس زى اتصالات (يارب ادخلها) وحاسبات وعماره
رابعا ان الصعوبه ديه اكيد مش عيب اكيد هتفهمنا اكتر والمفروض ان مفيش حاجه صعبه لما نذاكر
متفائله اوى انا صح
اهو اسمعوا من الضحايا السابقين ليا اللى اقنعتهم بعين شمس :friendsxs3:
اصلى ياكيمو والله :d
لو فى بعد الشر يعنى بعد الشر حاجه حصلت
انا ماعرفكوش :d
awlan mabrouk 3ala elnaga7
ana talb fe handeset elkahera we lessa me5als e3dady
besara7a ana ma3a elkahera we dah besabab
1- elmawdou3 mesh bese3oubet elemte7anat elmawdou3 bl dema3' lazem elwa7ed yekoun tal3 men elkesm beta3ouh beyefham we e7na 3andena fe elkolia nas gaeba emteyaz we hia dema3'ha baloooza bema3na elkelma l2naha bete7faz
2-mawdou3 elshie5 zaid dah lazez gedan (awlan ente sakna fen?) elshie5 zaid leha buses men kol 7eta we hateshterky we kolh tamam we hat2ade fe elbus dah a7la zakrayat e3dady
3- elmeza ele fe 3ien shams en feha kesm mechatronics we dah kesm el3sr dah l2nouh beyegma3 ben mechanics we electronics we dah mofeed gedan l2n eletegah delwa2ti le t2lel el3emala we ele3temad 3ala el2alat
4- elkahera kaesm 3ali gedan
a3la kolia fe masr doun mounafes
we zay mou2lt elmawdou3 mesh belexams msh 3alsahn atl3 mouhandes lazem ashel mawd we at3ak sana wala sanaten l2 dema3'y hia ele tefre2 ma3aya ba3d keda fe elsho3'l we ba3den mafesh 7ad beshta3'l now ela belcourses we elsoft skills (y3ni ezay at3amel ma3a software programmes zay eloffice we elautocad we matlab we many other things)
hewar en awel sana bel3arabe fe elkahera 3adi (ana 3ala fekra kont lo3'at fe elmadrasa) we 3ade elsa3b hwa elmoustal7at fe elawel we dah fe awel month belkter awyyyy ba3d keda 3adi laken elequations we elarkam belenglish we ele 3ayez yeketb belenglish 3ade men 7a2ouh
eldr. bardh haysal7 elwar2a
i hope u get my point and good luck
sorry for writing in franco but i am slow at arabic
انا اكتر حاجه بكرهها فى حياتى بعد الكلام بالفرانكوا ان حد يكتب بالفرانكوا :d
معلش انا ماقرتش اللى انت كاتبه اصل بضايق اوى من الكلام باللغه دى
ده احنا عندنا فى المنتدى اللى كان يكتب بيها كنا بنعمل عليه حملة :d
يلا احنا هنعفوا عنك بس عشان انت من القاهرة وزميل لينا امرنا لله :040vk0:
بس takecare بعد كده :p

استنى ايه ده انت داخل تقنعهم بالقاهرة ولا ايه
اوباااا المنافسة هتشتد :d

masterpeace

24-07-2009, 04:59 PM

انا اسف ياجماعة بس انا بطئ جدا في العربي
بس انا ممكن اوضح الفكرة بالأنجليزي لو تحبوا؟؟

a7mad3ali

25-07-2009, 02:50 AM

انا اسف ياجماعة بس انا بطئ جدا في العربي
بس انا ممكن اوضح الفكرة بالأنجليزي لو تحبوا؟؟

ياريت لاني بصراحه زي بقيت الاخوه بحول وانا بقرا الكلام ده
وبالمناسبه انا كتبت هندسه القاهره وامرنا لله وعايز اعرف مين الزمايل اللي في القاهره
طبعا عشان ابقي اظبطه وافهمه اي حاجه هو مش فاهمها في سنته :d

KeMoZzAzZ

25-07-2009, 08:14 AM

انا اسف ياجماعة بس انا بطئ جدا في العربي
بس انا ممكن اوضح الفكرة بالأنجليزي لو تحبوا؟؟
لا خلاص امرنا لله هنقراها بقى :d
بس على فكره يعنى حاول تتعود على العربى هتلاقيه لذيذ والله
وكمان هتلاقى نفسك اسرع من الفرانكو ده بس انت اتعود عليه
انا اما اتعودت عليه لقيت انى بكتب بيه احسن من الفرانكوا وكمان بيتقرى اسرع
ياريت لاني بصراحه زي بقيت الاخوه بحول وانا بقرا الكلام ده
وبالمناسبه انا كتبت هندسه القاهره وامرنا لله وعايز اعرف مين الزمايل اللي في القاهره
طبعا عشان ابقي اظبطه وافهمه اي حاجه هو مش فاهمها في سنته :d
ايوه طبعا طبعا فاهمين :039uw8:

OusaMix

28-07-2009, 08:36 AM

انا الحمد لله جاتلى هندسة القاهرة

KeMoZzAzZ

28-07-2009, 10:13 AM

الحمد لله مبروك ;)

حلوه هندسة القاهرة اوى شد حيلك فيها ;)

eng_dero

29-07-2009, 12:52 PM

وانا جاتلى هندسه القاهرة بس شكلى كده عحوووووووووووووووووول على عين شمس خلاص

KeMoZzAzZ

29-07-2009, 02:59 PM

ليه ؟
سؤال بيطرح نفسه معلش :d

Eng . ABoOoOoD

30-07-2009, 01:00 AM

يا استاذة cutie انتي افضل حاجة بالنسبالك ادخلي طب وريحي بالك بدل الحيرة دي اة والله ولا اقولك صيدلة او بيطري زي ما قلتي

بدل وجع القلب

eng_dero

30-07-2009, 12:41 PM

لا انا قررت التحويل خلاص لانى مش عايزه اجيب امتياز وخلاص عايزة اطلع مهندسه بجد عشان اشتغل بسهوله وكمان هندسه القاهرة اعدادى عربى وبعدين انجلش يعنى لخبطه وكمان اعدادى فالشيخ زايد يعنى بعيد وانا اتحديت البيت وهدخل عين شمس رغم صعوبتها وهذاكر زى ثانوى واكتر ان شاء الله ادعووووووووووووووووووووووووولى

KeMoZzAzZ

30-07-2009, 04:40 PM

ربنا معاااكى ان شااااء الله (اشطه انا كده سبت بصمتى ) :d
نشتغل فى الاحباط بقى بعد اما تحول ويبقى مفيش مفرق :d

TheDeco

30-07-2009, 08:27 PM

انا جالي الحمد لله هندسة القاهرة
بس اللي اعرفه ان هندسة عين شمس اصعب شوية من القاهرة
و ان اغلب الناس بتفضل تخش القاهرة عن عين شمس !!!!!

eng_dero

30-07-2009, 09:40 PM

تصدقوا بالله انا تعبت من موضوع القاهرة ولا عين شمس ده وشكلى على السن واخلص ايه ده المقارنه والاختيار اصعب من بعض كل حاجه ليها ميزه واحده واكتر من عيب

KeMoZzAzZ

31-07-2009, 01:19 AM

اقدر اقولك ان عين شمس عيبها فى انها صعبه ياهدير
وماعتقدش ان ده عيب بعد اما تتخرجى ;)
ده هيبقى ميزة وميزة كبيرة كمان ;)

ومين اللى قال ان الناس بتفضل القاهرة يا حج ديكو ؟ :d
ده انا سمعت ان القاهرة بتقبل تقريبا 1000 وحاجه
وعين شمس بتقبل 2000 وحاجه
وان القاهرة اكبر من عين شمس بنص درجه بس :stickjo4:

cutie.gogo

31-07-2009, 03:12 AM

طيب معلش ممكن يابشمهندس تقولنا الموقع بتاع منتدى عين شمس يعنى ناخد فكرة بردو احنا لسة ادامنا وقت

KeMoZzAzZ

31-07-2009, 08:00 AM

بشمهندس !!
اكيد مش انا :d
عموما ماعتقدش انى ينفع اكتبه معلش عشان اكيد مش هينفع اكتب اسم منتدى تانى هنا ولا ايه
انا لو عليا عادى بس عشان ماضيقش حد ;)

a.moniem

03-08-2009, 05:21 PM

أهلا انا في هندسة القاهرة ولسة مخلص اعدادي السنة دي
أحب الأول أهني علي المجموع
بالنسبة لموضوع ان أول سنة بالعربي فدة مش مشكلة لأن ببساطة مش هتحسي بالموضوع
دة لأن الأرقام و المعادلات(equations)كل دة بالأنجليزي
ده غير انه من حقك انك تجاوبي بالأنجليزي
وده لأن الدكاترة بيسمحوا بكدة لأن ببساطة
الدكتو اللي بيصحح ما بيهموش اللغة بس بيهمه الكلام المكتوب
بالنسبة لصعوبة الدراسة و الأمتحانات بتعتمد علي الدماغ
وطبيعي ان في أول شهر هتحسي بصعوبة بسبب التغيير
الجذري ما بين مناخ و نظام المدرسة ونظام الكلية
بالنسبة لهندسة القاهرة و لا عين شمس
أنا أولا خالي دكتور في هندسة عين شمس
و هو قاللي ان عين شمس أحسن في أقسام و القاهرة أحسن في أقسام
دة غير ان في أقسام هناك مش في القاهرة وفي أقسام في القاهرة مش هناك
بالنسبة لمعاملة الدكاترة فبنسبة 90% الدكاترة بتحترم الطلبة المحترمين
اللي ماشيين صح
أتمني أكون أفدتك و أسف علي التطويل

eng_dero

03-08-2009, 06:16 PM

TheDeco

03-08-2009, 07:08 PM

انا بقول سمعت كدة مش متاكد يعني

عموما انا عن نفسي بافضل القاهرة :)

a.moniem

04-08-2009, 04:53 PM

طب سورى يا a.moniem ممكن سؤال صغير
حاليا ايه اخبار الشغل فى هندسه القاهرة فعلا عين شمس ليها الاولويه ولا وكمان هى فعلا اعدادى فالشيخ زايد
سورى طولت عليك بس مش لاقيت حد هندسه القاهرة يقول رايه كل الناس عين شمس

و لا يهمك سؤالين تلاتة لو تحبي
أولا بالنسبة لموضوع الشغل مفيش حاجة اسمها الأولوية للمهندس خريج جامعة عين شمس لأن دي
مجرد اشاعة انتشرت في البلد الغريبة اللي احنا عايشين فيها دي وفي سبب أهم وهو من الواقع اللي احنا عايشنه أنه ببساطة مفيش مهندس متخرج من القاهرة أو عين شمس أو اسكندرية ما بيشتغلش وبعدين في
حاجة مش ناس كتير تعرفها هي ان السمعة الدولية لهندسة القاهرة أحسن من أي هندسة تانية في مصر
و الدليل علي كدة ان اليابان و دول أوروبا و أمريكا بيفضلو مهندس القاهرة علي أي مهندس تاني من أي جامعة
تانية في مصر وده برضه بيرجع الي ان هندسة القاهرة أقدم هندسة من سنة 1816

ثانيا : أنا قولت قبل كدة ان خالي دكتور في هندسة عين شمس فأكيد لو كانت هندسة عين شمس أحسن أنا كنت دخلتها علي الأقل كنت هتظبط ولا ايه وبعدين خالي مقاليش ان الأولوية لعين شمس وفي حجة تانية تدل
ان القاهرة أحسن هي ان عدد المقبولين في هندسة القاهرة أقل من عدد القبولين في هندسة عين شمس

ثالثا : بالنسبة لموضوع الشخ زايد فهو سنة واحدة هي اعدادي بس وكمان في باصات للكلية بتودي لحد باب الكلية في زايد ده غير ان الحياة في زايد حامدة اخر حاجة وكمان هتبقي ليكو ذكريات جامدة جدا هناك وجميلة
أوي وأوعدك أنك هيبقي نفسك تعيطي في اخر يوم هناك

a.moniem

04-08-2009, 04:57 PM

في حاجة تانية تبين ان القاهرة أحسن
في عين شمس
قسم كهربا بيبقي التخصص فيه باور أو اتصالات أو حاسبات من سنة تالتة
لكن في القاهرة من أول سنة أولي بيبقي اما 4 سنين باور أو 4 سنين حاسبات أو 4 سنين الكترونيات واتصالات
برضه في القاهرة بيبقي اتصالات والكترونيات لكن في عين شمس اتصالات بس ومن سنة تالتة

eng_dero

04-08-2009, 05:24 PM

a.moniem

04-08-2009, 05:26 PM

ثواني بعدل رغباتي عشان القسم اللي أنا عوزه هغيره وأرجعلك

eng_dero

04-08-2009, 05:29 PM

ok
take your time

a.moniem

04-08-2009, 05:54 PM

i am back again

a.moniem

04-08-2009, 06:12 PM

ميرسى ليك بجد بس مش كنت جيت بدرى شويه

المفروض ان ميعاد تقديمى فالقاهرة كان النهارده يعنى راح عليا خلاص
وبعدين انت قولت سؤالين تلاته زى ما تحبى انت اللى قولت هه

موضوع بقه ان اعدادى عربى هل ده بياثر او بيعمل لخبطه بحيث ان الباقى انجلش يعنى ولا ايه ؟
انا فعلا متاكده ان القاهرة معترف بيها دوليا بس محليا قصدى بدايه الطريق لما نيجى نشتغل بيبقى معترف بعين شمس اكتر
المستوى التعليمى ومدى الافاده انا شايفه ان كل ما كانت صعبه زى عين شمس يعنى يستفيدوا اكتر غير القاهرة المناهج سهله وهل فعلا بتاع مقبول او جيد عين شمس بيفضلوا عن امتياز القاهرة
افتكر انك انت اللى قولت براحتك وسورى بجد انا فعلا كل صحابى فعين شمس وكل الناس فعين شمس وكل واحد منحاز لكليته فمش عارفه وانا كده كده راح عليا ميعاد التقديم هحول باذن الله يوم السبت وقبلت يبقى اوكى مقبلتش يبقى استنانى ضيفتك ان شاء الله

1موضوع ان اعدادي عربي مش هيأثر علي أي حاجة بعد كدة لأن ببساطة ملهاش أي علاقة بالدراسات اللي بعد كدة غير في قسم ميكانيكا ومدني غير كدة أثناء الدراسة بتبقي عارفة كل حاجة بالعربي و بالأنجلش و الدكاترة بيحرصوا علي كدة وبعدين الموضوع ما بيمثلش أي مشاكل

2أنا قولت أن مفيش مهندس من القاهرة أو عين شمس أو اسكندرية ما بيشتغلش والتلاتة والله العظيم فرصهم متكافئة بس اللي عايز يسافر بعد كدة القاهرة أحسن بكتير

3 مين اللي قالك ان المناهج في القاهرة سهلة علي فكرة بقي مناهج الرياضة والميكانيكا والفيزياء الكهربية بتاعتنا أقوي من أي جامعة تانية و أنا بنفسي شوفت مناهج عين شمس و حلوان وعملت المقارنة دي
وبالذات منهج الرياضة بتاع القاهرة أقوي من أي هندسة تانية

4 أكيد هستناكي كزميلة أو ضيفة ان شاء الله بس باذن الله زميلة و لو معاد تقديمك في القاهرة فات
ممكن تروحي بكرة شؤون الطلبة هناك و هما هيخلصولك الموضوع و لو احتجتي أي حاجة في الكلية
ممكن تسأليني و هجاوبك

و برضه أي كم من الأسئلة ممكن أجاوبك عليه هههههههههه
و ربنا معاكي

eng_dero

04-08-2009, 06:38 PM

ميرسى يا جميل ربنا يخليك
ومعلش عارفه انى رغايه شويه وان شاء الله لما يجيلى القرار النهائى عالقاهرة هتلاقينى زميله معاك واجى ارغى واصدعلك دماغك برده
وميرسى كمان مره

a.moniem

04-08-2009, 06:38 PM

بس انتي تيجي بس

a.moniem

04-08-2009, 06:41 PM

كمان في حاجة نسيت أقولك عليها
احنا منهج الفيزياء بتاعنا بتاع اعدادي كان
physics for scientists and engineers
بتاع
serway/jwett

eng_dero

04-08-2009, 06:49 PM

Physics for Scientists and Engineers - Serway-Beichner
http://ec1.images-amazon.com/images/P/0030209692.01._SCLZZZZZZZ_.jpg

هو ده شكله جامد بس انا عايزه اعرف انا هدخل كده مش عارفه اى حاجه فى اى حاجه ايا كانت الجامعه بقه بس اكيد لازم يكون عندى فكرة صح؟
وحاليا انا بدور بس ابدا بايه وايه اهم حاجه لازم اكون عارفاها....؟

a.moniem

04-08-2009, 06:50 PM

اللي انتي جايباها دي نسخة قديمة منه
اللي اخنا بندرسها الطبعة السابعة

a.moniem

04-08-2009, 06:51 PM

الفكرة بقي في موضوع العربي ان احنا بناخد محتوي الكتاب بالعربي و زي مقولتلك ده ما بيمثلش أي مشاكل

KeMoZzAzZ

04-08-2009, 09:13 PM

ياااااااااااه انا هيبقى ليا تعليق كبير اوى :d
بسم الله توكلت على الله :d

KeMoZzAzZ

04-08-2009, 09:28 PM

و لا يهمك سؤالين تلاتة لو تحبي
أولا بالنسبة لموضوع الشغل مفيش حاجة اسمها الأولوية للمهندس خريج جامعة عين شمس لأن دي
مجرد اشاعة انتشرت في البلد الغريبة اللي احنا عايشين فيها دي
انت متأكد من الكلام ده ؟
اصل اللى اعرفه من مهندسين بنفسهم وبيشتغلوا فى شركات كبيره انه لو فى وظيفة معينة ومحتاجين فيها مهندس بياخدوا بتاع عين شمس
غريبه .... الدنيا بقى بتتغير من يوم للتانى :d
وفي سبب أهم وهو من الواقع اللي احنا عايشنه أنه ببساطة مفيش مهندس متخرج من القاهرة أو عين شمس أو اسكندرية ما بيشتغلش
بالظبط كله بيشتغل وده اللى احنا بنقوله وانا معاك فى النقطة دى
وبعدين في
حاجة مش ناس كتير تعرفها هي ان السمعة الدولية لهندسة القاهرة أحسن من أي هندسة تانية في مصر
و الدليل علي كدة ان اليابان و دول أوروبا و أمريكا بيفضلو مهندس القاهرة علي أي مهندس تاني من أي جامعة
تانية في مصر وده برضه بيرجع الي ان هندسة القاهرة أقدم هندسة من سنة 1816
طيب وبالنسبة للدول العربية ؟؟؟
وبالنسبة لو خريج عين شمس راح هناك واخد السنة المعادلة هناك دى ؟؟
كلها اسألة بتطرح نفسها :d
اكبر فرص عمل ليك فى مصر وبعد كده البلاد العربية بعد كده تبدء تفكر فى امريكا وغيره ;)

ثانيا : أنا قولت قبل كدة ان خالي دكتور في هندسة عين شمس فأكيد لو كانت هندسة عين شمس أحسن أنا كنت دخلتها علي الأقل كنت هتظبط ولا ايه وبعدين خالي مقاليش ان الأولوية لعين شمس وفي حجة تانية تدل
اسم خال حضرتك ايه ؟ (عشان يظبطنى انا بس ) :d
ان القاهرة أحسن هي ان عدد المقبولين في هندسة القاهرة أقل من عدد القبولين في هندسة عين شمس
لا ترجملى الحته دى :d

ثالثا : بالنسبة لموضوع الشخ زايد فهو سنة واحدة هي اعدادي بس وكمان في باصات للكلية بتودي لحد باب الكلية في زايد ده غير ان الحياة في زايد حامدة اخر حاجة وكمان هتبقي ليكو ذكريات جامدة جدا هناك وجميلة
أوي وأوعدك أنك هيبقي نفسك تعيطي في اخر يوم هناك
اول سنه ليك فى اول كلية كده :p
(لازم احبطه ) :d
في حاجة تانية تبين ان القاهرة أحسن
في عين شمس
قسم كهربا بيبقي التخصص فيه باور أو اتصالات أو حاسبات من سنة تالتة
لكن في القاهرة من أول سنة أولي بيبقي اما 4 سنين باور أو 4 سنين حاسبات أو 4 سنين الكترونيات واتصالات
برضه في القاهرة بيبقي اتصالات والكترونيات لكن في عين شمس اتصالات بس ومن سنة تالتة
اشد حاجه اما تبقى مهندس
جينيرال
لان ماينفعش تبقى مهندس متخصص مثلا فى اتصالات وبس
وتيجى عشان تشتغل يقولك الحاجه دى بايظه وفى مجال كهربا يا بشمهندس تقوله لا معلش انا مش حاسبات :d
ثواني بعدل رغباتي عشان القسم اللي أنا عوزه هغيره وأرجعلك
لا خد وقتك براحتك :d
i am back again
welcome back :d
1موضوع ان اعدادي عربي مش هيأثر علي أي حاجة بعد كدة لأن ببساطة ملهاش أي علاقة بالدراسات اللي بعد كدة غير في قسم ميكانيكا ومدني غير كدة أثناء الدراسة بتبقي عارفة كل حاجة بالعربي و بالأنجلش و الدكاترة بيحرصوا علي كدة وبعدين الموضوع ما بيمثلش أي مشاكل

2أنا قولت أن مفيش مهندس من القاهرة أو عين شمس أو اسكندرية ما بيشتغلش والتلاتة والله العظيم فرصهم متكافئة بس اللي عايز يسافر بعد كدة القاهرة أحسن بكتير

3 مين اللي قالك ان المناهج في القاهرة سهلة علي فكرة بقي مناهج الرياضة والميكانيكا والفيزياء الكهربية بتاعتنا أقوي من أي جامعة تانية و أنا بنفسي شوفت مناهج عين شمس و حلوان وعملت المقارنة دي
وبالذات منهج الرياضة بتاع القاهرة أقوي من أي هندسة تانية

4 أكيد هستناكي كزميلة أو ضيفة ان شاء الله بس باذن الله زميلة و لو معاد تقديمك في القاهرة فات
ممكن تروحي بكرة شؤون الطلبة هناك و هما هيخلصولك الموضوع و لو احتجتي أي حاجة في الكلية
ممكن تسأليني و هجاوبك

و برضه أي كم من الأسئلة ممكن أجاوبك عليه هههههههههه
و ربنا معاكي
انت متأكد من موضوع الرياضه والفيزيا؟؟
يعنى سيبك ماشى الميكانيكا عندنا هى المادة الوحيدة اللى سهلة فعلا عشان الدكاترة بيدونا الزتونة فيها
وسيبك من الرياضه كمان انا هعدهالك :d
انما تيجى لحد الفيزيا ؟؟؟؟
ياراااجل ياطيب :d
مش عارف ارد عليك اقولك ايه ولا بى ولا سى :d
ده السنه اللى فاتت عدد المدبلرين 700 تقريبا واحد بس فيهم اللى مادبلرش فيزيا :d
وعدد اللى شايلين فيزيا من اللى عدوا اعتقد كان 500 تقريبا
ده من مجموع 2500 تقريبا :d
يعنى انا مش عارف اقولك ايه :d
انا كده مش هرد عليك تانى انت عصبتنى بكلمة فيزيا دى :d
كمان في حاجة نسيت أقولك عليها
احنا منهج الفيزياء بتاعنا بتاع اعدادي كان
physics for scientists and engineers
بتاع
serway/jwett
مش هرد تانى :d

بص يامنعم انت ليه بتقول ان القاهرة معتمدة؟؟؟
ماعشان هما بيستخدموا الكتب دى
وكمان فى عدد ساعات معتمدة
بس عشان كده هى معتمدة مش اكتر

eng_dero

04-08-2009, 10:59 PM

بصراحه يا كيمو احيييييك على ان ربنا يعينك على كل ده رغى
المهم دلوقتى واحده زى حالاتى تعمل ايه وكل واحد عمال يطلع بكليته السما ................؟

sooomaaa

04-08-2009, 11:10 PM

بصراحه يا كيمو احيييييك على ان ربنا يعينك على كل ده رغى
المهم دلوقتى واحده زى حالاتى تعمل ايه وكل واحد عمال يطلع بكليته السما ................؟

بصى يا هدير ريحى دماغك وصلى صلاه استخاره وربنا يوفقك
وبعدين انتى لسه بتفكرى عين شمس ولا القاهره
الناس خلاص قدمت
واريحلك ادخلى الاقرب لبيتك
وانا شايفه ان عين شمس افضل
ده طبعا لانى داخله عين شمس وكل واحد لازم يتكلم عن كليته كويس

eng_dero

04-08-2009, 11:17 PM

والله يا سومه انا المفروض ان ميعاد تقديمى كان النهارده بس مروحتش وده بسبب الحيرة اللى كنت فيها وانا كتبت القاهرة اول رغبه وجاتلى بس عشان قرايبى بره ومسافرلهم وفهمت ان القاهرة اول جامعه تطلب بره
ومكنتش اعرف اى حاجه عن عين شمسولا على مستوى التعليم فيهاولما دخلت المنتدى وعرفت هو ده اللى خلانى فى حيره وانا كده كده هستنى التحويل يوم السبت وهقدم ويا عالم لو قبل فانا عندك فعين شمس مش قبل خلاص انا فالقاهرة وده نصيب الحمد لله

KeMoZzAzZ

04-08-2009, 11:32 PM

اسمعى كلام ابلتك سوما يابنتى :d

وعادى انا رغاى بطبعى :d
على النت بس ...فى الحقيقة اساسا انا سايلنت خالص ....مش خالص للدرجادى ماتبصليش كده :slap1qk6:

BaNZeR

05-08-2009, 01:57 AM

ياااااااااااه انا هيبقى ليا تعليق كبير اوى :d
بسم الله توكلت على الله :d

حاسس ان انت قدام حمام سباحة
وبتقول يااه ده الحمام كبير اوي

وبعدين
بسم الله توكلت على الله
وتروح ناطط

ربنا يستر بقى تعرف تطلع تاني :d

دنتا عامل دعايا فل

مفيش حد هنا من الصعيد طيب نعمل معاه شغل :d

sooomaaa

05-08-2009, 02:59 AM

اسمعى كلام ابلتك سوما يابنتى :d

وعادى انا رغاى بطبعى :d
على النت بس ...فى الحقيقة اساسا انا سايلنت خالص ....مش خالص للدرجادى ماتبصليش كده :slap1qk6:
ابلتك ماشى مقبوله منك
واضح فعلا انك سايلنت خالص

KeMoZzAzZ

05-08-2009, 01:15 PM

حاسس ان انت قدام حمام سباحة
وبتقول يااه ده الحمام كبير اوي

وبعدين
بسم الله توكلت على الله
وتروح ناطط

ربنا يستر بقى تعرف تطلع تاني :d

دنتا عامل دعايا فل

مفيش حد هنا من الصعيد طيب نعمل معاه شغل :d
:d
لا ياعم ماتخفش عليا بعرف اغرق كويس :d
لا اصل انا مش هسيب حد كده يغلط فى عين شمس
لو كان اتكلم عن مراخير شمس اوكى انما عنيها لا :d
(ايه القلش الرخم ده )
:d
ابلتك ماشى مقبوله منك
واضح فعلا انك سايلنت خالص
بس سعات ببقى فيبريشن يعنى :022yb4:

وايه ياديرو حددتى ايه ؟اوعى يكون لعب فى دماغك :d

eng_dero

05-08-2009, 03:43 PM

لا يا كيمو متخافش ( هسمع كلام ابلتى حاضر يا بابا )
و انا كده كده هقدم فالتحويل يوم السبت وجت عين شمس جت مجتش فانا عالقاهرة بقه والحمد لله

sooomaaa

05-08-2009, 04:11 PM

لا يا كيمو متخافش ( هسمع كلام ابلتى حاضر يا بابا )
و انا كده كده هقدم فالتحويل يوم السبت وجت عين شمس جت مجتش فانا عالقاهرة بقه والحمد لله
ايوة يا ديرو ربنا يوفقك ان شاء الله وتحولى عين شمس
وعلى فكره اوعى تندمى على حاجه جاتلك سواء عين شمس او القاهره وحاولى تحبى الكليه والمواد علشان تقدرى تتفوقى فيها
وربنا يوفقك

eng_dero

05-08-2009, 07:37 PM

لاااااااااااااااااا
انا الكليه والدراسه ومجال الهندسه حباااااااه جدا من زمان كمان بس مش فارقه معايا دى من دى مش هزعل اوى يعنى وان شاء الله اجيلك عين شمس ونعمل عصابه عالناس دى
ووربنا يوفقنى ويوفقك يا قمر

BaNZeR

05-08-2009, 07:49 PM

ايوة يا ديرو ربنا يوفقك ان شاء الله وتحولى عين شمس
وعلى فكره اوعى تندمى على حاجه جاتلك سواء عين شمس او القاهره وحاولى تحبى الكليه والمواد علشان تقدرى تتفوقى فيها
وربنا يوفقك

لاااااااااااااااااا
انا الكليه والدراسه ومجال الهندسه حباااااااه جدا من زمان كمان بس مش فارقه معايا دى من دى مش هزعل اوى يعنى وان شاء الله اجيلك عين شمس ونعمل عصابه عالناس دى
ووربنا يوفقنى ويوفقك يا قمر

ايوه ياعم كيمو عصابتك كبرت اهه :022yb4:
وابقى هدي الفيبريشن شوية عشان الجدد ميتخضوش بس :D

a7mad3ali

05-08-2009, 07:59 PM

هو كله عين شمس ومفيش حد القاهره ولا ايه يا جدعان :(
دنا حتي صحابي حوالي 15 واحد عين شمس وولا واحد القاهره وكل ده عشان خاطر اعدادي في الشيخ زايد :angry2:
شكلي هروح الكليه هلاقي نفسي لوحدي ربنا يستر

eng_dero

05-08-2009, 08:05 PM

BaNZeR

05-08-2009, 08:24 PM

انت بتقول فيها يا احمد انا بالظبط 17 بنت من المدرسه و حوالى 10 من الدروس كلهم عين شمس ولما شزفت القاهرة لاقيته بيقولى

(يوجد واحد طالب من هذه المدرسه فى هندسه القاهرة)

كنت هكسر اللاب والله

هههههههههه
يعني من الآخر لوحدك لوحدك
في الكلية في كتير وحتتعرفي على كتير ولا يهمك

eng_dero

05-08-2009, 08:32 PM

ااااااااااااه هتعرف على كتير بس يارب يبقوا زى صحابى مش لسه هقعد انقى واحكم عليهم
ربنا يستر ويوقعنا فى ناس كويسين

KeMoZzAzZ

05-08-2009, 08:43 PM

لا سيبك انت
المهم اللاب
اشطه ابقى اجيب انا كمان اللابتوب ونلعب فيفا بقى :d
خلاص بيس يا ديرو حولى عين شمس افضلك :d

hargo

06-08-2009, 07:44 AM

ana a2olk ta3aly iskndrya as3b mn elkolyten

w saba7 elmarmata ya3ny

hahahahahahahahahahah

:p:p:p:p:p

ela7sn saly salat esta5ra

w ana mn iskandrya wala lya fi 3en shams wala elkahra

w ba2olk 3en shams a7sn mn elkahra b mra7el

KeMoZzAzZ

06-08-2009, 12:41 PM

hargo
اصلى يامعلم :d
وعلى فكره ياجدعان مش انا اللى جايبه ولا قولتله يقول والله :d

eng_dero

06-08-2009, 09:32 PM

والله بردو مش مضمون انت يا كيمو

اعترف اديتله كام بالظبط............؟

hargo

06-08-2009, 09:54 PM

wallahy ana lsa bfasel ma3 kemo 3ala elmabl3` eh ra2yk a5od kam

bs bgd ana malesh sabe2 me3rfa belbashmohnds 5ales

wana atsharf tab3an bm3rfth

hargo

06-08-2009, 09:55 PM

wallahy ana lsa bfasel ma3 kemo 3ala elmabl3` eh ra2yk a5od kam
:d:d:d:d:d:d:d

bs bgd ana malesh sabe2 me3rfa belbashmohnds 5ales

wana atsharf tab3an bm3rfth

eng_dero

06-08-2009, 10:00 PM

والله القرار قرارك يعنى على الف اتنين تلاته لو شاطر
وبالنص طبعا اوعى تنسى

eng_dero

06-08-2009, 10:05 PM

لا سيبك انت
المهم اللاب
اشطه ابقى اجيب انا كمان اللابتوب ونلعب فيفا بقى :d
خلاص بيس يا ديرو حولى عين شمس افضلك :d

بقه كده يا كيمو كل همك اللاب طب مش هجيبه معايا ومفيش فيفا يلا بقه

a.moniem

08-08-2009, 01:27 PM

عارف يا كيمو حظك اني سافرت
بس الدنيا و الأيام بتلف وبتثبت
ان هندسة القاهرة هي الأفضل
علي مر العصور
أقولك علي حاجة

كفاية ان انا فيها
ههههههههههههههههههههههههههههههههههههههه

a.moniem

08-08-2009, 03:05 PM

كيمو شفت ده
http://www.thanwya.com/vb/showthread.php?t=143041

KeMoZzAzZ

08-08-2009, 08:08 PM

شوفته ورديت فيه وقولت ان الترتيب ده على اساس ايه :p
انما الاساس اللى هو ماشى عليه الترتيب فاكيد مش معناه انها الافضل القاهرة :p

يعنى مثلا نقول فى تريتب للجامعات
بالحروف الابجدية
يبقى القاهرة وبعدين عين شمس
يبقى كده القاهرة افضل ؟ :d
اصل لو تقصد افضل يبقى لازم تعمل المقاييس اللى نقصدها من حيث الشغل وان الناس اللى طالعه فاهمه ولا لأ ...والخ
مش بعدد البحوث الانجلش اللى طالعه من الكلية :d

yasasa

15-08-2009, 12:31 AM

فورزا مطرية

fatac2

15-08-2009, 07:44 AM

هندسة قنا احسن منهم هما الاثنين (عين شمس والقاهرة)
كفاية ان فيها قسم زواحف

بكده تضمن لك مكان في الجبل بتاع المطاريد