اقسام الحاسبات و المعلومات في كل الجامعات .. هنا المختصر المفيد [الأرشيف]

مشاهدة النسخة كاملة : اقسام الحاسبات و المعلومات في كل الجامعات .. هنا المختصر المفيد

Eng. Alios

06-09-2009, 05:27 AM

السلام عليكم و رحمة الله و بركاته

أهلاً و سهلاً بيكم في قسم كلية الحاسبات و المعلومات
اجمد كلية فيكي يا مصر !!

في البداية ده موضوعنا عن اقسام الكلية
ح نشرح باختصار ايه الموجود في كل قسم و المواد برضه باختصار ...
و مستقبل كل قسم ايه و لقبك ايه ...
كل ده ح نقوله في موضوعنا ...

في البداية برضه لازم نعرف ان كلية الحاسبات و المعلومات دي كلية قمة .. و هى فعلاً اجمد كلية فيكي يا مصر !!

ملحوظة غاية الأهمية :
لو ميول حضرتك برمجة و تصميم برامج .. يبقى مكانك معانا هنا و تقدر تقرأ الموضوع ...
لو ميولك كمبيوتر كأداه ترفيهية للعب و الاغاني و كده ... انصحك بلاش تقرأ موضوعنا ده لأنه مش ح يفيدك ...
اما لو ميولك هندسية بحته ( رسم و تصميم مباني و كهربا و ميكانيكا ) يبقى عليك و على قسم كلية الهندسة الموجود في المنتدى و ربنا معاك ...

لازم علشان تقرأ موضوعنا , تبقى ميولك كمبيوتريه بحته .. مش كمبيوتريه للتسليه و خلاص ..

تعالوا نتكلم عن اقسام الكلية بتفصيل مختصر ...

أولاً : اقسام الكلية الموجودة في كل الجامعات :
أ - قسم علوم الحاسب Computer Sciences Department = CS :
القسم ده من اجمل الاقسام اللي في كلية الحاسبات و المعلومات ...

و ده لأنك ح تاخد فيه معظم لغات البرمجة الموجودة في الكمبيوتر يعني مثلاً زي ( السي و السي بلس و السي بلس بلس و الجافا و الاسيمبلي و السي شارب ... الخ الخ ... ) ..
القسم ده الرياضه فيه مش كتير قد ما البرمجه فيه اكتر ..
المواد بتاعته بتختلف من جامعة لجامعة , لكن عموماً المواد باختصار بتعلمك ازاي تترجم لغات البرامج و ازاي تدرس البنية التحتية للبرمجيات , لانك ح تبقى مصمم برمجيات او مبرمج , و المبرمج بيهتم بالبنية التحتية للبرنامج ..
كذلك بتاخد مقتطفات عن برمجة الشبكات و مواقع الانترنت ...
لكن دراستك في هذا القسم بتنصب على برمجة الحاسب ...

التخصص في هذا القسم من سنة تالتة في بعض الجامعات زي حلوان ... و في من سنة رابعة زي عين شمس ... و في حاسبات بنها مفيش غير القسم ده و بس ...

طبعاً لقبك في مصر بيبقى مبرمج او مطور و رسمياً اسمك اخصائي حاسب , في بره مصر : مهندس برمجيات ...
المستقبل في هذا القسم مشرق جداً , و شغلك ح يكون في شركات الكمبيوتر اللي في مصر ..
و يا سلام لو طلعت من العشرة الاوائل في الكلية , شركات زي مايكروسوفت و اوراكل بتاخدك تشغلك ...
- - - - - - - - - - - - - - - - - - -

ب - قسم نظم المعلومات Information Systems Department = IS :
قسم نظم المعلومات من اجمل اقسام الكلية فعلاً ...
و للعلم لا خريج من نظم معلومات الا و بيشتغل في شركات كبيرة و بمرتبات رائعة ...
طبعاً نظم المعلومات بتدرس برمجة و بعض من شبكات الانترنت و الاتصالات و بعض من مواد التسويق و ادارة الاعمال ...
طبعاً البرمجة هنا باقصد برمجة قواعد البيانات SQL ...
الا انه برضه بياخد بعض لغات البرمجة مش كلها ..
بس دراسته تنصب على قواعد البيانات ...

المواد باختصار بتتكلم عن التجارة الالكترونية , و برمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي ... بالبلدي , ازاي تتعلم تصمم برامج لادارة الشركات و البنوك ... و ازاي تخزن بيانات الشركة كلها على برنامج واحد او على موقع انترنت واحد ...

لقبك جوه مصر : اخصائي نظم او مطور او مبرمج برضه , بره مصر : مهندس معلومات , او مهندس معلوماتية ...

المستقبل هنا لا تعليق , كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر , لان الشغل هنا بيبقى احسن كمان ...

بس خد بالك , لو ليك في برمجة قواعد البيانات فعلاً , يبقى عليك و على القسم ده ...

================================================== ==========================
ثانياً : اقسام الكلية اللي مش موجوده في كل الجامعات :
أ - قسم تكنولوجيا المعلومات Information Technology Department = IT:
قسم متميز جداً , و دراسته ممتعة جداً ...

و هنا ح تلاقي اسم القسم بالانجليزي شيك ... و كمان ح تلاقي دراسته شيك
و باختصار , هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين اللي عمله ... و تتعلم برضه ازاي تبرمج مواقع الانترنت الكبيرة و ح تاخد لغات برمجة خاصة بالمجال ده زي الفي بي سكريبت و الروبي و البايثون و الجافا طبعاً ...

دراسته بجد ممتعة جداً , و القسم لا غنى عنه في اي شركة كبيرة ....
المواد باختصار بتتعلم فيها ازاي تبرمج الشبكات , ازاي تبرمج مواقع الانترنت الكبيرة , و فيها مواد اتصالات ...

اسمك مبرمج او مطور , بره مصر : مهندس شبكات

يمكن معنديش معلومات كافية عن القسم , الا ان شغلك مطلوب في اي شركة كبيرة ...
القسم ده طبعاً موجود في اغلبية كليات الحاسبات و المعلومات , مش كلها ...

ب - قسم نظم الحاسبات Computer Systems Department = CS :
هنا في القسم ده , يمكن ح تلاقي تشابه بينه و بين قسم هندسة الحاسبات اللي في كلية هندسة ..

لانك هنا ح تدرس ازاي تربط البرمجة بالهاردوير ... يعني ازاي تبرمج البروسيسور , ازاي تبرمج الهارد ...
الكلام ده بيتاخد في قسم هندسة حاسبات , الا ان قسم هندسة حاسبات نشاطه اكتر و اكتر على الهاردوير ... السوفتوير فيه قليل شوية ...
في قسم نظم الحاسبات , انت البرمجة ح تاخدها بشكل مكثف عن الهاردوير , مع العلم انك ح تاخد هاردوير لكن شوية برضه ..

المواد باختصار بتتكلم عن اساليب امان الاسبات , و البرمجة الهيكلية و المعماريات المتوازية .. الكلام ده مش ح تعرفه الا لما تدخل الكلية بنفسك و تفهمها ...

لكن عموماً القسم يدرس ربط البرمجة بالهاردوير ...

و حقيقة لا اعلم اللقب ح يبقى ايه , لكن المستقبل مشرق لانه قسم من امتع الاقسام ...
القسم موجود في جامعة عين شمس و فقط ..

جـ - قسم الحسابات العلمية Scientific Computing Department = SC :
القسم ده يمكن بيركز على الرياضيات اكتر ...
لانك هنا ح تتعلم رسم الاشكال الهندسية المعقدة بالبرمجة ...
و فيه مواد نظري برضه ..

المواد باختصار بتتكلم عن نظرية الحسابات , و كيفية الرسم بالحاسب , و دراسة الاحصاء و الاحتمالات ...

هنا معرفش برضه ح يبقى لقبك ايه
لكن ممكن تشتغل في مركز الحساب العلمي التابع للجامعة ...
و مركز الحساب العلمي ده من اهم مراكز اي جامعة في مصر ...
او ممكن تشتغل برا مصر ...

القسم بلا استثناء ممتع لان الرياضه فيه كتير ... لو بتحب الرياضة بجانب الكمبيوتر كعلم ... يبقى ادخل القسم ده ...
طبعاً القسم موجود في جامعة عين شمس و فقط ...

د - قسم العلوم الاساسية Basic Sciences Department = BS :
القسم ده بقى ح تدرس فيه اساسيات الكمبيوتر ...
اساسيات الكمبيوتر من نحية العلم ...
يعني رياضة و فيزيا .. بس كتييير ...
طبعاً بجانب المواد النظرية .....

و هنا مقدرش اقول اكتر من كده , لاني لا افقه شيء عن القسم الا قليل من المعلومات ...
القسم موجود في جامعة عين شمس و فقط ...

هـ - قسم نظم المعلومات الحيوية Bioinformatics Department :
طبعاً هنا القسم خاص ...
و معنى كلمة خاص انه بفلوس ... و فلوس كتير مش شوية ..

و ح نتكلم عنه ياما شوية :
- أولاً القسم ده بيدخله علمي علوم , بس لازم بياخد رياضة 2 في اول سنة ..
- ثانياً ممكن علمي رياضة برضه يدخله , بس ح ياخد احياء طول دراسته في القسم ده ..
- ثالثاً مصاريف القسم بتوصل لـ 12 الف جنيه في السنة و يُقال انه 18 الف جنيه في السنة ..
- رابعاً : التخصص فيه من اولى ...

هنا القسم ممتع و لذيذ في دراسته لانك بتاخد العلم الطبي و بتطبقه الكترونياً ...
هنا في القسم ده بتدرس ازاي تبرمج الشرايح الالكترونية اللي بتعالج الناس من اشد الامراض , ازاي بتدرسها و ازاي بتجربها ...
طبعاً الشرايح انواع و المواد كتيير في القسم ده ...

هنا القسم ده مش شبيه بالهندسة الطبية , لان الهندسة الطبية بتركز على صيانة المعدات الطبية .. اما هنا فانت بتتعلم ازاي تبرمج المعدات دي للتشغيل ...

اي ربط البرمجة بالطب او تقدر تسميها : البرمجة الطبية ...

القسم لذيذ جداً جداً ... فلو معاك فلوس و نفسك فيه , يبقى ادخله ...
معكش فلوس و نفسك فيه , يبقى هذا قضاء الله ...

و لو دخلته , يبقى لازم على الاقل تجيب جيد ... لانك لو شلت مادة بتدفع اكتر ...
اما عن المستقبل , فمقدرش اقول لك , كل اللي اقدر اقولهولك انك ح تبقى اكبر من اي مهندس بترول ...
اسمك مهندس معلومات طبية و ده بره مصر للأسف ..
شغلك ح يتوقف هنا على المستشفيات و المستشفيات الخاصة بالذات ... و ممكن برا مصر في اكبر مستشفيات فيكي يا اوروبا ... و مرتباتك خيالية و فوق الوصف ...
القسم موجود في جامعة عين شمس و فقط ...

و - قسم نظم المعلومات الجغرافية Geographic Information Systems = GIS :
ده بقى قسم جميل و حلو لمحبي الاتصالات ...

هنا يمكن القسم مش شبيه بهندسة اتصالات , لان اتصالات بتركز على الكهرباء ...
هنا انت بتركز على الكمبيوتر ...

هنا بتتعلم دراسة الرادار و شاشات المراقبة و الاقمار الصناعية و الكلام الكبير ده ...
طبعاً الاهتمام هنا جغرافيا على كمبيوتر ...
و ده يعتبر دراسة للاتصالات ...

هنا ح تبرمج الرادار و القمر الصناعي ...

القسم موجود في قلة قليلة من كليات الحاسبات و المعلومات , لكن عموماً انت ح تاخده كمادة في سنة رابعة ضمن قسم نظم المعلومات ...

مستقبل القسم ممتاز عموماً ... و مرتباتك فوق الوصف برضه ...

يُذكر ان القسم او يُعتقد انه في جامعة القاهرة ...
لكن حقيقة , لا اعلم الا انه موجود في بعض من الجامعات المصرية ...

ز - قسم هندسة البرمجيات Software Engineering Department = SE :
ده قسمي بقى ...

و ح نتكلم عليه كتير :
- أولاً : واضح من الاسم ان لقبك رسمياً جوه مصر او بره مصر مهندس برمجيات , لانك ح تحصل على بكالوريوس الحاسبات و المعلومات - قسم هندسة البرمجيات ..
- ثانياً : القسم ساعات معتمدة زيه زي القسم الجديد اللي في عين شمس ...
- ثالثاً : القسم موجود في جامعة حلوان و فقط ...
- رابعاً : مصاريف القسم اخفّ من مصاريف قسم عين شمس الجديد , السنة تعمل لها 7500 جنيه ...
- خامساً : التخصص فيه من اولى ..

هنا بقى الكلام ح يختلف , لانك هنا ح تاخد كل لغات البرمجة اللي في الدنيا ..
المواد هنا عبارة عن خليط من مواد علوم حاسب على نظم معلومات على بعض من تكنولوجيا المعلومات على مواد من هندسة البرمجيات اللي نازله جديد على مواد دعم و اتخاذ قرار ...

المواد كتييير , علشان كده التخصص بيبقى من اولى ...
طبعاً رغم انك ح تاخد كل لغات البرمجة اللي في الدنيا , الا انك مش ح تاخدها بكمية كبيرة , لان اهتمامك هنا ح ينصب فقط على البرمجيات ثقيلة المعيار او اللي بيسموها عالية الجودة .. بالبلدي , مش اي برامج ح تصممها ... يعني ح تعمل برامج كبيرة ..

طبعاً زائد انك مهندس , يعني لازم ح تتعلم التسويق و اتخاذ القرار و التخطيط , لان الهندسة مش رسم زي ما انت فاكر و خلاص ... الهندسة رسم و تخطيط و اقناع و تصميم و تنفيذ و اشراف ..

هنا طبعاً المستقبل مفتوح مفتوح .... لان التخصص جديد و مش موجود حتى في اي كلية هندسة .. مش موجود حتى في اي جامعة خاصة ...

طبعاً مكانتك لن تقل عن مهندس البترول ... بل اعلى من مهندس البترول ... لان شركات الكمبيوتر محتاجة التخصص ده و بشده ...
القسم موجود في جامعة حلوان و فقط ...

ح - قسم بحوث العمليات و دعم اتخاذ القرار Decision Support And Progresses Researches = DS-PR = DS :
و ده آخر قسم ح نتكلم عليه ...
طبعاً هنا يمكن ح تاخد مواد رياضية كتير و مواد فيها حفظ ... و برمجة مش كتيرة برضه ..
لكن هنا الدراسة ممتعة , لانك ح تدرس ازاي تتخذ القرار في اي عملية الكترونية , و ازاي تناقشها باسلوب علمي بحت ...

طبعاً يُقال ان هذا القسم هو القسم الوحيد اللي محتاج واسطة , لان شغلك ح يبقى في مراكز حساسه زي رئاسة الجمهورية و مجلس الوزراء و مراكز دعم اتخاذ القرار الحكومية التابعة للرئاسة ...
مراكز حساسة جداً جداً ...

لكن لو عاوز القسم ده , يبقى لازم اجتهادك في المقام الاول ... لان اجتهادك هو واسطتك بعد ربنا سبحانه و تعالى ...

القسم موجود في جامعة القاهرة و المنصورة ....

=========== الموضوع لسه ما انتهاش ===========

معلومات و نصائح هامة جداً :

بعد ما استعرضنا الاقسام الموجودة باختصار ..

نحب نزود كام حاجة كده :

1 - في بعض الجامعات التخصص بيكون من تالتة , و بعضها التخصص بيكون من رابعة ..
2 - التخصص بيكون من اولى للأقسام الخاصة و فقط ..
3 - حاسبات بنها هى الوحيدة اللي فيها قسم علوم حاسب و فقط ..
4 - شركة مايكروسوفت بتعمل كل سنة مسابقة على مستوى كليات الحاسبات اللي في الجمهورية كلها , المسابقة دي عبارة عن اختيار افضل مشروع تخرج و اسمها Imagine Cup ..
الفائز فيها بيضمن شغله في الشركة نفسها ..
5 - كل سنة بتتعمل حاجة اسمها : ملتقى التوظيف , الملتقى ده كان كل سنة بيتعمل في عين شمس و لكل طلبة حاسبات .. السنة دي ح يبقى في في عين شمس و في حلوان ..
طبعاً الملتقى ده بيحضره اكابر القوم , المحافظ و الوزير و عميد الكلية و كل الاساتذة ... و الملتقى ده بتيجي كل شركات الكمبيوتر فيه علشان تعرض ايه الوظايف المتاحة و كيفية التقدم و القبول ليها و ممكن تقوم باختيار الطلبة المتميزين للعمل بتلك الشركات ..
6 - اعرف ان في دراستك في الكلية , كل سنة لازم ح تزود نفسك بكورسات .. الكورسات دي الكلية بتجبرها عليك علشان تاخدها و هى كورسات الحصول على شهادة icdl ...
اما بالنسبة لبعض الاقسام اللي مفيهاش برمجة كتير , فالكلية بتدي كورسات اجباري في البرمجة و دي اجباري على كل الطلبة اللي داخلين اقسام مفيهاش برمجة ... طبعاً بعض الجامعات هى اللي بتعمل كده ..
7 - الاولوية في الحاسبات للمتميز و المبتكر ... يعني لازم تجيب امتياز كل سنة او جيد جداً كل سنة , بجانب طبعاً كورساتك في اللغة و البرمجة اكتر و اكتر ... كل ده ح يؤهلك للشغل بشكل اكبر .. على فكرا الاولوية للمتميز في اي كلية مش حاسبات بس ...
8 - بالنسبة لمشكلة النقابة , فالنقابة جاري تنفيذها في اول خطواتها , و هى ح تبقى نقطة التحول و هى اللي ح تدي كيان للمبرمجين في مصر ... و حالياً , يمكن الانضمام للجمعية المصرية لمهندسي البرمجيات و الجمعية دي ليها انشطة كتيرة و مفيدة ..
موقع الجمعية : www.esea-online.org (http://www.esea-online.org)
9 - الدراسة في اي كلية حاسبات بالانجليزي ما عدا مواد الانسانيات ( حقوق الانسان ) .
10 - المناهج كلها عالمية , يعني مفيش دكتور في كلية الحاسبات مألف كتاب واحد , يعني زيك زي اي طالب في امريكا و المانيا و دول العالم الاول .
11 - مشكلة انك زيك زي خريج معهد , هذه المشكلة حلها بسيط جداً .. أولاً خريج المعهد بيحصل على شهادة معادلة لشهادة كلية التجارة , فبيطلع محاسب يادوبك اتعلم ازاي يشتغل على الاكسل و الورد و الباوربوينت و كده .. لكن مالوش لا في البرمجة و لا في اي حاجة ... و حتى لو اخد كورسات , فمش ح يبقى بقوة خريج حاسبات و معلومات ...
12 - مشكلة الاولوية لهندسة الحاسبات .. طبعاً هندسة الحاسبات اكل عيشها نادر في مصر جداً , لان هندسة الحاسبات بيهتم بدراسة الهاردوير و تصنيع قطع الهاردوير ... و طبعاً مفيش مصنع في مصر بيصنع بلاستيك اصلاً .. و السعودية و الامارات قالوا نفس الكلام , قالوا ان قسم هندسة الحاسبات عندهم مش مطلوب زي قسم علوم الحاسب او قسم هندسة البرمجيات ...
فمن الناحية دي اتطمنوا , خريجي الحاسبات و المعلومات ليهم الاولوية , لان هما اصل الكمبيوتر من نحية السوفتوير , فبيدرسوا سوفتوير بتعمق اكتر من هندسة حاسبات , و مجال البرمجة مفتوح لن يغلق , و مجال البرمجة هو المطلوب في اي حته في الدنيا ..
و برضه , مهندس الحاسبات ح يبقى مكانته عالية و شغله عالي لو اشتغل في شركة محترمة جوه مصر او بره مصر ...
13 - للعلم , هندسة الحاسبات في السعودية و الامارات و دول الخليج العربي , القسم ده من ضمن اقسام كليات الحاسبات و المعلومات هناك ...
14 - كان قد عقد اجتماع في جامعة اسيوط لمناقشة تحويل تسمية قسم علوم حاسب الى قسم هندسة برمجيات مع تغيير المواد , الا ان المجلس موصلش لاتفاق لان كلية الهندسة رفضت الموضوع دا و قالت ان الهندسة للهندسة ...
لكن جامعة حلوان تغلبت على المشكلة دي , بدليل انها دخلت قسم جديد تحت مسمى هندسة البرمجيات في كلية الحاسبات و المعلومات !
15 - وزير التنمية الادارية الدكتور احمد درويش قال انه لا بطالة في مهندسي البرمجيات ... و عميد كلية حاسبات حلوان قال : لا بطالة في خريجي الكلية لدينا ...
16 - في جامعات شغالة بنظام الساعات المعتمدة زي حلوان و القاهرة ... و في عادي زي عين شمس ..
17 - ميزة الساعات المعتمدة انك ممكن تخلصها في 3 سنين و ممكن تخلصها في 4 سنين , و ممكن تخلصها في 6 سنين ... و عموماً الكلية بتظبط عدد الساعات على اربع سنين ..
18 - برضه في ميزة انك بتختار القسم اللي يريحك في نظام الساعات المعتمدة , بس لازم تجيب جيد كأقل تقدير ... اما لو جبت مقبول , فاعتقد ان الكلية ح تحكم عليك بانها هى اللي ح تختار القسم الاقل في المجموع ... الكلام دا سألت فيه جامعتي عنه ( حلوان ) ...
19 - موضوع اللاب توب , انت ح تلاقي ناس من سنة اولى جايبينه ... لكن انا بقولك هاته من اول ما تتخصص ... لان معظم مواد الحاسبات نظرية ...
20 - ممكن تجيب اللاب توب في حالة واحدة , انك لو قاعد في المدينة الجامعية و المدينة دي مفيهاش قاعة كمبيوتر ... ساعتها تقدر تجيبه من اولى علشان تعرف تذاكر عليه بعد كده ..
21 - طبعاً في كل الجامعات في انترنت لاسلكي ( واي فاي ) و بسرعة عالية ... علشان لو حبيت تنزل محاضرات قديمة او امتحانات قديمة ...
22 - اياك و الحرج من سؤال الدكتور او المعيد , اسأل الدكتور عن اي حاجة ... لكن متسألوش عن حاجة تافهة ... و متبينلوش انك غبي للدرجة يعني , علشان لو حطك في دماغه , ح تضيع ..
23 - كورسات البرمجة اللي بياخدها اي طالب من هندسة او حقوق او ... او .... , دي تعتبر ملخص للي بيدرسه طالب الحاسبات في 4 سنين ... او بمعنى آخر عبارة عن اساسيات و مصطلحات ... طالب الحاسبات بيدرس بالتفصيل الممل و بأدق المعايير ... فطبعاً , الفرق كبير ..
24 - كذلك طالب الحاسبات ممكن ياخد كورسات هاردوير , بس طبعاً مش بقوة مهندس الحاسبات ..
25 - فقط عليك في الكلية دي انك تتميز و تتفوق ... تكتر من كورساتك و تشد في مذاكرتك و تحضر على قد ما تقدر .. بإذن الله مش ح تلاقي حاجة صعبة ...

* * * * * * * * * *

هنا انتهى الموضوع ...
و انا تعبت من الكتابة ... :)

جزاكم الله كل خير
و اي استفسار انا موجود بإذن الله ...

AL_Gawad

06-09-2009, 01:44 PM

شكرا جزيلا
ممكن بس تحدد الاقسام اللى فى حاسبات الزقازيق و اذا كان فى اقسام خاصه ولا لأ
وشكرا ليك مره تانيه

Eng. Alios

06-09-2009, 02:05 PM

اقسام حاسبات الزقازيق كالآتي :

- علوم حاسب
- نظم معلومات

طبعاً , الجامعة ادخلت قسم جديد و هو ما يسمى بـ : تقنية المعلومات او تكنولوجيا المعلومات
و ده قسم خاص طبعاً , نظراً لأنه لسه جديد جوه الكلية ...
و اعتقد ان تكاليفه مش عالية و ممكن تلاقيها بسيطة ...

طبعاً القسم ده داخل ضمن مشروعات ضمان الجودة اللي نزلتها وزارة التعليم العالي ...
علشان كده هو خاص ...

جزاكم الله كل خير

eng--zako

06-09-2009, 03:37 PM

قشطة .........

ahmed abdelaziz

06-09-2009, 04:53 PM

و الله بجد انت انسان محترم جدا
و كل ما حد يحبطنى من الكلية اخش اقرا موضوع من موضوعاتك فى المنتدى هنا
و بحس انى متحمس للكلية من جديد
جزاك الله خيرا و ما شاء الله عليك عندك قدرة جامدة على الاقناع
انت فوق الفظيع d:

Eng. Alios

06-09-2009, 05:11 PM

الله يخليك و يكرمك ...

و باحمد ربنا انك اقتنعت بأجمد كلية في مصر !!

AL_Gawad

06-09-2009, 05:46 PM

شكراااااااااااااااااا جزيلااااااا على الرد
الكليه ده فعلا طلعت عالم تانى
ربنا يوفقنا جميعا

Eng. Alios

06-09-2009, 06:54 PM

العفو ... على ايه بس ؟!

و اي استفسار آخر ... انا موجود بإذن الله

جزاكم الله خيراً

amour_amour88

06-09-2009, 11:32 PM

اولا شكرا ع المجهود بس ازاي تلبقي كليه واحده ولكنها مختلفه الاقسام ف الجامعات ع وايه دا الزقازيق ما فيهاش غير قسمين بس امال فين الجامعه اللي فيها كل الاقسام وايه احلي قسم فيم كلهم

eng.ahmed55

07-09-2009, 12:33 AM

بجد موضوعك روعة يا بشمهندس مرسى على الموضوع ده

Eng. Alios

07-09-2009, 03:31 AM

اولا شكرا ع المجهود بس ازاي تلبقي كليه واحده ولكنها مختلفه الاقسام ف الجامعات ع وايه دا الزقازيق ما فيهاش غير قسمين بس امال فين الجامعه اللي فيها كل الاقسام وايه احلي قسم فيم كلهم

اولاً العفو و جزاك الله كل خير

ثانياً : الزقازيق فيها قسمين بالاضافة الي قسم خاص و اسمه تقنية المعلومات .. القسم لسه جديد و ممكن تشوفي بنفسك من موقع وزارة التعليم العالي :
http://www.heep2.edu.eg/sc/menpp_pro.html

ثالثاً : اكتر جامعة فيها اقسام كتير هيا عين شمس ... عين شمس فيها خمسة اقسام و هى كالتالي :
- علوم الحاسب
- نظم المعلومات
- نظم الحاسبات
- الحسابات العلمية
- العلوم الاساسية

بالاضافة الي قسم خاص و هو اسمه نظم المعلومات الحيوية ...

و دي اقسام كل كليات الحاسبات اللي في الجمهورية :

عين شمس : علوم حاسب - نظم معلومات - نظم حاسبات - حسابات علمية - علوم اساسية - نظم معلومات حيوية
القاهرة : علوم حاسب - نظم معلومات - تكنولوجيا معلومات - بحوث عمليات و دعم اتخاذ قرار
حلوان : علوم حاسب - نظم معلومات - تكنولوجيا معلومات بالاضافة الي قسم خاص و هو هندسة البرمجيات
اسيوط : علوم حاسب - نظم معلومات - تكنولوجيا معلومات
المنيا : علوم حاسب - نظم معلومات - تكنولوجيا معلومات - بحوث عمليات و دعم اتخاذ قرار
المنصورة : علوم حاسب - نظم معلومات - تكنولوجيا معلومات - بحوث عمليات و دعم اتخاذ قرار
الفيوم : علوم حاسب - نظم معلومات - علوم اساسية
بنها : علوم حاسب
المنوفية : علوم حاسب - تكنولوجيا معلومات
الزقازيق : علوم حاسب - نظم معلومات - بالاضافة الي قسم خاص و هو تكنولوجيا المعلومات
الاسماعيلية ( تبع لجامعة قناة السويس ) : علوم حاسب - نظم معلومات - علوم اساسية

طبعاً مفيش حاسبات في اسكندرية و لا في طنطا و لا في كفر الشيخ و لا في سوهاج و لا قنا و لا اسوان و لا الاقصر و لا الحاجات دي خالص ...

بس حالياً بيُناقش موضوع انشاء كلية الحاسبات و المعلومات بالاسكندرية ...
------

اما بالنسبة ليك يا ahmed_va16 فجزاك الله كل خير على ردك الجميل ...

Eng. Alios

07-09-2009, 03:32 AM

بالنسبة لقسم نظم المعلومات الجغرافية فده مش عارف في اي جامعة ... لكن يُقال انه في القاهرة ...

amour_amour88

07-09-2009, 03:47 AM

ايه الاقسام الكتيره دي انا اتعقدت مش فاهم اي حاجه يا تري بعد لما اروح الكليه حأفهم ولا.............

ربنا يستر ويسهل

Eng. Alios

07-09-2009, 04:15 AM

اتعقدت من ايه ؟

اذا كان قصدك على الموقع اللي اديتهولك ... فده عبارة عن كل الاقسام الخاصة اللي نزلت كل الكليات بكل الجامعات المصرية ...

و اذا كان قصدك على اقسام كلية الحاسبات , فانا اديتك اسماء الاقسام في كل كليات الحاسبات اللي في الجمهورية ...

كل ده و متعقد ؟؟

ananoo

07-09-2009, 07:13 AM

جزاك الله خيرا على الموضع الاكتر من رائع

جعله الله في ميزان حسناتك

amour_amour88

07-09-2009, 06:03 PM

متعقد علشان انا مش فاهم الاقسام دي بتتكلم عن ايه ولا حتي هي ايه

بنت شبابيك

08-09-2009, 10:44 PM

بجد ميرسى على الموضوع الجااااااااااااااااااااااامد موت ده بجد بيدى الواحد امل انه ممكن يكون حاجة كويسة اما عن حكاية المسميات بره و جوه مصر مش عارف ليه كليتنا بره رقم 1 وهنا فى ناس متعرفش اصلا الكلية و يفكروها معهد او كلية ضعيفة ********يلا ربنا يسترها و تبقى كلية جامدة لينا كلنا ويارب نكون حاجة كويسة ان شاء الله

E/GOGO

09-09-2009, 04:22 AM

بجد جزاك الله خير
وبشكرك كتيييييييييييييييييير
على التوضيح
وعملك الرائع فى قسم كليتنا
والف شكر

eng.ahmed55

10-09-2009, 10:47 PM

منتظرين المزيد ان شاء الله

ahmed yay

11-09-2009, 01:36 AM

السلام عليكم.
انا الصراحه الكليه دى اموت وادخلها وانا بحب االكمبيوتر جدا وانا لسه رايح تالته وجايب فى تانيه 97% يعنى ان شاء الله ممكن ادخلها بسهوله ولكن انا اعرف ان الكمبيوتر بيحتاج انك تاخد فيه كورسات ودورات وحاجات زى كده بره طبعا غير اللى بتدرسه فى الكليه ودى بيكون تمنها غالى يعنى فيه 10او20او30الف واكتر او اقل وكمان لازم تشترى لاب توب وحاجات تانيه كتير وانا الصراحه الحاله الماديه لا تسمح بذلك وانا ان لم ادخل هذه الكليه مش عارف ادخل ايه بالظبط لانى بحب الكمبيوتر بجنون لدرجة انو احيانا بيعطلنى عن المذاكره ولكن المشكله اللى قولتها هى اللى مخوفانى من انى ادخل الكليه دى فهل فيه حل للمشكله دى او انتو رايكم ايه.

amour_amour88

11-09-2009, 04:09 AM

اصبر شويه وحانقولك رأينا علشان احنا لسه داخلين ومنعرفش حاجه والمبالغ دي كبيره جدا اعتقد ما توصلش الارقام دي لان الدورات ما تتعداش 500 جنيه

Eng. Alios

11-09-2009, 04:11 AM

أولاً اشكر كل من رد على الموضوع ... جزاكم الله كل خير

ثانياً بالنسبة للأخ ahmed yay ...
بص يا عم أحمد ...

أولاً : الف مبروك على مجموعك في تانية ثانوي .... ربنا يوفقك كمان و كمان ....
ثانياً : واضح من كلامك انك داخل علمي رياضة ...
ثالثاً : نيجي بقى لمشكلتك الاساسية ...

الكمبيوتر هوا اساس المستقبل , بل اساس الحاضر اللي احنا عايشين فيه ...
و حبك للكمبيوتر انجاز عظيم في حد ذاته ....

طبعاً انت لو بتحب الكمبيوتر بشغف زي ما بتقول , و بتمووت فيه ... يبقى ادخل كلية حاسبات و معلومات ...
بس لازم تعرف ان الكمبيوتر مجالين هاردوير و سوفتوير ...

كلية الحاسبات و المعلومات سوفتوير يعني ازاي تعمل برامج على الكمبيوتر , بل ازاي تبرمج اي حاجة في الكمبيوتر من الابرة للصاروخ ...
اما الهاردوير فعليك و على كلية الهندسة - قسم كهرباء الحاسبات , او قسم الحاسبات ... طبعاً لازم تعرف ان القسمين اللي في هندسة دول بيفرقوا في المسمى الوظيفي ... يعني في قسم كهرباء الحاسبات بتطلع مهندس كهرباء - قسم حاسبات , وهو قسم عام يتبع التنسيق الداخلي لكلية الهندسة بناءاً على تقديرك في اعدادي هندسة ... اما قسم الحاسبات فهو قسم خاص و بفلوس و بتطلع مهندس حاسبات مش مهندس كهرباء بقى ... و القسمين بيهتموا بالهاردوير يعني صيانة الكمبيوتر و تصنيع مكوناته ...

من كلامك واضح انك ح تقل السنة دي ... لان الكمبيوتر واكل تفكيرك و عقلك ...
و ده قمة قمة قمة الغلط ...

حب مذاكرتك و دراستك قبل اي حاجة تانية ... لازم تذاكر و تتميز و تنجح بمجموع عالي علشان تدخل اللي يريحك بعد كدا ...
و على ميولك الكمبيوترية لازم تذاكر علشان تدخل كليتك على ميولك ....

لانك لو مذاكرتش و مدخلتش الكلية دي , يبقى تفتكر نفسك على طول في علوم او تجارة او حقوق او ... او ....

بس بجد اهنيك على حبك للكمبيوتر , بس لازم تحدد حبك في انهي اتجاه برضه هاردوير و لا سوفتوير ...
طبعاً انت عندك تعريف باقسام الكلية زي ما انت شايف في الموضوع .... ده برضه ح يسهل عليك و يبقى عندك خلفية عن الكلية ...

بالنسبة بقى لموضوع الكورسات ...
الكورسات طبعاً عمر ما سعرها وصل لعشرة آلاف حتى .... اقصى كورس ممكن تاخده دلوقتي بتلاتة آلاف ... اربعة آلاف بالكتيير ... انما عشرة آلاف صعبة شوية ....
بس في الاول و الآخر الله اعلم يمكن تلاقي كورسات بالاسعار اللي انت بتقول عليها ...

لكن الكورسات دي ح تبقى لازمة في دراستك بل ضرورية جداً ...

أولاً : عليك كورس اساسي لازم تاخده و هوا كورس الحصول على شهادة icdl ... طبعاً الكورس ده كل الكليات بتاخده ... علشان ده باب مفتوح لفرص الشغل ...

ثانياً : لو ربنا كرمك و دخلت كلية الحاسبات , يبقى لازم تعرف ان اي قسم ح تدخله في الكلية دي لازم له كورسات .. فمثلاً قسم هندسة البرمجيات اللي في حلوان ده لازم و حتماً ح تاخد كورسات برمجة , لان مهندس البرمجيات رغم ان اسمه مهندس برمجيات يعني ابو البرمجيات , لكنه مش ح يدرس برمجة كتييير قد ما ح يدرس شبكات و نظم و دعم اتخاذ قرار كتيير ... فلازم ح ياخد كورسات برمجة علشان يبقى مهندس برمجيات صح ... يبقى مبرمج و مهندس برمجيات ...

الكلام دا مش للقسم دا بس ... الكلام دا عموماً في اي قسم ...

زائد بقى انك لازم ح تاخد كورسات في الانجليزي .... و يا سلاااام بقى لو اخدت كورسات في اي لغة تانية بجانب الانجليزي ... لانه دلوقتي كتير من الشركات بتبقى طالبة لغات تانية ... الانجليزي كله بياخدوا , و الشركات مش عايزة كله ... الشركات عايزة المتميز المتفوق ... و المتميز ده هوا اللي بيكتر من كورسات اللغات و الكمبيوتر ....

طبعاً انا خلصت كلامي , بس قبل ما اخلص خالص لازم اقول لك : لازم لازم لازم لازم لازم لازم لازم تذاكر ... و تنجح و تتفوق و حط مليار خط تحت تتفوق دي ...

و لو جات لك الكلية ان شاء الله .... لااااااااااااااااااااااااااااااااازم تتميز تتميز تتميز تتميز تتميز ... و اوعى اي حاجة توقفك عن مذاكرتك ... اوعى ...

اي استفسار انا موجود و ايميلي اهو لو عاوز تستفسر عن اي حاجة ان شاء الله اقدر افيدك : in_metal_i_live على الهوتميل ...

و ربنا يوفقك و يكرمك ان شاء الله

ahmed yay

11-09-2009, 02:13 PM

أولاً اشكر كل من رد على الموضوع ... جزاكم الله كل خير

ثانياً بالنسبة للأخ ahmed yay ...
بص يا عم أحمد ...

أولاً : الف مبروك على مجموعك في تانية ثانوي .... ربنا يوفقك كمان و كمان ....
ثانياً : واضح من كلامك انك داخل علمي رياضة ...
ثالثاً : نيجي بقى لمشكلتك الاساسية ...

الكمبيوتر هوا اساس المستقبل , بل اساس الحاضر اللي احنا عايشين فيه ...
و حبك للكمبيوتر انجاز عظيم في حد ذاته ....

طبعاً انت لو بتحب الكمبيوتر بشغف زي ما بتقول , و بتمووت فيه ... يبقى ادخل كلية حاسبات و معلومات ...
بس لازم تعرف ان الكمبيوتر مجالين هاردوير و سوفتوير ...

كلية الحاسبات و المعلومات سوفتوير يعني ازاي تعمل برامج على الكمبيوتر , بل ازاي تبرمج اي حاجة في الكمبيوتر من الابرة للصاروخ ...
اما الهاردوير فعليك و على كلية الهندسة - قسم كهرباء الحاسبات , او قسم الحاسبات ... طبعاً لازم تعرف ان القسمين اللي في هندسة دول بيفرقوا في المسمى الوظيفي ... يعني في قسم كهرباء الحاسبات بتطلع مهندس كهرباء - قسم حاسبات , وهو قسم عام يتبع التنسيق الداخلي لكلية الهندسة بناءاً على تقديرك في اعدادي هندسة ... اما قسم الحاسبات فهو قسم خاص و بفلوس و بتطلع مهندس حاسبات مش مهندس كهرباء بقى ... و القسمين بيهتموا بالهاردوير يعني صيانة الكمبيوتر و تصنيع مكوناته ...

من كلامك واضح انك ح تقل السنة دي ... لان الكمبيوتر واكل تفكيرك و عقلك ...
و ده قمة قمة قمة الغلط ...

حب مذاكرتك و دراستك قبل اي حاجة تانية ... لازم تذاكر و تتميز و تنجح بمجموع عالي علشان تدخل اللي يريحك بعد كدا ...
و على ميولك الكمبيوترية لازم تذاكر علشان تدخل كليتك على ميولك ....

لانك لو مذاكرتش و مدخلتش الكلية دي , يبقى تفتكر نفسك على طول في علوم او تجارة او حقوق او ... او ....

بس بجد اهنيك على حبك للكمبيوتر , بس لازم تحدد حبك في انهي اتجاه برضه هاردوير و لا سوفتوير ...
طبعاً انت عندك تعريف باقسام الكلية زي ما انت شايف في الموضوع .... ده برضه ح يسهل عليك و يبقى عندك خلفية عن الكلية ...

بالنسبة بقى لموضوع الكورسات ...
الكورسات طبعاً عمر ما سعرها وصل لعشرة آلاف حتى .... اقصى كورس ممكن تاخده دلوقتي بتلاتة آلاف ... اربعة آلاف بالكتيير ... انما عشرة آلاف صعبة شوية ....
بس في الاول و الآخر الله اعلم يمكن تلاقي كورسات بالاسعار اللي انت بتقول عليها ...

لكن الكورسات دي ح تبقى لازمة في دراستك بل ضرورية جداً ...

أولاً : عليك كورس اساسي لازم تاخده و هوا كورس الحصول على شهادة icdl ... طبعاً الكورس ده كل الكليات بتاخده ... علشان ده باب مفتوح لفرص الشغل ...

ثانياً : لو ربنا كرمك و دخلت كلية الحاسبات , يبقى لازم تعرف ان اي قسم ح تدخله في الكلية دي لازم له كورسات .. فمثلاً قسم هندسة البرمجيات اللي في حلوان ده لازم و حتماً ح تاخد كورسات برمجة , لان مهندس البرمجيات رغم ان اسمه مهندس برمجيات يعني ابو البرمجيات , لكنه مش ح يدرس برمجة كتييير قد ما ح يدرس شبكات و نظم و دعم اتخاذ قرار كتيير ... فلازم ح ياخد كورسات برمجة علشان يبقى مهندس برمجيات صح ... يبقى مبرمج و مهندس برمجيات ...

الكلام دا مش للقسم دا بس ... الكلام دا عموماً في اي قسم ...

زائد بقى انك لازم ح تاخد كورسات في الانجليزي .... و يا سلاااام بقى لو اخدت كورسات في اي لغة تانية بجانب الانجليزي ... لانه دلوقتي كتير من الشركات بتبقى طالبة لغات تانية ... الانجليزي كله بياخدوا , و الشركات مش عايزة كله ... الشركات عايزة المتميز المتفوق ... و المتميز ده هوا اللي بيكتر من كورسات اللغات و الكمبيوتر ....

طبعاً انا خلصت كلامي , بس قبل ما اخلص خالص لازم اقول لك : لازم لازم لازم لازم لازم لازم لازم تذاكر ... و تنجح و تتفوق و حط مليار خط تحت تتفوق دي ...

و لو جات لك الكلية ان شاء الله .... لااااااااااااااااااااااااااااااااازم تتميز تتميز تتميز تتميز تتميز ... و اوعى اي حاجة توقفك عن مذاكرتك ... اوعى ...

اي استفسار انا موجود و ايميلي اهو لو عاوز تستفسر عن اي حاجة ان شاء الله اقدر افيدك : In_metal_i_live على الهوتميل ...

و ربنا يوفقك و يكرمك ان شاء الله
السلام عليكم.
والله انا مش عارف اقولك ايه شكرا خالص على الرد الوافى والتشجيع والنصايح الغاليه جدا والله وانا ان شاء الله هاتفوق وهاذاكر كويس باذن الله ومش هاخلى الكمبيوتر يعطلنى عن المذاكره وانا بحب السوفت وير يعنى حاسبات باذن الله.
وشكرا.

eng.ahmed55

11-09-2009, 04:12 PM

السلام عليكم.
والله انا مش عارف اقولك ايه شكرا خالص على الرد الوافى والتشجيع والنصايح الغاليه جدا والله وانا ان شاء الله هاتفوق وهاذاكر كويس باذن الله ومش هاخلى الكمبيوتر يعطلنى عن المذاكره وانا بحب السوفت وير يعنى حاسبات باذن الله.
وشكرا.

ربنا ان شاء الله هيوفقك وعلى راى المثل اسعى ياعبد وانا اسعى معاك
وبتمنالك من كل قلبى دوام السعادة والنجاح والتفوق

ahmed yay

11-09-2009, 04:51 PM

ربنا ان شاء الله هيوفقك وعلى راى المثل اسعى ياعبد وانا اسعى معاك
وبتمنالك من كل قلبى دوام السعادة والنجاح والتفوق
السلام عليكم.
ربنا يخليك ويبارك فيك واسال الله لنا ولكم النجاح والتفوق.

ahmed abobakr

12-09-2009, 04:15 PM

شكرا على المعلومات الرائعة دى انا رايح تانية القاهرة ان شاء الله ...

احمدبردة

14-09-2009, 02:19 AM

شكرااا بس ممكن اسالك امتى اخد قرصات من اول الدراسة و لا ايه

Eng. Alios

14-09-2009, 02:39 AM

و الله لو أنت مستعد تاخدها من اول الدراسة , يبقى تاخد الأول كورس انجليزي ...

انما بقية الكورسات ان شاء الله لما تخلص اولى , لان الكلية ح تجبر عليك تاخد كورسات icdl و برمجة ...

و الله أعلم برضه ...

el saher dodo

14-09-2009, 09:47 AM

el saher dodo

14-09-2009, 09:54 AM

علفكرة انا لسة قارىء الموضوع
وبجد موضوع هاااااااااااايل جدااااا
وستفدت منه جدااااااا شكرا ع المعلومات دى

Eng. Alios

15-09-2009, 11:23 AM

السلام عليكم

انا حبيت بس اشارك برأيى يمكن يفيد البعض

بالنسبة للكورسات

انا من رأية تاخد icdl قبل ما السنة تخلص يعنى تاخدها وانت بتتدرس

لانها هتفيد اووووى ولو كنت اخدتها قبل الدراسة كان هايبقى احسن

لان ف الكليات بيبدأوا طبعا بالحاجات الاساسية ف الكمبيوتر فبالتالى بيشرحوا ال icdl

ارجوا انك نكون فهمت قصدى

شكرا

ما هو ده اللي اقصده .. انك تبدي تخلص نفسك و انت بتدرس ...
بل تكتر من الكورسات دي كمان ..

علفكرة انا لسة قارىء الموضوع
وبجد موضوع هاااااااااااايل جدااااا
وستفدت منه جدااااااا شكرا ع المعلومات دى

العفو ... جزاك الله كل خير

Eng. Alios

15-09-2009, 11:37 AM

شكرا على المعلومات الرائعة دى انا رايح تانية القاهرة ان شاء الله ...

العفو على ايه ؟

ان شاء الله ربنا يوفقك ...

و لو في معلومات جديدة ح احطها في الموضوع بإذن الله

Ahmed Saleh2

15-09-2009, 11:43 AM

المنتدى الرسمى لجامعة الزقازيق

www.zagtalaba.beetna.net (http://www.zagtalaba.beetna.net/)

romio2010445566

15-09-2009, 12:46 PM

شكرا و منكم نستفيد

هبة الشرق

29-09-2009, 11:25 AM

شكرا على المعلومات
ولكن ايه رايك فى المعاهد الخاصه والمواد الدرسيه المقرار لانى دخله السنه دى
ودى المواد المقرار

احمد بووجا

29-09-2009, 06:48 PM

السلام عليكم و رحمة الله و بركاته

أهلاً و سهلاً بيكم في قسم كلية الحاسبات و المعلومات
اجمد كلية فيكي يا مصر !!

ز - قسم هندسة البرمجيات software engineering department = se :
ده قسمي بقى ...

و ح نتكلم عليه كتير :
- أولاً : واضح من الاسم ان لقبك رسمياً جوه مصر او بره مصر مهندس برمجيات , لانك ح تحصل على بكالوريوس الحاسبات و المعلومات - قسم هندسة البرمجيات ..
- ثانياً : القسم ساعات معتمدة زيه زي القسم الجديد اللي في عين شمس ...
- ثالثاً : القسم موجود في جامعة حلوان و فقط ...
- رابعاً : مصاريف القسم اخفّ من مصاريف قسم عين شمس الجديد , السنة تعمل لها 7500 جنيه ...
- خامساً : التخصص فيه من اولى ..

هنا بقى الكلام ح يختلف , لانك هنا ح تاخد كل لغات البرمجة اللي في الدنيا ..
المواد هنا عبارة عن خليط من مواد علوم حاسب على نظم معلومات على بعض من تكنولوجيا المعلومات على مواد من هندسة البرمجيات اللي نازله جديد على مواد دعم و اتخاذ قرار ...

المواد كتييير , علشان كده التخصص بيبقى من اولى ...
طبعاً رغم انك ح تاخد كل لغات البرمجة اللي في الدنيا , الا انك مش ح تاخدها بكمية كبيرة , لان اهتمامك هنا ح ينصب فقط على البرمجيات ثقيلة المعيار او اللي بيسموها عالية الجودة .. بالبلدي , مش اي برامج ح تصممها ... يعني ح تعمل برامج كبيرة ..

طبعاً زائد انك مهندس , يعني لازم ح تتعلم التسويق و اتخاذ القرار و التخطيط , لان الهندسة مش رسم زي ما انت فاكر و خلاص ... الهندسة رسم و تخطيط و اقناع و تصميم و تنفيذ و اشراف ..

هنا طبعاً المستقبل مفتوح مفتوح .... لان التخصص جديد و مش موجود حتى في اي كلية هندسة .. مش موجود حتى في اي جامعة خاصة ...

طبعاً مكانتك لن تقل عن مهندس البترول ... بل اعلى من مهندس البترول ... لان شركات الكمبيوتر محتاجة التخصص ده و بشده ...
القسم موجود في جامعة حلوان و فقط ...

شكراااااااااااااااااااااااااااااااااا ليك بجد يا بشمهندس على المعلومات الجميله جدا دى وبجد انا استفدت كتير منها لانى مكنتش عارف حاجات كتير عن الاقسام دى بس ربنا يخليك قدرت تعرفها لكل واحد بس انا عندى لستفسار بسيط هو ان فى قسم هندسه البرمجيات انا سمعت ان ممكن التخصص فيه يبقى من 2 او 3 يعنى مش لازم من اولى وممكن نخصم ثمن المواد اللى اخدناها قبل كده فياريت لو تفضلت تقولى اذا كانت المعلومات دى صحيحه ولا لا وشكرااااااااااااااااااااااااااا

salooma992

04-10-2009, 07:37 PM

The topic is really great
Super...
God Bless You for this useful info.
Thank you...

shady.fci

05-10-2009, 12:39 AM

شكرا على المعلومات
ولكن ايه رايك فى المعاهد الخاصه والمواد الدرسيه المقرار لانى دخله السنه دى
ودى المواد المقرار

على فكرة مش دى المواد اللى بندرسها فى الكليه....:romarioxp6:
دى تقريبا كده مواد نظم ومعولومات اللى هيا زى تجارة مش زى حاسبات خالص

المعاهد الخاصى بتبقى معادلة زى الحكومة بس المعاهد اللى بتقبل علمى رياضة بس

زائر غير مسجل

28-02-2010, 01:19 AM

من فضلكم كنت عايزة اعرف لوحدخريج معهد الجزيرةقسمنظممعلوماتعشان يطورمننفسةيعمل ايةوياخدكورسات اية فمجال نظمالمعلومات وكمان كورسات فالمجال الاكثرطلبا ف الشركاتحاليا

manofwow

15-05-2010, 03:48 PM

سلام عليكم

انا كنت عايز استفسر عن حاجة

انا ان شاء الله حاخلص بعد شهر ومحتار بين حاسبات خاص وصيدلة خاص

طبعا انا علمى علوم

انا بصراحة لما قريت ارتحت نفسيا واحترت برضوه علشان كل المجالات جبارة جدا

واقتنعت بحاسبات ف ايه رأيكم

وممكن تقولوا لى افضل الجامعات الخاصة والاقسام المتاحة ان امكن اكون شاكر ليكم جدا

تحياتى

ALaa M G

20-06-2010, 02:11 PM

thxxxxxxxxxxxxxx

n4pst3r

24-07-2010, 03:26 PM

مشكوووووووووووور على الافادة

eng.tito

30-11-2010, 11:34 AM

حد ياجماااعة يفيدني بالقسم الخاص اللي في عين شمس لأني ناوي احول ليه ؟؟ ممكن ؟؟

dody_2_20000

03-01-2011, 06:46 AM

هية بتقبل من كام % و عايز الياهو لو عندك

احمد زه

16-05-2011, 11:13 AM

طيب دلوقتى حاسبات و معلومات مصر الدوليه فيها 3 اقسام
1- Computer Science (CS)
2- Information System (IS)
3- Software Engineering. (SE)

هل هندسه البرمجيات الى فيها ده زى الى فى حلوان و لا مختلف ؟؟؟

mkah21

16-05-2011, 04:20 PM

جميل بجد يا اخى الكريم
انا سبت شغلى لمدة نث ساعه عشان اقرى الموضوع الجميل دة
شكرا ليك وشكرا لتعبك
وبجد انت شرحتلى حاجة انا نفسى وادرسها وابقى فرد من الخرجين فيها
وربنا يكرمنى انا بحاول اقدم فى الجامعة المصرية للتعليم الالكترونى كلية الحاسبات
والله المستعان
دة غير انى فى دبولمة جامعه حلوان كلية الحاسبات

cg man

20-05-2011, 01:04 AM

ربنا معاكم واضح انه صعب بس اكيد احسن حاجة للى بيحبه

hesseny_aswany

01-08-2011, 05:51 AM

thaaaaaaaaaaaaaaaaaaaaaanks

صابر مسعد

07-08-2011, 01:09 PM

اقسام هندسة المنصوره

محمد البية

10-08-2011, 11:59 PM

ممكن تتكلم عن اقسام حاسبات الاسماعلية

badnamef4

11-08-2011, 12:16 AM

يا جماعة لو الكلام اللي في الموضوع ده صحيح 100% فأنا بطلب من الإدارة إنها تثبته لأن الطلبة محتاجاه جداً خاصة في الوقت ده
السلام عليكم و رحمة الله و بركاته

komalo

12-08-2011, 06:37 AM

انت برنـــــــــــــــــــــــــــــــــــــــــــــــ ـــــــــــــــــــــــــــــــــــــــــس, والله مفيش زيك :d

يا ريت فعلاً الموضوع بتثبت زى ما بيقول badnamef4 .... لأن بجد فى ناس مش عارفة الاقسام او أى معلومات عن الكلية و الشرح وافى و كافى و زى الفل

جزاك الله كل خير بصراحة

اروى السيد12

13-08-2011, 09:47 PM

يا جماعة انا مجتنيش هندسة على 1% وجاتنى حاسبات..... فى ناس كتير بتقولى سبيها انتى هتشتغلى في سيبر ودى مش شغلانة بنت اصلا وبيقولولى احول علوم بس انا مش بحب علوم ......... انا هستانا فى حاسبات دى اخر قرار انا قررته بس عاوزة حد يقولى هشتغل اة وفين وهتكون مكانتى بين الناس اة واه القسم الى ادخلة ويكون كويس ليا ؟؟؟؟؟؟؟؟؟؟؟؟؟؟؟؟؟؟؟؟

Altair4ever

15-08-2011, 11:54 AM

انت برنس وربنا شكرا على الموضوع التحفة ده بش كان عندى استفسار انا داخل اكادمية قسم علوم حاسب فهل الكلام الى انت كاتبه ينطبق عليا ؟

zamalek10tv

16-08-2011, 03:11 PM

ياريت تقوزلى معلومات عن القسمين دول لانهم موجودين فى الشروق
شعبة الإدارة والمحاسبة
شعبة نظم المعلومات الإدارية

abuhashim

16-08-2011, 09:05 PM

بشكر كاتب الموضوع الي مجهودة، لكن الحقيقة الكلام أغلبه غير صحيح بالمرة.

و كمان أغلب المعلومات الموجودة علي المنتدي عن كليات الحاسبات و دراستها و طبيعة شغلها غير صحيحة! الحقيقة مش عارف جايبين الكلام من فين!

نصيحة أخويه حاولوا تدوروا علي منتديات أو جروبات لطلبة الكلية و الخريجين القدام عشان تقدروا تاخدوا معلومات دقيقة و موثقة عنها.

badnamef4

17-08-2011, 11:12 AM

أستاذ أبو هاشم بعد إذن حضرتك ممكن تعمل موضوع فيه معلوماتك عن الأقسام؟
و شكراً مقدماً
السلام عليكم و رحمة الله و بركاته

MohamedHigazy

31-08-2011, 08:14 AM

على فكره انا فى معهد حاسبات وبدرس نفس دراسه حاسبات ومعلومات والبكالوريس بتعى معادل ببكالوريس حاسبات ومعلومات مش تجارة زى ما الاخ بيقول انتم وخدين فكره وحشه اوى عن المعاهد طب ما المعاهد زى الكليات نفس الشهاده وتخدها من مكان واحد اللى هو المجلس الاعلى للجامعات اللى بتقول عليهم دول بتوع نظم معلومات اداريه دول بكالوريس تجارة ومش بيخدو برمجه خلاص لكن احنا فى علوم حاسب بناخد من رياضه واخد لحد 4 وفيزياء وتراكيب محدده وتصميم منطقى وبرمجه شيئه وهندسه برمجيات وذكاء اصطناعى الخ الخ ... يعنى فى الاخر احنا حاسبات برضه ... شكرا

Eng.Mo'men

03-09-2011, 06:47 PM

مشكووووووووووووووووووووووووووووووووور جدا

mohamedsary

04-09-2011, 10:50 PM

من فضلك يا بشمهندس كون انى اول سنة انشاء اللة اخد كورسات حاليا ولا لما ندخل الكلية وتبدا الدراسة ارجو الرد

Ahmed Mofeed

15-06-2012, 03:31 PM

يارب يوعدنى بيها
انا حلمى وامنيتى انى ادخلها
انا لسه فى تانية ثانوى
ادعولى عشان ادخلها باذن الله
\ وتسلم ايدك عالموضوع التحفة http://www.thanwya.com/vb/life/icons/icon14.gif

عصام2

18-06-2012, 01:47 PM

ياه وأنا نفسى أدخولها يارب:rolleyes::rolleyes::rolleyes::rolleyes::rolle yes::rolleyes::rolleyes::rolleyes::rolleyes::rolle yes::rolleyes::rolleyes:

venuse_love2000

22-06-2012, 12:21 PM

أنا مدرس حاسب آلي علمي خريج تربية نوعيه 2001 هل يمكنني الإلتحاق بالكليات دي بمصروفات أو بأي طريقه لأني فعلا محتاج أني أكمل هل ممكن ؟؟
أشكر حضرتك على تعبك في الموضوع و جعله الله في ميزان حسناتك

m121294

23-06-2012, 01:47 AM

انا في ثانوية عامة ثالثة ثانوي علمي رياضة ينفع ادخل حاسبات ومعلومات

!KIMO!

25-06-2012, 04:15 AM

انا في ثانوية عامة ثالثة ثانوي علمي رياضة ينفع ادخل حاسبات ومعلومات

اكيد ان شاء الله لو جبت مجموعها ;)

tweetyy

14-07-2012, 03:34 AM

لو سمحت هو ايه مميزات حاسبات ومعلومات عن هندسه الكترونيات او نظم معلومات او هندسه الكترونيات

amr maro

18-07-2012, 12:51 AM

شكرا جدا جدا ...........

ممكن اى حد فى حاسبات و معلومات يبعتلى اكونت الفيس بتاعو .... انا عايز استفسر عن الكلية:022yb4::022yb4:

عصفورة العشاق

19-07-2012, 12:41 PM

أنا عاوزة أعرف الحد الأدني للقبول بكلية الحاسبات و المعلومات ؟

triste hack

30-07-2012, 08:53 PM

موضوعك ف غاية الروعه والله انا ببدور ع الموضيع دى وبحبها لانها بترفع من معنوياتى بعد ما الحج والحجه ينزلوها طبعا هههههههه تسلم ايدك وبجد عرفت حجات جديده وانا من عشاق الكليه دى واتمنى وبحارب علشان ادخلها بس بكره الرياضه ف هل همشى ف الكليه وانا وحش ف الرياضه
:wacko:
اسف طلب تانى :) عاوزك توضحلى اكتر عن قسم ال IT لان انا حاطط امل كبير ع الكليه والقسم دا انشاء الله
وشكرا ع الموضيع مالمميزه مره كمان

red.flower

01-08-2012, 10:18 AM

انا رايحه 1 حاسبات ومعلومات ومش عارفه احسن حاجه ايه كلهم جامدين جدا ولو التخصص من 1 اختار ايه ارجو الرد والمساعده انا محتاره بجد

....roka....

02-08-2012, 01:05 AM

يا جماعة انا سمعت ان خريج حاسبات بيبقى زى اى واحد واخد قرص والموضوع دة مضايقنى فعلا

ايه رايكم...؟

عثمان نور

03-08-2012, 09:41 PM

ممكن اعرف اقسام الحاسبات والمعلومات العالى فى التجمع الخامس ضررررررررررررورى

المهندس محمد صابر

04-08-2012, 01:13 PM

"نحن قوما أعزنا الله بالأسلام فإذا ابتغينا العزة فغيره أذلنا الله"

amralmagic

29-08-2012, 03:02 AM

الف شكررررررررررررررررر يا باش مهندس انا رايح حاسيات ومعلومات حلوان وعاوز اكلمك ضروووووووووووووووووووووي

coming_soon1986

02-09-2012, 01:49 AM

بالتوفيق للجميع

mada__

02-09-2012, 05:14 PM

لو سمحت انا الحمد لله جالى حاسبات ومعلومات عين شمس كنت عايز اعرف بس انا عايز اطلع مهندس برمجيات الى انت قلت عليه بيشتغل بسرعه وشغله حلو انى قسم بقى الى بيوازى قسم هندسه البرمجيات الى فى جامعه حلوان وهو لازم علشان اتخصص اجيب تقدير ايه

amralmagic

03-09-2012, 05:10 AM

الف شكر وشكرا ع المجهود يا باش مهندس

do3aa mohamed

21-12-2012, 09:21 PM

هو لاااازم اللي يدخل الكليه دي يكوون علمي ريآآآضه ...!!!! :(

coming_soon1986

08-01-2013, 06:23 PM

دة مقال كامل عن الكلية بكل تخصصاتها بأهدافها بمجالات عملها . مقال شامل عن الكلية

http://www.eswengs.com/2012/11/blog-post_3277.html

حاسبات مشروع وطن

اسلام ابوطالب

10-01-2013, 08:34 AM

انا نفسي اخش حاسبات ومعلومات بس اعرف عن كمبيوتر شويه ينفع لو خد كورس ادخلها ولا ايه

اسلام ابوطالب

10-01-2013, 08:36 AM

ده ايميلي eslamrony17***********

eng zoro

20-01-2013, 09:58 PM

معلش لو سمحت انا بدرس دلوقتى فى كلية الحاسبات بس فى الاكادمية العربية للعلوم والتكنولوجيا و كان نفسى ادخل القسم بتاعك انت اكيد متخرج دلوقتى والتخصص عندنا من سنة تالتة بس كنت عايزة رأيك هى الكلية دى و مجالها ينفع للبنات ولا احول لكلية اخرى انا لسة مخلصة ترم اول فيها فياريت تقولى رأيك؟؟

abdolol

01-03-2013, 10:50 PM

طب انا فى المنوفيه لو مثلا مفيث قسم انا عايزه فى ثبين اقدر احول لمحافظه تانيه؟؟

biso258

11-03-2013, 12:42 AM

الف شكر يا باشا و ان شاء الله هحتاج معلومات تانيه من حضرتك :)

islam elnashar

29-05-2013, 01:17 AM

موضوع جميل بس كنت عاوز استفسر عن حاجة..لو انا عاوز ادخل قسم معين من الاقسام دى ايه هو ترتيب الخطوات للدخول لقسم معين

joseph adam

18-06-2013, 12:31 PM

السلام عليكم و رحمة الله و بركاته

أهلاً و سهلاً بيكم في قسم كلية الحاسبات و المعلومات
اجمد كلية فيكي يا مصر !!

في البداية ده موضوعنا عن اقسام الكلية
ح نشرح باختصار ايه الموجود في كل قسم و المواد برضه باختصار ...
و مستقبل كل قسم ايه و لقبك ايه ...
كل ده ح نقوله في موضوعنا ...

في البداية برضه لازم نعرف ان كلية الحاسبات و المعلومات دي كلية قمة .. و هى فعلاً اجمد كلية فيكي يا مصر !!

ملحوظة غاية الأهمية :
لو ميول حضرتك برمجة و تصميم برامج .. يبقى مكانك معانا هنا و تقدر تقرأ الموضوع ...
لو ميولك كمبيوتر كأداه ترفيهية للعب و الاغاني و كده ... انصحك بلاش تقرأ موضوعنا ده لأنه مش ح يفيدك ...
اما لو ميولك هندسية بحته ( رسم و تصميم مباني و كهربا و ميكانيكا ) يبقى عليك و على قسم كلية الهندسة الموجود في المنتدى و ربنا معاك ...

لازم علشان تقرأ موضوعنا , تبقى ميولك كمبيوتريه بحته .. مش كمبيوتريه للتسليه و خلاص ..

تعالوا نتكلم عن اقسام الكلية بتفصيل مختصر ...

أولاً : اقسام الكلية الموجودة في كل الجامعات :
أ - قسم علوم الحاسب computer sciences department = cs :
القسم ده من اجمل الاقسام اللي في كلية الحاسبات و المعلومات ...

و ده لأنك ح تاخد فيه معظم لغات البرمجة الموجودة في الكمبيوتر يعني مثلاً زي ( السي و السي بلس و السي بلس بلس و الجافا و الاسيمبلي و السي شارب ... الخ الخ ... ) ..
القسم ده الرياضه فيه مش كتير قد ما البرمجه فيه اكتر ..
المواد بتاعته بتختلف من جامعة لجامعة , لكن عموماً المواد باختصار بتعلمك ازاي تترجم لغات البرامج و ازاي تدرس البنية التحتية للبرمجيات , لانك ح تبقى مصمم برمجيات او مبرمج , و المبرمج بيهتم بالبنية التحتية للبرنامج ..
كذلك بتاخد مقتطفات عن برمجة الشبكات و مواقع الانترنت ...
لكن دراستك في هذا القسم بتنصب على برمجة الحاسب ...

التخصص في هذا القسم من سنة تالتة في بعض الجامعات زي حلوان ... و في من سنة رابعة زي عين شمس ... و في حاسبات بنها مفيش غير القسم ده و بس ...

طبعاً لقبك في مصر بيبقى مبرمج او مطور و رسمياً اسمك اخصائي حاسب , في بره مصر : مهندس برمجيات ...
المستقبل في هذا القسم مشرق جداً , و شغلك ح يكون في شركات الكمبيوتر اللي في مصر ..
و يا سلام لو طلعت من العشرة الاوائل في الكلية , شركات زي مايكروسوفت و اوراكل بتاخدك تشغلك ...
- - - - - - - - - - - - - - - - - - -

ب - قسم نظم المعلومات information systems department = is :
قسم نظم المعلومات من اجمل اقسام الكلية فعلاً ...
و للعلم لا خريج من نظم معلومات الا و بيشتغل في شركات كبيرة و بمرتبات رائعة ...
طبعاً نظم المعلومات بتدرس برمجة و بعض من شبكات الانترنت و الاتصالات و بعض من مواد التسويق و ادارة الاعمال ...
طبعاً البرمجة هنا باقصد برمجة قواعد البيانات sql ...
الا انه برضه بياخد بعض لغات البرمجة مش كلها ..
بس دراسته تنصب على قواعد البيانات ...

المواد باختصار بتتكلم عن التجارة الالكترونية , و برمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي ... بالبلدي , ازاي تتعلم تصمم برامج لادارة الشركات و البنوك ... و ازاي تخزن بيانات الشركة كلها على برنامج واحد او على موقع انترنت واحد ...

لقبك جوه مصر : اخصائي نظم او مطور او مبرمج برضه , بره مصر : مهندس معلومات , او مهندس معلوماتية ...

المستقبل هنا لا تعليق , كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر , لان الشغل هنا بيبقى احسن كمان ...

بس خد بالك , لو ليك في برمجة قواعد البيانات فعلاً , يبقى عليك و على القسم ده ...

================================================== ==========================
ثانياً : اقسام الكلية اللي مش موجوده في كل الجامعات :
أ - قسم تكنولوجيا المعلومات information technology department = it:
قسم متميز جداً , و دراسته ممتعة جداً ...

و هنا ح تلاقي اسم القسم بالانجليزي شيك ... و كمان ح تلاقي دراسته شيك
و باختصار , هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين اللي عمله ... و تتعلم برضه ازاي تبرمج مواقع الانترنت الكبيرة و ح تاخد لغات برمجة خاصة بالمجال ده زي الفي بي سكريبت و الروبي و البايثون و الجافا طبعاً ...

دراسته بجد ممتعة جداً , و القسم لا غنى عنه في اي شركة كبيرة ....
المواد باختصار بتتعلم فيها ازاي تبرمج الشبكات , ازاي تبرمج مواقع الانترنت الكبيرة , و فيها مواد اتصالات ...

اسمك مبرمج او مطور , بره مصر : مهندس شبكات

يمكن معنديش معلومات كافية عن القسم , الا ان شغلك مطلوب في اي شركة كبيرة ...
القسم ده طبعاً موجود في اغلبية كليات الحاسبات و المعلومات , مش كلها ...

ب - قسم نظم الحاسبات computer systems department = cs :
هنا في القسم ده , يمكن ح تلاقي تشابه بينه و بين قسم هندسة الحاسبات اللي في كلية هندسة ..

لانك هنا ح تدرس ازاي تربط البرمجة بالهاردوير ... يعني ازاي تبرمج البروسيسور , ازاي تبرمج الهارد ...
الكلام ده بيتاخد في قسم هندسة حاسبات , الا ان قسم هندسة حاسبات نشاطه اكتر و اكتر على الهاردوير ... السوفتوير فيه قليل شوية ...
في قسم نظم الحاسبات , انت البرمجة ح تاخدها بشكل مكثف عن الهاردوير , مع العلم انك ح تاخد هاردوير لكن شوية برضه ..

المواد باختصار بتتكلم عن اساليب امان الاسبات , و البرمجة الهيكلية و المعماريات المتوازية .. الكلام ده مش ح تعرفه الا لما تدخل الكلية بنفسك و تفهمها ...

لكن عموماً القسم يدرس ربط البرمجة بالهاردوير ...

و حقيقة لا اعلم اللقب ح يبقى ايه , لكن المستقبل مشرق لانه قسم من امتع الاقسام ...
القسم موجود في جامعة عين شمس و فقط ..

جـ - قسم الحسابات العلمية scientific computing department = sc :
القسم ده يمكن بيركز على الرياضيات اكتر ...
لانك هنا ح تتعلم رسم الاشكال الهندسية المعقدة بالبرمجة ...
و فيه مواد نظري برضه ..

المواد باختصار بتتكلم عن نظرية الحسابات , و كيفية الرسم بالحاسب , و دراسة الاحصاء و الاحتمالات ...

هنا معرفش برضه ح يبقى لقبك ايه
لكن ممكن تشتغل في مركز الحساب العلمي التابع للجامعة ...
و مركز الحساب العلمي ده من اهم مراكز اي جامعة في مصر ...
او ممكن تشتغل برا مصر ...

القسم بلا استثناء ممتع لان الرياضه فيه كتير ... لو بتحب الرياضة بجانب الكمبيوتر كعلم ... يبقى ادخل القسم ده ...
طبعاً القسم موجود في جامعة عين شمس و فقط ...

د - قسم العلوم الاساسية basic sciences department = bs :
القسم ده بقى ح تدرس فيه اساسيات الكمبيوتر ...
اساسيات الكمبيوتر من نحية العلم ...
يعني رياضة و فيزيا .. بس كتييير ...
طبعاً بجانب المواد النظرية .....

و هنا مقدرش اقول اكتر من كده , لاني لا افقه شيء عن القسم الا قليل من المعلومات ...
القسم موجود في جامعة عين شمس و فقط ...

هـ - قسم نظم المعلومات الحيوية bioinformatics department :
طبعاً هنا القسم خاص ...
و معنى كلمة خاص انه بفلوس ... و فلوس كتير مش شوية ..

و ح نتكلم عنه ياما شوية :
- أولاً القسم ده بيدخله علمي علوم , بس لازم بياخد رياضة 2 في اول سنة ..
- ثانياً ممكن علمي رياضة برضه يدخله , بس ح ياخد احياء طول دراسته في القسم ده ..
- ثالثاً مصاريف القسم بتوصل لـ 12 الف جنيه في السنة و يُقال انه 18 الف جنيه في السنة ..
- رابعاً : التخصص فيه من اولى ...

هنا القسم ممتع و لذيذ في دراسته لانك بتاخد العلم الطبي و بتطبقه الكترونياً ...
هنا في القسم ده بتدرس ازاي تبرمج الشرايح الالكترونية اللي بتعالج الناس من اشد الامراض , ازاي بتدرسها و ازاي بتجربها ...
طبعاً الشرايح انواع و المواد كتيير في القسم ده ...

هنا القسم ده مش شبيه بالهندسة الطبية , لان الهندسة الطبية بتركز على صيانة المعدات الطبية .. اما هنا فانت بتتعلم ازاي تبرمج المعدات دي للتشغيل ...

اي ربط البرمجة بالطب او تقدر تسميها : البرمجة الطبية ...

القسم لذيذ جداً جداً ... فلو معاك فلوس و نفسك فيه , يبقى ادخله ...
معكش فلوس و نفسك فيه , يبقى هذا قضاء الله ...

و لو دخلته , يبقى لازم على الاقل تجيب جيد ... لانك لو شلت مادة بتدفع اكتر ...
اما عن المستقبل , فمقدرش اقول لك , كل اللي اقدر اقولهولك انك ح تبقى اكبر من اي مهندس بترول ...
اسمك مهندس معلومات طبية و ده بره مصر للأسف ..
شغلك ح يتوقف هنا على المستشفيات و المستشفيات الخاصة بالذات ... و ممكن برا مصر في اكبر مستشفيات فيكي يا اوروبا ... و مرتباتك خيالية و فوق الوصف ...
القسم موجود في جامعة عين شمس و فقط ...

و - قسم نظم المعلومات الجغرافية geographic information systems = gis :
ده بقى قسم جميل و حلو لمحبي الاتصالات ...

هنا يمكن القسم مش شبيه بهندسة اتصالات , لان اتصالات بتركز على الكهرباء ...
هنا انت بتركز على الكمبيوتر ...

هنا بتتعلم دراسة الرادار و شاشات المراقبة و الاقمار الصناعية و الكلام الكبير ده ...
طبعاً الاهتمام هنا جغرافيا على كمبيوتر ...
و ده يعتبر دراسة للاتصالات ...

هنا ح تبرمج الرادار و القمر الصناعي ...

القسم موجود في قلة قليلة من كليات الحاسبات و المعلومات , لكن عموماً انت ح تاخده كمادة في سنة رابعة ضمن قسم نظم المعلومات ...

مستقبل القسم ممتاز عموماً ... و مرتباتك فوق الوصف برضه ...

يُذكر ان القسم او يُعتقد انه في جامعة القاهرة ...
لكن حقيقة , لا اعلم الا انه موجود في بعض من الجامعات المصرية ...

ز - قسم هندسة البرمجيات software engineering department = se :
ده قسمي بقى ...

و ح نتكلم عليه كتير :
- أولاً : واضح من الاسم ان لقبك رسمياً جوه مصر او بره مصر مهندس برمجيات , لانك ح تحصل على بكالوريوس الحاسبات و المعلومات - قسم هندسة البرمجيات ..
- ثانياً : القسم ساعات معتمدة زيه زي القسم الجديد اللي في عين شمس ...
- ثالثاً : القسم موجود في جامعة حلوان و فقط ...
- رابعاً : مصاريف القسم اخفّ من مصاريف قسم عين شمس الجديد , السنة تعمل لها 7500 جنيه ...
- خامساً : التخصص فيه من اولى ..

هنا بقى الكلام ح يختلف , لانك هنا ح تاخد كل لغات البرمجة اللي في الدنيا ..
المواد هنا عبارة عن خليط من مواد علوم حاسب على نظم معلومات على بعض من تكنولوجيا المعلومات على مواد من هندسة البرمجيات اللي نازله جديد على مواد دعم و اتخاذ قرار ...

المواد كتييير , علشان كده التخصص بيبقى من اولى ...
طبعاً رغم انك ح تاخد كل لغات البرمجة اللي في الدنيا , الا انك مش ح تاخدها بكمية كبيرة , لان اهتمامك هنا ح ينصب فقط على البرمجيات ثقيلة المعيار او اللي بيسموها عالية الجودة .. بالبلدي , مش اي برامج ح تصممها ... يعني ح تعمل برامج كبيرة ..

طبعاً زائد انك مهندس , يعني لازم ح تتعلم التسويق و اتخاذ القرار و التخطيط , لان الهندسة مش رسم زي ما انت فاكر و خلاص ... الهندسة رسم و تخطيط و اقناع و تصميم و تنفيذ و اشراف ..

هنا طبعاً المستقبل مفتوح مفتوح .... لان التخصص جديد و مش موجود حتى في اي كلية هندسة .. مش موجود حتى في اي جامعة خاصة ...

طبعاً مكانتك لن تقل عن مهندس البترول ... بل اعلى من مهندس البترول ... لان شركات الكمبيوتر محتاجة التخصص ده و بشده ...
القسم موجود في جامعة حلوان و فقط ...

ح - قسم بحوث العمليات و دعم اتخاذ القرار decision support and progresses researches = ds-pr = ds :
و ده آخر قسم ح نتكلم عليه ...
طبعاً هنا يمكن ح تاخد مواد رياضية كتير و مواد فيها حفظ ... و برمجة مش كتيرة برضه ..
لكن هنا الدراسة ممتعة , لانك ح تدرس ازاي تتخذ القرار في اي عملية الكترونية , و ازاي تناقشها باسلوب علمي بحت ...

طبعاً يُقال ان هذا القسم هو القسم الوحيد اللي محتاج واسطة , لان شغلك ح يبقى في مراكز حساسه زي رئاسة الجمهورية و مجلس الوزراء و مراكز دعم اتخاذ القرار الحكومية التابعة للرئاسة ...
مراكز حساسة جداً جداً ...

لكن لو عاوز القسم ده , يبقى لازم اجتهادك في المقام الاول ... لان اجتهادك هو واسطتك بعد ربنا سبحانه و تعالى ...

القسم موجود في جامعة القاهرة و المنصورة ....

=========== الموضوع لسه ما انتهاش ===========

معلومات و نصائح هامة جداً :

بعد ما استعرضنا الاقسام الموجودة باختصار ..

نحب نزود كام حاجة كده :

1 - في بعض الجامعات التخصص بيكون من تالتة , و بعضها التخصص بيكون من رابعة ..
2 - التخصص بيكون من اولى للأقسام الخاصة و فقط ..
3 - حاسبات بنها هى الوحيدة اللي فيها قسم علوم حاسب و فقط ..
4 - شركة مايكروسوفت بتعمل كل سنة مسابقة على مستوى كليات الحاسبات اللي في الجمهورية كلها , المسابقة دي عبارة عن اختيار افضل مشروع تخرج و اسمها imagine cup ..
الفائز فيها بيضمن شغله في الشركة نفسها ..
5 - كل سنة بتتعمل حاجة اسمها : ملتقى التوظيف , الملتقى ده كان كل سنة بيتعمل في عين شمس و لكل طلبة حاسبات .. السنة دي ح يبقى في في عين شمس و في حلوان ..
طبعاً الملتقى ده بيحضره اكابر القوم , المحافظ و الوزير و عميد الكلية و كل الاساتذة ... و الملتقى ده بتيجي كل شركات الكمبيوتر فيه علشان تعرض ايه الوظايف المتاحة و كيفية التقدم و القبول ليها و ممكن تقوم باختيار الطلبة المتميزين للعمل بتلك الشركات ..
6 - اعرف ان في دراستك في الكلية , كل سنة لازم ح تزود نفسك بكورسات .. الكورسات دي الكلية بتجبرها عليك علشان تاخدها و هى كورسات الحصول على شهادة icdl ...
اما بالنسبة لبعض الاقسام اللي مفيهاش برمجة كتير , فالكلية بتدي كورسات اجباري في البرمجة و دي اجباري على كل الطلبة اللي داخلين اقسام مفيهاش برمجة ... طبعاً بعض الجامعات هى اللي بتعمل كده ..
7 - الاولوية في الحاسبات للمتميز و المبتكر ... يعني لازم تجيب امتياز كل سنة او جيد جداً كل سنة , بجانب طبعاً كورساتك في اللغة و البرمجة اكتر و اكتر ... كل ده ح يؤهلك للشغل بشكل اكبر .. على فكرا الاولوية للمتميز في اي كلية مش حاسبات بس ...
8 - بالنسبة لمشكلة النقابة , فالنقابة جاري تنفيذها في اول خطواتها , و هى ح تبقى نقطة التحول و هى اللي ح تدي كيان للمبرمجين في مصر ... و حالياً , يمكن الانضمام للجمعية المصرية لمهندسي البرمجيات و الجمعية دي ليها انشطة كتيرة و مفيدة ..
موقع الجمعية : www.esea-online.org (http://www.esea-online.org)
9 - الدراسة في اي كلية حاسبات بالانجليزي ما عدا مواد الانسانيات ( حقوق الانسان ) .
10 - المناهج كلها عالمية , يعني مفيش دكتور في كلية الحاسبات مألف كتاب واحد , يعني زيك زي اي طالب في امريكا و المانيا و دول العالم الاول .
11 - مشكلة انك زيك زي خريج معهد , هذه المشكلة حلها بسيط جداً .. أولاً خريج المعهد بيحصل على شهادة معادلة لشهادة كلية التجارة , فبيطلع محاسب يادوبك اتعلم ازاي يشتغل على الاكسل و الورد و الباوربوينت و كده .. لكن مالوش لا في البرمجة و لا في اي حاجة ... و حتى لو اخد كورسات , فمش ح يبقى بقوة خريج حاسبات و معلومات ...
12 - مشكلة الاولوية لهندسة الحاسبات .. طبعاً هندسة الحاسبات اكل عيشها نادر في مصر جداً , لان هندسة الحاسبات بيهتم بدراسة الهاردوير و تصنيع قطع الهاردوير ... و طبعاً مفيش مصنع في مصر بيصنع بلاستيك اصلاً .. و السعودية و الامارات قالوا نفس الكلام , قالوا ان قسم هندسة الحاسبات عندهم مش مطلوب زي قسم علوم الحاسب او قسم هندسة البرمجيات ...
فمن الناحية دي اتطمنوا , خريجي الحاسبات و المعلومات ليهم الاولوية , لان هما اصل الكمبيوتر من نحية السوفتوير , فبيدرسوا سوفتوير بتعمق اكتر من هندسة حاسبات , و مجال البرمجة مفتوح لن يغلق , و مجال البرمجة هو المطلوب في اي حته في الدنيا ..
و برضه , مهندس الحاسبات ح يبقى مكانته عالية و شغله عالي لو اشتغل في شركة محترمة جوه مصر او بره مصر ...
13 - للعلم , هندسة الحاسبات في السعودية و الامارات و دول الخليج العربي , القسم ده من ضمن اقسام كليات الحاسبات و المعلومات هناك ...
14 - كان قد عقد اجتماع في جامعة اسيوط لمناقشة تحويل تسمية قسم علوم حاسب الى قسم هندسة برمجيات مع تغيير المواد , الا ان المجلس موصلش لاتفاق لان كلية الهندسة رفضت الموضوع دا و قالت ان الهندسة للهندسة ...
لكن جامعة حلوان تغلبت على المشكلة دي , بدليل انها دخلت قسم جديد تحت مسمى هندسة البرمجيات في كلية الحاسبات و المعلومات !
15 - وزير التنمية الادارية الدكتور احمد درويش قال انه لا بطالة في مهندسي البرمجيات ... و عميد كلية حاسبات حلوان قال : لا بطالة في خريجي الكلية لدينا ...
16 - في جامعات شغالة بنظام الساعات المعتمدة زي حلوان و القاهرة ... و في عادي زي عين شمس ..
17 - ميزة الساعات المعتمدة انك ممكن تخلصها في 3 سنين و ممكن تخلصها في 4 سنين , و ممكن تخلصها في 6 سنين ... و عموماً الكلية بتظبط عدد الساعات على اربع سنين ..
18 - برضه في ميزة انك بتختار القسم اللي يريحك في نظام الساعات المعتمدة , بس لازم تجيب جيد كأقل تقدير ... اما لو جبت مقبول , فاعتقد ان الكلية ح تحكم عليك بانها هى اللي ح تختار القسم الاقل في المجموع ... الكلام دا سألت فيه جامعتي عنه ( حلوان ) ...
19 - موضوع اللاب توب , انت ح تلاقي ناس من سنة اولى جايبينه ... لكن انا بقولك هاته من اول ما تتخصص ... لان معظم مواد الحاسبات نظرية ...
20 - ممكن تجيب اللاب توب في حالة واحدة , انك لو قاعد في المدينة الجامعية و المدينة دي مفيهاش قاعة كمبيوتر ... ساعتها تقدر تجيبه من اولى علشان تعرف تذاكر عليه بعد كده ..
21 - طبعاً في كل الجامعات في انترنت لاسلكي ( واي فاي ) و بسرعة عالية ... علشان لو حبيت تنزل محاضرات قديمة او امتحانات قديمة ...
22 - اياك و الحرج من سؤال الدكتور او المعيد , اسأل الدكتور عن اي حاجة ... لكن متسألوش عن حاجة تافهة ... و متبينلوش انك غبي للدرجة يعني , علشان لو حطك في دماغه , ح تضيع ..
23 - كورسات البرمجة اللي بياخدها اي طالب من هندسة او حقوق او ... او .... , دي تعتبر ملخص للي بيدرسه طالب الحاسبات في 4 سنين ... او بمعنى آخر عبارة عن اساسيات و مصطلحات ... طالب الحاسبات بيدرس بالتفصيل الممل و بأدق المعايير ... فطبعاً , الفرق كبير ..
24 - كذلك طالب الحاسبات ممكن ياخد كورسات هاردوير , بس طبعاً مش بقوة مهندس الحاسبات ..
25 - فقط عليك في الكلية دي انك تتميز و تتفوق ... تكتر من كورساتك و تشد في مذاكرتك و تحضر على قد ما تقدر .. بإذن الله مش ح تلاقي حاجة صعبة ...

* * * * * * * * * *

هنا انتهى الموضوع ...
و انا تعبت من الكتابة ... :)

جزاكم الله كل خير
و اي استفسار انا موجود بإذن الله ...

احب اشكرك علي الموضوع دة
بس انا عايز اخد رايك في المعهد العالي لعلوم الحاسب ونظم المعلومات بـ6 اكتوبر
عايزك تقولي اي الفرق بينة وبين بتاع الكلية في الشغل ومجالات العمل
ارجوك رد عليا بسرعة

فاروقندى

22-06-2013, 06:28 AM

معلش عندى سؤال غريب شويه هل من الممكن دخول الكلية من علمى علوم واذا كان ممكنا ما الشروط

qqqqq25

01-07-2013, 12:23 AM

طب بالنسبة لمن يريد أن يعمل فى المجال الثلاثى الأبعاد

عبدالله ضيف

21-07-2013, 01:13 AM

انا لسه مخلص ثانوى ياريت حد يفيدنى فى اختيار الكلية سواء هندسة وا حاسبات
كل ما اريد ان اكون محترف برمجة روبوتات وانى اعرف هاردوير خصوصا فى الروبوتات على خفيف يعنى بمعنى اصح لو قدامى روبوت اقدر اعمله البرمجة التحتية زى الفيرموير مثلا او كده وفى نفس الوقت ابرمجه يتصرف ازاى

هل فى هذه الحالة ما هى الكلية الى المفروض ادخلها حاسبات ومعلومات ولا هندسة ؟؟؟؟؟؟؟؟؟؟ ياريت حد يساعدنى لانى بحثت على النت ومفيش اى حاجة مفيدة بخصوص الموضوع ده

raafat.horas

21-07-2013, 05:36 PM

11- مشكلة انك زيك زي خريج معهد , هذه المشكلة حلها بسيط جداً .. أولاً خريج المعهد بيحصل على شهادة معادلة لشهادة كلية التجارة , فبيطلع محاسب يادوبك اتعلم ازاي يشتغل على الاكسل و الورد و الباوربوينت و كده .. لكن مالوش لا في البرمجة و لا في اي حاجة ... و حتى لو اخد كورسات , فمش ح يبقى بقوة خريج حاسبات و معلومات ...

يعنى ايه؟؟؟؟
معهد ملوش لزمة ؟؟؟ ولا ايه ؟

.ايه.

22-07-2013, 04:33 PM

هى الكلية دى لعلمى علوم

Abanoubs

23-07-2013, 12:17 AM

شكرا خالص ليك بجد الف شكر
لكن انا عاوز اعرف حاجه لو انا دخلت الكليه دي واتحرجت بتقدير مش ولابد ايه هيكون موضوع التوظيف بالنسبه ليا ؟

Crazy SilenCe

30-07-2013, 05:58 PM

و الله يا باشمهندس انت برنس :d :d
تسلم ايديك بجد ع الموضوع , الناس مفكره ان حاسبات اخرها واحد بينزل ويندوز و خلاص ميعرفوش انها المستقبل بس مش بلدنا اللى بت*** الحلم :)))

حسني بدوي

31-07-2013, 11:50 PM

انا جايب مجموع385.5 ..............94.02% عايز اعرف احسن كلية حاسبات ومعلومات فى مصر هو اية ارجو الرد السريع

m7md.7amdy

06-08-2013, 10:00 PM

انا الحمد لله جالى حاسبات قناه السويس اولا عاوز اسال حضرتك بس هل هينفع احول لعين شمس ؟
ثانيا هل محتاج ابدء كورسات اى من بعد العيد ان شاء الله ؟

محمد راجح

10-08-2013, 03:42 AM

انا جالس حاسبات الزقازيق هل هي افضل ولا احول بنها لانها اقليميه وهل يمكن التحويل لحلوان او القاهره وياريت اجابه سريعه شكرا

herofire2020

26-08-2013, 11:05 PM

انت رائـــــــــــــــــــــــع ..... وضحتلي حاجات كنت دايخ عليها هموت واعرفها .... :022yb4:
زعلتني بس عشان حاجة واحدة ... موضوع ال software engineering انا دخلت الكلية وحولت من هندسة مخصوص عشان ابقى مهندس برمجيات وعرفت ان الكلام دا فعلوم الحاسب CS بس انت شوقتني للSoftware engineering وانا مش هقدر اخشه لانه مش فكل الجامعات زي ما قولت :(

اسلام ابوطالب

08-09-2013, 03:23 AM

طب حضرتك كنت عاوز ارف هي ايه نقابه العلميين دي

Eng.Mo'men

08-09-2013, 04:24 AM

هى الكلية دى لعلمى علوم

لا علمي رياضة بس

Eng.Mo'men

08-09-2013, 03:02 PM

شكرا خالص ليك بجد الف شكر
لكن انا عاوز اعرف حاجه لو انا دخلت الكليه دي واتحرجت بتقدير مش ولابد ايه هيكون موضوع التوظيف بالنسبه ليا ؟

ايوة ليك وظيفة طبعا الاهم من التقدير المشروع والمستوي العملي

Eng.Mo'men

08-09-2013, 03:03 PM

انا جايب مجموع385.5 ..............94.02% عايز اعرف احسن كلية حاسبات ومعلومات فى مصر هو اية ارجو الرد السريع

عين شمس وبعدها ع طول القاهرة

Eng.Mo'men

08-09-2013, 03:18 PM

انا الحمد لله جالى حاسبات قناه السويس اولا عاوز اسال حضرتك بس هل هينفع احول لعين شمس ؟
ثانيا هل محتاج ابدء كورسات اى من بعد العيد ان شاء الله ؟

ايوة ينفع بس المعاد فات خلاص وهتلاقي العدد كمل فى عين شمس

ايوة كورس انجلش او كورس c++ ويفضل الاتنين مع بعض

Eng.Mo'men

08-09-2013, 03:29 PM

انا جالس حاسبات الزقازيق هل هي افضل ولا احول بنها لانها اقليميه وهل يمكن التحويل لحلوان او القاهره وياريت اجابه سريعه شكرا

الف مبروك لا الزقازيق احسن ايوة ينفع بس الاماكن خلصت فى الجامعتين دول

Eng.Mo'men

08-09-2013, 03:31 PM

طب حضرتك كنت عاوز ارف هي ايه نقابه العلميين دي

دي نقابة خريجي كلية العلوم اسمها نقابة العلميين او نقابة المهن العلمية ودي مفتوحة لخريجي حاسبات لو عاوزين يسجلوا فيها لكن رسميا خريج حاسبات لسة مالوش نقابة ودا الافضل طبعا

اسلام ابوطالب

17-09-2013, 03:27 AM

طب حضرتك انا كان ليا استفسار عن خريح معهج حاسبات ومعلومات وخريج حاسبات ومعلومات حكومه في شركات بياخدوا بتاع حكومه اول ولا بيشوفوا مين احسن في اتنين

Eng.Mo'men

17-09-2013, 06:05 PM

طب حضرتك انا كان ليا استفسار عن خريح معهج حاسبات ومعلومات وخريج حاسبات ومعلومات حكومه في شركات بياخدوا بتاع حكومه اول ولا بيشوفوا مين احسن في اتنين

لو المعهد فعلا حاسبات ومعلومات وشهادته معتمدة وبيقبل بس من علمي رياضة يبقا الاتنين زي بعض وهيختبروهم والأكفأ ياخدوه

اسلام ابوطالب

17-09-2013, 08:08 PM

طب تمام عشان انا في حاسبات ومعلومات مدينه الثقافه والعلوم ومعتمده كمان وفي تخرج هاخد شهادتين شهاده من جامعه القاهره وشهاده من مدينه عشان هي معتمد من حاسبات ومعلومات جامعه القاهره

Eng.Mo'men

18-09-2013, 09:50 AM

تماااااااام جدا ربنا يوفقك

اسلام ابوطالب

18-09-2013, 02:25 PM

ربنا ي خليك وشكرا علي مجمهود

Eng.Mo'men

19-09-2013, 05:10 PM

ربنا ي خليك وشكرا علي مجمهود

حبيبي دا اقل حاجة نقدمها للناس المحترمة اللى زيكم

اسلام ابوطالب

19-09-2013, 08:26 PM

شكرا علي ذوق حضرتك

ballymody

30-10-2013, 08:44 AM

هل جامعة الازهر فيها كلية حاسبات ومعلومات ولا لا ؟

ضروري الرد

E-mail On Facebook

https://www.facebook.com/fired74:022yb4: (https://www.facebook.com/fired74)

mona mahsoup

31-10-2013, 02:26 PM

جزاك الله خير
انا اولى حاسبات ياريت حد يفيدنى اعمل ايه انا ضايعه على الاخراذاكر ازاى طب اخد كورسات ولا ايه

Eng.Mo'men

01-11-2013, 01:04 AM

ايوة فيها كلية واحدة بس حاسبات لسة السنة دي معمولة جديدة :)

ان شاء الله سهلة مش تقلقي انتي بس احضري محاضرات وسكاشن واكتبي غيابك عشان درجات اعمال السنة عليها 33% من الدرجة الكلية واشتري الورق من المكتبة او ذاكري من الكلام اللى بتكتبيه فى السكاشن والمحاضرات وان شاء الله الدنيا هتبقا سهلة معاكي بالتوفيق ^_^

mona mahsoup

01-11-2013, 08:21 PM

شكرا لحضرتك بس انا والله بعمل كده بس برضو حاسه انى ضايعه فى المذاكره

Eng.Mo'men

01-11-2013, 10:55 PM

انا كنت كدا والله وانا كنت حاسس زيك بالظبط فى الاول وتااايه خالص بس الحمد لله الدنيا اتظبطتت لو عاوزة ملفات تذاكري منها انا عندي اتفضلي اكونتي عالفيس وانا هبعتهملك

https://www.facebook.com/Momen1993

Prof ElMaTaDoOr

21-07-2014, 11:23 PM

أرجو تجديد الاقسام و الموضوع بالكامل بالتاريخ الجديد
ووضع مجموع الكليات باخر تجديد ليها
وشكرا لكم

Eng.Mo'men

22-07-2014, 01:06 AM

أرجو تجديد الاقسام و الموضوع بالكامل بالتاريخ الجديد
ووضع مجموع الكليات باخر تجديد ليها
وشكرا لكم

حااااااااضر :) بالتوفيق

EhabAmmar

22-07-2014, 02:32 AM

حااااااااضر :) بالتوفيق

انشاء الله يحصل ............. بالتوفيق للجميع

اسلام بيومي

24-07-2014, 05:09 AM

كنت عاوز اعرف هو كورس oracle تبع قسم علوم حاسب
ولا قسم نظم معلومات

EhabAmmar

24-07-2014, 02:50 PM

كنت عاوز اعرف هو كورس oracle تبع قسم علوم حاسب
ولا قسم نظم معلومات

قواعد database قويه جداً .... تعتبر تبع قسم علوم الحاسب .... بس بصراحه معرفش نظم بتاخده ولا لاء لان انا عمرى ما فكرت اعرف نظم دى بتاخد ايه و بتدرس ايه و هيطلعوا ايه

aking

25-07-2014, 01:42 AM

لو سمحت اية اقسام حاسبات فى جامعة 6 اكتوبر

Spring.Rose

25-07-2014, 01:43 AM

EhabAmmar

25-07-2014, 05:24 PM

جزاكم الله خيرا على الموضوع الجميل ده
انا عندي مشكله او حيره بمعنى ادق

انا جايبه 90% علمي رياضه داخله مرحله تانيه ان شاء الله مش عارفه انا مجموعي ممكن يجيب كلية حاسبات ومعلومات ولا لأ لان لو في امل هكتبها ف التنسيق طبعا ولو مش في امل طبعا هتبقى زيها زي الكليات اللي ضاعت من ايدي
يا ريت لو حد يقدر يفيدني ف الاستفسار ده

والله مفيش حاجه اسمها مفيش امل .. و مفيش مستحيل انشاء الله قدمها ... انا معتقدش انها ممكن تنزل 90 بس ... انت مش ضامن ايه اللى ممكن يحصل جايز تنزل ولو منزلتش الخاص موجود منها و كويس جداً

EhabAmmar

25-07-2014, 05:28 PM

لو سمحت اية اقسام حاسبات فى جامعة 6 اكتوبر

Department of Basic Science
Department of Computer Science
Department of Information system

----------------------------------------
1-قسم العلوم الاساسيه
2-قسم علوم الحاسب
3-قسم نظم المعلومات
_______________________________
قسم العلوم الاساسيه دى انا معنديش معلومات عنه بصراحه ممكن البشمهندس مؤمن يبقى عنده اى معلومات عنه يقدر يفيدك .......................... اما الباقى هقدر اجبلك حاجه تفيدك عنهم ....
-----------------------------------------------------------------------
2علوم الحاسب Computer Science
يهتم هذا التخصص في كيفية بناء انظمة تتناسب مع مختلف المجالات في الحياة وايضاً يهتم هذا التخصص بكيفية التراسل داخل الشبكات وحماية المعلومات وحماية التراسل بين الشبكات.
تخصص علوم الحاسب دائما يركز على الانظمة Software و البيانات Data والامن Security سواء للشبكات او للمعلومات و كيفية انشاء Algorithms لحل مشاكل معينة
يركز هذا التخصص على الرياضيات بشكل كبير فطلاب علوم الحاسب غالبا يدرسون 6 الي 8 كورسات في الرياضيات
علوم الحاسب يقوم بحل المشاكل المعقدة بوضع حلول رائعه مناسبة باستخدام التحليل الرياضي والخوارزميات باستخدام لغات برمجة وايضا يركز على كيفية حماية برنامج معين او شبكه معينه

علوم الحاسب يشكل القاعدة الاساسية لهندسة البرامج ,
كما الفيزياء تشكل القاعدة الأساسية للهندسة الكهربائية...

علوم الحاسب تخصص لا غنى عنه في جميع المجالات
فهو غير مقتصر على بناء البرامج البسيطه
بل له دخول في جميع العلوم الموجوده وله تواجد في جميع التخصصات
مثل الادارة والطب والاحياء والهندسة وعلم الفلك والجيولوجيا واللغة وجميع التخصصات

السؤال
هل توجد شركات في السعودية تحتاج لهذا التخصص؟
الاجابة: معظم الشركات الكبيرة والصغيره بحاجة الي خريج علوم حاسب
-----
3 نظم المعلومات Information Systems ؟
نظم المعلومات تقوم بدراسة النظام المطلوب تنفيذه وكيفية دمج التقنية مع هذا النظام بشكل كامل وبكفاءة عالية
دراسة نظم المعلومات تشمل تحليل وتصميم النظم وعمل قواعد بيانات وشبكات وحماية وقرارات علمية

يعتبر هذا التخصص هو حلقة الوصل ما بين تخصص علوم الحاسب و المجال العملي للشركات
فهو يقوم بفهم ودراسة المشاكل الموجوده في الأعمال ويقوم بطرح حلول تقنية لهذه المشكله

هل نظم المعلومات تابع لكلية العلوم الإدارية كما يقول البعض؟
الاجابة بالتأكيـد. لا...
نظم المعلومات لا يدخل ظمن ايطار كلية العلوم الإدارية بل هو أحد اكبر التخصصات التابعة لعلوم الحاسب

العلاقة ما بين نظم المعلومات وعلوم الحاسب
نظم المعلومات تخصص داخل ضمن احد اقسام علوم الحاسب لكن له علاقه بسيطه بإدارة الأعمال فهو الجزء المكمل لعلوم الحاسب لادخال التقنية في عالم الأعمال

السؤال
هل توجد شركات في السعودية تحتاج لهذا التخصص؟
الاجابة: جميع الشركات الكبيرة بحاجة ايضا الي خريج نظم المعلومات

مالفرق بين نظم المعلوم IS ونظم المعلومات الادارية MIS
تخصص MIS management information system
هو تخصص يدخل ظمن كلية الادارة فيدخل هذا التخصص في المحاسبه والموارد البشريه وادارة الاعمال والتسويق لكن يدخل هذا التخصص بشكل بسيط في علم الحاسب لكن لا يصل الا ان يكون تخصص حاسب

Marwa Atia

02-08-2014, 12:44 AM

EhabAmmar

02-08-2014, 03:32 AM

ممكن تتوسع اكتر في الكلام عن قسم هندسة البرمجيات وكده لان كل اللي سمعت اراؤهم من اقسام تانية -وبصراحة ماكنتش مشجعة- فانا كنت عايزة اعرف الدراسة فيه ماشية ازاي والمواد ايه وخصوصا ان كلام الموضوع ده شدني ليها اوي أصلي داخلة حاسبات السنادي إن شاء الله

مينفعش حد يديكى كل حاجه انتى عوزاها .......... لازم تبحثى عن القسم اللى انتى بتحبيه و نفسك فيه عشان تعرفى عنه كل حاجه و لو محتاجه حاجه معينه فى نقطه معينه انا تحت امرك

ebram96

03-08-2014, 03:43 PM

هل ينفع احول من حاسبات بني سويف الي حاسبات حلوان علشان قسم هندسة البرمجيات مع العلم اني ساكن في بني سويف

EhabAmmar

04-08-2014, 03:00 AM

هل ينفع احول من حاسبات بني سويف الي حاسبات حلوان علشان قسم هندسة البرمجيات مع العلم اني ساكن في بني سويف

اه ينفع ... فى شويت اجراءات كدا ممكن حد يقولك عليهم من القبول و التسجيل .... بمعنى انك ممكن تروح حلوان و تتأجر شقه و تاخد صوره من عقد الايجار و صوره من وصل النور على اساس انك ساكن هناك و كدا و تعمل تحويل و تحول

asd 55

10-08-2014, 03:08 AM

السلام عليكم انا علمى رياضه وحطيت فى رغباتى التنسيق كلية حاسبات ومعلومات وكلية تجاره وشوفت انو فى قسم نظم ومعلومات فى كلية تجاره وانو الخريج من القسم ده ليه مجالات كتير للعمل زى :

· محلل ومصمم نظم

· مبرمج حاسب

· أخصائي نظم

· أخصائي إدارة قواعد البيانات

· أخصائي دعم القرار

· مصمم مواقع الكترونية

· مراجع نظم حاسبات

و ذلك بالإضافة إلى الوظائف الأخري في مجالات المحاسبة والتمويل والتسويق والإدارة.

ودا بيعتمد على التقدير لزم يكون جيد جدا او ممتاز فى سنه 2 ودا اعلى قسم فى كلية التجاره.
فهل الوظائف دى مطلوبه فى مصر
لانى بجد بحب الحاسب الالى والهاردوير والبرمجه وكلية الحاسبات والمعلومات للاسف امل بعيد عنى لانى من الاسكندريه وكمان تنسيقها عالى لو ممكن تفيدينى وتقولى الكلام ده صحيح وشكرا ليك

محمد__رمزي

11-08-2014, 02:56 PM

اولا حابب اشكرك علي الموضوع الاكثر من رائع وحابب اقولك اني ان شاء الله جتلي بطاقة الترشيح حاسبات عين شمس وطبعا انا كنت كاتبها رغبة اولي علشان اقسامها الكتير والتخصص فيها من رابعة المهم انا الوقت متحير جدا ما بين قسم هندسة البرمجيات وقسم نظم المعلومات الحيوية وطبعا لانه التخصص فيهم من اولي لازم اني احدد من الوقت فكنت حابك تكلم عنهم اكتر وتوضح لنا الفرق وثانيا حضرتك كنت عاوزك ترتبلي اقسام حاسبات كلها تنازلي من حيث فرصة العمل والناحية المادية في ما بعد العمل وهل هي الافضل ولا القاهرة

Eng.Mo'men

12-08-2014, 07:33 AM

mo7amed_nagy

15-08-2014, 02:12 PM

سؤال بسيط ...هي كلية الحاسبات سهله ولا لا ؟
واي واحد يقدر يتفوق فيها ولا لا ؟
وايه المفروض تعمله علشان تبقي متفوق في الحاسبات؟

اسف علي الاطاله ....شكرا

EhabAmmar

17-08-2014, 04:26 AM

سؤال بسيط ...هي كلية الحاسبات سهله ولا لا ؟
واي واحد يقدر يتفوق فيها ولا لا ؟
وايه المفروض تعمله علشان تبقي متفوق في الحاسبات؟

اسف علي الاطاله ....شكرا

اولاً مفيش حاجه سهله ... كله بيرجع لقدراتك ....
ثانياً حاسبات هتعيد السؤال بتاعك تقصد تتفوق فى مجالك ولا فى الدراسه النظريه ....

مصطفى نادى مصطفى

17-08-2014, 01:39 PM

جزاك الله كل خير على هذا الموضوع الرائع

EhabAmmar

17-08-2014, 11:30 PM

جزاك الله كل خير على هذا الموضوع الرائع

بالتوفيق يا بشمهندس

ahmed ud

07-09-2014, 04:49 AM

انا محتار اوووى انى اخش حاسبات و معلومات خاص فى الاكادمية البحرية ولا لأ
(اولا) انا كنت عايز اعرف هل شهادتها كويسة ولا اى كلام ؟؟؟
(ثانيا) هل الكلية ليها مستقبل بجد مش كلام و بس يعنى عشان انا كل لما اخش هنا الكلية بتزيد فى نظرى و بحبها اكتر و بكون متحمس انى ادخلها لكن لما اكلم حد عليها او اهلى و على مستقبلها بحسسونى انها عادية و شغلها قليل فى الوقت دة و خصوصا فى المحافظة اللى ساكن فيها و هى اسوان .. و ان كلية نقل دولى و اللوجيستيات احسن منها من حيث الشغل و المستقبل خصوصا بعد انشاء قناة السويس و كدة !! انا عايز حد بس يفهمنى اكتر بعد الدراسة هعمل ايه ؟؟ و ممكن اشتغل فين ؟؟ و هل شغلها ليه مجال واسع ولا فى اماكن محددة او لازم يكون معايا واسطة او كدة ؟؟ محتاج حد يطمنى على انى هخش الكلية اللى حاببها و اللى هشتغل بيها بردو

=> ارجو الرد من شخص متخرج من الكلية و فاهم شغلها كويس اوووى .. شكرا جزيلا :)

Eng.Mo'men

07-09-2014, 05:24 PM

انا رديت عليك فى الموضوع التاني :)

ahmed ud

08-09-2014, 05:48 AM

شكرا جزيلا لحضرتك :)

zehoooo

31-10-2014, 11:45 PM

طب انا فى علوم حاسب مودرن اكاديمى
كومبيوتر ساينس
ده يعتبر معهد برضو و معادل لتجارة ولا

O.Halawany

09-04-2015, 03:32 PM

بعد اذن حضرتك انا لسى مبدأتش في 3 ثانوي اصلا بس عايز اعرف كم حاجة قبل ما اقرر رياضة ولا احياء
من الاول : انا في العموم مش بحب رياضة بس شكلي كدا هدخل رياضة عشان نفسي اخش هندسة برمجيات
انا حاليا لا افقه اي حاجة في البرمجة بس انا حاببها ونفسي ادخل هندسة برمجيات " ومخدتش اي كورس فيها لان مكنش بيبقى عندي وقت "
فعايز اعرف الاجازة الجايه دي قبل ما ابدأ في موال " 3 ثانوي " هل اخد كورسات في البرمجة ؟ عشان لو ربنا وفقني باذن الله ودخلتها هندسة برمجيات ابقى داخل فاهم حبتين ولا ايه ولو لازم اخد يبقى اخد كورسات في ايه ؟
ياريت اي حد يجاوبني

loodymoody

03-07-2015, 03:44 PM

السلام عليكم
انا كنت حابب اعرف ايه الفرق بين علوم الحاسوب و هندسة الحاسوب و مين الاحسن و مستقبله حلو ؟...و هل حاسبات في الاسكندريه فتحت و لا لسه . جديد ##

loodymoody

03-07-2015, 10:11 PM

السلام عليكم
انا كنت حابب اعرف ايه الفرق بين علوم الحاسوب و هندسة الحاسوب و مين الاحسن و مستقبله حلو ؟...و هل حاسبات في الاسكندريه فتحت و لا لسه . جديد ## ساعدوني .رجاء

loodymoody

03-07-2015, 10:18 PM

alireao

19-07-2015, 04:23 AM

شكرا لك على مجهودك الرائع
انا عايز اسأل سؤال بس طويل شوية
انا بحب الكمبيوتر والانترنت وهوايتى كده ومن صغرى وانا بقعد على جهاز الكمبيوتر بس طبعا انا وصغير كنت بحب الالعاب وكده ولما كبرت شوية بقيت ادخل على النت واتصفح كتير وابحث عن برامج وبدأت اتعمق فى كده ورفع اشياء على الانترنت وغيرها وعندى معلومات كتير عن الكمبيوتر والانترنت وشبكات الاتصال عامة فلو سمحت ايه القسم المناسب لكلامى ده علما بإنى هدخل حاسبات ومعلومات خاص ان شاء الله فلو سمحت ممكن تقولى ايه القسم المناسب لكده وهتعبك معايا :d ممكن تقولى اماكن الجامعات الخاصة ومصاريفها لهذا العام 2015 علما بإن رغبتى انى اروح كلية فى القاهرة وشكرا لكم وارجو الرد
واسف على الاطالة :lol:

RAFDARI

20-07-2015, 02:48 AM

انت بجد....................كوتــــــــــــــــش;)

asd khaled

25-07-2015, 03:21 PM

طـب الكـلام دا مـن 2009 طـب ايه نظامهـا دلـوقت ؟؟

Ahmed _Tawfik

04-08-2015, 01:25 PM

لو سمحت عايزين نعرف ايه هي اقسام كليه الحاسبات والمعلومات الموجوده في جامعه شبين الكوم؟؟؟ ....... وايه افضل قسم موجود بها؟؟؟......وايه هو لقب بعد التخرج؟؟؟..... والخريج له وجود في نقابه المهندسين ولا لأ؟؟ .... والتخصص في جامعه شبين يكون من سنه كام ؟؟؟ ....والاقسام الخاصه الموجوده بيها ومصروفاتها؟؟ ..... يرجي الرد ضروري

ebrcrysasf

05-09-2015, 11:17 AM

انا جايب 52.5% وعايز اخش معهد اوكلية حاسبات ومعلومات ايه المتوفر بهذا المجموع

اسماعيل مجدى كفافى

09-09-2015, 03:50 PM

ى لو سمحت انا جالى معهد القاهرة العالي للهندسة والتكنولوجيا اللى فى التجمع الأول شعبة علوم الحاسب عايز اعرف المعهد ده كويس ولا لا وهدرس ايه فيه وعايز اعرف الفرق بين نظم المعلومات وعلوم الحاسب وهل لو دخلت المعهد ده ايه الفرق بينى وبين خريج القاهرة وشكرا مقدما

mohamedurd

06-08-2016, 11:38 PM

ممكن اعرف ترتيب الاقسام من خلال فرص العمل و احسنهم دراسة

ahmedhuwidi

23-09-2016, 03:31 AM

شكرا علي المجهود ولاكن انا اود ان اعرف كيف، اتقدم لبعثه لكي ادرس في الخارج في امريكا او المنيا او اي، بلد متقدم لدراسه حاسبات ومعلومات وشكرا لك. :022yb4:

fgcux

23-06-2017, 12:32 AM

هل كلية الحاسبات والمعلومات خاص بتقبل طلبة الازهر

على 5554

01-07-2017, 10:50 AM

جزاك الله خيرا لكن عندى استفسار هندسة برمجيات دى خاص ولا حكومى وبتقبل طلبة الثانوية الازهرية ام لا وكم مصاريفها

على 5554

01-07-2017, 10:55 AM

قسم هندسة برمجيات فى كلية حاسبات ومعلومات دا خاص ولا حكومى وهل بتقبل طلبة الازهر وان كانت تقبل كم المصاريف

MOHAMED114114

25-11-2017, 12:39 AM

طيب ايه أفضل قسم من الأقسام في العلم انا بحب العلم والمستقبل والشغل ويكون مكنتو عاليه ويكون بيشتغل بشهاده على طول