http://islam.makcdn.com/image4819_500_361/500X361.jpg

{السلام عليكم ورحمة الله وبركاته}
~~~~~~~~~~~~~~~~~~~~


ياريت يبقي مفيش ازعاج بس انا ماليش حد بيفهم اسأله في الموضوع ده

دلوقتي أنا في أولي ثانوي وناوية إن شاء الله علي صيدلة

بس المشكلة معرفش آخد ايه في تانية أحياء ولا كيمياء؟؟

يعني ناس تقولي خدي كيمياء عشان تمسكي العصاية م النص

وناس تقولي احياء عشان مش هتستحملي أحياء وفيزياء مع بعض!!

وناس تقولي خدي كيمياء عشان تضمني المجموع في تانية ومتحتاجيش تعدليه في تالتة

وناس تريح دماغها وتقولي صلي استخارة وصليت حوالي مرتين ولا حياة لمن تنادي

وأنا شكلي ف الاخر هعمل زي اللي رقصوا ع السلم

ممكن حد ينصحني ويبقي مجرب عشان الموضوع ده بجد عاملي احباااط!!

نصيحتى ما دام انتى ناوية على صيدلة فتوكلى على الله وابدئى بالاحياء لان الفيزياء و الاحياء فعلا تقيلة اوى ومفيش حاجة اسمها امسك العصاية من النص اللى عيز حاجة لازم يتعب عشان يوصلها

صح كلامك بس انا كتبت كيمياء

شكرا ع النصيحة

انتى لو كتبتى كيمياء فى تانية وعدلتى رأيك انك تاخدى أحياء


ممكن تروحى المدرسة وتغيريها

لا طبعاً

الكميا افضل فى تانية

هى ناقصة كميا وفيزيا فى سنة واحدة

ده الدماغ تضرب

الناس كلها بتعمل كده

ومتحاوليش تبقى انت المختلفة عن بقية الناس

أنا هآخد كيميا عشان منهجها طويل مش هتستحمل فيزيا معاها

عموماً شكرا ع النصايح القيمة بجد... لكن والله لو الوزير ربنا يحميه لشبابه << لا لا لا لا

لو جالي وقاللي خدي احياء مش هقوله غير المقابلة انتهت برررراااااااا

انا اخذت الكيمياء فى تانية لان كدة فعلا احنا بنمسك العصاية من النص لان انتى مهما كنت شاطرة انتى مش ضمنة تجيبى الدرجة الى تخليكى تكملى فى حلمك بكلية الصيدلة وكمان ان الفيزيا مع الكيمياء صعبة

انا زيك بالضبط كنت محتارة في الموضوع ده

بس في الاخر اخترت الكيميا ان شاء الله السنة الجاية ..

بس محتارة جدااا في المستوي الرفيع ..ربنا يستر

كيمياء عشان ما تتدبسيش بمجموعك لو لا قدر الله حصلت مفاجأة

انا زيك بالضبط كنت محتارة في الموضوع ده

بس في الاخر اخترت الكيميا ان شاء الله السنة الجاية ..

بس محتارة جدااا في المستوي الرفيع ..ربنا يستر

عربى
رخم وتقيل بس مضمون
في حالة إجادة البلاغة والإعراب اجادة تامة
مع الاكتفاء بقراءة المنهج كل شهر مرة او كل شهرين مرة او حتى كل 3 اشهر مرة والتركيز عليه ليلة الامتحان
المطلوب فيه 14 موضوع قراءة , ومفيد جداً وخصوصا في الثقافة العامة
و هى نصيحة اخ ..
بمعني ان لو انا رجعت بالزمن و عدت السنة دي تاني هختار عربى برده

الكيمياء زي العسل و الفيزياء زي العسل والاحياء زي العسلين
و اللي بيقول غير كدا عايز يكسر مجاديفكوا والله ...

ملحوظة : اقصد عسل ابيض :)

قبل ما أرد عليكي هلفت إنتباهك لحاجة صغيرة بس قولتيها من غير ما تقصدي


وناس تريح دماغها وتقولي صلي استخارة وصليت حوالي مرتين ولا حياة لمن تنادي



صلاة الإستخارة دي الإنسان بيصليها بعد ما ياخد القرار، فبيصلي الإستخارة عشان يبقي وكل أمره لربنا مش أكتر
مش زي ما الناس فاهمه إننا بنصلي الإستخارة وهنستني الإجابة في رؤية أو حلم ... وكمان مينفعش نقول صليت إستخارة مرتين "ولا حياة لمن تنادي" ... أنا عارف إن مش قصدك حاجة غلط بس حبيت ألفت إنتباهك مش أكتر

أنا الحمد لله خلصت تالتة ثانوي السنة دي .. وكنت علمي رياضة مش علوم .. يعني أخدت رياضة 2 بدل الأحياء .. بس هقولك اللي جربته واللي أصحابي عملوه

انا أخدت كيمياء في تانية ثانوي وكانت لذيذة جدا الحمد لله والمناهج كمان كانت صغيرة ... والحمد لله رغم صعوبة إمتحاناتنا بسبب "ذكي بدر " جبت 97% وكنت داخل تالتة ثانوي مرتاح نسبيا الحمد لله .. وفي تالتة ثانوي أخدت رياضيات 2 وفيزياء وللأسف عانيت كتير بصراحة ... مش من صعوبة المناهج ولكن من حجم المناهج .. للأسف المناهج في سنة تالتة كبيرة جدااااااا ... العربي مثلا أد العربي بتاع سنة تانية مرتين .. الرياضة أد الرياضة مرتين .. والفيزياء أد الكيمياء مرة ونصف

الخلاصة ...رغم إن الكيمياء فيه تشابه كبير بينها وبين دروس الفيزياء في القوانين والدروس النظري ... إلا إنها مناسبة لسنة تانية أكتر من سنة تالتة ... لأن منهج الفيزياء كبير جدا وعاوز شغل كتير ... وعلي كلام أصحابي، الأحياء مش كبيرة أوي بس عاوزة حفظ ... يعني الأحسن تاخدي الكيمياء السنادي والأحياء السنة الجاية وربنا معاكي

بالنسبة للمستوى الرفيع ... قدامك مستوى أحياء أو عربي أو إنجليزي ... منصحكيش تاخدي الأحياء لأنك لو دورتي علي المنتدي هنا هتلاقي إن كل اللي أخدوا الأحياء ندموا جدااااا
قدامك إنجليزي أو عربي ... كل مادة فيها ميزة وعيب ... لو إنتي في مدرسة لغات أو تجريبي يبقي الأحسن تاخدي الإنجليزي هيبقي كويس معاكي ... ميزته إن منهجه أصغر بكتير من منهج العربي ... وعيبه إنك هتكتبي براجراف من 20 سطر عن الموضوع اللي هيطلبه منك.
ولو إنتي بتدرسي المواد بالعربي يبقي الأحسن تاخدي العربي ... ميزته إن نصف الإمتحان بيبقي سؤال بلاغة مش محتاج مذاكرة وإن شاء الله مضمون لو إنتي كويسة في البلاغة وتذوق الشعر وكده ... وعيبه إن منهجه 14 درس قراءة، بس بصراحة دروس القراءة صغيرة جدااااا ومفيدة جداااا ... أنا الحمد لله كنت واخد عربي وشايف إنه كويس جدا وممتاز
وإن شاء الله لما تدرسي بلاغة السنة دي هتعرفي إنها سهلة جدا ومبتتذاكرش أصلا ... ونصيحة ليكي إنك لما تاخدي المستوى الرفيع متأجليهوش لحد الإمتحانات .. ذاكريه قبل الإمتحانات بشهرين مثلا ... لأن كل اللي أجلوه لحد آخر السنة إكتشفوا إن عندهم مادة عاوزة تتذاكر وحسوا إنها صعبة وإنهم مش عارفين يذاكروها وباعوا الإمتحان
المستوى الرفيع بيضيف للمجموع 1.25% ... بيفرقوا مع طلبة كتير ... وإطمني تقدري طول السنة تغيري أي مادة إختياري سواء المستوي الرفيع أو الكيمياء والأحياء ... ربنا معاكي
Haitham

أنا الحمد لله خلصت تالتة ثانوي السنة دي .. وكنت علمي رياضة مش علوم .. يعني أخدت رياضة 2 بدل الأحياء .. بس هقولك اللي جربته واللي أصحابي عملوه

انا أخدت كيمياء في تانية ثانوي وكانت لذيذة جدا الحمد لله والمناهج كمان كانت صغيرة ... والحمد لله رغم صعوبة إمتحاناتنا بسبب "ذكي بدر " جبت 97% وكنت داخل تالتة ثانوي مرتاح نسبيا الحمد لله .. وفي تالتة ثانوي أخدت رياضيات 2 وفيزياء وللأسف عانيت كتير بصراحة ... مش من صعوبة المناهج ولكن من حجم المناهج .. للأسف المناهج في سنة تالتة كبيرة جدااااااا ... العربي مثلا أد العربي بتاع سنة تانية مرتين .. الرياضة أد الرياضة مرتين .. والفيزياء أد الكيمياء مرة ونصف

الخلاصة ...رغم إن الكيمياء فيه تشابه كبير بينها وبين دروس الفيزياء في القوانين والدروس النظري ... إلا إنها مناسبة لسنة تانية أكتر من سنة تالتة ... لأن منهج الفيزياء كبير جدا وعاوز شغل كتير ... وعلي كلام أصحابي، الأحياء مش كبيرة أوي بس عاوزة حفظ ... يعني الأحسن تاخدي الكيمياء السنادي والأحياء السنة الجاية وربنا معاكي

المستوى الرفيع بيضيف للمجموع 1.25% ... بيفرقوا مع طلبة كتير ... وإطمني تقدري طول السنة تغيري أي مادة إختياري سواء المستوي الرفيع أو الكيمياء والأحياء ... ربنا معاكي
haitham

حالياً انا فـِ 3 ثانوي واخدت كيميا في 2 ثانوي الحمد لله طلع اختيار صائب وبحاول أمشي السنه دي في الأحياء والفيزيا لأنه اتضح ان الكيميا بالنسبه ليهم لعب عيال بس هي سانداني جامد في الفيزيا والاحياء

النسبه بين مستوايا في العربي إلى مستوايا في الأنجليزي 3:1 وده مش كلامي بس السنه اللي فاتت اللي هيا 2011 قفلت الانجليزي ونقصت ف العربي 2.5 والاخطاء كلها تقنية أو بمعنى أصح اختلاف بين أسلوب النموذج وأسلوبي الشخصي

بس هاخد عربي لأنه مضمون وأنا عامله حسابي في أى وقت إني أحول انجليزي لو ممشيتش في العربي