اعرف ازاي تذاكر يا طالب ثانوية عامة [الأرشيف] - بوابة الثانوية العامة المصرية

مشاهدة النسخة كاملة : اعرف ازاي تذاكر يا طالب ثانوية عامة

The Lord Of The Rings

01-10-2007, 02:07 PM

بسم الله الرحمن الرحيم

الحقيقة انا احترت انزل الموضوع ف انهي قسم .. ف حطيته هنا و ارجو من المشرفين ينقلوه للقسم اللى شايفينه صح
انهارده يا جماعة و اخص طلبة ثانوية عامة .... بحاول اقدم لكم بعض النصائح العامة عن المذاكرة ف ثانوية عامة ..... بحكم ان الواحد عدى خلاص و ارتاح و انتو لسة ف البداية بقا
و الحقيقة ان فكرة الموضوع مش جديدة اوي و موجودة قبل كده ... بس اكيد ممكن تلاقوا نصائح جديدة او مفيدة ...... و التكرار مش وحش ف الحاجات اللى زي دي .... و الصراحة كان فيه موضوع جميل جدا كان كتبه زميلنا محمد البري لنصائح عن مذاكرة كل مادة على حده ... و الحقيقة قعدت ادور عليه اجيبه لكم مقدرتش ... هحاول تاني ان شاء الله

بسم الله

أولا : مذاكرتك .... من دماغك
يعني ايه الكلام ده ...... يعني مذاكرتك ف ثانوية عامة هي الطريقة اللى تريحك .... اللى انت شايف انها بتفيدك و مش بتتعبك ... و اياك تتبع طريقة حد يقولها لك لمجرد انه شاطر مثلا او كده ... لأن دي حاجة نسبية من شخص لآخر ... و اذا كنت انا بنزل موضوع زي ده ... فانا مش بنزل طريقة مذاكرة ... دي بعض النصائح و الحاجات الصغيرة اللى انت ممكن تحاول تطبقها ف مذاكرتك ... و تفيدك باذن الله .... ف اكرر تاني ..... انت تذاكر بطريقتك

ثانيا : خليك صريح مع نفسك
بمعنى .. ان ما دام احنا قلنا انك تذاكر بطريقتك و محدش يفرض عليك طريقة ... يبقى ف نفس الوقت تبقى صادق مع نفسك ... متكروتش الدرس بسرعة بداعي ان هي دي مذاكرتك .... و تقنع نفسك بانك كده ذاكرت 100 100 .... دي حاجة بينك و بين نفسك بقى ....... و يحضرني اللى حصل مع احد معارفي ... كان من النوع ده كده .... كان يقعد يقول لك ... انا راجعت الكيميا مش عارف خماشر تمناشر مرة و العربي كام مرة .... و فرحان اوي .... و لكن بعد ما ظهر الحق و خربت مالطة ... اعترف لنفسه و اللى حواليه ... بان المرة من الى كان بيقول عليهم دي .. كان ممكن يخلصها ف تلات اربع ساعات .... و انت يا اخي مش ف حاجة لكده .... مرة تمام احسن من خمسين كروتة .... و اظن انت او انتي ... بقيت ف مرحلة تقدر تتحمل فيها مسئولية ... و متضحكش على نفسك بسهولة كده ... انت بتحدد مستقبلك

ثالثا : اكتب بايدك
و دي حاجة الصراحة مفيدة جدا جدا جدا جدا للطالب ... و خصوصا ف المواد النظرية .... الكتابة باليد ... بتثبت المعلومة ... بطريقة متتخيهاش ..... تذاكر الدرس ( بطريقتك عادي ) ... و متكتبش ف ساعتها ... لأنك اساسا لسة مذاكره ملحقتش تقع منك حاجة ... لكن مثلا ممكن تيجي تاني يوم تكتب الدرس او كل اللى انت تعرفه عنه ... كل اللى في دماغك ... و بعد كده ممكن بعد اسبوع ولا اتنين و انت بتراجع الدرس ...... متفتحش الكتاب عليه على طوول كده ... لأنك كده كده حتى لو كان فيه حاجة واقعة منك .. بمجرد م تشوفها ف الكتاب هتقول ايوة ايوة انا عارفها .. و هي واقعة منك اساسا ... تعمل ايه بئا ... تراجع بانك تكتب تاني .... كل حاجة ف دماغك عن الدرس ... و بعد م تعصر دماغك ... و تكتب .... تشوف بئا ايه اللى وقع منك ... و تقارن اللى انت كاتبه ( عصارة نفوخك ) بالدرس نفسه ... ده هيديك رؤية اوضح عن مذاكرتك للدرس ... و مقياس كويس لتذكرك ... و ف نفس الوقت اهي طبعا مراجعة .... زي م كانوا بيقولوا لنا زمان ف حفظ القرآن ... لو كنت عايز تراجع سورة انت كنت حافظها ... متفتحش تقراها كده على طوول ... لأ . حاول تسمعها لنفسك و هات اخرك ف التذكر لحد م تقف ... ساعتها افتح و شوف
* حد يقول لي م انت بتقول لنا طريقة مذاكرة اهي و عايزنا نطبقها .... اقول لا .. طريقة المذاكرة اللى اقصدها هي اول مذاكرة للدرس ... انت بتدخل المعلومات ف دماغك بطريقتك ... اما الكتابة دي فهي حاجة مساعدة تعملها بعد مذاكرتك لتثبيت المعلومة ... و بعدين ممكن حد يجربها يحس انها مش فارقة معاه اوي عما كان قبل م يكتب ... و ان الكتابة بتضيع وقته من غير نتيجة كبيرة ... انا اول واحد بقول له متكتبش ...... لكن الحقيقة ان طريقة الكتابة دي جابت ثمارها مع ناس كتير .......................

رابعا : اللى يزيد عن حده ينقلب ضده
ايه ده ..... اقول لكم .... طبعا محدش يختلف على اهمية ثانوية عامة ف حياة اي طالب .... و طبعا لازم اهتمامك يزيد بيها عن السنوات الدراسية التانية ... و لكن .. في حدود المعقول .... اوعى اهتمامك يزيد عن حده ... هينقلب ضده ... ازاي ... عن طريق حاجات كتير :-
1- لو اهتمامك زايد اوي ... طبعا الحماس اللى ف الأول ده ( اللى هو طبيعي عند كل الطلبة ) هيبقى كبير اوي ...... هتذاكر كتير ... تحرق نفسك مذاكرة ... تجبر نفسك ع الكتاب .....م انت متحمس اوي لاهتمامك اهو ... غلط كبييييييييير ... المذاكرة الزيادة دي .... هتخليك توصل ف يوم من الايام ... و غالبا بيبقى ف الترم التاني ..... ان انت وصلت لحالة زهق و ملل قصوى ... او تشبع بدرجة اصح ... مش طايق الكتاب ... كرهته ...... لو تجبر نفسك تذاكر ... ممكن توصل بيك الدرجة انك قاعد قدام الكتاب ... و الكتاب مفتوح .. و انت عينك فيه ... بس مش بتقرا ... خلاص انت جبت اخرك معاه ...... و ممكن من زهقك بتقنع نفسك انك كده بتذاكر فعلا ... لأنك مش عايز تواجه نفسك بحقيقة انك مش قادر .... و نرجع بقى لنقطة الصراحة مع النفس تاني ...... خصوصا انك ف الفترة دي المفروض انك بتستعد تزود من طاقتك شوية عشان موسم ما قبل الامتحانات داخل ....... طبعا انت متخيل حالك هيبقى ازاي !!!!!!!!!!!!!
2- لو اهتمامك زايد عن الحد برضو ....... هينقلب ضده ... هينقلب لتوتر و قلق دائم ...... و خصوصا طبعا ف موسم الامتحانات و ما قبله ..... هيخليك دايما متوتر و متنشن .... لأنك مديها اهتمام اكبر من اللازم ..... و دي حاجة طبعا بتأثر عليك ف امتحاناتك .... خوفك يزيد ... و دي حاجة مش ف مصلحتك ........
3- ارجع و اقول ... ثانوية مش زي اي سنة .... لآزم تهتم بيها .... و لكن في حدود المعقوووووووووول !!!!

خامسا : محدش بيجري وراك
و دي حاجة يمكن انتم استخلصتوها من الكلام اللى فات ....... ابدا دراستك بمذاكرة عادية خالص ... متفتحش ع الرابع .... متقعدش تقول انا هاسبق انا .. ارتاح ... و الله لو عندك مقدرة .. ميمنعش ( لكن الصراحة مع النفس للمرة ال 100 ) ..... لكن ذاكر بطريقة عادية جدا .. اهم حاجة ... ميفوتكش درس معين تأجله ... تخلص كل درس اول باول .... اللى تذاكره تخلص عليه ... تبقى مذاكرة بضمير ....... و خلى الشد و الفتح ع الرابع ده ف الموسم بتاعه .... اللى هو الترم التاني ..... و النص الأخير منه على وجه الخصوص ..... ساعتها ... افتح ع التامن يا عم ...... ولا يهمك

سادسا : نظم مذاكرتك
يعني ايه بقى .... متهيأ لي العنوان باين .... لكن عايز بس انبه لحاجة ..... موضوع انك تعمل جدول لنفسك ف المذاكرة و تمشي عليه .... ده برضو موضوع نسبي من شخص للتاني .... يعني اياك تجبر نفسك على عمل جدول اذا كنت شايف انه هيعمل معاك مشاكل او حاجة ..... ناس تانيين وجدوا ان الجدول نظم لهم المذاكرة بشكل طبيعي و ماشي معاهم فل الفل .... يبقى مفيش مانع ... مش قلنا ذاكر بالطريقة اللى تريحك ....
- و لكن بشكل عام ... اللى احسن من الجدول ..... انك تنظم مذاكرتك على اساس المواد مش على اساس الوقت ..... يعني ايه .... يعني انت ف الجدول بتمشي نفسك على وقت معين تذاكر فيه حاجة معينة .... ده ممكن ف بعض الأحيان ياخد من حق مادة معينة .... مثلا انت جه عليك وقت و ف اي ظرف من الظروف مضطر تذاكر فيزيا اكتر ... عندك امتحان مثلا او كده ..... لو ربطت نفسك بالجدول ممكن تلاقي الوقت ده مثلا عربي ولا اي حاجة ....... طيب و بعدين
زي م قلت حاول تنظم نفسك من نفسك .. مش بورقة و قلم .... حاول توازن المذاكرة بين كلمادة و التانية حسب احتياجك ليها ف الوقت الحالي ... فيما لا يخل بانك تكون لامم كل المواد و مخلصها .... يعني مش معنى انك تذاكر فيزيا مثلا عشان محتاجها دلوقتي ... تنفض لمادة تانية زي العربي عندك نقص فيها .... زود فيزيا آه .... تخل بالتوازن لأ ..... دي كلها حاجات انت تقدر تظبطها مع نفسك .... و بتدخل فيها اهم حاجة قلتها فوق ( الصراحة مع نفسك ) .... أوعى تضحك على نفسك ..... انت الخسران

سابعا : اللى فات مات
دي حاجة ليها علاقة بالامتحانات ... اي نعم بدري اوي عليها .... لكن بالمرة بقى ..... اثناء الامتحانات .... اوعى تخلى حلك ف مادة يأثر ف المادة اللى بعدها ...... انا مثلا كنت ماشي مع مبدا معين ..... انا مثلا لما اخرج من امتحان .... اراجع مع مدرسي زي م انا عايز ... اتكلم و اتضايق زي م انا عايز ..... لما اروح البيت انام من التعب شوية ..... اصحى من النوم ناسي المادة دي للأبد .... مليش علاقة بيها .... كأني ممتحنتش فيها .... اعتبر " القيلولة " دي فاصل نهائى للمادة دي ...... لأن كثير من الطلبة من النوع اللى لو مثلا لقى نفسه لا قدر الله ... عنده حتة واقعة ف الامتحان ولا حاجة..... يفضل متضايق و مكتئب و حاله حال...... طبعا ده بيأثر على الامتحان اللى بعده ...و على المذاكرة بتاعته ..... دي حاجة مهمة ........ و ده برضو يندرج تحت مبدأ ... التوكل على الله

ثامنا : توكل على الله ( و دي اهم حاجة )
خليك دايما مؤمن بانك ما دام عملت اللى عليك بكل صدق و اجتهدت ... ان الله لا يضيع اجر من احسن عملا ...... و توكل على الله .... و خليك مؤمن ان ربنا عمره م هيضيع مجهودك

دي كانت شوية ملحوظات عامة ارجو انكم تستفيدوا بها
و قريب ان شاء الله نتكلم عن كل مادة و مشاكلها

التوقيع
طالب اجتاز ثانوية عامة
و بيحبكم ف الله

بلال سلامة

احمدمحمود

01-10-2007, 03:05 PM

ياريت حد يعمل موضوع زى ده

بس لطلبة الجامعة

احسن اخوكم متسوح

موضوعك جميل

The_Relativistic200

01-10-2007, 03:20 PM

ابدعت يا ولدى
نصايح حلوة همشى عليها ان شاء الله:):)

=========================
لكن انا هقول على جزء من تجربتى فى الثانوية
انى دخلت ابيض يا ورد
لقيت نفسى غبى ومش فاهم حاجة
والنقطة اللى بلال بيتكلم عليها
واحد مثلا يقوللك انا حليت تلاتين امتحان
الاستاذ بتاعنا ده ميه ميه بيخرجك حافظ من الدرس
وتبتدى تحس انك فى وادى.....واصحابك اللى مثلا مش معاك فى نفس الدرس و الاستاذ فى وادى تانى خالص
ويقوللك خد السؤال ده...
ده خدنا فلان الفلانى حله
ومتعرفش تحله فعلا
وتحس ان ناس كتير احسن منك
كل ده هجايص!!!
اى حد بيتكلم على استاذه وبيقول عليه انه عمل وسوى فى الحصة
احسنلك نفضله واحلقله كمان
لان الناس دى اخرها 80 %
وده عن تجربة يعنى
:)
ذاكر براحتك اوى
امتحانات الدروس مش هنكر مهمة فى بعض الفترات
فى الفترات اللى انت مش مذاكر مثلا فيها جزء كبير
فبتحط نفس تحت ضغط الامتحان وضربت اربع عصافير بحجر
ذاكرت او حتى خدت فكرة على اللى مذاكرتهوش احسن من مفيش طبعا
اتحطيت تحت ضغط الامتحان اللى هو مصيبة لواحده
قيمت نفسك وسط زمايلك
عرفت هتبدا منين تلم منهجك اللى انت واخده

صحيح
وجهة نظرى انك تبقى راجل وناضج بما فيه الكفاية ومتسمعش نصايح حد
لان انت عارف اخرك وقدراتك ...ومش محتاج حد يوجهك.....
وده انا عملته مع نفسى الصراحة
بسمع من ودن ولابطلع من الودن التانية
ولا عمرى سألت حد يقوللى اعمل ايه

نقطة تالتة بلال ما ذكرهاش
انك متفكرش فى مستقبلك وتعيش اخلام اليقظة كتير
انك تبقى مهندش مثلا او دكتور او علاف
سيبك من المستقبل
فكر فى اللى معاك وفى ايدك بس

بس كده
مش هزود حاجة على اللى قالها بلال
هو يعرف ينصح اكتر منى:d

fares elnet

01-10-2007, 04:18 PM

شكرا يابلال على النصائح اللى قدمتها

لاخوانك واخواتك فى المنتدى

بارك الله فيك وجزالك كل خير

The Lord Of The Rings

01-10-2007, 06:07 PM

جزاكم الله خيرا ع المرور يا جماعة

و متشكرين يا خالد باشا ع الأضافة الجميلة

اكيد هتفيد الناس

متشكريين

واحـد من النــاس

01-10-2007, 06:16 PM

اخص اخص .. متأخر اوووووي يا بلال .. بعد الـ 86.5% يابني .. اعمل بيها ايه النصايح دي يا حبيبي ..

بس تسلم ايدك .. هحاول اطبقها ف تالتة وانفد بجلدي من كلية الشعب .. نصايح حلوة .. بس المهم التنفيذ

والتعود .. لاني اكتر واحد بيسمع نصايح بس عمره ماطبقها والدليل .. اني قاعد دلوقتي ع النت اهو

ومعنديش دم ولا قاعد اذاكر ههههه

سلاااااااااااااااام

MohammeD el_SadaT

01-10-2007, 06:18 PM

الله يبارك فيك يا بلال
بجد الموضوع أكتر من ممتاز
حطيت فيه كل خبرتك وتجارب السابقه
ودى حاجه أنا أهنيك عليها
وبشكرك على لسان جميع أعضاء المنتدى

وبعد إذنك بما إن الركن العام أنشط قسم أنا هنقله فيه عشان الفيده تعم

CrazY Bo$S

01-10-2007, 06:38 PM

شكرا يا باشمهندس بلال عالموضوع الجامد ده وان شاء الله يفيد كل طليةثانوية بس فى ناس كتير بتسمع وتنفض زى واحد صاحبنا الله يسهله .. ماعلينا
إنت عملت اللى عليك وجبت خلاصة التجربة وجزاك ربك خيرا على ذلك
إن شاء الله ياجماعة اللى هيطبق النصايح دى بإخلاص حيطلع الرحلة أو يجيب امتياز :p:p

..Just Stop

01-10-2007, 07:53 PM

ان الله لايضيع اجر من احسن عملا

بصراحة دى اكتر حاجة عجبتنى فى الموضوع يابلال

يعنى اللى يزرع شوك هيحصده شوك
اللى يزرع تفاح هيحصده تفاح
اللى مش هيزرع حاجة مش هيلاقى حاجة يحصدها

الكلام كتير يا بلال
والتنفيذ سهل
والناس نايمة

اسهل حاجة فى الدنيا الثانوية
بس مين يصدق

عموما مش هطول عليك
شكرا على النصايح يا بلال
وشكرا على الاضافة المهمة يا خالد

وربنا يوفق الجميع

أحمد2025

01-10-2007, 10:41 PM

الله عليك يابلال
والله نصائح مفيدة حقا
موضوع عظيم من عضو أعظم

The Lord Of The Rings

01-10-2007, 11:49 PM

شكرا جزيلا للردود الجميلة دي

الله يكرمكم

mR . mOstafa Fathi

02-10-2007, 01:31 AM

الله
يسلمو الايادى يا يلال

Crazy Pharma Boy

02-10-2007, 01:34 AM

:d موضوعي اتحذف يا بلال

بس كويس موضوعك يا باشا :)

اما اللي بيسأل عن نصايح لطلبة الجامعات والله اظن اننا نزلنا موضوع في قسم الجامعات المصرية

ربنا يوفقك يا بلال ويوفقك الجميع :)

The Lord Of The Rings

02-10-2007, 04:45 PM

ليه كده موضوعك يحذف يا بري .... ده كان موضوع جامد جدا و الله

*****************

The Lord Of The Rings

02-10-2007, 09:16 PM

اللغة العربية

يمكن العربي من اكتر المواد اللى ممكن تعمل مشاكل لطلبة كتير .... او بلاش اعمم ... ع الأقل بالنسبة لي و اصحابي اللى معايا و المعارف و كده .... كانوا كلهم حاسين ان العربي ممكن يعمل لهم مشاكل ..... و خصوصا عربي تالتة .... بس كانوا بيختلفوا ف الفرع يعني كان بعضهم بيتضايق من النحو و ناس من الأدب و غيره ..... ع العموم خلينا نتكلم عموما عن كل فرع .... و الكلام يشمل تانية و ثالثة

أولا : القصة
- خلاصة الكلام ... تقراها .. كاملة ....... ناس كتير جدا هيقولوا لك الملخصات تجيب م الآخر ... و يدللوا على كلامهم باسئلة معظم امتحانات ثانوية عامة اللى فاتت .... كانت متخلفة لدرجة غريبة الصراحة .... تخلى اللى ميعرفش حاجة عن القصة يجاوب ...... لكن !!!!!!!!!!!!!!!!! انت ايش ضمنك ان ممكن ممتحن السنة دي ميلفش .... و حصلت كتير .... زي الدفعة اللى قبل اللى فاتت .... ( لما كنا احنا ف تانية ) ... حب يغير ف الامتحا كتير ...... محدش يقدر يفتح بؤه معاه ........ و بعدين انت عايز تتعلم تعليم صح .... مش تعليم و السلام ...... و لكن قليل اللى بيعتقد ف فكرة التعليم الصح دي ...... خليك منهم
- ممكن تقول ... قصة تالتة طويلة جدا ... مملة .... مش قادر ...... اقول لك .... معلش .... اعصر على نفسك لمونة و اقراها برضو :D ..... انت عايز تفوق ....... مش نجاح

ثانيا : القراءة
- دي بقى مبتعملش اي مشاكل مع اي حد على ما أظن ...... لأنه حتى مهما كان الدرس مثلا انت مش حابه .... اهو بكتيرة صفحتين ولاحاجة .... مش هي اللى تعمل لك مشاكل ..... اسئلتها مكررة ف كل حتة ..... ف اللذيذ يعني

ثالثا : الأدب
- مشكلة المشاكل ...... لكتير من الطلبة ... خصوصا ف ثالثة ..... لأنه طويل جدا ....... و حفظ ....... مش عارف كام مدرسة شعر ...... لكل واحدة خماشر تماناشر خاصية ..... ده غير المكملات ........ و غيره
- ده بقى ملوش حل ....... حتعمل ايه .... لازم هتحفظ ...... بس اللى يساعدك اوي اوي ..... موضوع انك تكتب بايدك اللى كنت اتكلمت عليه قبل كده ده ...... يسهل لك الحفظ جدا ......
- حاجة تانية مسهلة جدا ..... و هي انك بالأمارة تفتكر ..... يعني ايه .... يعني مثلا فيه 10 نقط مثلا عايز تحفظهم ...... تاخد كلمة واحدة مميزة من كل واحدة ....... و تحط الكلمات المميزة دي لوحدها مع بعض ...... و تحفظهم ...... لما تيجي تسترجع بقى .... تفتكر الجملة المميزة دي ...... كل كلمة فيها تفكرك بنقطة ...... الموضوع ده و الله بيسهل كتير اوي ......
- غير كده ....... مش عايزك تحفظ صم صم ...... اللى هو لازم تحفظ الكتاب كاتب ايه بالظبط ....... لازم تخلى لنفسك اي مجال انك تكتب باسلوبك ..... بس عن نفس النقطة طبعا ...... متكتبش موضوع تعبير عن حتت تانية ....................

رابعا : البلاغة
- دي بقى مافيهاش مذاكرة .... هتذاكر فيها ايه ..... البلاغة بتعتمد على حاجتين :-
1) على الاستعداد الشخصي لطالب ... و قدرته على استخدام ادوات الغة ... و معرفتها بالمفردات العربية و تركيباتها ..... لأن 75% من حل سؤال البلاغة هو انك تفهم القطعة او الأبيات اللى جاية لك ........ و النقطة دي فروق فردية .... و تعويضها بيحتاج لحاجات اعلى من الدراسة نفسها ... و هي ان الواحد يقرا كتب عربية كتير ... و القديم منها خاصة ... عشان يتعمق اكتر ف اللغة
2) الحل الكتير ....... و دي حاجة ف ايدك ...... كل م تحل قطع بلاغة كتير كل م تبقى اقدر ع الحل اسرع و تفهم اكتر ....... و بيني و بينكم .... البلاغة اساسها ان الواحد يكون متأسس فيها كويس ... يعني نسبة كبيرة منها بتعتمد ع المدرس ...

خامسا : النصوص
- متهيأ لي برضو النصوص مشكلتها مش كبيرة اوي ...... اصل النص عبارة عن ايه غير ... انك تفهم المفردات ( و اللى على اساسها انت بتفهم شرح النص ) ..... و مواطن الجمال ..... و دي بما انك المفروض دارس بلاغة ... يعني تقدر تستخلصها بنفسك ..... بس برضو لازم تقرا كل مواطن الجمال اللى ف الكتب ..... و انصحك كمان انك متاخدهاش مسلمة كده ..... يعني مش تقرا دي مثلا استعارة و خلاص ...... حاول تاخدها من وجه نقدي.... يعني تقول لنفسك دي مكنية ليه و دي تصريحية ليه ..... و كذلك ف الايحاءات و الدلالات .... متاخدهاش برضو مسلمة كده .... حاول تقنع نفسك هو جابها كده ليه ... و ازاي ..... لأن الطريقة دي هتخليك انت نفسك احسن ف مواطن الجمال و مش هتضطر تحفظها صم كده ...... و برضو بتقويك ف البلاغة عموما
- الحاجة المهمة الوحيدة ف النصوص ..... هي التعليق اللى ورا النص ...... اللى بيبقى فيه الجو العام و الظروف المحيطة بالشاعر و ملامح شخصيته و اسلوبه و هكذا ... و النقد اللى يوجه له ....... لأن دي اللى فيها البهاريز يعني .... و من المفترض ان سؤالها اساسي ف الامتحان ..... الحاجات دي ممكن تكون حفظ شوية لكن لو اتبعت طريقة جملة الكلمات المميزة ...... مع طريقة انك تفهم كل واحدة جت ازاي و ايه اللى خلاهم يقولوا ع الشاعر كده مثلا ... و طريقة التسميع بالكتابة .... الطرق دي هيقربو لك الدرس اوي
لكن ده طبعا ميمنعش انه يكون فيه نسبة حفظ برضو ........

خامسا : النحو
- ممممممم ..... النحو ده كتير جدا من الطلبة كانوا بيقولوا ان ده هو المشكلة الكبرى ... البعبع بمعنى اصح ...... النحو ده بيعتمد كلية على التاسيس .... لو انت اتاسست كويس فيه من زمان ... مش هيمثل لك مشكلة خالص ...... بس طبعا زمان ده خلاص عدى .... خلينا ف دلوقتي .......
- الصراحة انا مش عارف اقول ايه بالظبط لكن عموما اتطرق لكام نقطة كده :-
1) فيه قاعدة نحوية اساسية و قديمة قوي بتقول ... " الفهم شطر الأعراب " .... و ف رواية " المعنى شطر الأعراب " ..... لازم تحط الكلمة دي ف دماغك ........ اياك ثم اياك ثم اياك ... انك تتبع طريقة برايل بتاعة كثير من المدرسين ... طريقة حسس ولا تفهم ... من اللى يقولك ( نكرة + نكرة = نعت ) ولا ( نكرة + معرفة = مضاف اليه ) و الحاجات دي ..... اياااااااااااااك .... انت ممكن تلجأ للحاجات دي ف الاعرابات الثابتة بس.... زي مثلا الكلمات اللى يها اعراب ثابت ف اي حتة .... بسسس ...... غير كده ف الاعراب ... لازم تتبع القاعدة اللى قلتها دي ...... افهم الجملة الأول ..... فصصها ... متبصش للكلمة اللى تحتها خط على طوول كده و اللى قبلها و اللى بعدها بس على قد الاعراب ...... غلط
هضرب مثل بسيط .... مثلا لو فيه جملة ( شرب الولد اللبن ) مثلا ...... عايز تعرب الولد ... تقول لنفسك الكلمة دي ايه دورها ف الجملة .... محطوطة ليه .... بتعمل ايه للمعنى ... آآآآآآه دي بتدل على اللى عمل الفعل ... تبقى فاعل ...... انا بس بضرب مثل على حاجة هايفة عشان اوصل الفكرة يعني ..... مش عيب تقعد تفكر ف الأعراب من الناحية دي .... و دي كمان تفيد جدا ف المنصوبات ... لأنها بتبقى شبه بعض اوي ........ ممكن تحس ان الكلمة حال و مفعول مطلق و مفعول لأجله ...... و الطريقة دي هي الوحيدة اللى هتفرق لك بوضوح ...... الكلمة دي محطوطة عشان تبين الفاعل كانت حالته عاملة ازاي ... ولا عشان تبين لك هو عمل الحاجة ليه ... و هكذا ... تقول لنفسك كده ...... تحلل الجملة ..... و كل ده اتباعا لمبدا " الفهم شطر الاعراب " ............

2) النحو مادة تراكمية ..... سيبك من الكلام اللى بيطلع كتير ده لما مثلا بتوع ثالثة يعترضوا يقولوا لك النحو من دروس تانية ...... طيب ماهو بيجيلهم ف الاعراب كلمات فاعل و مفعول و حاجات كده ..... طيب م الحاجات دي من رابعة ابتدائي ... ماعترضوش ليه ؟؟؟؟
خلي ف دماغك انك مطالب بالنحو اللى درسته ف حياتك كله .... متاخدش النحو على قد دراستك الحالية بس لو انت ف تانية ...... ع العموم فيه كتاب كانوا سلموه لنا ف اولى ثانوي ( مش عارف اذا كانوا لسة بيسلموه ولا لأ ) ... هو كتاب شامل لمعظم قواعد النحو اللى انت خدتها و اللى انت مطالب بيها ...... الكتاب ده مهم جدا ..... الجأ له ف اي حاجة حاسس ان انت ناسيها او كده ........

3) لو حاسس ان النحو بيمثل لك مشكلة فعلا ..... اتدرب كتيييييييييير اوي اوي ..... و اعرض حلولك على اي مدرس ..... و زود اكتر لو حسيت ان لسة فيه مشاكل .....

سادسا : التعبير
- مش هقول فيه اكتر من حاجة مهمة بس ...... اوعى تتبع الكلام اللى بعض المدرسين بيرددوه من القوالب دي ... من أمثال " انه لمن بلاغة اللسان و سحر البيان ان نتكلم عن هذا الموضوع لأن . . . . لوك لوك لوك " ..... بيدوا مقدمات ثابتة و خواتم ثابتة كده ......بلاش بلاش ........ اكتب كل حاجة من دماغك ....... الكلام ده ضحك ع الدقون .... و للأسف معظم الطلبة بيستسهلوه و بيلجأوا ليه ... مع ان ده و الله حاجة غلط جدا ...... و بعض السنين على فكرة كانوا ف التصحيح بيتعمدوا ينقصوا اللى يلاقوه لازق مقدمة محفوظة كده ..... اصل على فكرة المقدمات دي بتبقى معروفة اوي

انتظروا القادم باذن الله

تحياتي

CrazY Bo$S

02-10-2007, 09:39 PM

خطييييير يابنى والله

CrazY Bo$S

02-10-2007, 09:41 PM

بس يا بلال لو ضميت الشرح ده للموضوع الاساسى فوق حيبقى افضل بدل م بتاع الثانوى يدنه يدور فى الصفحات ( قريبا يعنى )

The Lord Of The Rings

02-10-2007, 09:44 PM

بص يا باشا

لو اعرف كنت اعملها و الله

خلى اي مشرف يعملها و انا موافق عشان هي فكرة حلوة و الله

CrazY Bo$S

02-10-2007, 09:49 PM

بالتوفيق ........

The_Relativistic200

02-10-2007, 10:10 PM

The Lord Of The Rings

02-10-2007, 10:28 PM

اضافة صغيرة يا بلال
اختصار ما قولت فى لعربى ...وكلامك حلو على فكرة
ان العربى محتاج واحد حفّيظ
فى ما عدا النحو والبلاغة
وملحوظة برضو
ان النحو ولبلاغة هم للى بيفرقوا بين طلبة الثانوية العامة فى المادة
لانهم لامؤاخذة بيدلوا على الفهم
لان المنهج كاملا سواء بتعلقات نصوصه او القراءة انا بسميه حفظ مقنع
يعنى انك اقتنعت ان مش هييجى الامتحان غير من التعليق او هييجى منه سؤال فتصمه احسن
وسكمن بكمن:)
نقطة ياريت تكلمنى انا فيها:)
وهفتحلك مجال للكلام خصوصا فى العربى ...

اولا: جزئية اسئلة الاختيارات فى العربى بالذات
وازاى انها ملهش حل
وان السؤال لو جاله اينشتين نفسه هيرقص من غموض السؤال
وايه حلها من وجهة نظرك؟؟
هل ممكن تتحل الحاجات دى بطريقة حادى بادى
بطريقة ام سعيد....يعنى اختار اول اختيار وخلاص؟؟
بص يا خالد باشا ... اهى دي حاجة من الحاجات اللى بتدل على تخلفنا .... هقول عنها ايه يعني .... مستشار تلاقيه وصل للمركز ده بالواسطة مش بالكفاءة .... فاكر نفسه لما يقلب اسئلة غبية يبقى كده حط بصمته ع الامتحانات .... و كل ده على دماغ الطلبة ... فعلا اسئلة ملهاش اي لزمة ف الحياة .... هو الأحسن بدل م يقول اختار الاجابة الصحيحة من بين الأقواس ....... المفروض يقول ... " امامك اربع اجابات صحيحة ... اختر اللى المستشار عايزها من بين الأقواس " ...... و للأسف انا ماقدرش اقوللك طريقة معينة تتحل بيها ..... هقول ايه يعني ...... اهو الواحد يختار اللى قلبه يقوله صح .... اصل عقلك هيقول على كله صح ... انا عارف انت اكيد بتتكلم على امتحان تانية بتاعنا :p
وهل الاسئلة دى بتقيس حاجة فى مخ الطالب؟؟؟
طبعا لأ .. ده اذا كانوا معتبرين ان الطالب ليه مخ و هم بيحطوها
وتفتكر ليه الاساتذة بيختلفوا فى حلول الاسئلة دى
من نفس المنطلق .... سؤال غبى حله مش واضح ... حله الوحيد هو اللى ف دماغ واضع الامتحان
ولا تفتكر احسن حل انى ادعى انها ما تجيش خالص:p
بالظبط ... انت كده جبت من الآخر :D

بجد فعلا انا لغاية دلوقتي مش لاقي اي طريقة لحل الأسئلة الغبية كده

ماهو للأسف يا خالد ان بعد المذاكرة و كل حاجة ... بتيجي امتحانات متفرقش بين طالب و تاني

و ع الدنيا .......... سلام

FRANKENSTEIN

03-10-2007, 10:59 PM

ثالثا : الأدب
- مشكلة المشاكل ...... لكتير من الطلبة ... خصوصا ف ثالثة ..... لأنه طويل جدا ....... و حفظ ....... مش عارف كام مدرسة شعر ...... لكل واحدة خماشر تماناشر خاصية ..... ده غير المكملات ........ و غيره

مظنش يا بلال ان الادب بتاعنا كان طويل اوي دا بالعكس كان صغير ومسلي
وميزته انك بتطبق وبتفهم مش بتحفظ زي الحمار وبس
يعني كان فيه تشغيل دماغ شويه
والقصه بجد مش عارف الناس كانت بتشتكي منها ليه رغم ان اي حاجه لطه حسين لازم تبقي ممتعه :D

The Lord Of The Rings

06-10-2007, 12:50 AM

مظنش يا بلال ان الادب بتاعنا كان طويل اوي دا بالعكس كان صغير ومسلي
وميزته انك بتطبق وبتفهم مش بتحفظ زي الحمار وبس
يعني كان فيه تشغيل دماغ شويه
والقصه بجد مش عارف الناس كانت بتشتكي منها ليه رغم ان اي حاجه لطه حسين لازم تبقي ممتعه :D

انا قلت لكتير من الطلبة يا بيسو مش للكل
هو ع العموم انا رايي يمكن مش معاك شوية و لكن ع العموم اختلاف الراي لا يفسد للود قضية :D
و احنا خلصنا اساسا نختلف ليه بقى :D

The Lord Of The Rings

06-10-2007, 12:51 AM

الرياضيات

- الرياضة بقى كلها .... مينفعش افصل لك بين فرع و فرع .... كله ف النهاية رياضة ....
- الرياضيات عشان تتعامل معاها لازم تحبها .... اياك تفضل حاطط ف دماغك .... انك مش حاببها ... او مش طايقها ...... لأني عارف ان فيه طلبة كتير مش بيحبوها ... زي طلبة الأدبي .... او الطلبة اللى مش بيحبوها من زمان و ناويين على احياء .... الكلام ده كله طبعا ف رياضة واحد .....

- عايز اقول ان الرياضيات بتعتمد بشكل اكبر ع الطالب مش ع المدرس .... لأن المدرسين مهما اختلفت طرق تدريسهم ..... يا تفهم 100 100 .... يا متفهمش خالص ..... و نسبة مدرسين الرياضة اللى ممكن مفهمش منهم .... قليلة جدا جدا جدا .... لأنهم ف الآخر مدرسين رياضة .... مش حاجة سهلة ....

- بعض المدرسين بيتبعوا ف شرحهم طريقة الشرح المفصل ... اللى هو يجيب لك اصل الموضوع من اوله ... و فيه مدرسين بيعتمدوا انهم يدوك القوانين .... و يحلوا كذا مثال ..... و بعدين كثرة الحل ...... و دول ليهم طلابهم ..... و دول ليهم طلابهم .... و على رأي المثل ..... كل شيخ و له طريقة

- بغض النظر عن المدرس و طريقة شرحه ...... مهما كان ..... الطالب مفروض انه يقتل الدرس ..... يعني اهو اخد الدرس خلاص .... ساعة المذاكرة حاول على قد م تقدر متخشش ع المسائل كده خبط لزق بداعي انك لسة واخد الدرس ...... لأ ..... برضو اديها ف الأول حتة نظري كده ....... اقرا الدرس من كتاب المدرسة ....... و دي يمكن حاجة غريبة ...... بس لها مميزات ..... انها بتثبت الدرس اكتر و اكتر ...... بتعرف افكار الأمثلة اللى ف الدرس ماشية ازاي ....... و مهما كان انا اعتقد انك لما تعرف المعلومة اصلها ايه او جاية ازاي ... احسن بمراحل من انك تعرفها مسلمة كدا ..... و الكتاب بيبقى كاتب كلمتين كدا ... اي نعم ممكن تعتبره رغي ..... بس و الله بيقرب الفكرة ..... و مش بقولك ضيع وقت كتير ف الحوار ده ....... بس ف نفس الوقت متهملوش

- نيجي بقى للمهم ..... الحل .......... و كما قال الشاعر العظيم ف معلقته الطويلة " الرياضة حل "
متزهقش من الحل ....... حل على قد م تقدر ...... من كل حتة .......

- عايز اقول حاجة ...... ساعات كتير ممكن تلاقي ف اخر التمرين مثلا مسائل عقر ...... خصوصا ف النماذج ..... و ف بعض الكتب الخارجية زي ( لامي ) - و ده الكتاب اللى بنصح بيه الصراحة - ........ و ممكن تقف معاك شوية ........ اوعى تعقد نفسك ........ اعرف انهم بيبقوا حاطين دول مش للدراسة عموما ....... زي م بيقولوا للمتميزين ... و الله ولا للمتميزين ..... هي بتبقى كده يقوللك بس ان الرياضة فيها حاجات عقر و كده يعني ...... متحطش ف دماغك ...... طبعا لازم تحاول فيهم .... و تعصر دماغك

- اذا ماقدرتش تحلهم اوعى تقعد تعقد ف نفسك و تكره الرياضة اكتر و اكتر .... ممكن تشوف حلولهم اذا كانت مكتوبة و تعرف الفكرة ..... بس برضو هنرجع لحتة الصراحة مع النفس... يعني متجيش ف المسائل اللى ف الأول اللى بتبقى مباشرة و تقف فيها .... تقول لنفسك دي من المسائل الصعبة ... و تضحك على نفسك ..... لأ ... ساعتها هتبقى اكيد محتاج تقوي نفسك .... ممكن تخلى المدرس يقوللك ايه المسائل الصعبة اوي اللى هي فوق مستوى الطلبة بس .... اما الباقي لازم تحله

- ف المسائل الكلامية ..... طبعا اشهرها مسائل الميكانيكا كلها .... و انت بتقرا المسألة تقراها كلها على بعضها الأول ... تحددد درسها و نوعها و كده ... بعد كده تمشي عليها تفصصها واحدة واحدة .... كل كلمة تترجمها للرموز بتاعتها .... خصوصا ان المسائل دي كل كلمة فيها بيبقى ليها فايدة .... زي قضيب منتظم ولا لأ ....ز و الذذي منه ... كل كلمة تلاقيلها فايدة ترجم على طول,,,, كمان تفضي المعطيات ( الأرقام ) فوق المسالة قبل م تبدأ عشان تبقى ف وشك على طوول .... مش كل م تحتاج رقم ف المسالة تقعد تدور عليه ف الورقة بتاعة الأسئلة ... و ده يشتت التركيز .... دي حاجة بتفيد برضو

لو افتكرت حاجات تانية هبقى اعمل edit و اضيفها ان شاء الله

Unique Muslimah

08-10-2007, 05:22 AM

wowwwwwwwwwwwwwww!!! this is soooo excellent, mashaAllah...Jazak Allahu Khair, inshaAllah I will try my best to implement all that I have learned from ur lessons and advice and take them 2 heart when I study....thanks a bunch :)

أ. الدادمونى

08-10-2007, 04:42 PM

شكرا يابلال على النصائح اللى قدمتها

لاخوانك واخواتك فى المنتدى

بارك الله فيك وجزالك كل خير

وربنا يكـــرمك يا رب

امانى احمد

10-10-2007, 09:02 AM

شكرا جزيلا على هذه النصائح الغالية وفقك الله و جزاك كل خير :rolleyes::rolleyes::rolleyes:

goldenbelal_007

11-10-2007, 09:41 PM

كلامك متفق عليه من بلال متفوق برده بس أوائل الكويت

بالتفويق و تكملهم المشوار و تفدهم أكتر

د/ بلال

براءة

18-10-2007, 03:46 PM

انا اللى خرجت بيه من تجربة السنة اللى فاتت
انى
والله
ما
هتعب
دماغي
لان بجد نتيجة تخنق تخنق تخنق
وانا بتنرفز اما تيجى سيرتها
توزيع الدرجات يخليك تشد فى شعرك
السنة اللى فاتت كنا داخلين جامد وفى الاخر قعدنا نلعب
السنة دى ناوية ان شاء الله كلها لعب
بلا هم
شكرا يا بلال هجيب اخويا يقراهم بس يمكن ربنا يكرمه
بس لعلمك
انا بردو بذاكر بس اما ابقي فاضية اهو حاجة تسلي
او يمكن اما بيصعب عليا بس الدروس اللى بطفحها
والحمد لله باخد درسين رياضة وفيزيا وماشية فيهم تمااام جداا ويمكن كمان متفوقة فيهم جدا بالنسبة لباقي مجموعتى
سبتنى بقي من كتب كيف تذاكر والتنميةالمعرفش ايه اللى ملهاش اى لازمة فى اى حاجة
وسبتنى من الدح والكلام الفاضي ده
خدت موضوع المذاكرة ده كحاجة كده اعملها اما ابقي حاباها
بجدبجد ربنا موفقنى جدا
كمثال
الرياضة انا ذاكرتها من غير ضغط اطلاقا
بذاكرها اما احس انى عاوزة تحدى كده اقوم احللى شوية رياضة
ولحد دلوقتى مفيش درس خدته غير وحليت عليه كتاب لامى وكتاب متخلف اسمه المعاصر وكتاب المدرسة
ووالله من غير اى ضغط
بس لما ابقي عاوزة اعمل ده عن حب
الفيزيا كذلك حاسة انى شربتها
ومن غير ضغط اطلاقا
بذاكرها قليل اوى اوى بس بردو عن حب
مثلا انا النهاردة الصبح خلصت الفصل التانى وغيري ناو فى الفصل الرابع
بس تعالىاتكلم معاهم هتلاقيهم ابيض يا ورد ابيض يا اريال
وكل يوم قاعدة ع الميل وبلعب وبتفرج ع التليفزيون وبخرج واتفسح واروح التمرين
وعايشة حياتى ع الاخررررررر
بجد انا كده مرتاحة جدا
وحاسة انى متفوقة عن السنة اللى فاتت كمان
عملنا ايه بالدح
والله هتيجى مادة تخسف بيك الارض وتقعد تسال نفسك ليه ده حصل
بس اهم حاجة فعلا انا مقتنعة بيها زى ما قلت انت وخالد
ملكش دعوة بغيرك
خليك فى نفسك وابقي مقتنع باللى بتعمله :)

The Lord Of The Rings

20-10-2007, 03:36 PM

خدت موضوع المذاكرة ده كحاجة كده اعملها اما ابقي حاباها

خليك فى نفسك وابقي مقتنع باللى بتعمله :)

ما شاء الله ..... الخلاصة

شكرا يا رحمة للأضافة المهمة

Confidence

21-11-2009, 11:19 AM

السلام عليكم و رحمة الله و بركاته
ربنا يبارك فيك على هذا الموضوع المهم
و لكن ممكن تعرفنى الطريقة السايمة لمذاكرة الكيمياء و الفرنساوى لتانية ثانوى لأن أنا بحس انى زهق منهم الاثنين و خلاص شهر 12 هيبدأ

Confidence

21-11-2009, 11:21 AM

من فضلك رد عليا ضرورى

براءة

21-11-2009, 11:31 AM

repentance

22-11-2009, 09:36 PM

جزاك الله خيرا كلام حلو اووي حتي لينا ي اولي ثانوي
شكرا الك

Confidence

22-11-2009, 11:29 PM

السلام عليكم و رحمة الله و بركاته
ممكن حد يفيدنى فى كيفية مذاكرة الفرنساوى و الكيمياء
من فضلكم ضرورى

اوركيدا2009

10-12-2009, 03:08 PM

رائع جدااا

الباش مهندس

25-12-2009, 03:28 AM

الــــــــــــــــــــلــــــــــــــــــــــــه عـــــــــــــــلــــــــــــــــــــيــــــــــــ ــــــك بــــــــــــــــــجــــــــــــــــــد

BATSY15

29-12-2009, 09:23 PM

موضوع حلو جدا وربنا يجازيك خير
بجد فادني شديد جامد طحن فحت ردم
تحياتي
وهابي نيو يير يا جماعة

Mohamed.Helmy

30-12-2009, 12:59 PM

شكرا بس انا متاخر اوى ى المنهج

kwan

30-01-2010, 12:18 PM

طب الللي متاخر في المناخج دا يعمل اييييييه .. انا متاحر في الرياضة شوية كتير و الكمياء اوييييي .. مخدتش غير الباب الاول و التاني و السادس و انا ف التاسع .. العربي يعني ماشي و الفرنساوي دا انا متاخر بردو و الأنجليزي مش اوي :( المشكلة اني سعات بيبقى ورايا حجاااااااااااات كتييييييييييير و بقعد كدا مبعغملش حاجة مش بحس بابلاوي وااااااااااء

profheikal

22-02-2010, 02:45 PM

جزاكم الله كل الخير

ahmedkuwit

23-02-2010, 02:48 AM

بالتوفيق لنا جميعا ان الله تعالي

soosoo_kotp2000

13-07-2010, 10:16 AM

موضوع اكتر من مميز مفيد

بارك الله فيكم

Aya Abdelrahman

14-07-2010, 02:22 PM

جزاك الله كل خير

بجد نصايح حلووووة أوي ومن أرض الواقع

أنا مثلاً بصراحة عمري ماعرفت يعني ايه مذاكرة الا في 3 اعدادي يعني نص ساعة لكل مادة فل أووووي

بس إن شاء الله ناوية أعمل اتفاقية شاملة مع جميع المواد وهنفذ نصايحك بالحرف الواحد عشان شكلك مجرب وحققت نتايج مذهلة

ربنا مبيضيعش حق حد ولا تعب ومجهود حد

ربنا يوفقنا كلنا ويححق لكل واحد أحلامه في الكلية المرجوة

the.engineer2010

08-08-2010, 08:41 PM

بارك الله فيك اخي الكريم ونفعك بما تنفع به الناس وجزيت الف خير عنا

د/نداء الجنة المصرية

03-09-2010, 07:12 AM

اسلوب منطقى سليم وربنا يوفقنا جميعا

hate_life

08-03-2011, 03:27 PM

merci 3la el.nsay7 wallahy el.e7bat byster 3lena fe el.e2t dah bzat 3lshan elemt7nat 2rbt rbena m3ana w yshel melly gowana showya

داندن

10-03-2011, 06:16 AM

ياااه
استفدت كتير اوي
و بالذات طريقة عصر النفوخ دي
جزاك الله كل خير

فاطمة456

14-03-2011, 11:29 PM

شكرا علي هذا الموضوع الرائع

Miraculous

28-03-2011, 06:22 PM

موضوع جميل والله
جزاك الله خيرا

HAGOOORA

28-03-2011, 07:13 PM

جزاك الله خيرا عالنصائح الجميله دي

warda2011

29-03-2011, 01:58 AM

حلو موضوعك ميرسى

حسام مرتضي

06-06-2011, 02:10 AM

انا رأي بكل صراحة انا اري ان طريقتي هي الافضل وانا مش بجبرها علي حد بس انا عاوز مناقشة
انا طريقتي عبارة عن :- افهم الدرس من المدرس في المدرسة او الدرس الخصوصي وبعد كده تطبيق
علي فكرة نظام الكتابة ممل لاقصي درجة اما موضوع الحماس فانا مقتنع تماما بالكلام ده

مناجاةُ النجاةَََِ

21-07-2011, 05:20 PM

بجد بارك الله في حضرتك يا بلال
وفعلا احنا محتاجين النصايح دي
بارك الله ف حضرتك لان بجد اناا استفدت جامد

el rock

21-07-2011, 05:23 PM

جزاك الله خير

sh.sh.

21-07-2011, 09:05 PM

بجد حقيقي بارك الللللللللللللللللللللللللللللللللله في حضرتك ونرجو المزيد وبجد بجدددددددددددددددددد نصائح مفيدة جدددددددددددددددددددددددا

زهرة 1996

05-08-2014, 06:32 PM

موضووووووووووووووووووع ممتاااااااااااااااز

اية عبد اللطيف

05-08-2014, 07:47 PM

جزاك الله خير