المساعد الشخصي الرقمي

مشاهدة النسخة كاملة : شرح تفصيلي وشامل لكل شئ متعلق بكلية التجارة جامعة القاهرة-تم تعديل المجموعة المميزة

vampire1188
17-07-2011, 08:26 PM
بسم الله الرحمن الرحيم

صباح الخير للى بيقروا الموضوع الصبح ومساء الخير للى بيقروا الموضوع بالليل

موضوعنا النهارده شامل كل صغيرة وكبيرة ممكن تتخيلوها عن كلية التجارة – جامعة القاهرة

يعنى من النهارده مافيش استفسارات .. مافيش انا ماعرفش .. مافيش انا هاسئل فى الشئون

وبالتالى ياريت تركزوا معايا جدا لان الموضوع طويل طويل طويل وفيه كل تنتوفة عن الكلية

بس قبل اي حاجة عايزين نتفق اتفاقين حلوين كدا

- الاتفاق الاول -
ياريت نقرا الموضوع الاول ونفهم الكلام وبعد كدا اللى عنده اي استفسار مهما كان هوا شايف انه ساذج ياريت يسأل ومايتكسفش

- الاتفاق التانى -
الموضوع دا هايبقى مغلق يعنى غير مسموح لاي شخص مهما كان انه يحط اي رد فيه ودا عشان بس الموضوع مش يتلخبط وفي نفس الوقت كلنا نستفيد ومانتشتتش واللى عايز يسأل اي سؤال يخش على اللينك دا
http://thanwya.com/vb/showthread.php?p=3696010#post3696010
ويحط السؤال اللى هوا عايزة وان شاء الله الرد هايكون عنده .. واكرر .. اى سؤال انا تحت امرك

عموما الموضوع هايتقسم على هيئة اجزاء
وكل جزء محطوط فى رد لوحده
الاجزاء اللى هانتكلم فيها فى الموضوع دا هى كالآتى
- يعنى ايه كلية التجارة ؟
- شرح تفصيلى لأماكن الكلية بشئونها بمدرجاتها
- خلصت ثانوية عامة وعايز اقدم فى الكلية اعمل ايه ؟
- التربية العسكرية (للطلاب الذكور فقط)
- الانشطة جوا الكلية (جماعات – اتحاد طلبة – موديلز – ملاعب جامعة .. الخ)

وحاجات تانية كتيييييييير يمكن فيه ناس فى خلصت الكلية وماتعرفهاش !!

عايز نفــس عميــق من كل واحد بيقرا التوبيك دا دلوقتى كدا ويفتح دماغه معايا عشان فيه كلام زي الفل هايتقال دلوقتى ان شاء الله

انزل بالماوس وقول بسم الله
..........
vampire1188
17-07-2011, 08:39 PM
يعنى ايه كلية التجارة – جامعة القاهرة ؟؟





كتير من الناس دخلت الكلية وماتعرفش يعنى ايه تجارة

كتير من الناس اتخرجت من الكلية وماتعرفش يعنى ايه تجارة !!
واللى اكتر منهم الناس اللى مادخلتش الكلية وماتعرفش يعنى ايه تجارة !!

العقل بيقول حاجة حلوة اوى .. الطبيعى انك قبل ماتخش المكان لازم تبقى عارف انت داخل ايه على الاقل معلومات بسيطة عشان تحاول تأقلم نفسك معاه

لكن المشكلة ان الناس اللى دخلت الكلية 98% منهم داخل عشان مجموعه مايسمحلوش انه يدخل كلية مجموعها أعلى من تجارة وفي نفس الوقت حرام يخش كلية مجموعها اقل من كلية تجارة

عشان كدا بيصاب بحالة من اليأس والاحباط الشديدين اللى بيخلوه يقول انا هاخش تجارة وخلاص
وزي مايكون تجارة دى حاجة مالهاش اى تلاتين لازمة !!

فالطبيعى انك قبل ماتخش الكلية او حتى لو انت جوا الكلية لازم تبقى عارف شوية معلومات عن كليتك



مبدأياً كدا كلية تجارة دى هيا واحده من ضمن اربع كليات كانوا هما النواة الاساسية فى بناء جامعة القاهرة سنة 1911(ايام ماكان اسمها جامعة فؤاد الاول)

ودا كان شكلها ايام زماااااااان

http://i53.tinypic.com/3168dnc.jpg

وكانت مدة الدراسة فيها 3 سنين بس والمواد كانت بسيطة جدا لا تتعدى الـ 8 مواد فى التلات سنين كلهم !!
واول دفعة اتخرجت منها كانوا 19 طالب بس
(دلوقتى لو اتخرج منها 10 الاف بنقول عليهم قليلين !!)

بعديها بكام سنة الناس اللى كانوا ماسكين ادارة الجامعة قالوا ماينفعش اننا نسيب كلية التجارة من غير تقسيمة كدا .. فقالوا احنا هانقسمها لقسمين
قسم تجارة – وقسم اقتصاد
(مع مراعاة ان كلية سياسة واقتصاد كانت ساعتها لسه مش موجودة)
قسم تجارة قسموه لتلات شعب "محاسبة-ادارة تجارية-ادارة صناعية"
قسم اقتصاد قسموه لشعبتين "سياسة – اقتصاد"

بعد كدا جم بقى فى سنة 59 ايام عبد الناصر قالوا جيه الوقت اللى ننشأ فيه كلية خاصة بالسياسة عشان نطلع ناس تشتغل صح فى الخارجية
وطبعا دا خلاهم يفصلوا القسم الاقتصادى كله من كلية التجارة وأعادوا تقسيم كلية تجارة تانى لقسمين وهوا محاسبة وادارة اعمال .. وبعدها بكام سنة اضافوا ليه قسم التأمين
وفى سنة 92 جيه عمو الوزير حسين كامل بهاء الدين (فلة من فلول النظام السابق :D)
وطلع قرار وزارى غريب وقال احنا هاننشأ قسم انجليزى داخل كلية التجارة بحيث ان الطلبة هايدرسوا كل مواد التجارة بالانجليش
وبعدها على طول بـ 3 سنين جيه دكتور محمود بازرعة ربنا يكرمه وعمل اتفاقية مع جامعة سيتى فى لندن وانشأ قسم العلوم الاكتوارية

ودى بقى معلومة جديدة عليكوا .. ان من المتوقع انشاء قسم جديد خاص بكل شئون البورصة والاستثمار والاوراق المالية بس لسه ماتحددلوش اسم وهوا بقيلهم كام سنة بيتناقشوا فيه

ودى كانت نبذة تاريخية لااااااازم تعرفوها عن الكلية
لان ليس من البديهى ان طالب يخش يدرس 4 سنين فى الكلية وهوا مايعرفش اى حاجة عن تاريخها
vampire1188
17-07-2011, 08:49 PM
شرح تفصيلى لكل أماكن الكلية

خلصت ثانوية عامة وعايز اقدم فى الكلية اعمل ايه ؟
مبروك يا عم الحج .. خلصت ثانوية عامة وكبرت اهو وداخل الجامعة بقى وهاتعيش حياااااااتك

نتيجتك ظهرت .. تنسيقك بدأ .. كتبت رغباتك .. جاتلك كلية التجارة
قشطة اوى .. عايزك تطبع نتيجة التنسيق اللى ظهرت على موقع التنسيق على ورقة بيضا عادية
وحطها على جنب

روح مدرستك الصبح بدرى كدا زى الشاطر واسحب ملفك من هناك واللى هايبقى جواه
- استمارة الثانوية العامة
- استمارة الاعدادية و استمارة الابتدائية
- شهادة الميلاد
والملف ماينقصش ورقة

روح لأى مصوراتى محترم خليه يصورك صورة كويسة كدا .. وياريت تبعد عن صور الثانوية العامة القديمة عشان 90% منها بيبقى شكلها عار والواحد اصلا مابيصدق الثانوية تخلص !!

وانت راجع من عند المصوراتى عايزك تشترى دوسيه من ابو كبسولة عشان هوا دا اللى حضرتك هاتحط فيه كل ورقك لما تيجى تقدم فى الكلية

حد يقولى ماينفعش اى دوسيه تانى ؟
اقوله لاء لازم يكون بكبسولة عشان ورقك يبقى متحافظ عليه ومايتبهدلش ومايضيعش وهوا محطوط فى الكلية

شهادة الميلاد لازم تكون موجودة طبعاً سواءاً القديمة او الجديدة مش فارقة
وفى جميع الاحوال ماعندكش شهادة ميلاد روح لأقرب سجل مدنى وطلع منه شهادة الميلاد المميكنة بـ 7 جنيه


فى "بعض" الأحيان بيطلبوا حاجة اسمها استمارة 2 جند
ودى وظيفتها انه بيتعملك تأجيل للجيش من خلال الكلية .. لان القانون بيقول انك اول مابتوصل لسن الـ 18 بتكون تحت طائلة الاستدعاء للجيش

وفى كثير من الاحيان الجيش بيعتبر مابين سن الـ 18 : 20 دول بيدرسوا فامش بيهتموا بيهم .. عشان كدا ممكن الكلية ماتطلبش استمارة الـ 2 جند باعتبار ان سنك لسه 17 سنة

استمارة الـ 2 جند بتتجاب من مديرية الأمن اللى منطقة سكنك تابعة ليها بـ 50 قرش
وكدا كدا فيه جزئية كاملة خاصة بموضوع تأجيل الجيش والعسكرية هانعرف فيه كل حاجة

فى بعض الاحيااااااان برده ساعات بيطلبوا صورة البطاقة (عشان متقولوش فامبير ماقالش)

لو ماطلعتش البطاقة لسه مش مشكلة ولو بتاع الشئون خنق عليك شوط فيه وعن ثقة

دلوقتى صورك معاك .. استمارة الثانوية العامة معاك .. شهادة ميلادك معاك .. استمارة الـ 2 جند معاك .. جواب التنسيق اللى انت طبعته من ع الموقع معاك

هاتحط كل الحاجات دى فى الدوسيه ابو كبسولة اللى اشتريته من المكتبة اللى جنب بيتكوا وتستنى لما ميعاد التقديم بتاع مرحلتك يبتدى (اللى هوا 99.5% هايبقى مرحلة اولى)

ميعاد التقديم بيبقى غااااالباً فى آخر شهر 7 لان نتيجة الثانوية العامة بتظهر فى حدود نص سبعة
وفى جميع الاحوال تابع الاخبار وشوف المواعيد وروح قدم
vampire1188
17-07-2011, 08:59 PM
ميعاد التقديم فتح ؟

الله اكبر .. بداية مرحلة تعليمية جديدة فى حياتى .. اخيراااا هاخش الجامعة اللى بسببها دوقت المر سنتين !!

هذا هو لسان حال كل طالب لحظة مابيعرف ان تقديم الكلية فتح وانه هايروح الكلية بكرة وهايقدم

تصبح الصبح .. تاخد الدوسيه بتاعك اللى جواه :
- شهادة الميلاد
- 6 صور (وتكتب اسمك فى ضهرهم)
- استمارة الثانوية العامة
- استمارة 2 جند (طلبة ذكور فقط)
- جواب التنسيق

اتأكدت من ان كل حاجة موجودة ؟ تمام يعنى ؟
بيـــس
تنزل من بيتك تروح ع الجامعة
ماتنزليش الساعة 7 الصبح او 2 الضهر
لا خليك فى المعقول .. الساعة 7 مش هاتلاقي حد لان شئون الطلبة بتبتدى شغل على 9ونص
الساعة 2 برده مش هاتلاقى حد لان الشئون بتقفل على واحده ونص
(مع ان دى مش المواعيد الرسمية بس انا بقولك الواقع العملى اللى هاتمشى عليه من لحظة التقديم وطول الاربع سنين بتوعك)

هاتوصل الجامعة بالسلامة .. هاتخش من باب كلية التجارة .. بتاع الامن هايقولك رايح فين ؟ قوله داخل اقدم ورقى فى شئون الطلبة

هاتمشى من باب تجارة لغاية ماتوصل لشئون الطلبة زى ما الصورة دى بتوضح
(انا عامل احلى واجب اهو وبالصور كمان عشان ماحدش يتوه جوا)


http://i54.tinypic.com/2mdrnfc.jpg

هاتتلاقى شبابيك كتير .. هاتروح للشباك اللى انا معلملك عليه فى الصورة
بالاحمر دا لشئون عربى
بالابيض دا لشئون انجليزى

هاتتلاقى زحمة كتيرة اسأل الاول وشوف دا شباك اولى ولا لاء وبعد كدا خش فى الطابور

ولحد هنـا هانعمل استوب
ونفترق لطريقين
طريق اللى مقدمين لتجارة عربى – طريق اللى مقدمين لتجارة انجليش
vampire1188
17-07-2011, 09:25 PM
اللى مقدمين لتجارة عربى
خش فى الطابور لغاية ماتوصل للموظف .. اديله الدوسيه زى ماهوا وسيبه يتعامل .. وانت واقف هاتلاقيه طلع ورقك واتأكد منه وتلاقيه فتح كشف فيه اسماء كتيرة كدا .. الكشف دا فيه اسماء الناس اللى مكتب التنسيق رشحهم لدخول كلية التجارة
بعد مابيتأكد من ان اسمك موجود فى الكشف وكله تمام بياخد الدوسيه منك ويقولك شكرااااااا مع الف سلامة
وكدا مبروك :022yb4: .. لقد تم قيدك فى كلية التجارة



اللى مقدمين لتجارة انجليش


طبعاً قبل ماتقدم لازم تبقى عارف نقطتين مهمين جداً
1- لازم تكون جايب على الاقل 40 من 50 فى الانجليش فى الثانوية العامة .. واقل من كدا ماينفعش

2- قبولك فى تجارة انجليش كاااااان بيبقى معتمد اعتماد كلى وشامل على التنسيق الداخلى
بس حاليا الوضع اتغير وبقى رغبة منفصلة
بمعنى انك لما بتيجي تملي الرغبات بتاعة التنسيق وكوباية الشاي جنبك بتبقى تجارة انجليش رغبة موجودة زيها زيها كلية اداب وكلية اعلام
والحوار الفاكس بتاع انك تقدم في تجارة عربى وبعد كدا تقدم في تجارة انجليش وتدفع 100 جنيه ويتعملك تنسيق داخلي وتستني لغاية اما النتيجة تطلع و ياتتقبل ويبقى تمام او ماتتقبلش وتترمي في تجارة عربي غصب عنك دا كله خلاص بخ مابقاش موجود

وطبعا النظام دا مميز جداااااااا جدا جدا
يعنى المفروض تحمدو ربنا عليه وتبوسو ايدكو وش وضهر
اولا عشان رحمك من حتة التدبيس اللى بتحصل في تجارة عربى في حالة عدم قبولك في تجارة انجليش
ثانيا فتح فرصة قدام زمايلك الغلابة بتوع المرحلة التانية انهم يخشو ويقدمو في تجارة عربى

يارب اكون قدرت اوضح المعلومة كويس
طيب السؤال الذى يطرح نفسه بقى
القبول بيتم ازااااااااى ؟؟

عن طريق المجموع الاعتباري يا برنس الجيل

ايه المجموع الاعتباري دا ؟؟

المجموع الاساسي بدون المستوي الرفيع
+
مجموع اللغة الانجليزية
(ولازم يكون فوق 40 من 50)
+
المستوي الرفيع للغة الانجليزية إن وجد

ودا معناه ان لما نتيجة التنسيق تنزل
هاتلاقي مجاميع معدية الـ 400 والـ 405
ماتستغربش من المجاميع العالية اوي دي
لان المجاميع دي زي ماقولتلك كدا فوق

نرجع لمرجوعنا تاااانى

دلوقتى حضرتك اتقبلت الحمدلله وجاتلك تجارة انجليش القاهرة

هاتقدم زيك زي بتوع تجارة عربى بالظبط
تحضر الفايل بتاعك وتحط جواه
- استمارة الثانوية العامة
- شهادة الميلاد
- صورة البطاقة (اختياري)
- بطاقة الترشيح
(ويكون مطبوع عليها الرغبةالمقبولة بوضوح تام)
- 6 صور
وتروح بيه لشئون طلبة تجارة انجليش





هاتقف فى الطابور .. هاتخش لغاية ماتوصل لموظف الشئون تقوله عايز اقدم فى تجارة انجليش
هايقوم ساحب الدوسيه بتاعك ويتأكد من ان اسمك موجود فى الكشوفات اللى مكتب التنسيق بعتها للكلية
وياخد منك الفايل ويبقى تمااااااام اوي كدا وزي الفل
الف الف مبروك حضرتك بقيت طالب في تجارة انجليش

وانت واقف بقى ماتنساش تقوله لو سمحت عايز إذن دفع مصاريف
وفي اليوم اللى بعده او يوم بقى انت تحبه تروح للخزنة بس يحبذ يبقى قبل الدراسة عشان الخزنة بتبقى زحمة جدا ايام الدراسة

ودا مكان الخزنة




http://i51.tinypic.com/53o1g5.jpg




هاتدفع الفلوس في الخزنة (4500 جنيه) وتستني شوية هاينده على اسمك ويديك 3 ورقات .. هاترجع تانى لشئون الطلبة بتاعة تجارة انجليش وتديله التلات ورقات دول عشان تعمل بيهم اثبات دفع مصاريف
ولو ماعملتش اثبات دفع يبقى كأنك مادفعتش حاجة
ولازم وانت بتعمل الاثبات يبقى معاك صورة
عشان الصورة دي هيا اللى هايتعملك بيها الكارنيه
وكدا يبقى تماااااام اوي اوي
vampire1188
17-07-2011, 09:34 PM
شكله ايه الكارنيه دا ؟؟؟

اااادى شكله ياسيدي

كارنيه تجارة عربى

http://i51.tinypic.com/2qast2b.jpg


كارنيه تجارة انجليش

http://i54.tinypic.com/20tmrzr.jpg

مع مراعاة ان الكارنيه ليه 3 وظايف :
- دخولك الجامعة بيبقى من خلاله
(وبعد الثورة وتغيير الحرس الجامعى بتاع الداخلية بأفراد امن مدنى اصبح من الصعب جدا دخولك الجامعة بدون الكارنيه)
- اى امتحان بتخشه بيبقى من خلاله
- بدون الكارنيه انت تعتبر غير مقيد فى الجامعة اصلا
وممكن تعرض نفسك لحوارات مش كويسة خاصة لو اتقفشت :frown:
(ودى صعبة شوية فى جامعة القاهرة بالذات)
- كلية الحاسبات والمعلومات بتقدم خدمة بيع سيديهات الويندوز والاوفيس الاصلية باسعار رخيصة جدا جدا وعشان تجيبها لازم يبقى معاك الكارنيه
vampire1188
17-07-2011, 09:38 PM
سنة اولى كليــة

هانتفق على مبدأ اساسى قبل مانتكلم فى الجزئية دى

عايزك تنسى كل حاجة متعلقة بالثانوية العامة
يعنى شغل المدرسة ويا مستر والعيال الخنيقة اللى بيرخموا عليك فى الكلاس انساااهم تماماً

انت دلوقتى دخلت الكلية خلاص ودى بداية مرحلة تعليمية جديدة تماماً

دلوقتى فيه ناس دخلت تجارة عربى وناس دخلت تجارة انجليش

وبالتالى هاضطر اننا اطول فى الرغى شوية واقسمهم لقسمين

قسم خاص بتجارة عربى وقسم تانى خاص بتجارة انجليش

لان من الطبيعى ان نظام الدراسة فى عربى مختلف عن الدراسة فى انجليش

وكل واحد فيهم هاحطه فى بوست منفصل عن التانى عشان يبقى فيه تنظيم وتنسيق وماحدش يتوه منى
vampire1188
17-07-2011, 09:47 PM
أولاً – تجارة عربى

الدراسة غالبا مابتبدأ اول يوم أحد بعد يوم 15/9
ودا لان يوم السبت بقى اجازة فى الكلية خلاص
(والكلام دا خاص بشئون الطلبة وشعبة عربى اما الدراسة ذات نفسها فابتبقى شغاله فى تجارة انجليش فقط)

طبعاً عايزك تعرف معلومة ظريفة اوى
ان عدد الطلبة فى تجارة عربى فى الدفعة الواحده لا يقل عن 10 الاف طالب
وبالتالى ليس من المعقول ان الـ 10 الاف دول ياخدوا فى مدرج واحد وكلهم يتكوموا فوق بعض !!

عشان كدا الكلية عملت اختراع ظريف اوى
وهوا ان الـ 10 الاف دول يتقسموا على مجموعات
والتقسيمة دى بتبقى بناءاً على الحروف الابجدية
كالآتى :
المجموعة المميزة : بيبقالها تنسيق داخلى زيها زى تجارة انجليش بالظبط
مجموعة (أ) : حرف الألف كله
يعنى اسمك احمد – اسماء – امجد – ايمن .. الخ تبقى تبع المجموعة دى)
مجموعة (ب) : من حرف الـ ب : حرف الـ
مجموعة (ج) من حرف الـ
مجموعة (د) : من محمودات : حرف الـ ى
"يعنى اسمك محمود – ياسر – مصطفى – مروة – هاجر ... الخ تبقى تبع المجموعة دى"

كل مجموعة من اللى فوق دول بيبقالهم جدول محاضرات مستقل ودكاترة مستقلين وامتحان مستقل
ودا معناه ان حضرتك ملزم بانك تحضر محاضراتك تبع مجموعتك مش تبع مجموعة تانية

اذن كل اللى هاطلبه منك دلوقتى انك تحدد انت مجموعة ايه طبقاً للتقسيمة اللى قولتها فوق دى

حددت خلاص ؟ .. متأكد ؟؟؟
مااااشى


دلوقتى جيه معاد انك تعرف جدول محاضراتك
الجدول دا بينزل قبل بداية الدراسة بكام يوم كدا
ومهم طبعاً انك تبقى عارف جدولك ايه قبل ما الدراسة تبدأ عشان تبقى مأهل نفسك انت هاتنزل ايام ايه وامتى

وعموما جدول المحاضرات بيتقسم على هذا الاساس
الاسبوع كله بتنزل فيه 4 ايام
من الاربع ايام دول فيه يومين هاتحضر فيهم محاضرتين
ويومين تانيين هاتحضر فيهم 3 محاضرات
ومدة كل محاضرة ساعة ونص

ودا معناه ان توتال المحاضرات الاسبوعية اللى المفروض حضرتك تحضرها هما 10 محاضرات

مع مراعاة ان فى تجارة عربى مافيش حضور وغياب
يعنى عايز تحضر كان بها .. مش عايز انت حر بس هاتلبس صح فى امتحان الترم لو انت من حزب المنفضين الأحرار

جدول المحاضرات ان شاء الله كل ترم بننزله هنا ع الموقع .. فامتقلقش خالص اول مابينزل بنقوم حاطينه على طول

دلوقتى عرفت مجموعتك ؟ عرفت جدولك ؟

تمااااااام اوى .. اكيد حضرتك اول ماشوفت الجدول لاقيت اسماء مواد غريبة واسماء دكاترة اغرب

ماتقلقش خااااالص خالص .. الموضوع بسيط وسهل
انت عندك فى سنة اولى 5 مواد الترم الاول و5 مواد الترم التانى

مواد الترم الاول هى
1- محاسبة مالية
من اهم المواد اللى لازم تركز عليها جدا جدا جداااا لانها الف باء محاسبة ومن غيرها مش هاتفهم حاجة فى السنين اللى جايه
ولازم تاخد بالك ان فيه ناس كتيرة بتشيلها (يعنى بتسقط فيها) عشان بيهملوها وبينفضولها .. فيااااريت تركز عليها وتذاكرها اول بأول

2- مبادئ ادارة وتنظيم
بتدرس فيه الف باء ادارة .. بتعرف يعنى ايه ادارة وتطورها والنظريات اللى اتكلمت عليها
مادة لذيذة وظريفة ولو تابعتها ان شاء الله هاتجيب تقدير عالى فيها

3- رياضة بحتة
مادة كلها رياضة فى رياضة وبتتكلم عن الاحتمالات والاستنتاج الرياضى وشوية تفاضل ونهايات
والحاجات دي تقريبا درستوا زيها فى الثانوية العامة

المادة دى محتاجة حل كتير ومتابعة مع الدكتور عشان مش تتوهوا فيها

4- سلوك انسانى
مادة غريبة الشكل والمضمون فعلا .. بتدرس فيها حاجات تبع علم النفس وشوية ادارة برده

مادة مالهاش لازمة اصلا بس مفروضة عليك
وخد بالك انها تعتبر اطول مادة فيهم فركز فيها

5- موارد اقتصادية
مادة معظمها حفظ وفيها شوية فهم
كلها معتمدة على حفظ النسب والرغى الكتير
ناس كتيرة بتشيلها عشان بيتخنقوا منها
والدكاترة بيستحلفوا للطلبة عشان عارفين ان الطلبة بيهملوها لان هيا كدا كدا اصلا مش مادة تجارية
ركزوا فيها وتابعوا كويس

والخمس مواد دول هما مواد الترم الاول
نعمل استوب لغاية هنا

نشوف بقى الدكاترة ايه نظامهم

مبدأياً كدا دكتور الجامعة حاجة كدا كبيرة
يعنى التعامل معاهم مش بنظام ثانوى خالص

اى شد مع اى دكتور انت بتعرض نفسك لمصيبة سودا
فاهدى كدا وافتكر انى قولتلك بطل حركات ثانوى انت كبرت خلاص وبقيت مسؤول من نفسك وعن نفسك

هاتتلاقى فى الجدول برده المكان اللى هاتاخد فيه المحاضرة .. والمكان دا هوا المدرج

المدرج دا حاجة ضخمة كدا بيتسع لـ 200 طالب على الاقل
فى الكلية عندنا فيه 7 مدرجات هارتبهم من
الاكبر للأصغر
مدرج العيوطى – مدرج هـ - مدرج و – مدرج ج – مدرج د – مدرج ب – مدرج أ

انت بتشوف محاضرتك فى انهى مدرج من دول وتروح للمدرج فى ميعاد المحاضرة بتاعتك وتخش

عرفت مجموعتك ؟ عرفت جدولك ؟ عرفت موادك ودكاترك ؟
تماااااام جدا جدا

ظبط نفسك وحالك ومحتالك عشان الدراسة هاتبتدى ان شاء الله
vampire1188
17-07-2011, 10:01 PM
ثانياً : تجارة انجليش
آخر حاجة احنا وقفنا عندها انك الحمدلله نجحت ودفعت المصاريف ومستنى الكارنيه يتعمل
الكارنيه بيتعمل فى حد اقصى اسبوعين من تاريخ اثبات الدفع فى الشئون

يعنى لو انت دفعت فى الخزنة وماعملتش اثبات دفع فى الشئون يبقى كأنك مادفعتش حاجة

ولغاااااااية ما الكارنيه يتعمل .. دخولك الجامعة بيبقى من خلال بطاقة الترشيح بتاعة التنسيق

معلومة حلوة اوى برده لازم انك تكون عارفها

عدد طلاب تجارة انجليش لا يقلوا عن 400 طالب فى افضل الحالات
الـ 400 دول بيتقسموا لمجموعات صغيرة .. بحيث ان كل مجموعة تشيل حوالى مثلا 80 طالب
للأسف انا طبعامش هاقدر اقول التقسيم بتاع المجموعات لان كل سنة بيتغير بناءا على الاسماء واعداد الطلبة

يعنى ممكن تلاقى واحده اسمها نانسى السنة اللى فاتت كانت فى مجموعة D والسنة دى بقت فى مجموعة F

وافضل طريقة تعرف بيها مجموعتك انك تنزل اول يوم فى الدراسة وتعرف انت مجموعة ايه من خلال الكشوفات اللى بتتعلق قدام الباب الزجاجى
(واللى بعد الثورة بقى مرايه)
لمبنى تجارة انجليش

وطبعا حضرتك ملزم انك تحضر مع المجموعة بتاعتك
لان تجارة انجليش فيها حضور وغياب وكل التفاصيل دى هاتتعرف كمان شوية

بالنسبة لجداول المحاضرات احب انوه ان داااائما وابداً جدول محاضرات تجارة انجليش بيطلع متاخر جدا ومابينزلش الا فى مساء اخر يوم قبل بداية الدراسة ولو طلع بدري عن كدا يبقى حظكو كويس
يعنى الدراسة يوم الاحد .. تلاقى جدول المحاضرات
متعلق جوا مبنى تجارة انجليش فى الدور الارضى على عصر يوم الخميس

وكل سنة كدا لازم ينزل متأخر .. فاللى فى تجارة انجليش والدراسة بكرة مثلا وجدول محاضراته لسه مانزلش مايقلقش .. بس المشكلة انه هايضطر ينزل اول يوم فى الدراسة عشان يعرف مجموعته وجدول محاضراته

ومن البديهى طبعا ان كل مجموعة ليها جدول محاضرات مخصوص ليها
يعنى جروب A ليه جدول محاضرات غير جروب C
ودكاترة جروب B غير دكاترة جروب D وهكذاااا

جدول المحاضرات بيتقسم بنفس تقسيمة تجارة عربى
4 ايام فى الاسبوع
يومين فيه محاضرتين
يومين فيه 3 محاضرات
التوتال .. 10 محاضرات اسبوعياً

بالنسبة للمواد انت عندك 5 مواد فى الترم الاول
وكلللللهم بالانجليش عشان فيه بعض الناس بتحب تفتى وتقول ان فيه مواد فى تجارة انجليش بالعربى

-Financial Accounting
المحاسبة المالية مادة مهمة جدا ولازم تتذاكر من اول السنة عشان هيا بدائيات المحاسبة ولو ماتفهمتش مش هاتفهم اى محاسبة تانية

- intro. To Business
بتدرس فيها مبادئ الادارة وشوية نظريات على شوية كلام كتير كدا .. مادة ممتعة وهاتحبوها

(Organizational Behavior) -
السلوك الانسانى .. مادة علم نفس .. رخمة وخنيقة ومالهاش لازمة وماعرفش بتدرس ليه اصلا !!

- economics
حاجة كدا زى الجغرافيا .. عبارة عن نسب كتيرة وحفظ كتير ورغى كتير .. عييييش حياتك فيها

Pure Math -
الناس اللى كانت فى مدارس حكومية عربى هاتتخنق منها لانها رياضة بالانجليش .. الناس اللى كانت لغات وتجريبى هايمشوا فيها تمام

نعمل بقى استوب لغاااااااية هنا

حضرتك طول الـ 4 سنين هاتحضر داخل مبنى الكلية بتاعك

يعنى مافيش حد يضحك عليك ويقولك احنا عندنا فى مدرج كذا .. لا دا يبقى بيبعتك

كل محاضراتك هاتبقى فى الروومز اللى موجودة جوا مبنى تجارة انجليش

طبعاً قبل ما تبتدي الدراسة لازم سيادتك تبقى عارف نظام الدراسة ماشى ازاى عشان نبقى على نور من اول السنة كدا ومانبقاش داخلين على عمانا

نظام الدراسة فى تجارة انجليش لو قارناه بمثيله فى تجارة عربى هانلاقيه خنيق شوية
ليـــه ؟؟
عشان الاتى :
- تجارة انجليش فيها حضور وغياب وبيتاخد عليه درجات ولو غيبت هاتنقص فى الدرجات
- تجارة انجليش فيها ميد تيرم وكويزات بتتعمل
- تجارة انجليش فيها assignments ووجع دماغ

طبعا فيه ناس هالاقيها دلوقتى قاعدة وبتهرش في راسها ومش مستوعبة الكلام دا :p.. ايه الميد تيرم دا وايه الكويز وايه الاسايمنت !!

عااادي جدا جدا .. انا مجرد بس بدي مقدمات مش اكتر لكن التفاصيل دي هاقولها قدام شوية
بس خليك معايا متابع وماتزهقش :blush:

اذن نستنتج من الكلام دا ان تجارة انجليش فيها مذاكرة طول السنة وشغل كتير

كدا الملخص العام للتعريف بالكلية تقريبا خلص
الردود اللي جايه بقى هابتدي اشرح سنة اولي عربى بالتفصيل وسنة اولي انجليش بالتفصيل

تـــابعونــــــا ...

وماتنسوش .. اى استفســار انا موجود
vampire1188
22-07-2011, 03:00 PM
سنة أولى تجارة عربى

في البوست دا هابتدي اوضح بقى سنة اولي بالذااات عشان السنة دي بتبقى سنة غريبة وغير واضحة المعالم للناس اللى داخلة الكلية جديد

ملحوظة : هوا بوست طويل شوية

طبعاً اول يوم دراسة هايبتدي هاتقوم حضرتك صاحي / صاحية بدري وتضرب الطقم اللى ع الحبل وتظبط نفسك ميه ميه وتقوم نازل الجامعة
اول ماهاتخش من بوابة الجامعة هاتحس باحساس غريب كدا
ايه المكان الغريب دا ؟
شباب هناك عمالين يضحكو !
ولد قاعد مع بنت وماسك ايدها وبيقرالها الكف !
شوية بنات وشوية شباب قاعدين بيلعبو صلح !
شوية بنات وشباب قاعدين بيلعبو اونو !
ناس رايحة تجيب اكل من الكافتيريا وناس رايحة تصلى وناس خارجة وناس داخلة
جو انت اول مرة تشوفه .. واول مرة تحسه
خليك عاااادي وكوول خالص .. لان انت لسه فى مرحلة المبتدئين جامعياً
وخد بالك ان الناس القديمة زي تالتات ورابعات هايعرفوك وشششش لان سنة اولي بيبان عليهم

المهم .. قبل اي حاجة
طبعا سيادتك مادفعتش المصاريف
صح ؟؟

هاتروح لشئون الطلبة بتاعة سنة اولى
تقول لو سمحت عايز اذن دفع مصاريف
هايقولك هات بطاقة الترشيح
هاتديهاله
هايكتب اسمك على ورقة كبيرة كدا الورقة دي اسمها اذن دفع
ودي شكلها
http://www.mediafire.com/?2v265kate12b26a (http://www.mediafire.com/?2v265kate12b26a)
بعد كدا بتاخد الورقة دي وتروح بيها للخزنة وهوا دا مكانها

http://i51.tinypic.com/53o1g5.jpg

طبعا هاتلاقي طابور طويل عريض .. اقف فيه وامرك لله
هاتدي الاذن دا للراجل اللى قاعد في الخزنة ومعاهم 140 جنيه
الـ 140 دول هما مصاريف السنة
هاتستنى شوية لغاية ماينده على اسمك تانى ويقوم مديك 3 ورقات
هاتاخد التلات ورقات دول وترجع بيهم تااانى على شئون الطلبة وتقوله عايز اعمل اثبات دفع مصاريف
هايقوم واخد منك التلات ورقات وصورة شخصية
الصورة دي هيا اللى هاتتحط على الكارنيه
وبس كدا خلاص مبرووك حضرتك دفعت المصاريف

هاتقولي هاستلم الكارنيه امتى ؟؟ هاقولك اسأل بتاع الشئون عشان هوا اللى عارف وبتختلف من وقت لوقت

ملاحظة مهمة : طبعاً انت ممكن تدفع المصاريف فى اي يوم من ايام السنة مافيش اي مشكلة يعنى .. بس عشان انت في سنة اولي ومش معاك الكارنيه فادخولك الكلية هايبقى رخم شوية فانتا بتبقى عايز تدفع المصاريف عشان تطلع الكارنيه في اقرب وقت عشان تعرف تخش بيه الكلية بعد كدا

نخش بقى على المهم ...

ايام المدرسة كنا بنستلم الكتب قبل الدراسة و في بعض الاحيان كنا بنستلمها في اول يوم دراسة وكان دايما دفع المصاريف مرتبط ارتباط وثيق باستلام الكتب

دلوقتى حضرتك خلاص ربنا تاب عليك من المدرسة ووجع دماغها وبقيت بوب كبير ودخلت جامعة

هاتحضر محاضرات اول اسبوع مش هاتفهم حاجة
هاتحضر تانى اسبوع برده مش هاتفهم حاجة
كل اللى انت بتعمله انك بتكتب ورا الدكتور زي الالة الكاتبة بتاعة ايام زمان وبس

وتروح البيت زي البطيخة تنام من التعب اللى انت فيه وتصحي من النوم تبقى عايز تبيض المحاضرة

(تبييض المحاضرة دا مصطلح جامعي اصيل يشير الى انك لما بتبقى فى المحاضرة بتبقى بتكتب الكلام غير مرتب وكله متكوم فوق بعضه .. من الاخر شكل الورقة يسد نفس الكتكوت الاصفر
وبالتالى بتضطر انك تنقل الكلام دا فى كشكول تانى يكون الكلام فيه مترتب وحلو ومتظبط بحيث انك تعرف تقراه
الجدير بالذكر ان تبييض المحاضرة دا بيفيد اوي بالنسبة للشباب المبتدئين اللى نفسهم يتعرفو على بنات وبيفيد اوي برده البنات اللى بيستهبلو فيها عشان يتعرفو على شباب واثبتت الاحصائيات اللى عملناها ان من كل 6 شباب بيطلع منهم واحد بيبيض المحاضرة وبيدي كشكوله للبنت وفي نفس اليوم بيكون واخد رقم تليفونها :P
معلش ماتزعلوش منى بس دا الواقع وانا عارف انكو وانتو بتقرو الكلام دا بتضحكو بس ماعلينا)

المهم .. بيضت المحاضرة وخلصتها وظبطها ؟

تعالى بقى عشان تذاكر .. هاتلاقي نفسك بطيخة مش فاهم اي حاجة برده

والسؤال اللى بيورد على ذهنك دايما

انا دلوقتى بقيلي اسبوعين في الكلية وحاسس ان بقيت شبه قورنى من كتر مانا مش مستوعب .. لا انا عارف اذاكر ولا عارف افهم وكل دكتور بيخش يرزع الكلمتين ويجري .. طب والعمل ؟؟؟؟

خد بقى الكبسولة الجامدة دي
اللى انت فيه دا شئ طبيعي جدا جدا جدا .. لانك لسه جديد وعضمك طري ومش واخد على جو الكلية
عادي يا سيدي مش عيب ماحنا كلنا كنا زيك كدا في الاول
بس الفرق ان احنا مالقيناش حد يقولنا روحو فين وتعالو منين !!

المهم .. اول اسبوعين في الكلية عشان تبقى حاطط في دماغك كدا مالهومش اي تلاتين لازمة

ليـــه يا ريس ؟
قالك عشان مافيش كتب نزلت لسه
يعنى ايه ؟؟! اخبط راسي في الحيط مثلا ؟!
ماحدش قالك اخبط راسك في الحيط بس rules are rules
لما يعدي اول اسبوعين من الكلية وتعرف ان الكتب نزلت على طول تروح تجيبها وساعتها بقى تبتدي تفتح الكتب وتتفرج على البهاريز اللى جوا

حد يسألنى سؤال لولبى محوري .. اجيب الكتب منين وازاى وبكام ؟؟

تجيب الكتب منين ؟
جنب خزنة الكلية اللى انت دفعت فيها المصاريف

ازاى ؟
بتروح للحتة بتاعة خزنة الكلية وتسأل يا جماعة انا عايز ادفع مصاريف الكتب .. هاتدفع المصاريف وهايديك الوصل دا
http://www.mediafire.com/?n4l488m0roter03
تاخد الوصل وتروح بيه لمقر استلام الكتب بتاعة سنة اولي وهاتلاقيه في نفس صف الشبابيك بتاع الخزنة برده وهاتستلم الكتب بتاعتك .. بس بليييييز راجع الكتب كويس اوي عشان مايبقاش فيه حاجات ناقصة

بكـــام ؟
مصاريف الكتب كانت من 3 سنين بالظبط بـ 90 جنيه ودا عشان كل دكتور كان بيطبع الكتاب بتاعه فى دار نشر معينة والكلية بتشتريها من دار النشر دي بسعر البيع
وبالتالى الكتب هاتبقى غالية
لكن بعد كدا الجامعة قالت الحوار دا فكسان ومش هاينفع
وقامت عملت قرار شراء حقوق التأليف والنشر من كل الدكاترة اللى فى الجامعة وبقت الجامعة هيا اللى بتنشر الكتب وبالتالى هيا اللى بتحدد السعر بتاع البيع
وبما ان جامعة القاهرة ما شاء الله ربنا يزيد ويبارك فيها ميزانية ضخمة فعلا ودا مش تريقة دا حقيقي .. قامو منزلين سعر الكتب كلها على بعضها بـ 25 جنيه والمادة الواحدة بـ 5 جنيه
اذن سعر الكتب الحالى
المادة الواحده بـ 5 جنيه
الكتب كلها على بعضها (package) بـ 25 جنيه

تمام يا ريسنا ؟؟؟
دلوقتى انت جيبت الكتب ؟ قريتها ؟ مش فاهم حاجة برده ؟!!
اه مش فاهم حاجة برده .. كتاب زي كتاب المحاسبة المالية دا هاتلاقي فيه حاجات غريبة غرابة التنين
جداول ودائن ومدين واصول وخصوم ورغى كتير وهيا العملية مش ناقصة داحنا لسه في اول سنة وبنقول يا مسهل سهل !!

بص يا سيدي .. مذاكرتك في الكلية دي هاتبقى من اربع مصادر لا خامس لهم والاولوية هاتبقى بنفس الترتيب اللى انا كاتبهولك دا
المحاضرة – ورق الدرس – كتاب التطبيقات – السكاشن

بتهرش في راسك ومش فاهم برده .. خليك معايا وانا ارسيك ع الحوار كله

اولا .. المحاضرة
يتم تعريف المحاضرة فى القاموس الجامعى على اساس انها المكان الذي يجتمع فيه عدد من الطلاب للاستماع الي شرح الدكتور .. من الممكن ان يكون دكتوراً مملا وفي تلك الحالة ربنا يقويك .. وفي الاحيان الاخري يكون دكتوراً برنساً وفي تلك الحالة بيــس اوي :D

عشان تبقى عارف .. انت كطالب ملتزم باللى الدكتور بيقوله فى المحاضرة لان الدكتور عمره ماهايجبلك امتحان من المريخ
(مع ان في بعض الاحيان بتحصل ومسيرك تجرب وتتلسع بس ماعلينا)
وعشان كدا احنا بنعتبر ان المحاضرة دي هيا المصدر الاول والاهم فى المذاكرة وخاااااااصة في سنة اولي بالذات
وبالتالى كشكولك معاك وقلمك معاك وتسجل الكلام اللى الدكتور بيكتبه وبيقوله ولو فيه اي ملاحظات الدكتور بيقولها قشطة اكتبها برده مسيرها تنفعك

ثانيا .. ورق الدرس
يتم تعريف ورق الدرس على اساس انه مجموعة من الملازم يتم نشرها في المكتبات الكائنة ببين السرايات والتى تقع في الجانب الشمالى من كلية التجارة او الجانب الشرقى من قبة الجامعة
ويحتوي هذا الورق على شرح وافى لكل مادة من المواد المقررة دراسياً على سيادتك .. فإذا أردت النجاح فبادر بشراء تلك الملازم اولاً بأول
لان بالصلاة ع النبى كدا مافيش حد بينجح في الكلية دي من غير مايكون ذاكر من الملازم دي

ثالثا .. كتاب التطبيقات
كتاب التطبيقات دا عبارة عن كتاب تمارين
اشبه كدا بكتاب التدريبات بتاع ابتدائى او دليل تقويم الطالب في الثانوية العامة
الكتاب دا الدكتور هوا اللى بينزله بمزاجه .. وبالتالى هوا مش مطالب انه ينزله اصلا .. دي بمثابة ان الدكتور بيحن عليكو بيه
نستنتج من دا ان التطبيقات تختلف عن الكتاب الاساسى
نستنتج من دا كمان ان مش كل المواد اللى عليك هاينزل فيها تطبيقات
بس للعلم .. غاااالبا كل مواد المحاسبة اللى هاتدرسها من اول سنة اولي لغاية رابعة لازم ينزل فيها كتاب تطبيقات
وعموما اي مادة عملية لازم ينزل فيها تطبيقات والا يبقى دكتور خنيق ورخم

المواد العملي عندك في الترم الاول هاتلاقيها المحاسبة والرياضة
يتبقالك تلات مواد
السلوك الانساني .. ماعتقدش انه بينزل فيه لانها نظري بس عادي ممكن الدكتور يضرب في دماغه وينزل
الموارد الاقتصادية .. ممكن ينزل وفيه دكاترة كتير بتنزل
الادارة والتنظيم .. ممكن اه وممكن لاء

بس عمووووووما المحاسبة المالية والرياضة دا اساسي لازم ينزل فيهم تطبيقات

كل اللى حضرتك هاتعمله انك هاتجيب التطبيقات دي
هاتلاقي فيها تمارين كتير .. هاتمسك التمارين وتقعد تحل
وتخلي بالك دايما من التمارين اللى الدكتور بيحلها فى المحاضرات من التطبيقات عشان بتبقى مهمة جداً جداً

التطبيقات بتنزل امتى ؟؟
الدكتور هوا اللى بيقول في المحاضرة يا جماعة كتاب التطبيقات نزل في مكتبة كذا روحو هاتوه

بكام ؟؟
فيه بـ 8 وفيه بـ 10 على حسب بقى

رابعاً .. السكاشن
كتيييييير مننا سمع عن مصطلح السكاشن دا
ان كان من ابن خالتك او ابن عمك اللى في كلية هندسة ويقولك دانا مطحون في السكاشن وبتاع وانت بتقوله اه ربنا معاك وجوا نفسك بتقول ايه السكاشن دي ؟!!

السكشن دا عبارة عن محاضرة .. او حاجة شبيهة بالمحاضرة
بيقوم بتدريسها المعيدين اللى موجودين في الكلية

اهمية السكشن دا بقى في ايــــــه ؟؟
ان السكشن بيجيب من الاخر .. تلاقي المعيد يخشلك السكشن
بصو يا جماعة انا عارف انها مادة خنيقة وبنت ستين في سبعين فاحنا نخلينا في اللذيذ كدا مع بعض .. كل سكشن هاتاخدو كام تمرين وهانحل مع بعض واللى مش فاهم يقول واللى فاهم مايوجعش في دماغي
وبالتالى السكشن انت بتدرس فيه المادة من الاخر
عشان كدا ان شاء الله لما توصل لتالته كدا ولا حاجة هتلاقي نفسك بتنفض للمحاضرات وبتقضيها ورق درس وسكاشن وفكك من اي حاجة تانية
بس انت بالنسبالك عشان انت في سنة اولي ماينفعش اقولك اعمل الكلام دا عشان انت لسه جديد ومش عارف تعمل ايه اصلا
بس اللى اقدر اقولهولك عموما انك اعمل زي مانا قولتلك
ومصادر مذاكرتك هاتبقى زي ماقولت من شوية
محاضرات – ورق درس – تطبيقات – سكاشن

السكاشن دي بتبتدي من اول السنة ؟؟
لاء
دي بتبدأ غالبا بعد بداية الدراسة بحوالى شهر

لو مشيت ع النظام دا وذاكرت اول بأول اضمنلك انك تبقى في السليم وتمام اوي ومش بعيد ربنا يكرمك وتجيب تقدير كمان
بس ساعتها ابقى افتكرني بدعوة بقى :D

طبعا حضرتك هاتفضل ماشي على النظام دا لغااااااية ما الترم الاول يخلص


ريح بقى شوية دلوقتى عشان انا عارف انك تعبت من القراية
وفكك من البوست الجاي عشان دا بتاع تجارة انجليش
بعد بوست تجارة انجليش بقى هاعرفك الامتحانات ونظامها والنتيجة .. الخ الخ
vampire1188
09-08-2011, 03:00 PM
تجارة انجليش
FCES

http://i52.tinypic.com/2ey8k9f.jpg

اولا أأسف على التأخير الشديد اللى حصل فى تنزيل البوست دا بس فيه ظروف حصلت كدا خلتنى اتأخر فى كتابته

شد حزامك وافتحلي بلوتوث دماغك


احنا وصلنا دلوقتى لانك خلاص اسمك متسجل ضمن المقبولين في تجارة انجليش الحمد لله وطبعاً سيادتك دفعت المصاريف والحياة بيس

تماااااام اوي كدا
اول يوم فى الدراسة لاااازم تنزل الكلية
ليـــه ؟
عشان تعرف اسمك متسجل فى انهى جروب
يعنى ايه جروب ؟؟
شعبة انجليش كتيرة شوية
حوالى 400 او 500 طالب
فايستحيل ان البشرية دي كلها تاخد مع بعض
الا فى حالة واحده وهيا المواد "الغير تجارية" زي ماهتعرف بعدين
فالكلية بتضطر انها تقسمهم لجروبات
كل جروب بيبقى فيه حوالى 80 طالب
والجروبات دي مالهاش توزيع معين للحروف زي تجارة عربى كدا
وعشان كدا انا مش هاقدر اقولك انت في انهي جروب بالظبط
لازم تنزل بنفسك وتشوف اسمك
هاتتلاقيه فيــــن ؟
متعلق قدام الباب المراية بتاع مبنى تجارة انجليش


حددت اسمك في انهى جروب خلاص ؟
الحمد لله
باقي حاجة واحده بس وهيا انك تعرف جدول محاضراتك
هاتسيب الباب المرايه خلاص وتخش المبنى جوا في الارضى
هاتسأل اي حد تقوله لو سمحت الاقي الجداول فين

غاااالبا هاتلاقي زحمة مهولة وساعتها اعرف ان الزحمة دي على جداول سنة اولي
هاتخش وسط الزحمة دي وتحاول تنقل الجدول بتاعك

انهى جدول ماهو فيه جداول كتيرة ؟؟
هاتنقل الجدول بتاع الجروب اللى انت تبعه يا ذكى
وعشان خاطري بلاش حَوَل واتأكد ان الجدول دا بتاع سنة اولي مش بتاع سنة رابعة !!

عرفت جروبك ؟ ونقلت جدولك ؟
شااااااااطر


وقفت في نص المبنى كدا وتايه ومش عارف اي حاجة في اي بتنجان

بص يا حج .. المبنى اللى انت واقف فيه دا بيتكون من 3 ادوار + الارضى


الدور الارضى

اول مابتخش من باب الكلية بتلاقى على شمالك الحمام وعلى يمينك السلم

وفي وشك الساحة بتاعة المبنى

هاتمشي شوية قدام هاتلاقى على شمالك مدرج الكلية (Audit.) وعلى يمينك شئون الطلبة وشئون الخريجين


هاتمشي قدام شوية هاتلاقى الاصانصير وحصيرة صغيرة كدا عشان الصلاة :D

من اول الدور الاول للدور التالت هاتلاقي فيه 28 رووم
الروومز دي هيا اللى حضرتك هاتاخد فيها المحاضرات

بس خد بالك اللى يخصك من الروومز دي هيا من اول رووم لغاية رووم 24 (اسوأ رووم فى المبنى بجد)
لان بدءا من رووم 25 لغاية رووم 28 دي تبع
برنامج جورجيا
"وهاعرفك ايه برنامج جورجيا دا بس في بوست منفصل"

المهم دلوقتى انك عرفت المبنى بتاعك دا في ايه وتمام كدا
لانك هاتقعد فيه اربع سنين فلازم تكون عارفه كويس

طب دلوقتى انت عرفت ان الروومز دي اللى هايتاخد فيها المحاضرات

ودا شكل الرووم اللى انت هاتحضر فيها

http://i56.tinypic.com/2s7j48w.jpg (http://i56.tinypic.com/2s7j48w.jpg)

امال المدرج (الاوديت) وظيفته ايه في الحياه ؟؟

الاوديت دا ياسيدي اللى بيتجمع فيه كل الجروبات عشان يحضرو المحاضرات اللي مش تجارية

يعنى ايه مش تجارية ؟؟
يعنى المادة ذات نفسها بيقوم بتدرسيها دكاترة من بره الكلية
زي الـ economics فى الترم الاول والـ economy والـ law فى الترم التاني

الـ economic اصلا مادة تبع كلية آداب
والـ economy مادة تبع سياسة واقتصاد
والـ law تبع حقوق

طب اشمعنه المواد الغير تجارية هيا بتتاخد في الاوديت ؟؟
عشان يجمع كل الشعبة وتتاخد في محاضرة واحده
لانه ليس من المعقول خالص ان 6 دكاترة يسيبو شغلهم الاساسي وييجو لتجارة عشان يدرسو مادة لكل جروب من الجروبات !!

لكن الانسب ان دكتور واحد او دكتورين بالكتير اوي يدرسو هما المادة لدفعة الشعبة كلها مرة واحده

فهمت ؟؟؟

ودا شكل المدرج

http://i54.tinypic.com/1zoev0k.jpg (http://i54.tinypic.com/1zoev0k.jpg)

نرجع بقى لمرجوعنا تانى

تبص لجدولك تشوف عندك محاضرات امتى
والوقت اللى يبقى فيه عندك المحاضرة تطلع على طول على الرووم بتاعتك او شوف انت هاتاخدها فين وتخشها

وكل روم بتكون مجهزة بكذا تكييف وبروجيكتور ووايت بورد زي ماشوفت في الصورة قبل كدا

طبعاً نظام المدرسة دا اتلغى وتفرمته من درايف السي في مخك نهائى
بمعنى نظام انك تخش الرووم وتجري ع المكان واللى يلحق الاول ودا يبقى مكانه طول السنة دا نظام مالوش مكان في الكلية خلاص

انت اه يستحسن تخش بدري عشان تعرف تاخد مكان كويس قدام تعرف تتابع فيه الدكتور كويس وتبقى مستوعب الكلام

لكن دا مايمنعش انك لو قعدت ورا هاتبقى فاهم برده

هاتفضل قاعد مستني لغاية ماتتلاقي واحد محترم كدا داخل الرووم ببدلة وشكله باين عليه انه نضيف .. هوا دا الدكتور

طبعا هايبتدي يرحب بيكو ويديكو نبذة عن الكلية ويرغى شوية

وماتستعجبش لو بدأ الكلام بالانجليش .. عاااااااادي جدا جدا

هاتتعود بعد كدا وهاتاخد على كدا

طبعاً خلال الاسبوع الاول من الدراسة غاالبا مابيبقاش فيه غياب

ليـــه ؟؟

عشان الـ IDs بتاعتكو لسه ماتوزعتش

حد يقولي يعنى ايه ID ؟

اقوله الـ ID دا عبارة عن رقم ظريف كدا حضرتك بتاخده في اول السنة
والرقم دا هوا بيكون الرقم التعريفي بتاعك وهوا اللى بتكتبه على اي كويز وفي امتحان الميد تيرم وكذلك في امتحان الفاينال برده

وهاعرفك يعنى ايه كل الكلام دا كمان شوية

اول ما الـ IDs بتاعتكو بتنزل هاتلاقيها متعلقة في كشوفات قدام الباب المرايه بتاع مبنى الشعبة تحت فى الدور الارضى
هاتعرف رقمك ايه وتحفظه كويس اوي

واول ما الارقام دي بتنزل يبقى كدا الغياب ابتدي يتحسب

بيتاخد ازاااااااى بقى الغياب ؟؟

كل دكتور يا عم الحج بيبقى معاه كشف فيه كل اسماء الجروب
يعنى انت مثلا جروب A .. يبقى كل دكتور هايخشلك هايبقى معاه صورة من الكشف بتاع اسماء الناس اللى فى جروب A .. فهمت ؟؟
والكشف دا بيمر على الطلبة جوا الكلاس .. وكل طالب يحط علامة صح قدام الاسم بتاعه وبعد ماتخلصو خاالص بيقوم الدكتور واخد الكشف

فيه بقى دكاترة بترخم وبتنده الاسماء بس بطريقة عشوائية طبعا عشان يشوفو فيه حد بينصب فى الغياب ولا لاء .. وفيه دكاترة بتنفض

بعد ما الـ attendance بيتاخد هايبتدي الدكتور يخش فى الشرح مباشرة
تقوم مطلع كشكولك وشغال كتابة .. لو مافهمتش مش مشكلة اوي
بس بعد فترة حوالي اسبوع او اسبوعين كدا هاتبتدي تلاقي نفسك بدأت تقرا الجو من حواليك والعملية بيس يعنى

المهم دلوقتى انت ماعندكش اي ماتيريال تذاكر منها لان سيادتك لسه ماستلمتش الكتب

كتب تجارة انجليش عموما مابتنزلش فى اول السنة زي ايام المدرسة كدا

لا بتقعدلها بتاع اسبوعين ولا حاجة وتنزل

وعموما اول ما الكتب بتنزل بيكون الخبر منتشر فى الكلية



طب لو نزلت بتستلمها ازاااااااى ؟؟

سيادتك لما بتدفع المصاريف .. المصاريف دي بتبقى شاملة مصاريف الكلية اللى هما 3000 جنيه + مصاريف الكتب اللى هما 1500 جنيه
لما بتدفع اسمك بيتكتب فى كشف كدا مخصوص للناس اللى دفعت مصاريف الكتب .. عشان انت ممكن ماتدفعش الكتب عادي وتوفر الـ 1500
فانتا يوم استلام الكتب بتروح لمقر الاستلام فى الدور الارضى لمدرج هـ وبتدي للراجل البطاقة بتاعتك بيقوم باصص فى الكشف ويشوف انت دافع ولا لاء وساعتها يقوم مسلمك الكتب ومعلم قدام اسمك علامة صح

ومعلومة تهمك برده
ان يوم استلام الكتب دا بيبقى يوم خنيق جدااااا
لان كتب تجارة انجليش كلها بتبقى كتب مستوردة
يعنى مش دكاترة الكلية هما اللى مألفينها
لا خاالص .. ابسلوتلي :D

كل الكتب بيبقى ناس اجانب هما اللى مألفينها فيما عدا كام كتاب كدا
زي الـ governmental فى سنة تانية والـ law فى سنة اولى على سبيل المثال لا الحصر

اللى بيخلي يوم استلام الكتب خنيق ان الكتب دي بتبقى تقيلة جدا
يعنى كتاب مثلا زي كتاب الـ accounting بتاع سنة اولي دا تلاقيه زايد عن الـ 1200 صفحة !
بس ماتتخضش اوي كدا
الكتاب دا هايقعد معاك 3 تيرمات

الترم الاول والتانى بتاع سنة اولي والترم الاول بتاع سنة تانية
دا زائد انك مش هاتدرسه كله يعنى

على حسب .. الدكتور بيمسك الكتاب ينقى منه كام شابتر ويبقى هوا دا المنهج بتاعك

المهم

دلوقتى انت استلمت الكتب والدراسة دخلت معاك في تالت اسبوع
لازم تبقى عارف كذا معلومة مهمة هاقولهوملك دلوقتى عشان تبقى على نور من اولها كدا :


صحصح وماتنامش :friendsxs3:


- معلومة رقم 1

احنا خلاص قبل كدا عرفنا ان احنا عندنا 5 مواد في الترم الواحد
كل مادة منهم بتتحسب من 20 درجة

يعنى الترم الواحد 20 درجة ×5 مواد = 100 درجة

يعنى السنة كلها 100 درجة × 2 ترم = 200 درجة




بس فى تجارة انجليش الوضع بيبقى مختلف شوية
لان الـ 20 درجة بتاعة كل مادة بتتوزع على 6 حاجات

- 1 درجة للـ Assignment
- 1 درجة للـ Quiz
- 1 درجة للـ Attendance
- 3 درجات لامتحان الـ Mid-term
- 14 درجة لامتحان الـ Final

-معلومة رقم 2


يعنى ايه assighment ؟

كلمة assighment يعنى واجب .. حاجة كدا زي هوم وورك بس على مستوي اعلى شوية

كل اللى بيحصل ان الدكتور بيكلفك تعمل حاجة وليكن مثلا تحل مسألة (problem) .. بتقوم انت حالل المسألة في ورقة او كشكول وفي المحاضرة اللى بعدها تقوم مديهاله وهوا يصححهالك

ونظام الـ assignments دا بيضمن للدكتور ان كل الطلبة تكون بتذاكر اول بأول وعشان كدا تجارة انجليش بتبقى مقرفة شوية فى الحوارات دي







- معلومة رقم 3

يعنى ايه Quiz ؟؟

Quiz فى اللغة يعنى امتحان مصغر .. او امتحان مفاجئ

الطبيعي اللى بيحصل انك تبقى قاعد في المحاضرة وتلاقي الدكتور في اخر المحاضرة يقولكو يا شباب فيه كويز المحاضرة اللى جايه ذاكرو كويس

واللى مش طبيعي ان الدكتور تضرب في دماغه يعمل كويز في التو واللحظة وفي تلك الحالة بيبقى موضوع رخم شوية




والجدير بالذكر ان في الترم كله ممكن تاخد 4 او 5 كويزات فى المادة الواحده

ودا معناه ان الكويز الواحد ممكن يقف عليك بـربع درجة من الدرجة الكلية للمادة

- معلومة رقم 4

يعنى ايه attendance ؟؟

كلمة attendance يعنى كشف الحضور والغياب

كل جروب من الجروبات بيبقى ليه كشف فيه اسماء الناس اللى متسجلة في الجروب دا
وكل دكتور من الدكاترة اللى بيدرسولك في الجروب بتاعك بيبقى معاه صورة من الكشف دا وبيفضل محتفظ بيه طول الترم
وكل محاضرة بيخشها بياخد فيها الغياب دا

وعرفنا قبل كدا الغياب بيتاخد ازاى


حد يسألنى سؤال ذكي ومحوري ولولبي

لازمته ايه الـ attendance ؟ مانا ممكن انفض وفي ستين داهية الكلية ع اللى فيها وفي اخر السنة اروح امتحان الفاينال وبنااااقص الدرجة الحقيرة بتاعة الغياب دي !

بص ياعم الحج
ناس كتيرة كانت داخلة زيك كدا فى الاول في السنين اللى فاتت وبيقولو نفس الكلام اللى انت بتقوله دلوقتى
لغاية مابيتصدمو بالحقيقة المرة الا وهى ....


ان في قبل امتحان الفاينال
(وهانعرف كمان شوية ايه الفرق بين الفاينال والميد تيرم)
الدكتور بيعمل احصا سريعة لكشف الغياب اللى عنده فى المكتب
ولو لاقى ان فيه طالب من الطلبة نسبة الغياب بتاعته تعدت الـ 30%
ساعتها مش بيبقى للطالب دا الحق فى دخول امتحان الفاينال
وبينزل اسمه فى كشف المحرومين من دخول الامتحان

ودا معناه ان فيه 14 درجة كاملين طارو منك
يعنى نسبة سقوطك فى المادة ممكن تتعدي الـ 85% !!

حاجة اخيرة بس احب اضيفها

ان الـ attendance بيتعمل فقط فى المواد اللى تبع الكلية
واظن انا شرحت قبل كدا يعنى ايه مواد تبع الكلية ومواد بره الكلية
يعنى مادة زي الـ economic دي مش هايبقى عليها غياب
ليه ؟ لانك هاتاخدها في الاوديت اللى هايبقى اصلا متجمع فيه كل الجروبات فايستحيل ان الغياب يتاخد لكل العدد دا

ونستنتج من دا استنتاج حلو اوي .. ان اي محاضرة بتبقى عليك فى الاوديت اعرف ان مش عليها غياب

- معلومة رقم 5

يعنى ايه امتحان الـ mid-term ؟؟


امتحان الميد تيرم دا بيتعمل بعد مرور

6 اسابيع على بدأ الدراسة
يعنى حضرتك ابتديت دراسة مثلا فى 15 سبتمبر
يبقى امتحان الميد تيرم بتاعك هايبقى على اول شهر 11 (نوفمبر)
طبعاً دا العادي اللى بيحصل كل سنة .. بس لازم تتابع الكلية عندك وتشوف امتحان الميد تيرم امتى عشان ماتلبسش في الحيطة

والمعلومة دي مهمة جدا بالنسبالك ولازم تبقى عارفها كويس اوي عشان ماتلاقيش الوقت بيجري منك وانت لسه ماذاكرتش حاجة وساعتها تتسوح تسويحة السنين !

امتحانات الميد تيرم بتتعمل فى مبنى قاعات الامتحانات
ومدة كل امتحان ساعة واحده فقط لا غير
وعشان تحضر الامتحان لازم يبقى معاك رقم الجلوس بتاعك اللى انت استلمته وعرفته في اول السنة

- معلومة رقم 6

يعنى ايه امتحان الـ Final ؟؟


امتحان الفاينال هو اخر امتحان بيتعمل فى التيرم كله
ودا بيستحوذ بالنصيب الاكبر من الدرجة الكلية للمادة اللى هيا 14 درجة .. يعنى بتمثل 70% من الدرجة الكلية للمادة

الامتحان دا هو امتحان الترم اللى بعده بتاخد الاجازة وبيكون مدته ساعتين
ومكان الانعقاد بتاعه على حسب الكلية ماتتحددلك

فيه ناس بتاخد في قاعات الامتحانات وناس تانية بتاخد في مبنى الشعبة ذات نفسه وناس تالته بتاخد في مدرج العيوطى

وزي ماعرفنا قبل كدا ان الحاجة الوحيدة اللى تمنعك من دخول الامتحان دا هو انك تغيب بنسبة تزيد عن المسموح ليك بيها وهى 30% من جملة عدد ايام المحاضرات

- معلومة رقم 7

أذاكر منيـــــــن يا بنى آدمين ؟؟



مذاكرتك هاتكون من 4 مصادر
المحاضرات – السكاشن – ورق الشرح

طب احنا عرفنا المحاضرات

ايه بقى حوار السكاشن وورق الشرح دا ؟؟

1-السكاشن

اطلع على البوست اللى قبل البوست دا على طول واقرا الجزء بتاع السكاشن فى تجارة عربى .. هوا هوا

2 – ورق الشرح
ورق الشرح دا عبارة عن ورق بيتباع في المكتبات اللى بره الكلية وبيبقى فيه شرح تمام وزي الفل وهايظبطك

والورق دا بينزل فى كل المواد
ميزة الشرح دا انه بيلم المادة كويس اوي
زائد ان كل جزئية بيبقى عليها امثلة واسئلة من امتحانات سابقة

طب بتجيب الورق دا منيـــن ؟؟؟

فيه مكتبتين بيعملو ورق الشرح بتاع تجارة انجليش

مكتبة مى – مكتبة نور

مكتبة نور ناس كتيرة مابتحبهاش وبيقولو شرحها مش تمام
والمعظم بيجيب من مكتبة مى

مكانهم فين المكتبات دول ؟؟

هاتطلع من باب تجارة وهاتعدي الشارع الناحية التانية واسأل اى حد على اي مكتبة فيهم وألف من يدلك


كدا تقريبا انا خلاص خلصت بوست تجارة انجليش
فيه حاجتين متعلقين بتجارة انجليش
1- قسم اكتواري
(ودا مهم جدا جدا جداااا ولازم تقروه كويس اوي)
2- شعبة جورجيا
(ودا للناس اللى الانجليش بتاعهم جامد وناويين يدفعو كتير)

والاتنين دول هانزلهم فى بوست منفصل ان شاء الله
البوست الجاي دا بقى هايبقى عن الامتحانات والنتيجة وما يتصل بهم من مواضيع
vampire1188
14-08-2011, 10:07 PM
ناس كتير قعدت تسأل على قسم اكتواري وشعبة جورجيا


وانا كنت قولت هنزلهم ان شاء الله بعد بوست الامتحانات والنتيجة


بس انا شايف ان الناس عايزة تعرف فاقولت انزله الاول




عشان تخش قسم اكتوارى دا لازم يتوافر فيك شرطين


1- انك تكون جايب في سنة اولى تقدير لا يقل عن جيد

2- انك تكون جايب في الثانوية العامة فى الانجليش والرياضة ما لايقل عن 80% من مجموع كل مادة على حدة
يعنى في الرياضة ماتقلش عن 40 من 50
والانجليش ماتقلش عن 40 من 50

اذا توافر فيك الشرطين دول يبقى تمام كمل معايا الجزئية دى
مش متوافر فيك بعد اذنك اجرى بالماوس وتخطاها
عشان مش هاتفيدك فى حاجة

دلوقتى بعد ما خلصت سنة اولى الحمدلله بنجاح وبتقدير جيد
بعد ما النتيجة تظهر بحوالى أسبوع كدا او أسبوعين
هاتروح لشئون الطلبة بتاعة المجموعة بتاعتك
وتقولهم انا عايز حاجتين :
1- بيان نجاح (اثبات قيد) ومكتوب فيه تقدير سنة اولى
(وعشان تعمله بتدفع 10 جنيه فى الخزنة)
http://www.mediafire.com/?oqn12kblib7fbc8 (http://www.mediafire.com/?oqn12kblib7fbc8)

2- صورة من استمارة الثانوية العامة اللى انتا قدمت بيها فى الكلية
(وممكن يدفعك فلوس على الصورة دي عادى يعنى)


وفايدة الورقتين دول ايه بقى ؟


1- ان بيان النجاح دا اثبات انك جيبت جيد في سنة اولى




2- استمارة الثانوية العامة دى بتتجاب عشان يشوفوا درجاتك فى الانجليش والرياضة كانوا كام



بعد مابتطلع الورقتين دول بتقوم واخدهم وطيران على شئون تجارة انجليش
(دا لو انت كنت تجارة عربى اما لو كنت تجارة انجليش خلاص كله بيخلص من شباك واحد)
تديهم الورقتين هايشوفوا درجاتك وتقديرك يسمح ولا لأ
وبعد مابيتأكدوا بتقوم مدياك أذن دفع بـ 200 جنيه




تروح تدفعهم فى خزنة الكلية وترجع تانى هاتقوم مدياك استمارة التقديم
هاتملا بياناتك فيها .. وهايتتحددلك معاد الامتحان
اذن من الآخر الاستمارة دى ماهى الا حجز للامتحان مش اكتر







ناس هاتسألنى بقى تقولى .. الامتحان دا فى ايه ؟؟؟

الامتحان دا فيه انجليش و ماث (رياضة يعنى بس انجليش)






طب ودا هانخشه ازاى من غير مانذاكر ؟

والله عايز تذاكر ممكن تذاكر مع نفسك
عايز تاخد فيه كورسات .. ممكن تاخد فيه كورسات






الجامعة مقدمالك كورس بتروح تقدم عليه فى مركز خدمة المجتمع


اسم الكورس : العلوم الاكتوارية


مدة الدراسة : اسبوعين (كل يوم 4 ساعات)


القيمة : 200 جنيه للماث – 200 جنيه للانجليش

يعنى التوتال كدا 400 جنيه
مكان الدراسة : على حسب ما الدكاترة يحددوا




مع اول كلاس بتحضره بيدوك ملزمتين
ملزمة فى الانجليش وملزمة فى الماث
ودى زى بمثابة مرجع ليك فى المذاكرة يعنى







بعد مابتخلص الكورس بـ 10 ايام بتخش الامتحان

الامتحان مدته ساعة بتحل فيها حوالى 4 ورقات



بعدها بفترة بتنزل النتيجة وتتعلق قدام باب تجارة انجليش



بأسماء الطلبة الناجحين فقط
يعنى الطلبة اللي ماوفقوش ودخلوا القسم مابيكونوش مكتوبين


فيه ناس بتدور في دماغهم الاسئلة دي :



1- القسم دا انا سمعت عنه كتير اوى .. هوا مهم ؟؟

الحقيقة أهمية القسم دا بترجع لانه تخصص زي مابنقول كدا نادر
او بمعنى اصح مميز .. ودا عشان كذا سبب :
أ- عدد الطلبة المقبولين فيه واللي بيدرسوا بيبقوا قليلين
ب- الدراسة فيه بالانجليش
جـ- مافيش فى مصر كلها غير جامعتين اللى بيدرسوا التخصص دا
جامعة القاهرة – الجامعة الامريكية




2- طب هوا انا لو دخلت القسم دا هاتخرج اشتغل ايه ؟؟




المفروض انك بتبقى خبير ائتمانى .. والخبير الائتمانى دا بيعمل حاجتين فى مجالين

- مجال البنوك -
المفروض لما شركة بتيجى تطلب قرض من اى بنك
الطبيعى ان البنك بيعمل دراسات ائتمانية عن الشركة دى
ويشوف هل هى هاتقدر تدفع اصل وفوايد القرض ولا لاء
وهيا دى بقى وظيفة خبير الائتمان .. انه بيعمل دراسة حوالين الشركة ويشوف هاتقدر تسدد ولا لاء
- مجال شركات التأمين -
اى بوليصة تأمين بيبقالها قواعد وشروط
وظيفة خبير الائتمان انه هوا اللى يحط الشروط دى




3- بالنسبة للناس المقبولة .. كام واحد بيتقبلوا ؟؟
من كام سنة كدا كانوا بياخدوا اعداد قليلة جدا جدا





يكفى انى افتكر دفعة 2008/2009 تقريبا كانوا واخدين 17 طالب !!

بس على كل حال دا النظام القديم .. النظام الجديد بقى يقبلوا 35 طالب





4- طب والنجاح في الامتحان دا من كام ؟؟


من 75%



5- وبالنسبة للمصاريف ؟؟


نفس مصاريف تجارة انجليش بالظبط (4500)



6- والكارنيه ؟ هل بيتم تمييزنا ولا زينا زى أى حد ؟؟

بيتكتب على الكارنيه فوق تجارة انجليزى – قسم علوم اكتوارية



يعنى معنى كدا ان انا هابقى متسجل في تجارة انجليش ولو فيه ورق عايز اخلصه من شئون الطلبة يبقى اروح شئون طلبة تجارة انجليش ؟؟
بالظبط كدا .. يعجبنى ذكائك






حتى لو انا كنت تجارة عربى في سنة اولي ؟؟

ايــوا .. بمجرد قبولك في قسم اكتواري كدا انت بقيت تجارة انجليش خلاص





7- وياترى شكلها ايه الاستمارة اللى بنقدم بيها دى ؟؟

http://www.mediafire.com/?dwohuw5msif8ao1






8- انا كنت أدبى في ثانوي .. هل ينفع اخش ؟

اول ما القسم اتعمل كانو بياخدو خريجي الثانوية العامة من شعبة علمى رياضة فقط لا غير
بس بعد كدا فتحوها لكل الناس وبقى اي حد بيقدم بس لازم يكون متوافر فيه الشروط اللى قولنا عليها في الاول خالص








نصيحة أخيرة بخصوص قسم اكتواري


القسم دا عايز ناس دماغها نضيفة في الرياضة


بمعنى اصح تكون الرياضة دي لعبتك


اما لو كنت بتتخنق منها اصلا بس نفسك تروح تجارة انجليش وخلاص لا يبقى بلاش تقدم لانك مش هاتنجح في امتحان القبول اصلا وحرام عليك تدفع الـ 200 جنيه بتوع التقديم



وأخيراً للناس اللى ماحالفهاش الحظ في دخول تجارة انجليش في الثانوية العامة


احب اقولكو لســه فيه امل .. بس اتعبو شوية




معلومة أخيرة احب بس انوه عنــها عشان ناس كانت سألت عليها



من 3 سنين بالظبط الكلية اعلنت عن وجود مجموعة جديدة اسمها المجموعة المميزة ودي كانت بمثابة مجموعة اضافية لشعبة تجارة عربى



يعنى في الاساس كان فيه 4 مجموعات انتظام

أ – ب – ج – د .. دا غير مجموعات انتساب بس مش مهم انتساب دلوقتى لانها اتلغت خلاص



المجموعة المميزة دي بقى كانت مجموعة اضافية جت عليهم


ومش بيخشها الا الناس اللى بتجيب تقدير جيد جدا وامتياز


والدخول اختياري طبعا مش اجباري


يعنى انا مثلا كنت في مجموعة أ وجيبت امتياز فبروح اعمل طلب تحويل للمجموعة المميزة عشان احول .. حاجة بسيطة جدا




بالنسبة للناس بقى اللى داخلة كلية جديد اللى هما بتوع الثانوية العامة فكان بيتعملهم تنسيق داخلي زي النظام القديم بتاع تجارة انجليش كدا


واعلى مجاميع بتكون مقدمة طلب التحاق على المجموعة دي بياخدوهم طبقاً للعدد اللى هما طالبينه




المجموعة دي نظام الدراسة فيها كان نفس نظام تجارة انجليش


بس لغة الدراسة كانت بالعربى


يعنى فيه كويزات .. وفيه اسايمنت وفيه ميد تيرم وفيه مذاكرة طول السنة




والمجموعة دي كانت بتتميز عن باقى المجموعات بانهم بيروحو تريننج وبياخدو منح ببلاش وحاجات زي كدا



الكلام والمميزات في ظاهرها حلو وظريف وجامد


ومسمى المجموعة المميزة ذات نفسه لما تسمعه لاول مرة تقول اوووووبا ايه العسل دا !!




بس تعالى للواقع بقى




تجارة عربى العادية .. انت بتخش امتحان الفاينال بتلعب في العشرين درجة كلهم


يعنى غيب براحتك .. عيش براحتك .. لف في الكلية زي مانتا عايز .. ماتحضرش محاضرات مش مهم طوز


بس انت بتذاكر في البيت .. المهم انك بتذاكر


تعالى بقى في الامتحان لو حليت كويس ممكن تجيب في المادة وليكن 17 او 18 !!


تجارة عربى المميزة بقى .. انت طول الترم فيه درجات عماله تطير منك في حاجات غريبة


درجة في الحضور والغياب ممكن تاخد فيها نص


درجة في المشاريع والاسايمنت اللى الدكتور بيطلبها منك تاخد فيها نص او تلات تربع بالكتير


3 درجات في الميد تيرم لو انت دحيح اوي ممكن تجيب فيهم درجتين ونص


على بال ماتوصل لامتحان الفاينال اللى هوا بيتحسب من 14 تلاقي طار منك ييجي 3 درجات في الهوا في حاجات غريبة !!



وتخش امتحان الفاينال تلاقي امتحان رخم رخامة السنين تجيبلك من الـ 14 قول 12 لو انت جامد


يبقى كدا طار منك 5 درجات في المادة كلها وانت اساسا مش حاسس !



قارن بقى بين طالب المميزة وطالب تجارة الغلبان العادي


العادي يجيب 18 وهوا برنس


المميز يجيب 15 وهوا طالع عينه طول السنة !!




والموضوع دا طلبه كتير اكتشفته ونفضوله


وناس اعرفها شخصيا كانت جايبه جيد جدا وامتياز


وفضلو زي ماهما في مجموعاتهم وماحولوش للمميزة




ولما الكلية لاقت ان الموضوع مش عليه اقبال والحوار فكسان


ومابقاش فيه ميزة ولا فيه بتنجان .. قامت لاغية المجموعة كلها


ولما الثورة قامت طبعا حصل حاجات كتير ومن ضمنها تغيير القيادات الجامعية عن طريق عمل انتخابات
ولما الانتخابات اتعملت في كلية التجارة جامعة القاهرة دكتور حلمي البشبيشي هوا اللى كسب وبقى العميد الجديد

ومن ضمن القرارات اللى اخدها
رجوع المجموعة المميزة تااااااانى من بعد ما كانت اتلغت

ناس هاتقولي طب انت حكيت القصة دي ووجعت دماغنا بيها ليه من الاول ماكنت تقول انها اتلغت وخلاص !!

كان لازم اقولكو الحكاية دي عشان تفهمو الموضوع ماشى ازاى عشان ماتبقوش حاسين بالذنب وزعلانين ان هيا اتلغت


بالعكس .. انتو كدا في الامان وكدا احسـن


تمــام يا رجالة ؟ تمــام يا بنات ؟

اشوفكو في البوست القادم ان شاء الله



" شعبة جورجيـا "
اينشتاين العرب
15-08-2011, 01:09 AM
طب سؤال يا فامبير
الرياضه دي مقصود بيها رياضه 1 ولا رياضه 2 عشان انا جايب في الانجلش 44 و في رياضه 2 49.5 وفي رياضه 1 36 عشان ابقي عارف كده ينفع ادخل ولا لا ؟؟؟
vampire1188
18-08-2011, 12:32 AM
شعبة جورجيـــا


http://i52.tinypic.com/xeq6o4.jpg


عشان نبقى متفقين من اولها كدا
لو الانجليش بتاعك محترم وقادر تدفع 20 الف جنيه في السنة كمل البوست دا معايا للاخر
لو الانجليش بتاعك تعبان ومش مقتدر ماليا يبقى اقفل الموضوع احسن ووفر على نفسك وقتك


كــان يا ما كان في سنة 2005


كان فيه دكتور اسمه محمد يوسف كان ساعتها عميد كلية التجارة جامعة القاهرة .. الدكتور دا قرر يعمل اتفاقية شراكة وتعاون مع جامعة امريكية اسمها



Georgia State University



مشاورات من هنا واتفاقيات من هناك لغاية ما الموضوع تم على خير والاتفاقية تمت بنجاح


وكان مضمون الاتفاقية بتقول ان هايتم انشاء برنامج اسمه برنامج جورجيا والدراسة فيه هاتبدأ بدءاً من سنة 2007 والشهادة اللى الخريج هاياخدها هاتبقى معتمدة من الجامعتين

(القاهرة و ولاية جورجيا) ومصاريف البرنامج دا 20 الف جنيه سنوياً


وكدا تكون خلصت الحكاية



نرجع بقى من الاول خالص ونشوف ايه قصة جامعة ولاية جورجيا دي



اولا زي ماحنا عارفين ان فيه 52 ولاية امريكية


من ضمن الولايات دي ولاية صغننة كدا اسمها جورجيا


ولاية جورجيا دي موجود فيها 48 جامعة


من ضمن الـ 48 دول جامعة ولاية جورجيا


بس لازم نفرق بين حاجتين مهمين


جامعة جورجيا وجامعة ولاية جورجيا


لان جامعة جورجيا (Univ. of Georgia)


تصنيفها عالميا الـ 88


اما جامعة ولاية جورجيا (Georgia State Univ.)


تصنيفها الـ 523



وبالتالى لما تيجي حضرتك تخش شعبة جورجيا ماتبقاش فرحان اوي انك داخل برنامج تبع جامعة امريكية لان الجامعة دي تصنيفها عالميا 523 !!


ودي كانت اول نقطة حابب اتكلم فيها



ثانيا مصاريف الجامعة دي في امريكا 4 الاف دولار


يعنى تقريبا هوا هوا نفس سعر المصاريف بالمصري


بس الـ 4 آلاف دولار دول رقم متدني جدا مقارنة بجامعات تانية زي جامعة كورنيل بيتدفع فيها 20 الف دولار وجامعة بنسلفينيا بيتدفع فيها 30 الف دولار


وبلاش بقى نتكلم عن جامعة زي هارفارد اللى بيتدفع فيها سنويا 45 الف دولار !!



يعنى من الآااااخر الـ GSU دي جامعة غلبانه في امريكا


ودي تاني نقطة كنت حابب اتكلم فيها



وبالتالى ماتشوفش نفسك اوي وتعيش في الدور انك بتدفع 20 الف جنيه في السنة وتبقى حاسس انك جامد بقى وملك في الكلية !


المعلومتين دول كنت لازم تعرفهم عشان ماتبقاش داخل وبتدفع فلوس في حاجة انت حاسس ان هيا جامدة بس في الواقع هيا عادية من منظور التعليم الامريكي مش المصري



طبعا بعد ماقريت الكلمتين دول نفسك اتسدت وقولت ايه الشعبة التعبانه اللى انا عايز اخشها دي


بالرغم من انها طبقاً للتعليم الامريكي هيا عادية مش تعبانه .. ولكنها بمقياس التعليم المصري حاجة كويسة


كويسة في حاجتين :

- نظام التعليم
- عدد الطلبة واعضاء هيئة التدريس






أولاً : نظام التعليم


نظام التعليم في الشعبة دي امريكي بحت .. ونظام الدراسة الجامعي في امريكا ناس كتير مصريين مايعرفهوش ولو عرفوه بيستغربوه وبيحسو انه معقد شويتين .. انا بقدر الامكان هحاول اوضح النظام ماشي ازاى ودا اللى فعلا بيتمشي عليه في الشعبة .. ولو ربنا مش اراد انك تخش الشعبة دي فدا هايكون معلومات عامة ليك اهو مسيرها تفيدك


بص ياسيدي .. فتح دماغك معايا كدا وفوق وماتنامش :slap1qk6:



اولاً .. مافيش حاجة اسمها ترم اول وتانى


لكن فيه حاجة اسمها


Fall Semester و Spring Semester


الـ Fallدا بيساوي الترم الاول في النظام المصري عشان دايما الترم الاول بييجي في الشتا


الـ Spring دا بيساوي الترم التاني في النظام المصري عشان دايما الترم التاني بييجي في الربيع





بالاضافة لان فيه حاجتين اضافيتين


Winter Session و Summer Session


الوينتر بتبقى في اجازة الفول سيمستر والسامر بتبقى في اجازة الاسبرينج سيسمتر


وظيفتهم ايه ؟ هاتلخبطك شوية ومش مهم تعرفها ومش مطبقة في برنامج جورجيا لكن في امريكا بتبقى موجودة فعلا



ثانياً : الكليات والاقسام في الجامعة


في جامعات امريكا واوروبا عموما وحتى كمان في الجامعة الامريكية هنا في مصر بيقسمو الجامعة كلها لاربع كليات رئيسية وممكن تزيد او تقل على حسب الجامعة


وكل كلية بيبقي فيها اقسام .. الاقسام دي بتساوي الكليات عندنا في التعليم المصري



كل قسم من الاقسام دي بيتقسم لتخصص .. واللى هوا بيساوي الاقسام عندنا في التعليم المصري


نوضح اكتر ...

الاربع كليات بيبقو متقسمين كالاتى :





1- Faculty of Archaeology and Anthropology


اللى هيا كلية الآثار وعلوم الانسان


2- Faculty of Sciences and Engineering

اللى هيا كليات العلوم والهندسة




3- Faculty of Social Sciences


اللى هيا كلية العلوم الاجتماعية


4- Faculty of Business


كل كلية من دول بيبقى تحتها اقسام فيما عدا آخر واحده اللى هيا عندنا في مصر بتساوي كلية تجارة .. وعشان هيا ليها اهمية كبيرة عندهم في اوروبا عاملينلها كلية لوحدها بس عندنا في مصر الوضع يختلف !!



فمثلا كلية زي كلية العلوم الاجتماعية دي تلاقي تحتها اقسام كتيرة زي :


علوم سياسية – فلسفة – تاريخ – أدب انجليزي

وكل قسم من دول بتلاقي تحتيه تخصصات كتيرة


زي مثلا علوم سياسية تلاقي تحتيه تخصصات زي علاقات دولية والاقتصاد السياسي والشئون الافريقية .. الخ الخ


المعلومة دي بيتهيألي مالهاش علاقة باللى احنا بنتكلم فيه بس دي معلومة عامة ليك يعنى مش اكتر اهو بالمرة تعرفها



ثالثا .. النظام كله ماشى على حاجة اسمها الساعات المعتمدة



Credit Houres


طبعا اكيد حضرتك سمعت عن الساعات المعتمدة دا وكنت بتسمع انه حاجة كويسة بس ياتري ...


يعنى ايه ساعات معتمدة ؟


يعنى قبل ماتخش الدراسة الكلية بتقولك اللى اوله شرط اخره نور .. انت يا حج مطلوب منك انك تجتاز عدد ساعات معين عشان تاخد شهادة التخرج بتاعتك


غاااااااااااالبا عدد الساعات المعتمد دا بيكون 120 ساعة للسنة الواحده


طب بالذمة هل يعقل ان في 4 سنين هاحضر 120 ساعة بس ؟! يا بلاش !!


لا طبعاً .. فتح دماغك اوي معايا في الحتة دي عشان تفهم


كل ساعة من الـ 120 ساعة دول بتمثل اسبوع


وكل اسبوع عدد الساعات الفعلية اللى المفروض تحضرها في كل مادة على حدة 4 ساعات


يعنى الساعة الواحده التقديرية = 4 ساعات فعلية لكل مادة

وانت عندك في الترم الواحد غالبا بيبقى 3 شهور




يعنى 12 اسبوع .. وانت مطالب انك تحضر في كل مادة 4 ساعات زي ماقولنا


يعنى في الترم الواحد مطالب انك تحضر


4 ساعات × 12 اسبوع = 48 ساعة / للمادة الواحده


وانت عندك 5 مواد


يعنى توتال الساعات اللى المفروض تحضره في الترم الواحد لكل المواد

48 ساعة للمادة الواحده × 5 مواد = 240 ساعة




يعنى في السنة كلها 240 × 2 = 480 ساعة


ودا معناه انك لو لاقيت مادة ومكتوب قدامها 4 credit hours يبقى دا معناه ان الاربع ساعات دول اسبوعيا


لو مافهمتش ارجع اقراها تانى وتالت



بناءاً على عدد الساعات دا بيتم حساب النتيجة بتاعتك


والنتيجة مابتبقاش نتيجة عادية زي ماحنا عارفين


لا بيبقى اسمها GPA


ودي اختصار لكلمة طويلة اسمها


Grade Point Average


يعنى معدل النقاط التراكمي .. بيتحسب ازاااااااي ؟؟



انسى نظام التعليم المصري بتاع النهاية العظمى والسفلي دي ! صحصح معايا :slap1qk6:


اثناء مانتا بتدرس طبعا بيقابلك ميد تيرم وكويزات واسايمنتات وبلاوي زي دي .. معلومة مش جديدة يعنى


بس الجديد هنا انك بتتحاسب بنظام النقط


بمعنى انك في نهاية السيمستر بتلاقي كل مادة بتتحسبلك بالنقط ..

طب ازاااى


يعنى مثلا تلاقي مادة زي الماث انت جايب فيها A ومادة زي الايكونوميك جايب فيها +B .. فاهم حاجة ؟


اكيد طبعا مش فاهم .. ابسطهااااالك


الحرف بيشير للتقدير زي جيد جدا وامتياز ومقبول


النقطة الواحده بتشير لدرجتك


ودا توزيع التقديرات مع النقط .. والنظام دا هوا النظام العالمي واللى ماشي في كل الجامعات


A= 4.0 point ودا يعنى انت كدا برنس


A-= 3.7 point كدا دي زي جيد جدا


B+= 3.3 point دي يعنى تمام


B= 3.0 point دي يعنى جيد


B-= 2.7 point دي يعنى شد حيلك شوية


C+= 2.3 point دي يعنى صحصح من الغيبوبة بتاعتك


C= 2.0 point دي يعنى مقبول ومستواك زفت


تحت كدا يبقى ربنا معاك بقى !!



طيب انا جاتلي النتيجة لاقيت نفسي جايب الاتى :


financial accounting = B+ 3.3

OB = B 3.0


Economic = C+ 2.3


Management = A- 3.7


Math = B- 2.7


1- هاضرب النقط بتاعة كل مادة على حدة في عدد الساعات الاسبوعية (4 ساعات) عشان يطلعلي حاجة اسمها Quality Hours


2- هاقسم الـ Quality Hours على اجمالى عدد الساعات في الاسبوع (4 ساعات)

3- الرقم اللى يطلع اضربه في عدد الساعات الاسبوعية لكل المواد اللى انت بتدرسها ( 5 مواد يعنى 20 ساعة)





نطبق ؟؟ يالا بينا


1- الفانياشيال 3.3 × 4 = 13.2

2- الاو بي 3.0 × 4 = 12
3- الايكونوميك 2.3 × 4 = 9.2





4- مانجمنت 3.7 × 4 = 14.8


5- ماث 2.7 × 4 = 10.8

نبتدي نجمع بقى اللى طلع دا
هايطلع المجموع 60 نقطة
بعد كدا نقوم قاسمين الـ 60 نقطة دول على 20





يطلعلنا 3.0 .. واللى هوا بيساوي في التقدير كااااااام ؟؟


B واللى احنا قولنا عليه قبل كدا يعنى جيد


لو مافهمتش ارجع تانى واقراها مرة واتنين وتلاته


عشان انا عارف انها رخمة



ثالثاً : اعداد الطلبة


شعبة جورجيا بتتميز عن غيرها بان اعداد الطلبة بتاعتها قليل جدا .. لو جمعت الاربع دفعات من اولي لرابعة




هاتلاقيهم كلهم على بعض كدا مايكملوش 120 طالب





الجامعة الامريكية AUC بجلالة قدرها كانت واخده في دفعة 2008 تقريبا على ما افتكر 140 طالب لسنة اولي في كلية ادارة الاعمال هناك


(مع العلم ان الكلية دي واخده احسن كلية ادارة اعمال على مستوي الشرق الاوسط وافريقيا لسنة 2010)


قارن بين عدد دا ودا .. هاتلاقي ان عدد سنة اولي في الايه يو سي يساوي عدد شعبة جورجيا كلها

اي نعم فيه فوارق في الكواليتي بتاعة التعليم بس احنا بنتكلم في نقطة العدد





رابعاً : اعضاء هيئة التدريس


عندكو 18 دكتور من احسن الدكاترة اللى ممكن يدرسو في مصر .. وماشاء الله كلهم واخدين الدكتوراه من جامعات عالمية


خامساً : الشهادة


ان شهادة التخرج لما بتطلعلك بتبقى طالعالك من جامعتين

كلية التجارة جامعة القاهرة




و كلية روبنسون لادارة الاعمال بجامعة ولاية جورجيا


(هاتقولي يعنى ايه روبنسون هاقولك ان النظام في امريكا انهم بيسمو الكليات هناك على اسماء الدكاترة الجامدين تخليدا لذكراهم زي كلية الهندسة في جامعة تكساس مثلا اسمها كلية كوكريل .. الخ)



اذن من الوضع العام نستنتج ان الشهادة اللى سيادتك هاتاخدها مش عليها القيمة اوي .. بس التعليم اللى هاتتعلمه هايبقى كويس ومتميز



متهيألي كدا كل واحد فينا كوِّن فكرة كويسة عن الشعبة دي وقدر ياخد رأي فيها



السؤال اللى بيشغل بالك دلوقتى طبعاً


انا خلصت ثانوية عامة .. اقدم في الشعبة دي ازاى ؟؟


نتيجة التنسيق ظهرت صح ؟ وطلعلك كلية التجارة صح ؟



مش شرط انها تكون انجليش .. لو عربى اتس اوكي


تاخد بطاقة الترشيح اللى هايكون مكتوب عليها


تم ترشيحه لكلية تجارة القاهرة


وتروح بيها الجامعة لشئون تجارة انجليش


وتقولهم لو سمحت انا عايز اقدم في برنامج جورجيا


هايديك اذن دفع بقيمة 150 جنيه


هاتروح تدفعهم في الخزنة وتستني لما الراجل بتاع الخزنة ينده على اسمك ويديك كام ورقة كدا هاتاخدهم وترجع بيهم تانى على شئون انجليش


وتدي الكام ورقة دول لنفس الراجل اللى اداك اذن الدفع


هايقوم واخد الورق دا منك ومديك ابليكيشن التقديم


http://www.mediafire.com/?bcegilcahf47xsr



هاتملاه مع نفسك وتقوم مديهوله تانى


بعدها بيتصلو بيك عشان يقولولك على ميعاد للانترفيو بتعمله حضرتك مع دكتور من الدكاترة


عشان يشوف انت الانجليش بتاعك كويس ولا لاء



وبعد مابتخلص الانترفيو روح بيتكو واستني تليفون منهم عشان يقولولك انت ناجح ولا لاء


وممكن يبعتولك ع الميل برده



ولو مانجحتش يبقى انت كدا اتدبست في تجارة عربى خلاص



طب ياتري القبول بيتم ازاى ؟؟


بياخدو اعلى مجاميع متقدمة في ضوء العدد المطلوب


يعنى هما مثلا عايزين 50 طالب


اتقدملهم 80 .. بياخدو اعلى 60 مجموع متقدم


والـ 60 طالب دول بيتعملهم انترفيو لغاية مايصفوهم على 50 اللى هوا العدد المطلوب فعلا


فهمـــت ؟؟



اول ماحضرتك بتتقبل وبيكلموك ويقولولك انت اتقبلت


تطير على الجامعة عشان تدفع المصاريف بتاعتك


ممكن تدفعها كاش 20 الف مرة واحده


وممكن تقسطها على قسطين مرة في الفول سيسمتر ومرة في الاسبرينج سيمستر وقيمة القسط بتكون 10 الاف جنيه



نظام الدراسة جوا احنا عرفناه والحمدلله





مكان الدراسة فين ؟؟


الكلية خصصتلك آخر دور في مبنى شعبة انجليش


فيها انضف قاعات موجودة في الكلية


ودي صورة قاعة فيهم


http://i54.tinypic.com/2ljrkhv.jpg



والقاعات دي ماحدش بيحضر فيها غير طلبة جورجيا بس حتى قافلين الدور كله بباب ازاز زي ماهو واضح في اول صورة في البوست كدا



كدا الموضوع خلص والحمد لله



كدا انا خلصت تجارة عربى كلها وتجارة انجليش كلها بما ضمنهم اكتواري وجورجيا



مش باقى غير الامتحان والنتيجة والانشطة داخل الكلية


الامتحان والنتيجة انا شايفه مش مهم اوي دلوقتى لان لسه بدري



فان شاء الله البوست الجاي هابتدي اعرفكو بقى جو الكلية ماشي ازاى وايه اتحاد الطلبة وايه رعاية الشباب والموديلز وحاجات كتيرة



ابقـــو معنــــا :D :D

ملحوظة : البوست الجاي ممكن يتأخر شوية لانشغالي باجراءات الجيش .. ادعولي يا جماعة :(
freetigerf
18-08-2011, 06:19 AM
طب بالنسبة لخريجى جورجيا دول بيبقى نظامهم فى الشغل ايه هل هما مطلوبين ولا عادى ولا ايه النظام اصلا
Dina ElGendy
19-08-2011, 06:13 PM
هما القسمين دول لازم الاشتراك فى واحد منهم ولا ممكن نكمل ال4 سنين عادى من غير م اشترك فى الاقسام دى؟؟و بالنسبة للقسم الاكتوارى انت قولت مصاريفه 4500 المصاريف دى غير مصاريف كلية تجارة ُeيعنى فى السنة لو دخلت قسم اكتوارى ادفع 9000 ولا هى 4500 و بس ؟؟وكمان ان كنت اعرف ان التخصص بيكون فى سنة رابعة و انت قولت ان التخصص من سنة ثانية فياريت بس اعرف هو التخصص بيكون من سنة كام بالظبط....و ان اسفة طولت عليك و اسئلتى كانت كتيرة بس ربنا معاك و يوفقك
محمود محسن مصطفى
20-08-2011, 07:26 AM
ممكن حضرتك تقولنا ازاى نختار التخصص وعلى اى اساس واهمية كل تخصص واحتياج سوق العمل لة بالنسبة لتجارة انجليزى
معلش سؤال تانى انت بتقول ان عدد تجارة انجلش 400 او 500 طالب وبيقسموهم مجكموعات صغيرة مع ان السنة دى احنا فى جامعة القاهرة عددنا 1096
Dina ElGendy
26-08-2011, 05:42 PM
[quote=Dina ElGendy;3867905]هما القسمين دول لازم الاشتراك فى واحد منهم ولا ممكن نكمل ال4 سنين عادى من غير م اشترك فى الاقسام دى؟؟و بالنسبة للقسم الاكتوارى انت قولت مصاريفه 4500 المصاريف دى غير مصاريف كلية تجارة ُeيعنى فى السنة لو دخلت قسم اكتوارى ادفع 9000 ولا هى 4500 و بس ؟؟وكمان ان كنت اعرف ان التخصص بيكون فى سنة رابعة و انت قولت ان التخصص من سنة ثانية فياريت بس اعرف هو التخصص بيكون من سنة كام بالظبط....و جزاك الله خير isa
Dina ElGendy
26-08-2011, 05:43 PM
[هما القسمين دول لازم الاشتراك فى واحد منهم ولا ممكن نكمل ال4 سنين عادى من غير م اشترك فى الاقسام دى؟؟و بالنسبة للقسم الاكتوارى انت قولت مصاريفه 4500 المصاريف دى غير مصاريف كلية تجارة ُeيعنى فى السنة لو دخلت قسم اكتوارى ادفع 9000 ولا هى 4500 و بس ؟؟وكمان ان كنت اعرف ان التخصص بيكون فى سنة رابعة و انت قولت ان التخصص من سنة ثانية فياريت بس اعرف هو التخصص بيكون من سنة كام بالظبط....و
جزاك الله خير
vampire1188
01-09-2011, 03:45 PM
فيه رسالتين حابب اوجههم لكل شاب ولكل بنت داخلين الكلية جداد
والرسالتين دول اساسيين ولازم يتقرو
على الاقل عشان تبقى محضر نفسك لجو التعاملات مع الناس جوا الكلية ماشي ازاى


فابعد اذنكو الشاب هايقرا الرسالة بتاعته ويقفل التوبيك وكذلك البنت تقرا رسالتها وتقفل التوبيك
وبلاش بقى شغل الفضول يأثر عليكوا



-
رسالة لكل شاب -
صحصح يابنى انت وهوا وركز معايا :stickjo4:
الجزئية المتعلقة بتعاملاتك مع زمايلك دي انا مش هاقدر اكلمك فيها نهائى
لان دي بتاعتك انت وانت اللى تتعامل وكل واحد وشخصيته
انت خلاص بقيت راجل وليك كيانك

لكن خلينا صرحاء مع بعض برده
الشاب بيبقى خارج من الثانوية العامة زهقان وطالع عنيه وياما اهله خنقو عليه في البيت في المذاكرة والدروس ووجع الدماغ
واول مابيخش الجامعة مابيصدق يلاقي متنفس يعوض بيه كل الزهق والكبت اللى كان فيه ايام الثانوية العامة
وبيستغرب اوي لما يشوف الجامعة ابوابها مفتوحة ومافيش حاجة اسمها نكوت ونهرب من فوق السور !!

كل المتغيرات اللى بيشوفها قدامه دي بتخليه يبص للجامعة بنظرة ان
جامعة القاهرة = الازهر بارك
انا بروح الجامعة عشان اقضيها مع صحابي لف في طول الجامعة وعرضها
ونقضيها اكل وساندوتشات وبيبسي وعصاير
وياسلام بقى لو اتعرفنا على شلة بنات تبقى العيشة زي الفل
وبالا محاضرات بالا بتاع
ويظل الوضع على ما هو عليه لغاية ماتيجي في اخر الترم وتلبس يا معلم
!!!!
وتيجي نتيجة الترم الاول وتلاقي نفسك شايل مادة او مادتين
وتقعد تقول ياريت اللى جري ما كان

الكلام اللى انا قولتهولك دا سيناريو تفصيلي هاتلاقيه مع شباب كتير جدا في الجامعة مش بس في تجارة ولكن في كل كليات الجامعة
عشان كدا احنا بنعتبر ان اول سنة ولنكن اكثر تحديد "اول ترم" بيكون اغبي ترم لان هوا النقطة الفاصلة بين حياة الثانوية العامة الخنيقة وبين حياة الجامعة الحرة
(بالرغم من انه اسهل ترم دراسياً)

عامل زي المسجون اللى ساجنه بقيله سنتين ومرة واحده قومت فاكك منه الكلابشات وسيبته ينطلق !
وبالتالى دي نصايح اخ ليك :
1- عيش حياتك في الجامعة زي مانتا عايز بس راعي ربنا في تصرفاتك .. انا مش هاعملك فيها شيخ وواحد بدقن بقى والكلام دا بس صدقنى هوا دا الصح
2- اثناء الكام يوم اللى في الاول وانت بتحضر محاضرات بتبقى لسه شنكوت
وماتزعلش دي حقيقة لانك لما بتوصل لسنة رابعة وبتفتكر ايام سنة اولي بتقعد تضحك على نفسك وتقول يااااه كانت ايام
3- لتجنب ظاهرة الشنكته دي خلي بالك بقى من الكلام الجاي دا
أ- تخليك راسى كدا وراجل .. وبلاش هبل

ب- لو شوفت بنت حتى لو كانت قمر وعايز تتعرف اوعى تريل عليها لانها هاتفكسلك تماماً

ج- عايز تتعرف على بنات اتعرف بس بلاش افورة في التصرفات وثق تماما ان اول خطوة في التعارف بتبقى في كيفية اختيار المكان الصح اللى تقعد فيه فى المدرج
ودي ليها تيكنيك معين بس مش هاقولهولك :P

د- لما تيجي تتعرف على بنت وتمشي معاها ماتعيش في الدور وتبقى ماشى جنبها وانت ولا كأنك ماشى جنب انجلينا جولي لان بيبان عليك وبيبقى شكلك وحش وبيتقال عليك شنكوت اصلي

د- ماتأخدش بنت عليك بحجة انك عايز تكسر
الحاجز وتبقو فريندز جامدين بسرعة
لان الجو دا فاكس درجة اولي وبدل ماهتبقو فريندز هاتبقى انت الخبوء بتاعها

وحط في دماغك ان الصداقة بين البنت والشاب مش بتيجي غير بالاحترام الكامل والمتبادل بينك وبينها واللى بيتمثل فى المواقف والتصرفات وعمره مابييجي بهزار الايد والكلام الاوفر

هـ- ممكن وانت اثناء مانتا بتلف في الجامعة تشوف عينات من بنات وشباب بيهزرو بالايد وهايبقى بينك وبين نفسك تبقى عايز تعمل كدا بس صدقنى انت كدا بتحقر من نفسك وخد بالك ان فيه ناس بتتفرج عليك واللى بيتصرف تصرف ممكن ماياخدش باله لكن اللى حواليك هما اللي بياخدو بالهم

4- حط في دماغك ان دي اسمها جامعة القاهرة مش جنينة الاورمان
يعنى غرضك الاساسي هو التعلم وممارسة الانشطة واكتساب مهارات جديدة
بجانب الكلام دا تعيش حياتك بقى بس في المعقول زي مانبهتك

بس استووووووووب بقى لغاية هنا واخلع يا برنس عشان اللى جاي دا مايخصكش الا اذا كان شعرك طويل وبتعمل ضفيرة :D


- رسالة لكل فتاة -
طبعاً انا متاكد ان كل واحده قاعدة دلوقتى هاتلاقيها مفنجلة عنيها
وبتقول ياتري عايز يقولنا ايه الراجل دا ؟ وهوا ايش فهمه اصلا في البنات .. دا فرويد بجلالة قدره ماعرفش يحلل شخصية المرأة !!
انا مش دكتور نفسي ولا خبير في العلاقات النسائية عشان ماتجيش واحده تقولي شكلك مقطع السمكة وديلها !


اولاً انتى خارجة من مرحلة ما يعلم بيها الا ربنا الا وهى الثانوية العامة
مذاكرة ودروس ومشاوير كل يوم للسنتر او المجموعة وات ايفر يعنى

ضغط من الاهل عشان تجيبي مجموع
والحمدلله ماجيبتيش مجموع زي ماهما عايزين بس ربنا قدرلك انك تخشي تجارة القاهرة .. الف مبروك
:D

كبت - زهق - خنقة - عايزة تنطلقى ومش عارفه
وطبعاً الجامعة هى السبيل الوحيد ليكي للانطلاق لحياة جديدة فيها حرية نوعا ما بعيدا عن خنقة الثانوية العامة

قربت الدراسة .. وشئ اساسي طبعا لازم تنزلي تجيبي اللبس اللى هاتلبسيه في الجامعة

الشياكة حلوة طبعا بس بعد اذنك خليكي في المعقول واظن انتى فاهمة قصدى كويس

شئ طبيعي انك تغيري لما تلاقي بنت لابسه لبس جذاب اكتر منك بس حطي في دماغك ان قصاد الجاذبية ونظرات الاعجاب اللى هيا بتاخدها من نص شباب الكلية بيبقى عداد السيئات شغال الله ينور


دخلتى الكلية وحضرتى اول يوم محاضرات
وعشان تبقى عاملة حسابك من دلوقتى ان المدرج هايبقى سايح على بعضه .. يعنى البنات جنب الشباب ومابيبقاش فيه فواصل

طبعا انتى مش مجبرة انك تقعدي جنب شاب غصب عنك
بس في نفس الوقت حتى لو قعدتي جنب شاب هوا مش هايعضك
فلو انتى من النوع اللى عنده حساسية عالية ضد الشباب يبقى دائما لما تيجي تقعدي اختاري المكان السليم بلجوئك للبينش المليان اللى على حرفه في مكان يسيع شخص او اتنين بالكتير اوي ويكون ع الحرف فيه بنات قاعدة
ساعتها انتى تقومي قاعدة جنب البنات دي وتبقى انتى ع الحرف وكدا يبقى منعتى اي شاب انه ييجي يقعد جنبك لان بكل بساطة البينش اتملي خلاص

او ان انتى يبقى معاكي صحابك البنات وساعتها انتى تقومي مختارة اي بينش وتقعدي وسطيهم بحيث ان يبقى على شمالك ويمينك صاحباتك البنات وبكدا برده تكوني تجنبتى القعدة المحتملة جنب اي شاب


اما اذا كنتى من النوع اللى هوا ايزي وواثقة من نفسك والقعدة جنب الشباب بالنسبالك شئ عادي فاتس اوكي مافيش اي مشكلة


نيجي بقى للجزئية اللى كتير من البنات بيخافو منها
التعامل مع الشباب هايبقى ازاى ؟؟؟؟
1- حطى في دماغك ان الشاب دا كائن حي زيه زيك بالظبط يعنى لا هايعضك ولا هايمسكك ويشدك من ايدك
2- لو لاقيتي شاب جيه يتعرف عليكي ويفتح معاكي اي حوار وبيبقى غالبا متعلق بالمحاضرة اللى فاتت اللى ياعيني مالحقش يكتبها او بالدكتور الخنيق اللى ماعرفش يفهم حاجة منه وعايزك تشرحيهاله باعتبارك عبقرينو زمانك فدا مش معناه ان هوا معجب بيكي او هايموت عليكي وبناءا عليه بلاش تعيشي في دور الاميرة ديانا وتبقى مناخيرك فوق وتعتبري نفسك ملكة جمال المدرج
معلش ماتزعليش مني بس الكلام دا بيحصل فعلا وفيه نوعيات من البنات بتبقى كدا ودا حقيقي

فاذا كنتى عايزة تتعرفي يبقى جاريه في الكلام وبيس .. اما لو مخنوقة ومش طايقاه يبقى بكل شياكة كدا تقوليله انا مضطره امشى واوعي تقوليله اسمك لان لو قولتيله اسمك يبقى كدا هوا هايعتبر انه خلاص اتعرف عليكي رسميا ولو شافك في المدرج لازم هايسلم عليكي


3- بمناسبة السلام برده .. لو انتى بتسلمي بالايد دا شئ يرجعلك (مع انه مكروه دينياً) اما لو ماكنتيش بتسلمي ولاقيتي شاب اتعرفتي عليه وجيه يسلم عليكي يبقى اوعي تمدي ايدك وسيبيه يتحرج مش مهم عشان يتعلم بعد كدا

او فيه حركة شيك ظريفة وهوا لو هوا مد ايده عشان ماتكسيفهوش ممكن لو معاكي كتاب مثلا او اي حاجة تتمسك في الايد تسلمي بيها بحيث ان ايدك مش تلمس ايده


4- احترامك لنفسك ولذاتك فوق اي شئ ..
يعنى ايه ؟؟
يعنى علاقتك بالشاب تبقى في اطار الزمالة ويوم ماتتطور اوي تبقى صداقة بس صداقة مقننة ومحترمة
لانك هاتلاقي نوعيات بنات غريبة بنظام مدام رشا وآنسة حنان اللى طلعو مع التهامي في ميلودي كامبين


5- انتى اللى بتحددي شكل العلاقة الاساسي بينك وبين الشاب من اول لحظة تعارف
يعنى لو انتى اللى ابتديتي تمدي ايدك هاتلاقيه هوا كمان مد ايده والعملية بقت مش تمام

وكذلك لو هوا بدأ ومد ايده وانتى ماديتيش اي كومينت او ابديتي ردة فعل يبقى انتى كدا بتوصلي رسالة للشاب ان انا بنت ايزي خالص وساعتها ماتزعليش بعد كدا
فعشان كدا لازم يبقى في خطوط حمرا بينك وبين الشاب
والخطوط دي انتى اللى تحدديها بنفسك


6- اي تصرف خارج – اي كومينت ماخدتيش بالك وانتى بتقوليه – طريقة كلامك – لبسك .. كل الكلام دا بيبقى موضع نقاش ونقد من قبل الشباب فخلي بالك وماتسيبيش فرصة لواحد مالوش فيها يقول عليكي كلمة مش تمام

الرسالتين دول كانو لازم يتقالو قبل ما ابتدي اخش في تعريفك بجو الجامعة لانك لازم تبقى عارف طبيعة العلاقات جوا الكلية ماشية ازاى عشان ماتبقاش مصدوم بالبنات او مصدومة بالشباب


البوست الجاي باذن الله هابتدي اخش بقى في جو الجامعة الاكاديمي وازاى تقدر تستفيد منه بقدر الامكان

وبجد هايبقى بوست مفيد جدا جدا جدا ولازم تقراه
لان فيه زمايل ليك اتخرجو ومايعرفوش الكلام دا وفيه زمايل ليك عرفو الكلام دا متأخر للاسف وكانو بيقولو ياريتنا كنا عرفناه من سنة اولي كان الواحد استمتع فعلا
الوحيده
01-09-2011, 06:01 PM
نصائح رائعه وتنفع كل الى مقبلين على اى كليه مش تجاره بس انا كليه تربيه عين شمس
ملك عاشقة الرياضيات
02-09-2011, 11:02 AM
بجد شكررااا جدااا جداااا يا فامبير بجد انا مكنتش عارفه اعمل ايه بجد انا لما كنت بتفرج على فيلم نجيبه خوفت جدااا اه احنا بنضحك لما هى بتعمل مش لطيفه بس لو الواحد مكنها مش هياخد باله خالص نصائح غاليه
vampire1188
03-09-2011, 09:19 PM
ملحوظة بس قبل ما ابدأ
انت ممكن ماتستفيدش بالكلام دا دلوقتى .. بس بعدين هاتستفيد منه



فلو فيه معلومة نسيتها او حابب تسأل فيها ابقى دايما خلى البوست دا مرجع ليك بعد كدا





نخش في المفيد بقى



ازاى تستفيد من الجامعة وتستمتع بحياتك بعيداً عن قرف الدراسة الاكاديمية والمحاضرات والامتحانات ووجع الدماغ دا ؟؟



قدامك 3 حاجات



- اتحاد الطلبة


- الموديلز
- ملاعب الجامعة




اتحاد الطلاب

الاتحاد بيتكون من 7 لجان رئيسية
اللجنة العلمية – اللجنة الثقافية – اللجنة الاجتماعية – الجوالة – الأسر – اللجنة الفنية – اللجنة الرياضية

كل لجنة منهم بتتكون من عضوين
وبالتالى يبقى عندنا عدد الاعضاء 14 عضو



بينتخب من بين الـ 14 دول رئيس الاتحاد ونائب الرئيس


طب انا طالب وعايز ارشح نفسى .. ازاى ؟؟
اولاً من الاخر كدا عشان ترشح نفسك لازم يبقالك شعبية وناس كتيرة تكون عارفاك .. يعنى ماتجيش تقولي اه انا مظبط مع 20 واحد صاحبى فى المدرج ودول هايظبطوني ساعتها هاقولك لا روح نام في بيتكو احسن !!




ثانياً الانتخاب بيبقى عن طريق القوايم النسبية
بمعنى ان كل قايمة بتضم سبع لجان وكل لجنة بيترشح فيها اتنين من كل فرقة
يعنى فى القايمة الواحده بيترشح لكل لجنة حوالى 8 طلاب
وعشان تخش فى القايمة دي اصلا لازم يبقالك نشاط ملحوظ ماتبقاش نايم فى الدرا وبتاكل بطاطا !


طب وايه فايدة كل لجنة من اللجان دي ؟؟
اللجان بشكل عام بتعمل نشاط للطلبة فى الكلية
يعنى عندك مثلا اللجنة الرياضية بتظبط البطولات بتاعة الكلية وبتعمل انشطة رياضية كويسة
اللجنة الفنية بتعمل مسابقات فنية بين الطلبة وبتعلن عنها وبتدي جوايز
الاسر ودي انا بعتبرها الكحكة الكبيرة لانها المسؤلة عن حوالى اكتر من 8 اسر فى الكلية واللى غالبا هيا اللى بتعمل شغل فى الكلية زي الرحلات والحفلات الخ الخ الخ


اللجنة العلمية



بتعمل مسابقات علمية وفي بعض الاحيان بتخش مسابقات على مستوي الجامعات




اللجنة الثقافية


معروف من اسمها دا زائد انها بتعمل ندوات ثقافية وشعر وبتستضيف ناس من بره الجامعة وكتير من اعضاء اللجنة دي بتلاقيهم لاجئين في ساقية الصاوي :D




اللجنة الاجتماعية


ودي بتبقى مسئولة عن النشاط الاجتماعي للطلبة داخل الجامعة .. او بمعنى اصح مسئولية الطلاب تجاه بعضهم البعض وكذلك تجاه المجتمع خارج اطار الحرم الجامعى


ومعظمهم بتلاقيهم شغالين مع بنك الطعام المصري وجمعية رسالة وSIFE.. الخ الخ



الجوالة


ودي بقى بيبقى منصب اساسها على المعسكرات والسفاري والكشافة والحوارات دي


فيه ناس بتحب المجال دا وبتعشقه .. فلو كنت انت من هواة المجال دا يبقى انضم ليهم ولا تترد



طبعا انت اول ماهاتخش الجامعة هاتلاقي زحمة كتير وخاصة عن مدرج جيم ودال .. لو قعدت شوية في الحتة دي هاتلاقي واحد لابس حاجة شبيهة باللبس دا كدا



http://t0.gstatic.com/images?q=tbn:ANd9GcQnXfvH9U81AW2RR-t1tsBW7TrdXeEUsz3gAh-Bd6GKPIu51rG7-aUyhV0



وجايلك وبيقولك الجوالة ويقعد يشرحلك بقى المميزات والانشطة وانك هاتبقى عضو فى نادي الكشافة البحرية وحاجات كتيرة كدا


والاشتراك السنوي بتاعها 2 جنيه تقريبا وتديهم صورة عشان يعملولك الكارنيه


والغريب فى الموضوع انك مش بتلاقي بتوع الجوالة دول الا في اول السنة بس .. وطول السنة مابتشوفش وش حد فيهم


فعموما اذا كنت مهتم خش معاهم .. مش مهتم يبقى فكك



وانا لو فتحت موال على موضوع الجوالة دا مش هاخلص وهاقعد اتكلم للصبح .. فانتا عندك جوجل عيش حياتك فيه وهايديك معلومات كتيرة عنه



طبعا فيه نقطة كدا صغيرة لازم اقولها عشان فيه ناس بتتلخبط



فيه فرق مابين انك تبقى عضو فى اتحاد الطلبة او انك مشارك فيه



العضو دا بيبقى جاي بالانتخاب


وطبعا قبل الثورة كان كلهم بييجو بالتزوير


بس بعد الثورة بقى تلات تربعهم اخوان ان ماكانش كلهم كمان !


ودا مش عيب على فكرة .. لان الاخوان ليهم نشاط ملحوظ جداااا فى الكلية وناس في قمة الاحترام


واللى عايز يشترك معاهم يشترك مافيش مشكلة


بس هما مشكلتهم انهم عايشين الدور شوية بس اني واي هما ناس ميه ميه بصراحة يعنى



بس عليهم تصرفات تفقع .. زي يبقى الوقت اللى بين المحاضرة والتانية المفروض الواحد مابيصدق الدكتور يخرج عشان يرغى مع اللى جنبه او يفك شوية من جو الخنقة دا


تلاقي واحد يقوم داخل المدرج وعمال يزعق ويقول واذا قرأ القرآن فاستمعو له وانصتو وتلاقي واحد تانى يوم طالع ع الاستيدج بتاع الدكتور وقاري كام آية كدا وبعد مايخلص يقول كلمتين ويخلع


فابتبقى حاجة مملة جدااا يعنى .. انا مش بعيب على قراية القرآن طبعا .. بس انا بتكلم على مبدأ انك تسمعنى غصب عنى وغير كدا انك بتقرا في مدرج موجود فيه مسيحيين مالهومش ذنب انهم يسمعو القرآن



المهم نرجع لمرجعونا تانى


اما بالنسبة للمشارك فدا بيبقى طالب عادي جدا وراغب في الاشتراك في احد انشطة اللجان داخل اتحاد الطلبة



وبكدا اكون خلصت الجزئية بتاعة اتحــاد الطلبة



نخش بقى على جزئية جديدة



اثناء مانتا ماشي في الكلية وخاصة عند تجارة انجليش كدا بتلاقى حاجات اشبه بأكشاك او ترابيزة طويلة ووراها حائط خشبي ومكتوب عليه شوية كلام بالانجليش وشكله نضيف كدا


وبتتلاقي ناس واقفة عنده ولابسين اي ديهات في رقبتهم وشكلهم ناس قديمة في الجامعة



الحاجات دي بيبقى اسمها Models


ودماغك ماتروحش لبعيد وتفكر في موديلز الكليبات يا وحش :P


الموديلز اللى انا اقصدها يعنى نموذج محاكى للواقع


ومسماه فى الانجليش Simulation



يعنى ايه بقى نموذج محاكي للواقع ؟


يعنى فيه حاجة موجودة في الحياة فعلا واحنا عايزين نعمل حاجة زيها بس على قدنا


زي مثلا جامعة الدول العربية دي موجودة في الواقع .. فاحنا في الجامعة بنقوم عاملين موديل لجامعة الدول العربية بتبقى حاجة شبهه وبيبقى فيها كل حاجة موجودة في جامعة الدول العربية الحقيقية بالظبط



فانتا تلاقي مثلا جامعة الدول ليها امين عام وامين مساعد ولجان فرعية وممثلين دبلوماسيين عن كل دولة من الدول الـ 22



كل الكلام دا هاتلاقيه موجود في الموديل



وكذلك برده نفس النظام هاتلاقيه في موديل الكونجرس الامريكي


الكونجرس الحقيقي بيبقى فيه حاجتين


الـ house والـ senate


الـ house بيبقى عدد اعضاؤه 435 سيناتور


والـ senate عدد اعضاؤه 100


وكل واحد منهم بيبقى متقسم عدده على الحزبين الجمهوري والديمقراطي


ومجلس الـ senate بيبقى فيه 16 لجنة اسمها committees


وكل لجنة منهم بيبقى ليها رئيس اسمه chairperson


وكذلك فيه حاجة اسمها الجراوند .. والجراوند دا بيتم فيه التصويت على حاجة اسمها Bill .. البيل دي هيا اللى بيتم فيها اقرار القوانين واللى واحد زي اوباما بيبقى هايموت عليه عشان يتعمل



ودا حصل قبل كدا في اقرار مشروع التأمين الصحى وعلاج ازمة الرهن العقاري ومؤخراً مشكلة رفع سقف الديون



وكل الكلام دا موجود فعلا وهاتلاقيه في الموديل بتاع الكونجرس الامريكي



طبعا الشرح اللى انا قولته دا انا مش بقوله عشان اتمنظر عليكو واعرفكو ان انا فاهم


بس انا بقوله عشان اعرفكو قد ايه الاشتراك في الموديلز دي بتبقى مفيدة جدا وبتفتح ليك ابواب انك تعرف حاجات جديدة عمرك ماكنت تفكر انك تعرف عنها حاجة



اذن الاصل فى كلمة model هو انشاء نموذج محاكي للواقع


والنماذج دي 99% هاتلاقيها موجودة في كلية سياسة واقتصاد


والـ 1% هاتلاقيه موجود في كلية تجارة وبيتمثل فى موديلين بس هايفيدك كويس



الموديلز اللى موجودة في كلية سياسة زي :





الكونجرس الامريكي


(Model American Congress)MAC


http://i54.tinypic.com/n15ugg.jpg



مجلس الشعب المصري


MEPA


(Model Egyptian People's Assembly)



http://i51.tinypic.com/352gh8n.jpg



– مجلس العموم البريطاني


MBHC (Model of British House of Commons)



http://i52.tinypic.com/nf1amg.jpg


- جامعة الدول العربية والامم المتحدة


ALMUN (Arab League Model United Nations)



http://i55.tinypic.com/309hd1k.jpg



وبالمناسبة نموذج الامم المتحدة اللى هوا اخر واحد دا جامد وحلو اوي


ودورو عليه في كلية سياسة او اسألو عليه هايفيدكو اوي


بس هوا مشكلته انه ضامم جامعة الدول العربية والامم المتحدة في موديل واحد ودا عيب فيه


على العكس .. الجامعة الامريكية كانت عاملة موديل برده للامم المتحدة واسمه CIMUN وكان نموذج الامم المتحدة فقط بكل تفاصيله وخد جايزة التميز في مسابقة النموذج الوطنى للامم المتحدة في نيويورك مرتين ورا بعض



فاتمنى انهم في جامعة القاهرة يفصلو جامعة الدول عن الامم المتحدة عشان كل واحد فيهم ياخد حقه صح



وطبعا الموديلز اللى انا قولتها دي على سبيل المثال لا الحصر لان فيه موديلز تانية موجودة في سياسة واقتصاد



اما الـ 1 % اللى كنا بنقول عليه موجود في كلية تجارة فدا بيمثل موديلين


الاول اسمه SMS ودا اختصار لكلمة


Stock Market Simulation



http://i54.tinypic.com/9fs047.jpg



ودا جامد جدااااا ومالوش حل بجد


بقيلهم 5 سنين شغالين فيه وكل سنة بيثبت نجاح اكتر من السنة اللى قبلها


الموديل بيمثل البورصة المصرية بكل التفاصيل اللى موجودة فيها


سماسرة هاتلاقي .. مستثمرين هاتلاقي .. مضاربين هاتلاقي .. شركات سمسرة هاتلاقي .. سيستم البورصة ذات نفسه هاتلاقي


كل حاجة تتخيلها هاتلاقيها


فانتا كأنك بتعيش حياة البورصة الحقيقية



الموديل التانى اسمه MAEU ودا اختصار لكلمة


Model of Arab Economic Unity



http://i55.tinypic.com/a9s7et.jpg



يعنى مجلس الوحدة الاقتصادية العربية


المجلس دا تاريخيا تابع لجامعة الدول العربية وهدفه تحقيق وحدة اقتصادية بين الدول الاعضاء اللى هما 22 دولة


وطبعا كلام فكسان ومالوش لازمة لان لا فيه وحدة ولا فيه زفت



فعشان كدا تم انشاء نموذج الـ MAEUدا وبدأ في سنة 2010


عشان يناقش القضايا الاقتصادية العربية من وجهة نظر الشباب ومحاولة ايجاد حلول ليها


الموديل دا متقسم لتلات مجالس او تلات لجان


مجلس التجارة الحرة ومجلس الشرق الأوسط ومجلس الأوبك العالمي



وطبعا موديل مفيد جدا لانه هايديك فيد باك جامدة اوي عن المتغيرات الاقتصادية اللى بيعيشها المجتمع العربى دا زائد ان هايزود المعلومات العامة عندك وهاتحس ان دماغك بقت عالية



وفيه حاجة ظريفة اوي عملوها وعجبتنى جدا


وهوا انهم اخترعو شعار اسمه "سجل انا عربى"


ومعناه ان لغة الكلام داخل النموذج بتبقى عربى وبس وغير مسموح باستخدام اي لغة تانية خالص حتى ولو كانت كلمة واحده


واللى يستخدم اي لغة تانية عقوبته انه يبحث عن الحاجة اللى اتكلم عنها دي بعشر لغات ويعمل عنها بحث ويقدمه خلال مدة محددة !!



وفيه موديل تالت اسمه WTO اختصارا لكلمة


World Trade Organization


اللى هيا منظمة التجارة العالمية .. بس اعتقد انهم مالقوش تمويل كافى فالموديل اتلغى .. بس مش شور من الموضوع دا



ــــــــــــــــــــــــــــــــــــــــــــــــــ ــــــــــــــــــــــــ



في كلية تجارة بقى مفهوم الموديل كنموذج محاكي للواقع اختلف شويتين



ازاى ؟؟


ان فيه نماذج موجودة وبنفس التنظيم والاسلوب المتبع في ادارة نماذج المحاكاة اللى موجودة في سياسة واقتصاد


(وهانعرف كمان شوية ازاى بيتم ادارة النماذج دي)


بس النموذج مش شرط يكون نموذج محاكي للواقع


النموذج بيبقى فكرة معينة وبيقوم على اساسها النموذج ككل



بس معظم الموديلز اللى موجودة في الكلية هاتلاقيها بتركز على انهم يدو زي برامج تدريبية للطلبة في الانشطة الاقتصادية والادارية بوجه عام .. واللى بتشمل بقى بورصة واسواق مال وتسويق .. الخ الخ



طيب احنا عندنا كام موديل فى الكلية ؟؟؟


فيه كتير .. بس مين الأشهر ؟؟



COMET


اختصار لكلمة


Conference On Marketing, Economics and Trade



http://i53.tinypic.com/11az4tx.jpg



ABC


اختصار لكلمة


Advanced Business Community



http://i56.tinypic.com/121658g.jpg



Our Vision



http://i51.tinypic.com/2ikxqgj.jpg



وطبعا لو مسكت كل موديل عشان اشرحه مش هاخلص


فانا سايبلكم التفاصيل الصغيرة دي بقى انتو تعرفوها بنفسكو


اتعبــــوا شوية :P :P



وفيه موديل حابب اضيفه اسمه


SIFE


اختصار لكلمة


Students in Free Enterprise


http://i56.tinypic.com/2q18i28.gif


واللى بعتبره حاجة جامدة جدا وكان نفسي اخشه بجد


بس للأسف عرفته متأخر


ويكفى انى اقول ان كل سنة بيتعمل مسابقة دولية ليها اسمها


SIFE World Cup


بمشاركة جامعات كتيرة من كل دول العالم


واللى بيحصل ان كل دولة بتعمل تصفيات للجامعات جواها واللى بيكسب التصفيات المحلية دي بيمثل الدولة في بطولة العالم


وفي سنة 2009 و 2010 الجامعة الفرنسية كسبت التصفيات المحلية وفي السنتين كان كل مرة جامعة القاهرة توصل للنهائى وتخسر قدامها


لغاية 2011 اخيراً جامعة القاهرة كسبت وفكت النحس وبقت تمثل مصر في بطولة العالم



الجدير بالذكر ان الجامعة الفرنسية كسبت بطولة العالم في 2009 و 2010 باكتسااااااح !!


بالنسبة لنشاط SIFE عموما هوا نشاط طلابى جامعى بيركز على الانشطة الخيرية والتنموية .. اشبه بجمعية رسالة كدا بس على اجمد



متهيألي كدا احنا اخدنا فكرة شاملة وكبيرة اوي عن نشاط الموديل في الجامعة ككل وخاصة تجارة وسياسة واقتصاد باعتبارهم اكبر كليتين بيعملو الموديلز في جامعة القاهرة كلها


ودا مايمنعش ان فيه موديلز في كليات تانية زي حقوق وهندسة


بس مش موضوعنا ومش هايهمنا في حاجة



نيجي بقى للمهم .. شوفت موديل من الموديلز دول وعجبك واحد فيهم وعايز تقدم



الاول لازم تعرف ازاى الموديل بيتم ادارته



أى موديل موجود في اى حتة في الدنيا بيبقى متقسم لتلات حاجات


OC و AC و Delegates



الـ OC اختصار لكلمة


Organizational Committee


والـ AC اختصار لكلمة Academic Committee


(وخد بالك ان الكلمتين دول لازم هاتسمعهم لما تروح تقدم في اي موديل فانا بشرحلك اهو عشان ماتبقاش رايح على عماك)



الـ OC دول اللي هيا اللجنة التنظيمية .. ودي مسئولة عن ادارة الموديل ككل .. طبعا الاستراكتشر بتاعتها بيختلف من موديل


لموديل تانى على حسب التقسيم وعلى حسب التمويل وكمان على حسب اعداد اعضاء اللجنة ذات نفسها


بس عموما اي OC بتتكون من الـ president اللى هوا رئيس الموديل


وبعديه الـ vice president ودا النائب بتاعه وفي بعض الاحيان بيبقى اسمه assistant


والاتنين دول بيبقو الادارة العليا للموديل ككل


بعد كدا بيتم تقسيم الـ OC للجان فرعية


عددها ومسمياتها بتختلف من موديل لموديل زي ماقولنا من شوية


بس غاااالبا بيبقى فيها الآتى :


HR – Public Relations – Coordination – IT – Media – Financial


وكل لجنة من دول بيبقى ليها مهام محددة ومعروفة



اما بالنسبة للـ AC فدي بتبقى اللجنة الاكاديمية .. ودي بتبقى مسئولة عن تدريس الماتيريال والموديولز داخل الموديل لما بيبدأ


بمعنى اصح الـ AC دول بمثابة مدرسين او انستراكتورز


في بعض الاحيان بيكون الـ AC دول من الطلبة بس بيكونو دارسين المواضيع كويس اوي اوي وبيبقى ماشاء الله عليهم


وفي احيان تانية بيكونو من شركات بره او مندوبين عن شركات



اما الـ Delegates فدول بيبقو الطلبة العاديين اللى عايزين ياخدو يحضرو البرامج التدريبية دي ودول بيبقو كتير طبعا بس طبعا مش بياخدو غير الاعداد اللى هما عايزينها ودا معناه ان فيه عملية تصفية بتتم بين المتقدمين .. يعنى فيه انترفيوهات وهانعرف الكلام دا كمان شوية



أى حد يقدر يقدم سواء في الـ OC او في الـ Delegates


اما الـ AC فدا لازم تكون عضو في الـ OC عشان ساعتها بيبقى بيتعمل حاجة اسمها internal recruitment وبتبقى انستراكتور



سواء بقى تقدم في الاو سي او الديليجيتس .. لازم تمر بعملية انترفيو عشان يشوفو انت تستاهل تخش معاهم الموديل ولا لاء



بس طبعا بيبقى انترفيو الاو سي ارخم واغبى لانك لو نجحت انت بتبقى عضو في لجنة ادارة الموديل ككل .. يعنى ليك نشاط وليك كلمة ولو ماكنتش على قد المستوي المطلوب يبقى انت كدا هاتبقى عبئ عليهم ومالكش لازمة وهاتضرهم



طب انا عندي فكرة وعايز اعمل موديل زي العالم دي .. ازاى ؟؟



أولاً لازم تكون فكرتك جديدة ومحترمة ومش اي هبل



ثانياً لازم تحصل على موافقة حاجتين :
مركز البحوث التجارية – وكيل الكلية لشئون الطلبة




ثالثاً هاتجيب فلوس منين يا حلو عشان تصرف على الموديل ؟؟


لازم يكونلك مصدر تمويل .. ودا اهم حاجة في الموديل ككل


عشان كدا دايما اخطر ناس واهم ناس تلاقيهم في اي OC محترم هما لجنة الـ Financialوبيبقى اسمها Fundraisers


عشان هما دول اللى بيبقو مسئولين عن انهم يجيبو تمويل من اي حتة خلقها ربنا



طب التمويل ممكن ييجي منين ؟


التمويل المبدئى هايجي من مركز البحوث التجارية


يعنى لو انت خدت موافقة من مركز البحوث اعرف انك كدا هاتاخد تمويل منهم كمان



بس هل تمويل البحوث التجارية دا كافى ؟


لاء مش كافى .. فعشان كدا لازم تسعى بره الجامعة وتشوف اي شركات او بنوك تبقى راعية للموديل دا عشان تديك فلوس تقدر تشتغل بيها وتصرف بيها ع الموديل بتاعك


وانت وشطارتك بقى يا معلم



وعموماً دا فايل كامل كان نواة لانشاء موديل جديد


كان اسمه XYZ


وفكرته مبنية على اساس ان احنا عايزين ندرب ونعلم ناس تكون عارفه معلومات عن مواضيع معينة ومهمتنا ان احنا نكملهم الحتت الناقصة اللى هما مش عارفينها في المعلومات دي



وعشان كدا احنا سميناه XYZ .. عشان احنا بنبتدي من الآخر مش من الاول


بس للأسف حصل مشاكل بين الـ model creators والموضوع فشل بسبب الخلاف اللى حصل مش اكتر



الفايل اهو .. اللى عايز يداونلود يتفضل



http://www.mediafire.com/?zlaxiwujed79p4p (http://www.mediafire.com/?zlaxiwujed79p4p)



بعد ماتقرو الفايل دا هاتكونو فهمتو كل حاجة عن الموديلز وبكدا دي تكون نهاية موضوع الموديلز



نخش بقى على الملاعب الجامعة


دلوقتى انت راجل رياضى .. وبنت رشيقة


وعايز تظبط نفسك بقى في الرياضة ويبقى ليك نشاط كدا وتبقى جامد


في جميع الاحوال انت مضطر انك تعمل كارنيه صغير كدا عشان الملاعب .. بتطلع لرعاية الشباب في الدور التانى مدرج جـ و د


وتقولهم عايز اعمل كارنيه عشان ادخل ملاعب الجامعة


فابيدوك اذن دفع .. مش فاكر بالظبط كام بس تقريبا 2 جنيه


بتدفعهم في الخزنة .. واظن انت عارف السكة كويس



بعد كدا بيدوك استمارة بيتحط عليها صورتك وتملي بياناتك وتروح تختمها من شئون الطلبة وبعد كدا بيطلعلك الكارنيه في ساعتها

من خلال الكارنيه دا بقى تقدر تعيش حياتك في الملاعب



لو كنت من هواة كرة القدم او الباسكت .. تأجير الساعة بـ 5 جنيه


بس هاتبقى الملاعب الخماسية


لان الملعب الكبير اللى فيه النجيلة دا خاص بمنتخب الجامعة فقط لا غير





اما لو كنت من هواة التنس الارضى زيي كدا .. تأجير الساعة بـ 2 جنيه بس المضارب والكور عليك انت يا اما بتدفع عليهم فلوس تأجير بس مش عارف بكام بقى

ولو كنت راجل لياقة بقى .. عندك جيم محترم هناك الساعة فيه بجنيه واحد بس .. وانت كدا كدا آخرك في الجيم ساعة كفاية اوي انك تلعب على عضلتين الا اذا كنت بتريح كتير بقى بين التمرين والتمرين !!

ولو كنت بتحب السباحة فيه بسين ميه ميه الجامعة عاملاه باشتراك سنوي 60 جنيه بالاضافة لمدربين هايعلموك لو ماكنتش بتعرف تعوم




يعنى من الاخر هاتعيش حياتك عيشة تمام وزي الفل



بكدا اكون خلصت خلاص ودي نهاية الانشطة الطلابية ككل


يارب تستفيدو كويس اوي من الكلية وتستمتعو بحياتكو الجامعية



ناخد ريست بقى شوية كدا


لان مش باقى في الموضوع الكبير دا غير 5 حاجات


- الامتحان
- النتيجة
- ازاى اختار التخصص ؟
- خلصت الكلية وعايز اخلص ورقى واطلع شهادة التخرج
والبوست الاهم .. الكورســات والتريننج




واي حد عايزنى اضيف حاجة او اتكلم عن حاجة زيادة عن دول يبعتلى



ربنا يوفقكو ان شاء الله :friendsxs3:
ملك عاشقة الرياضيات
04-09-2011, 05:32 AM
موضوع جميل كنت عايزه افهم يعنى ايه موديل وياريتنى مفهمت بجد صدعت
today_2011
04-09-2011, 06:13 PM
طب ياريت تبتدي بالكورســات والتريننج ..؟؟
منى عاشقة الكيمياء
07-09-2011, 06:55 AM
سؤال متخلف اسفه يعنى ايه ترينينج
منى عاشقة الكيمياء
07-09-2011, 06:56 AM
على فكره يا فامبير كلام مهم جدااا الى مالا نهايه بجد انا بدخل المنتدى عشان اشوف اضافت ايه فى البوست الجديد منتظرين نصايح حضرتك
منى عاشقة الكيمياء
07-09-2011, 06:58 AM
المنتدى جميل وكل حاجه بس ارخم حاجه فيه مبتعرفش تبعت رسائل خاصه الا بعد 50 مشاركه وانا زهقت من كتر الكتابه اووووووف
عبدالرحمن ابراهيم محمد
13-09-2011, 04:25 AM
شرح وافي و مش سايب أي حاجة
جزاك الله خيرا و ربنا يباركلك
nirmen
24-09-2011, 02:33 PM
بجد استفدت كتير ميرسى اوووى
bloodyman
25-09-2011, 02:16 PM
فييييين الموضوع يا فامبير انت اتأخرت اوى p:
vampire1188
29-09-2011, 12:46 PM
جـــارى التحـضير للبـوست القادم (الكورسات والتدريب)
ونأسف على التأخير

وكل عام وجميع الطلاب بخير وان شاء الله تكون سنة سعيدة عليكو :)
ملك عاشقة الرياضيات
29-09-2011, 01:48 PM
انا شوفت فى الجامعه المكتبة المركزية وسألت على الاى سى دى ال قالولى دى انترناشونال من لوكال فقولت لبتوع الاستعلامات ايه الفرق قالولى ان التانيه بتنتهى بعد 5 سنين لكن الانترناشونال ممتده ومعتمده من اليونسكو فسألت بكام هنا قالولى اناه هنا ب600 جنيه 200 تدريب و400 امتحان وانا مش عارفه هو كده معقول ولا غاليه بس انا بصراحه عجبنى المكان جداااا تحفه تحس انك فى بنك كده بس يا فامبير انت عندك خبره عنى فاكيد عارف ايه الصح وانا كمان معايا واحده صحبتى بس كنت هدفع ال200 جنيه انا وهيه بس قالنا نسته عشان نسال عشان ميضحكش علينا يعنى ونعرف الجو وكده وكمان فيه 10 جنيه اشتراك مكتبه /كارنيه للمكتبه اعمله ولا انت شايف ان ملهوش لزمه ولا ايه رأيك
*نهى*
29-09-2011, 07:01 PM
لو سمحت هو فين شرح المجموعه المميزه ؟ بدور عليها مش لاقياها
la vie
06-10-2011, 12:02 AM
اولا بجد شكرا ليك عالمجهود اللي بذلته بجد وفيت كل اسئلتي
بس انا كان عندي سؤال محيرني
ايه اللي مطلوب مني عشان اضمن اني في موديل ( يعني اتقبل )
soso2012
16-01-2012, 06:18 PM
شكرا جزيرا على المجهود الرئع
LATCO
02-05-2012, 11:32 AM
Latco Training & Technology Center
مكتب لاتكو للمحاسبة (خبراء فى مجال المحاسبة والضرائب والدورات العلمية فى هذا المجال ) نقابةالتجاريين

محاسبون قانونيون - خبراء ضرائب
<الدورة المتكاملة>
فى اعداد الحسابات الختامية والميزانية
دفترى - كمبيوتر
*تدريب محاسبين.. تأسيس شركات
*دبلومة المحاسبة الالكترونية
* دبلومة المدير المالى
*دبلومة المحاسب المالى المحترف
*حيث يمكنك المكتب من اعداد القيد المحاسبى - التسجيل باليومية الامريكية - اعداد موازين المراجعة - قائمة الدخل - قائمة المركز المالى - قائمة التدفقات النقدية دفتريا وباستخدام الكمبيوتر ومحاسبة شركات صناعية وشرح التحليل المالى والتعامل مع البنوك والمحاسبة
الخدمية
تتميزبأساتذة جامعيين ممتخصصين وباسعار منافسة
كما يوجد تخفيضات للمجموعااات
ت/01009509300 – 01221778134 –24845360
dndoonh
17-05-2012, 07:47 PM
ياااااا مستر فامبير
انا ثانوووى تجااره وعايزه اكمل فى القااهره ينفع ولا ايه الحووار
emma3
26-07-2012, 09:23 PM
هو انا ممكن اقدم شعبة انجليزى و شعبة جورجيا ولا شعبة وحدة بس..
همسه الجميلة
09-08-2012, 08:52 PM
مجهووووووووود جامد
شكراااااااا
m . w . sakr
15-08-2012, 02:52 AM
موضوع رائع فعلا شكرا
eslam mohsen ali
05-09-2012, 05:52 PM
السلام عليكم
اين بوست الكورسات والترينج
student/salma
17-09-2012, 10:00 PM
لو سمحت انا انتساب ينفع ادخل جورجيا؟؟؟؟؟؟؟؟؟؟؟
vampire1188
18-09-2012, 08:05 PM
لو سمحت انا انتساب ينفع ادخل جورجيا؟؟؟؟؟؟؟؟؟؟؟

انتى جايه تسألي دلوقتى ؟!! ماكان من الاول .. دلوقتى بعد ما الدراسة بدأت لا خلاص كدا شكرا مش هاينفع باي حال من الاحوال للأسف
student/salma
18-09-2012, 09:05 PM
لا عمتا ينفع انتساب يدخل جورجيا؟؟
student/salma
18-09-2012, 09:41 PM
لو سمحت كان عندى استفسار بشكل عام ينفع انتساب يدخل جورجيا؟؟؟
karem20055002
21-10-2012, 03:36 AM
الله ينور يا فامبير انا مستني باقي الموضوع بتاع الكورسات والتجهيز لسوق العمل بقالي زمن احسن عاوز احدد هامشي في انهي طريق من الستة
مجدىمحمدمحمد
31-12-2012, 04:40 PM
ممكن طالب يكون فى سنة تانية معهد نظم ومعلومات خاص يحول فى سنة تانبة نظم للصف الاول كلية تجارة انا سمعت الكلام دة وقالت اتاكد من حضرتك
man_reda
17-04-2013, 07:02 PM
- كلية الحاسبات والمعلومات بتقدم خدمة بيع سيديهات الويندوز والاوفيس الاصلية باسعار رخيصة جدا جدا وعشان تجيبها لازم يبقى معاك الكارنيه




أستفاد من موضوع السيديهات ديه أزاى يعنى أروح فين أجيبها وبكام تقريبا ولأى حد معاه الكارنيه فى تجاره القاهره ؟ وشكرا يا باشا
eslam mohsen ali
22-04-2013, 06:57 PM
ناس كتير قعدت تسأل على قسم اكتواري وشعبة جورجيا


وانا كنت قولت هنزلهم ان شاء الله بعد بوست الامتحانات والنتيجة


بس انا شايف ان الناس عايزة تعرف فاقولت انزله الاول




عشان تخش قسم اكتوارى دا لازم يتوافر فيك شرطين


1- انك تكون جايب في سنة اولى تقدير لا يقل عن جيد

2- انك تكون جايب في الثانوية العامة فى الانجليش والرياضة ما لايقل عن 80% من مجموع كل مادة على حدة
يعنى في الرياضة ماتقلش عن 40 من 50
والانجليش ماتقلش عن 40 من 50

اذا توافر فيك الشرطين دول يبقى تمام كمل معايا الجزئية دى
مش متوافر فيك بعد اذنك اجرى بالماوس وتخطاها
عشان مش هاتفيدك فى حاجة

دلوقتى بعد ما خلصت سنة اولى الحمدلله بنجاح وبتقدير جيد
بعد ما النتيجة تظهر بحوالى أسبوع كدا او أسبوعين
هاتروح لشئون الطلبة بتاعة المجموعة بتاعتك
وتقولهم انا عايز حاجتين :
1- بيان نجاح (اثبات قيد) ومكتوب فيه تقدير سنة اولى
(وعشان تعمله بتدفع 10 جنيه فى الخزنة)
http://www.mediafire.com/?oqn12kblib7fbc8 (http://www.mediafire.com/?oqn12kblib7fbc8)

2- صورة من استمارة الثانوية العامة اللى انتا قدمت بيها فى الكلية
(وممكن يدفعك فلوس على الصورة دي عادى يعنى)


وفايدة الورقتين دول ايه بقى ؟


1- ان بيان النجاح دا اثبات انك جيبت جيد في سنة اولى




2- استمارة الثانوية العامة دى بتتجاب عشان يشوفوا درجاتك فى الانجليش والرياضة كانوا كام



بعد مابتطلع الورقتين دول بتقوم واخدهم وطيران على شئون تجارة انجليش
(دا لو انت كنت تجارة عربى اما لو كنت تجارة انجليش خلاص كله بيخلص من شباك واحد)
تديهم الورقتين هايشوفوا درجاتك وتقديرك يسمح ولا لأ
وبعد مابيتأكدوا بتقوم مدياك أذن دفع بـ 200 جنيه




تروح تدفعهم فى خزنة الكلية وترجع تانى هاتقوم مدياك استمارة التقديم
هاتملا بياناتك فيها .. وهايتتحددلك معاد الامتحان
اذن من الآخر الاستمارة دى ماهى الا حجز للامتحان مش اكتر







ناس هاتسألنى بقى تقولى .. الامتحان دا فى ايه ؟؟؟

الامتحان دا فيه انجليش و ماث (رياضة يعنى بس انجليش)






طب ودا هانخشه ازاى من غير مانذاكر ؟

والله عايز تذاكر ممكن تذاكر مع نفسك
عايز تاخد فيه كورسات .. ممكن تاخد فيه كورسات






الجامعة مقدمالك كورس بتروح تقدم عليه فى مركز خدمة المجتمع


اسم الكورس : العلوم الاكتوارية


مدة الدراسة : اسبوعين (كل يوم 4 ساعات)


القيمة : 200 جنيه للماث – 200 جنيه للانجليش

يعنى التوتال كدا 400 جنيه
مكان الدراسة : على حسب ما الدكاترة يحددوا




مع اول كلاس بتحضره بيدوك ملزمتين
ملزمة فى الانجليش وملزمة فى الماث
ودى زى بمثابة مرجع ليك فى المذاكرة يعنى







بعد مابتخلص الكورس بـ 10 ايام بتخش الامتحان

الامتحان مدته ساعة بتحل فيها حوالى 4 ورقات



بعدها بفترة بتنزل النتيجة وتتعلق قدام باب تجارة انجليش



بأسماء الطلبة الناجحين فقط
يعنى الطلبة اللي ماوفقوش ودخلوا القسم مابيكونوش مكتوبين


فيه ناس بتدور في دماغهم الاسئلة دي :



1- القسم دا انا سمعت عنه كتير اوى .. هوا مهم ؟؟

الحقيقة أهمية القسم دا بترجع لانه تخصص زي مابنقول كدا نادر
او بمعنى اصح مميز .. ودا عشان كذا سبب :
أ- عدد الطلبة المقبولين فيه واللي بيدرسوا بيبقوا قليلين
ب- الدراسة فيه بالانجليش
جـ- مافيش فى مصر كلها غير جامعتين اللى بيدرسوا التخصص دا
جامعة القاهرة – الجامعة الامريكية




2- طب هوا انا لو دخلت القسم دا هاتخرج اشتغل ايه ؟؟




المفروض انك بتبقى خبير ائتمانى .. والخبير الائتمانى دا بيعمل حاجتين فى مجالين

- مجال البنوك -
المفروض لما شركة بتيجى تطلب قرض من اى بنك
الطبيعى ان البنك بيعمل دراسات ائتمانية عن الشركة دى
ويشوف هل هى هاتقدر تدفع اصل وفوايد القرض ولا لاء
وهيا دى بقى وظيفة خبير الائتمان .. انه بيعمل دراسة حوالين الشركة ويشوف هاتقدر تسدد ولا لاء
- مجال شركات التأمين -
اى بوليصة تأمين بيبقالها قواعد وشروط
وظيفة خبير الائتمان انه هوا اللى يحط الشروط دى




3- بالنسبة للناس المقبولة .. كام واحد بيتقبلوا ؟؟
من كام سنة كدا كانوا بياخدوا اعداد قليلة جدا جدا





يكفى انى افتكر دفعة 2008/2009 تقريبا كانوا واخدين 17 طالب !!

بس على كل حال دا النظام القديم .. النظام الجديد بقى يقبلوا 35 طالب





4- طب والنجاح في الامتحان دا من كام ؟؟


من 75%



5- وبالنسبة للمصاريف ؟؟


نفس مصاريف تجارة انجليش بالظبط (4500)



6- والكارنيه ؟ هل بيتم تمييزنا ولا زينا زى أى حد ؟؟

بيتكتب على الكارنيه فوق تجارة انجليزى – قسم علوم اكتوارية



يعنى معنى كدا ان انا هابقى متسجل في تجارة انجليش ولو فيه ورق عايز اخلصه من شئون الطلبة يبقى اروح شئون طلبة تجارة انجليش ؟؟
بالظبط كدا .. يعجبنى ذكائك






حتى لو انا كنت تجارة عربى في سنة اولي ؟؟

ايــوا .. بمجرد قبولك في قسم اكتواري كدا انت بقيت تجارة انجليش خلاص





7- وياترى شكلها ايه الاستمارة اللى بنقدم بيها دى ؟؟

http://www.mediafire.com/?dwohuw5msif8ao1






8- انا كنت أدبى في ثانوي .. هل ينفع اخش ؟

اول ما القسم اتعمل كانو بياخدو خريجي الثانوية العامة من شعبة علمى رياضة فقط لا غير
بس بعد كدا فتحوها لكل الناس وبقى اي حد بيقدم بس لازم يكون متوافر فيه الشروط اللى قولنا عليها في الاول خالص








نصيحة أخيرة بخصوص قسم اكتواري


القسم دا عايز ناس دماغها نضيفة في الرياضة


بمعنى اصح تكون الرياضة دي لعبتك


اما لو كنت بتتخنق منها اصلا بس نفسك تروح تجارة انجليش وخلاص لا يبقى بلاش تقدم لانك مش هاتنجح في امتحان القبول اصلا وحرام عليك تدفع الـ 200 جنيه بتوع التقديم



وأخيراً للناس اللى ماحالفهاش الحظ في دخول تجارة انجليش في الثانوية العامة


احب اقولكو لســه فيه امل .. بس اتعبو شوية




معلومة أخيرة احب بس انوه عنــها عشان ناس كانت سألت عليها



من 3 سنين بالظبط الكلية اعلنت عن وجود مجموعة جديدة اسمها المجموعة المميزة ودي كانت بمثابة مجموعة اضافية لشعبة تجارة عربى



يعنى في الاساس كان فيه 4 مجموعات انتظام

أ – ب – ج – د .. دا غير مجموعات انتساب بس مش مهم انتساب دلوقتى لانها اتلغت خلاص



المجموعة المميزة دي بقى كانت مجموعة اضافية جت عليهم


ومش بيخشها الا الناس اللى بتجيب تقدير جيد جدا وامتياز


والدخول اختياري طبعا مش اجباري


يعنى انا مثلا كنت في مجموعة أ وجيبت امتياز فبروح اعمل طلب تحويل للمجموعة المميزة عشان احول .. حاجة بسيطة جدا




بالنسبة للناس بقى اللى داخلة كلية جديد اللى هما بتوع الثانوية العامة فكان بيتعملهم تنسيق داخلي زي النظام القديم بتاع تجارة انجليش كدا


واعلى مجاميع بتكون مقدمة طلب التحاق على المجموعة دي بياخدوهم طبقاً للعدد اللى هما طالبينه




المجموعة دي نظام الدراسة فيها كان نفس نظام تجارة انجليش


بس لغة الدراسة كانت بالعربى


يعنى فيه كويزات .. وفيه اسايمنت وفيه ميد تيرم وفيه مذاكرة طول السنة




والمجموعة دي كانت بتتميز عن باقى المجموعات بانهم بيروحو تريننج وبياخدو منح ببلاش وحاجات زي كدا



الكلام والمميزات في ظاهرها حلو وظريف وجامد


ومسمى المجموعة المميزة ذات نفسه لما تسمعه لاول مرة تقول اوووووبا ايه العسل دا !!




بس تعالى للواقع بقى




تجارة عربى العادية .. انت بتخش امتحان الفاينال بتلعب في العشرين درجة كلهم


يعنى غيب براحتك .. عيش براحتك .. لف في الكلية زي مانتا عايز .. ماتحضرش محاضرات مش مهم طوز


بس انت بتذاكر في البيت .. المهم انك بتذاكر


تعالى بقى في الامتحان لو حليت كويس ممكن تجيب في المادة وليكن 17 او 18 !!


تجارة عربى المميزة بقى .. انت طول الترم فيه درجات عماله تطير منك في حاجات غريبة


درجة في الحضور والغياب ممكن تاخد فيها نص


درجة في المشاريع والاسايمنت اللى الدكتور بيطلبها منك تاخد فيها نص او تلات تربع بالكتير


3 درجات في الميد تيرم لو انت دحيح اوي ممكن تجيب فيهم درجتين ونص


على بال ماتوصل لامتحان الفاينال اللى هوا بيتحسب من 14 تلاقي طار منك ييجي 3 درجات في الهوا في حاجات غريبة !!



وتخش امتحان الفاينال تلاقي امتحان رخم رخامة السنين تجيبلك من الـ 14 قول 12 لو انت جامد


يبقى كدا طار منك 5 درجات في المادة كلها وانت اساسا مش حاسس !



قارن بقى بين طالب المميزة وطالب تجارة الغلبان العادي


العادي يجيب 18 وهوا برنس


المميز يجيب 15 وهوا طالع عينه طول السنة !!




والموضوع دا طلبه كتير اكتشفته ونفضوله


وناس اعرفها شخصيا كانت جايبه جيد جدا وامتياز


وفضلو زي ماهما في مجموعاتهم وماحولوش للمميزة




ولما الكلية لاقت ان الموضوع مش عليه اقبال والحوار فكسان


ومابقاش فيه ميزة ولا فيه بتنجان .. قامت لاغية المجموعة كلها


ولما الثورة قامت طبعا حصل حاجات كتير ومن ضمنها تغيير القيادات الجامعية عن طريق عمل انتخابات
ولما الانتخابات اتعملت في كلية التجارة جامعة القاهرة دكتور حلمي البشبيشي هوا اللى كسب وبقى العميد الجديد

ومن ضمن القرارات اللى اخدها
رجوع المجموعة المميزة تااااااانى من بعد ما كانت اتلغت

ناس هاتقولي طب انت حكيت القصة دي ووجعت دماغنا بيها ليه من الاول ماكنت تقول انها اتلغت وخلاص !!

كان لازم اقولكو الحكاية دي عشان تفهمو الموضوع ماشى ازاى عشان ماتبقوش حاسين بالذنب وزعلانين ان هيا اتلغت


بالعكس .. انتو كدا في الامان وكدا احسـن


تمــام يا رجالة ؟ تمــام يا بنات ؟

اشوفكو في البوست القادم ان شاء الله



" شعبة جورجيـا "






مصاريف اكتوارى 3140 للعلم فقط اما مصاريف تجارة انجليزى 6400......ادعلى ربنا يوافقنى وادخل اكتوارى
mohamed shawki
30-05-2013, 03:47 PM
ممكن صيغة شهادة التخرج لكلية التجاره عربى
vampire1188
17-07-2013, 08:27 PM
ممكن صيغة شهادة التخرج لكلية التجاره عربى

محتاجها في ايه ؟؟؟
ahmed abdel twab anani
20-07-2013, 01:50 PM
عليا النعمه انت برنس وربنا هيبركلك انا طالب ثانويه عامه لسه مخلص وجيلك السنه الجايه تجاره القاهره :022yb4::022yb4::022yb4:
vampire1188
20-07-2013, 04:13 PM
عليا النعمه انت برنس وربنا هيبركلك انا طالب ثانويه عامه لسه مخلص وجيلك السنه الجايه تجاره القاهره

ya welcome ya welcome :)
maged4ninja
23-07-2013, 05:46 PM
الصراحه شرح زالفل ومش عارف انت قدرت ازاي تعمل كل ده ما شاء الله
ثانيا عندي شوية استفسارات
انا هقدم في التجاره وهجرب حظي في التنسيق الداخلي يمكن اتقبل فيه
ياريت بقي توضح التنسيق الداخلي ده في انهي شباك :d
وتاني حاجه المجموعه المميزه الي بتنسيق داخلي دي ايه مميزتها وشروطها!
بس كده :d
وهل في ملاعب سله نظرا لان طول يبلغ 2 متر ؟! :d :d
vampire1188
23-07-2013, 09:27 PM
الصراحه شرح زالفل ومش عارف انت قدرت ازاي تعمل كل ده ما شاء الله
ثانيا عندي شوية استفسارات
انا هقدم في التجاره وهجرب حظي في التنسيق الداخلي يمكن اتقبل فيه
ياريت بقي توضح التنسيق الداخلي ده في انهي شباك
وتاني حاجه المجموعه المميزه الي بتنسيق داخلي دي ايه مميزتها وشروطها!
بس كده
وهل في ملاعب سله نظرا لان طول يبلغ 2 متر ؟!

كل اسألتك دي متجاوب عليها في الموضوع على فكرة :)
تيتانيك
26-07-2013, 02:39 PM
انا بقى مشكلتى كبيرة ومش فاهمها يا فامبير انا علمى رياضة جايب 88 ف المية وجايب ف الانجليش 46 من 50 بس معرفش هلحق تجارة انجليش ولا لا .. انا جبت تنسيق السنة اللى فاتت لقيت تجارة عين شمس واخدة362 ونا جايب 361.50 معرفش تجارة كدة ابقى اقدم وهى تجارة عربى زى انجليش ولا هتفرق ف المجموع هتقل عليك شويةانا معرفش وصلت للبوست بتاع حضرتك ازاى ممكن بعد اذنك تبعتلى الرد ف رسالة خاصة
Alia _ عاليه
27-07-2013, 12:51 AM
بجد اللهم صلي ع النبي يعني .. مفيش بعد كده انا داخله طاازه تجاره انجلش ان شاء الله و ما كنتش فاهمه حااجه ,, شكــــــــــــــــــراً اااووووي :d:d
بس عايزه اعرف حااجه ,, دلوقتي نتيجة التنسيق بتاعتي يوم الحد ان شاء الله ارووح بقى الكليه اقدم امتي ؟ :)
vampire1188
28-07-2013, 08:19 PM
انا بقى مشكلتى كبيرة ومش فاهمها يا فامبير انا علمى رياضة جايب 88 ف المية وجايب ف الانجليش 46 من 50 بس معرفش هلحق تجارة انجليش ولا لا .. انا جبت تنسيق السنة اللى فاتت لقيت تجارة عين شمس واخدة362 ونا جايب 361.50 معرفش تجارة كدة ابقى اقدم وهى تجارة عربى زى انجليش ولا هتفرق ف المجموع هتقل عليك شويةانا معرفش وصلت للبوست بتاع حضرتك ازاى ممكن بعد اذنك تبعتلى الرد ف رسالة خاصة

Message has been sent :)
vampire1188
28-07-2013, 08:21 PM
بجد اللهم صلي ع النبي يعني .. مفيش بعد كده انا داخله طاازه تجاره انجلش ان شاء الله و ما كنتش فاهمه حااجه ,, شكــــــــــــــــــراً اااووووي
بس عايزه اعرف حااجه ,, دلوقتي نتيجة التنسيق بتاعتي يوم الحد ان شاء الله ارووح بقى الكليه اقدم امتي ؟

تابعي في الجرايد دايما عشان ساعتها هاتلاقي خبر فتح باب التقديم لكليات المرحلة الاولي .. ودا غالبا بيكون بعد ظهور نتيجة التنسيق بتلات اربع ايام كدا

بس في ظل الظروف المهببة اللى بتمر بيها البلد ومنطقة النهضة والجامعة بالذات فا اعتقد ممكن تتأخر شوية
محمود شقرون
30-07-2013, 01:20 AM
انت رغاي اوي يعني انا اسف :d
vampire1188
30-07-2013, 01:27 AM
انت رغاي اوي يعني انا اسف

شكرا .. اقفل التوبيك وشوف اي موضوع تاني يكون مافيهوش رغي هاتلاقي المنتدي مليان
ياســــــــمين *
31-07-2013, 08:16 AM
يآآآآآه يا عبد الصمد ههههههههههه
الموضوع بالرغم انو طويل جداااااااااااااااا بس قرأته كله حتا الحاجات اللى متخصنيش , او اللى مش ناوية علبها زى شعبة جورجيا وعلوم اكتوارى
بجد ألف ألف شكر انك تعبت نفسك وكتبت كل ده ,, أنا استفدت جدااااااااااااا وأسلوبك ف الشرح جميل ومسلى يخلى الواحد عاوز يقرأ الموضوع للآخر ,, دلوقت أنا تقريباً فهمت كل حاجة ولازم هقرأ الموضوع ده تانى ان شاء الله
بعد ما أدخل الكلية

دعوآآآتك بقآآآ عشان مستنية التنسيق الداخلى ده , و حسبى الله ونعم الوكيل فى اللى عمل تجارة انجلش تنسيق داخلى نظام هبآآآآآآآب :d

شكرااااااااااااا مرة تانية يا فامبير
devianT
31-07-2013, 11:25 AM
هو موضووع على فكرة راائع،
تسلم إيدك ..

بس كان عندي سؤال معلش،
هو هيفرق لو دخلت تجارة خاص الي هيا بتكون إدارة اعمال
قسم محاسبة والدراسة بالإنجليزي ،أقصد يعني هتفرق من حيث الشهادة او الشغل؟
*اسما*
31-07-2013, 02:13 PM
جزاك الله كل خير
*اسما*
31-07-2013, 02:22 PM
انت رغاي اوي يعني انا اسف :d

شكرا .. اقفل التوبيك وشوف اي موضوع تاني يكون مافيهوش رغي هاتلاقي المنتدي مليان


على فكرة الرغى الى مش عاجبك ده هو الى مبسط الموضوع ولو مش عاجبك يعنى مكنتش ترد حاجة غريبة
vampire1188
31-07-2013, 07:59 PM
يآآآآآه يا عبد الصمد ههههههههههه
الموضوع بالرغم انو طويل جداااااااااااااااا بس قرأته كله حتا الحاجات اللى متخصنيش , او اللى مش ناوية علبها زى شعبة جورجيا وعلوم اكتوارى
بجد ألف ألف شكر انك تعبت نفسك وكتبت كل ده ,, أنا استفدت جدااااااااااااا وأسلوبك ف الشرح جميل ومسلى يخلى الواحد عاوز يقرأ الموضوع للآخر ,, دلوقت أنا تقريباً فهمت كل حاجة ولازم هقرأ الموضوع ده تانى ان شاء الله
بعد ما أدخل الكلية

دعوآآآتك بقآآآ عشان مستنية التنسيق الداخلى ده , و حسبى الله ونعم الوكيل فى اللى عمل تجارة انجلش تنسيق داخلى نظام هبآآآآآآآب

شكرااااااااااااا مرة تانية يا فامبير

welcome on board :)

وبالتوفيق ان شاء الله
vampire1188
31-07-2013, 08:03 PM
هو موضووع على فكرة راائع،
تسلم إيدك ..

بس كان عندي سؤال معلش،
هو هيفرق لو دخلت تجارة خاص الي هيا بتكون إدارة اعمال
قسم محاسبة والدراسة بالإنجليزي ،أقصد يعني هتفرق من حيث الشهادة او الشغل؟

ناوي تخش خاص ايه بالظبط ؟؟ اقصد جامعة ايه يعنى ؟ حدد عشان بتفرق طبعا
omar.ahmed3
31-07-2013, 09:16 PM
تسلم على التوبيك الرائع
استفد منة كتير والله
انا الحمد لله جالى كلية تجارة عين شمس
ربنا يوفقنا جميعا
devianT
01-08-2013, 09:10 AM
ناوي تخش خاص ايه بالظبط ؟؟ اقصد جامعة ايه يعنى ؟ حدد عشان بتفرق طبعا

لأ مش جامعة ..
الأكاديمية الحديثة،
أكاديمية أخبار اليوم،
اكاديمية القاهرة الجديدة،
أو معاهد عالية ..

لسا مقررتش، بس مش هتكون جامعة يعني إن شاء الله ..

ومعلش سؤال تاني،
هيا تجارة مفتوح لو مثلاً جبت تقدير عالي
مينفعش احول انتظام او انتساب؟
ولا هفضل اتعلم في المركز المفتوح طول الـ 4 سنين
مهما اجيب في تقديرات
وبردوا شهادتها بتفرق عن شهادة إنتظام؟
من حيث الشهادة والشغل بردوا
vampire1188
01-08-2013, 07:35 PM
لأ مش جامعة ..
الأكاديمية الحديثة،
أكاديمية أخبار اليوم،
اكاديمية القاهرة الجديدة،
أو معاهد عالية ..

لسا مقررتش، بس مش هتكون جامعة يعني إن شاء الله ..


بص ردودي مابحبش فيها التجميل .. اي اكاديميات ادارة اعمال بتبقى اكاديميات فاشلة

بياخدوا منك فلوس وخلاص وولا بتتعلم ولا اي حاجة

نصيحــة .. يا تخليك في الحكومي يا عليك وعلى الجامعات المحترمة

لكن شغل الاكاديميات دا تعبااااااااااااان

ومعلش سؤال تاني،
هيا تجارة مفتوح لو مثلاً جبت تقدير عالي
مينفعش احول انتظام او انتساب؟
ولا هفضل اتعلم في المركز المفتوح طول الـ 4 سنين
مهما اجيب في تقديرات

بتفضل في التعليم المفتوح زي مانتا مافيش اي تحويل نهائي

وبردوا شهادتها بتفرق عن شهادة إنتظام؟
من حيث الشهادة والشغل بردوا

طبعـــاً
devianT
02-08-2013, 07:13 AM
بص ردودي مابحبش فيها التجميل .. اي اكاديميات ادارة اعمال بتبقى اكاديميات فاشلة

بياخدوا منك فلوس وخلاص وولا بتتعلم ولا اي حاجة

نصيحــة .. يا تخليك في الحكومي يا عليك وعلى الجامعات المحترمة

لكن شغل الاكاديميات دا تعبااااااااااااان



الأكاديميات الدراسة فيها بالإنجليزي، هتكون وحشة بردوا؟
أنا كنت قريت إن الكتب أصلا والدراسة بتبقى عالمية عشان إنجليزي.

وممكن ترشحلي جامعات ايه؟
vampire1188
02-08-2013, 10:06 AM
الأكاديميات الدراسة فيها بالإنجليزي، هتكون وحشة بردوا؟
أنا كنت قريت إن الكتب أصلا والدراسة بتبقى عالمية عشان إنجليزي.

وايه يعنى لما اكاديمية تستوردلها كام كتاب محاسبة على ادارة من بره وانت كطالب هاتكعلك في السنة بتاع 1500 كتب وهاتبقى فرحان وانا بدرس حاجات انترناشيونال .. بس هاتيجي للفعلي ولااااااااا الهـــوا

عايز تخش حتت عدلة عندك الـ guc .. عندك الـ bue ..

مش هاقولك الـ auc عشان هاتلاقيها غالية عليك وعايزة متطلبات معينة فاسيبك منها
devianT
02-08-2013, 10:52 AM
وايه يعنى لما اكاديمية تستوردلها كام كتاب محاسبة على ادارة من بره وانت كطالب هاتكعلك في السنة بتاع 1500 كتب وهاتبقى فرحان وانا بدرس حاجات انترناشيونال .. بس هاتيجي للفعلي ولااااااااا الهـــوا

عايز تخش حتت عدلة عندك الـ guc .. عندك الـ bue ..

مش هاقولك الـ auc عشان هاتلاقيها غالية عليك وعايزة متطلبات معينة فاسيبك منها إ

طيب، آآخر سؤال بقى معلش تقلت عليك ..

هو لو انا دخلت جامعة، اكاديمية او معهد عالي وقعدت فيه سنة
ينفع بعدين احول حكومة؟ اعمل معادلة شهادة واحول من خاص لحكومة .
الكلام ده شوفت ناس كتيرة بتقول عليه، فقولت اسأل .

معلش يمكن الإستفسار مش في مكانه ..
vampire1188
02-08-2013, 10:04 PM
إ

طيب، آآخر سؤال بقى معلش تقلت عليك ..

هو لو انا دخلت جامعة، اكاديمية او معهد عالي وقعدت فيه سنة
ينفع بعدين احول حكومة؟ اعمل معادلة شهادة واحول من خاص لحكومة .
الكلام ده شوفت ناس كتيرة بتقول عليه، فقولت اسأل .

معلش يمكن الإستفسار مش في مكانه ..

لاء لان بكل بساطة شهادة الاكاديمية او المعهد العالي اصلا بيبقى معمولها معادلة من المجلس الاعلي للجامعات بدرجة بكالوريوس

وثانياً مافيش معادلة لكلية تجارة غير للدبلومات .. غير كدا مافيــش
ياســــــــمين *
02-08-2013, 10:51 PM
فامبير معلش ليا سؤال كده ,, دلوقت أنا دخلت ع الموقع الرسمى بتاع الكلية هنا لقيت كاتبين فى شروط تجارة انجلش البند ده :
** يتم قبول الطلاب حسب المجموع الاعلى فى التنسيق الداخلى ووفق العدد المصرح للكلية أخذه فى نفس العام ( يتم قبول عدد الطلاب بالشعبة بنسبة 25% من طلاب الانتظام تقريبا بعد موافقة مجلس الكلية والجامعة على العدد فى نفس العام ) **

هو نسبة 25 % دى معناها ان العدد اللى بياخدوه بيكون ربع العدد اللى ف تجارة العربى اللى هيقدموا ؟؟
يعنى مثلا انا دخلت ع موقع الاستاذ لقيت عدد طلاب تجارة دمياط ربعماية طالب , معنى كده انهم هياخدوا مية طالب ف انجلش بس السنة دى ؟؟؟؟ " الربع يعنى "

معلش أنا مش فاهمة اى حاجة خالص :(
vampire1188
03-08-2013, 12:37 PM
فامبير معلش ليا سؤال كده ,, دلوقت أنا دخلت ع الموقع الرسمى بتاع الكلية هنا لقيت كاتبين فى شروط تجارة انجلش البند ده :
** يتم قبول الطلاب حسب المجموع الاعلى فى التنسيق الداخلى ووفق العدد المصرح للكلية أخذه فى نفس العام ( يتم قبول عدد الطلاب بالشعبة بنسبة 25% من طلاب الانتظام تقريبا بعد موافقة مجلس الكلية والجامعة على العدد فى نفس العام ) **

هو نسبة 25 % دى معناها ان العدد اللى بياخدوه بيكون ربع العدد اللى ف تجارة العربى اللى هيقدموا ؟؟
يعنى مثلا انا دخلت ع موقع الاستاذ لقيت عدد طلاب تجارة دمياط ربعماية طالب , معنى كده انهم هياخدوا مية طالب ف انجلش بس السنة دى ؟؟؟؟ " الربع يعنى "

معلش أنا مش فاهمة اى حاجة خالص فامبير معلش ليا سؤال كده ,, دلوقت أنا دخلت ع الموقع الرسمى بتاع الكلية هنا لقيت كاتبين فى شروط تجارة انجلش البند ده :
** يتم قبول الطلاب حسب المجموع الاعلى فى التنسيق الداخلى ووفق العدد المصرح للكلية أخذه فى نفس العام ( يتم قبول عدد الطلاب بالشعبة بنسبة 25% من طلاب الانتظام تقريبا بعد موافقة مجلس الكلية والجامعة على العدد فى نفس العام ) **

هو نسبة 25 % دى معناها ان العدد اللى بياخدوه بيكون ربع العدد اللى ف تجارة العربى اللى هيقدموا ؟؟
يعنى مثلا انا دخلت ع موقع الاستاذ لقيت عدد طلاب تجارة دمياط ربعماية طالب , معنى كده انهم هياخدوا مية طالب ف انجلش بس السنة دى ؟؟؟؟ " الربع يعنى "

معلش أنا مش فاهمة اى حاجة خالص

ماهو قالــك بعد موافقة مجلس الكلية والجامعة على العدد فى نفس العام يعنى مش قاعدة .. ممكن يقبلــوا اكتر

وبعديــن موقع ايه بس اللى انتي داخلة عليه دا ؟!! .. المواقع دي بقيلها عشروميت سنة ماتعمليهاش تحديث

نصيحة .. ماتشغليش نفســك بوجع الدماغ بتاع التنسيق الداخلي دا عشان هاتفضلي في صراع داخلي كدا مع نفسك مالوش اي تلاتين لازمة ولو ليكــي نصيـب تخشــي انجليــش هاتخشــيها بإذن الله
ياســــــــمين *
03-08-2013, 01:09 PM
تمام ,, شكرا ع الرد
omar.ahmed3
06-08-2013, 09:49 PM
ما هى اجراءات التحويل ؟
وما موعد فتح التحويل الالكترونى والورقى
التحويل من كلية تجارة عين شمس للقاهرة
مع العلم انى من القليوبية
وانا كاتب فى الرغبات عين شمس بنها القاهرة
ارجو المساعدة من فضلكم
اوشااا
12-08-2013, 06:18 PM
والله انت ماااااااااااااااااااااااااااااااان علي فكرة انا اعلام القاهرة بس لما لقيت المجهود الجامد ده منك حبيت اعمل كومنت وياريت يكون في حد كده في اعلام احسن ماحدش سائل فينا خالص!!!!!!!!!!!!!!!
hobahoby
13-08-2013, 12:33 PM
حضرتك مجهود اكثر من تحفةةةةة ^_^ ^_^
اول مرة اسمع عن الاكتوارى و شكلة حلو اوى
بس حضرتك متأكد ان دة زى تجارة انجلش من ناحية الوظايف و كل حاجة :(
يعنى مطلوب ولا زية زى تجارة عربى :( :(
M..Elawady
15-08-2013, 04:50 PM
طيب مفيش لجامعة المنصورة
vampire1188
23-08-2013, 02:58 PM
حضرتك مجهود اكثر من تحفةةةةة
اول مرة اسمع عن الاكتوارى و شكلة حلو اوى
بس حضرتك متأكد ان دة زى تجارة انجلش من ناحية الوظايف و كل حاجة
يعنى مطلوب ولا زية زى تجارة عربى

ميت مرة قولت تجارة انجليش مش هيا البوابة السحرية اللى انت فاكر انك هاتتخرج منها هاتلاقي الدنيا وردي والشركات هاتتلهف عليك

فيه حاجة اسمها تنمية قدراتك مع نفسك .. مش الكلية اللى هاتعملك كل حاجة .. ولو اعتمدت ع الكلية بس ولاااااااا هاتوصل لحاجة
Omniakamel
07-09-2013, 11:37 AM
السلام عليكم و رحمة الله و بركاته
دى اول مشاركه ليا فى الموقع ده
تحيه لحضرتك طبعا ع المعلومات و المجهود الاكثر من رائع ده :)
-------------------------
المجموعة المميزة : بيبقالها تنسيق داخلى زيها زى تجارة انجليش بالظبط
مجموعة (أ) : حرف الألف كله
يعنى اسمك احمد – اسماء – امجد – ايمن .. الخ تبقى تبع المجموعة دى)
مجموعة (ب) : من حرف الـ ب : حرف الـ
مجموعة (ج) من حرف الـ
مجموعة (د) : من محمودات : حرف الـ ى
"يعنى اسمك محمود – ياسر – مصطفى – مروة – هاجر ... الخ تبقى تبع المجموعة دى"

كل مجموعة من اللى فوق دول بيبقالهم جدول محاضرات مستقل ودكاترة مستقلين وامتحان مستقل
ودا معناه ان حضرتك ملزم بانك تحضر محاضراتك تبع مجموعتك مش تبع مجموعة تانية
-------------------
انا جبت 365 ( 89%) ادبى وجاتلى كلية اثار قنا ..على امل انى احول لاثار القاهره...بس طبعا مش عن اقتناع
لكن غيرت راى فى تقليل الاغتراب و كتبت تجارة القاهره .. و مش عن اقتناع برضو ...
و لسه اهو النتيجة ما ظهرتش لغايت دلوقتى.. و تقريبا كده فاتنى التقديم فى تجاره انجلش ..
بس مش مهم تجاره عربى بالنسبالى احسن
-----------------
سؤال بقى ..
.
.
التقديم فى المجموعه المميزه ديه بيبقى و قت لما بقدم ورقى فى الكليه
و لا لما الدراسه تبدا ( دا لو فى دراسه اصلا !! )
و لا خلاص قفلت
و هى بتقبل من كام فى الادبى ؟
ايه النظام ....
legend_hossam
08-09-2013, 03:31 PM
[quote=omniakamel;5481183
-----------------
سؤال بقى ..
.
.
التقديم فى المجموعه المميزه ديه بيبقى و قت لما بقدم ورقى فى الكليه
و لا لما الدراسه تبدا ( دا لو فى دراسه اصلا !! )
و لا خلاص قفلت
و هى بتقبل من كام فى الادبى ؟
ايه النظام ....[/quote]

المجموعة المميزة التقديم بتعها بيبقى بعد ما الدراسة تبدأ بتروح شئون الطلبة و تاخدى استمارة تقديم ليها وهما مش بيخدوا من درجة محددة ممكن نقول انهم بيدوا استمارات لكل اللى فوق 85 مثلا و بيقبلوا بقى اعلى ناس على حسب العدد اللى عاوزينه .
Mim0Pr0
13-09-2013, 12:50 AM
انت برنس و الله انا لقيت الموضوع ده بالصدفة و سجلت هنا عشان ارد عليك و احييك و الله شغل عاااااااااالى جدا شغل فنادق يعنى و استفدت انا داخل ان شاء الله تجارة انجلش السنة دي اتقبلت خلاص بس فى فرع الشيخ زايد انا عارف ان الموضوع ده قديم و من 2011 بس لو تعرف حاجة عن فرع الشيخ زايد قولى و لو تعرف ممكن احول تانى للمبنى الى فى الجامعه و لالا لان فى ناس قالولى مينفعش و مرة تانية شكرا على المجهود الجامد ده
بسنت نبيل
19-07-2014, 08:21 AM
بعد اذنك كنت عاوزة اسال عن تنسيق تجارة انجليزى السنة ادى فى جامعة القاهرة و عين شمس و كنت عاوزة اسال اذا كنت تعرف انهى احسن تجارة فى جامعة القاهرة و لا عين شمس و اذا كان فيه فيه قسم خاص لكلية تجارة انجليزى بعد اذنك ممكن الرد السريع لان التنسيق هيبدا يوم الاحد.
المجموع 88.5% و 44 من 50 فى الانجليزى نظام حديث
mido.uwk07
19-07-2014, 01:54 PM
هو ايه الاحسن عربى ولا انجلش من حيث فرص الشغل ؟؟؟ اصل انا سمعت مقوله كده"الفاشل فى عربى = المتميز فى انجلش و انا مش فاهمها الصراحه " و عايز اعرف ايه هو cfa , cma
vampire1188
20-07-2014, 12:00 AM
هو ايه الاحسن عربى ولا انجلش من حيث فرص الشغل ؟؟؟ اصل انا سمعت مقوله كده"الفاشل فى عربى = المتميز فى انجلش و انا مش فاهمها الصراحه

مابقتش فارقة كتير .. اهم حاجة تقديرك وكورساتك .. بمعنى اصح اشتغل على نفسك كتير (بجانب دراسة الكلية طبعا)

و عايز اعرف ايه هو cfa , cma

دي كلها شهادات مهنية .. حاجات كدا مش هاتفيدك نهائي لو عرفتها دلوقتى وحتى لو قولتلك عليها مش هاتستوعبها الاستيعاب الكامل
vampire1188
20-07-2014, 12:02 AM
بعد اذنك كنت عاوزة اسال عن تنسيق تجارة انجليزى السنة ادى فى جامعة القاهرة و عين شمس و كنت عاوزة اسال اذا كنت تعرف انهى احسن تجارة فى جامعة القاهرة و لا عين شمس و اذا كان فيه فيه قسم خاص لكلية تجارة انجليزى بعد اذنك ممكن الرد السريع لان التنسيق هيبدا يوم الاحد.
المجموع 88.5% و 44 من 50 فى الانجليزى نظام حديث

مش فارقة كتير اذا كان القاهرة او عين شمس .. على حسب بقى اقرب حاجة من سكنك ايه

بالنسبة لعربي وانجليش اكيد فيه الاتنين .. واضح انك ماقريتيش الموضوع كويس .. اقريه ولو فيه سؤال مش واضح ابقى اتفضلي اسألي
mido.uwk07
20-07-2014, 11:42 AM
طب معلش هى الكورسات دى زى الدروس أيام الثانوى علشان أفهم و كده ولا دى حاجه تانيه باخد عليها شهادات ؟؟؟
و لو هى زى الدروس بتاعة الثانوى ينفع اعتمد على نفسى و ماخدهاش ؟؟؟ و حاجه أخيره معلش بتائل عليك تعرف حاجه عن تجاره اسكندرية ؟
vampire1188
21-07-2014, 11:52 PM
طب معلش هى الكورسات دى زى الدروس أيام الثانوى علشان أفهم و كده ولا دى حاجه تانيه باخد عليها شهادات ؟؟؟

انسي ثانوي دا خااااااااااالص .. مرحلة وعدت من حياتك ماتفكرش فيها تاني

انت اساسا ماتعرفش الكلية فيها ايه وموادها ايه ونظامها ايه يبقى كورسات ايه اللى بتسأل عليها ؟!!

الأولي انك تعرف الكلية فيها ايه وبعد كدا ابتدي اعرف يعنى ايه محاسبة وبناءا عليه تعرف اسماء الكورسات المتعلقة بيها

وخد بالك الكورسات دي مش قبل سنة رابعة عشان تفكر فيها .. و80 في الميه من الناس اساسا بيدرسوها بعد التخرج بتلات واربع وخمس سنين من تخرجهم !!

ماتتعبش نفسك فيها دلوقتى وركز في الكلية اللي هاتخشها باذن الله
mido.uwk07
22-07-2014, 11:19 AM
انسي ثانوي دا خااااااااااالص .. مرحلة وعدت من حياتك ماتفكرش فيها تاني

انت اساسا ماتعرفش الكلية فيها ايه وموادها ايه ونظامها ايه يبقى كورسات ايه اللى بتسأل عليها ؟!!

الأولي انك تعرف الكلية فيها ايه وبعد كدا ابتدي اعرف يعنى ايه محاسبة وبناءا عليه تعرف اسماء الكورسات المتعلقة بيها

وخد بالك الكورسات دي مش قبل سنة رابعة عشان تفكر فيها .. و80 في الميه من الناس اساسا بيدرسوها بعد التخرج بتلات واربع وخمس سنين من تخرجهم !!

ماتتعبش نفسك فيها دلوقتى وركز في الكلية اللي هاتخشها باذن الله

انا بسأل والله علشان مش فاهم
tito mohammed
14-08-2014, 03:08 PM
شكرا اوى على مجهودك الاول
بص انا زى ناس كتير كان هدفى حاجه غير تجارة بس كنت ناسى انى فى مصر فا الحمدلله اكيد
ما علينا انا جبت 87% ادبى
و كنت فى اداب حلوان و حولت تجارة و مستنى نتيجة التحويل
و هبقى تجارة عربى مش هقولك انى حببها
بس لازم احبها عشان نفسى ابقى حاجه
فا انا كنت ناوى اخد كورس انجلش من دلوقتى كده عشان مش عاوز اخلص جامعة و اكون لسه هدرس تانى عاوز اخلص فى الاربع سنين دول كذا حاجه
, فا ايه الكورسات اللى كويسة اخدها بقى ؟و اعمل ايه بظبط عشان ابقى الناس محتاجنى فى مجال العمل مش انا اللى محتاجهم
Josef Mohamed
24-07-2015, 04:28 PM
انا طالب ثانوي عام نظام قديم مجموعي 50%

يا تري فيه اي حاجة اقدر اعملها تخليني ادخل كلية تجارة

معادلة او حاجة تفيدني ف التقديم

ارجو الرد سريعا وشكرا لاهتمام السادة ف المنتدي
فوزى عبد الشافى
23-09-2015, 01:23 PM
الشكر والتقدير على المجهود المبذول
محاسب قانونى فوزى عبد الشافى

Thanks and appreciation for the effort expended
FAWZY A.SHAFY A.AZIZ
Charterd Accountant – Tax Expert
ShadyEhab
10-11-2015, 05:17 PM
موضوع رائع والله