مش معايا غير دبلتين تتجوزيني ؟ الحملة القومية لألغاء الشبكة [الأرشيف]

مشاهدة النسخة كاملة : مش معايا غير دبلتين تتجوزيني ؟ الحملة القومية لألغاء الشبكة

Sofia El-behairy

16-08-2011, 03:20 AM

http://www9.0zz0.com/2011/08/16/00/109538532.jpg (http://www.0zz0.com)

http://www9.0zz0.com/2011/08/16/00/547174228.jpg (http://www.0zz0.com)

"الجواز مش شبكة.. والشبكة مش بس دبلتين.. لكن الجواز مسؤلية كبيرة يقتسمها الزوجين.. مش هنقول إن مفيش تكاليف مادية كبيرة.. وإنها تسببت في زيادة نسبة العنوسة.. لكن مش هأقول غير مش معايا غير دبلتين: تتجوزيني؟"

تلك المقدمة تمثل خلاصة فكرة "جروب"، "مش معايا غير دبلتين تتجوزينى.. الحملة القومية لإلغاء الشبكة" الذى أنشأه مجموعة من الشباب على موقع التواصل الاجتماعى "فيسبوك" لإلغاء "الشبكة" وذلك بهدف تقليل تكاليف الزواج.

نظرا للارتفاع الشديد فى اسعار الذهب والانخفاض الشديد لقيمة الجنية وغلاء الاسعار وتشدد الاهالى فى مطالبهم قرر مجموعة من الشباب والشابات أخذ هذه المبادرة على عاتقهم وتبنى فكرة الغاء الشبكة او جعلها قيمة رمزية .

مش بندعوا لإن ميكنش فيه أي حاحجة فى الشبكة ..

كفاية دبلتين و توينز و خاتم ..
أو دبلتين و خاتم ..
أو دبلتين و محبس ..

ده جروب على الفيس بوك و حمله كبيره جدا

عايزه اراء شباب و البنات فيها و كمان اراء المدرسيين بما ان ليهم ولاد

يعنى هل لو انت شاب ترضى لاختك تتجوز منغير شبكه او بحاجه بسيطه ؟؟

هل لو انت اب ترضى لبنتك تتجوز منغير شبكه او بحاجه بسيطه ؟؟

انا عن نفسي حبدا و اكون اول من تشارك برايها

اولا انا شايفه ان شبكه ديه هديه من عريس للعروسه و اكيد محدش بيختار هديته تكون كام جرام او تكون سعرها كام

ثانيا مش معنى ان عريس جاب شبكه رمزيه شويه يبقى مش عارف قيمه العروسه ده يبقى على حسب الظروف و هديه مش بتمنها يكفى انه جاب هديه

ثالثا بقى حتى لو هو مش معاه فلوس يجيب شبكه قبل الجواز مش شرط يعنى ممكن لما يحس انه بقى معه فلوس يجيب بعد جواز

رابعا لو انتين بيبحبوا بعض بجد لازم يقدروا بعض و انا متاكده لو بنت بتحب حتنازل يعنى مش معقول مش حتمشى الجوازه عشان شويه دهب بعد الحب ده كله

و اكيد برده لو شاب بيبحبها بجد و معه فلوس مش حيستخسر فيها بالعكس ده بيكون عايز يجيب لها احسن هديه

يعنى من الاخر الجوازه مش حتقف عشان شبكه لازم تكون ب 20 الف

و لازم الاهل يدركوا ده ...عشان نتيجه لعدم زواج بتبقى الضرر للطرفين البنت و الشاب

قال رسول الله صلى الله عليه وسلم :: "إذا أتاكم من ترضون خلقه ودينه فزوجوه إلا تفعلوا تكن فتنة في الأرض وفساد عريض "

ده كان راى ...اتمنى اسمع راى الكل بكل الاعمار و كمان المدرسيين الكبار يشاركوا و بنات وشباب

عايزين مناقشه بجد و نقاش هادف و حلول للمشكله الشبكه

و يكون الحل يرضى كل الاطراف

Sofia El-behairy

16-08-2011, 03:35 AM

ده تعليق واحد على حل مشكله شقة

Sameh Mesrega
بالنسبه لموضوع الشقق انا عندى اقتراح كدا وياااااااااارب يفيد
هي فكره مشروع اسكان شفته تم قدامى وفكره جامده جدا

الفكره هيا ان مجموعه من اللى محتاجين سكن بيتجمعوا مع بعض ولنفرض مثلا 60 شاب
ودا مثال بسيط جدا
دول محتاجين مثلا ستين شقه
يعني 15 دور وكل دور فيه 4 شقق

اللى هيتم انهم هيعملوا اتفاق بينهم ويعملوا زي لجنه تتولى الموضوع

اللجنه دي هتأجر أرض مباني من أراضي الدوله ودا موضوع سهل جدا والايجار بيبقي بسيط جدا

تانى حاجه بتبدأ الرسومات الهندسيه والكلام دا وتكلفتها هتبقي ولا حاجه لما تتوزع على الستين شاب

تالت حاجه التنفيذ
مثلا كل مرحله بتحتاج مبلغ مثلا 500 الف
كل شاب هيدفع حوالى عشر الأف

البرج كله بيتم فى حوالى اربع خمس مراحل

اساسات وعمدان
طوب
مرافق
تشطيبات

يعني لو اربع مراحل يبقي كل شاب هيدفع 40 الف جنيه
خليهم خمسين الف كمان مش مشكله
كدا الشقق بقت جاهزه

اخر حاجه بقا بتتم
ان بيتعمل الخمستاشر دور دول فوق الور الأول والارضي

يعني الدور الأول والأرضي مش تبع حد فى الستين شاب دول

الدور الأول بيبقي عباره عن محلات
المحلات دي فى نهايه البناء بتتباع
بتوصل تمنها كلها يمكن للمليون
او هنقول نص مليون
النص مليون لو اتوزع على كل شاب
هتلاقي كل واحد رجعله 10 الف جنيه
ممكن يفرش بيهم شقته فرش بسيط جدا بس اهو اسمه فرش الشقه

الدور الأول بقا بيتأجر للشركات التجاريه وايجاره بيروح للخدمات العامه للبرج
زي ايجار الارض نفسها وزي مرتبات الفراشين واى خدات اصلاحيه فى البرج او الاسانسيرات وهكذا

يعني كدا كل شاب خد شقه مفروشه جاهزه بما يعادل 50 الف جنيه
ومساحه الشقه اللى تتكلف المبلغ دا حوالى 110 متر

والله انا مش بألف والمشروع دا انا شفته تم بجد
بل لسا كمان شايف واحد بايع شقته بمبلغ 250 الف جنيه لأن البرج كان فى منطقه راقيه

ياريت الأدمن يهتم
وياريت الشباب لو يقدر يجمع نفسه مع بعضه ويعملوا الموضوع دا
مشروع يعني ولا فى الأحلام ومكاسبه كلها للشباب نفسهم

بصوا كل الكلام دا مش تأليف والله
دا مشروع حقيقي انا شفته بعيني واتنفذ وخلص خااااااالص من حوالى تلات او اربع سنين
والشقه اللى شفتها بعيني ودخلتها كانت 110 متر واتكلفت بالظبط 45 الف جنيه على الطوب

usernamo

16-08-2011, 03:49 AM

Sofia El-behairy

16-08-2011, 03:54 AM

ممكن اقولك حاجة يا صوفيا ..؟

مش ده تفكير صوفيا اللى كانت اهم حاجة عندها الانجليزى و عشقها للترجمة و اللغات

مش دى المواضيع اللى كانت تشغل بالك .. ياريت .. تفكرى فى العلم دلوقتى لان عقلك كبير فى العلم و هينفعك كتير فى المجال اللغوى .. ربنا يوفقك ^^

ههههه و ايه علاقه ده بده

اولا يا امجد لو تلاحظ انى اخدت الموضوع كوبي و بست من موقع اهرام و موقع يوم سابع كمان اتكلم فيه و عمرو اديب انهارده اتكلم عن جروب ده

يعنى مش انا الى عملت الجروب و لا انا الى عامله الموضوع اصلا ده كوبي و بست و قلت راى و بس

هو مش ده قسم نقاش الهادف و لا ايه ؟؟

على عموم انت اكتر واحد عارف انى لسه مهتميه بالعلم لدرجه انى لسه داخله اولى ثانوى و بدات اخد اذاكر منهج انجلش بتاع اولى ثانوى و كمان 2 ثانوى اظنى داخله اولى و ده طبعا لحبي فى الانجلش

يعنى صوفيا الحمد الله لسه زى ما هى

عاشق البلانكو الابيض

16-08-2011, 05:55 PM

كلها حملات وهمية فى الاخر ولا شئ بيحصل ويبقى الوضع على ما هو عليه

إليزابيث

17-08-2011, 07:36 AM

كلها حملات وهمية فى الاخر ولا شئ بيحصل ويبقى الوضع على ما هو عليه

عندك حق و الله :blush::blush:
زي حملتك بتاعة يومها اللي انت قولت فيها ازاي تتجوز بجنيه صح و لا غلط؟؟؟؟؟؟؟؟؟؟؟؟؟؟؟:excl::excl:

عبد الله الرفاعي

17-08-2011, 09:35 AM

كفاية دبلتين و توينز و خاتم ..
أو دبلتين و خاتم ..
أو دبلتين و محبس
إحنا إتفقنا على دبلتين وبس إيه الحاجات التانية دى (توينز - محبس ) لو ينفع محبس الميه أنا مستعد والموضوع والله مش محتاج حملات وفيس بوك وتويتر وعمر مريب الموضوع كله يحل فى قول النبى (ص) : " أقلهن مهرا أكثرهن بركة "

نقاء الروح

17-08-2011, 02:09 PM

مادام فيه بنت عمها جالها وبنت عمتها ماجالهاش
مافيش حاجة هتنفع معاهم ..
وزي ما قال مستر عبدالله الحل فقول الرسول عليه الصلاة والسلام

BaNZeR

18-08-2011, 12:27 AM

ببساطة ... الحملة ولا حيكون ليها اي تأثير

اولاً لإنها مش الاولى
ثانياً لانها شاملة

مش الاولى لإننا باقيلنا سنين بنتكلم في نفس النقطة
بس الكلام ده مش بيوصل للاب للى مصر يتقدم لبنته شبكة مش اقل من (***)

وشاملة لإنه مينفعش نقارن بين ناس تقدر وناس متقدرش
ايه المشكلة لو معايا وممكن اجيب الاكتر من الدبلتين

المفروض الحملة متفرضش او متحددش
لكن الحملة تغير
تغير طريقة تفكير تغير طريقة تعامل تغير من جوه الشخص نفسه

aleman

19-08-2011, 01:04 PM

والله ياجماعة فيه اهالى متهاونين يا صوفيا جدا
وده بقى بيخلى العريس او بمعنى اصح اهله يشكوا فى العروسة
وليه اهلها بيسهلوا كده
اكيد فيها حاجة
مشكورة للموضوع

ostazmath4m

19-08-2011, 03:13 PM

اولا:الجروب فعلا مشهور جدا وانتشر بطريقه كبيرة ع الفيس بوك
مشكور جدا لنقله الينا ف المنتدي يا صوفيا لاني اساسا مش متابعه ع الفيس
اهي فرصه اتابعه هنا في المنتدي فجزاك الله خيرا
ثانيا:احنا محتاجين حملة تغيير تفكير او حملة تطهير التفكير او حملة وداعا للتفكير البدائي الساذج
والله لو فيه حملة زي المسميات دي واتطبقت فعلا وكلنا طبقناها في كل حاااجه احنا نفسنا هنظم
حيتنا صح سواء تمن شبكه تكاليف افراح ومش كده وبس اي تفكير بقي مش شرط الجواز بس
طبعا اتمني ان حملة زي بتاعت الدبلتين دي تنجح وتتحقق فعلا خصوصا انها متزامنه مع سعيي لاحضار
شبكه في هذه الايام اه بالمناسبه انا عندي مناسبه هبقي اقولكم عليها في قسم الاهداءات عشان
تباركولي ان شاء الله واهوو بالمرة اقولكم عملت ايه واتصرفت ازاي ؟؟؟؟؟
وزي ماقلتي يا صوفيا وده رأي الاغلبية او الجميع ان الجواز مش شبكه وان الشبكة مش دبلتين
والله يا جماعه تقريبا انا عمري ما شفت اتنين متجوزين بغض النظر عن الشبكه اللي جابها العريس كتيرة قليله غالية رخيصه عمري ماشفت اتنين متجوزين الا والاقي دايما الراجل بيغير الدهب لمراته ويجيبلها احدث او يزود لها دهبها من غير ماهي تتطلب وده تقريبا اللي بيحصل دايما مع الزوج لما ربنا يكرمه بعد
الجواز بيجيب دايما الحاجات اللي مقدرش يجيبها لمراته اثناء الشبكه صح ولا انا غلطان مش ده اللي
بيحصل ؟؟؟؟؟ اذا كان ده اللي بيحصل ليها بقي بنعسرها ع الشباب وقت الزواج والله المستعان
ودي النتيجه نسبه العنوسة في ازدياااااااااد خلي البنات تعنس والواحد بقي بيسمع حاجات غريبة
اليومين دول كان نفسي اجمع موضوع عن الشباب والشابات اللي بيتأخروا في الزواج ايه اللي بيحصل
معاهم بعد كده بس وقتي ضيق جدا فالموضوع شائك جدا ومتشعب وربنا يوفق الجميع الي الخير
اللهم امين ،، تقبلي مروري يا صوفيا وزي ماقال حبيبي استاذ عبدالله احنا قلنا دبلتين وبس ايه لازمتها
بقي توينز ومحبس شويه شويه نقول وكمان غويشتين وخلاص خلاص ماهي دي الشبكه هو احنا كده
غيرنا حاجه ههههههههههههه اقول ايه بس الشعب المصري بقي بيموت في الفصال،،
وتحياتي للجميع لكم من قلبي ارق التحيات

Dr/Reem2011

19-08-2011, 03:33 PM

أكيد اللي قوم الحمله دي ولد متعقد جامد قوي من أهل العروسه
أو بنت مخنوقه قوي من أهلها

عاشق البلانكو الابيض

19-08-2011, 05:29 PM

عندك حق و الله :blush::blush:
زي حملتك بتاعة يومها اللي انت قولت فيها ازاي تتجوز بجنيه صح و لا غلط؟؟؟؟؟؟؟؟؟؟؟؟؟؟؟:excl::excl:

اه صح انتى لسه فاكرة المهم حد سمع عنها حااجة من يومها :d

lolotamerlovers

21-08-2011, 02:06 AM

ومين هيسمع ؟؟؟

s&isoma

22-08-2011, 09:44 PM

هي صح فكرة حلوة بس فين اللي هيرضى بالكلام ده ممكن البنت ماترضاش وتقول( دبلتين بس فين الشبكة زيي زي اي واحدة تاني وببعدين زي ما اشتراني بالرخيص هيبيعني بالرخيص ولا يهموا بعدين) او الأهل مش هيرضوا بكدة اصلا
والله هي فكرة حلوة بس فيييييييييين اللي يوافق ويطبق

‏Dr.KaR!MaN

23-08-2011, 03:06 PM

طيب ياجماعه لو هو من الناحيه الماديه مايقدرش يجيب غير دبلتين هايفتح بيت ويصرف عليه إزااااي؟!

هويدااحمد76

25-08-2011, 11:46 PM

أحلام أفلاطونية غير قابلة للتنفيذ فى عالم الواقع
ليه التشاؤم يمكن ثورة الشباب اللى على الفيس بوك اللى غيرت مصر بعد ثلاثين سنة من حمك مبارك
تقدر تغير آراء الآباء والامهات فى الشبكة والمهر والفرش وخلافه

هويدااحمد76

25-08-2011, 11:47 PM

[] ليه التشاؤم يمكن ثورة الشباب اللى على الفيس بوك اللى غيرت مصر بعد ثلاثين سنة من حكم مبارك
تقدر تغير آراء الآباء والامهات فى الشبكة والمهر والفرش وخلافه]

samar saad

26-08-2011, 12:05 AM

والله بصي ياصوفيا دى حاجه بتبقا بين الطرفين او الاهل في اهل بيبقا عندهم قناعه وفى عايزين يطمنوا على بنتهم وبيحسوا ان ده تقدير كبير لبنتهم
وفى بنات مش بتفرق معاها وفى بتفرق بشكل كبير وفى بتبقا حابة تتباها قدام اصحابها فدى حاجه مش نقدر نعممها على حد
وفى بنات بعد الجواز لما بتحس ان ظروف جوزها صعبه مثلا اوقات كتير بتساعده وبتبيع شبكتها فمن هنا نقدر نقول فعلا دى هدية منه ليها
وفالاخر مانقدرش نعمم ونطبق الحاجه دى على كل الناس
موضوع جميل ياصوفيا
تقبلى مرورى
تحياتى

MOSTAFA093

26-08-2011, 12:13 AM

طيب ياجماعه لو هو من الناحيه الماديه مايقدرش يجيب غير دبلتين هايفتح بيت ويصرف عليه إزااااي؟!

يا باشا القصد فى الموضوع إنه مش معاه يجيب ب 50 أف جنيه شبكه و 50 ألف شقة غير الفرح والتجهيزات والعفش
يعنى بدل فلوس الشبكه يجيب بيهم شقة وتجهيز أفضل من الشبكة
ودى بصراحة فكرة كويسة جداً وياريت تطبق فى الواقع
هتحل مشاكل كتير
يعنى الدهب لازم يتجوزوا بيه ومن غيره مينفعش ومفيش جواز
!!!!!!!!!!

samar saad

26-08-2011, 12:23 AM

يا باشا القصد فى الموضوع إنه مش معاه يجيب ب 50 أف جنيه شبكه و 50 ألف شقة غير الفرح والتجهيزات والعفش

يعنى بدل فلوس الشبكه يجيب بيهم شقة وتجهيز أفضل من الشبكة
ودى بصراحة فكرة كويسة جداً وياريت تطبق فى الواقع
هتحل مشاكل كتير
يعنى الدهب لازم يتجوزوا بيه ومن غيره مينفعش ومفيش جواز
!!!!!!!!!!

والله كلامك كويس جدا بس انا كمان بشوف ان اللى مالوش لازمة خالص الافراح اللى تكاليفها عالية دى
دى اللى المفروض تتلغى يمكن الشبكة يقدروا يستفيدوا بيها فيوم من الايام لكن الفرح ليلة وبتنتهى ومش نستفيد منها اى حاجه

MOSTAFA093

26-08-2011, 12:34 AM

والله كلامك كويس جدا بس انا كمان بشوف ان اللى مالوش لازمة خالص الافراح اللى تكاليفها عالية دى
دى اللى المفروض تتلغى يمكن الشبكة يقدروا يستفيدوا بيها فيوم من الايام لكن الفرح ليلة وبتنتهى ومش نستفيد منها اى حاجه

عندك حق يا سمر برضو فى موضوع الفرح ده
يعنى الواحد مش يحجز قاعة ب 10 ألاف مثلاً غير التكليفات وغيرة
يعنى الفرح بقاعة بألفين وشوية مصاريف وآخره 3 أو 4 ألاف الواحد يفرح بيهم
بس مش 50 ألف شبكة على الفاضى ، وفى الآخر بيتباعوا :d

شهيره طارق

26-08-2011, 02:46 AM

موضوع رائع

‏Dr.KaR!MaN

26-08-2011, 09:48 AM

منار على

26-08-2011, 10:01 AM

ههههههههههههه المشكله مش فى الشبكه المشكله ليقول فى الاول مش معايا غير دبلتين تتجوزينى وبعد كدا يقولك معنديش شقه ومرتبى مفيش تعالى نقعد فى الشارع او استنينى 70 سنه لكن لو الموضوع اتوقف على الشبكه ايه المشكله نلغيها مع انى ضد الغائها وضد المغالاه فيها يعنى ايه المشكله تبقى شبكه بسيطه حتى الدهب كل يوم فى الطالع ويعتبروا انهم بيحوشوا لبعدين لان فى الاول والاخر الدهب دا هديه من العريس لان اهل العريس احيانا بيفهموا التسهيلات اللى بيقدمها اهل العروسه غلط ابسط حاجه يقولوا دول ماصدقوا يخلصوا منها او كلام تانى كتير وياخدوا قلم بقى فى ابنهم اللى سالف تمن الدبلتين

sygma-zita

26-08-2011, 11:28 AM

اسمعوووونى ...... أنا مع اللى بيقولوا ان الفرح مالوش لازمة ...... لكن الدهب قيمته مع الأيام بتعلى مش بتقل ..... أنا عمرى ما سمعت عن عريس ماجابش شبكة أو الأهل اتساهلوا معاه و حافظ على عروسته أبدا !!!!!!!!!! ........ و بعدين اللى مش معاه يجيب شبكة إزاى هايصرف على مراته ؟؟؟؟؟؟ و بعدين الشبكة دى هى قيمة العروسة عند عريسها ..... أنا طبعا باتكلم عن جواز الصالونات .....أما بقى لو فى قصة حب فعلاَ بين الطرفين _ أنا باقول قصة حب حقيقية _ يبقى نخلى الموضوع ماشى و يجيبلها كل حاجة بعدين طالما انه أهل للثقة و هايحافظ على البنت ......... عذراَ للإطالة و تقبلوا مرورى ..... و لو عندى أفكار غلط ياريت تصححوهالى ....

سعادتي في عبادتي

26-08-2011, 11:37 AM

‏Dr.KaR!MaN

26-08-2011, 01:51 PM

ما هي ممكن يجبلها شبكة ب (...........) و يصحى الصبح يتعذر في فلوس يقولها هاتي الشبكة و يا إما تعالي زوريني بعيش و حلاوة ، بس تفتكروا هتديلو الشبكة و لا تفضل أنها تزورو بعيش و حلاوة؟؟؟؟؟؟؟؟

والله هو لو كان كويس معاها هاتديهالوا أما لوكان وحش معاها هاتروح تزورو بعيش بس من غير حلاوه ..‏‎
‎

أسطورة الأحزان

28-08-2011, 09:10 PM

الموضوع بالفعل اتحقق واغلب الناس دلوقت بتشبك بدبلتين حتى من غير محبس
شكرا ياصوفى عى الموضوع

sygma-zita

29-08-2011, 04:25 PM

على فكرة ..... أنا ماسمعتش عن حد بيتعذر من يوم و ليلة

mr-ahmed2011

31-08-2011, 04:15 AM

راى باختصار ان طالما الشاب اتقدم للبنت فهذا فقط اكبر دلييييييييييل على انه يقدرها ويحبها ولذلك ذهب بيتها ليطلبها من اهلها وانا اقسم لكم ان لو اختى جائها شاب محترم يعمل ويجتهد ويفكر تفكير سليم ويخطط لمستقبله ويعرف الى اين سيذهب ومن اين اتى فسوف اهديه اختى زوجة له دون اى طلبات فعلا يكفى مجرد الدبلتين و بس

د.عبدالله محمود

01-09-2011, 11:54 AM

اسمعوووونى ...... أنا مع اللى بيقولوا ان الفرح مالوش لازمة ...... لكن الدهب قيمته مع الأيام بتعلى مش بتقل ..... أنا عمرى ما سمعت عن عريس ماجابش شبكة أو الأهل اتساهلوا معاه و حافظ على عروسته أبدا !!!!!!!!!! ....
أخبرنا النبي صلى الله عليه وسلم أن أقلهن مهوراً أكثرهن بركة
أما مسألة إنه يحافظ عليها أو ميحافظشى دى بترجع لدينه وأخلاقه
وللزوجة برضه
وبعدين هوه ممكن يجيبلها شبكة قيمة جداً وتطلع شبكته سوده .. مش كده ولا إيه
" إذا جاءكم من ترضون دينه فزوجوه "

هبه محمود25

03-09-2011, 03:28 AM

تسلم ايدك عالموضوع انتى عندك حق طبعا بس لو احنا شوفنا الاحصائيه ف مصر الكلام ده بيحصل امتى هتلاقيه معظمه ف جواز الصالونات وده بيرجع باه لمدى التفاهم اللى بين الطرفين لو البنت والولد عارفين بعض ومتفاهمين وبيحبوا بعض يبقى خلاص انا عن نفسى البنت العقله اللى بتبص لمستقبلها اهم متبصش للشبكه انا عن نفسى مبحبش الدهب وشايفه عن نفسى ان البنت متعترضش حتى لو مكنش فيه شبكه وبرده ف الاخر هنقول السبب لو هى بتحبه وهو بيموت فيها يبقى خلاص كفايه عليها ان هو شريها بس انا عندى سؤال ليه ديما جواز الصالونات بيبقى عامل زى البيعه كان الولد بيشترى قفص طماطم ليه كده بجد انا بصراحه مبعترفش بالراجل اللى يتقدم لبنت ويفضل يفاصل ع الشبكه ومرسى جدا ع الموضوع الجامد ده

نووونا

04-09-2011, 02:00 AM

علي فكره بيتهيالي موضوع الشبكه ام عشرين الف والكلام ده انتهي من زمان
ومعظم الاهالي دلوقتي وده بشوفه بعيني بناتهم بيتخطبوا بدبله ومحبس وخاتم
وانا من رايي ان الشبكه دي حاجه بتاعة العريس هو اللي يقدر قيمتها حسب ظروفه
اهم حاجه انه مايكونش بخيل معاها بعد كده

Analyzer.Mn3m55

05-09-2011, 12:21 AM

يا جمااااااعه والله الدهب الصينى تحفه هههههه انا اختى هتجيب شبكه منه و توفر فلوسها لجهاز الشقه احسن بجد :d

طالبة المعالى

05-09-2011, 12:58 AM

غلط غلط اللى يقول قيمة البنت بالذهب

تقدروا تقولولى فى واحد كان جايب شبكة بعشرين ودا طبعا بمساعدة بابا وكاتب على نفسو مؤخر 80 الف
والان سنة فوق الاربعين ولا يعمل يبقى فايدة المظاهر دى ايه؟؟؟

وغيروا كتير امثلة
وناس تانية بتجيب شبكة بسيطة ومؤخر بسيط وبيوفر فلوسة لتجهيز الشقة وبيبقوا أسعد ناس والحمد لله

لازم الاهل يعرفوا انهم بيشتروا راجل وبيبنوا حياة زوجية اساسها مودة ورحمة مش فلوس ومظاهر
شكرا صوفى

rokyracat

05-09-2011, 01:04 AM

انا عن نفسي اقسمت بالله انى حتى مش هطلب الدبلتين
عشان شوفت بهدلة اهلى وشيلانهم الهم لما خطبوا لاخواتى الصبيان

وعلى فكره الدنيا لسه بخير
اخويا جاب دهب قليل جدا و العروسه كان معاها خاتمين حططهم على دهبنا ومشي الحال
واخويا التانى جايب دبلتين ومحبس وخاتم
و والدي والله دايما يقول انا مش هطلب حاجه من عرسان بناتى ولو بنتى احتاجت حاجه انا اجيبهالها ....

انا امى رضت بوالدى وهو محلتهوش حاجه
وبعد كده ربنا كرمها ببابا وطلع إعاره وخدها معاه ودوقها الشهد
وع الحال ده دايما
لما يتزنق تبيعله دهبها ولما يكون معاه فلوس بيجبلها منه لنفسه
اسفه ع الاطاله ..

د.عبدالله محمود

05-09-2011, 08:47 AM

tmatem2

11-09-2011, 06:35 AM

موضوع رائع وفكره رائعه ع فيس
هي حمله انا معها جداا لاني حسيت باد ايه حمل الشباب في الجواز والشبكه انا ليا تلات اخوات ولاد وحسيت بهم التجهيز
فانا لما عرفت سعر الدهب قررت اني لما اجي اتخطب هوافق ع دبله صيني مش مهم حتي الدهب او اي حاجه المهم الشخص
الهبقا معه هو الهي يحافظ عليا ويجبلي كل حاجه بس المشكله في (الاهل)

Sofia El-behairy

12-09-2011, 02:42 PM

مدرس اللغة

13-09-2011, 06:50 PM

الموضوع جميل والمفروض حتى لو من غير دبل نوافق طالما العريس محترم وذو أخلاق عالية ومتدين وبيخاف الله
وميكونش هلفوت:d ويكون بيعرف ربنا ولو اختلف مع بنتي أو اختي يطلقها بس ميهنهاش وميقطعش مصرينها:rolleyes:
لو كان كدا هو ده اللي اجوزه بنتي او اختي ويكون جدع يعني راجل يعرف يتعامل مع كل الناس ويعرف يجيب القرش ويعرف ينفقه في الحلال ويكون متوفر عنده السكن المتواضع اللي هيستطيع توفيره :)
ويكون ابن ناس محترمين يعني عيلة محترمة
بس المشكلة كلها في العادات والأعراف وخاصة أننا في الصعيد مجتمع قبلي يعني العادات والتقاليد أحيانا بتغلب رأي الشرع فطبعا عندنا بنطلب من محدود الدخل من :)15الف إلى 20ألف دهب ومن اللي معاه فلوس:) (كان في الخليج متغرب :)-تاجر:)-صاحب أملاك وأراضي:)- في وظيفة مرموقة :)-معاه مشروع:))من20 ألف إلى مالي نهاية..

الاستاذ محمد الطنطاوى

17-09-2011, 11:12 PM

لو الشبكة جت على حد دباتين يبقى انا كدا الحمدلله معاى تمن الشبكة والشقة نص شطيبيعنى الحمد لله كدا تمام اوى قربنا ع الجواز

Analyzer.Mn3m55

17-09-2011, 11:49 PM

والله انا اختى خطوبتها بعد يومين و هى قصه حب و هنصبر عليه فى الشبكه و كده و الفرح بردو مش هنعمله يوفروا الفلوس دى ليهم احسن .. اصل المعازيم و القرايب هم بس اللى بيستفادوا من الفرح و فى الاخر محدش بيعجبه حاجة .. و ربنا يتمم بخير و كلكوا معزومين ان شاء الله
و ربنا يصلح حااال كل البنات يارب

Sofia El-behairy

17-09-2011, 11:57 PM

Analyzer.Mn3m55

18-09-2011, 12:01 AM

مبروووووووووووووووووووووووك ..ربنا يبارك ليهم يا رب

والله مبسوطه اوى

اول تجربه حيه

ما شاء الله

المهم السعاده

الله يبارك فيكى .. عندك حق المهم السعاده و على فكره مش هم بس اللى مش ه يعمله فرح انا بشووف ناس كتير كده يوفروا الفلوس احسن لحهاز شفتهم و حاجتهم احسن ما يستفااد بيها الغير .. اصلا بالعافيه على ما قرروا يعملوا الخطوبة يعنى يارب تكمل على خير :d
و كل البنااااااااااااات تفرح ياااااااااااارب .. بس انتوا تبطلوا طلبات هههههههههههه :d