في الموضوع ده ح نتكلم عن سنة ثالثة طب بشري

سنة جديدة خالص .. و مختلفة عن اللي فات

لأن بقالك سنتين بتدرس في أحوال البني الآدم الطبيعي .. و قليلا ما تطرقت للحديث عن بعض الأمراض المشهورة للغاية فيما تدرس

بس السنة دي غير

أنت السنة دي جاي تدرس الأمراض ... كيف يعتل الجسم ؟؟؟

و بتاخد فكرة و تحط رجليك على أولى طرق العلاج

في سنة ثالثة أول خطوة علشان تفهم الحيود عن الطبيعة

زي م اتكلمنا قبل كده و قلنا أن الهدف من السنين الثلاثة الأولى في الطب أنك تكون على دراية كافية بأساسيات العلوم الطبية اللي ح تدرسها في السنين الاكلينيكية

و المختلف في السنة دي .. أنك بتبدأ تخرج عن اطار الطبيعي

يعني السنة معظم موادها درسات مَرَضيّة

المواد اللي ح تدرسها السنة دي باذن الله هي

علم الأمراض Pathology

علم الكائنات الدقيقة Microbiology

علم الطفيليات Parasitology

علم الأدوية Pharmacology

علم الأمراض

Pathology

يعني ايه ؟؟؟

هو العلم اللي بيهتم بدراسة الأمراض .. من اسمه يعني .. بس المهم بيدرسها ازاي بقى ؟؟

بيدرس الأسباب Etiology اللي بتؤدي للاصابة بالمرض

و بعدين بيدرس ازاي الأسباب دي أدت الى حدوث المرض ( الآلية Mechanism ) .. توليد المرض Pathogenesis

و تأثير المرض على طبيعة العضو في تغير شكله ***** eye and Microscopic Picture of the diseased organs

ازاي المرض بيتطور Disease progression (Fate(

ايه المشاكل اللي ممكن تحصل أثناء تطور المرض .. المضاعفات Complications

و طبعا الكلام ده في كل الأمراض حسب أهمية المرض و أهمية النقاط اللي بيتم مناقشتها

يعني مثلا .. الدرن بتناقش فيه كل حاجة و مش بتسيب نقطة

انما في حاجات تانية مهم فيها المضاعفات مثلا .. أو غيرها و هكذا

علم الأمراض Pathology

المنهج ده بيتقسم الى قسمين كبار

1. علم الأمراض العام General Pathology و ده بتدرس فيه الأمراض اللي ممكن تصيب أي جزء في الجسم - بدون تخصيص - بالاضافة لبعض الأمثلة على أشهر الأعضاء اللي بتصاب بالأمراض دي و ح نبص عليهم بصة سريعة كده

الالتهاب Inflammation ... و دي استجابة حيوية للجسم نتيجة لاصابته بأي حاجة مؤذية Injurious agents

و بتدرس فيه أنواعه .. الحاد Acute و المزمن Chronic و مصيره Fate و مضاعفاته Complications ... الخ

الاصلاح Repair ... و دي العملية اللي بيقوم بيها أي نسيج حي لاستعادة مكوناته الطبيعية بعد الاصابة

و بتعرف أنها ممكن تنجح أو تفشل أو يترتب عليها مشاكل Complications of repair و ازاي الجسم ممكن يعوض نسيج بيفقده بشتى الطرق

اضطرابات الجهاز الدوري العامة Circulatory Disturbances .. و دي اضطرابات في سريان الدم بتؤثر على معظم الأعضاء في الجسم

و بتعرف فيها مفهوم التورم Edema و الجلطة Thrombosis و السدة Embolus و الاحتشاء - موت النسيج نتيجة نقص الامداد الدموي - Infarction و غيرها كتير من المصطلحات اللي ح تتعرف عليها بالتفصيل و تاخد لها أمثلة

الأمراض المعدية Infection ... و دي بتدرس بالتفصيل في Microbiology بس هنا بتاخد فكرة عن قواعد و أسس الأداء الميكروبي جوه الجسم

يعني ازاي الميكربات بتتحرك في الدم و تفرز السموم و غيرها .. و كمان بعض الأمثلة ليها زي الدرن Tuberculosis TB و الجذام Leprosy و البلهارسيا Bilharziasis و غيرهم

الأورام Tumors ... و ده نمو غير طبيعي و غير مُتحكم فيه بيعمل مشاكل كتير ح تدرسها بالتفصيل

و بتتعرف فيه على معنى الورم الحميد Benign و الخبيث Malignant و ايه المشاكل اللي بيسببوها و ايه أنواعهم و غيرها من الحاجات المهمة اللي ح تعتمد عليها بعد كده في باقي المنهج

2. علم الأمراض الخاص Special (Systemic) Pathology و ده بتدرس فيه ..

الأمراض المتعلقة بأجهزة الجسم يعني مثلا Gastrointestinal Pathology و في كل جهاز بيمسك عضو عضو و يناقش الأمراض اللي ممكن تصيبه و تؤثر على أدائه لوظيفته

و بيقسم معظم الأمراض دي على أساس ال General الى Inflammatory (infectious and non-infectious ) - Circulatory and tumors

و كده في كل الأجهزة CVS - CNS - Respiratory - Male Genital - Female Genital - Bone - Lymphatic ...... ETC

تم بحمد الله منهج الباثولوجيا

علم الأحياء الدقيقة و علم الطفيليات

Microbiology & Parasitology

يعني ايه ؟؟

الميكروبيولوجيا : ده العلم اللي بيدرس كافة أشكال الحياة للكائنات الميكروسكوبية .. بداية من البكتريا و مرورا بالفيروسات و الفطريات و الديدان و غيرها

و يتناول بالدراسة دورة حياتها و تصنيفاتها و طرق الاصابة بها و الأمراض التي تتسبب بها و طرق الوقاية منها .... الخ .. يعني من الآخر كل حاجة عن الكائنات الدقيقة

طيب ايه الفرق بينه و بين الطفيليات ؟؟

الحقيقة أن علم الطفيليات Parasitology جزء من علم الميكربيولوجي .. و لكنه جزء كبير و مهم و له خصوصية الى حد ما .. علشان كده فصلوه دراسيا عن الميكروبيولوجي الا أنه يظل جزءا منها في الكتب و المراجع العالمية

في المادتين دول أنت بتدرس بالتفصيل العدوى Infection و التي تم اجمال النظرة المرضية لها و تأثيرها المرضي على الأعضاء في علم الأمراض Pathology

بتدرس الأمراض من وجهة نظر اكلينيكية .. يعني بتشوف ايه في العيان (أعراض Symptoms و علامات Signs ) ..

و بيتم التركيز عليها و على التشخيص Diagnosis و الوقاية Prevention & Immunization أكتر من التركيز على الباثولوجي أو العلاج

و كنتيجة لاهتمام العلم ده بالوقاية Prevention & Immunization بيلحق بيه دراسة لعلم المناعة Immunology

علشان كده تلاقي القسم اسمه Microbiology & Immunology Department

علم الأحياء الدقيقة Microbiology

في العلم ده ح نتعرف على عدة أشكال من الحياة و يتم تقسيم كل منها الى مقدمة عامة للتعريف بالنوع Species ثم يأتي التخصيص و الدراسة الأكثر تفصيلا للأمراص التي تسببها الأجناس Genus المتعددة من هذة الكائنات الحية .. اللي ان شاء الله حنمر عليها سريعا دلوقتي

أولا .. علم البكتريا Bacteriology .. و دي الأصل و الأساس لهذا العلم و البكتريا هي السبب في العديد من الأمراض .. و تُعد من أكثر الكائنات في أنواعها و تعددها

و هذا العلم ينقسم الى .. General Bacteriology ..

و هو المسئول عن تعريفك بالبكتريا و مفهومها و اختلافها عن باقي الأحياء الدقيقة

و تدرس فيه أنواع البكتريا .. الكروية Cocci و الاسطوانية Bacilli و المتموجة Spiral و غيرها من ألنواع و التقسيمات .. كذلك الأيض البكتيري Bacterial metabolism و المضادت الميكروبية Anti Microbial ***** و الهندسة الوارثية البكتيرية Bacterial Genetics

و الشطر الآخر هو .. Systemic (Special) Bacteriology .. و ده بتدرس فيه كل بكتريا على حده ..

يعني بنمسك واحدة واحدة و بنفصص فيها .. من أول عوامل الشراسة Virulence Factors و الأمراض التي تسببها و كيفية تشخيصها - وده بيتم بطرق كتير بتدرس معظمها و ايه الطريقة المخصصة لكل بكتريا و غيرها من أساليب التشخيص - و العلاج - في كلمة و نص - ثم الوقاية منها

ثانيا .. علم الفيروسات Virology .. و ده بيعتبر من العلوم الحديثة نسبيا و برده بينقسم الى

علم الفيروسات العام General Virology اللي بتدرس فيه ..

مقدمة عن علم الفيروسات .. ماهيتها .. تركبيها .. أنواعها .. تقسيمها .. طرق الاصابة بيها .. خطوط عريضة للتشخيص و العلاج

علم الفيروسات الخاص Special Virology و ده بتدرس فيه ..

الفيروسات كلٌ على حدة .. طبقا للتقسيمة Classification اللي درستها في ال general

و في كل فيروس بتتعرف على نوعه .. و مكانه في التقسيمه .. الأمراض اللي بيسببها .. و طرق تشخيصه بالتفصيل .. و العلاج - كلمة و نص - .. و الوقاية Immunization

ثالثا .. علم الفطريات Mycology .. برده بيعتبر علم حديث نسبيا الا أنه مهم جدا لأن الفطريات رخمة جدا في علاجها بس ان شاء الله سهله في مذاكرتها

و كالعادة بينقسم لجزء عام General Mycology .. و بتدرس فيه تطور العلم ده و تصنيف الفطريات و أهميتها الطبية .. و ازاي بتعيش Metabolism و التكاثر الفطري Fungal Reproduction .. و كذلك خطوط عريضة للتشخيص و العلاج

ثم بتدخل على الجزء الخاص Special Mycology .. اللي بتدرس فيه أهم الفطريات اللي ممكن تعمل أمراض مشهورة ..

و بتدرسها بالتفصيل .. من الشكل و التصنيف .. و المرض .. و التشخيص .. و العلاج .. و غيرها .. بحيث تغطيها تغطية كاملة

رابعا و أخيرا .. علم الأحياء الدقيقة الإكلينيكي Clinical Microbiology .. و ده عبارة عن تجميعة على حسب الأمراض

بمعنى آخر .. ايه البكتريا و الفيروسات و الفطريات اللي ممكن تسبب المرض الفلاني ؟؟ .. ده السؤال اللي بتجوابه في الفصل ده

بكده يبقى خلصنا نظرة سريعة على نظام الشغل في الميكروبيولوجي