أولى طب... عايز تعرف عن المواد, الادوات ...خش هنا [الأرشيف]

DR.Neuro

29-07-2008, 11:05 PM

السلام عليكــم ورحمـة الله وبركاته،،

قبل ما اكلم في اي حاجه الموضوع منقول 100 % :) باسم الدكتورة - ronyrody

وجزاها الله كل خير على مجهودها الفظيع ... http://forum.shamsawy.net/style_emoticons/default/smile.gif

وحبيت انقله لتعم الفائدة ... :)

أنا هنزله هنا على شكل حلقات :D

السلام عليكم و رحمه الله و بركاته

اول حاجه عايزه اقول لكل اللي في ثانويه عامه مبروك عليكم

بس اكيد كل واحد فيكو دلوقتي بيفكر يترى هدخل كلية ايه؟
اللي كان محدد موقفه و ناوي عالطب ان شاء الله اكيد عنده شويه اسئله محيراه عن الكليه و الدراسه فيها طبيعي جدا كلنا كنا كده

اول ما دخلت الكليه كنت حاسه اني دخلت متاهه .. ايه المواد اللي هدرسها ؟ طب كل ماده بتتكلم عن ايه ؟ و ايه الادوات اللي هحتاجها ؟

علشان كده فكرت في كتابه الموضوع دا و اللي فيه هقدم بعض من خبرتي البسيطه في الكليه .. علشان اللي داخل يبقى داخل على نور

الموضوع هيكون على شكل س-ج

س1: ايه المواد اللي هتدرسها في سنه اولى؟

احب اقولكم ان الدراسه في ال3 سنين الاولى من الكليه بتكون مواد اكاديميك .. يعني ايه ؟ يعني هتدرس مواد مواد تؤهلك بعد كده لدراسة الطب الاكلينيكي

في سنه اولى بندرس من الماد دي 4 مواد هي :
1- anatomy و هو علم تشريح جسم الانسان
2-physiology و فيه بندرس و ظائف كل عضو
3-histology علم الانسجه
4- biochemistry الكيمياء الحيويه

طيب سلام دلوقتي :cool: و استنوا الاسئله الجايه و لو اي حد عنده سؤال يريت يقولي عليه

ملحوظه: النظام اللي شرحته هو اللي مطبق في مصر

DR.Neuro

29-07-2008, 11:07 PM

ازيكوا

بعد متكلمت بشكل مجمل عن المواد احب اشرحها اكتر

س2 : بالنسبه لل anatomy هندرس ايه فيها بالضبط ؟

ماده التشريح ماده كبيره تساوي 250 درجه من المجموع الكلي للدرجات بتدرس فيها تشريح جسم الانسان و طبعا في سنه اولى مش بناخده كله مثلا بندرس الاطراف العلويه و السفليه و الصدر او حسب المنهج المتبع في الكليه و يتكون كل جزء من
1- العظم bones: بندرس كل العظام المكونه للجزء ده و سماتها العامه و الخاصه و العضلات اللي ماسكه فيها
2- العضلات muscles : بندرس العضله ماسكه في اى عظمه ايه و عملها action و العصب اللي بيغذيها nerve supply
3- الشرايين arteries و الورده veins: المنشاء و النهايه و التفرعات
4- الاعصاب nerves : ايه العضلات اللي بيديها و التفرعات و التشوه الناتج عن اصابته

الماده بتنقسم الي جزء نظرى او محاضرات و جزء عملي او سكاشن و دا بقى اللي بناخده في المشرحه .... ايه؟! ايه المشرحه دي ؟!

دا اللي هقولكم عليه بعدين

سلام

,,,,,,,,,,,,,,,,,,,,,,

DR.Neuro

29-07-2008, 11:22 PM

طيب هاكمل وأمرى الى الله بشرح لنفسى أنا :mad::(

كنت بدأت اتكلم عن حاجه غريبه جدا و هي المشرحه ...

ايه هي بقى المشرحه؟!

المشرحه دي من اكتر الحاجات اللي في كليه الطب اللي بتثار حولها الخرافات و الخزعبلات , و لازم تكون متوقع انك ان شاء الله اول ما هتوصل بيتك بالسلامه من الكليه في اول يوم هتنهال عليك الاسئله حول هذا المكان العجيب من كل اللي تعرفهم ... فمثلا حد يقولك"ها قوللي عملت ايه اول مدخلت المشرحه؟! اغما عليك ..ها؟!"
و غيره " هوا فعلا هناك في ميتين ؟!" وغيره كتير اكيد هتكتشفها بنفسك

الموضوع ابسط من كدا بكتير المشرحه دي المكان اللي بنتلقى فيه الدروس العملي لمادة التشريح .. يعني انت قاعد في المحاضرات تسمع عن arteries و veins و غيرها لازم طبعا تعرف الحاجات دي شكله ايه جو الجسم و تعرف كمان الفرق بنها و دا اللي بيوريهولك الدكتور على الجثه في المشرحه
لكن طبعا اكيد برده الموضوع و في اول مره بيبقى غريب شويه لكن بالتكرار الواحد بيتعود و بتصبح المشرحه بالنسبه للطلبه مكان عادي .... يعني عندنا مثلا في القصر العيني الناس بتعتبرها مكان التجمع و تلاقي واحد بيقول لصاحبه قابلني قدام المشرحه .... اهو شفتوا عادي جدا :D
بس في بعض الحاجات حابه اقولها :اداب التعامل مع المشرحه

1- لازم تحط في بالك ان الميت دا كان في يوم من الايام انسان زيك زيه فلوسمحت التعامل يكون فيه احترام لحرمة الميت
2- طبعا مش محتاجه اقول ان التصوير بالتليفون المحمول دا حرام كبير .. تخيل ان اللي قدامك دا ابوك " الله يديله طولت العمر " هتحب حد يعمل فيه كده ؟!
3- لا تنسى مهمتك الاساسيه و هي انك بتتعلم مش جاي تلعب بناس ظروفهم هي اللي وضعتهم في هذا المكان و ان شاء الله يكون لهم ثواب الصدقه الجاريه
4- احذر ان تتهاون بكسر شيء في جسم الجثه او قطع شيء فيها حرام ..حرام ,ده غير انك هتضر نفسك و غيرك
5- ياريت تخلي دخولك المشرحه عظه ليك و تذكير بلاخره و انك ميت ميت و متنساش الدعاء للميت ده ,و متبخلش علي الناس التانيه بالنصح لو لقيتهم بيعملوا حاجه غلط

و على العموم مش عايزه اطول عليكم في الموضوع ده بس كان لازم اتكلم فيه
و دلوقتي اقولكم سلام و استنوني في بقيت الموضوع

مستنى الردود عشان أكمل :D

DR.Neuro

29-07-2008, 11:24 PM

متابعينك كمل بقى
بس على المشرحه عارفينها
كنت حموت و ادخلها السنه اللى فاتت مع رحله المدرسه
بس قعدو يقولولنا لازم تعدو لغايه الساعه5
سعتها فعلا زعلت
يلا
الواحد كده كده حيدخلها
فى رعايه الله
طيب شكرا على التشجيع هاكمل أهو :D

الموضوع كبير يا جماعة :)

FRANKENSTEIN

29-07-2008, 11:29 PM

DR.Neuro

29-07-2008, 11:34 PM

ههههههههههههه
هي دي تعليمات المشرحه :D
عاحبني اوي التعامل ع الميت باحترم :)
ياه لو تشوف اللي كنا بنعمله السنة دي
مش مشكله
تقريبا الحاجه الوحيده اللي التزمت بيها دخول المشرحه بالبالطو
ع ايه معرفش
مش مشكله

بس تقريبا الاناتومي بتاع اولي بيدرسوا فيه
upper limp ..thorax....pelvis...abdomen..embriology
وطبعا كل جزء بيشمل اللي حضرتك قلته

يالا متابع :D

شكرا ع المجهود
ألف شكر على ردك

بالنسبة للمشرحة فدة كلام دكتورة زى ما أنت شايف :D

انا عارف إن فى ناس بتحب تلعب بالجثة بس لو بتتعلم خلاص

دة لو فى فرصة تبص أصلا عليها من بعيد :cool:

وشكل حضرتك هتمثلنا إفادة كبيرة

متظر تعليقات حضرتك الثمينة وجزاكم الله خيرا :)

DR.Neuro

29-07-2008, 11:39 PM

ايه الادوات اللي هحتاجها في مادة التشريح ؟
1- اكيد البالطو الابيض
2- جوانتيات بلاستيكيه او مطاط
3- فورسبس (ملقط)
4- ممكن تحتاج عده تشريح بس هي مش مهمه و على العموم متستغلاش اخرك 8 جنيه انت مش هتبقى جراحhttp://forum.amrkhaled.net/images/smilies/icon_cool.gif

,,,,((((( أنا مش مقتنع بالكلام دة أخويا فى تالتة طب وبيقولى أنهم بيشوفوا الجثة بالعافية ومش بيشرحوا ولا حاجة ))))),,,,,

و دلوقتي اقول سلامhttp://forum.amrkhaled.net/images/smilies/marsa50.gif و استنوني هقولكم ازاي و منين نذاكر التشريح

د/ ماجدولين

30-07-2008, 12:39 AM

DR.Neuro

30-07-2008, 12:48 AM

حضرتك كمل

الموضوع مفيد بجد:)
جزاك الله كل الخير
انا فعلا كنت هسأل ع لحاجات دى
عشان مدخلش الكلية على عمايا:confused:
بس ممكن سؤال
هو طب مش بيشرحو اى نوع من الحيوانات؟؟؟؟؟؟؟
يعنى كلة ع الناس بس
ربنا يعينك

فى رعاية الله

جزانا وجزاكم الله خيرا :)

ومفيش أى تشريح حيوانات خالص زى بتوع صيدلة :p

لانه اسمه طب بـــــــــــشرى

كله على البشر :D

شكرا على التشجيع وهاكمل أهو :cool:

DR.Neuro

30-07-2008, 12:50 AM

بعد ملا اتكلمت عن الادوات اللي ممكن نحتاجها اكيد كل واحد دلوقتي بيقول هذاكر ازاي و منين ؟
مقدرش اقول لاي حد يذاكر ازاي لان كل واحد له الطريقه اللي بيستوعب بيها و الانسب له لكن ممكن اقولك في التشريح تركز على ايه في المذاكرة و لو ان كله مهم
1- بالنسبه للعظم مهم جدا تكون عارف ايه الحاجات اللي ماسكه في العظمه دي لان دا هيسهللك كتير كذاكرة العضلات و كمان مهم في الامتحان الشفوي و العملي(spotting)
2-اما الشريين مهم جدا تعرف التفرعات (branches) و الشبكات اللي بيشارك في صنعها (anastomosis)
3- الاعصاب بقي تركز علي العضلات اللي بيغذيها العصب و ال branches و كمان مهم جدا جدا التشوه الناتج عن اصابه العصب nerve injury
4-في حاجه كمان اسمها spaces او regions زي ما هتعرفوا بعد كده مثل cubital fossa ,femoral triangle لانها ممكن تيجي سؤال كامل

ييجي بعد كده سؤال طب هذاكر منين ؟
لازم تبقي عارف ان النظام في الكليه غير المدرسه يعني عندك الحريه انك تذاكر من المصدر اللي يريحك
اما كتاب القسم و اللي يفضل انه يكون عندك و تهتم بيه لان غالبا رئيس القسم هو اللي بيحط الامتحان , هتلاقي كمان دكاتره منزله كتب خاصه بيها ممكن لو حابب تشتريها في كمان مذكرات الدروس الخصوصيه ممكن الاستعانه بها لان غالبا الدكتور بتاع الدرس بيكون مجمع فيها اهم الحاجات و الاسئله اللي ممكن تتسئل في الشفوي و مهم جدا يكون عندك اطلس كويس لان الرسومات بتساعد جدا في فهم الanatomy

كمان المحاضرات مهمه جدا و السكاشن مهمه جدا جدا حاول على قد ما تقدر تكتب كل اللي بيتقال او ممكن كمان تسجل دي طريقه كويسه قوي

طب ايه بقى يا تري حكايه الدروس الخصوصيه دي ؟
الدروس فعلا منتشرة جدا في كليتنا و حوالي 75% من الطلبه بياخد دروس و لكن انا مبنصحش اي حد بيها و عن تجربه شخصيه مدام انت بتحضر محاضرات و سكاشن و بتذاكر اول باول مش هتحتاج الدروس و صدقوني

و دلوقتي اقولكم سلام

DR.Neuro

30-07-2008, 12:51 AM

نكمل كلامنا ....

اكيد بعد ما عرفنا تقريبا كل حاجه عن الanatomy عايزين نعرف ايه نظام الامتحان ؟
الامتحانات في الكليه تنقسم الي نظري (written و MCQ) و عملي و شفوي
1- الامتحان النظري :
بيكون في نص السنه (اعمال سنه) و اخرها
و علشان ان شاء الله تجاوب كويس لازم تكون طبعا مذاكر كويس غير كده لازم تكون مدرب على اسئلة الMCQ (او الاختيار من متعدد) لان النوع ده من الاسئله مهم جدا في كليتنا , كمان لازم تكون و انت بتذاكر متعود ترتب افكارك و تركز علي العناوين الرئيسيه اللي لو جالك سؤال في الجزء ده هتتكلم فيها .. و صدقوني مهم جدا تكون عارف النقط و العناوين الاساسيه لكل موضوع لان غالبا وقت الامتحان لايكفي لذكر كل التفاصيل , كمان في ال anatomy بالذات الرسومات لها و قع السحر على المصصح فحاول من اول السنه تتدرب عليها و مش لازم يا اخي يكون رسمك حلو انت مش بيكاسو بس على الاقل يكون واضح و معبر

2- الامتحان العملي : عملي ال anatomy بنقول عليه spotting في الامتحان بيجيلك حاجه معينه متحدده بعلامه و المطلوب تقول ايه الحاجه دي و ممكن يسألك سؤال بسيط عليها
لو انت ملتزم بحضور السكاشن فالامتحان ده هيكون بالنسبه لك سهل ان شاء الله

3- الشفوي : الامتحان الشفوي بيكون مصدر رعب:d للطلاب من اول السنه و دا نتيجة الخرافات و الاشاعات اللي سمعوها عنه من اول يوم دراسه .. مثلا حد هيقولك الدكتور فلان ده بيموت الطلبه و في الاخر يديك صفر .. و اللي هيقولك الدكتور علان اللي عامل نفسه طيب ده بيسأل اسئله مستوى دكتوراه
كل دا كلام فاضي بس خلينا صرحه امتحان الشفوي دا رزق ممكن يكون حظك مع دكتور يقتنع باي اجابه هتقولها و ممكن واحد تاني يكون بيحب الطالب الperfect دا غير طبعا الوسايط اللي بتخش في الموضوع
بس انت اهم حاجه تكون عامل اللي عليك و مذاكر و متوكل على ربنا بالنسبه لل anatomy ركز كويس جدا علي العظم لانه غالبا مفتاح الامتحان
حاجه تانيه في ناس هتقولك لازم تكون لابس formal مش شرط المهم يكون لبسك مهندم و ميستفزش:engry1: الدكتور
و بلاش بقى ربطات امينه شلبايه و الحاجات دي :d

تقريبا كده نبقي خلصنا كلام عن ال anatomy
المره الجايه بقى هكلمكم عن مادتي المفضله physiology--:

سلام

د/ ماجدولين

30-07-2008, 01:05 AM

ومفيش أى تشريح حيوانات خالص زى بتوع صيدلة

لانه اسمه طب بـــــــــــشرى

كله على البشر

شكرا للرد
انا تقريبا دة اللى كنت أعرفة
بس قولت أتاكد
ولو حضرتك كنت قولت أيوة
كنت هحول تجارة:confused::(
1- الامتحان النظري
- الامتحان العملي
- الشفوي
لآ .امتحان الثانوية العامة اسهل:)
متابعة بأذن الله

Dr.mayson

30-07-2008, 03:31 AM

الموضوع جميل اووووووووووووى وياريت تكملوا كلوااااااااااااااااااااا وباسرع وقت وكل الشكر ليك وياترى حد هنا فى طب المنصوررة

DR.Neuro

30-07-2008, 03:34 AM

لموضوع جميل اووووووووووووى وياريت تكملوا كلوااااااااااااااااااااا وباسرع وقت وكل الشكر ليك وياترى حد هنا فى طب المنصوررة
شكرا جزيلا :D

طيب هنكمل وأمرنا إلى الله

DR.Neuro

30-07-2008, 03:36 AM

مش قادرة اوصفلكم سعادتي لاني هكلمكم عن مادتي المفضلة الphysiology و اللي اتمنى انه يكون كدة بالنسبه لكم ان شاء الله طيب يا ترى ايه هو الphysiology و هندرس فيه ايه ؟
الphysiology هو علم و ظائف الاعضاء بندرس فيه ازاي كل عضو و كل جهاز من اجهزة الجسم بيشتغل و التكامل بين الاجهزة دي و غالبا بندرس في سنه اولى
1-blood (الدم) بندرس فيه خلايا الدم المختلفه و نسبة كل منها و الوظيفة اللي بتقوم بيها و كيفية القيام بالوظيفة دي
2- autonomic nervous system (الجهاز العصبي الا ارادي) ده من اهم الفروع و اللي كمان موضوع شيق جدا بنشوف فيه ازاي الجهاز ده بيقود الجسم في حالة التعرض للخطر و حاجات تانيه هتعرفوها بعدين
3- nerve and muscles بندرس في الفصل ده كيفية انتقال النبضه العصبيه في العصب و كمان من العصب للعضله و ازاي العضله بتحول النبضات دي الى حركة
4- respiration (التنفس) بنشوف ميكانيكية التنفس و ازاي المخ
بينظم عمليه التنفس
5- circulation (الدوره الدمويه) بندرس في الباب ده و ظيفه القلب و الاوعيه الدمويه و التحكم العصبي فيها و كمان بندرس حاجه ظريفة جدا بتحسسك انك خلاص بقيت دكتور و هي الECG او رسم القلب دا زائد ضغط الدم و العوامل المؤثرة فيه و بصراحه الباب دا هو المفضل عندي

6- Git ممكن تخدوا في اولى او تانيه على حسب الجامعه

تقريبا كده دي الحاجات اللي بندرسها في physiology اولى

و دلوقتي سلام http://forum.amrkhaled.net/images/smilies/marsa50.gifhttp://forum.amrkhaled.net/images/smilies/assalam.gifو المره الجايه هكلمكم عن العملي في الphysiology

DR.Neuro

30-07-2008, 03:37 AM

نرجع نكمل كلامنا و صلنا لحد عملي الphysiologyعملي الماده دي ظريف جدا و مسلي و لازم نهتم بحضور السكاشن لان اولا عليه غياب و ثانيا التجارب اللي بتتشرح هي دي اللي هتيجي في الامتحان فلازم طبعا نكون عارفين هنعملها ازاي علشان متضربش لخمه في الامتحا و الموضوع مش ناقص بعزأت درجات

في السكشن هناخد تجارب على الحاجات اللي في النظري و كمان التجارب دي مش بتتشرح في المحاضرات و علشلن كده بأكد تاني على ضرورة الانتظام في السكاشن

فمثلا احنا درسنا blood جا الدور اننا نشتغل تجاربه زي نسبه الهيموجلوبين سرعة الترسيب فصائل الدم عوامل التجلط
كمان بنعرف ازاي نقيس الضغط و بنشوف رسم القلب بيتعمل ازاي
دا غير تجارب الضفاضع اللي بنشوف فيها مثلا استجابة العضله للمؤثر الكهربي و منظم ضربات قلب الضفضعه و على فكره هي كائن اليف جدا

يعني دا كده على السريع هو عملي الphysiology و زي مقلتلكم مسلي و ظريف

نقول ايه الادوات اللي هنحتاجها

الادوات اللي هنحتاجها للphysiology مش هتختلف عن الanatomy كتير و هي

1- اكيد حبيبنا و اللي عاملنا فضيحه في الشارع البالطو

2- زي ما شفتوا التجارب فيها دم و ضفاضع يبقى اكيد هنحتاج الجوانتيات و نصيحه مني اشتروا علبه من اول السنه و خليه عندكو و مش غاليه فيها 100 واحد و بحوالي 16 الى 20 جنيه

3- بالنسبه لتشريح الضفاضع هي هتكون متجهزه او هما هيدوكوا الادوات اللي هتشرحوا بيها

4- ممكن لو عايز تجيب جهاز ضغط و سماعه دا لو عايز تتمرن على اخواتك و ترسم نفسك شويه عادي دا حققك, الصين منزلاهم باسعار حلوه جدا و كمان الوان هايله فوشيا و اخضر و لبني يعني اخر دلع و بلاش بقى حد يلعب في دماغك و يقولك صيني ايه اللي هتجيبو هات الالماني! , اولا الالماني دي غاليه و انت مش هتستخدمها كتير و غالبا هتتسرق منك اصبر لما تفتح عيادتك و ابقى جيب اللي انت عايزه بس صدقوني الصيني هايله و هتلاقيها بعشرين جنيه اقصي حاجه انا اعرف ناس حايبين ب 10 :cool:

DR.Neuro

30-07-2008, 03:40 AM

نرجع نكمل كلامنا عن الphysiology

و حد ممكن يسال هنذاكره منين ؟

الphysiology مختلف شويه عن الanatomy ,لان الanatomy ماده تعتمد في اساسها على وصف حاجات مرئيه و محسوسه فمش هيكون في اختلاف بين المصادر المختلفه الا بسيط قوي علشان كده ممكن تذاكر من المصدر اللي يريحك, اما الphysiology و لانه بيتعامل مع حاجات دقيقه و اغلبه اجتهادات و نظريات فممكن يكون في اختلاف بين المصادر و علشان كده يفضل الاعتماد على كتاب القسم كمصدر رئيسي

ممكن تلاحظ ان بعض الدكاتره بيقول كلام مختلف عن الكتاب ياريت تكتبه , بس مش علشان تكتبه في الامتحان لا دا علشان لو جه حظك مع نفس الدكتور في الشفوي ممكن يسالك عن اللي هو قاله

ممكن الاستعانه ببعض المراجع او الكتب الاجنبيه لتوضيح النقط الغامضه او لو انت زيي من النوع اللي بيحب يتوسع, و اشهرها gyton لان اسلوبه سلس و غالبا بيكون هو المرجع بتاع القسم في كمان ganon بس الكتب دي غاليه قوي , في منها متصور بتكون رخيصه بس طبعا مش نفس جودة الاصليه .اما بالنسبه للecg او رسم القلب لو بجد عايز تفهمه خطوه خطوه عليك بكتاب ecg made easy كتاب اكتر من رائع و ب10 جنيه يا بلاش

ممكن كمان تستعين بمذكرات الدروس , هو هو نفس الكلام اللي في الكتاب بس مرتب و مكتوب على هيئه points و مزود برسومات توضيحيه او diagrams و على فكره الdiagrams احسن حاجه تفهم physiology

نكمل كلامنا عن الphysiology

الphysiology زي كل المواد بنمتحن فيه امتحان اعمال سنه بيكون عليه 50 درجه من ال250 و الامتحان ده بيكون غالبا MCQ و لاجتياز الامتحان بتفوق لازم نتدرب على النوع ده من الاسئله كويس

نيجي بعد كده للامتحان العملي و ده غالبا بيكون في ابريل , في العاده الامتحان بيكون مقسوم لمرحلتين , الاولي مرحة اخد القراءات من تجارب معده قبل كده زي مثلا سرعة الترسيب , ECG , الخ....
المرحله التانيه بيكون مطلوب منك تنفيذ احد التجارب قدام الدكتور و هو اللي هيقيم ادائك و ممكن يسالك كام سؤال نظري علي التجربه , و ساعات زي ما حصل السنه اللي فاتت يكون في امتحان نظري على الجزء النظري اللي متعلق بالتجارب
علشان كده لازم التجارب كلها تكون بالنسبه لك a pice of cake زي ما بيقولو , لان ببساطه درجات العملي المفروض انك ان شاء الله ضامنه

بعد كده يجي الامتحان النظري اللي بيكون في اخر السنه , وقت الامتحان 3 ساعات , الامتحان بيكون ورقتين الاولى MCQ و الثانيه long eassy او اسئله مقاليه , لازم تخلي بالك كويس جدا من الوقت في الامتحان لان الاسئله بتكون طويله ,فمتخليش سؤال ياخد منك اكتر من اللازم و الا هتلاقي نفسك خارج من اللجنه و سايبلك سؤال ولا 2 , حاول ترتب الافكار و العناوين الرئيسيه للسؤال قبل ما تبدا الاجابه , و متطولش في شرح العناصر اكتر من اللازم

يفضللك كده امتحان الoral , خد الموضوع ببساطه هيعدي و نفس الكلام اللي قولته قبل كده ثابت في كل الoral

كده تقريبا خلص الكلام عن الphysiology , المره الجايه نتكلم عن الbiochemistry

يالا هانت مفضلش غير مادتين بس :D

DR.Neuro

30-07-2008, 03:50 AM

أنا هانزل اصلى واطلع انام وإن شاء الله بكرة أكمل

لو كان فى العمر بقية

DR.Neuro

30-07-2008, 03:58 AM

لو تعرف تجيب الموضوع كلوا مرة واحدة يبقى تمام اوووووووووى
وشكرااااااااااا
لا لازم يبقى فيه تشويق... متعة.... إثارة ...

كدة يعنى :D

DR.Neuro

30-07-2008, 05:00 AM

يا دكتورة واحد قالى نفس الكلام وقلتله انا مليش دعوة دة كلام الدكتورة أنا ناقله بالحرف

اللى عايز ياخد اللى هو عايزه منه وخلاص

قال ملقاط قال

,,,,((((( أنا مش مقتنع بالكلام دة أخويا فى تالتة طب وبيقولى أنهم بيشوفوا الجثة بالعافية ومش بيشرحوا ولا حاجة ))))),,,,,

DR.Neuro

30-07-2008, 05:02 AM

وبعدين أنا إن شاء الله مش هاخد درووس

يعنى لا عباس و حاجة

ahmed12910

30-07-2008, 09:38 AM

%medo%

30-07-2008, 10:39 AM

عجبنى الموضوع ده قوى
انا جبت طب القاهرة والحمد لله
ارجو اكون معاكم فى المجموعة الطبية

تحياتى,

اوركيديا

30-07-2008, 02:44 PM

يلا كمل
مش قلت بكره
اه شغل اطفال مش مهم انى رايحه اولى كليه
بس عايزه اعرف الباقى
فى رعايه الله

m.a_lu

30-07-2008, 02:54 PM

الموضوع ده فعلا رااااااااااااائع أنا كنت هبقي تايه في الكلية لولاه
شكرااااااااااااااا جزيلا أخي العزيز علي هذا الموضوع

DR.Neuro

30-07-2008, 03:33 PM

ماشى خلاص هاكمل بس عشان الدكتورة اللى دخلت توبخنى

يلا مش مشكلة نكمل

DR.Neuro

30-07-2008, 03:35 PM

نبدأ الكلام عن ماده جديده و هي الbiochemistry

الbiochemistry او الكيميا الحيويه و اختصارا الbio ماده بتناقش كيميا الجسم و التفاعلات اللي بتحصل جواه في سنه اولى بندرس الcarbohydrates بنعرف فيها تركيب السكريات البسيطه simple sugars و خصائصها و تفاعلاتها و كمان كيفيه ارتباطها لتكوين oligo و polysaccharides متشغلوش بالكم بالمسميات دلوقتي

غير كده بندرس الدهون lipids و بنعرف ايه هي الاحماض الدهنيه و الكوليسترول و دخوله في مركبات كتيره زي الهورمونات و عمل كل هرمون منهم

كمان البروتيناتproteins و اللي بتتكون من احماض امينيه amino acids و ارتباطها لتكوين عديد الببتيد و اشكال البروتينات المختلفه و وظائفها

اما بقى المتعه اللي بجد هتبدأ مع دراسه الاحماض النوويه nucliec acids او الDNA جزء شبيه باللي درسناه في الثانوي بس مع تفصيل اكتر , الجزء ده مهم جدا و لذيذ جدا في فهمه دا كان المفضل عندي

كمان في جزء ظريف و هو acid base balance او التوازن بين الاحماض و القواعد و ازاي الجسم بيحافظ على نسبه ثابته بينهم و الامراض اللي بتغير النسب دي

دا فيما يتعلق بالنظري المره الجايه هنتكلم عن العملي

DR.Neuro

30-07-2008, 03:37 PM

عملي الbio لذيذ جدا و سهل جدا لو اهتميت بحضور السكاشن

بنعمل تجارب تخليك تقدر تعرف المحلول اللي قدامك ده carbohydrates ولا protiens الخ...

كمان بنعمل تجارب للتفريق بين المركبات في المجموعه الواحده يعني مثلا الglucose و الfructose الاتنين من الcarbohydrates بنفرق بينهم بtest اسمه سيلفانوف ... و مش قادره احكيلكم على اللون التحفه اللي بيطلع cherry red تحس انك عايز تشربه ... و ها كذا تجارب الbio كلها الوان تجنن

عايزه اقولكم ان حضور السكاشن و عمل التجارب بأديك مهم جدا .. مهم كمان كتابت الخطوات اللي هتمشي عليها او الscheme و الكميات اللي هتحطها من كل ماده زي مثلا 2ml من الsolution و عليهم 2ml من alcoholic alpha napthol و الاسامي المكعبله دي ... كمان مهم تكون عارف الخواص الطبيعيه للماده زي مثلا لونها ريحتها و ما ادراك ما الروايح في الbio طعمها ..بس اوعى تدوق حاجه .. هل هي حمضيه او قلويه

عارفين ايه اغلس حاجه في الموضوع الtest tubes او انابيب الاختبار و الholders او الماسك
من ناحيه لان الانابيب دي بتكسر كتير جدا.. تبقى واقف في امان الله و اذ فجأه تششششششش ..ايه دا ؟ عادي الانبوبه اتكسرت اصل الholder كان واسع

و من ناحيه تانيه لان غالبا اللي بيديك الانابيب دي بيكون عمال المعمل و الامر لايخلو من "فين الشاي بتاعنا يا دكتور" و "يا رب اشوفك عميد الكليه" و "لو عزت اي حاجه اسأل بس على عم محمود" و عبارات مشابهه كتير هتسمعوها طول السنه, و طبعا الهدف منها انك تخلي عندك نظر و تشوف الراجل ده بقرشين .. المهم انك تنوي بيهم الصدقه!

حاجه كمان مهمه احب انبه عليها و هي ضرورة لبس البالطو ..و يا ريت كمان تلبس اوحش حاجه عندك يوم سكشن الbio لان انت بتتعامل مع مواد كيماويه و احماض و لو معملتش كده يبقى على اخر السنه هتلاقي هدزمك كلها عايزه تترمي
مش هنسا ابدا شنطتي الjeans اللي بقت عامله زي المنخل من كتر الخروم .. دا غير jacket كنت بموت فيه و مش عارفه ايه اللي و قع عليه لقيت حتت خرم و طبعا رميته

ان شاء الله متتعرضوش للحوادث دي و تستمتعو بالسكشن

__________________

عاملين ايه نكمل كلامنا عن الbio و نعرف مع بعض هنذاكر البيو منين و ازاي

ناس كتير مش بتحب البيو و بتتعقد منه خصوصا في اول السنه, عايزه اقولكم دا شعور طبيعي اي لو سألت اي حد هيقولك كدم انا عن نفسي كنت بكرهها في اول السنه و فضلت على الحال دا الترم الاول كله

المشكله ان الناي بتبقى تايهه في البيو و مش عارفين هي مادة فهم و لا حفظ
اللي بيعتبر البيو مادة للحفظ بس فدا غلطان لان صعب جدا و في البيو بتاذات انك تحفظ حاجه مش فاهمها, لو عملت كده هتلاقي الدنيا معاك بقت سلطه و لا انت فاهم و لا انت حافظ , و اللي هتحفظه هيتبخر , ودا اللي انا عملته في الترم الاول و يا ريتني حفظت بضمير انا اساسا مبحبش الحفظ ,كنت بحفظ الصفحه في ساعه و انساها تاني يوم و كل دا لاني سمعت كلام ناس قالولي انها مادة للحفظ دا غير ان في الاول ربنا رزقنا بكام دكتور عسل

بس اوعو تفهمو من كلامي انها مادة للفهم بس, ودا برده اللي انا كنت فاكراه في بداية الترم التاني كنت بدأت افهم الموضوع و الدنيا بتتكلم عن ايه, و قلت لنفسي فرجت و هي البيو طلعت للفهم , ودا كمان اعتقاد غلط و الحمد لله لحقت نفسي و اكتشفت كده بدري.

البيو ببساطه ماده للفهم و الحفظ, يعني لازم تكون فاهمها كويس و في نفس الوقت حافظ. ساعتها بس هتحس المتعه في البيو , على فكره البيو دي هي علم المستقبل . صدقوني

DR.Neuro

30-07-2008, 03:38 PM

دلوقتي اكمل كلامي عن البيو

المره اللي فاتت اتكلمت عن طبيعة الماده و عرفنا انها مادة فهم و لكن الحفظ بيلعب فيها دور اساسي

المره دي هكلمكم تذاكروها منين

احسن حاجه للبيو كتاب القسم و مبنصحش اي حد بالاستعانه باي حاجه تانيه و غالبا مفيش

لو حضرت المحاضرات و ركزت فيها و نظمت الكتاب كويس يبقى كده تقريبا مش ناقصك حاجه , خصوصا بقى اذا كان الكتاب اصلا كويس و مرتب زي الكتا اللي عندنا في القصر العيني اللي عامله الدكتور رشيد, بصراحه الراجل ده عبقري و مهم اتكلمت مش هوفيه حقه. ياريت اللي داخل منكم القصر العيني او يعرف حد داخل يجيب الكتاب ده و ياريت تحضرو كل محاضراته

(( نفس كتاب د- صابحه انا كنت بذاكر منه ومش كنت بحب ورق د- ايمن لان الكتاب كان جميل وحلو ... http://forum.shamsawy.net/style_emoticons/default/smile.gif ))

في بعض ناس بتحب تجيب مذكرات الدروس على اساس انها بتكون منظمه و مكتوبه على شكل نقط -ماشي- بس لنل عن نفسي بحس انها لا تضيف جديد و زي قلتها

و انت بتذاكر يا ريت تركز على الرموز او الFORMULAE بتاعت المركبات و على فكره بتتسأل في الشفوي و ساعات في النظري, دا غير انها بتسهل عليك فهم خواص المركب و مشتقاته (( احتمال تطبق في عين شمس السنة الجاية ))

كمان يا سلام بقى لو لقيت اسم انزيم ENZYME و رحت معلم عليه بالhigh lighter .لان الانزيمات مهمه جدا و موضع اسئله

هتلاقي كمان وانت بتذاكر النظري حاجات ليها علاقه بالعملي , اهتم بيها زي مثلا الprinciple او الاساس العلمي اللي بيقوم عليه test معين دا هيساعدك جدا في العملي لان ممكن ييجي سؤال على الprinciple و كمان هيسهل عليك حفظ الtest

مهم للعملي انك تكون حافظ تسلسل الخطوات اللي هتمشي عليها في التجربه او الscheme بيكون مكتوب في كتاب العملي بس مهم حضور السكشن علشان هناك هيربطلك الschemes ببعض

_____________________

ناقصلنا في الكلام عن الbio اننا نعرف ايه الادوات اللي هنحتاجها في الbio

بالنسبه للbio فكل اللي هتحتاجه هو البالطو الابيض , الجونتيات, و زي اي طالب محترم كشكول و قلم

اما بالنسبه للtest tubes فدي هما بيدوهلنا في المعمل

DR.Neuro

30-07-2008, 03:41 PM

كدة مفضلش إلا الهستولوجى ...........

dr.saeed

30-07-2008, 03:43 PM

بالراحة علينا شوية يا انس
انا هاغير رأيى خلاص
هههههههههه

DR.Neuro

30-07-2008, 03:43 PM

عجبنى الموضوع ده قوى
انا جبت طب القاهرة والحمد لله
ارجو اكون معاكم فى المجموعة الطبية

تحياتى,
انت تشرفنا يا ميدو :)

ahmed12910

30-07-2008, 04:04 PM

يا عم انس

زهقتنا

سيب الناس تستمتع بالاجازة

........

ما تجيبلهم جثث بالمرة

ههههههه

.....

freespirit

30-07-2008, 08:56 PM

جزاك الله كل خير يا دكتور انس والدكتورة ronyrody
ويا ريت كلنا فعلا نشترك ونسال غيرنا ونفيد بعضنا
عموما ربنا يوفقك

DR.Neuro

30-07-2008, 09:19 PM

جزاك الله كل خير يا دكتور انس والدكتورة ronyrody
ويا ريت كلنا فعلا نشترك ونسال غيرنا ونفيد بعضنا
عموما ربنا يوفقك
جزانا وجزاكم الله خيرا

هاكمل آخر مادة عشان أبقى أرضيت ضميرى :p

DR.Neuro

30-07-2008, 09:24 PM

النهارده هكلمكم عن اخر ماده من المواد الاربعه اللي بندرسها في اولى و هي مادة الhistology او علم الانسجه

من اسمها الماده دي بتتكلم عن انسجة الجسم

في اول باب الcytology هندرس الخليه-the cell - و تركيبها و الorganelles او العضيات و شكلها تحت الميكروسكوب الضوئي light microscope و كمان الميكروسكوب الالكتروني او الelectron microscope.
هنعرف كمان اننا علشان ندرس الحاجات دي و نشوفها تحت الميكروسكوب لازم تتصبغ بصبغات معينه او stains,الstains دي ليها انواع كتيره و كل واحده منها متخصصه في صباغة حاجه معينه و من اشهر الstains و اللي لازم تعرفوها من دلوقتي لانها ماشيه معاكم طول السنه هي الhematoxylin & eosin او الهيماتوكسيلين و الايوسين,

الباب اللي بعد كده هو cytogenetics و اللي بندرس فيه تركيب الكروموسومات و احجامها و وظيفتها و انقسام الخليه بنوعيه و الامراض اللي بتنتج عن الخلل في الانقسام

بعد ما درسنا الخليه هندرس الانسجه و علينا منها في سنه اولى epithelial tissue او النسيج الطلائي , connective tissue او النسيج الضام و غيرها , بنعرف تركيب الtissue مكانه و وظيفته

حابه اقولكم ان الhistology ماده ظريفه بس اغلب الناس مش بتحبها لانها فيها وصف و تفاصيل كتيره و حفظ بس في الاخر بيحبوها لانها بتتلم بسرعه قبل الامتحان

يعني دي كده فكره مختصره عن الماده و المره اللي جايه هكلمكم عن العملي

سلام

DR.Neuro

30-07-2008, 09:26 PM

دي هكلمكم عن عملي الhistology , عملي الhistology اميز حاجه فيه انك مش محتاج البالطو

العملي كله قائم على الشرائح او الslides و الslides دي بتكون نوعان

1- microscopic ودي بنشفها تحت الميكوسكوب الضوئي العادي
2-projector slides دي علشان تشوفها هيضلمو النور و هيبدأ العرض , حاجه كده زي السينما

و في الحالتين الدكتور هيشرح ازاي تتعرف على الشريحه دي و لازم تركز كويس لان السرائح دي بتيجي في الامتحان العملي

جزء مهم كمان في العملي و هو الرسومات, المطلوب انك ترسم شكل الانسجه و الخلايا في الكتاب العملي او ساعات يسموه كراسة العملي

حد ممكن يسأل هنجيب الرسومات منين ؟
متقلقش الرسومات كلها بتكون موجوده في الاطلس و كل اللي عليك انك تنقلها

طب و ايه اللي يحصل يعني لو مرسمتش؟
احب اقولك ان الرسومات دي مهمه جدا و لازمتكون مرسومه كويس من الاول و كل سكشن تيجي و كراستك كامله لان الدكتور بيصححها و يمضيلك جمبها و يكتبلك التاريخ , و تقعد طول السنه تجمع التواريخ دي لحد الامتحان الشفوي و اللي جزء من درجته على العملي ساعتها هتدخل على الدكتور و قبل مايقول لك اي حاجه هيسألك "وريني كراسة العملي" و يشوف الرسومات اذا كامله و التواريخ و يديك درجه, و علشان تعرف قد ايه هي مهمه هحكلكم اللي حصل مع صاحبتي
اول ما دخلت على الدكتور سألها على الكراسه و قعد يقلب فيها و علشان هي كانت راسمه باتقان و مزبطه كل حاجه , الدكتور قالها" رسمك تحفه و انا اديتك النمره النهائيه" منغير ما يسألها و لا سؤال

DR.Neuro

30-07-2008, 09:27 PM

السلام عليكم ورحمة الله وبركاته

و دلوقتي هكلمكم عن ازاي و منين نذاكر الhistology

احسن حاجه لمذاكرت الhistology كتاب القسم و لابديل عنه

بالنسبه للنظري و انت بتذاكر في حاجات اساسيه لازم تركز عليها و هي

1- هرفنا قبل كده اننا بنستخدم stains في صباغت الانسجه , الصبغه اللي بتستخدم كتير هي الhematoxylin eosin و لانها بتستخدم كتير جدا فا مش مهم ذكرها , في انواع من الخلايا او الorganelles مبترضاش تتصبغ بالصبغه دي علشان كده بيستخدمولها صبغات مخصوصه و بيقولو عليها special stains اهي الspecial stains دي مهمه جدا و موضه اسئله , مثلا يجي يقول الsudan III بتستخدم لصباغت ايه ؟ و ها كذا

2- الsites اللي بتكون موجوده فيها الخليه او النسيج دا , زي مثلا الfat cells بتكون موجوده حولين الاعضاء و بتكون مخده pad و دا سهل انك تحفظه لو فهمت ايه و ظيفة الخليه او النسيج دا

3- كل organelle بيكون موجودبشكل اكبر في نوع من الخلايا و مش في غيرها فلازم تعرف ايه هي الخلايا دى ,زي مثلا الlysosomes بتكون موجوده اكتر في الphagocytic cells او الخلايا الاكوله

4- كل خليه متخصصه بوظيفه بيكون ليها مواصفات و المواصفات دي ممكن تستنتجها من فهم وظيفة الخليه , زي مثلا الخلايا المصنعه للبروتين او خلايا الافراز و غيرها

اما العملي
فمهم جدا انك تركز في السكاشن على الslides سواء microscope او projector و تحاول تعمل علامه خاصه بيك مميزه لكل شريحه تعرفها بيها , غير كده مهم جدا انك تحفظ الصفات بتاعت الشريحه و اللي بتتقال في السكشن و بتكون مكتوبه في الكتاب العملي دا غير الspecial stains و اللي باكد تاني على اهميتها

لان امتحان العملي هيجيلك شريح المطلوب منك تقول ايه دا و نوع الصبغه (مهم جدا) و هنا هتعتمد على العلامه اللي انت عملتها للشريحة يعني انا مثلا كنت معلمه الthymus انها عامله زي البلاطات , و بعدين يسالك عرفته منين و هنا يبدا الخداع و هتكتب الصفات اللي انت حافظها و اللي كتير منها ما بتكونش شفتها

في ناس بتحب تاجر الشرايح قبل الامتحان علشان تراجع عليها في البيت مش وحش بس حابه اقول ان المراجعات في السكاشن بتكون كافيه جدا

كمان الرسومات مهمه مش بس علشان الكراسه لان في الامتحان في سؤال كامل على الرسمه علشان كده حاول انك تحفظهم على مدار السنه

تقريبا كده خلص الكلام عن الhistology

بالنسبه للادوات اللي هتحتاجها في الhistology فكل اللي هتحتاجه علبة الوان خشب و بالاخص اللون الوردي و البنفسجي

DR.Neuro

30-07-2008, 09:28 PM

كدة خلصنا الموضوع

حد ليه أى استفسارات ؟!!!

Dr.mayson

30-07-2008, 11:47 PM

شكراااااااااااااااااااااااااا جدا على الموضوع الاكثر من رائع ده

DR.Neuro

31-07-2008, 12:09 AM

العفو يا دكتورة

JusT DreaM

31-07-2008, 12:10 AM

جزاك الله خيرا

باين عليها كلية سهلة

واكيد هتكون سهلة علينا عشان احنا بنحبها ومختارينها

وشكرا للدكتورة اللي تعبت عشان تفيدنا

وربنا يوفقنا كلنا يارب

DR.Neuro

31-07-2008, 12:12 AM

جزاك الله خيرا

باين عليها كلية سهلة

واكيد هتكون سهلة علينا عشان احنا بنحبها ومختارينها

وشكرا للدكتورة اللي تعبت عشان تفيدنا

وربنا يوفقنا كلنا يارب
جزانا وجزاكم الله خيرا

الكلية سهلة بس محتاجة صبر وتحمل الضغط العالى وارتفاع درجات الحرارة وفروق التوقيت :D

Dr.mayson

31-07-2008, 01:12 AM

انا بقى عايزة استفسر عن حاجة مهمة جدااااااااااااا
هيكون ايه نظام الكلية يعنى هيكون فى بردوا دروس زى ثانوى ارجو لو حد يعرف يتكلم فى الموضوع ده

DR.Neuro

31-07-2008, 01:15 AM

اه طبعا فى دروس بس دة يرجع لحضرتك وقدرتك على المذاكرة

موجود فى إحدى المشاركات فى أول الموضوع

وتذكرى ان المذاكرة فن وكدة مش أى حد هيحكم غير حضرتك

mogym

31-07-2008, 01:16 AM

DR.Neuro

31-07-2008, 01:20 AM

جزاك الله خيرا
لو سمحت عندي شوية اسئلة هايفة اوى بس اعمل ايه
اولا في المدرسة اول يوم في الدراسة كل مدرس بيقول كل واحد يجيب كشكول 80 للحصة وواحد 40 للواجب وغيره للامتحانات وكده يعنى اما دلوأتى مفتوحة اوى وانا مش عارفة اجيب ايه لكل مادة
ثانيا الادوات ومذكرات الدروس تيجي منين ياريت تؤلي مكان كويس (اسمه ايه؟)اناطب القاهرة
سؤالكمان في فترة الدراسة ممكن نتواصل علشان نفيد ونستفيد
اوعى تكون زهقت مني دا انا عسولة خاص واسئلتى عسولة زيي بالظبط
جزانا وجزاكم الله خيرا:)

بصى حضرتك .. أما تروحى الكلية هتلاقى فى كذا أسرة مستنية على الابواب

دول وظيفتهم أنهم ياخدوا الطلاب الجدد ويعرفوهم ايه النظام

يعنى مفيش أى قلق خالص :D

وطبعا مفيش نظام كشاكيل ستين وتمانين والجلاد أبو لون فحلقى دة :D

وأنا مش بزهق فى إنتظار أسئلة حضرتك يا فندم :)

Baskoota

31-07-2008, 01:26 AM

المها

31-07-2008, 01:26 AM

طيب لو سمحت انا داخلة ان شاء الله صيدلة المنصورة واود ان اتعرف على المواد وكيفيةمذاكرتها وخاصة انها بالانجليزى؟؟ولك جزيل الشكر

DR.Neuro

31-07-2008, 01:30 AM

جزاك الله خير للموضوع الجميييل
انا الحمد لله خلصت من اولى طب
هي في الاول صعبة بس مع الوقت والتعود ان شاء الله هتبقى سهلة
طبعا انا النظام عندي في الكلية غير كل جامعات مصر
قناة السويس ليها حالة لوحدها
الحمد لله على كل شئ
ربنا يوفق الجميع ان شاء الله
شكرا جزيلا ...

شكـــــــــــــــرا للمداخلة و جزاكى الله خيرا:D

طيب لو سمحت انا داخلة ان شاء الله صيدلة المنصورة واود ان اتعرف على المواد وكيفيةمذاكرتها وخاصة انها بالانجليزى؟؟ولك جزيل الشكر
نحن _أهل الطب _ لا شأن لنا بتلك الصيدلة فاسألى أهلها :D

mogym

31-07-2008, 01:31 AM

جزاك الله خيرا للمرة التانية
ربنا يوفقك

DR.Neuro

31-07-2008, 01:37 AM

جزاك الله حيرا للمرة التانية
ربنا يوفقك
جزانا وجزاكم الله خيرا وقيض لك من يعينك على الخير :)

Dr.diamond

31-07-2008, 01:37 AM

طيب لو سمحت انا داخلة ان شاء الله صيدلة المنصورة واود ان اتعرف على المواد وكيفيةمذاكرتها وخاصة انها بالانجليزى؟؟ولك جزيل الشكر

نحن هنا يا بنتى فى اى استفسار:D

بصى انا معرفش المنصوره على اى نظام جديد ولا قديم

لو نظام قديم هتاخدى انجلش وفيزيا وكيمياوعلم نبات وحيوان

اما لو نظام جديد هتاخدى مواد كتير كده هسالك عليها

ويا ريت تشرفينا فى موضوعنل بدل ما تلفى فى المواضيع التانيه دى

DR.Neuro

31-07-2008, 01:38 AM

نحن هنا يا بنتى فى اى استفسار:D

بصى انا معرفش المنصوره على اى نظام جديد ولا قديم

لو نظام قديم هتاخدى انجلش وفيزيا وكيمياوعلم نبات وحيوان

اما لو نظام جديد هتاخدى مواد كتير كده هسالك عليها

ويا ريت تشرفينا فى موضوعنل بدل ما تلفى فى المواضيع التانيه دى
يلا من هنا :mad::mad:

هش :p

د/ ماجدولين

31-07-2008, 07:30 AM

طبعا شكراااااااااااااااااا ع التوبيك
بجد جميل ومفيد:)
جزاك الله كل الخير
بس انا عاوزة أضيف حاجة عشان مش نتصدم:confused:
احنا بأذن الله الأربع مواد اللى حضرتك قولتهم
دى المواد الأساسية
بس فى مادتين اتنين تكمليتين:confused:
وهما
الأنجلش والكمبيوتر
شكلنا هنرجع لأيام ثانوى:(
تقبل مرورى
فى رعاية الله

Dr.mayson

31-07-2008, 04:28 PM

يعنى ايه مواد تكمليلة يعنى تضاف للمجموع ولا لا تضاف للمجموع

DR.Neuro

31-07-2008, 05:50 PM

لا بتنضاف

بس عموما أخويا بيفولى سهلين أوى وأى حد بيجيب فيها فوق ال 45 من 50

يعنى مفيش قلق حضرتك خالص

أميرة الورود

31-07-2008, 08:19 PM

شكرا جزيلا يا د. أنس على الموضوع الرائع والمفيد جدا جدا
الموضوع فادني جدا خاصة اني مرعوبة من الكلية جدا جدا
و ربنا يستر معانا

DR.Neuro

31-07-2008, 09:38 PM

العفو وشكرا على التثبيت :)

LA STELLA

31-07-2008, 09:46 PM

شكرا على التثبيت :)

لا شكر على واجب

الموضوع مفيد فعلا لكل من هو مقبل على دخول كلية الطب إن شاء الله
وبيُدخل نوع من الاطمئنان لقلوبهم
وبيساعد طلبة اخرين فى حسن الاختيار لما هو مناسب لكل منهم من كليات بعد الاطلاع على المواد ونظام الدراسة

،،،
جزاكم الله كل خير ووفقكم الى ما يحبه ويرضاه

:)

Dr.mayson

31-07-2008, 11:53 PM

لا شكر على واجب

الموضوع مفيد فعلا لكل من هو مقبل على دخول كلية الطب إن شاء الله
وبيُدخل نوع من الاطمئنان لقلوبهم
وبيساعد طلبة اخرين فى حسن الاختيار لما هو مناسب لكل منهم من كليات بعد الاطلاع على المواد ونظام الدراسة

،،،
جزاكم الله كل خير ووفقكم الى ما يحبه ويرضاه

:)

شكرا طبعا على التثبيت لان الموضوع مفيد جداااااااااااااا بس هو الصراحة لم يدخل اى نوع من الاطمئان الى القلوب بالرغم انوا بيقدم معلومات جيدة جدا عن الكلية وربنا يستر

DR.Neuro

01-08-2008, 12:34 AM

طيب حضرتك عايزة إيه بالظبط عشان تتطمنى

بصى حضرتك

كليتنا سهلة .. بس سلاحها حاجتين .. المثابرة وتنظيم الوقت

لو حضرتك شلتى السلاحين دول ..

أتوقع ليكى يا فندم مستقبل فوق الهايل وإن حضرتك تطلعى من أوائل الدفعة كمان

Dr.ahmed91

01-08-2008, 10:23 AM

DR.Neuro

01-08-2008, 10:27 AM

أوعى يا بنى لازم نعمل منظر برضك :d

freespirit

01-08-2008, 10:56 AM

اولا جزاك الله كل خير يادكتور انس
ثانيا عندي شوية اسئلة كدة فيا ريت تستحملوني
انا عايزة اعرف استعد ازاي للكليلة والدراسة من دلوقتي وازاي استغل الاجازة
وكمان عايزة اشكركم بجد ونكون متواصلين في الدراسة ان شاء الله

DR.Neuro

01-08-2008, 11:03 AM

جزانا وجزاكم الله خيرا

طيب ممكن نعرف حضرتك فى طب ايه الاول

freespirit

01-08-2008, 11:11 AM

انا طب الفيوم

DR.Neuro

01-08-2008, 11:15 AM

يا خسارة .. :(

طيب هنحضر للموضوع دة بس قدام شوية

لو عاوزة حضرتك تسلى نفسك بكلمات انجليزية

freespirit

01-08-2008, 11:30 AM

جزاك الله كل خير يا دكتور على الرد
بس ممكن تقولي ممكن اجيب قواميس ايه
(اسفة لو كنت بضايق حضرتك بأسئلتي)

DR.Neuro

01-08-2008, 11:39 AM

لا والله مفيش أى إزعاج انا جاهز لأى سؤال ..

المشكلة إنى زعلت عشان مش هاعرف أفيد حضرتك فى الحكاية دى عشان مش عين شمس ..

لأنى بجد معرفش الاماكن عندكم

وأى استفسار أنا فى الخدمة :)

freespirit

01-08-2008, 12:02 PM

بجد جزاك الله كل خير وربنا يوفقك لما يحب ويرضى

المحب لرسول الله

01-08-2008, 09:08 PM

يا جماعه الحقوووووووووووووووووووووووووووووووووووووووووني

انا خلاص هحول اما اداب او تجاره

طب ايه ونيلة ايه اخرتها دكتور مش عايزها

انت خوفتني جامد با انس

شكرا يا انس

وبعدين

احم احم يا انوس يا حبيب قلبي

احنا اهل الفيوم

وبالنسبه ل freespirit

انا لي واحد قريبي معيد في طب الفيوم
اسمه د / حسن
بس هو للاسف فرحه الشهر ده
وانا مش عارف اتلم عليه

بس هسأله وهرد عليك
واقول لك ايه النظام

وكمان في موقع خاص بطلبة طب الفيوم
هشوف الرابط بتاعه وهاكتبه

يا ريت اتعرف بحضرتك يا freespirit

عشان انا من الفيوم بس دخلت القاهرة

سلاااااااااااااااااااام

DR.Neuro

02-08-2008, 01:32 AM

خلاص ياعم محب وربنا ألغى الموضوع عشان خاطرك ...

هو أنا أطيق زعلك

freespirit

02-08-2008, 05:15 PM

الحمد لله اخيرا وبعد طول عناء لقيت حد في المنتدى من الفيوم
اهلا بحضرتك وجزاك الله كل خير على استعدادك للمساعدة لاني فعلا كنت محتارة جدا انا حتى لسة ما قدمتش ورقي
بس يا ريت ما تقولش هحول دي تاني لحسن يقولوا بتوع الفيوم مش جامدين وبيخافوا (طبعا ده مش صح )
وبعدين يا اخي فكر اننا في مجالنا اللي اختاروا لنا ربنا ووفقنا ليه ممكن نعمل حاجة ننصر بيها الاسلام (لوبصينا من المنظور ده ان شاء الله كله هيهون وهنستحمل كل حاجة )
عموما جزاك الله كل خير وربنا يوفقك

المحب لرسول الله

03-08-2008, 08:23 PM

د-منى

03-08-2008, 08:42 PM

لموضوع جميل اووووووووووووى وياريت تكملوا كلوااااااااااااااااااااا وباسرع وقت وكل الشكر ليك وياترى حد هنا فى طب المنصوررةالسلام عليكم
انا فى طب المنصورة انشاء الله
بس انت ولد ولا بنت؟:huh:

د-منى

03-08-2008, 09:00 PM

يا جما عة انا فى طب المنصورة انشاء الله ياريت حد يقولى نقدم امتى

Dr.mayson

04-08-2008, 05:31 AM

فييييييييييييينك يا منى من زماااااااان مش تقولى يا بنتى انك طب المنصورة انا ياستى بنت ودخلت طب المنصورة الحمد لله واسمى ميسون وفرحانة اوى انى لاقيتك وبخصوص التقديم فانا اتصلت بالكلية قالولى ان التقديم هبدا بعد المرحلة التانية يعنى انتى لو عايزة تروحى تقدمى ابداى من يوم السبت او الاحد فيما فوق بقى وطمنينى عليكى

freespirit

04-08-2008, 03:03 PM

ايه يا عم freespirit

انا بهزر طبعا احول ايه وبعدين كل اللي على المنتدى عارفهم وعارفيني عشان كده بهزر معاهم

وان شاء الله احنا ادها ونص

اذ كنا قدرنا ربنا على م***ة الفيزياء طب ايه اللي مش هنقدر عليها

وان شاء الله تفتح جوجل وتبحث عن موقع طلبة طب الفيوم هيفيدك اوي الموقع ده
وان شاء الله اجيب لك اللينك قريبا

انا بحثت بس كان في مشكله في الموقع

انا في خدمتك يا عم

سلام

ماشي يا سيدي ربنا يوفقك
وانا الحمد لله لقيت الموقع وافادني جدا فجزاك الله كل خير
وعلى فكرة انا بنت مش ولد وكويس ان الايميل اتحذف من المشاركة لاني ما كنتش هاخده وجزاك الله كل خير مرة تانية

طبيبة مسلمة

05-08-2008, 12:04 AM

جزى الله خيرا كاتبة الموضوع وناقل الموضوع خير الجزاء وجعله في ميزان حسناتهم لمساعدتهم اخونهم الطلبة

بس ممكن تقولي ممكن اجيب قواميس ايه

ممكن حضرتك تجيبى قاموس دكتور فوزي جاب الله
قاموس حلو وشامل ومتوفر في كل الجامعات هتلقيه لونه أورانج كدة

ربنا معاكو ويوفقكوا يارب

طبيبة مسلمة

05-08-2008, 12:06 AM

يا جماعه الحقوووووووووووووووووووووووووووووووووووووووووني

انا خلاص هحول اما اداب او تجاره

طب ايه ونيلة ايه اخرتها دكتور مش عايزها

انت خوفتني جامد با انس

ليه هو حضرتك فاكر ان باقي الكليات سهلة يعني
كل كلية موادها صعبة لو متذاكريتشي ومتفهميتش
حضرتك اعمل اللي عليك وأخلص النية لله
وبجد والله مجال الطب فعلا لذيذ جدا
بالتوفيق ان شاء الله

المحب لرسول الله

05-08-2008, 11:45 AM

شكرا ليك ايتها الطبيبة المسلمه بس انا كنت بهزر

اماfreespirit

انا اسف جدا والله

يا ريت تقبلي اسفي

انا افتكرك ولد لان الاسم موضحش
يا ريت متزعليش

سلاااااااااااااااااااااااااااااااااااام

freespirit

05-08-2008, 02:20 PM

لا خلاص حصل خير انا بس قولت انبه حضرتك
وحضرتك فعلا افدتني فجزاك الله كل خير

darsh gabr

09-08-2008, 05:32 PM

شكراً يا دكتور على الموضوع الجامد أنا الحمد لله طب القاهرة و شايف زملاء كتير برده القصر العينى دى هتبقى دفعة دمار

DR.Neuro

09-08-2008, 11:30 PM

أى خدمة يا دوك .. ربنا يعينكوا إن شاء الله

hoky70

11-08-2008, 12:38 PM

شكرا على هذا المجهود وتمنياتي للجميع بالتوفيق

freespirit

11-08-2008, 03:46 PM

جزاكي الله كل خير ايتها الطبيبة المسلمة على النصيحة بشأن القاموس

DR.Neuro

13-08-2008, 10:22 AM

أكرم بطل لعب لو سمحت :d

الموضوع مش بالطريقة دى

Dr. akram

13-08-2008, 10:46 AM

أكرم بطل لعب لو سمحت :d

الموضوع مش بالطريقة دى

خلاص يا باشا بطلنا لعب
-----------------------------------------
ربنا معاك و مع الجميع
-----------------------------------------

DR.Neuro

13-08-2008, 10:48 AM

خلاص يا باشا بطلنا لعب
-----------------------------------------
ربنا معاك و مع الجميع
-----------------------------------------
:D:D

انت الكبير يا حبى اللى تشوفه صح اعمله :)

طبيب عالمى قادم

26-08-2008, 09:22 PM

مشكووووووووووووووووووور على المعلومات الهامة دى

Dr.Abo Hassan

04-09-2008, 01:10 PM

شكراااااااااااااااااا على هذة المعلومات التى لا غنى عنها

DR.Neuro

04-09-2008, 01:46 PM

:) :) :) :) :)

sumasamy

07-09-2008, 01:56 AM

شكراااااااااااااااااااااا جزيلاااااااااااا موضوعك رائع جداااا وياريت تكمليه بسرعة انا دخلة تالتة ثانوى وبفكر فى الطب على فكرة انتى ايه رأيك فى كليات الطب فى مصر مين افضل بنها ولا القاهرة ولا عين شمس ياريت حد يفيدنى بسرعة

sumasamy

07-09-2008, 02:00 AM

شكرا جزيلا على الموضوع التحفة دا ياريت تستمرى فيه على طول بس ياريت تعرفينا بيكى وانتى فى جامهة ايه

sumasamy

07-09-2008, 02:01 AM

انا عيزة اخد رأيك فى حاجة مين افضل كلية طب بنها ولا القاهرة ولا عين شمس؟؟ ياريت تفيدينى لانى محتارة

DR.Neuro

09-09-2008, 11:54 AM

انا عيزة اخد رأيك فى حاجة مين افضل كلية طب بنها ولا القاهرة ولا عين شمس؟؟ ياريت تفيدينى لانى محتارة
أولا : أنا ولد حضرتك مش بنت ..

والسؤال دة مبحبش أجاوب عليه عشان إخوانى فى الكليات التانية ميضايقوش ..

حضرتك روحى لكل واحد إسأليه على جامعته .. زى ما أنا عملت كنت محتار جدا بين طب القاهرة وعين شمس ..

ٍسألت أطباء عين شمس وأطباء القاهرة فى نفس الوقت ;)

وطبعا الإستخارة وارتحت لعين شمس ... :cool:

وبعدين مستعجلين على إيه :p:)

sumasamy

12-09-2008, 02:25 AM

سورى جدا والله كنت ف**** بنت انا اسفة كمان مرة

sumasamy

12-09-2008, 02:27 AM

مستعجلين على ايه عندك حق الهم جاى جاى بس انا لما قريت التوبيك بتاعك حبيت الطب جدا وشكلى كدة هكرهه جدا

DR.Neuro

14-09-2008, 01:07 AM

ليه يا فندم إيه اللى جاب الكره هنا ؟!!!

scorpion_200200

14-09-2008, 10:32 PM

السلام عليكم
ممكن اسأل!؟ هو احنا حنروح اول يوم الساعة كام؟؟؟؟؟؟؟؟؟؟؟؟؟؟؟؟؟

DR.Neuro

15-09-2008, 01:20 AM

وعليكم السلام ورحمة الله ..حضرتك معرفتناش كلية إيه :) ؟

Dr.MRADI

15-09-2008, 07:59 AM

السلام عليكم و رحمة الله و بركاته
موضوعكو شيق فعلا وشدنى جامد

بس انا مستغربه اوى ان ماحدش اهتم بالسؤال عن مصيره بعد ما يخلص السنه السادسه
ده مهم اوى عشان تعرف ايه اللى يتداكر كويس قوى و هاينفعك و ايه اللى هايترمى فى تابوت فى النيل بلا رجعه
و تعرف ايه اهم مواد عشان ما تضيعش درجاتها
انا بنبهكوا لانى بعمل الماجستير(عقبالكو)و فيه زمايلى بيترفضوا عشان تقديراتهم متدنيه فى مواد معينه
اللى يهمه الكلام ده يقول :(

Dr. MARWA RADI

scorpion_200200

16-09-2008, 01:05 AM

وعليكم السلام ورحمة الله ..حضرتك معرفتناش كلية إيه :) ؟

:rolleyes::d:dكلية قصر العيني:d:d:rolleyes:

DR.Neuro

16-09-2008, 04:16 PM

للأسف أنا طب عين شمس مش هاقدر أفيد حضرتك :d

darsh gabr

05-01-2009, 04:36 AM

فعلا فى ناس مينفعش تحضر فى بعض التخصصات اللى هم جابوا فيها درجات مش كويسة إن شاء الله أجيب تقدير حلو فى الجراحة عشان من و انا صغير كان نفسى اطلع جراحو السلام عليكم لحين مشاركة أخرى بعد عمر طويل باذن الله

azab045

12-01-2009, 01:26 PM

دكتورة مروه كملى موضوعك حسيتفيد منه ناس كثير اوى
مع تمنياتى بالتوفيق

Dr_memo_5_7

26-03-2009, 11:06 AM

شكرا..............................................

Dr/ELNOWIHY

10-06-2009, 12:11 PM

للأسف أنا طب عين شمس مش هاقدر أفيد حضرتك :d

انت طب عين شمس دة احنا على كدة زمايل

بس انا فى سنة اولى انت فى سنة كام؟؟

A L M A S

16-06-2009, 10:55 PM

FRANKENSTEIN

16-06-2009, 11:00 PM

شكرا على الموضوع الجميل ده ..
..
كلية الطب دي كانت ابعد حاجة عن دماغي .. ( كنت بفضل البيطري اكتر :d ) ..
لكن بعد ما شوفت الموضوع ده .. فكرت في الطب البشري ..
..

شكرا مرة تانية ..
و الله يجزيك الخير

هههههههههههههههههههه
انصحك بجد خليك ف بيطري اسهل
بلا طب بلا نيله
اهو صداع ع الفاضي :d

skybaby

07-07-2009, 04:43 PM

السلام عليكم الموضوع ده جااااااااااااااااااااااامد فعلا يستاهل شكر جاااااااااااااامد من غيره فعلا الواحد يبقى تايه وبيحسسنا ان احنا خلا على ابواب الجامعة باذن الله

ABOAB

10-07-2009, 07:40 AM

لو سمحت انا كنت عايز اسأل انالدراسه فى أول سنه بتكون صعبه ولا لأ خصوصا ان هيا بالانجليزى كمان

يعنى الانجليزى دا مشكله ولا لأ

skybaby

10-07-2009, 11:09 AM

السلام عليكم الموضوع راااااااااااااائع ويستاهل اكتر من الشكر لو سمحتم بس عايزة اعرف هو طب اسماعيلية حلو اصل الناس بتقول لا اوعي تدخلي اسماعيلية الزقازيق احلى ياريت حد يوضح

romel2007

10-07-2009, 12:00 PM

علي حد معلوماتي ان في اختلاف في النظام حيث ان طب الاسماعلية الكلية الوحيدة التي تتبع نظام مختلف في الدراسة عن باقي كليات الطب و بيعتمد علي البحث يعني مفيش عندهم كتب بينزلها الدكاترة لكن نظام دراستهم بيكون كله عن طريق البحث .

أحمد أبواليزيد موسى

24-07-2009, 04:00 AM

طيب أنا إن شاء الله هدخل طب طنطا
هل هو نفس النظام والمواد إللي حضرتك قولتها ده ولا مختلف عن كده ؟؟؟؟؟؟؟؟؟؟؟؟؟؟؟؟

شمس الدقهلية

24-07-2009, 09:38 PM

مشكلة الدراسة بالانجليزى ازاى ممكن نتغلب عليها قبل الدراسة ماتبدأ بالنسبة لطب

أنا هأدخل طب المنصورة

ريوان احمد

27-07-2009, 12:27 AM

sumasamy

27-07-2009, 12:56 AM

بجد بجد موضوع هايل جدا ودخلت طب فى دماغى بجد عشان ان شاء الله يبقى الحافز الجامد الى يخلينى اذاكر فى الثانوى عشان اوصله بس عايزة اعرف من الدكاترة كانو بيذاكرو ازاى فى الثانوى
عشان يبقو قدوة ليا ونبقى ان شاء الله وبأذن الله زملا
او لبلاش اقول زملا يبقو دكاترتى واهو يبقى فى وسطة ليا بالمرة
اولا /ربنا معاكى وشدى حيلك للثانوية لانها عيزة واحد جامد بجد ومش بيتعب بسرعة وربنا يوفقك
وثانيا/نصيحة من اخت ليكى بلاش تزاكرى قوى من اول السنة لانك هتيجى فى الاخر وتتعبى
ثالثا/سيبى كل حاجة على ربنا اعملى اللى عليكى وبنية كوبسة وان شاء الله ربنا مش بيضيع تعب حد ابدااااااااااا واسألى مجرب واختك مجربة كتييييييييييييير
رابعا/بلاش تسمعى كلام اى حد عن الثانوية ويكون مش جايب مجموع عالى لانه هيعقدك وهيكرهك فيها
ونصيحة اخيرة كبرى حلمك علشان كل متكبرى حلمك كل متقدرى تحققيه وربنا يوفقك ويكرمك

Dr.Cheetah

27-07-2009, 06:46 PM

انا لسة داخل سنة اولى جامعة m u s t لو في اي معلومات عن التدريس فيها يا ريت تقولهالي

Franklin

28-07-2009, 11:13 AM

السلام عليكم

شكرااااااااااااا جزيلااااااااااااا على هذا الموضوع الرائع

بصراحه انا حبيت الطب اكتر بعد لما قرات هذا الموضوع

هو صعب بس لذيذ و الله المستعان

انا جبت 99,39 و داخله ان شاء الله طب اسماعليه لو فى حد داخل طب اسماعليه يا ريت يرد و خصوصا لو كان فى سنه تانيه او
تالته

يعنى اخد خبرة منكم

hawass007

04-08-2009, 08:35 AM

موضووووووووع رائع

heba 77

05-08-2009, 03:49 AM

ممكن حد يقولى اعمل ايه اثناء الاجازه عشان مبقاش مش فاهمه حاجه اول شهرين انا طب منصوره ان شاء الله

طبيب عالمى قادم

10-08-2009, 12:44 PM

انت طب عين شمس دة احنا على كدة زمايل

بس انا فى سنة اولى انت فى سنة كام؟؟
على فكرة انا كان نفسى نتعرف على اللى في عين شمس كلهم اللى فى المنتدى
ياريت يا دكتور انس نتعرف على بعض
شكرا

Dr.Cheetah

13-08-2009, 03:10 AM

انا مش عارف لية خايف و حاسس اني مش هعرف اذاكر الانجليزي والحوار دا حد يطمني

تيتوطلبه

13-08-2009, 11:27 AM

السلام عليكم انا هبة عايزة اكلم واحدة علشان اعرف منها شوية استفسارات

impct

24-08-2009, 02:46 PM

متشكر جدا على المعلومات بس عاوز اسال هل النظام ده هو نفس النظام اللى فى طب اسكندرية؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

timo mido

31-08-2009, 03:09 PM

انا طب اسماعيليه يعني amrican system وبنشتغل بنظام problem solving الكلام ده برده هيبقي عندنا ولا ايه؟؟؟؟؟؟؟؟؟

dr rema

20-09-2009, 12:29 AM

جزاك الله الف خير :dبس هوه احنا هنفضل بجد اول شهرين مش فااااااااااااااااااااااااااااااااهمين حاجه انا لسه اولى وخايفه مووووووووووووووت:(:(:(:(:(:(:(:(:(:(:(:(

lovelyheart

27-09-2009, 02:45 AM

بجد موضوع اكثر من رائع
بس تصدق زعلت كان نفسي اشرح علطوووول :d
اه و الله ياريتنا حتي كان عندنا تشريح حيوانات
اهو اي حاجاه تصبرنا

dr/a.a.a.h

01-10-2009, 02:47 PM

شكرا جداhttp://www.thanwya.com/vb/life/icons/star.gif

dr/a.a.a.h

01-10-2009, 02:48 PM

اريد ان اسال عن بعض الموضوعات واكثر ايضاحا

dr.shwshw

10-10-2009, 12:29 PM

شكرررررررررررررررا جزيلا علي هذا الموضوع انا دلوقتي عرفت الكلية

اسعد عصام

11-10-2009, 10:11 PM

اجد صعوبة فى الترجمة ماذا افعل وانا طالب من الفرقة الاولى طب

d. islam adel

12-10-2009, 08:13 PM

نايس توبيك
و شكرا على المساعدة
اعرف نفسى
انا لسة جديد
اناسلام
طب طنطا فرقة اولى
تقبل مرورى

d. islam adel

12-10-2009, 08:21 PM

السلام عليكم
انا طب طنطا وعايز اى حد من طب طنطا
نتكلم عن الكلية
وشوية استفسارات

l0vely girl

22-10-2009, 03:53 AM

يا جماعة لو سمحتو عايزة كتب و مراجع علمية عن الانزيمات
بس تكون بالعربى مش بالانجلش
يا ريت اللى يقدرى يجيبلى الكتب دى اكون شاكر ليه جدا

FRANKENSTEIN

22-10-2009, 09:24 AM

اجد صعوبة فى الترجمة ماذا افعل وانا طالب من الفرقة الاولى طب

الموضوع بيبقي صعب بس ف الاول

بعد شوية حتمشي اوي ف الترجمه
حتبقي حاجه بسيطه بالسنبه لك

واساسا بعد اول شهر مش حتستخدم القاموس الا ناردا

لان المصطلحات بتتكررر معاك كتير

ياللا ربنا معاك

FRANKENSTEIN

22-10-2009, 09:25 AM

يا جماعة لو سمحتو عايزة كتب و مراجع علمية عن الانزيمات
بس تكون بالعربى مش بالانجلش
يا ريت اللى يقدرى يجيبلى الكتب دى اكون شاكر ليه جدا

مصطلحات بالعربي صعبه اوي تلاقيها ع فكره

انا دورت بس ملقتش غير انجلش

اسف جدا :d

l0vely girl

23-10-2009, 05:08 PM

مصطلحات بالعربي صعبه اوي تلاقيها ع فكره

انا دورت بس ملقتش غير انجلش

اسف جدا :d

شكرا لحضرتك و لاهتمامك
ربنا يوفقنى و اقدر الاقى حاجة بالعربى

Mahmoud_Nassar

04-01-2010, 12:20 PM

http://i43.tinypic.com/24xp84n.jpg

هانى وقع فى البير
قصدى
شادى نام على السرير
يوووووووه
قصدى
هابى نيو يير
ههههههههههههههه
كل سنه وانتو طيبين جميعا
وان شاء الله يكون عام سعيد علينا
ان شاء الله
يارب يكون وش السعد والنجاح السنة دى
بأذن الله
ياريت اكون احسن صديق ليكو بأذن الله
وكل سنه وانتو طيبين

http://www.alltalaba.com/board/style_emoticons/default/blowup.gif

http://s5.tinypic.com/2qsw5fc.jpg
مستشار محمود نصار

http://s5.tinypic.com/2qsw5fc.jpg

سلمى سامى سليم

10-02-2010, 03:36 AM

جزاك الله كل خير

جيلا هيما

11-02-2010, 12:26 AM

شكراااااا
ا جزيلا أخي العزيز علي هذا الموضوع

دكتورة منة

21-08-2010, 11:57 PM

ميرسى عالطرح المميز
بالتوفيق

Smart Rose

02-12-2010, 07:07 PM

شكلها كلية لذيذة ..
يا رب أقدر أدخلها ..

المشكلة في التشريح شكلهـ مرعب ..

و الدراسة بالانجليزي . . حاسة انها هتكون صعبة ..

هو الكيمياء الحيوية فيها معادلات وحاجات زي اللي في الكيمياء كدا ؟

zamalek1

12-12-2010, 11:06 AM

عندى طبعا خمس مواد العربى والانجليزى والرياضة والكيمياء والفرنساوى
نفسى فى الطب البشرى حلم العمر بالنسبالى والرد على كل المشككين فيا انا من ابتدائى كنت شاااااااااااطر اوى لحد اول ثانوى مستويا هبط بطريقة غريبة جدا وعشان اثبت نفسى حططنى تحت ضغط رهيب مغ تفسى قبل اسرتى والناس بس انا داخل على الترم التانى فى تانية ثانوى وحاسس ان حلمى هيضيع زى حلم الكورة ولو ضاع الطب من ايدى هعيش بقية عمرى محبط عديم الثقة بي حتى ادخل طب واقعد فيها مليون سنة
بس مستويل مش مريحنى خالص

zamalek1

12-12-2010, 11:08 AM

احمد هيونداي

22-03-2011, 05:57 PM

والله عندك حق

انك ميت وانهم لميتون

لا اله الا الله محمد رسول الله

اللهم امتنا على الاسلام

فاطمة456

07-06-2011, 06:40 PM

http://www.thanwya.com/vb/life/icons/neww1qw1.gif
اولا: السلام عليكم يا دكاترة انا طالبة فى الثانوية بس انا عايزة احدد هدفى عشان اعمل لية وانا عايشة فى حيرة فظيعة وخيفة حتقولولى خيفة لية حقولكم لنى مش عارفة محتارة بين كلية صيدلة ولا طب انا من النوع اللى بحب المغمرة ونفسى اشتغل شغل ممتع غير ممل ودة بيتوفر طبعا فى كلية طب بس من ناحية تانية بقول انى كلية الطب حتخلينى مشغولة ومعيش وقت وده مينفعش بالنسبة ليا عشان انا بنت والبيت ان شاء الله والعيال وانتوا عارفين طبعا وناجى لكلية الصيدلة معلش يعنى هى شغلانة مملة كل اللى بتعملة انك بتفتحى صيدلية وتقعدى فبها ليل نهار وانتى على الكرسى ودة ملل اما فى شركة ادوية والمسئولية والنسب ودة لو حد قبلك اصلا وهو ده الصراع اللى جوايا ومش عارفة الاقيله حل.......
ممكن لو سمحتم تساعدونى.