مشاهدة النسخة كاملة : يوميات :سيد بيه الخروف .....متجدده
بورسعيدى 02-05-2006, 01:42 AM مغترب عبيط ..من خيبته..فرحان انه راجع مصر:.......
راجع مصر بعد 10سنين غربه
ركبت طيارة مصر للطيران
صدقونى حسيت وانا داخل الطيارة بريحة ملوخية بالتقلية داخلة نخا شيشى واحشنى اكلك ياما
فى شركات الطيران التانية معاندكش وقت تشم علشان عنيك بتبقى زايغة على الركاب ...ماعلينا
مضيفات مصر لطيران اخر احترام وشياكة ..الله عليكى يامصر والطيارة واضح انها جديدة ومتكلفة..عارف عارف حتقولوا موش موضوعنا
على بركة الله طلعت الطيارة وعينك ماتشوف الا النور.. ايه..خير الله ما اجعله خير اخ من الاخوة اخد ركن فى الطيارة موش عارف جابه ازاى على الرغم من الطيارة مفيهاش منفس ..والله واكبر وبدا يصلى.....عمى ..اخويااا....كابتن ...طب ازاى والقبلة ..ووو ....الواوات كتير ولا تعليق.
ادامى ست مصرية ايه تبارك الله مكياج ايه ..وريحه مدرك ايه.. قصدى.. بارفان غالى من اللى بيقولوا عليه..واضح انها لسه خارجة من عمرة شد وش ودهانات على حبة ترقيع والذى منه
من الاخر نيو لوك .فى بالى قولت لما ده النيو لوك اما اللوك القديم كان شكله ايه وبخباثة قلت لنفسى ادفع نص عمرى واشوفها قبل النيولوك ...لا وعلى ايه هو العمر بعزقة
واذا بصوت ملائكى ...مدام.. يعنى.. مخكوا مايروحش لبعيد.. بتكلم ابنها بالانجليزى ...الله وايه لزمة الانجليزى والطيارة مصرية والقعدين من غير حسد مصريين والواد مصرى والام مصرية بالصلاة عالنبى
وواضح والله اعلم انها من بولاق الدكرور مع الاعتذار لبولاق الدكرور طبعا
الاستاذ اللى جنبى كان قاعد موش على بعضه كل شوية يقوم ويقف ويعدل فى الكراسى قولت له ايه مالك قاللى موش عارف عاوز اظبت ضهر الكرسى وموش عارف قولتلوا بسيطة وتطوعت فى شهامة ابن البلد ودوست على الجرس علشان المضيفة تيجى وياريتنى ما دوست
جت الست المضيفة وبكل رقة وذق ابتسمت وباخر احترام وادب قالت ايوه يافندم
طبعا الاستاذ اللى قاعد جنبى ابدى شئ من الكسوف (عرفت فيما بعد انه ماكانش كسوف..)وبما ان انا اللى ضربت الجرس تطوعت بشرح المشكة
وعينك ماتشوف الا النور... الملاك بقى وحش كاسر كشر عن انيابه وزام وهاج وكراسى طارت فى الهوا(والحمد لله ماكانشى فيه كلوبات) انتوا يامصرين كده الطيارة طالعة سليمة.. الكرسى عملك ايه. علشان تكسروا
وعموما بقى مافيش اى كراسى فاضية وحاتفضل قاعد عليه كده لغاية مانروح مصر.
.وكل اللى كان بيعملوا صاحبنا اثناء وصلة الردح الحيانى واللى مايشترى يتفرج انه كان بيهز راسه بالايجاب عل وزن اى نعم وانتهت باعتذار صاحبنا ونشكرالمولى ان المضيفة قبلت الا عتذار عن مضض .
..تفتكروا خلص الموضوع ?
طبعا لا .....حاكمل بعد سماع الردود يوميات منقولة
zizo2_2 02-05-2006, 01:49 AM دائما تستخدم عامل التشويق في مواضيعك
عايز نرد على ايه على المصرين ما كلنا حافظنهم وهترفينهم كويس مبيسبوش أي حاجة عدلة عل حالها أبدا
عايز أرد أقولك ايه معظم المصريين عينيهم زايغة
انت عاوز مننا ايه عمال تقلب المواجع علينا في مواضيعك ليه
أسلوب كوميدي ساخر يحمل في محتواه الكثير والكثير
يعجبني ذلك الأسلوب في عارض المشاكل
بورسعيدى 02-05-2006, 01:54 AM ويعجبنى دائما ردك ومشاركتك
ولكن لا تستعجل الاحداث
وطول بالك
هو انت لسة شوفت حاجه
zizo2_2 02-05-2006, 01:55 AM يا مسهل
قمر قمر 02-05-2006, 02:34 AM فى اجمل من كده
على العموم ملها مصر مزى الفل وانضف من الصينى بعد غسيلة
Miss_CaR!zma 02-05-2006, 07:38 AM والله يا استاذ بورسعيدى
انا بقرا مواضيعك اكتر من مره علشان اجيب اللى وراها
وفعلا موضوع جميل واسلوب العرض بتاعه اجمل واجمل
فحضرتك بتناقش قضيه معينه
بس بطريقه تخلى ان اللى يقرا اول الموضوع لازم يجيبه لآخر حرف فيه
وعموما مصر مش موجوده دلوقتى
الكيان المصرى اختفى من زمان
هى موجوده
آآآآه موجوده... لكن على الخريطه وبس
foxxx 02-05-2006, 09:05 AM يا جمالك يا استاذ بور سعيدى
بورسعيدى 02-05-2006, 11:11 PM شكرا لمروركم جميعا
نورنى مرورك يا قمر 14
ربنا يخليكى يا تويتى
وجهة نظرك فى محلها والحمد لله
شكرا يا فوكس على المرور
بعد قليل سوف اقوم بوضع الجزء التالى
msamido 02-05-2006, 11:54 PM يا جماعه مش معني الوضع الي احنا فيه ان مصر مش موجوده
مصر موجوده وهتفضل طول عمرها موجوده طول ما اهلها اللي هما احنا وسيبك من اي حد تاني موجودين طول ما حبها جوانا وطول ما فيها ناس مستعده تضحي بكل حاجه ليها يبقي موجوده مش معقول نتجاهل اكتر من 70 مليون علشان عشرين او خمسين او حتي مليون بني ادم سرقوها مصر موجوده موجوده موجوده موجوده كفايه انها موجوده في قلوبنا
كنت هنسي اقول شكرا علي الموضوع استاذي
حمادة نور 03-05-2006, 01:46 AM تسلم ايديك استاذ بورسعيدى
كان ليا الشرف الرد على مواضيعك
Xx.Youri.xX 03-05-2006, 10:08 PM اهوه واحد اتشرف بالرد على موضوعك يا عم
ابسط بقى ;)
looolz
الموضوع حلو يا بورسعيدى وانا ان شاء الله اتابع
بس انت بتجيب الحاجات دى منين
سلام
بورسعيدى 03-05-2006, 10:52 PM وصلت الطيارة الى القاهرة ...قاهرة المعز لدين الله الفاطمى
لمس قلبى ارض المطار قبل ماتلمسه رجلى... خفق قلبى (يعنى دق فى اللغة العربية ..حبكت معلهش)
سجدت لله شكرا... الله عليكى يامصر ..واغنية لشادية زمان بتدور فى دماغى ياحبيبتى يا مصر يامصر ...يابلادى يا..... ايه مش فاكر الباقى .
دخلت من بوابة المطار وحاسس كل المطار فاتح اديه وبياخدنى بالحضن ويقولى زى مابتقول نجاة حمدالله عالسلامة يابواجمل ابتسامة ياما .......وهوب خبطت فى اللى ادامى معلش انا اسف...
رد هو... ولا يهمك بتحصل فى احسن العائلات وضحك ضحكة عالية بصهاليل زى بتاعة الافلام... قال يعنى الواد قال نكتة ومستنينى اضحك زيه ..بصيت له برخامة وقلت له طيب.
..طبعا انتم كنتم مستنين موقف والا حكاية احكيها لكم عن الراجل ده بس معلشى المرة دى اوت مافيش حاجة من دى
دخلت على ظابط الجوزات مساء الخير ياباشا(باسمعهم يندهوا الظابط فى الافلام بباشا قلت اجارى انا كمان الموضة) بص لى بمنتهى القرف وسالنى مصرى ?طبعا كنت ممكن استظرف واقوله لا ..لوندى ههههههه وازيكم ازيكم انا جاية اخدم عندكم زى مابتقول الممثلة منى زكى ...قلت بلاش خلى الطيب احسن ده ظابط ياابا...رديت عليه ايوه ياباشا مصرى
سالنى تانى.. بس بقرف معصور عليه لمونة..معاك حاجة تثبت ان انت مصرى(لسانى اهو زى البرابنت ومتبرى منى.. طبعا الكلام ده كان فى سرى)لا يافندم مامعيش رديت انا...قالى يبقى حاتحتاج فيزة سياحة
.. (ياحلاوة ايه الهنا ده كله صحيح صبرت ونلت بعد كل الاغانى اللى غنتها والنشيد الوطنى.. بلادى.. بلادى.. تقولى فيزة سياحة)ماشى قصرت ورحت جبت طابع البوسطة اللى قال عليه وكلفنى 93جنيه ورجعت له بس ماكانشى موجود كان واحد تانى.. دخلت عليه اتفضل ياافندم طابع البوسطة علشان فيزة السياحة .. بص لى وضحك قلى مين طلب منك ده ?..قلت له الظابط زميلك كان قاعد مكانك هنا من شوية
راح رد عليا وقلى.. طالما انت مصرى مش محتاجه ..قولتلوا بس انا معايا بسبور اجنبى ومامعيش حاجة تثبت انى مصرى ...
وبمنتهى الذوق ختم البسبور وقلى حمد الله على السلامة ..قلتله طيب وطابع البوسطة ابو 100جنيه اعمل فيه ايه?.. بص لى بخبث وقلى.. اقولك وماتزعلشى ..قلتله لا وعلى ايه الطيب احسن.
يلا يامصر حار ونار فى جتتك ال 150اللى دفعتهم فى طابع البوسطة قصدى موش خسارة فيكى يابلدى يا حبيبتى(اه باحسب ..دى مصر اللى بترد تقول كده)
استلقانى شيال الشنط عند السير اللى نزلت عنده الشنط بتاعتى
وبسرعة عنك يابيه ماتتعبشى انت نفسك ورينى الشنط بتاعة سعادتك ..شاورتله عليهم شالهم وحطوهم على العربية اللى كانت معاه وقالى ظبتنى بقى يابيه قبل مانتحرك علشان اوصلك لحد الجمارك واطلعك على بره على طول
قولت فى نفسى هو الراجل ده اللى انا كنت عاوزه ..حايخدنى عالجمارك وعالطول مافيش تفتيش ما انا حاظبطه زى ماقال وعدل على بره طبعا اكيد مامور الجمرك عارفه ولما يشوفنى معاه حايعدينى من غير تفتيش
عنها ورحت مطلع حتة ورقة خضرة ب20دولار امريكانى
لهفها صاحبنا وقلى بص بقى ياباشا شايف ايد العربية دى تدوس عليها كده تمشى العربيه.. يلا ذق العربية... والجمارك ادامك هناك اه ...حمد الله عالسلامة.. وسابنى ومشى
.......ياابن اللذين امنوا..هو احنا فينا من كده.. وانا اللى باقول يبلادى وشادية ونجاة حمدالله عالسلامة وعبد الحليم يقول بالاحضان ....قوم اتاخد بالافيان ..كده عينى عينك اخد على قفايا فى عز الظهر...وقفت كده ..ومسحت قفايا وقلت كما قال الشاعر معلشى يازهر.
ورحت داخل عالجمارك ودى بقى عايزة لها قعدة تانية...
وزى ما بيقولوا فى الرويات ودخل نور الصباح فسكت شهر ريال عن الكلام المباح..قوم البنت شهرهربانة فاتحة المطوة قرن غزال وحطاها فى كرشه وقايلة له.. وله ..وله ..حتكمل ولا اجيب كرشك ..فتثائب وقال لها كده شوفتى اللى حصل انا لازم اروح الحمام..ههههههههه حتة غلاسة الباقى جاى بعد فاصل الاعلانات :P :P :D :D
=ivan= 04-05-2006, 12:42 PM هههه..
كمل يا باشا ....احنا متابعين
Xx.Youri.xX 04-05-2006, 03:37 PM ههههههههههههههههه
انت بتجيب الحاجات دى منين
!!
قمر قمر 04-05-2006, 09:23 PM الى يعيش ياما يشوف
بورسعيدى 04-05-2006, 11:02 PM شكرا للمرور واليلة ان شاء الله الجزء التالى
بورسعيدى 05-05-2006, 01:09 AM قولت ياواد ولا يهمك من اللى حصل لاانت اول ولا اخر اللى خدوا على افاهم وايه يعنى
الحياة بمبى... وبردوا بحبك يامصر
وعلى فكرة الكلمة دى حافضل ارددها طول الرحلة.
وطول الوقت اللى قضيتوا فى مصر لغاية ما حسيب مصر ...الكلمة حتكون شئ تانى ... وعلشانك يامصر رفضت ارجع عل مصر للطيران بلاش نسبق الاحداث.
افكركم وعلشان الناس الى نامت منى دى انا لازلت فى المطار براقب عمليات التفتيش اللى بيقوم بيها مامورى الجمارك مع الركاب
معظم المصريين اللى اتفتشوا اتعاملوا بطريقة اقل مايقال عنها ..عدم احترام للادامية المصرية وكل المواقف اللى شوفتها تهلك من الضحك
لكن حبى لبلدى وبالخصوص الصعايدة اللى ياما ضحكونى بس المرة دى وبالعند فيكم موش حاضحكم عليهم.
وقعت عينى على مامور جمرك كل ما واحد يدخل عليه يعديه من غير ما يفتح الشنط
كل اللى كان مامور الجمرك يعملوا.. يفتح بسبور الواحد من دول ويقلب فيه ويساله سؤال والراكب يجيب بهز راسه بمعنى كلمة لا
يقوم مامور الجمرك يحط ايده في جيبه ويقولوا اتفضل ....ياسلام كده من غير تفتيش ولا حاجة
والسيناريو بيتكرر ادامى اكتر من 10مرات
الراكب يديلوا البسبور والمامور يفر كام ورقة من البسبور وبعدين
يحط ايده فى جيبه ويسلم البسبور للراكب ويطلع الراكب من غير تفتيش
بس مافهمتش ليه كل مرة يفتح بسبور يحط ايده فى جيبه وتفضل فى جيبه لغاية مالراكب اللى بعده يديله البسبور... مافكرتش كتير ..قولت يمكن سقعان....سقعة ايه واحنا فى يوليوا ..ماتشغلوش بالكم انتم.. اكيد سبب تافه.
دخلت على صاحبنا المامور وسلمته البسبور و قلب الصفحات زى السيناريو اللى شفته وسالنى السؤال اللى توقعته... معاك حاجة تتجمرك ?وطبعا من جانبى حرصت ان الاجابة تكون مطابقة للمواصفات قصدى للسيناريو وحركت راسى ذهابا وايابا ..لا ..واكدت كمان بلسانى وبالفم المليان لا...
فوجئت ان مامور الجمرك فر البسبور مرة تانية ..وتالتة... ورابعة... ومرة خامسة.. علشان الحبايب .
واضح انه كان بيدور على حاجة فى البسبور..ايه ? موش عارف. . وكنت حاستظرف كالعادة واقول له ..اجى ادور معاك ?
قولت بلاش لان الليلة واضح انها كوبية ....وراح صاحبنا قفل البسبور ..بس المرة دى محطش ايده فى جيبه زى كل مرة ..وبص لى ودار بينا الحوار التالى....
هو:طبعا انت كندى?
انا:ايوه(باحترام)
هو :وبقالك كتير هناك?
انا:10سنين (خمسة وخميسة)
هو :وطبعا معاك الجنسية?
انا:(عبيط انت امال ملة البسبور اللى فى ايدك بتقول ايه) ايوه معايا.
هو :واكيد اتجوزت هناك علشان تاخد الجنسية
انا:(الرجل ده اكيد ظابط مخابرات)لا يافندم انا هاجرت هجرة رسمية من مصر وعطونى هما الجنسية علشان لاقونى واد مطقطق وحليوة.
هو :بص لى بفتور وابتسم
انا:فى اى اسئلة تانية حضرتك?
هو :جايب معاك دولارات?
انا:اه...
هو :كام ? ..وياترى غيرتوهم من البنك?
انا:قلتلوا نعم......بس نعم دى.. فى الغالب بيعقبها صوت عميق ياتى غالبا من المناخير زى ما شباب كرموز المحترمين بيعملوا...(كرموز من اعرق الاحياء الشعبية فى اسكندرية)
وهممت انى افتح ايدى واسقفلوا واقولوا احمد ياعمر..زى ما ستات الانفوشى المحترمات برضوا بيعملوا.
وهنا فى 3اسئلة.....
الاول:فين الانفوشى?..ايه ياخونا ..عمركم ماشفتوا... وله ياااحموووو هات التاكسى يلاه...اصل(الخنزيرة) عكمت عليها الضرايب ولا عزاء للمعلمة فضة.
السؤال التانى :ايه الافيه بتاع احمد ياعمر ده ?..اصله يجنن ..ياى....مالهاش اى معنى لكنها بتداول كشتيمة وصيغة استنكار.
السؤال التالت:انت ناوى تكمل يابورسعيدى? فى الحقيقة ....ايوه
..الموضوع كبر اوى
لحظة واحدة اتحزم واجيلكم
zizo2_2 05-05-2006, 01:30 AM انت يا راجل مش هتبطل حركاتك دي وتكتب موضوع على بعضه بقى
بورسعيدى 05-05-2006, 11:50 PM شكرا يا زيزو على مرورك الوحيد
كفاية نورك علية يا صاحبى
نكمل..??
قولت اللهم اغزيك ياشيطان ولم الدور.. رد عليا الشيطان وقلى شايفنى مكنسة تقولى لم الدور ..قولتلوا حتى انت ياشوشو بتتريق
ماعلينا...
صاحبنا مامور الجمرك طلب انى افتح كل الشنط وبدا يشمر عن ساعديه كما لوكان يستعد لفتح عكا
فتحنا الشنط... بدا يدعبس فى الشنط ولا اللى بيدور على مخدرات وفجاءة..
تهللت اساريره (لغة عربية فصحى علشان ماتقولوش انى حارمكم من حاجة خالص)
وراح ماسك علبة برشام لونها ازرق وعلى هيئة اللى مسك الديب من ديلوا ..وسالنى فياجرا دى ? (فال الله ولا فالك ..تف من بقك ..بعد الشر ..بعد الشر..ده انا لسه شباب ..وزى الفل) قلت له لا.. ده برشام صداع بس لونه ازرق..رد هو وقال اه باحسب
وايه ده ? ااقولكم الصراحة اتلخمت وماعرفتش ارد..اصله كان ماسك ازازة بارفان... طيب بالله عليكم ردواانتم. ...خلاص رديتوا.
واضح ان الذوق موش حينفع مع الراجل ده ..رديت بكل برود ازازة ريحة ...وتوالت الاسئلة السخيفة على منوال هبلة ومسكوها طار
وايه ده كاميرا. وده بنطلون .. ومنين دى ..وبكام ده.. خد عندك ..ساعة قول ساعتين
الركاب مشوا كلهم ووصلوا بيتوهم ..وباقى الموظفين قاعدين يتفرجوا علينا ..والعمال مستنينا ننهى ...علشان يطفوا النور بتاع المطار ترشيدا للاستهلاك
وانا وصاحبنا واقفين واخيرا قرر انه يسيبنى على شرط انا حاحجز اسكانر ..كلكم طبعا عارفين الاسكنر قولتلوا ليه ده بقى من الممنوعات?
قلى ماعرفش.. بس لازم تجيب موافقة مباحث الاموال العامة على دخول الاسكنر للبلاد (مايكونشى الاسكنر ده متهرب من الضرايب وانا معرفش ...موش فاهم ايه دخل مباحث الاموال العامة فى اسكنر)
لميت الدور علشان انتم صعبنين عليا واكيد زهقتم زى كده
خرجت من المطار ...واستنشقت اول دفعة هوا نسيم عليل تدخل صدرى من 10سنين
الله على هواكى يامصر .كح كح ..كح كح كح ..ده انا بس بكح واضح ان هوا مصر دلوقتى موش هو بتاع زمان.
صديقى عمرى كان مستنينى فى المطار.. بسرعة علشان واضح ان الكلام ممل وانتم عارفكم بتملوا بسرعة
ركبت مع صاحبى عربيته وحكيت له على اللى حصل ضحك وقلى كان مستنى رشوة ولما انت مافهمتش سالك على الصريح غيرت دولارات
كلمة واحدة خرجت منى.............................اخص
وانا قاعد جنب صحبى فى العربية قولوا انتم مين معدى جنبينا وسايق عربية ماركة اللى يحب النبى يزق .....مضيفة الطيران اياها قولت لها هو انتى تعاليلى بقى انا كنت مستنى اشوفك
........هنالك لاح نور الصباح ...فسكتت ام السيد ..عن الكلام المباح.......انا اسف نسيت ااقولكم ان شهر هربانة خلصت على شهر ريال بعد ماعملها على روحه المرة اللى فاتت
ودخلت السجن.. بس للامانة هى مادخلتشى السجن علشان موتت شهرريال لا..
علشان بعد ماقطعتوا نسيت تعبيه فى الاكياس البلاستيك فالجيران شموا الريحة فبلغوا البوليس
تتبع....
zizo2_2 06-05-2006, 12:00 AM طيب هنستجمل زي ما شهرزاد استحمل لغاية لما تخلص وبعدين السياف هيكون جاهز
وإن شاء الله استاذي الموضوع الجاي لحضرتك هيكون يوميات زيزو هديك قصة حياتي كلها وانت اعملها لي يوميات
هههههههههههههههه
دمت لنا بالخير استاذي
elnono_308 08-05-2006, 09:44 PM شكرا استاذ بورسعيدي بس ممكن
اسال حضرتك سؤال
انت حضرتك اللي بتكتب القصص ديه من دماغ حضرتك اقصد من تاليفك ولا لا
أ/ مروان حسن 08-05-2006, 10:20 PM بوسعيدي
قصه رائعه مشوقه ورغم انها أخذت من وقتي الكثير ولكنها حقا تستحق كل هذا الوقت وأكثر وننتظر المزيد
و
المزيد
بورسعيدى 08-05-2006, 11:02 PM شكرا لمروركم جميعا
بالنسبة لسؤال elnono_308
هو فى حاجات انا باكتبها وفى حاجات منقولة طبعا
يعنى مش كل الاعمال من تأليفى
ها ....
نرجع لليوميات ؟
بورسعيدى 08-05-2006, 11:10 PM وانا قاعد جنب صحبى فى العربية قولوا انتم مين معدى جنبينا وسايق عربية ماركة اللى يحب النبى يزق .....مضيفة الطيران اياها قولت لها هو انتى تعاليلى بقى انا كنت مستنى اشوفك
بصراحة لقيت انها فى اللى عملتوا فى الطيارة كان عندها حق واكيد بيعدى عليها مصايب مااحنا مصريين وفاهمين الفولة
قولت ياواد عيب خليك متحضر وجنتلمان فرحت اول مابصيتلى وعرفتنى
روحت مشاور لها على طريقة هاى..ايوه انا هو بتاع الطيارة
تخيلوا عملت ايه?
بصيت لى بمنتهى القرف اللى فى الدنيا وعلى طريقة ايوه عارفاك.. هو انت ...وراحت مدورة وشها بالطريقة التقليديه سم ..كده
يلا..... انا يتقلى سم كده ...طيب
بس وعديناها بالعربية وكملنا طريقنا...ايه مالكم مستغربين انى ماقولتش اى حاجة ..هو انا اول واحد يتقلوا ياسم..المسامح كريم
مصر ومصر كلها عزايم واكل وانا اموت فى الاكل المصرى .. ماشفتوش من يجى كده 10سنين
صاحبى واحنا راجعين من المطار قلى والفرحة بتنط من عنيه حضر نفسك يابطل علشان المدام عندى طباخة درجة اولى وانا قولت لها على كل اللى بتحبه وعملتهولك
وصلنا البيت عند صاحبى ولو انى ماكنتش جعان لكن انا واحشنى قوى اشوف منظر السفرة المصرى وهى مترعة بكل ملذا وطاب واشى مشوى على محمر ومشمر ومحاشى على طواجن ....معلشى جوعتكم .. يلا اتفضلوا معانا....
اول ما عينى وقعت .. كان على فرختين لاحول لهم ولاقوة واضح انهم بذلوا محاولات رهيبة للفرار من مرات صاحبى اللى لفت تجرى وراهم الشقة لحد ما مسكتهم
واكيد مرات صاحبى دى ست بيت شاطرة ومدبرة واكيد بتربى الفراخ في البيت
..بس السؤال اللى كان بيدور فى بالى ليه الفراخ حجمها صغير? اقل ما يقال عنها انها تقاوى فراخ ..والا.. يمكن الفراخ كانت عاملة رجيم ..والا يمكن كانوا عاملين اضراب..?
.ايه الوساوس دى كلها اصحوا ياسادة ..اتضح انها فراخ شواية اشتروها من برة ....مات اول حلم من احلامى... فرخة بلدى
موش مهم اكيد فى حاجات تانية عملها المدام
وايه ده ...ممبار ..احمدك يارب..والقيت نظرة مابين الممبار وصاحبى
نظرة كان مفادها ربنا يخليلك مراتك ...يااخونا الست اللى تعمل ممبار دى اكييد وصلت لاعلى درجات الاحتراف فى المطبخ ....بس ياخسارة لقيت صاحبى بيقولى انا عارف انك بتعز الممبار ..وصيت عليه جى معمول جاهز من قرية عبدالوهاب..
ده كمان موش من عمايل ايد المدام?
فقلت انجز واسال .. هى المدام عملت ايه?
فرد صاحبى وقلى اهو...
قلت ايه ده?
قلى ملوخية...
نعم......ده انا اللى باقول ...طب دى بتتاكل بالايد ولا بالرجل?
الملوخية زمان على ايامى كنا بنغمسها بالعيش او نشربها بالمعلقة
لكن دى عاوزه صنارة علشان نصطادها من الاعماق وهى راقدة فى القاع غير ماءسوف على شبابها
طب نشوف ايه اللى فى الصينية ده ...مكرونة بالبشاميل .. وان جيتوا للحق كانوا مفروض يسموها م عك رونة.. لانها واضح انها كانت فعلا عك
والتقيل جاى ورا... كان صاحبى هو اللى عاملها.. اصل الطبخ فى مصر دلوقتى مشاركة مابين الراجل والست وربنا يرحم الرجالة
سيبونا من العزومة دى
انابافكر اخطب بنت الحلال بالطريقة البلدى اهلها واهلى
وبما ان انا عزبنجى موش عازب....عارف عارف حتسالونى ايه عزبنجى دى..ااقولكم
عزبنجى..يعنى عازب بس بمزاجه ومستمتع بالعزوبية
اما العازب فهو الدبور اللى قرر يهدم عشه وبيدور على عروسة
والحاجة ماما بعتت فى كل انحاء الجمهورية العساسين والبصاصين يدوروا على عروسة لشخصى الكريم.
....وهنا ظهر نور الصباح الذى لعلع ولاح
فسكت انا المدعو ...عبده افرنجى ..عن الكلام المباح عشان ام السيد دخلت تنيم العيال نامت هى ...بيتك بيتك و كلوا على العشة ياكتاكيت
يتبع............
طبعا لسة فى كتير من اليوميات :P
zizo2_2 09-05-2006, 01:36 AM ماشي ماشي تنيك اعمل فينا كدة
لما نشوف أخرتها معاك
msamido 09-05-2006, 02:34 AM لا بقي دي يوميات عايزه قاعده من اول اليوم
علي العموم ماشي زي ما قال استاذ زيزو خليك كده حضرتك اقفلنا كل شويه علي حته كده من اللي هي
بورسعيدى 09-05-2006, 10:59 PM طيب خدوا اليوميه الجديدة
بعد الفاصل
بورسعيدى 09-05-2006, 11:42 PM اول ماوصلت مصر لقيت الحاجة ماما مجهزة لى حبة صور لعرايس وش القفص.. نقاوة اديها ..ماتقولشى كانت بتنقى طماطم
..وطبعا عاوزة تفرح بابنها اللى جاى من بره وتعمله فرح يهد الدنيا وتكيد بيه الاعادى
يا ماما سيبى الدنيا فى حالها ماتهدهاش وبلاش كيد الاعادى لانهم فى الاول والاخر مصريين موش امريكان
ماما قررت نبتدى ببنت سيد بيه(مبدئيا اطلقت عليه لقب خروف حاتعرفوا ليه لما تكملوا الموضوع)
وسيد بيه خروف صاحب مركز كبير اوى فى قرية البضائع التابعة للجمارك واصبح الحاكم والامر والناهى فيها
وكان من راى ماما نزورهم للتعارف واشوف البنت وبالمرة اخد منه ميعاد فى قرية البضايع علشان استلم التلاجة اللى باعتها اخويا من السعودية لماما.
وبالزيارة دى حابتدى رحلة الصالونات...لان كل بيت عروسة بيستقبلنا فى الصالون ومن كتر قعادى فى الصالونات اصبحت خبير بانوعها..وموديلاتها وموش بعيدة اعمل مكتب واحط يافطة عليه خبير ومثمن ومصفى انتريهات وصالونات..
ماما اقترحت ناخد معانا صندوق جاتوة اوتورتة وانا طبعا قلت لالالا بوكيه ورد... اشيك...
وصلنا منزل العروسة (تهانى).. اللى اتحول اسمها لتيتى بقدرة قادر... بعد النقلة اللى اتنقلها ابوها من مستخلص صغير فى الجمرك لاكبر راس فى قرية البضايع وسبحان مغيير الاحوال
ام تهانى ... واللى انا سميتها المونيا هانم لانها بتشبهنى بمعدن الالمونيوم هشة وخفيفة وبتلمع وبعد اول غسلتين ودعكة بليفة مواعين اللون يبهت وباى باى طنط
خبط الباب... فتحت الست المونيا الباب...كنت متوقع سيد بيه هو اللى يفتح ...اما راجل خروف بصحيح .
المونيا هانم ست متصيغة (كلمة بلدى للدلالة على الدهب الكتير)
تمشى تشخلل وتقول يا ارض اتهدى ماعليكى قدى...طبعا من كتر الدهب اللى لابساه
اديتها الورد.. بصت عليه بقرف ومصمصت شفايفها وقالت تعبيين نفسكوا كده ليه. .اول القصيدة جليطة ده انا اللى باقول
قعدنا فى الصالون ...وفى الصالون اى حاجة ممكن تتزور قصدى العروسة لازم تتزوق اوتتجمل بس اللى انا شفته كان زواق مع سبق الاصرار والترصد
العيون بعد ماكانت بنى بقت خضراء بلون البسلة..والشعر من اكرت (سلك مواعين) لحرير عالخدود يفهف..ومن اسود ربانى الى الالوان المتحدة وكل الالوان جايزة طالما ان الشرع ماحددش ايه اللون الشرعى اللى يجوز للخاطب انه يشوفه من الخطيبة
وده كوم والفستان الزيطة اللى كانت تيتى لابساه كوم تانى.. ضيق فى ضيقة وسط البلد ساعة الذروة ..وقصر الفستان يثبت نظريتى فى ان سيد بيه.. فعلا خروف..
اكمل والا زهقتوا?
momi1985 10-05-2006, 01:38 AM موضوع جميل جدا جد اجدا
وطبعا لازم تكمل
انا مستني البقية
وشكرا ليك مرة تانية
zizo2_2 10-05-2006, 02:32 AM مستنين الباقي
msamido 10-05-2006, 12:58 PM منتظر الجاي وبقرأ كل اللي فات تاني وباستمتاع
شكرا جزيلا استاذي
بورسعيدى 10-05-2006, 11:28 PM <span style=\'color:blue\'>كنت قاصد ان انا ارسم بسمة على وجوه كل اللى بيقروا الموضوع لكن كمان في سلبيات كتيرة انا باذكرها
لالقاء الضوءعليها...وموش حاهمل الايجابيات ولو انها كانت تكاد تنعدم
ولسة برضو بحبك يامصر
zizo2_2 11-05-2006, 12:50 AM أنا لو شفت الديك ده هموته علشان ميدنش ويقول كوكو كوكو
بورسعيدى 11-05-2006, 01:36 AM اليوميات دى باقى فيها حلقتين وبس
لكن الى جاية بعدة مصيبة
اسمها!!!!!!!!!!!!!!
والا بلاش
خليها لوقتها احسن
بورسعيدى 16-05-2006, 10:31 AM نكمل.. ???
.دخلت قرية البضايع... قابلتنى السكرتيرة بتاعة سيد بيه خروف ..بس المرة دى ماطلعشى خروف..عليه حتة سكرتيرة بمعنى الكلمة ..حاجة كده من بتوع السيما اللى بيريلوا عليها الرجالة ..ولو كان شافها مخرج الروائع حسن الامام كان عملها قد يجى كده 5افلام من اياهم بمبة كشر..والحقوا بنتى طلعت رقاصة والباقى اللى انتم فاهمينه...
ماعلينا..طلع سيد بيه رحب بى وشد على ايدى ونادانى بابو نسب ادام السكرتيرة علشان يقطع لها اى امل لو كانت رامية هلب على العبد للة
دخلنا المكتب عنده ومعايا الاوراق بتاعة شحن التلاجة..راح منادى على واحد موظف عنده وعطى له الاوراق وقالوا نفذ اللى قلتلك عليه والاوراق اها..وبص لى بنظره فيما معناه حاتشوف بنفسك
قلت استغلوا بالمرة فى موضوع الاسكنر...وحكيتلوا الحكاية من طاطا لريكا قصدى من طاءطاء لسلاموا عليكم
والحقيقة الراجل بدا يتكلم بلغة العارف ببواطن الامور وبدا كلامه ...
شوف يا ابونسب(ابونسب قال.. بعينك. .ده انا اللى بقول)
موضوع الاسكنر ده سيبك منه لانهم حتى لوعطوك تصريح بدخوله حايمضوك على اقرار يلزمك ان فى حالة اى تزوير لعملة فى مصر من حقهم يجوا يدوروا عليك ويكشفوا على الاسكنر وموش بعيد ياخدوك تحرى لغاية ما يثبت لهم انه موش انت المزور وقهقه .....هههههههه وموش بعيدة كمان ياابونسب ينسوا يطلعوك من الحبس حتى بعد مايكتشفوا انه موش انت اللى عاملها
انا:معقول الجهل وصل للدرجة دى..
دخل الموظف اللى كان بيخلص اوراق التلاجة وضرب تعظيم سلام وقال..كله تمام ياسيد بيه زى ماحضرتك امرت
تهللت اسارير سيد بيه واشرق وجه وقال الحمد لله كما لو كان عاد لتوه من فتح عكا...وسحبنى فى ايده نشوف التلاجة قبل العمال مايحملوها..فقلت له مافيش داعى اشوفها كفاية العمال يحملوها...رد وقلى ده كلام موش لازم تشوف اما سيد بيه يحط ايده فى حاجة تبقى ايه..
وراح ساحبنى من ايدى ووقفنى ادام حيطة استنلستيل ...سرعان مااتضح لى انها دولاب ..لا استنوا ...ياحلاوة دى تلاجة ببابين كل باب فيهم فى حجم باب زويلة والباب اللى عاليمين فيه شاشة زى شاشة الكمبيوتر .. افتكرت فى الاول انها بتعرض افلام ولا يمكن تكون تلفزيون وعرفت فيما بعد ان الشاشة دى التلاجة بتستخدمها علشان توضح لك الحاجات اللى ناقصة ..واتوماتيك تبعت فاكس للبقال والبقال يبعت لك الحاجات اللى التلاجة محتاجاه بدون اى تدخل شخصى منك...ياااسلام يانينة زى ماالراحل عماد حمدى كان بيقول
اما الباب التانى فيه ماشاء اللة حنفية للمية الساقعة وحنفية للمية السخنة وحنفية للايس كريم وحنفية تنزل تلج وفتحة صغيرة استنتجت انا انها اكيد بينزل منها البيض المسلوق والاومليت..وموش بعيد كمان لما سعادتك تعطس ...التلاجة ترد عليك تقولك يرحمك الله.. اوم انت تنتهزها فرصة وتقولها موش انا اللى عطست ياريس..وليه لا ويمكن لما الاولاد يجوا نازلين المدرسة ..التلاجة تميل عليهم وتديهم المصروف. .....(لموا الدور ..عيب سيد بيه واقف وانتم بتقلسوا عالتلاجة)
سالت سيد بيه اي ده ?رد وقلى التلاجة اللى باعتها اخوك...قولت له اكيد فيه غلط التلاجة اللى باعتها اخويا 10قدم وباب واحد
رد سيد بيه بافتخار وقلى دى ااقل حاجة ممكن ااقدمها لك ياابونسب ..زى ماتقول كده ..عربون محبة...
اه فهمت يعنى انت ياسيد بيه بدلت الاوراق بتاعة الشحن اللى باعتها اخويا مع اوراق الشحن بتاعة التلاجة دى?...وصاحب التلاجة دى لما يجى يستلمها ويلاقيها نزل عليها التخفيض من 24قدم ل10قدم ومن بابين لباب واحد حايعمل ايه?
رد سيد بيه بزهو وقال بنقولوا هى دى التلاجة اللى وصلت وان هو ده اللى عندنا عجبك عجبك موش عاجبك سيبها....
دى مهزلة وانا استحالة اسمح لنفسى بالاشترك فى حاجة زى كده
عنها وسحبت التلاجة الاصلية بتاعة اخويا ومن غير سلام لسيد بيه مشيت
قاعد فى البيت رن جرس التليفون ..ترن ترن ..ترن ترن
رديت الو...رد صوت حريمى ارق من الرقة وانعم من الكريمة اللبانى..الصوت كان فيه بحة وطرواة ولافطيرة بلدى بالسكر
قالت مساء الخير:
رديت فى بالى.. خير بس ..ده قشطة وزبدة ورزمعمر
هى:ياترى سهى موجودة?
انا:(برضه فى بالى باقول..ولو موش موجودة نوجدها لك ياجميل..عمرك شفتى القمر يطلب حاجة وحد يقوله لا..ياسلام مافيش اجمل من الشقاوة. .) لا يافندم النمرة غلط ..قولت كده وقفلت السكة
ياسلام لو تتصل تانى ...معقول فيه صوت بالجمال ده...سرحان انا.
.رن التليفون تانى ..ترن ترن ..ترن ترن
رديت الو...رد صوت حريمى ارق من الرقة وانعم من الكريمة اللبانى..الصوت كان فيه بحة وطرواة ولافطيرة بلدى بالسكر
قالت :اناسهى حد سال عليا?
.....مفاجاءة ليكوا موش كده...الغريبة ان انا ماتفاجئتش بالعكس رديت عليها وقلت لها انا عارف انك بتلعبى اقفلى السكة وماتتكلميش هنا تانى
....لسة فيه ناس فاضية وبتعاكس كل مشاكلنا خلصت وبقى فيه وقت فاضى نعاكس فى الناس
صدقت عبلة كامل لما قالت ...الدنيا زى الخيارة يوم فى ايدك ويوم فى ايد واحد تانى..يحطها برضوا فى ايدك..واللة يرحمك ياصلاح جاهين لو سمعهابتقول كده كان قلها ده تزوير فى رباعيات رسمية
تانى ..ترن ترن ..ترن ترن...المرة دى جرس الباب تخيلوا مين كان عالباب.......
يتبع .....
zizo2_2 16-05-2006, 04:57 PM دى تلاجة ببابين كل باب فيهم فى حجم باب زويلة والباب اللى عاليمين فيه شاشة زى شاشة الكمبيوتر .. افتكرت فى الاول انها بتعرض افلام ولا يمكن تكون تلفزيون وعرفت فيما بعد ان الشاشة دى التلاجة بتستخدمها علشان توضح لك الحاجات اللى ناقصة ..واتوماتيك تبعت فاكس للبقال والبقال يبعت لك الحاجات اللى التلاجة محتاجاه بدون اى تدخل شخصى منك...ياااسلام يانينة زى ماالراحل عماد حمدى كان بيقول
ههههههههههههههههههه
بجد انت رائع
بس يا ترى مين بقى اللي كان على الباب
بورسعيدى 17-05-2006, 12:13 AM ده الى هانعرفة فى المشهد القادم ان شاء الله
momi1985 17-05-2006, 02:47 AM بجد يااستاذ بورسعيدي
انت اكثر من رائع
ومستنيين المشهد الجاي
zizo2_2 17-05-2006, 12:37 PM طيب انت كدة عندك تأخير يا بطل
يعني امبارح ليه محطتش اليوميات ؟؟
بورسعيدى 17-05-2006, 11:32 PM ياسيدى لو المنتدى منتظم ومش بياخد اجازات كان فاتنا خلصنا من زمااااااان
بورسعيدى 18-05-2006, 12:33 AM تانى ..ترن ترن ..ترن ترن...المرة دى جرس الباب تخيلوا مين كان عالباب.......
عيل صغير بيبيع كياس نايلون....ماما فتحت الباب وقالت له..كان على عينى يابنى الحاج اتكل على الله قبل مااهنيه واعبيه فى كياس بلاستيك
ماما جات وقعدت جنبى وقالت لى العروسة التانيه واهلها حايعجبوك عالاخر
انا:ياماما معقول ماحرمتيش وياترى حايطلعوا مين بسلامتهم المرة دى؟
ماما رديت حاتشوف بعينك
العروسة التانيه
بنت الحاج ابو اسماعيل صاحب افضال ورجل بر وتقوى وبسم الله ماشاء الله عليه
البنت منقبة ومابتطلعش غير للضرورة
اما الام فهى ايضا منقبة واخر مرة ظهرت فى الشارع كان يوم ما طلع الحاج ابو اسماعيل من السجن اصله كان زبون مستديم فى كل سجون مصر بالاضافة للرحلات اللى كانت بتنظمهاله المباحث تحت اسم كعب داير ....اصل الراجل كان عضو نشط فى الجماعة الاسلامية لكن بعد كام
سنة من الذهاب والاياب للمعتقل الراجل تاب واناب
واصبح من البيت للجامع ومن الجامع لبيت
ماعلينا الحاج ابوأسماعيل دخل فى الموضوع بسرعة
وسألنى...طبعا انت مسلم
انا... ايه السؤال الغريب ده...الحمدلله طبعا مسلم
الحاج ابواسماعيل...واكيد بتصلى الفروض فى المسجد؟
انا..فى الحقيقة ...اصل ...هو...يعنى...فى الواقع ...الكدب خيبة(احضرونا انتم اكدب واآقول اه وابقى خفت من الراجل وما خفتش من ربنا)
رديت صلاة الجمعة عمرها ماتفوتنى..... طبعا الراجل فهم
الحاج ابواسماعيل...واكيد حافظ حاجة من القرآن
انا فى الحقيقة ياعمى انا على وشك الانتهاء من حفظ الجزء ال30وبأذن الله كده ومن غير مقاطعة اخلص حفظه قبل الجواز
تهلل وجه الحاج ابواسماعيل وصهلل وهلل الله واكبر ... الله واكبر... وقال بسم الله.. ما شاء الله ...اتميت حفظ الاجزاء ال29من القرآن وفاضللك بس كام اية وتبقى حفظت القرآن كله
خفت الراجل تيجى له سكتة قلبية من كتر الفرحة فقلت له ياعمى انت فاهم غلط انا موش حافظ غير بس كام اية فى الجزء التلاتين
بلع الراجل ريقه على خيبة امله فيا بس واضح انه مافقدش الامل
وسألنى تانى( يادى النيلة احنا فى حصة انشا هنا هو مافيش غيرى تسأله) :D
الحاج ابواسماعيل...وبتشتغل ايه يابنى فى البلد اللى انت فيها ?
انا... ياعمى عندى مزرعة هناك
الحاج ابواسماعيل.... وبتربى فيها ايه?
بأربى فيها كل حاجة ....حيوانات.. وبنى ادميين لو احتاج الامر وضحكت ههههه
لكن الحاج ابواسماعيل برضه مصر يحطنى فى خانة اليك
الحاج ابواسماعيل على كده بتربى خنازير اعوذ بالله
طأطأت راسى وما عرفتش ارد
ورد الحاج ابوأسماعيل بس ده حرام ياأبنى
ليه هو انا باكلها ...انا بس بأربيها
ولم يقتنع ..وانا من ناحيتى ما حاولتش اقنعه .... وكالعادة اجرى ياماما
لقيت فجوة عميقة وضيقة فى فهم وتحليل الناس للامور
الايجابيات تكاد تنعدم فى سلوك الناس
السلبيات واللامبلاة اصبحت سمة ضرورية ان ماكانتش اساسية فى الحياة اليومية
حان وقت السفر
ودعت امى.. لميت شنطى.. وفى اول تاكسى كنت ناطط ....وعالمطار عدل... وفى اول طيارة كنت مسافر... المرة دى للاسف ماكنتش مصر لطيران
بصيت من الشباك شفت الاهرامات ...والنيل.... وافتكرت اهلى وناسى ...ونزلت دمعة على خدى
رفعت ايدى اشاور لبلدى..... بس ساعتها الطيارة كانت فوق فوق اوى... ومابقتش شايف غير السحاب.... مسحت دمعتى ودق قلبى بكلمة بحبك يامصر.
جات المضيفة الاجنبية وقالت مساء الخير بلانجليزى طبعا
رديت خير وبس ده خير وقشطة وعسل وفطير مشلتت بالسمنة البلدى
اتمنى تكون عجبتكم
وشكرا لحسن المتابعة يا زيزو
والى اللقاء فى يوميات اخرى
السلام عليكم ورحمة الله وبركاته
zizo2_2 18-05-2006, 12:57 AM شكرا ليومياتك وننتظر يوم اخر
momi1985 18-05-2006, 01:44 AM والله عمل خييييير البلد دي ميتقعدش فيها اساسا
شكرا ليك استاذي العزيز ع اليوميات الجميلة دي
ومنتظرين يوميات جديدة
بورسعيدى 18-05-2006, 02:57 AM ان شاء الله
محضر لكم يوميات تحفة
وان شاء الله تعجبكم
اسمها
ابو الافكار خرم خـُرم فى دماغى
جديرة ان تقرؤها
فتاة_الإسلام 18-05-2006, 08:13 AM يوميات جميلة جداً يا أستاذ بورسعيدي.. ولو إن الهرب من مصر مش حل للمشكلة..
((وبرضه هنقول بنحبك يا مصر))
وبإنتظار اليوميات الجديدة إن شاء الله
فتاة الاسلام 18-05-2006, 11:54 AM شكرا لك مستر بورسعيدى يوميات جميلة جدا وحضرتك لك اسلوب متميز فى عرض ارائك والمشكلات والسلبيات
وانا زى ما فتاة_الاسلام بتقول رغم كل دة
((وبرضه هنقول بنحبك يا مصر))
الله عليك
موضوع راااااااااائع
وليه تعليق على هالموضوع
بس بعد ما انتهى من قرائته كاملا
نلتقى قريبا
بسم الله الرحمن الرحيم
اولا
لا اقول احبك يا مصر ..ولكن .. اعشق ترابك يا امى يا مصر
واقول ... لو لم اكن مصريا لودت ان اكون مصريا
..
ثانيا
احنى رأسى امام موهبتك الفذة فى عرض وتناول الموضوع
..
ثالثا
لقد رايت ما لم ترة انت فى قصتك
رايت المصرى الشهم الذى اراد ان يساعد اخيه المصرى فى الطائرة
رايت التسامح فى الشوق والحنين الى الوطن مهما حدث منها
....
رابعا
على قدر ما فى الموضوع من سخرية على قدر ما فيه من مرارة
والمرارة جاءت من النظرة السيئة وكأن مصر وحدها هى التى ينتشر فيها الفساد
...
ولكن احب ان انوه الى ان
الفساد مصاحب للفقر
وكل ما سردته فى المطار انا رايته فى دوله اوربيه
ولكن بشكل افظع ... ففى الدول الاوربية يطلبون الرشوة وكأنها رسوم اجباريه
ولكن هنا بتطلب على حياء .. وقصر ذات اليد ..
...
خامسا
اشكرك لانك عرفتنى من اين جاءت فكرت النساء بتعبئة الرجال فى اكياس
من قهر كل شهر يار للنساء ...
....
سادسا
ولي عتاب ... لما نحن دائما نشوة صورتنا
ولماذا ذكرت قصة ابو اسماعيل
بصراحة اساءت لنا
(ده من وجهة نظرى )
واعتذر على الاطاله
B) B) B)
وننتظر منك يوميات رائعة كهذه
بورسعيدى 18-05-2006, 11:47 PM شكرا للمرور الكريم
وشكرا رآرائك النبيلة المصرية يا مهرة
ولكنى اود ان اوضح شيئ مهم ورغم اننا جميعا نرفع شعار ( وبحبك يا مصر الحبيبة)
لا شك ان ما نعانية فى مصر موجود فى كل مكان او فى معظم دول الدنيا ولكننا تعلمنا ان نلوم من نحب ونقيم كل ما هو غالى ونفيس الى انفسنا
واعلمى يا اختى الفاضلة اننى حينما اجد شيئ غلط من انسان عزيز او شخص قريب الى نفسى فلابد ان اقوم بإرشادة وتقويمة الى الطريق الصحيح
ولكن اذا كان هذا الخطأ من انسان لا علاقة لى به فممكن ان اتجاهل تصرفة او اقوم بإرشادة من باي النصيحة ليس إلا
zizo2_2 19-05-2006, 01:44 AM الأخت الفاضلة مهرة الأستاذ الفاضل بورسعيدي كل من قرا الموضوع
ليس معنى أن ننقد حال سيء بمصر أن ذلك تشويه للبلد
ولكن لنتوقف عند كل حال سيء وننقضه يجب أن يكون لنا صوت فليست مصر قطعة من السماء انها بها الطيب والخبيث يجب أن نعين الطيب ونحاول من ان نوقف الخبيث
هكذا علمنا ديينا وشكرا ليك استاذي ومنظرين مواضيعك الجميلة
بورسعيدى 19-05-2006, 03:18 AM انتظرونا غدا ان شاء الله مع يوميات جديدة وموضوع جديد
يوميات ابو الافكار
مهمه جدا جدا
وان كنت اود
ان تعمل اليوميات الجديدة
فى صفحة اخرى وتضع الرابط هنااااااااااااا
هذا اقتراح
ولك ما تشااااء
msamido 21-05-2006, 01:24 AM شكرا استاذ بورسعيدي
واعذرني مكنتش متابع اول بأول بس انت عارف اي موضوع لحضرتك لازم بنهيه
شكرا ليك بجد يوميات كانت جميله منتظرين بقي البقيه في يوميات ابو الافكار
اوركيديا 28-07-2008, 03:50 AM المهم
انا برده حرد على الموضوع ده بالعند
عشان استاذ بورسعيدى يتعب من الردود
بس انا كل اللى عايزاه انكو تحسو بالحرمان اللى انا حسيته من الموضوعات الجميله اللى زى دى
و نبقى نقول لاستاذ بورسعيدى سيبك من الاشراف و الكلام الفاضى ده
و ارجع اعملنا مواضيع تحفه زى دى
يلا فى رعايه الله
Dr.Mai 28-07-2008, 10:01 PM موضوع جميييييييييييييييييييييييييييييييييل
جزاك الله خيرا
زهرة البنفسج 28-07-2008, 10:57 PM والله حضرتك انا اسفة انى مش لاقيه كلمة تليق بموضوع حضرتك بجد حضرتك عبقرى
ربنا يخليلك للمنتدى
تقبل مرورى
ZAHIMR 28-07-2008, 11:57 PM بسم الله ماشاء الله
حلوة اوى
شكرا ليك استاذ بور سعيد
( لؤلؤة الإسلام ) 29-07-2008, 02:49 AM وضوع فوق الفظيييييييييييييييييييييييييع و ما فيش احسن من كده .. تسلم ايدك !!
بورسعيدى 29-07-2008, 04:25 AM المهم
انا برده حرد على الموضوع ده بالعند
عشان استاذ بورسعيدى يتعب من الردود
بس انا كل اللى عايزاه انكو تحسو بالحرمان اللى انا حسيته من الموضوعات الجميله اللى زى دى
و نبقى نقول لاستاذ بورسعيدى سيبك من الاشراف و الكلام الفاضى ده
و ارجع اعملنا مواضيع تحفه زى دى
يلا فى رعايه الله
انتى تانى ؟؟؟:D
اهلا اهلا
نورتى الموضوع
اقصد جددتى الموضوع
يا نهار البيض؟؟
انا اتعب من الردود
دى اسعد لحظات حياتى لما اشوف ردود جميلة وشيك مثل ردودك
طيب وهو انتى حاسة انى مشرف ؟؟
ده انا عمرى ما نقلت ولا حزفت ولا حسست حد خالص انى مشرف
الاشراف ده تقدرى تقولى وسام من ادارة المنتدى مش اكتر
لكن والله انا مش بتغير ابدا سواء عضو او مشرف او حتى زائر
فى سر بقا عايز اقوله لك
بخصوص عمل موضوعات جديدة
انا بصراحة كده مش عندى الاستعداد
لانك شوفتى بنفسك مستوى الموضوعات القديمة لكل الى بيشاركونى موضوعاتى
وشوفتى كمان مستوى الردود والمشاركات
مش مجرد نقل موضوع ودخول الاعضاء.... يقولوا ( مشكور - ننتظر المزيد - جزاك الله خيرا - يسلمووووو- جعلة الله فى ميزان حسناتك ) الخ الخ
هذا النوع من الردود انا لا احبة ..... اشجع دائما عرض وجهة النظر والمناقشة وذكر الفوائد من عرض الموضوع
وايضا زى ما حضرتك شوفتى لايوجد ابدا خلافات او زعل حتى لو كان الرأى الآخر مخالف لرأى صاحب الموضوع
موضوع جميييييييييييييييييييييييييييييييييل
جزاك الله خيرا
ربنا يبارك فيكى والحمد لله ان الموضوع عجبك
وان شاء الله نتجمع دائما على الخير وعلى حب مصر
والله حضرتك انا اسفة انى مش لاقيه كلمة تليق بموضوع حضرتك بجد حضرتك عبقرى
ربنا يخليلك للمنتدى
تقبل مرورى
وهو فى احلى من كده كلام
يكفينى جدا مشاهده اسمك داخل الموضوع
ده كفاية اوى انى اول ما ادخل الموضوع اشتم عبير زهرة البنفسج
شكرا لمشاركتمك الجميلة
بورسعيدى 29-07-2008, 04:29 AM بسم الله ماشاء الله
حلوة اوى
شكرا ليك استاذ بور سعيد
مرورك الجميل هو الى حلو اوى
سعدت جدا بتشريفك الموضوع
موضوع فوق الفظيييييييييييييييييييييييييع و ما فيش احسن من كده .. تسلم ايدك !!
والله مرورك هو الى فظيييييييع
شكرا لمرورك العطر
ودائما نلتقى على الحب والخير
اوركيديا 29-07-2008, 05:28 AM فى سر بقا عايز اقوله لك
بخصوص عمل موضوعات جديدة
انا بصراحة كده مش عندى الاستعداد
لانك شوفتى بنفسك مستوى الموضوعات القديمة لكل الى بيشاركونى موضوعاتى
وشوفتى كمان مستوى الردود والمشاركات
مش مجرد نقل موضوع ودخول الاعضاء.... يقولوا ( مشكور - ننتظر المزيد - جزاك الله خيرا - يسلمووووو- جعلة الله فى ميزان حسناتك ) الخ الخ
هذا النوع من الردود انا لا احبة ..... اشجع دائما عرض وجهة النظر والمناقشة وذكر الفوائد من عرض الموضوع
وايضا زى ما حضرتك شوفتى لايوجد ابدا خلافات او زعل حتى لو كان الرأى الآخر مخالف لرأى صاحب الموضوع
طيب ليه ايه هو الحل
اكيد ماشى كل جيل اوحش من اللى قبله
بس برده لسه فى ناس عايزه تتناقش عايزه توصل لحل
م كله راضى بمشكوررررررررررررر
بس فى موضوعات بتجبرنا على كده
وفى موضوعات برده بتجبرنا اننا نفتح عيونا و نتناقش مع بعض
و اللى زى حضرتك هما اللى عليهم الدور ده
لو كل واحد رفع الرايه البيضه الحمد لله كده المنتدى حيبقى ابيض من الصينى بعد غسيله
على العموم دى حلايه شخصيه (مع انها بتتعارض مع حريتى و انا مش مقتنعه بيها)
فى رعايه الله
الاستاذ محمد سرور 29-07-2008, 06:28 AM والله يا استاذى كان نفسى اقرأ القصة كلها
بس مش شايف الكلام الخط صغير قوى
بس البداية جميلة
سنووايت 11-08-2008, 02:33 PM بجد حلوه اوي ياريت تكتب يوميات كمان
|