|
انجح هات مجموع عالي .. ازاي
بسم الله الرحمن الرحيم كلنا بيسأل نفسه .. عايز اجيب مجموع عالي بس ازاي .. أنا أقوالك ازاي نجاحك ده بيتلخص في بعض العوامل أهمها : 1- لازم الثقة بالنفس وتحديد أهداف وطموحات 2- طاعة الله ورسوله والحرص على الصلاة في وقتها خاصة الفجر ، وطاعة الوالدين وفعل الخير والإحسان للناس . 3- حب المادة .. طب ازاي ( انك تفتكر يوم النتيجة وانتا رافع راسك وراس أبوك وأمك .. وانك تشوف نفسك بعد عشر أو 15 سنة طبيب أو مهندس أو أي حاجة تحبها ) وحط المقولة دي في دماغك ( حب ما تعمل حتى تعمل ما تحب ) . الاجتهاد .. وانك اتعتقد إن ربنا مش هيضيع جهدك 4- 5- انتا خايف من الامتحان .. صح .. طيب ليه متعتبرش الامتحان ده خصمك ولازم تعرف نقاط ضعفه وقوته ...وتشوف كل مبارياته علشان تعرف تلاعبه .. وتلاعب ناس كتير في مستواه أو اعلى منو .. يعني تحل امتحانات كتير 6- تنظم الوقت .. وانك تعرف ازاي تذاكر .. وتقدر تقعد على الكتاب لمدة طويلة دول ست نقط كل نقطة ليها إن شاء الله درس منفرد |
نااااااااايس توبيك اكتر من رائع
|
أنا لسه مخلصتش الموضوع .. عايزين نسمع رأي حضرتك بعد الانتهاء
|
ومتى البقية
|
حــلو أوووووى ..
كمـل بسـرعة ... |
من عنيا يا أستاذ إبراهيم
|
الدرس الأول : الثقة بالنفس وتحديد الطموحات : إزاي تثق بنفسك .. انتا أكيد جواك أفكار سلبية ( مثلا : إنك هتعيد السنة أو هتجيب مجموع وحش أو مش هتدخل الكلية اللي بتتمناها ) .. أنا مش قادر .. أنا مش بفهم .. مش بعرف أحفظ .. يا عم والله العظيم انتا عندك حاجة في راسك وزنها كيلو تقريبا .. تقدر تحفظ بيها أي حاجة .. ربنا بيقول في القرآن الكريم ( وعلم آدم الأسماء كلها ) .. شفت ازاي انك تقدر تحفظ أي حاجة .. انتا ليه بتقول مقدرش .. انتا جربت .. حاولت .. طيب اعمل اللي عليك والباقي على ربنا .. فأول كلمة هنقولها .. أنا أقدر .. أنا من وجهة نظري نظام التعليم في مصر غلط في غلط باختصار فاشل .. أكيد انتا بتقول كده .. لأنوا بيوقف مستقبلك على ورقة وش وضهر .. طب لو قلت للناس ( أنا شاطر بس النظام فاشل ) الكل هيرد عليك بشكل واقعي ( لما هوا فاشل ازاي فلان ابن عمو فلان جاب مجموع عالي ازاي مع النظام الفاشل ده ) يبقى لازم تنسى ان النظام ده فاشل وتحط في راسك المقولة دي ( الناجح هو الذي يحقق نجاحه في أقصى ظروف الفشل ) .. نسينا إن النظام ده فاشل .. في أفكار بتيجي لبعض الطلبة .. يقول انه ازاي يحل امتحان طويل عريض بدون ولا غلطة .. ازاي يجيب 98% طيب .. ازاي في طلبة جابوا مية في المية وطلعوا أوائل الجمهورية كمان .. هل فيه فرق بينك وبينه .. لا طبعا .. فيه .. انو هو بيطرد الأفكار السلبية دي .. ويحط بدلها ايجابيات ( إن شاء الله هقفل المواد كلها .. وهجيب 100% .. وهدخل الكلية الفلانية ) بعد ما طردنا الأفكارالسلبية .. ازاي أحدد طموحي .. انا بذاكر ليه .. انا عايز اووصل لايه .. وكام نسبة نجاحي أو وصول للشيء ده .. اللي انا متوقعها .. ودايما حط نسبة نجاح عالية .. لان لو ما حققتاهاش .. حتحقق أقل منها بدرجة بسطة .. انا هجيب 100% .. لو قلت كدا .. مع المذاكرة الجادة ممكن تجيب من 95 الى مية في المية بص من غير تحديد هدف .. حتى لو جبت مجموع عالي .. حتى لو دخلت الكلية الفلانية .. انتا فاشل .. يعني لازم قبل ماتذاكر .. أنا هذاكر ايه .. هذاكر ليه .. عايز أوصل لايه .. وبتحديد هدفك هتكون عملت 70 % من اللي عليك .. والنسبة الباقية دي .. مذاكرتك .. احنا هنمشيها ثقة وطموحات ولا ايه .. لا يا عم انا مبقولش كدا علشان تقعد تقولي أنا هنجح وهجيب وهاعمل .. من غير مذاكرة .. لا يا عم الحاج .. لازم علشان النجاح تحقق المعادلة دي .. نجاح = 70%تحديد أهداف + 30 % مذاكرة ويدخل برضو في تحديد الاهداف .. تحديد هدف على المدى البعيد .. اللي هو أكبر هدف يعني مثلا انك عايز تترشح لمجلس الشعب .. او تكون عميد الجامعة الفلانية .. او حتى رئيس الجمهورية .. وبص للنقطة المهمة دي .. مش الحياة الطب والهندسة والصيدلة .. ممكن تكون مدرس بس بارع في المادة بتاعتك .. يعني القصد انو اهم حاجة التميز .. مش المجال .. فخلاصة الدرس هو طرد السلبيات ووضع ايجابيات مكانها .. تمحوها .. وتحديد الهدف اساس النجاح .. وبكدا انتهى الدرس الأول .. ان شاء الله الدرس الجاي قريبا.. جدااااا |
الدرس الثاني : طاعة الله ورسوله والحرص على الصلاة في وقتها خاصة الفجر ، وطاعة الوالدين وفعل الخير والإحسان للناس .
يمكن الحاجات دي صعبة شوية .. وانتا تفتكر انها ممكن تضيع وقتك .. بس انتا لو تعرف أهميتها وقيمتها .. مش هتقول كده .. طاعة ربنا كانت سبب في نجاح ناس كتير .. وفي نفس الوقت كانت من عوامل الفشل لناس تانية .. انتا أكيد بتقول .. ان الحكاية جهد .. مش صلاة وبر.. ممكن تكون بتجتهد وربنا هيديك على قد جهدك .. بس مش ربنا هو اللي اداك العين اللي بتشوف بيها .. والعقل اللي بتحفظ وتفهم وتفكر بيه .. وغيرها من النعم .. كتيييييييييييييييييييير .. يعني كل النعم دي وانتا مش عايز .. تشكر ربنا .. يا اخي ده انتا لو واحد بيعملك أي خدمة في الشارع .. بتقوله شكرا .. طيب .. انتا فاكر ان الصلاة أجر وبس .. لا طبعا .. دي حاجات كتييييير .. ربنا بيقول في كتابه الكريم ( ولئن شكرتم لأزيدنكم ) .. أهي أول حاجة استفدناها .. الزيادة والبركة .. ربنا كمان بيقول .. ( ومن أعرض عن ذكري فإن له معيشة ضنكا ) .. تاني حاجة .. الراحة النفسية .. ربنا برضو بيقول .. ( إن الصلاة تنهى عن الفحشاء والمنكر ) .. تالت حاجة .. تبعدك عن المعاصي .. والذنوب .. احنا قولنا صلاة الفجر بالأخص ليه .. أولا :: انتا لما تقوم الصبح بيبقى فيه هدوء شديد .. لما تنزل تصلي في الجامع .. هتكون بدأت يومك بجرعة نشاط .. وفي نفس الوقت برأت نفسك من النفاق .. طيب .. وثبت علميا إن فترة الصبح هي أفضل فترة في اليوم كله .. بعد كده طاعة الوالدين :: انتا هتطيع أبوك وأمك ليه .. علشان الامتحانات صح .. تبقى غلطان .. لانك كدا عملت الحاجة دي .. علشان حتة ورقة وش وضهر .. يبقى مفيش إخلاص .. يا أخي مش كفاية ان هما اللي جابوك للدنيا دي .. وهما علموك وربوك .. وعملوا كتييييير كتيييير .. يبقى أنا هطيع أبويا وأمي علشان ربنا أمرني بكدا .. في كتابه العزيز .. ( وبالوالدين إحسانا ) يبقى أول حاجة هنستفيدها من طاعة الوالدين هي .. الامتثال لأمر الله ورسوله .. ايه تاني .. انتا عارف ان دعوة الوالدين ليك .. خصوصا أمك .. دي كبيرة جدا .. لان من الثلاثة الذين لايرد الله دعاءهم .. دعوة الوالد لولده .. تالت حاجة .. الراحة النفسية برضو .. تالت حاجة فعل الخير والإحسان للناس :: انتا لما بتدي واحد مسكين أي فلوس .. حتى لو ربع جنيه .. انتا مش عارف ايه الفوائد من كده .. اقولك يا عم .. اول حاجة .. الصدقة تدفع البلاء .. يعني تحوش عنك المصايب .. تاني حاجة ترضي عنك الله .. تالت حاجة .. تكفير الذنوب .. يعني شوف الربع جنيه ده .. مفعوله ازاي .. بعد كده الإحسان للناس .. يدخل على فكرة في الإحسان للناس .. صلة الرحم .. مش زي قرايبك اللي بتشفوهم في العيد الكبير بس .. اولا :: صلة ربنا ليييييييييك .. ودي الأعظم .. تاني حاجة .. دخول الجنة .. تالت حاجة .. زيادة الإيمان .. ومن الأسباب المهمة القران الكريم .. هل تعلم أن الربع الواحد مش هياخد منك ربع ساعة .. يعني ايه المانع تقرا ربع كل يوم وانتا رايح المدرسة .. أو بعد ما تصلي الفجر .. على فكرة القران فوائده عظيمة جدا .. منها راحة النفس .. والشفاء من كل داء .. بس لمين للمؤمنين .. ( وننزل من القران ما هو شفاء ورحمة للمؤمنين ) الدعاء .. وده سبب عظيم للناجح .. ) إن الله يستحي من عبده إذا رفع يديه أن يردهما صفرا ) ازاي ربنا يستجيب دعاءك .. !!؟؟؟ أن يكون مالك حالك ولبس حلال وشربك حلال .. انك تلح على ربنا في الدعاء .. يعني مش ترفع ايديك وعندك شك في الاجابة حتى لو 01.% .. لا ده انتا لازم تكون متأكد من الاجابة ..،، الاخلاص في الدعاء .. فعل الخير بشتى أنواعه .. الطمع فيما عند الله .. وبكدا الدرس التاني خلص .. انشاء الله الدرس التالت قريبا .. جدااااااااا نسألكم الدعاء .. |
جزاك الله خيرا انا قريت الاولى و و كنت مستنى الكمالة ^_^
|
وجزاك .. ولسا فيه كمان .. بس دعمكم لينا ..
|
يعني مفيش ردود .. بكتب لنفسي أنا ..
|
ازاى احنا في اشد الحاجة للموضوع دا انا اول مرة اشوف الموضوع وعاجبنى جدا جدا جدا يريت تستمر معانا حضرتك انت لو شوفت كمية الشكاوى اللى الطلبة بيشتكوا منها هتعرف ازاى محتاجين للتوبيك دا بكرا هتلاقى كله دخل وكتب مشكلته :av4056bb7jp3: كمان يعنى وانا هقولهم الجروب تالتة ثانوى لانهم اكيد عايزين الموضوع دا وحضرتك لو شوفت التوبيكات هنا معظمهما شكاوى محتاجة حلول من المجربين زي حضرتك استمر وجزاك الله خيرا وهكمل قراية |
حضرتك بس عشان في فترة محدش من الطلبة القديمة سأل احنا ضايعين ازاى بسبب امتحانات الميد تيرم فالطلبة اللى زى حالتنا فقد الامل في النصيحة دلوقى الى حد ما :slap1qk6: اول مهيلاقوا الموضوع دا هتلاقى تفاعل غير عادى لان بجد واقعين وجزاك الله خيرا |
شكلتى اذاكر وانسى ع طول النظرى وطبعا معظم الدروس ان لم تكن كلها مبحلش عليها لان اول ما سؤال يقف قصادى بتعقد من المادة واسبها واشوف غيرها يعوض ربنا
|
موقع حلوووووووووو http://www.skoool.com.eg/Default.aspx?tabid=87
|
بص يا أستاذ محمود ..
سوء الحفظ ده بيرجع لعدة أسباب .. أهمها ... 1- سبب نفسي .. وهو الخوف والتوتر والقلق .. 2- سببب عضوي .. لنقص بعض العناصر الغذائية الهامة ..ك زيت أوميغا 3 الموجود في السمك .. وانصحك بالاكل المكتامل والفواكه والخضروات .. 3- سبب ديني .. وهو المعاصي .. لقول الشافعي رحمه الله :: شكوت إلى وكيع سوء حفظي فأمرني بترك المعاصي .. وعلشان تتغلب على كده .. لازززززززززززززززم ..التركيز في الذاكرة .. التكرار .. الكتابة فكما يقال لليد ذاكرة .. قراءة القران .. فعلميا هو يقوي الذاكرة .. |
حضرتك جبت كام فى ثانوى
وكنت علمى رياضه ولا علوم ؟ |
أنا جبت 98.1 علوم ..
|
اقتباس:
|
بص يا استاذ محمود .. التوتر والقلق لازم تخلص نفسك منو .. انتا الزاي بتقلق على حاجة محضلتش .. لما تحلص يبقى ربنا يسها .. اذاكان الأمس قد ضاع،،،،فبين يديك اليوم واذا كان اليوم يجمع أوراقه وسيرحل،،،،فلديك الغد لا تحزن على الأمس فلن يعود لك،،،، ولا تأسف على اليوم فهو راحل،،،، واحلم بشمس مضيءة في غد جميل،،،، فانتا ليه تقلق .. أما تنظيم مواعيد النوم .. فحاول تنام وانتا مش مرتاح راحة كاملة .. ومتنمش في مكان هادي أوي .. وانتا عارف نفسك .. وخلي اللي هيصحيك سواء أبوك ولا أمك أو اختك أو أي حد .. يستخدم كل الطرق .. يعني أحلا حاجة الميه .. وأول ما تقوم صلي ركعتين .. علشان متكونش نعسان .. ويروح النوم .. ولو محدش بيصحيك اظبط منبه صوته عالي .. وحطو بعيد عنك .. يعني مرتفع بحيش انك متقدرش تمسكو وانتا في مكانك .. يعني باختصار انك تقوم وتكتسب جرعة نشاط .. فهتكون فايق .. طيب مواعيد المذاكرة .. خلي في اليوم فترتين أو فترة .. أو تلاتة حسب قدرتك .. لازم الجدول لا يزيد عن 3 مواد .. مثلا مواد الاجتماعيات كعلم النفس .. لازم تكون في مكان هادي ويكون زهنك صافي .. مواد الحل زي الرياضة .. تكون في اي وقت واي مكان .. اكتب لكل مادة بداية الوقت ونهايته .. ازا نقصت خمس دقايق زود خمس دقايق .. عشرة زود عشرة .. وهكذا .. مش مهم الوقت المهم الانجاز والتركيز .. ممكن الجدول تقولي ايه المواد اللي عندك والسهل والصعب منها .. وانا اعمله .. بس قولي بتزاكر امتى .. |
الدرس التالت : مرحلة المذاكرة الفعلية قبل المذاكرة ::1- لازم تشبع حاجاتك النفسية :: يعني انك تكون نايم كويس .. وتكون لا شبعان على الاخر أو جعان .. يعني خليك وسط .. 2- لو المدرس بيشرح في مدرستك .. لازم تروح .. لانك لو مروحتش تبقى غلطان .. لأن لو رحت المدرسة مش هتستفيد .. غلط .. ياعم استفيد لو حتى خمسين في المية .. على الأقل تكون دي مذاكرة مبدئية ليك .. 3- الدروس الخصوصية :: هي حاجة مهمة جدا .. بس لازم علشان تاخد درس لازم :: تختار مدرس كويس وخبير .. مش اي حاجة وخلاص .. ازاي تعرف انو كويس ؟؟!! بعد ماسألت عنو .. تروح اول حصتين تلاتة .. اذا كان بيراجع علطول .. وأول بأول .. وامتحانات علطول .. وبيدي واجبات كتير .. يبقى ده ممتاز .. وكمل معاه .. أما لو كان .. كده وخلاص .. من غير مراجعة .. وشرح أي حاجة .. يبقى .. اخلع .. بعد ما اختارنا المدرس القوي .. واظب على الدرس كل يوم .. مش تاخد الفلوس وتروح اللي بالي بالك .. 4- الدروس التعليمية :: يعني لو مثلا انتا بتتفرج على التليفزيون ساعتين .. يا عم اعتبر نفسك بتتسلى .. واتفرج .. واستفيد أي حاجة .. ده انتا بتدفع للمدرس فلوس .. وبتمشي وتركب مواصلات علشان تروح .. طب دي عندك .. وببلاااااااااش .. ومش هيسألك في نص الحصة .. يعني حلوة من كل ناحية .. 5- هيء نفسك :: يعني جهز اقلامك وكتبك .. واعرف انتا هتزاكر ايه .. وقبل كل ده حدد طموحاتك .. زي ماقلنا .. ولما تزاكر زاكر بجد .. يعني ساعتين يبقى ساعتين .. لعبت خمس دقيقة زود خمسة .. وهكذا .. خلي راحة عشر دقايق بين كل ساعة .. مش ساعة لكل عشر دقايق .. زي ما انتا فاهم .. اختار المكان المناسب :: يعني لازم مكتب وأباجورة .. واوضه هادية .. ولونها أزرق .. وتكييف ب4 الاف جنيه .. واغلى انواع الاقلام .. ولازم البلكونة تبص على جنينة فيها حمام سباحة .. لا طبعا مش كدا .. احنا هنجيب ده كلو منين .. ده ( الجود في الموجود ) .. يعني من افضل الأماكن فوق السطح .. بس مش تقعد تعاكس في بنات الناس .. غض بصرك .......... اختار الوقت المناسب :: واحسن وقت هو قلب الفجر وبعده .. وانتا براحتك .. حسب ماترتاح .. قبل ما تبدأ المذاكرة توكل على الله .. واحسن النية .. مثلا قول ( انا هذاكر عشان اخدم ديني ووطني ) يعني تزاكر وتاخد حسنات .. وابدأ بدعاء :: ( اللهم إني أسألك فهم النبيين وحفظ الملائكة المقربين .. اللهم اجعل لساني عامرا بذكرك .. وقلبي بخشيتك إنك على كل شيء قدير .. وحسبنا الله ونعم الوكيل ).. أثناء المذاكرة :: لأزم يكون معك ورق أبيض .. لأن فيه مثل بيقول ( لليد ذاكرة ) .. وشويت أقلام حلوين .. وخطهم حلو .. واجمع كل ادواتك .. ابعد الملهيات : لأن المعلومة لو تدخل مشتتة مش هتسترجعها لما تحتاجها .. 1- اقفل المبايل : يعني مش لزم تبص فيه .. مفيش رسايل جديده .. لسه الرصيد زي ماهو متخفش .. ومحبكتش تكلم صاحبك دلوقت .. واوعى تشغل على المبايل أغاني .. 2- خلي قدامك مادة وحده بس .. لإن لوقدامك كتاب تاني أكيد .. هتتفرج فيه .. فهتتشتت المعلومة .. يعني خلي قدامك المادة اللي بتذاكرها بسسسسسسس .. 3- متذاكر على الكمبيوتر :: لأن أول حاجة تعرضك للضوء ده هيتعب عينيك .. ثانيا لما تكون المذكرة في ايديك وتعلم فيها .. وتخطط .. انشاء الله هتفتكر أحسن .. ذاكر من مذكرة واحدة بس :: عشان متتلخبطش .. ومش تطبع من النت وخلاص لازم تتأكد من صحتها .. يعني تكون بتاعت المدرس بتاعك .. أو ملخص مشهور .. ابدأ بالأصعب :: لأنك هتكون في كامل نشاطك .. وبالتالي نفسيتك هترتاح أكتر .. لما تخلص الصعب وتدخل في السهل .. لما تذاكرجزء خد نظرة عنو .. بمعنى ان تقراه قراءة مبدئية قبل المذاكرة .. وذاكر الجزء على بعضه .. يعني درس يبقى درس كامل عشان يكون في ترابط .. وحاول تشرح لنفسك وحط أسئلة .. يعني اعتبر نفسك طالب ومدرس وجاوب واسال .. واكتب الدرس أكتر من مرة .. بس مش كل المواد طبعا .. في مواد تختلف .. وماتعتبرش اي حاجة في الكتاب تافهة .. اللي حاطط الكتاب عارف انها مهمة .. مفيش اي تفاهات في الكتاب .. تمااااااااااااام عملنا كل ده خلصنا مذاكرة .. انهي المذاكرة بدعاء .. ( اللهم إني أستودعك ما قرأت وما حفظت وما تعلمت .. فرده إلي عند حاجتي إليه إنك على كل شيء قدير وحسبنا الله ونعم الوكيل ) .. خلي المذاكرة دي روتين يومي .. زي النوم .. مش لو منمتش هتموت .. خلي المذاكرة كده .. وبكدا نكون انتهاينا من جزء المذاكرة .. ان شاء الله الأجزاء الجاية عن المراجعة .. وكيفية مذاكرة المواد .. |
الاول خالص انا مش قلقان من الامتحان قلقان علشان مقصر جامد فالمذاكرة يعنى العربى بفضل احفظ فى مظاهر الجمال وبنسها وخصوصا الايحاءات والمحسنات البديعية والاحياء ذكرت فيها شوية لكن لسه مذكرتش ع الوراثة خالص لان المدرسة بتاعة الاحياء مبنحلش معاها خالص هى بتفضل تشرح تشرح والجولوجيا مادة حفظ بس لسه مذكرتهاش بردو رغم انها عليها 60 درجة ربنا يستر الفرنسى سهل لكن عايز حفظ انا قررت انى مرحش الدرس بتاع الفرنسى الشهر دا علشان اذاكر كويس الشهر دا وكمان انا حاسس ان كل اللى ذكرتو الشهر اللى فات ناسيو وفى مسائل بتقف قدامى فالفيزياء والكمياء المواد الصعبة الفيزياء مش علشان صعبة لا علشان لما بذاكر الشرح ساعتين بحتاج افضل احل عليه 6 ساعات تقريبا علشان منسهوش ولو حليت ومسالة وقفت قصادى بفضل اجرب فيها وفى الاخر ممكن تطلع غلط ودا غالبان حضرتك تنصحنى انى اللى عارف نفسى انى مش هعرفها اشفها فالاجابات وخلاص واحفظ الفكرة ولا احاول وكمان بتاخد وقت كبير فالمحاولة ييجى عشرة دقائق او اكتر والكمياء اعتبرها من الصعبة بردو علشان الحل عليها لان النظرى سهل تقريبا اما العربى فالاستاذ بيمتحنا كل حصة وبناخد 3 حصص فالاسبوع هنتظم معاه وذاكر اللى هنمتحن فيه الجولوجيا مذكرتهاش والفرنساوى مذكرتوش بس عارف القواعد واالانجليزى ماشى مع المدرس فالدرس معلش طوووووووووولت اوى معلش :bosyht9: اولا انا عايز ابدء من الاول خالص يعنى ابدء كانى لسه مذكرتش حاجة بس احل ع اللى هذاكر لانى مبحلش فبنسى بسرعة انا مش عارف الوقت الافضل من 12 بالليل لحد 7 ونصف ولا من 8 بالليل لحد الفجر اصلى وانام يعنى مشكلتى انى مبعرفش اضبط الوقت ولما بعمل جدول مش ببقا عارف المادة دى هتاخد وقت قد ايه فاضل 5 شهور تقريبا ع الامتحان وكل اللى اقدر اقلك انى ذكرتو واكيد نسيت معظمو :blush: الفصل التاسع فيزياء والعاشر وحليت عليهم والكمياء شرح الباب السادس والسابع والثامن ومحلتش لان السادس عقدنى من الحل بحل مسائل كتير غلط هى مش كتير بس لو لف فالمسالة بالذات الباب دا والعربى ذكرت غربة وحنين ونسيتو :bosyht9: والمساء وشكلى بردو نسيتو :bosyht9: والاحياء ذكرت الفصل الاول ومنستوش والحمد لله علشان حليت عليه لكن لسه مذكرتش الوراثة :( والجولوجيا (النفسية صفر من ناحيتها ) مفيش خالص والفرنساوى بحفظ فى الكلمات والانجليزى كويس الى حد ما بس انا عايز ابدء من اول درس فكل ماد مش عارف هلحق اخلص ولا لا بس ان شاء الله هلحق مشكلتى مبعرفش افضل قاعد ع الكتاب كتير بحس بالملل اغير وضع المكتب ولا حاجة ؟ هو فى حل انى افتح باب البلكونة علشان منعسش بس هموت من البرد بس لو مفيش الا الحل دا عادى برد برد نفسى فى حاجة واحدة بس اقعد ع الكتاب مزهئش لازم اعمل ايه افتح النت وهترحم منو ولله الحمد زى ما بعت عن الفيس تانى انا الحمد لله كويس فى الفهم لكن الحفظ خربان بس عادى الحمد لله بردو بكتب وبحفظ لكن مشكلتى مش عارف انتظم ع جدولو لا وقت انام فيه واذاكر فيه ولا اتلم ع الكتاب علشان استهتارنا فتانية واولى المهم قبل ما ابص الاقلا نفسى ع الامتحانات زى كل سنة ومذكرش الا اخر شهر اعمل ايه ؟؟؟؟؟؟؟؟؟؟؟؟؟؟ طبعا طبعا عارف انى طولت مش كتير وبس لا كتيييييييير وبغباء معلش :bosyht9:
|
بص انا هكلمك بصراحة خالص علشان والله ارتحتلك اولا انا اول شهر ونصف فالمدرسة كنت بذاكر من ع النت وطبعا دا اخطر حاجة المهم دخلت ع المنتدى دا بالصدفة لقيت قسم اجتماعيات طالب دخلت لقيت موضوع لطلبة علمى علوم دخلت عليه كانت دكتورة ميادة فاتحة قلتلى ابعد عن الفيس خالص حلفت ما انا فاتحو لمدة اسبوع وبعدها حلفت ما انا فاتحو لمدة شهر والشهر دا هيخلص يوم الخميس اللى جى دا المهم بقا المنتدى دا نفسو عمل زى الفيس بالنسبة ليا وبصحا علشان اذاكر اول ما اشعر بملل اشغل الكمبيوتر وافتح النت واضيع وقت انا فى اسبوع حلفت فيه ما هفتح لا نت ولا الكمبيوتر خالص او 10 ايام ذكرت فيهم الفصل التاسع والعاشر وحليت عليهم فيزياء و5 دروس احياء وحليت ع درسين تقريبا وذكرت الباب السادس كمياء وكلمات 5 وحدات انجليزى ونصين فالعربى بس لما ذكرت بجد اسبوع وبعد كدا رجعت تانى للاهمال انا عارف نفسى لازم احلف بالعظيم علشان اعمل الجاجة دى يعنى لما حلفت كنت كل يوم اجى افتح الجهاز افتكر انى حلفت وشكلى هحلف بس بعد يوم الخميس علشان افتح الفيس هفتحو يوم وبعدها هذاكر وحلف ما هفتحو الكمبيوتر تانى ولما احب ادخل اشوف شرح فيزياء او حاجة هبقا افتح الاب بتاع اخويا وهحلف يوم الخميس وبعد ما الاسبوع يخلص هدخل واقول لحضرتك انا ذاكرت ايه فالاسبوع دا واقفل ع طول ويا ريت تكون حضرتك متابع معانا علشان لو فى مشكلة ولا حاجة تقدر حضرتك تفدنا بخبرتك المهم انا منتظر رد حضرتك علشان اول ما هترد باى نصيحة هعمل بيها وبعدها هحلف طبعا هحلف ما هفتح الكمبيوتر تانى ع العموم والله ما انا فاتحو بكرا خااالص هفتحو يوم الخميس بس وبعدها كل اسبوع مرة ( النت يعنى لانى مش هفتح الكمبيوتر دا تانى بعد النهاردة هو سبب فشلى ) بعت عنو ارتحت رجعتلو اهملت اهمال شديد حتا فى موضوع عملتو علشان كل يوم انا و not msaked نكتب ذاكرنا ايه مش عارف اكتب نا ذاكرت ايه مكسوف اقول ذكرت حاجة بيسطة وبس انا هفتح كل يوم اكتبلو ذاكرت ايه علشان اتنافس انا وهو بس خمسة دقائق لان اخويا اصلا مش هيسمحلى باكتر من كدا ع الاب ههههههههه بضحك من همى بس عادى بقا بس انا الحمد لله لو بدئت مذاكرة مادة مبحطش فى تفكيرى انها صعبة ولا سهلة عادى جدا بس المشكلة مبعرفش استمر ع الكتاب ومتقليش افتكر يوم الامتحان بردو مبعرفش المفروض اذاكر المادة كام ساعة متواصلة علشان مزهئش وكدا وهل مذاكرة المواد كلها فى يوم واحد حلو ؟؟
|
بص يا استاذ محمود .. قولي ايه المواد اللي عندك تحديدا .. وانتا نظام حديث ولا قديم .. وانا هزبطلك جدول تمشي عليه .. بحيث تزاكر المنهج في 3 شهور وتبدأ تراجع الشهرين الباقيين ..
|
انا نظام جديد علمى علوم المواد (عربى - احياء - انجليزى - فرنساوى - جولوجيا - كيمياء - فيزياء - ) مواعيد دروسى السبت 11 احياء 2 عربى 5 فرنساوى الاحد 3ونصف فيزياء بس فى نصف ساعة قبلها مواصلات وبعدها والدرس ممكن يكون ساعة ونصف او اقل ع حسب ويوم الاثنين الساعة 1 e والساعة 4 الا ربع كمياء و5 احياء و7 عربى يوم الثلاثاء الساعة 4 فرنساوى بس مبرحوش الشهر دا و6 جولوجيا ويوم الاربعاء 4 فيزياء نفس نظام يوم الاحد والساعة 7 عربى يوم الخميس 4ك 5 f
|
أنا عندي فكرة ليك انك تخلص المنهج في 3 شهور وبعد كده تبدأتراجع .. الشهرين الباقيين ..
بس انا هعملك جدول أسبوعي .. |
اقتباس:
|
1 مرفق
اقتباس:
بس أنا ملاحظ ان معندكش رياضة .. ايه النظام الغريب ده .. امشي على الجدول .. والبداية هتكون صعبة شوية .. بس هو اسبوع واحد والجدول هيكون روتين يومي .. |
اقتباس:
وبعد اسبوع ان شاء الله هقول لحضرتك انا انتظمت بنسبة كام فيه يا رب اقدر امشى عليه ومفيش حاجة تعطلنى جزاك الله خيرا وياريت يثبتو الموضوع دا علشان بجد مهم اوى |
اقتباس:
|
اقتباس:
حضرتك طيب انا كلام المدرس الشاطر منطبق كليا على بعض المدرسين اللى باخد عندهم بس في مدرسين زى الكيمياء بيشرح وشرحه حلو خالص وناس كتير نصحتنى بيه وانا مرتاحة معاه من سنة تانية هوا كل فصل بيدينا مراجعة نشوف ايه الاسئلة اللى وقفت معانا ولما نخلص المادة هيعمل امتحانات زى مبيقول بس بصراحة يعنى لو في مرة كسلت مش بيسأل اوى في مدرس تانى بيمتحن كل شوية ومراجعة بس انا في نص السنة ومش عايزة اغامر تانى وانا اى سؤال بسأله ليه العربى انا طلعت من عنده لا بيمتحن كل خمس حصص وبيسمعلنا كل حصة المراجعة والتحضير شفوى وواجب النحو بيحله بسرعة شفوى وبيكون عندى اسئلة هوا بيمشى بسرعة ومش بيجاوب على حد فانا قولت انا اقعد في بيتى ولا اروح عنده لان اهم حاجة اسألتى رغم ان في ناس كتير دخلت طب كانت عنده انا دلوقتى رحت عند مدرس جديد شرح حلو وكل الاسئلة بيجوبها وامتحانات وحلو بس انا عايزة اخفف من الدروس وخايفة اطلع من العربى واندم انا قولت امشى كأنى مع مدرس واقعد في البيت واذاكر واى سؤال يقف اروح المدرسة في مدرسين ممتازين يجوبونى ومدش الجولوجيا بروحله عشان موجه وفاهم في تكات الامتحان وبيمتحن كل حصة بس بصراحة انا بروح عنده عشان امتحاناته مش بفهم منه اوى هوا انا كدا ماشية صح ولا ايه والانجليزى دلوقتى احفظ كلمات ترجمة اى كلمة ولا في كلمات معينة زى اللى بيحصل في البلد وكدا عشان انا معنديش حصيلة لغوية قوية:o وشكرا جدا لاهتمام حضرتك وجزاك الله خيرا |
اقتباس:
انتي بتقولي انك بتكسلي في الكيمياء .. يبقى التقصير منك .. واعتبري دايما ان المذاكرة امانة .. ولو ما ذاكرتش .. هتخوني الأمانة .. العربي :: انتظمي مع المدرس .. وركزي كويس جدا في العربي .. لان فروعه كتيره .. وخدي النصايح دي للعربي .. 1- اقري القصة كتير .. 2- حلي كتير على البلاغة .. 3- احفظي الننصوص ومفرداتها ضروري جدا .. 4- الأدب شوية حفظ بس مراجعة أول بأول .. 5- التعبير حلي موضعات على قد ماتقدري .. 6- حلي اكتر كم من الامتحانات .. بالنسبة للانجليزي .. بما ان حصيلتك اللغوية قلية لازم تحفظي كلمات كتييييييييييييييييييييير .. القصة لازم تذاكريها كتييييييييييير .. احفظ القواعد وافهميها وحلي عليها كتير .. اما البراجراف .. الفي مقدمة ونهاية ليكي واحفظيهم .. او اسالي احد المدرسين عليها .. حلي امتحانات كتييييييييييييييييييييييير .. متنسيش الانتظام في العربي .. واذا انتي مرتاحة مع المدرسين استمري معاهم .. |
بجد شكراً |
اقتباس:
بس اللي أعرفه ان اللي ما بياخدش لغة تانية في أولى مش هياخدها باقي السنين .. بالنسبة للادوات لازم تحفظي الكلمة بالأداة .. الديالوج حلي عليه كتييييييييييير .. يعني حلي اكبر عدد من المذكرات والملخصات .. حتى لو حليتي الديالوج بس .. دي نصيحتي ليكي في المواد كلها .. مش الالماني تحديدا لازم الحل ةالكتيير .. على الجزئية اللي انتي مش فهماها .. وكله بالتمرين .. وزاكري بالورقة والقلم .. يعني مثلا لو حفظتي كل يوم 15 كلمة بادواتهم .. اعتبريها روتين يومي .. |
|
اقتباس:
واي اسالة انا تحت أمركم |
حضرتك كام سنه ؟
|
اقتباس:
|
ياريت تتابع انا متابعة الموضوع جدا ياريت لو سمحت
|
الدرس الرابع
الدرس الرابع : المراجعة : يمكن قبل ما اكلمك عن المراجعة غيري كتييير كلموك عنها .. هيا فعلا حاجة مهمة جدااااااااااااا ..انتا اكيد بتنسى .. وده شئت ام أبيت هيحصل .. انا مش هقولك انك اول ما تبص في الحاجة وتيجي تفتكرها هتفتكرها .. ده مستحييييييييييييييييل .. وحل النسيان هو انك تفهم .. لكن لازم من الحفظ لانو هو اللي بيدعم الفهم .. مش قصدي الحفظ ان اول ما المدرس يسالك ترص الصفحة رص .. لأ .. قصدي توازن بينهم .. امتى تكون المراجعة ؟؟ أكيد مش اخر السنة دي في كل وقت .. اخر اليوم ونهاية الاسبوع ونهاية الشهر ونهاية الترم واخر السنة .. يعني لازم تراجع من فترة لفترة ..يعني حط ساعة او نص ساعة في اليوم .. تراجع فيها .. ويوم في الاسبوع تراجع فيه .. وهكذا .. المراجعة النهائية :: حاول تدي لنفسك اكتر وقت ممكن في المراجعة النهائية ..يعني مثلا قبل الامتحان بتلات شهور تلاتة ونص .. وفي الفترة دي حاول متفكرش في الامتحان سهل ولا صعب .. احنا قلنا ايه خليك في الحاضر ومهد لمستقبلك .. وسيبك من الامتحان .. زاكر وبس .. عايز تعرف الامتحان سهل ولا صعب .. اقولك .. انتا لو طلعت من اللجنة حالل كويس .. يبقى تعبت واجتهدت .. ولو طلعت وقولت انو صعب يبقى انتا ماذاكرتش .. في نقطة مهمة جدا .. اوعى تفكر في الدرجات اللي هتجيبها .. نخش في المراجعة الفعلية .. اللي فات ده كان تهيئة .. ازاي أراجع .. بص انتا ياللي في تالتة عندك سبع مواد .. هتزاكر المواد دي ازاي .. انتا هتيجي قبل الامتحان بشهرين تلاتة .. وتقسم المواد دي على مجموعتين على سبيل المثال ( عربي - فيزيا - أحيا ) أو المواد الصعبة وتاخد فيهم اسبوع متقومش من عليهم لحد متخلصهم .. دي المراجعة الأولى .. بعد كده تاخد يووم تحلي فيه على الاقل خمس امتحانات لكل مادة .. كده راجعنا النص في 8 ايام .. بعد كده الاسبوع اللي بعده على سبيل المثال ( كيميا - جيولوجيا - انجليزي - فرنساوي ) وراجعهم في اسبوع .. بعد كده خد يوم حل امتحانات للجميع .. كده راجعنا المراجعة الأولى في نص شهر .. بعد كده .. هتاخد تلات ايام للمجموعة الاولى تراجع فيها الاجزاء اللي اخفقت فيها .. وتقييمك من الامتحانات اللي حليتها .. واربع ايام للمجموعة التانية .. بعد الاسبوع ده تاخد اسبوع تاني تراجع كل يوم مادة متقومش من عليها بحيث ميكونش عند اي مشكلة .. كده راح شهر .. وباقيلك شهرين او شهر على الامتحانات حسب مابدأت .. ان كان بقيلك شهر اقعد في الشهر ده حل امتحانات من سنة 1960 .. ههههههههه وان كان بقيلك شهرين اقدر اقول انك ملك .. اقعد بقا راجع لحد الاتقان .. بحيث اول ما المدرس يسالك في المادة ترص رص .. بعد كده حل امتحانات على قد ما تقدر .. نصائح عامة :: لازم وانتا بتراجع تبدا بالأصعب ..وما تروحش لجزئية اللي لما تخلص اللي قبلها 100 % .. واهم حاجة التركيز .. وسيبك من التليفونات الي بتكترالفترة دي .. زاكر احسن من كده .. واهم حاجة خلي عندك ثقة في نفسك .. انا ان شاء الله هاطلع الاول على المدرسة او الادراة او حتى الجمهورية .. ايه المانع .. وبكده الدرس ده خلص .. الدرس الجاي ان شاء الله عن كيفية مذاكرة كل مادة .. وفنيات كل مادة .. |
العربي
بما إن أنا بكتب لنفسي
إذن هكمل وانتظر اي حد يرد العربـــــــــــــــــي القراءة :: أحسن حاجة تذاكرها على صورة اسئلة و اجوبةالنصوص :: اعرف المعاني كويس جداااااااااااااااااا .. احفظ الحاجات الشاذة وافهمها .. ركز على الاستعارات والتشبيهات والكنايات مهمة جداااااااااااااااا .. حاول تعرف الحاجات دي في البداية .. لأن الى بيحفظ الجماليات يبقى بيتعب عقله على الفاضى وتركز على التعليق على النص .. هو المدرسين مش بيشرحوا .. بس هوا تمييز بين الفاهم . واللي مش فاهم .. الجزء الاحلى ::: القصة :: اقرا الفصل مرة واتنين وتلاتة .. وركز على المعاني .. وحاول تعرف المعنى من السياق .. واعتبر القصة فيلم .. الأدب :: ده حفظ اكتر من الفهم .. واسئلته واضحة ومعروفة .. النحو :: ذاكر القواعد كويس .. يعني النحو من رابعة ابتدائي لحد تالتة ممكن يسالك فيه ده فرع تراكمي التعبير :: اهم حاجة في التعبير انك قبل ما تكتب في الموضوع .. تعمل حاجة زي التمهيد .. مش تخش علطول .. وتسيب كلمة فاضية قبل ما تبدأ .. الكتب الخارجية : الامتحان هوا أحسن كتاب .. |
الانجليزي
الانجليـــــــــــــــزي اهم حاجة في الانجليزي الفهم مش الحفظ .. وتاخد بالك من التعبيرات وتركيبات الجمل .. واحفظ كلمات على قد ماتقدر .. والقصة احسن طريقة فيها هي السؤال والجواب .. بعد ما تقرا الفصل مرة واتنين .. وتركز على القةاعد اوييييييييييي .. لان عليهم سؤالين .. Choose و Rewrite وبالنسبة للترجمة .. احفظ كلمات على قد ماتقدر .. وفيه مذكرات بيعملوها المدرسين .. بتكون فيها كلمات ترجمة .. القي نظرة عليها .. بالنسبة للتعبير .. سيبك من انك تحفظ مقدمة ونهاية وتشتغل بيهم .. ده اسمو تخلف ده بيلغي ابداعك .. انتا تعبر بطريقة جميلة بحيث انك تكسب المصحح .. بس الكتب الخارجية :: سربرايز أو توب ستيودنتس |
كمل الموضوع جميل وانا بصراحة استفدت منه ارجو انك تذكر باقى المواد وايه الاخطاء اللى نحاول مانقعش فيها:d
|
الفرنساوي
الفرنســـــــــــاوي مادة سهلة جداااااااااااااااقواعدها سهلة فى المذاكرة خالصصصصصصصصصصصصص وكلماتها مش صعبة زيها زى الانجليزى من حيث أنك تلم عدد كبير من الاسئلة والمعانى يعني درجتها في جيبك ان شاء الله الكتب الخارجية : مون بروفيسور أو برافو |
الأحياء
الأحيــــــــــــــــــــاء مادة سهلة وحلوة بس عايزة منك شوية حفظ ..وبالنسبة ليك في تالتة مع النظام الجديد هيا قليلة .. وهيا من مواد الخمسينات ان شاء الله .. بس عايزة مراجعة مستمرة .. الكتب الخارجية : الامحتان |
انا بصراحة كنت رافض فكرة إن حد يكتب خطة مذاكرة لحد تاني بس امبارح واحد صاحبي كان كاتب خطة حلوة وعجبتني جدا وشكلي هبدأ أغير رأيي في النقطة دي المهم أنا نفسي حضرتك تكتبلي خطة بحيث أخلص المنهج واراجع عليه حلو وانا مبروحش مدرسة وبروح درسين بس واحد من(١١ونص ل ١ ونص) الظهر والتاني (٦ل ٧) بالليل والدرسين سبت واتنين واربع بس ياريت تكتبها علي الورد مش بي دي إف عشان انا بفتح من محمول مش كمبيوتر أو ممكن تكتبها علي document
|
ايه يا دوك فينك؟
|
1 مرفق
اقتباس:
|
السلام عليكم .. بجد الموضوع جميل وجبار فعلاً ربنا يجزيك كل خير ويوفقك
بالنسبة لي أنا 3ث بس نظام قديييم .. وبصراحه يعني إلى حد ما ف حالة أحباط شديد أنا مأجله فيزيا ورياضه بس وامتحنت الباقي طبعا كان فيه ظروف ....... الحمد لله ع كل شئ أنا دلوقت حماسي قليل جدا جدا وبصراحه خايفه من فكره اني أكون ضيعت السنه ع الفاضي وبحاول أقاومها بس مفيش فايده تذكر أنا مشكلتي في الجداول بصراحه وتنظيم الوقت النوم والمذاكره مش عارفه أصحى إزاي مش بصحى لوحدي عايزه بس حضرتك تقوللي ع مخطط للفيزيا مثلا وإني أخلصها وأحلها ... وبعدين أراجع ..أنا عايزه حاجة اتشجع بيها ملاحظه يعني أنا إمتحاني على المنهج كله يعني ال15 فصل ياريت حضرتك تساعدني فعلا بأي مقترح لآي حاجه لان خلاص الوقت مفيييييييييش .. والمادتين اللي معايا بمثابة 4 مواد نظام جديد ربنااااااااااااا يسهل والله ويجزيك كل خييييييييييييييييييييييييييييييييييييييييييييييييي يييييييييييير |
اقتباس:
هيا مش صعبة ولا حاجة .. انا الفيزيا بدأت أزاكرها من شهر 1 .. وجبت فيها 49.5 هيا مادة ممتعة جداا .. لانها فهم بجزء بسيط حفظ .. تقريبا احنا دلوقت في نص شهر 12 باقي على الامتحان 7 شهور ونص على اساس انو في سبعة .. يعني معاكي سبع شهور ونص .. انتي لو خلصتي الفيزيا في 3 شهور ونص بمعدل اربع ابواب في الشهر .. يبقى ممتاز .. ويكون معاكي تلت شهور تراجعي فيهم .. ولاحظي انك بتزاكري فيزيا ورياضة بس .. يعني هتزاكر اليوم كله في مادتين .. يعني ان شاء الله تقفيلهم ... اما الرياضة فدي حلها بسيط جدا .. الميكانيكا : فهم القوانين وحفظها بعدين التطبيق والحل .. الجبر والفراغية : اهم حاجةفي الفراغية حفظ القوانين عربي كويس .. والجبر اجاباته منطقية .. التفاضل والتكامل : وده فرع مضمون وتافه بس لازم الحل .. الرياضة قسميها على تلت شهور ونص برضه زي ما تحبي .. وراجعي وحلي امتحانات الباقي .. دعواتك |
| جميع الأوقات بتوقيت GMT +2. الساعة الآن 08:22 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.