أساتذتى رواد البوابة الكرام

فى هذه السلسلة المتجددة سوف نتعلم مفاهيم أساسية عن الأقتصاد

نرجو من أساتذتنا الرواد الكبار فى البوابة فى مجال الاقتصاد

التصحيح لنا والمشاركة معنا فى هذا الموضوع

سوف يتم تخصيص هذه المشاركة لعمل فهرست بالموضوع لسهولة الوصول الى البنود الخاصة بالموضوع



تابعونا




فهرست الموضوع


المشاريع المشتركه مع شركات اجنبيه الجزء الأول الجزء الثانى

مين المسئول عن أزمة الدولار؟ الجزء الأول الجزء الثانى


هل الشعب المصري فعلا مفرط في الاستهلاك؟ الجزء الأول الجزء الثانى الجزء الثالث الجزء الرابع


الاستيراد والتصدير فى مصر الجزء الأول الجزء الثانى الجزء الثالث


مقارنة الصادرات المصرية و التونسية هنــــــا


رفع سعر الفايده في مصر و امريكا و تأثيره علي مصر الجزء الأول الجزء الثانى


سعر الدولار و ازاي البنك المركزي قلل سعره هنــــا


هل حملات تنشيط السياحه الداخليه مفيده؟ الجزء الأول الجزء الثانى


ماذا يحدث لسعر الدولار (١) الجزء الأول الجزء الثانى


ماذا يحدث لسعر الدولار (٢) الجزء الأول الجزء الثانى الجزء الثالث


ماذا يحدث لسعر الدولار (3) الجزء الأول الجزء الثانى الجزء الثالث

الاسئله و الاجوبه المفيده في الدولار و الجنيه هنــــا

ماذا يحدث للبورصه المصريه الجزء الأول الجزء الثانى الجزء الثالث


الخصخصة الجزء الأول الجزء الثانى الجزء الثالث الجزء الرابع


ازاي نطور مصر للطيران؟ الجزء الأول الجزء الثانى


أنواع الاقتصاد الجزء الأول الجزء الثانى الجزء الثالث


الميزان التجاري بين الدول الجزء الأول الجزء الثانى


اسعار و سوق الغاز … و العلاقه بين مصر و اسرائيل في الغاز الجزء الأول الجزء الثانى الجزء الثالث الجزء الرابع الجزء الخامس


الناتج القومي المحلي الجزء الأول الجزء الثانى الجزء الثالث


تبسيط مفاهيم الاقتصاد.الحلقه الاولي: التضخم و أسبابه الجزء الأول الجزء الثانى الجزء الثالث



تبسيط مفاهيم الاقتصاد.الحلقه الثانى : البورصة الجزء الأول الجزء الثانى الجزء الثالث الجزء الرابع

المشاريع المشتركه مع شركات اجنبيه





https://jawdablog.files.wordpress.co...nies.jpg?w=670




ليه بقي بنقول ان شراكه الجيش مع الشركات الاجنبيه في السوق المصريه هي مصيبه كبيره؟


تعالوا نفهم امتي و ليه و ازاي المفروض تعمل مشروع مشترك مع شركه اجنبيه و انواع المشاريع المشتركه.

تعالوا نتخيل الاستاذ احمد مدني هوه راجل عنده محل بقاله في مصر فتحه بعد لما رجع من الخليج و حط فيه رأسمال حوالي ٣ مليون جنيه هو تحويشه عمره من الشغل في الخليج. المحل فتحه في التجمع الخامس و بيكسب معقول.

لكن الاستاذ احمد مدني واجهته مشاكل. ايه هي؟

١- ان ناس كتير ابتدت تشتري من كارفور و امثاله.

٢- لو هو حب يتوسع زي كارفور هو محتاج رأسمال ١٠٠ مليون جنيه تقريبا و دي فلوس مش معاه. ٢٠ منهم بس تمن الارض اللي وراه.

٣- انه زار محلات السوبر ماركت في امريكا و بريطانيا و لقي انهم عندهم حاجات مش موجوده في حته تانيه. يعني مثلا بيقدروا يدرسوا سلوك المشتري في المحل من الكاميرات و بناءا عليه بيرتبوا السلع في الأرفف بحيث انها تعمل اقصي ربح و ان المشتري يلاقي الحاجه بسهوله . ده اللي احنا بنقول عليه المعرفه او know how.

٤- ان شركات السوبرماركت الامريكيه بتشتري السلع بكميات ضخمه جدا لان سوقهم كبير قوي و بالتالي بياخدوا تخفيضات جمله كبيره جدا و كمان بيقدروا يتحكموا في الجوده. يعني مثلا والمارت الامريكيه بتقدر تفرض علي المنتجين ان ينتجوا حاجات مخصوصه لوالمارت بالجوده اللي والمارت تطلبها و دي كلها حاجات هو ميقدرش عليها.

يبقي عاده أهداف المشروع المشترك مع شركه اجنبيه هي انك:

١- تجيب فلوس جديده. رأسمال مثلا عشان توسع النشاط.
٢- تجيب خبرات جديده او تكنولوجيا جديده مش موجوده عندك.
٣- انك تجيب حد يقدر يسد معاك في منافسه انت مش قدها. زي مثلا محل بقاله قصاد شركه زي كارفور.

طيب ليه شركه اجنبيه تقبل تشترك مع حد او شركه مصريه؟

الأسباب كثيره.

١- مثلا في بعض الدول زي السعوديه و الصين القانون بيفرض ان جزء من الشركه يكون مملوك لجهه محليه.

٢- ان السوق الجديد فيه تعقيدات محتاجه حد يكون فاهمها. يعني محتاجين حد مثلا موجود فعلا في السوق الصيني لانه معقد و لغته مختلفه تماماً.

٣- ان الشركه الاجنبيه مش عاوزه تشيل كل المخاطره و عاوزه واحد يدخل معاها في المخاطره لو السوق فيها ربح كتير بس مخاطره عاليه.

طبعا العقد شريعه المتعاقدين. و بناءا علي كل طرف معاه ايه و عاوز ايه يكون موجود في الشراكه بتختلف الموازين بين الطرف المحلي و الأجنبي.

لذلك احنا مثلا المفروض نشجع النوع ده من الشراكات طالما فيها توازن لان مصر دوله محتاجه رأسمال و محتاجه معرفه و محتاجه و دي كلها حاجات شركات اجنبيه كتير تقدر تعملها.

جميل. طيب ليه بقي بنقول ان شراكه الجيش مع الشركات الاجنبيه في السوق المصريه هي مصيبه كبيره؟ تعالوا نفهم.



يتبع

تابع



جميل. طيب ليه بقي بنقول ان شراكه الجيش مع الشركات الاجنبيه في السوق المصريه هي مصيبه كبيره؟ تعالوا نفهم.




المعلم تامر العسكري هو اكبر معلم بتاع بقاله في السوق المصري. و طبعا زي ما احنا عارفين في أيده الحل و الربط و البندقية و الدبابه و كل شيئ. المعلم تامر العسكري في أيده حاجات كتير قوي و يقدر يطلع قوانين و يحاكم اي حد يعني في محاكمه الخاصه.

المعلم تامر لقي انه محتاج يتوسع في محلات البقاله بتاعته و قرر انه محتاج رأسمال اجنبي. المعلم تامر زار بريطانيا في دوره تدريبيه و عجبه جدا محلات تيسكو هناك. قرر المعلم تامر انه يدخل شراكه مع تيسكو الانجليزيه. طبعا المعلم تامر له اتصالات كبيره في إنجلترا و كلم سفير مصر هناك عشان يرتب مقابله مع رئيس شركه تيسكو.

رئيس شركه تيسكو عجبته جدا حكايه انه يدخل شريك مع المعلم تامر العسكري. بالذات بعد المعلم فهد السعودي كلمه و قاله انه ياخذ باله من المعلم تامر لان عزيز عليه قوي و انه لو عمل شغل مع المعلم تامر في سوق البقاله في مصر حيقدر يعمل شغل كبير مع المعلم فهد السعودي في السوق بتاعته اللي هي جنب سوق المعلم تامر.

قرر رئيس شركه تيسكو يخش شركه النص بالنص مع المعلم تامر. المعلم تامر دخل بتمن الارض في التجمع الخامس (محدش يقدر يقول للمعلم تامر لا) اللي هي ارض واخدها من الدوله ببلاش. و حيدخل كمان بتمن الكهربا و المياه و الإعلانات. كل دول حاجات المعلم تامر بياخدها ببلاش. و شركه تيسكو تدخل بتمن المباني و الاداره. و يقسموا الربح بالنص.

بنوا السوبر ماركت الأولاني و التاني. الفلوس جريت مع المعلم تامر. و فكر انه يروح يجيب شركه والمارت الامريكيه يعمل معاها شركه جديده تانيه. بتوع تيسكو قالوا للمعلم تامر مينفعش. ليه؟ قالوا انه لو جاب والمارت حتدخل و تاكل السوق و تنزل الاسعار و مكاسبك اللي بتعملها معانا حتقل كتير قوي. انت عاوز تجيب والمارت ليه؟ عشان أتوسع أكتر و افتح سوبرماركت في المعادي. طيب احنا حندخل معاك في سوبر ماركت المعادي. مش مشكله. و ربحك مضمون يا معلم تامر.

المعلم تامر العسكري حسبها. و لقي ان كلام تيسكو صح. و بعدين هوه صحيح الاسعار حتقل علي المصريين لو والمارت دخلت. بس ربح المعلم تامر كمان حيقل. و ليه كده؟ و بعدين الواد اللي اسمه احمد مدني ده كمان عاوز يجيبهم يشتغلوا هنا في السوق. علي جثتي. انا حاحط مليون عقبه قدام احمد مدني لحد والمارت ما تطفش و عمرها مترجع مصر أبدا.

و طبعا الورق ورق المعلم تامر و الحكومه حكومه المعلم تامر. هوه في حد يقدر ينافس المعلم تامر؟

تمر السنين و رئيس شركه تيسكو يبقي رئيس وزرا بريطانيا.
(عادي جدا ان ده يحصل بالذات في امريكا. ديك تشيني كان رئيس شركه هاليبرتون. جورج بوش الاب و الابن كانوا اصحاب شركات. جورج شولتز وزير الخارجيه الأسبق كان رئيس شركه بيكتيل الامريكيه اكبر شركه إنشاءات في العالم. روبرت ماكنمارا كان رئيس شركه فورد للسيارات. و هكذا.)

طبعا رئيس شركه تيسكو عارف المعلم تامر و ماسك عليه انه منع والمارت انها تدخل السوق المصريه. خد بالك رئيس تيسكو معملش حاجه غلط. هوه بس ادي فكره ان دخول والمارت منافس وحش. و ده طبيعي و عادي في المنافسه. تصرفات المعلم تامر هي اللى مش تمام.

كمان طبعا شركه والمارت نبهت السفاره الامريكيه في القاهره للموضوع و المخابرات الامريكيه عرفت الحكايه. و تصرفات المعلم تامر طبعا ضد القانون الامريكي اللي بيمنع الاحتكار. و طبعا زي ما شوفنا في موضوع فساد الفيفا امريكا تقدر تطبق قانونها في اي مكان في العالم.

بريطانيا و امريكا كانوا محتاجين تأييد المعلم تامر العسكري لضرب دوله بهريزيا. المعلم تامر بيحب الناس في بهريزيا. المعلم تامر مكانش عاوز يؤجر محل البقاله بتاعه لضرب بهريزيا. رئيس وزرا بريطانيا كلمه مكالمه و قاله فاكر ايام زمان لما انا كنت رئيس شركه تيسكو. و الله عملنا شغل كويس مع بعض. عاوزين تأييدك في ضرب بهريزيا. المعلم تامر اتحجج ان مجلس الشعب حيرفض. تاني يوم سفير بريطانيا في مصر سلم المعلم تامر رساله فيها ان المدعي العام البريطاني و الامريكي ناوي يفتح تحقيق في موضوع منع شركه والمارت.

المعلم تامر حويط طبعا و فهم الموضوع و علي طول أيد ضرب بهريزيا. مجلس شعب ايه و بتاع ايه. دول كلهم شغالين عند المعلم تامر.

عرفنا ليه الجيوش و اجهزه الدوله غلط انها تدخل في البيزنس و الاسوء و المصيبه الأكبر انها تدخل مع شركات اجنبيه؟

ده اللي احنا بنقول عليه تعارض المصالح او conflict of interest.
مينفعش تبقي صاحب القانون و الجيش و الدبابه و في نفس الوقت تعمل بيزنس.

واحد يقولك احنا واثقين في الجيش. يا عمي الرسول بيقولنا اجتنبوا الشبهات يا ناس: ( إن الحلال بين والحرام بين وبينهما أمور مشتبهات لا يعلمهن كثير من الناس فمن اتقى الشبهات استبرأ لدينه وعرضه ومن وقع في الشبهات وقع في الحرام كالراعي يرعى حول الحمى يوشك أن يرتع فيه ألا وإن لكل ملك حمى ألا وإن حمى الله محارمه ألا وإن في الجسد مضغه إذا صلحت صلح الجسد كله وإذا فسدت فسد الجسد كله ألا وهي القلب) متفق عليه.

هذه هي الشبهات و الله.

مين السبب في ازمه الدولار؟



https://jawdablog.files.wordpress.co...it-1.jpg?w=670



في ارقام كده لازم تحفظها كده عن ظهر قلب.

الرقم الاول هو مصر بتستورد بكام.

كل شهر مصر بتستورد سلع بحوالي ٤,٥ مليار دولار او بحوالي ٥٥ مليار دولار في السنه. يعني كل طلعه شمس مصر بتدفع للعالم ١٥٠ مليون دولار تكاليف الحاجات اللي بنستوردها. الرقم ده ثابت بقاله فتره طويله باستثناء سنه ٢٠١٥ جينا فجأه في شهر واحد استوردنا بحوالي ٧ مليار دولار و معظمها راح في سيارات و سلع كماليه


https://jawdablog.files.wordpress.co...pg?w=670&h=330


بس بصفه عامه كل يوم مصر لازم تدبر ١٥٠ مليون دولار عشان نعرف نآكل و نشتري لبس و المنتجات الصينيه الأخري.

الدولارات دي بتيجي من ٤ مصادر رئيسيه: التصدير، قناه السويس، تحويلات المصريين في الخارج و السياحه. لو المصادر الاربعه دول كفوا يبقي مصر معاها دولارات كفايه و سعر الدولار يفضل ثابت. لو المصادر دي مكفتش يبقي مفيش دولارات بس طبعا لازم نأكل يبقي لازم يحصل ازمه دولار.

يبقي الرقم التاني هو التصدير.

مصر بقالها سنين طويله بتصدر بحوالي ٢,٥ مليار دولار في الشهر او بحوالي ٣٠ مليار دولار في السنه. الكلام ده ثابت بقاله سنين.

من سنه ٢٠١٣ لحد دلوقتي و التصدير عمال يقل باستمرار (الصوره الاولي) لحد لما وصل ١,٥ مليار دولار في الشهر دلوقتي.


https://jawdablog.files.wordpress.co...pg?w=670&h=375

يعني نزل حوالي ٤٠٪ في ٣ سنين.

يعني بدل ما بنصدر ب ٣٠ مليار بقينا بنصدر ب ١٨ مليار دولار في السنه بس.

الرقم التالت هو الدخل من قناه السويس.

و ده ٥ مليار في السنه مش بيتغير. بالعكس عمال ينقص شويه صغيرين بسبب التباطؤ الاقتصادي في الصين.

الرقم الرابع هو الدخل من السياحه

و ده كان لحد ٢٠١٣ حوالي ١٠ مليار في السنه. دلوقتي نزل جدا بس مفيش ارقام معلنه عنه لكن حنشوف ازلي حنوصله.

الرقم الأخير هو تحويلات المصريين في الخارج

و ده كانت عادته يكون من بعد الثوره حوالي ٢٠ مليار دولار في السنه. لكن برضه نزل و حنشوف ازاي حنقدر نعرف الرقم دلوقتي.


تعالوا نحسب بقي:




يتبع

تابع


تعالوا نحسب بقي:



في الأحوال العاديه:

داخل لنا في السنه: ٥ مليار من القناه. ٣٠ مليار تصدير. ٢٠ مليار تحويلات مصريين في الخارج. و اخيرا ١٠ مليار سياحه. يعني داخلنا حوالي ٦٥ مليار دولار. بنصرف منهم حوالي ٦٠ مليار استيراد. و الباقي بنحطه احتياطي للزمن. او ساعات نستورد زياده شويه.

يعني الدولار اللي داخل قد او أكتر من اللي طالع. و بالتالي مفيش ازمه دولار و سعر الدولار يبقي ثابت و مش محتاجين نشحت من حد.

في الازمه الحالية :

داخلنا في السنه: ٥ مليار قناه زي ما هما. ١٨ مليار تصدير بس (بسبب قفل المصانع ).

البنك المركزي أعلن (الصوره الثالثه) ان العجز في الدولارات في مصر وصل انه ٥ مليار دولار كل ربع سنه. يعني 20 مليار دولار في السنه (المصدر ).


https://scontent-cai1-1.xx.fbcdn.net...fa&oe=582079F9



معني كده ان السياحه و التحويلات بقوا ١٧ مليار دولار بس بدل ما كانوا ٣٠ مليار. يعتي نزلوا النصف.


هل احنا اللي ضربنا الطياره الروسيه؟ هل احنا اللي قعدنا نتلاعب و نستذكي مع الروس و نقول لا مش ارهاب؟ هل احنا اللي قتـلنا باولو ريجيني؟ هل احنا اللي استنصحنا مع إيطاليا في موضوعه؟ لا.
يبقي دور مين اللي استنصح و هو اللي مسئول ان السياحه نزلت النصف.

و دور مين اللي طلع قال الدولار حيبقي باربعة جنيه . لان هوه ده اللي مسئول ان تحويلات المصريين نزلت النص بان مفيش مصري حيحول دلوقتي و هو عارف انه لو استني شويه حيحول بسعر اعلي.


https://jawdablog.files.wordpress.co...pg?w=670&h=422

يبقى طار ١٢ مليار دولار كانوا بيجوا من التصدير.

وطار ١٥ مليار دولار كانوا بيجوا من تحويلات المصريين في الخارج و من السياحه.

لذلك مصر بدل ما تبقي عايشه بقت دلوقتي بتشحت و محتاجه ٢٠ مليار دولار معونات كل سنه بس عشان سعر الدولار يثبت.



و للاسف لسه بقي فوايد الديون المتلتله مدخلتش لان كلها ديون بالدولار و حيجي وفت لازم تتدفع.

هى دى الحكاية

هل الشعب المصري فعلا مفرط في الاستهلاك؟




https://jawdablog.files.wordpress.co...ming.jpg?w=670


هل احنا فعلا شعب مستهلك و بيضيع كل فلوسه في السلع الاستهلاكيه و هل فعلا الحكومه غلبانه معانا و انه مش معقول كده؟

طبعا أنصار الرأي ده بيقولوا بصوا علي عزومات رمضان و انك تلاقي العزومه فيها مليون صنف و حاجات كتيره بتروح الزباله او بص علي إعلانات السلع الاستهلاكيه و الكومبوندات في التلفزيون و انت تعرف اننا فعلا شعب استهلاكي.

معارضو الرأي ده بيقولوا لأ دي طبقه محدده اللي بتعمل كده. بصوا علي الفقرا في الشعب و شوفوا دول بياكلوا من الزباله. و بين الرأيين الحقيقه ان الحقيقه ذاتها تاهت. و بالتالي عامه الشعب تاهت في غياب الحقيقه و المعلومات و بيبقوا معرضين انهم ياخدوا مواقف مختلفه تبعا للظروف و الأحاسيس و ده مش بيخلينا نتقدم و لا خطوه لانه بيخلي اي حد يقدر ييجي و بعملنا غسيل مخ و ممكن جدا نقتنع بأي حاجه يقولها و نستمر في اننا شعب يسهل الضحك عليه . طيب تعالوا نتجنب ده و نتعلم حاجه مفيده.


مقياس انفاق البيوت الاستهلاكي

Household final consumption expenditure او اختصارا HFCE



ده مقياس عالمي (المصدر ) بيقيس الفلوس اللي البيت household المتوسط بينفقها علي السلع الاستهلاكيه النهائيه. ناخد بالنا اولا من حكايه المتوسط دي. يعني مروحناش للاغنياء قوي و لا الفقرا قوي. روحنا لمتوسط الانفاق في البلد. عشان دي مشكله كبيره في مصر ان كل واحد عاوز يثبت وجهه نظره بأنه يقوم رايح علي الحالات القصوي اللي اما في اعلي شريحه او اوطي شريحه و الهدف بس انه يطلع صح. عارفين احنا الناس دي كويس و دول احد اهم أسباب المصيبه اللي مصر فيها.

و مش بس كده دول كمان بيغيروا رأيهم حسب الظروف. يعني حسب القعده مين بيقول رأي ايه و هل انا بأحب الشخص ده و لا لأ و بناءا علي ذلك احدد رأيي و اطلع بيانات تعزز بيها رأيي ده من اقصي اليمين او اقصي اليسار و في النهايه انا متلخبط و مش فاهم و بالتالي الكل متلخبط و مش فاهم.


نلاحظ كمان ان المقياس ده بيقيس الاستهلاك النهائي. يعني الفلوس دفعتها و مثلا اشتريت اكل و اكلته او رميته في الزباله. استهلاك نهائي. مش بيدخل فيه مثلا اني اشتريت اكل و طبخته و بيعته لان ده مش استهلاك نهائي.


المقياس ده بيدخل فيه الفلوس اللي بتنصرف علي الاكل و الشرب و اللبس و قسط السياره و فاتوره الكهربا و المياه و هكذا. كمان بيدخل فيه ايجار الشقه او البيت و لو شاري البيت بيدخل فيه قسط البيت طالما البيت بهدف السكن مش بهدف الاستثمار. لذلك ده مقياس ممتاز للاستهلاك في اي بلد.


مقارنه مصر بالعالم في الاستهلاك:




يتبع

المشاركة الأصلية كتبت بواسطة محمد محمود بدر (المشاركة 6482597) و طبعا الورق ورق المعلم تامر و الحكومه حكومه المعلم تامر. هوه في حد يقدر ينافس المعلم تامر؟

المشاركة الأصلية كتبت بواسطة محمد محمود بدر (المشاركة 6482655) يبقى طار ١٢ مليار دولار كانوا بيجوا من التصدير. وطار ١٥ مليار دولار كانوا بيجوا من تحويلات المصريين في الخارج و من السياحه. لذلك مصر بدل ما تبقي عايشه بقت دلوقتي بتشحت و محتاجه ٢٠ مليار دولار معونات كل سنه بس عشان سعر الدولار يثبت. و للاسف لسه بقي فوايد الديون المتلتله مدخلتش لان كلها ديون بالدولار و حيجي وفت لازم تتدفع. هى دى الحكاية

المشاركة الأصلية كتبت بواسطة Mr. Ali 1 (المشاركة 6482667) - أطيعوا الله وأطيعوا الرسول وأولي الأمر منكم. صدق الله العظيم. امضي يا أبو العلا :(:( - طبعاً السبب في طيران هذه المليارات هو المواطن البسيط , ولذلك تقوم الدولة بمعاقبته وتحميله هذه الخسائر !! - فيه ملحوظة صغيرة : هو احنا اللي نفهم اقتصاد ولا المسئولين عن إدارة الاقتصاد وإدارة الحكم؟ أكيد احنا طبعاً لأن الكوارث تقع علينا دونهم !! جزاك الله خيراً وبارك فيك علي هذا الموضوع . متابع. خالص تحياتي

الاستيراد و التصدير في مصر



حنحاول نفهم مصر بتصدر ايه و بتستورد ايه. و لو عاوزين نزود التصدير و نقلل الاستيراد نعمل ايه. موضوع مهم جدا وهيجاوب على اسئله كتيره من نوعيه “طيب طالما انتم فاهمين كده متقولولنا نعمل ايه”

:d:d

طيب. استعنا بالله. اول حاجه لازم تعملها انك تدخل علي ويب سايت عملاه جامعه ام اي تي الامريكيه (معهد ماساتشوستس للتكنولوجيا). دي يا جماعه اهم و اكبر جامعه في العالم. الجامعه دي ميزانيتها في السنه الواحده ٣ مليار دولار (المصدر ).

الويب سايت ده اسمه او اي سي OEC و هي الأحرف الاولي لمرصد التعقيد الاقتصادي (العنوان). اه و الله اسمه كده. بيرصد حركه التجاره العالميه لكل دول العالم. الويب سايت ده فيه صفحه عن مصر زيها زي كل دول العالم (مش مؤامره علي مصر لوحدها يعني) و موجوده هنا.

قبل ما تدخل علي صفحه مصر في الويب سايت ده لازم تعرف حاجه الاول. الويب سابت ده عمله سيزار هيدالجو (أستاذ في ام اي تي و اصله من شيلي) و بيلي كلينجر (مدرس في جامعه هارفارد) و ريكاردو هاوسمان (أستاذ الان في هارفارد و اصله من فنزويلا) و ألبرتو لازلو برباسي (أستاذ في ام اي تي و مهاجر من الاقليه المجريه في رومانيا). الناس دي مش اي كلام. دول نشروا مقاله في مجله ساينس الامريكيه سنه ٢٠٠٧. انك تنشر في ساينس فهذا أنجاز ما بعده إنجاز بالنسبه لأي عالم. عشان بس نعرف ان ده مش ويب سايت عادي. احنا داخلين علي قمه العلم في العالم و حنحاول نبسطها و حتكتشفوا اننا زي بقيه البشر ممكن نبقي كويسين و بنفهم .

ادخل بقي علي صفحه مصر هنا. حتلاقي ايه. حتلاقي اول رسمه فيها اللي بتصدره مصر و التانيه فيها ايه اللي بتستورده. و احنا عشان عارفين انك حتكسل نقلنا الرسمتين هنا.


الاول نبص علي الواردات:


https://scontent-cai1-1.xx.fbcdn.net...16&oe=5858941D

دي الصوره الاولانيه. المستطيل الكبير كله هو عباره عن كل شيئ بتستورده مصر. و متقسم تقسيمات كل واحده عباره عن سلعه محدده مصر بتشتريها و مساحه المستطيل بتاع السلعه دي يتناسب مع كميه الاستيراد من السلعه دي. و الألوان بتاعه المستطيلات حسب السلعه. يعني البترول و منتجاته لونهم بني غامق. المنتجات الصناعيه لونها لبني. الملابس و المنسوجات لونها اخضر غامق و هكذا.

مصر بتستورد بحوالي ٧٠ مليار دولار في السنه. نبص كده علي الحاجات التقيله. حنلاقي انها بتستورد منهم ١١,٥ مليار منتجات بتروليه. منها ٦,٥ مليار دولار بنزين. و دول ظاهرين في الرسمه باللون البني الغامق.

بعد كده باللون الأزرق الغامق المنتجات الصناعيه. استيراد المنتجات الصناعيه كويس يا جماعه. دول عباره عن مضخات و مولدات كهربا. و علي فكره ده كان سنه ٢٠١٣ لما كان لسه في خير و بنستورد منتجات صناعيه.

لكن المصيبه بقي هي ان من المنتجات الصناعيه دي مصر بتستورد تليفونات بمليار دولار. اه و الله.

بعد كده خرده الحديد. طيب ليه بنستورد حديد خرده؟ لان بيدخل في صناعه الحديد و أعاده تدويره.

بعد كده بنستورد قمح بحوالي ٢,٥ مليار دولار. يعني الدوشه دي كلها بتاعه لوبي القمح هي علي ٢,٥ مليار دولار بس من أصل ٧٠ مليار. اه و الله. تخيل. لذلك اي حد يقولك ان دعم القمح هو المشكله حط صباعك في عينه لانه بيستهبلك.


مصر دوله كان لها تاريخ زراعي. مع شحه المياه و قله الارض الزراعية في مصر من الاسهل و الأرخص التعاون مع السودان لإنتاج القمح. طبعا كلكم حتزعلوا لكن الحقيقه مره. من الصعب ان تحافظ مصر علي كونها دوله زراعيه اولا. مش عيب علي فكره. يعني كوريا مثلا بتستورد قمح و ذره قيمتهم ٣,٥ مليار دولار في السنه (المصدر ). لكن محدش قال ان كوريا بلد فاشله. بلد صناعيه من الدرجه الاولي قطعا. و بتستورد قمح و ذره من امريكا و العلاقات بينهم قويه جدا.



يتبع

تابع


القمح ده في مصر حله انك تسيبه للعرض و الطلب. ادي الفلاح المصري سعر عالمي للقمح و خليه ينتج قد ما يقدر و خلي اليات السوق تشتغل لوحدها.

بعد كده مصر بتستورد أدويه قيمتها ١,٢ مليار دولار. ده بقي عيب. يعني مش الأفضل بالذمه اننا ننتج الدوا بتاعنا؟ بالذات ان مصر فيها قاعده صناعيه مش بطاله لصناعه الدواء؟

بعد كده مصر بتستورد ملابس و منسوجات بحوالي ٤ مليار دولار. اه انت سمعتها صح. مصر بتستورد (تحتها ٣ خطوط) منسوجات بحوالي ٤ مليار دولار. ده بقي اللي اكبر عيب. يعني بلد فيها صناعه منسوجات من ايام طلعت حرب تقع بسهوله كده قدام الصين؟


نوصل بقي للمصيبه الكبيره. مصر بتستورد عربيات و موتوسيكلات و توكتوك بحوالي ٤ مليار دولار في السنه.

يعني بنستورد عربيات ب ٤ مليار في السنه. عشان نحطلها بنزين ب ٦,٥ مليار دولار في السنه. ضايع معظمه في الوقوف في اشارات. عشان نقف نتكلم في التليفون اثناء الاشاره بمليار دولار في السنه. يعني حوالي ١٢ مليار دولار في السنه رايحين في كلام فارغ. و بعدين نيجي نشطر علي القمح بتاع الفقرا اللي بحوالي ٢,٥ مليار بس. و بعدين بعد كده تشتكي احنا ليه مش بنتقدم. ماهو عشان محدش عاوز يبص علي الأرقام و البيانات و محدش عاوز يفهم. احنا مش حنطق من شويه.

يعني في ٥ سنين المصريون صرفوا ٦٠مليار دولار عشان يقفوا في اشارات و يضايقوا بعض في المرور. مبروك علي الذكاء.
لو احنا مكان الحكام في مصر نحول ال ٦٠ مليار دولار انهم يعملوا أفظع مترو انفاق في التاريخ. أصل عيب قوي ان طول مترو الانفاق في مصر كله اول عن اخر ٨٠ كيلو. و طول مترو انفاق لندن ٤٠٠ كم. محتاجين احنا ال ٤٠٠ كم دول عشان نقدر نبطل العربيات و نستخدم المترو في كل حته و نعيش زي بقيه خلق الله يعني.

نفس الكلام اننا المفروض نحفز صناعه المنسوجات اننا نجيب خبره تركيه (اكبر منتجي المنسوجات في أوروبا الان). مش عيب علي فكره. احسن من الخبره الاماراتيه او السعوديه اللي ملهاش في انتاج الملابس.

و نفس الكلام عن صناعه الدوا اننا نتعاون مع الهند اللي هي دلوقتي من اكبر و اهم منتجي الادويه في العالم. لأن الشركات الاوروبيه و الامريكيه نادر جدا انها حتديك سر الخلطه. عكس الهنديه اللي هم عاوزين ان كل دول العالم تتعاون معاهم يفكوا سر الخلطه.


علي فكره احنا بنستورد توكتوك من الهند.
ادي ٢٠ مليار دولار ممكن نقللها من خانه الاستيراد و يمكن حتي نحولها لخانه التصدير بشويه شطاره

يتبع

تابع



نبص علي الصادرات. ايه هي الصادرات التقيله؟





https://jawdablog.files.wordpress.co...pg?w=670&h=237

اول حاجه البترول غير المصفي. مصر بتصدر بترول عشان يتصفي بره عشان نرجع نستورده بعد ما يتصفي. و هذه كارثه. و علي فكره بنستورد معظم البترول المصفي ده من الهند. اه و الله. البنزين اللي انت بتروح تملأه جاي من الهند. و التوكتوك اللي واقف جنبك برضه منتج في الهند. علي فكره الهند معمرهاش حكمها حاكم عسكري مع انها دخلت ٤ حروب!


بعد كده مصر بتصدر منسوجات ب ٤ مليار دولار. يعني بنستورد منسوجات ب ٤ مليار. و بنصدر ب ٤ مليار. شيئ يفرح في بلد هي مهد صناعه المنسوجات في العالم.


بعد كده بنصدر سماد بحوالي ٣,٧ مليار دولار. و بعدين منتجات زراعيه زي الليمون و البرتقال بحوالي ٣ مليار و هكذا تبتدي الأرقام تقل.


طيب صادراتنا بتروح لفين؟





https://jawdablog.files.wordpress.co...pg?w=670&h=201

بص علي الصوره التالته فيها صادراتنا بتروح لفين. إيطاليا و الهند و السعوديه و تركيا و الصين و امريكا هم اهم الاسواق اللي احنا بنصدر لها.


تلاحظ بقي مثلا ان دوله الامارات العربيه المتحده مش موجوده تقريبا (مصدر بتصدر لها ٧٠٠ مليون دولار في السنه بس معظمها منتجات بتروليه للمصانع الاماراتيه و بعض الليمون و البرتقال. يعني مش منسوجات حتي). مع انها بتستورد تقريبا كل حاجه من كل حته.
مصر بتصدر لتركيا مثلا سماد و منسوجات غير نهائيه. و بتصدر للهند بترول غير مصفي عشان يتصفي في الهند و يرجع لنا تاني. شيئ مفرح.


طيب ازاي نزود الصادرات؟





https://jawdablog.files.wordpress.co...pg?w=670&h=413

سيزار هيدالجو و المجموعه بتاعته في أم اي تي اخترعوا رسمه سموها خريطه الصادرات (الصوره الرابعه). الرسمه دي مهمه قوي و حنعلمك ازاي تستخدمها. و علي فكره مفيد قوي هنا لو انك تدخل علي الخريطه التفاعليه هنا بنفسها لانها جميله جدا. يعني مثلا تحط السهم علي نقطه حتطلعلك ايه هي و حجم اللي مصر بتصدره من السلعه دي كمان.


كل نقطه في الصوره هي سلعه مصر بتصدرها. الخطوط بين النقط بتعبر عن ان السلع دي مترابطه ببعضها. ازاي؟ يعني مثلا لو بلد بتصدر ليمون. في الأغلب تقدر كمان تصدر برتقال. و كمان تقدر تصدر خضار و فاكهه و هكذا. كمان لو بلد بتصدر توكتوك، تقدر بشويه مجهود تصدر عربيات و بعدين اتوبيسات مثلا و هكذا.


لما تبص علي خريطه التصدير لمصر حتلاقي في نقط ملونه و نقط رمادي. النقطه الملونه معناها مصر بتصدر السلعه دي فعلا. النقطه الرمادي معناه ان مصر مش بتصدرها او بتصدرها بكميه قليله قوي.


طيب انت لو عاوز تزود التصدير تعمل ايه؟ تبص علي النقط الرمادي في الخريطه اللي مرتبطه بنقط احنا فعلا بتصدرها. واضح الكلام؟
يعني مثلا لو احنا بتصدر برتقال دلوقتي حيبان انه نقطه ملونه. و نفرض اننا مش بنصدر لمون. حيبان اللمون انه نقطه رمادي متوصله بنقطه البرتقال. يعني الخريطه بتقولنا و بتتكلم احنا نركز في ايه عشان نزود الصادرات. بس مين اللي يفهم.


ناخد بمثال:




https://jawdablog.files.wordpress.co...pg?w=670&h=387
بص كده علي شمال الخريطه من تحت خالص و حتركز عليها في الصوره الخامسه. حنلاقي ان مصر بتصدر سجاد بارز (الصوره السادسه) بحوالي ١٣٥ مليون دولار. و ده رقم مش وحش بس مش كبير قوي. السجاد البارز ده سهل عمله جدا. حتلاقي ان السجاد البارز ده له خط مرتبط بسلعه تانيه هي “أدوات البيت المعدنيه”. يعني الحلل و الكسرولات و السلالم المعدنيه الخ. دي برضه تكنولوجيا إنتاجها بسيطه و سهل إنتاجها. و كون ان في خط بينهم معناه ان الدول اللي تقدر تنتج سجاد بارز تقدر كمان تنتج حلل و تصدرها. المصيبه بقي ان مصر بتصدر أدوات منزليه معدنيه بس ب ١٥ مليون دولار.



https://jawdablog.files.wordpress.co...pg?w=670&h=445

خش علي اللي بعدها. حتلاقي ان الرابط بعد كده هوه مع “السكاكين”. مصر بتصدر سكاكين بس ب ٢ مليون دولار. و ده رقم قليل جدا لكن مش مشكله دلوقتي. خليك معانا شويه. لو كملت تمشي تبع الخريطه حتلاقي ان كمان المفروض مصر تقدر تصدر الزرع الصناعي. يعني اللي يقدر يعمل سجاد و حلل يقدر في الأغلب بتكنولوجيا مقاربه و استثمارات مش كبيره يعمل زرع بلاستيك. دي صناعه بتحتاج انك تعرف تعمل بلاستيك و عماله يدويه شاطره تدككه في بعض عشان يطلع زرع صناعي مع فنانين يقدروا يعملوا أشكال حلوه. كل ده موجود في مصر. مصر بقي بتصدر زرع صناعي بس ب ٥ الاف دولار (انت قريتها صح ٥٠٠٠ دولار فقط لا غير و صدرتهم للأردن غالبا غلطه). ما شاء الله!



طيب احنا مش عاوزين نصدمك بس امريكا لوحدها باعت في محلاتها زرع صناعي قيمته ٢ مليار دولار في سنه واحده هي ٢٠٠٥ (بص علي صفحه ٥ في الملف المرفق و هو من الحكومه الامريكيه ذاتها).
يعني الامريكان لوحدهم اشتروا زرع صناعي قيمته ٢ مليار دولار. و مصر صدرت زرع صناعي قيمته ٥ الاف دولار بس.


https://jawdablog.files.wordpress.co...pg?w=670&h=447


علي فكره لو كملت في الخريطه حتلاقي نقطه اسمها “زينه الحفلات”. و دي مصر مش بتصدر فيها حاجه خالص. ايوه. زينه الحفلات بتاعه ورق أعياد الميلاد و كده. شركه امريكيه واحده اسمها بارتي سيتي متخصصه في مجال زينه الحفلات. واضح من اسمها. قيمه رأسمال الشركه دي في السوق الامريكيه ٢ مليار دولار (المصدر ).


احنا أخدنا أتفه فرع موجود في الخريطه عشان نوريك قد ايه ان العلم غائب في البلد دي. و ان اللي عملك فنكوش عبد العاطي كفته مش ممكن حيوصل انه يقرأ ام اي تي و لا يفهم خريطه الصادرات و لا يعرف يعمل حاجه من دي.


و بعد كده نسأل هم ليه بيتقدموا و احنا بنتخلف!

مقارنة الصادرات المصرية و التونسية



https://jawdablog.files.wordpress.co...rts1.jpg?w=670


اول حاجه نعملها ندخل علي المصدر ده لان فيه كل الإحصائيات الاقتصاديه اللي بتصدرها الجهات الرسميه في كل دول العالم. يعني من مصر بياخدوا البيانات من الجهاز المركزي للتعبئه و الإحصاء و وزاره الماليه و البنك المركزي كل في اختصاصه و يحطوها في فورمه ممكن نستخدمها للمقارنه مع بقيه العالم. الموقع ده مهم قوي لأي دارس للاقتصاد علي فكره و ميزته ان بياناته كلها من مصادر رسميه و بيدخله ٥ مليون واحد في السنه من ٢٠٠ دوله. اي كورس اقتصاد دولي في دول العالم المتقدم بيعتمد دلوقتي علي الموقع ده.


مقارنه بسيطه بين البلدين:


طيب تعالوا نمسك معلومات الصادرات في بلدين: مصر و تونس. حنلاقي تونس في المصدر ده و مصر في المصدر ده. نمسك تونس الاول. في شهر نوفمبر ٢٠١٥ صدرت تونس بحوالي ٢٥٠٠ مليون دينار تونسي. الكلام ده مصدره هو معهد الإحصاء الوطني التونسي. طيب الدينار التونسي سعره دلوقتي حوالي نصف دولار (المصدر ). يعني تونس صدرت في شهر نوفمبر بحوالي ١٢٥٠ مليون دولار أمريكي.


https://jawdablog.files.wordpress.co...ng?w=670&h=312


طيب ندخل علي مصر.

أخر بيانات مصر هي شهر اكتوبر مصر صدرت في اكتوبر بحوالي ١٦٥٠ مليون دولار. لاحظ انه تونس بتكتب بياناتها بالدينار التونسي بس مصر بتكتب بالدولار علي طول. جنيه مصري ايه و بتاع ايه. احنا حنهرج.


اول ملاحظه هي انه مصر بسكانها ٩٠ مليون صدرت بحوالي ١٦٥٠ مليون دولار في الشهر. تونس سكانها ١١ مليون بس. اه و الله. صدرت بحوالي ١٢٥٠ مليون دولار. طبعا ميصحش كده. لكن أكيد دي مؤامره علي البلد المنتجه دي.

:stickjo4::stickjo4:
https://jawdablog.files.wordpress.co...ng?w=670&h=312


المقارنه بين تأثير ثوره تونس و ثوره مصر



نبص بقي كده علي الأرقام في تونس من سنه ٢٠٠٦ لحد دلوقتي و نفس الكلام في مصر. احنا عشان نسهلك الامور طلعنا الرسمتين من موقع تريدنج ايكونومكس في المصدرين السابقين . بس انت مفروض كده تتعلم و تدخل الموقع من نفسك و تعمل نفس اللي احنا عملناه عشان تتعلم.

حتلاقي ايه؟ بص كده علي الصوره الاولانيه. حتلاقي ان تونس صادراتها عماله تزيد باستمرار من سنه ٢٠٠٦ لحد دلوقتي. و لا حتي باين انه في تأثير للثوره و لا اي حاجه. منحني مستمر في الارتفاع بنفس الوتيره.

بس في حاجه مهمه. تونس مقيمه صادراتها بالدينار التونسي. و الدينار سعره قل قصاد الدولار. فعلا. في ٢٠١١ سعر الدينار كان ٧٠ سنت أمريكي و الصادرات كانت حوالي ١٨٠٠ مليون دينار تونسي في الشهر في ٢٠١١. يعني نحولهم لدولار بسعر ٢٠١١ يطلعوا ١٢٥٠ مليون دولار أمريكي. دلوقتي في ٢٠١٥ الدينار التونسي بحوالي ٥٠ سنت و صادرات تونس حوالي ٢٥٠٠ مليون دينار. نحولهم لدولار بسعر دلوقتي يطلعوا ١٢٥٠ مليون دولار برضه.

يعني ايه الكلام ده؟ يعني صادرات تونس مقومة بالدولار من سنه ٢٠١١ لحد دلوقتي تقريبا ثابته بالرغم ان العمله التونسيه قلت.

نبص كده علي مصر. حتلاقي ايه في الصوره الثانيه؟ نفتكر مصر بتقوم صادراتها بالدولار علي طول. حنلاقي انه صادرات مصر كانت بتزيد لحد ٢٠١١. و بعدين من ٢٠١١ لحد ٢٠١٣ صادرات مصر تقريبا ثابته. يعني لحد ٢٠١٣ مصر كانت ماشيه زي تونس اللي هما بلدين حصل فيهم ثوره و بالتالي قللت النشاط الاستثماري و ده طبيعي في اي ثوره ان الناس مش بتستثمر لحد ما تطمئن. و في خلال الوقت من ٢٠١١-٢٠١٣ حصل ثبات في التصدير مقوم بالدولار زي تونس بالضبط.



تونس لسه التصدير فيها ثابت مقوم بالدولار. لكن منحني الصادرات المصريه حتلاقيه انه نازل بسرعه الصاروخ. بدل ما كنا في ٢٠١٢ بنصدر بحوالي ٢٥٠٠ مليون دولار في الشهر بقينا في ٢٠١٥ بنصدر بحوالي ١٥٠٠ مليون دولار في الشهر. يعني صادراتنا قلت ٤٠٪. اه و الله ٤٠٪. تقريبا النص. .




مع ان المفروض ان خلاص بقي فيه استقرار و المفروض ان المستثمر اللي كان خايف يدخل بقي. لذلك عاده بعد الثورات بعده سنوات يحصل نمو كبير (و ده اللي داخله عليه تونس لان سعر العمله فيها ابتدى يستقر (المصدر السابق) و مع ذلك الصادرات بالدينار عماله ترتفع.

طبعا ده محصلش في مصر. و كمان ما ننساش ان مصر دخلها ٤٠ مليار دولار من الخليج و حصل فيها مؤتمر اقتصادي. و كمان حصل فيها قناة السويس الجديدة و هكذا.

و بعد كل ده يجي ابنك انت و يبيعلي البتاع ده هوه و يقولي عجله الانتاج.

رفع سعر الفايده في مصر و امريكا و تأثيره علي مصر




https://jawdablog.files.wordpress.co...usa1.jpg?w=670



من كام يوم البنك المركزي المصري رفع سعر الفايده. كمان بنك الاحتياطي الامريكي رفع سعر الفايده.

يعني ايه الكلام ده؟ و ايه تأثيره؟


الوظيفه الرئيسيه لأي بنك مركزي في العالم هي منع التضخم الزايد عن الحد . يعني ايه تضخم؟ يعني ان السلع اسعارها تزيد. طيب ليه السلع سعرها يزيد؟ لان المعروض منها اقل من الطلب عليها و بالتالي السعر حيزيد بالذات لو الناس معاها جنيهات كتير.

تعالوا نشتغل بمثل سهل عشان نفهم. لو انا و انت عاوزين نشتري كل واحد فينا كيلو خيار. و البياع عنده كيلو خيار واحد بس. و احنا الاتنين رحنا للبياع. و لأننا مش لاقيين خيار في السوق احنا الاتنين قلنا للبياع اننا مستعدين ندفع اي سعر في كيلو الخيار. طبعا لازم سعر كيلو الخيار ده حيزيد. احنا عندنا مشكله في الموضوع ده. احنا بنلوم البياع انه جشع و زود سعر الخيار علينا. لو يجي واحد متحزلق و يقولك متعيشوا من غير خيار. كل ده كلام فارغ و عك و فنكوش زى موضوع كفته عبد العاطى . الحل الصح هو انك تزود انتاج الخيار عشان سعره يقل!

;););)

طيب سعر الخيار زاد. ايه علاقه البنك المركزي بالموضوع ده؟ سعر الخيار زاد لان انا و انت لما رحنا لبياع الخيار كان معانا فلوس جنيهات كتير و مستعدين نزود السعر. سعر الخيار مش حيزيد لو انا و انت معاناش فلوس. البنك المركزي لما بيزود سعر الفايده بيعمل ايه؟ بيخلي بعض الناس بالذات المستثمرين و اللي معاهم فلوس كتير يبقي اسهل لهم انهم يحطوا فلوسهم في البنوك و تجيلهم فايده عاليه. يعني بدل ما يستثمر يحط فلوس في البنك. الاستثمار بيخلي الناس تبقي معاها فلوس لان الاستثمار معناه توسع المحل بتاعك مثلا فتشغل ناس و عماله و تديهم مرتبات فيبقي معاهم فلوس و الفلوس دي حتروح انها تشتري خيار و حاجات تانيه كتير. و بالتالي سعر الحاجه يزيد لو كان المعروض اقل من الطلب.


يعني برفع سعر الفايده البنك المركزي بيقلل الاستثمار و بيسحب الفلوس من السوق عشان تروح البنوك و بالتالي الفلوس في السوق تقل و بالتالي يقلل من زياده الاسعار. فهمنا النقطه دي؟

جميل. طيب واحد يقول ما البنك المركزي حلو قوي اهوه و قلبه علينا و مش عاوز الاسعار تزيد. لا يا حبيبي. افهم. هو سحب الفلوس منك بس برضه هوه البياع فضل معندوش الا كيلو خيار واحد. فواحد بس اللي حيشتريه او انت حتشتري نص كيلو و انا حشتري نص كيلو. ما أهو أصل كميه الخيار ثابته متغيرتش. الفرق بس هو إحساسك ان الاسعار زادت او قلت. لكن الانتاج متغيرش! يعني انت فضلت فقير في الحالتين.

طبعا احنا بيغيب عننا ان هدف الاستثمار في بلد فيها اليات السوق بتشتغل زي بقيه بلاد الله انه لو سعر الخيار زاد قوي فالاستثمارات تروح عشان نزرع خيار أكتر و بالتالي المعروض منه يزيد و بالتالي سعره يقل و كمان الناس تلاقي كل الخيار اللي هيا عاوزاه. إنما بزياده سعر الفايده و ما يطلق عليه “ضبط الاسعار” و ان الجيش يدخل يبيع خيار بسعر قليل فانت بتمنع الاستثمارات انها تروح في الأماكن السليمه لزياده الانتاج.



يتبع

تابع



بالكلام المكلكع ده بيتقال عليه price signal manipulation او التلاعب في اشارات الاسعار. لان في الدول المحترمه (اللي بقت تقريبا العالم كله) لما سعر حاجه بتزيد ده بيدي أشاره للمستثمرين انهم حيعملوا أرباح كتير لو استثمروا في انتاج الحاجه دي. و بالتالي الاستثمارات تروح في الحاجه دي و الانتاج يزيد. لذلك الهدف من تكبيل الاقتصادانهم يخلوا الفلوس دائماً في أيدهم في البنوك بعيد عن الناس عشان يفضل مجموعة مسيطرة علي البلد كلها و اقتصادها و نفضل كلنا فقرا بنتخانق علي كيلو خيار واحد!

طيب ازاي الامريكان زودوا سعر الفايده؟ هم كمان عاوزين شعبهم يفضل فقير؟


إطلاقا. بنك الاحتياطي الامريكي زود سعر الفايده في امريكا لانه من سنه ٢٠٠٨ والاقتصاد الامريكي في حاله تعافي مستمره. و نسبه البطاله في امريكا دلوقتي ٥٪ بس (المصدر ) و دي نسبه قليله جدا.

الامريكان بيخافوا قوي لما نسبه البطاله تقل عن ٥٪. ليه؟ لانه بيقولك ان معني كده ان اصحاب الاعمال بيشغلوا اسوء ناس موجودين في السوق. لأنهم بيقولوا ان دائماً في ٥٪ اللي هم دائماً إمكانياتهم ضعيفه و مش متعلمين كويس مقارنه بالباقيين. لو اصحاب الاعمال ابتدوا يشغلوا ال ٥٪ دول معني كده انهم عاوزين يستثمروا بأي شكل و محتاسين و مش لاقيين حد يشغلوه الا ال ٥٪ التعبانين دول.


https://jawdablog.files.wordpress.co...pg?w=670&h=367

طيب ايه المشكله انك تشغل ال ٥٪ التعبانين دول. متسيبوا الناس تستغل. نظريه الاقتصاد الامريكي الحديثه من ايام الان جرينسبان انك لو شغلت ال ٥٪ دول حيطلعوا شغل وحش و الاستثمارات حتضيع و بالتالي الاقتصاد مش حيتحسن علي المدي البعيد. حيبان حلو و جميل في المدي القصير بس حينفجر بعد شويه. و الناس التعبانة دي حتاخد مرتبات ميستحقوهاش و حيصرفوها في حاجات مش محتاجينها و مش حينتجوا حاجه كويسه و بالتالي يرجع التضخم مره تانيه بشكل كبير. و البنك الاحتياطي الامريكي وظيفته الحفاظ علي الاقتصاد الامريكي علي المدي البعيد مش القصير (التلميح مننا هنا مقصود).

لذلك لما نسبه البطاله تقل قوي كده يبقي افضل تهدي حركه الاقتصاد و تسحب شويه فلوس من السوق و تبطء حركه الاستثمار في امريكا و تعمل اللي بنقول عليه cool down او نبردالاقتصاد شويه. زي ما لعيب كوره يلعب ٤٥ دقيقه و جاب ٣ أجوان و محتاج انك تهدي عضلاته بين الشوطين عشان ميتعورش علي المدي البعيد و تخسره.


طبعا ده كلام لا يقارن بالاقتصاد المصري اللي معظم شبابه في بطاله و اللي محتاج الاستثمارات و اللي محصلش فيه نمو و اللي دخل فيه ٦ أجوان في اول ربع ساعه عشان المدرب مش فاهم و اللعيبه مش بتلعب و صاحب النادي المعلم محمد العسكري عمال يلم الفلوس كلها من الجمهور عشان يحطها في كرشه.

هو دا موضوع رفع سعر الفايده

سعر الدولار و ازاي البنك المركزي قلل سعره



https://jawdablog.files.wordpress.co...d_it.jpg?w=670


ازاي البنك المركزي يقدر كده بقرار ينزل سعر الدولار. طيب طالما يقدر يعمل كده معملش كده من بدري ليه؟

الموضوع سهل جدا. احنا دائماً بننسي اللي قولناه في اول الحلقات. و هو ان الدولار و اي عمله الحقيقه هو سلعه زي بقيه السلع سعرها يخضع لآليات العرض و الطلب . رجعنا للكلام المكلكع. يعني ايه؟ يعني لو المعروض من سلعه كتير في السوق اكثر من الطلب عليها لازم سعرها ينزل. يعني لو ناس كتير معاها دولارات و عاوزه تبيعها في السوق اكثر من الطلب علي الدولارات دي فلازم سعر الدولار ينزل.زي بالضبط لو كان السوق فيه طماطم كتير أكتر من حاجه الناس فلازم التاجر ينزل سعر الطماطم عشان يبيع اللي معاه.

طيب حد يقول انتم حتجننونا ليه؟ مش انتم قلتم قبل كده ان موارد مصر من الدولار اقل من احتياجاتها ؟ و احنا كلنا عارفين ان في ازمه دولار. يبقي المفروض وفق كلام العرض و الطلب بتاعكم ده ان سعر الدولار يزيد مش يقل زي ما حصل.

جميل. تعالوا ندي مثال. المعلم محمد العسكري تاجر طماطم كبير في السوق. مشكله السوق السنه دي ان الجو حر قوي و الطماطم باظت في الارض و بالتالي المعروض من الطماطم قليل جدا و الإقبال عليها كتير فأسعار الطماطم زادت قوي. الناس بدأت تشتكي. و المعلم محمد العسكري بحكم انه تاجر كبير في السوق خاف ان الناس تدخل تكسر المحلات و تاخد الطماطم. قوم يعمل ايه. قرر انه ينزل سعر الطماطم جامد و يبيعها. طبعا الناس كلها بقت تشتري الطماطم من المعلم محمد العسكري بس. بقيه التجار مكنش قدامهم غير انهم كمان ينزلوا السعر لان المعلم محمد العسكري هو اكبر تاجر طماطم في السوق و عنده اكبر مخزون من الطماطم.

طيب ما المعلم محمد العسكري راجل طيب قوي اهوه. امال انتم زعلانين منه ليه؟ المشكله ان الكلام ده موقت و كمان بيخلي الحاله في السوق تبقي اسوء كمان في المستقبل. ليه؟

مشكله المعلم محمد العسكري ان الطماطم اللي معاه كميتها قليله و محدوده لان إمداد الطماطم قليل. و حتي دلوقتي لما بيعوز طماطم بيضطر يستلفها من المعلم حسن السعودي اللي هو تاجر كبير قوي في السوق اللي جنبنا. لكن حتي المعلم حسن السعودي برضه الطماطم عنده فيها مشكله. لذلك المعلم محمد المصري بيستلف طماطم مش بتاعته و بيديها للناس بسعر رخيص لكن مخزون الطماطم عمال يقل. و طبعا هوه فرض علي التجار كلهم ان يبيعوا بنفس سعره القليل لكن مش حيقدروا يستمروا كده كتير.

كمان العك ده حيعمل مصايب اقتصاديه قادمه في السوق. ازاي؟ طبعا في ناس شاطره و شايفه ان المعلم محمد العسكري مزنوق و عمال يبيع طماطم رخيصه عشان الناس متكسرش محله. حيعمل ايه الناس الشاطره دول؟ حيدخلوا يشتروا الطماطم الرخيصه اللي المعلم محمد العسكري عمال يبيعها و يخزنوها في تلاجات و لما المعلم محمد العسكري يخلص المخزون اللي عنده و ان المعلم حسن السعودي يزعل و يوقف تسليف طماطم زي ما حصل قبل كده فيدخل الناس الشاطره دول يبيعوا الطماطم اللي خزنوها بسعر عالي و يعملوا الفرق. بالعكس الناس دي حتتحكم في السوق و حتغلي تمن الطماطم جدا.


هل الناس دي وحشه؟ إطلاقا. هم بس بيستخدموا غباء المعلم محمد العسكري و انه مش فاهم ان مشكله الطماطم ان المعروض منها قليل و ان المعروض ده مش حيتحسن الا اذا انتجنا طماطم!
(اللي هوه يعني الدولار مش حينخفض بشكل دايم الا اذا مصر تحولت لدوله صناعيه منتجه. مش دوله تعتمد علي الخدمات السياحيه )

اللي عمله المعلم محمد العسكري هو الآي بنسميه short term dislocation. يعني السوق حصل فيه كسر مؤقت. ده مش بيغير من اساسيات السوق ان العرض اقل من الطلب. هو بس بيعمل تاثير مرحلي مؤقت

علي فكره الناس الشاطره دي اللي بتخزن الدولار دلوقتي عشان يضاربوا عليه هم بس بيستخدموا اليات السوق لمصلحتهم
الفرق بين المعلم محمد العسكري الحقيقي بتاع الدولار و المعلم العسكري بتاعنا بتاع الطماطم ان بتاع الطماطم بيشتغل في طماطم بتاعته. بتاع الدولار بيعمل أرباح من دولار هو ملك الشعب المصري.


دى حكاية الدولار

المشاركة الأصلية كتبت بواسطة محمد محمود بدر (المشاركة 6482669) مقارنه مصر بالعالم في الاستهلاك: اللي حنعمله اننا حنقارن الاستهلاك في مصر بالاستهلاك في دول تانيه (مصدر 1 مصدر 2 مصدر 3 ). المقارنه بدول زينا مين هيه الدول اللي دخلها مقارب جدا لمصر؟ مصر ترتيبها ١١٤ من حيث الدخل القومي او الناتج القومي للفرد بحوالي ٣٧٠٠ دولار في السنه. حوالينا دول زي التالى (المصدر ): نتايج المقارنه بين مصر و دول العالم المشابهه ليها: – مصر: نسبه الاستهلاك للدخل ٧٦٪

المشاركة الأصلية كتبت بواسطة محمد محمود بدر (المشاركة 6482671) لو انت دخلت علي هذا المصدر حتلاقي فروق الاسعار بين مصر و تونس. الحقيقه ممكن تلاقي فروق الاسعار بين اي مكانين في العالم. المصدر ده عاوزينك تحفظه عندك عشان محدش يضحك عليك بعد كده. حتلاقي ان متوسط الاسعار في مصر اعلي من تونس حوالي ١٣٪. و سعر ايجار الشقق في مصر لوحده اعلي من تونس ٢١٪. هما دول بالضبط ال ١٣٪ اللي عاملين الفارق بين مصر و تونس في الاستهلاك. يعني الحقيقه ان الشعب المصري استهلاكه الفعلي مقارب للشعب التونسي و يقع في النص تقريبا من شعوب العالم. لكن فيه حوالي ٤٣ مليار دولار رايحه علي الشعب المصري في ان الاسعار عنده عاليه. ليه الاسعار في مصر اعلي من تونس؟ ليه الاسعار لأي حاجه في اي بلد في العالم تكون اعلي من بلد تانيه؟ زي ما شفنا قبل كده هي تعتمد ان الطلب عالي و المعروض قليل. حاجه زي البيوت او الشقق. ازاي يكون فيها الطلب في مصر اعلي من المعروض بالمقارنه بتونس؟ الشقه لا سلعه مستورده و لا حاجه. و البلدين بيقدروا يبنوا عماير يعني. مش شغلانه كبيره. و البلدين عندهم صحرا واسعه. ليه سعر الايجار او التمليك في المتوسط في مصر يكون اعلي من تونس؟ ببساطه الفارق هو ان سوق الاسمنت و الحديد في مصر فيهم احتكارات كبيره بينما تونس بتستورد المنتجات دي بأسعار أرخص! الجيش و الحكومه و لا فارج (شركه فرنسية باع لها ساويرس شركات للاسمنت ) و ابو هشيمه و عز بيحتكروا السلع الرئيسيه دي. كمان الجيش بيحتكر الاراضي. مينفعش ان اي حد يروح يبني في اي ارض. ده بيقولك كل الاراضي علي جنب كل الطرق تابعه للجيش. و طبعا دي عمليه تسقيع و احتكار. و التسقيع بينتج عنه ارتفاع اسعار و الاحتكار بينتج عنه ارتفاع اسعار أكتر. و ده بيخلي في المتوسط الاسعار في مصر اعلي من تونس ١٣٪. يعني لو احنا يبقي عندنا النظام السياسي و الاجتماعي في تونس حنوفر ٤٣ مليار دولار بتروح النهارده في جيب الجيش و المحتكرين. يا خبر ابيض. ٤٣ مليار دولار في السنه نقدر ندخرها و نعمل استثمارات محليه. الشعب ده منهوب و الله. و العجيب انه بيصقف للي بينهبه! المقارنه بجورجيا و ارمينيا و اندونيسيا

المشاركة الأصلية كتبت بواسطة محمد محمود بدر (المشاركة 6482800) الاستيراد و التصدير في مصر حنحاول نفهم مصر بتصدر ايه و بتستورد ايه. و لو عاوزين نزود التصدير و نقلل الاستيراد نعمل ايه. موضوع مهم جدا وهيجاوب على اسئله كتيره من نوعيه “طيب طالما انتم فاهمين كده متقولولنا نعمل ايه” :d:d طيب. استعنا بالله. اول حاجه لازم تعملها انك تدخل علي ويب سايت عملاه جامعه ام اي تي الامريكيه (معهد ماساتشوستس للتكنولوجيا). دي يا جماعه اهم و اكبر جامعه في العالم. الجامعه دي ميزانيتها في السنه الواحده ٣ مليار دولار (المصدر ). الويب سايت ده اسمه او اي سي oec و هي الأحرف الاولي لمرصد التعقيد الاقتصادي (العنوان). اه و الله اسمه كده. بيرصد حركه التجاره العالميه لكل دول العالم. الويب سايت ده فيه صفحه عن مصر زيها زي كل دول العالم (مش مؤامره علي مصر لوحدها يعني) و موجوده هنا. قبل ما تدخل علي صفحه مصر في الويب سايت ده لازم تعرف حاجه الاول. الويب سابت ده عمله سيزار هيدالجو (أستاذ في ام اي تي و اصله من شيلي) و بيلي كلينجر (مدرس في جامعه هارفارد) و ريكاردو هاوسمان (أستاذ الان في هارفارد و اصله من فنزويلا) و ألبرتو لازلو برباسي (أستاذ في ام اي تي و مهاجر من الاقليه المجريه في رومانيا). الناس دي مش اي كلام. دول نشروا مقاله في مجله ساينس الامريكيه سنه ٢٠٠٧. انك تنشر في ساينس فهذا أنجاز ما بعده إنجاز بالنسبه لأي عالم. عشان بس نعرف ان ده مش ويب سايت عادي. احنا داخلين علي قمه العلم في العالم و حنحاول نبسطها و حتكتشفوا اننا زي بقيه البشر ممكن نبقي كويسين و بنفهم . ادخل بقي علي صفحه مصر هنا. حتلاقي ايه. حتلاقي اول رسمه فيها اللي بتصدره مصر و التانيه فيها ايه اللي بتستورده. و احنا عشان عارفين انك حتكسل نقلنا الرسمتين هنا. الاول نبص علي الواردات: https://scontent-cai1-1.xx.fbcdn.net...16&oe=5858941d دي الصوره الاولانيه. المستطيل الكبير كله هو عباره عن كل شيئ بتستورده مصر. و متقسم تقسيمات كل واحده عباره عن سلعه محدده مصر بتشتريها و مساحه المستطيل بتاع السلعه دي يتناسب مع كميه الاستيراد من السلعه دي. و الألوان بتاعه المستطيلات حسب السلعه. يعني البترول و منتجاته لونهم بني غامق. المنتجات الصناعيه لونها لبني. الملابس و المنسوجات لونها اخضر غامق و هكذا. مصر بتستورد بحوالي ٧٠ مليار دولار في السنه. نبص كده علي الحاجات التقيله. حنلاقي انها بتستورد منهم ١١,٥ مليار منتجات بتروليه. منها ٦,٥ مليار دولار بنزين. و دول ظاهرين في الرسمه باللون البني الغامق. بعد كده باللون الأزرق الغامق المنتجات الصناعيه. استيراد المنتجات الصناعيه كويس يا جماعه. دول عباره عن مضخات و مولدات كهربا. و علي فكره ده كان سنه ٢٠١٣ لما كان لسه في خير و بنستورد منتجات صناعيه. لكن المصيبه بقي هي ان من المنتجات الصناعيه دي مصر بتستورد تليفونات بمليار دولار. اه و الله. بعد كده خرده الحديد. طيب ليه بنستورد حديد خرده؟ لان بيدخل في صناعه الحديد و أعاده تدويره. بعد كده بنستورد قمح بحوالي ٢,٥ مليار دولار. يعني الدوشه دي كلها بتاعه لوبي القمح هي علي ٢,٥ مليار دولار بس من أصل ٧٠ مليار. اه و الله. تخيل. لذلك اي حد يقولك ان دعم القمح هو المشكله حط صباعك في عينه لانه بيستهبلك. مصر دوله كان لها تاريخ زراعي. مع شحه المياه و قله الارض الزراعية في مصر من الاسهل و الأرخص التعاون مع السودان لإنتاج القمح. طبعا كلكم حتزعلوا لكن الحقيقه مره. من الصعب ان تحافظ مصر علي كونها دوله زراعيه اولا. مش عيب علي فكره. يعني كوريا مثلا بتستورد قمح و ذره قيمتهم ٣,٥ مليار دولار في السنه (المصدر ). لكن محدش قال ان كوريا بلد فاشله. بلد صناعيه من الدرجه الاولي قطعا. و بتستورد قمح و ذره من امريكا و العلاقات بينهم قويه جدا. يتبع

المشاركة الأصلية كتبت بواسطة محمد محمود بدر (المشاركة 6482887) الوظيفه الرئيسيه لأي بنك مركزي في العالم هي منع التضخم الزايد عن الحد . يعني ايه تضخم؟ يعني ان السلع اسعارها تزيد. طيب ليه السلع سعرها يزيد؟ لان المعروض منها اقل من الطلب عليها و بالتالي السعر حيزيد بالذات لو الناس معاها جنيهات كتير.

المشاركة الأصلية كتبت بواسطة محمد محمود بدر (المشاركة 6482906) دى حكاية الدولار

http://store2.up-00.com/2016-08/1471205768271.jpg

http://store2.up-00.com/2016-08/1471205770312.jpg

المشاركة الأصلية كتبت بواسطة mr. Ali 1 (المشاركة 6483026) نحن نختلف عن الأخرون. في مصر الأسس والقواعد العالمية لا تنطبق علينا في كثير من الأمور. بمعني : الفجوة شديدة جداً جداً جداً بين الطبقات الغنية وبين الطبقة المتوسطة وبين الطبقة الفقيرة وبين الطبقة المعدمة ( الفجوة كبيرة للغاية وليست كما هي في الدول الأخري ) وبالتالي فحساب الدخل السنوي للفرد في مصر غير دقيق مطلقاً ( غالبية الشعب المصري لا يحصلون علي هذا المبلغ سنوياً ) وبالتالي فالطبقات الغنية أثرت علي هذا الناتج. وليس من المنطق ولا الواقع أن أطلب من غالبية الشعب المصري أن يتخيلوا أنهم يحصلون علي هذا المبلغ من أجل أن هذا المعيار قائم علي العلم ( والعلم في مصر لا يُكيل بالباذنجان ). فالغني يحصل علي الدخل المرتفع جداً ويدخل في حساب متوسط دخل الفرد هنا فيؤثر بالسلب علي المواطن البسيط. وأيضاً يدخل في حساب الاستهلاك ويؤثر أيضاً علي نسبة المواطن البسيط. يا أ/ محمد المعلم كمثال في مصر يختلف راتبه الشهري من محافظة لأخري بالرغم من الاتفاق في سنة التخرج واستلام العمل!! ولو أخذنا المعلمون في مصر كمثال علي دخل الفرد السنوي فسنجد أن المذكور في الدراسة أو التقرير ( 3700 دولار سنوياً ) لا ينالها سوي معلم خبير قديم فيما فوق. فأين بقية المعلمون؟!! كما أن الأسعار لها علاقة وطيدة جداً بين دخل الفرد واستهلاكه , والأسعار تشمل كل شيء من مستلزمات الحياة الضرورية للفرد ( السكن - كافة الفواتير من كهرباء وغاز ومياه وغيرها - العلاج - السلع الغذائية - المواصلات - الملبس ) وأسعار هذه الضروريات أصبحت كوارث عندنا بالنسبة للمواطن البسيط والذي يمثل الشريحة الكبيرة من الشعب المصري! ولكن بهذه الدراسة أو التقرير أو أي مسمي له نخرج بأن دخل الفرد هو 3700 دولار سنوياً , يقوم بإنفاق 76% منه ويقوم بإدخار 24% . فهل هذا حقيقة ما يحدث مع غالبية الشعب المصري؟!! إن كان في كلامي أي خطأ , أتمني مشكوراً تصحيحه لي وبيان الصواب. خالص تحياتي

أتفق مع حضرتك تماما

ومع أننا أقل من المستوى الذى ذكرته

إلا أننا ما زلنا فى نظر البعض شعب مسرف ومبذر

المشاركة الأصلية كتبت بواسطة Mr. Ali 1 (المشاركة 6483082) الأسعار في مصر بصفة عامة تزداد بسبب العديد من الأمور مثل :- - زيادة البنزين والسولار. - زيادة الكهرباء. - زيادة قيمة الايجارات والتمليك. - فرض رسوم وضرائب جديدة. - سياسة الاحتكار. - سعر الدولار. - فساد الرقابة وموت جهاز حماية المستهلك. - زيادة بالمزاج ( تسميها استغلال ... تسميها استهبال .... ) مش مهم! زيادة الأسعار في مصر هواية يمارسها كل قادر عليها !!! خالص تحياتي

المشكلة أن الدولة هى المفترض أنها تقف لكل محتكر وتحاول معادلة الأسواق فى حال طغيان سلعة معينة لكن فى كل الحالات المذكورة لحضرتك

السبب الرئيسى فيها كانت الدولة أو بالأحرى الحكومة
الظاهر كمان ان قانون منع الاحتكار لا يساوى ثمن الحبر الذى كتب به


بالفعل


زيادة الأسعار في مصر هواية يمارسها كل قادر عليها !!!

:friendsxs3::friendsxs3:

هل حملات تنشيط السياحه الداخليه مفيده؟




https://jawdablog.files.wordpress.co...eful.jpg?w=670


الاقتصاد و حالته في العالم كله بيتقاس بمقياس بسيط قوي اسمه الناتج الكلي المحلي او بالإنجليزي gross domestic product (GDP)

تعالوا نفهم المقياس ده بيقيس ايه.

نفترض اننا عاوزين نحسب الناتج الكلي المحلي بتاع محل خضار. المحل ده في السنه باع خضار بألف جنيه. و اشتري خضار من الفلاح ب ٨٠٠ جنيه. كده الناتج الكلي المحلي بتاع محل الخضار حيبقي ٢٠٠ جنيه. يعني الربح بتاعه.

طيب لو عاوزين نحسب الناتج المحلي بتاع الفلاح اللي باع الخضار؟

نفرض الفلاح ده أتكلف سماد و تقاوي استوردها تمنها ٦٠٠ جنيه و باع الخضار الناتج للخضري زي ما عرفنا ب ٨٠٠ جنيه. يبقي الناتج بتاع الفلاح الفرق بين ٦٠٠ و ٨٠٠ يعني ٢٠٠ جنيه.

الناتج الكلي المحلي هو القيمه الصافيه لكل السلع و الخدمات اللي دارت في السوق المحلي كلها .

يعني لو السوق كله عباره عن الفلاح بتاع المستهلك السابق و الخضري و ست البيت اللي اشترت الحضار و قدمته لأسرتها حيبقي الناتج المحلي بتاعهم هو ال ٢٠٠ جنيه الصافي بتوع الفلاح زائد ال ٢٠٠ جنيه الصافي بتوع الخضري.

مينفعش نحط ال ٦٠٠ جنيه اللي الفلاح استورد بيهم سماد و تقاوي من بره لأنهم استيراد و قيمه الاستيراد لا تضاف للناتج المحلي. لانه “محلي” يعني للبلد بتاعتنا بس. كمان الخضار اللي ست البيت عملت بيه سلطه خلاص بقي سلعه منتهيه و مش داخل في حسابات الناتج القومي.

لو الفلاح و الخضري خد كل واحد منهم ال ٢٠٠ جنيه بتوعه حطهم في جيبه. خلاص يبقي الناتج المحلي زي ما هوه ٤٠٠ جنيه. طيب لو خد الخضري ال ٢٠٠ جنيه بتوعه و حطهم في انه يعمل استثمار و يوسع المحل بتاعه و انه يدي ال ٢٠٠ جنيه دول عربون للشركه اللي حتوسع المحل بتاعه. اه. طالما الفلوس موقفتش و لسه بتدور يبقي لازم تتزود علي الناتج المحلي. يبقي الناتج المحلي دلوقتي بقي ٦٠٠ جنيه.

طيب لو الخضري بدل ما يوسع المحل بتاعه بال ٢٠٠ جنيه ربح قرر انه يشغل موظف عنده و يديله مرتب ٢٠٠ جنيه. طالما الفلوس انتقلت من أيد لايد يبقي الناتج المحلي برضه حيبقي ٦٠٠ جنيه.

طيب لو الخضري قرر انه ياخذ ال ٢٠٠ جنيه بتوعه و يروح مع عياله شرم الشيخ بيهم؟ برضه الناتج المحلي بقي ٦٠٠ جنيه زي ما هو. ال ٢٠٠ بتوع الفلاح. ال ٢٠٠ اللي الخضري عملهم من ربح المحل. و ال ٢٠٠ اللي راحوا لشركه السياحه في رحله شرم الشيخ.

يعني المواطن اللي بدل ما يصرف فلوسه في شيئ ما و راح صرف الفلوس دي في شرم الشيخ فحساباتها بالنسبه للاقتصاد الكلي دي ما هي. الناتج واحد في الاخر.

بالنسبه للاقتصاد ككل الناتج واحد. لكن بالنسبه لشركه السياحه الناتج مش واحد. بالنسبه للعامل اللي الخضري كان المفروض يعينه بس قرر انه مش حيعينه عشان يروح شرم الشيخ برضه الناتج مش واحد. لو الخضري اخذ فلوسه و راح شرم الشيخ طبعا شركه السياحه مبسوطه. العامل او شركه توسيع المحل مش حياخدوا حاجه.

لذلك حملات تشجيع السياحه الداخليه لتعويض انخفاض الخارجيه حملات لا تاثير لها إطلاقا علي الناتج الكلي المحلي. كل اللي بتعمله انها بتخلي رجال الاعمال المالكين و الناس اللي بتشتغل في شرم الشيخ مبسوطين علي حساب ناس تانيه في الاقتصاد الكلي.

:bosyht9::bosyht9:

طبعا مرواح شرم الشيخ و الترويح عن الاسره عمل جميل. لكن لما تقول للناس لازم تروح و تخليه بدل ما يوسع المحل او يزود العمال يروح يدفع فلوس في شرم الشيخ فالسؤال اي عمل فيهم أفيد للاقتصاد علي المدي البعيد؟ أكيد الاستثمار طبعا. ليه؟ لان في الغالب محدش مثلا حيقطع فلوس الأكل و الشرب او الدروس الخصوصيه او المدارس عشان يروح شرم الشيخ. أكيد حيقطع من اي فلوس كان شايلها للاستثمار و لو حتي المستقبلي. و طبعا الاستثمار افضل من ان أسره تروح شرم الشيخ للمره التانيه في سنه واحده مهما كانت القيمه الترويحيه لزياره شرم الشيخ.

يبقي الحملات دي هدفها هو ان رجال الاعمال و العاملين في شرم الشيخ يستفيدوا علي حساب قطاع الاستثمار في الاقتصاد. و طبعا الاعلام اللي ورا الحمله دي مملوك لرجال الاعمال دول و هم كل هدفهم فلوسك مش أكتر.


طيب لو الفلوس جايه من سايح اجنبي؟




يتبع

تابع



طيب لو الفلوس جايه من سايح اجنبي؟



نفرض ان الخضري في مثالنا ده بدل ما يبيع خضار ب ٢٠٠ جنيه باع خضار ب ١٠٠ جنيه لمصريين و ب ٢٠ دولار لأجانب.

ده بيعمل حاجتين في الاقتصاد.

١- ال ٢٠ دولار اللي الأجنبي دفعهم دول فلوس داخله من الخارج علي الاقتصاد مباشره. بتزود الناتج المحلي الكلي بقيمتها الكليه و بدون حاجه انك تطبع فلوس.

٢- بتدخل عمله صعبه مباشره للاقتصاد و اقتصاد مصر زي ما شفنا عنده مشكله كبيره في العملات الصعبه (وشرحنا ده بالتفصيل).

لذلك مفيش سياحه محليه حتعوض ده الا اذا كانت بدل ما الخضري يروح يصيف بره مصر او يعمل عمره في السعوديه انه يصيف في شرم الشيخ لانه في الحاله دي بس وفر العمله الصعبه اللي كان حيحتاجها لو سافر بره و كمان دور الفلوس دي جوه مصر في اقتصاد مصر بدل ما تدور في اقتصاد خارجي.

ايه موضوع انهم بينزلوا الاسعار في شرم الشيخ عشان المصريين ييجوا؟



و طبعا المصريين زعلانين من كده. و بيقولوا في الاعلام دوروا علي الغالي عشان تساعدوا اقتصاد مصر!

:006et4::006et4:

و الله بيضحكوا عليكم.



اي سلعه حتي الليالي في الفنادق السياحيه تخضع للعرض و الطلب. لما الطلب يزيد السعر يزيد. و لما الطلب يقل السعر يقل.

طيب لو مفيش سياح يبقي أكيد الطلب يقل يعني السعر لازم يقل جدا. و طبعا رجال اعمال شرم الشيخ مش عاوزين كده. لكن هو لازم حيقلل السعر جدا للاجنبي عشان ميقدرش يضحك عليه. يقوم عشان يعوض ده يعمل حمله في مصر انه عيب تقليل السعر. عشان لما تروح انت شرم الشيخ و تدفع أكتر من الأجنبي تحس كده بالوطنيه و بالفخر.

بينما انت عملت فايده بس لرجل اعمال شرم الشيخ. و لا حتي العمال في الفندق استفادوا من الفلوس الزياده دي لانها رايحه مباشره لرجل الاعمال و الموظفين دول دخلهم ثابت.

مبروك عليك انهم ضحكوا عليك.

:o:o

كلمه اخيره


مينفعش بلد زي مصر في منطقه غير مستقره زي دي تعتمد علي السياحه بس. مينفعش. لازم التصنيع يا ناس يا هوه.

و الله تعبنا من الكلام ده.

ماذا يحدث لسعر الدولار (١)



https://jawdablog.files.wordpress.co...ers1.jpg?w=670

اول حاجه حنتعلمها النهارده ان الدولار سلعه زي اي سلعه. ازاي؟

يعني لما يزيد الطلب عن المعروض لازم سعرها يزيد. و لما يكون موجود منها كثير في السوق و محدش عاوزها سعرها لازم يقل . و علي فكره الكلام ده في العالم كله. لانه مفيش عمله في العالم دلوقتي معتمده علي مقياس الذهب. كل عملات العالم دلوقتي سلع تخضع للعرض و الطلب.

ازاي ده حصل؟

زمان بعد الحرب العالميه التانيه العالم عمل اتفاقيه اسمها بريتون ودز (المصدر ). الاتفاقيه دي قالت ان كل عملات العالم تبقي منسوبه للدولار و الدولار يقوم بالذهب بنسبه ثابته تلتزم بيها الحكومه الامريكيه. يعني العالم اعترف ان كل العملات تنزل و تطلع في مقابل الدولار لكن الدولار نفسه يقوم بالذهب بنسبه ثابته لا تتغير. معني كده ان لو امريكا عاوزه تطبع دولارات لازم تزود احتياطي الدهب بتاعها عشان تغطي الدولارات الزياده. الكلام ده استمر لحد عام ١٩٧١ لما نيكسون فك ارتباط الدولار بالذهب و خلي امريكا تطبع اي كميه دولارات هي عاوزها عشان يحل ازمه امريكا الماليه وقتها

من ساعتها و الدولار زي اي سلعه يخضع للعرض و الطلب. زي الطماطم و الخيار و الكوسه.

طيب جميل. يعني لو بلد الدولار فيها كثير سعر الدولار فيها يقل. و العكس صحيح. كلام بسيط جدا.

طيب يعني ايه المعروض من الدولار و الطلب علي الدولار في بلد زي مصر؟


انت لو عاوز تشتري حاجه من بره. دول العالم مش حتاخد منك جنيه مصري. حتاخد منك دولارات. يعني لو عاوز تشتري قمح حتشتريه بالدولار. عاوز تشتري عربيه حتدفع تمنها بالدولار و هكذا. اي حاجه بتشتريها من بره حتدفع تمنها بالدولار. ده اسمه الطلب علي الدولار.

كالعاده واحد ناصح حيقول ما احنا لو نرغم العالم يبيع لنا بالجنيه المصري يبقي احنا الكسبانين و مش حيبقي في طلب علي الدولار.

للاسف مش حقيقي. لانه حتي لو مثلا شركه هيونداي قبلت تأخذ منك جنيه مصري في مقابل العربيه هي حتقوم علي طول محوله الجنيه اللي أخذته منك لدولارات. و يبقي معملناش حاجه. طيب ليه تحوله دولارات؟ لان شركه هيونداي عندها عمال في كوريا و امريكا و عندها موردين في العالم كله و دول كلهم بياخدوا بالدولار و عملات زي الدولار. مش بياخدوا جنيه مصري. لذلك في غياب ان الجنيه المصري ياخذ مكان الدولار و يبقي عمله الأساس في العالم يبقي كل اللي بيقول ندفع بالجنيه بيقول اي كلام. بالعكس لو شركه هيونداي قبلت تاخد فلوسها بالجنيه حتاخد منك عموله التحويل و تأخذ منك تأمين مخاطر لانها مش مطمنه ان الجنيه سعره يبقي ثابت و حتطلع انت الخسران و دافع أكتر.

طيب ده الطلب علي الدولار. ايه المعروض من الدولار؟



يتبع

تابع



طيب ده الطلب علي الدولار. ايه المعروض من الدولار؟




المعروض من الدولار هو كميه الدولار اللي بتدخل مصر. يعني مثلا السايح اللي بيجي مصر بيغير الفلوس اللي معاه من دولار بجنيه. ده مصدر للدولار. السفن اللي بتعدي القناه بتدفع دولارات. الحكومه المصريه عندها استثمارات بره مصر بيجي منها عايد بالدولار. و هكذا. كل ده دخل من الدولار.

الفارق بين الطلب علي الدولار و العملات الاجنبيه الأخري و المعروض من الدولار و العملات الاجنبيه الأخري في مصر اسمه ميزان المدفوعات.

يعني ميزان المدفوعات بيقيس اللي داخل و اللي خارج من العملات الاجنبيه بين مصر و العالم كله (المصدر ).

عرفنا يعني ايه ميزان مدفوعات؟ طيب نفهم بقي ايه اللي داخل في ميزان المدفوعات في مصر:


الاستيراد. كل اللي انت بتستورده بتستورده بالدولار و بالتالي ده طلب علي الدولار. لو زاد الاستيراد لازم سعر الدولار يزيد لان الطلب عليه بيزيد.

التصدير. لو بتصدر أكتر و بتاخد فلوسك بالدولار المعروض من الدولار يزيد و بالتالي سعره يقل.

الفرق بين الاستيراد و التصدير اسمه الميزان التجاري.

الخدمات: يعني ايه؟ دي بيدخل فيها:

– النقل: يعني سفن معديه في القناه بتدفع لك فلوس بالدولار. و كمان مصر لها سفن بتعدي في اماكن تانيه زي قناه بنما فبرضه بتدفع فلوس هناك بالدولار. مش بس السفن. الطيارات اللي بتعدي المجال الجوي المصري بتدفع فلوس بالدولار. و العكس طيارات مصر للطيران اللي بتسافر السعوديه و غيرها بتدفع هناك بالدولار كمان.
– السياحه: السايح اللي بيجي مصر بيدفع بالدولار. بس كمان الحجاج المصريين بيروحوا السعوديه و بيطلبوا ريال سعودي اللي هو مرتبط بالدولار.

– عوايد الاستثمار و الفوائد. يعني الحكومه المصريه عندها استثمارات في الخارج بيجي منها عوايد بالدولار. بس كمان الحكومه المصريه لازم تدفع فوايد علي القروض اللي واخداها. و كل ده بالدولار. لو الفوايد اللي لازم ندفعها بتزيد لازم ده يزود الطلب علي الدولار و بالتالي يزيد سعره. و العكس صحيح.

– التحويلات: و دي نوعين. تحويلات خاصه من ناس عايشين بره بيحولوا فلوس لأهلهم في مصر. و في تحويلات حكوميه يعني فلوس المساعدات من السعوديه و الامارات.

تجمع كل ده فوق بعضه يديلك ميزان المدفوعات في مصر.

ماذا يحدث لسعر الدولار (٢)


https://jawdablog.files.wordpress.co...ers1.jpg?w=670


ايه اللي داخل و خارج في ميزان المدفوعات في مصر:



اول حاجه تعملها تفتح تقرير البنك المركزي ( في المرفقات تقارير 3 سنوات سابقة ). ده فيه كل الأرقام. و الأرقام دي مش اسرار و لا حاجه. و لازم البنك المركزي ينشرها لانه بناءا عليه المؤسسات الدوليه بتقيم موقف مصر المالي و تحدد تسلفها و لا لأ. و اللي مش عاوز ينشر الأرقام ميلزموش و بالتالي محدش حيسلفه. لذلك كل العالم بينشر كل الأرقام.



حتلاقي ايه في التقرير ده؟ عشان بس محدش يضحك عليك.

١- الاستيراد. كل اللي انت بتستورده بتستورده بالدولار و بالتالي ده طلب علي الدولار. لو زاد الاستيراد لازم سعر الدولار يزيد لان الطلب عليه بيزيد.

مصر بتستورد في المتوسط حاجات قيمتها ٦٠ مليار دولار في السنه. يعني استوردت ب ٦٠ مليار في ٢٠١٣/٢٠١٤ و نفس الرقم في ٢٠١١/٢٠١٢ لكن استوردت بس ب ٥٧ مليار في ٢٠١٢/٢٠١٣. يعني سنه مرسي اليتيمه قل الاستيراد فيها بحوالي ٣٪. مش نسبه حلوه بس علي الأقل في الاتجاه الصحيح. السنه الوحيده من ايام الثوره اللي الاستيراد قل فيها شويه. لكن فجأه في ٢٠١٤/٢٠١٥ زاد الاستيراد ١٥٪ (من نشره البنك المركزي نفسه) و يوصل ٦٥ مليار دولار بحساب ان النص التاني من السنه يبقي زي النص الأولاني.



يبقي أديك خسرت ٥ مليار دولار لازم دلوقتي تدور عليهم و مكنتش قبل كده محتاجهم.

٢- التصدير. لو بتصدر أكتر و بتاخد فلوسك بالدولار المعروض من الدولار يزيد و بالتالي سعره يقل. مصر في العاده بتصدر بحوالي ٢٥ مليار دولار. في سنه ٢٠١٢/٢٠١٣ كانت السنه اليتيمه اللي مصر صدرت فيها ب ٢٧ مليار دولار . المصيبه ان في ٢٠١٤/٢٠١٥ الصادرات قلت و بقت ٢٤ مليار دولار.


طيب ادي كمان مليار دولار كانوا بيجوا من التصدير و مبقوش يجوا.

الفرق بين الاستيراد و التصدير اسمه الميزان التجاري. و ده بقي اسوء بمقدار مجموع المليار اللي التصدير قل بيهم و ال ٥ مليار اللي الاستيراد زاد بيهم. يعني المجموع بقي ٦ مليار دولار لازم تلاقيهم. يعني الطلب علي الدولار زاد حتي عن سنه ٢٠١٣/٢٠١٤ بمقدار ٦ مليار دولار. و زاد عن سنه مرسي بمقدار ١٠ مليار دولار. تخيل. ارقام مهوله فعلا. و كله من ارقام البنك المركزي .



الخدمات: يعني ايه؟




يتبع

تابع



الخدمات: يعني ايه؟دي بيدخل فيها:

– النقل: يعني سفن معديه في القناه بتدفع لك فلوس بالدولار. كمان خط انابيب سوميد مصر بتاخد عليه عوايد مقاربه لعوائد قناه السويس. لكن كمان مصر لها سفن بتعدي في اماكن تانيه زي قناه بنما فبرضه بتدفع فلوس هناك بالدولار. مش بس السفن. الطيارات اللي بتعدي المجال الجوي المصري بتدفع فلوس بالدولار. و العكس طيارات مصر للطيران اللي بتسافر السعوديه و غيرها بتدفع هناك بالدولار كمان.
مصر دخل لها من النقل ٩ مليار دولار منهم ٥ من قناه السويس في سنه ٢٠١٣/٢٠١٤. و الرقم متغيرش في سنه ٢٠١٤/٢٠١٥.
و مصر دفعت للعالم في النقل حوالي ١,٧ مليار دولار رسوم عبور سفن و طيارات مصريه في العالم. الرقم ده كمان متغيرش.
طيب علي الأقل في بند متغيرش. و ان كان طبعا التطبيل بتاع القناه كلنا عارفين دلوقتي انه تطبيل.


– السياحه: السايح اللي بيجي مصر بيدفع بالدولار. بس كمان الحجاج المصريين بيروحوا السعوديه و بيطلبوا ريال سعودي اللي هو مرتبط بالدولار.

طيب في ٢٠١٣/١٠١٤ مصر دخل لها ٥ مليار دولار من السياحه. المصيبه طبعا انها طلع منها ٣ مليار دولار برضه في سياحه المصريين في الخارج. يعني حج و خلافه.

في ٢٠١٤/٢٠١٥ السياحه زادت حوالي ٢ مليار في نص السنه الأولاني. حنقول ان الكلام ده استمر في النص التاني. يعني زادت ٤ مليار دولار بالمقارنه ب ٢٠١٣/٢٠١٤.

اللطيف في موضوع السياحه ده انه سنه مرسي السياحه عملت ٩ مليار دولار و هو تقريبا متوسط ايام مبارك. في سنه ٢٠١٣/٢٠١٤ السياحه بقت ٥ مليار دولار بس. يعني نزلت جدا عن سنه مرسي. نزلت النص تقريبا. و بعدين رجعت بقت ٩ مليار تاني في ٢٠١٤/٢٠١٥.

لكن بالمقارنه بسنه ٢٠١٣/٢٠١٤ الدولار دخل من السياحه بزياده ٤ مليار. و لكن نفس العوايد بالمقارنه بسنه مرسي! خد بالك انهم حيعتبروا ده إنجاز!

– عوايد الاستثمار و الفوائد. يعني الحكومه المصريه عندها استثمارات في الخارج بيجي منها عوايد بالدولار. بس كمان الحكومه المصريه لازم تدفع فوايد علي القروض اللي واخداها. و كل ده بالدولار. لو الفوايد اللي لازم ندفعها بتزيد لازم ده يزود الطلب علي الدولار و بالتالي يزيد سعره. و العكس صحيح.

طيب مصر بيدخلها حوالي ٣ مليار دولار من دخل استثمارات الحكومه في الخارج مع الرسوم اللي بتاخدها الحكومه من المصريين في الخارج مع رسوم التأشيرات للاجانب، الخ. كل ده بحوالي ٣ مليار و مش بيزيد و لا بيتغير قوي.

لكن مصر بتدفع فوايد ديون ٧ مليار دولار في السنه. و مصاريف الحكومه المصريه في الخارج حوالي مليار دولار و مصاريف رحلات الرئيس و الوزرا و كل ده بتدخل في بند اسمه “و خلافه” و قيمته حوالي٣ مليار دولار. الأرقام دي مش بتتغير.


لذلك اللي يضحك عليك و يقولك احنا دفعنا اقساط ديون مش عارف بكام. كل ده عك ملوش وجود في الأرقام الرسميه و اقساط الديون اللي دفعناها ثابته و لسه تاثيرات الاقتراض اللي بيعمله الرئيس دلوقتي مظهرتش. لسه كام سنه. كمان موضوع دفع اقساط البترول ده له حساب مختلف بيدخل في حسابات الاستثمار و حنشرحه بعدين لانه ممكن يبقي يندفع من أصول البنك المركزي مثلا و بالتالي تأثيرهم علي الدولار الموجود في السوق محدود.

– التحويلات: و دي نوعين. تحويلات خاصه من ناس عايشين بره بيحولوا فلوس لأهلهم في مصر. و في تحويلات حكوميه يعني فلوس المساعدات من السعوديه و الامارات.

تحويلات الناس العاديه بعد ما كانت عماله تزيد كل سنه. يعني كانت ١٢ مليار في ٢٠١٠ و بقت ١٨ مليار في سنه مرسي و بعد الثوره، التحويلات دي مبقتش تزيد. ثبتت عند ١٨ مليار دولار.

تحويلات الحكومات بقي هي ده اللي فيها اللعب كله. ازاي.



يتبع

تابع


تحويلات الحكومات بقي هي ده اللي فيها اللعب كله. ازاي.




في سنه ٢٠١٢/٢٠١٣ الحكومات الخارجيه حولت لمصر ٨٠٠ مليون دولار. بس. و ده الرقم الثابت من ايام مبارك. علي فكره ده غير الودائع الرسميه في البنك المركزي. دي ليها حساب تاني حنحسبه لان الوديعه لازم تترد و متقدرش تصرفها في السوق عشان مثلا تشتري بها قمح او سكر. التحويل هو قرض او منحه داخله مباشره علي حساب الحكومه و ممكن تشتري بيه اي حاجه.

في سنه ٢٠١٤/٢٠١٥ الرقم ده نط بقي ١٢ مليار دولار بعد لما كان ٨٠٠ مليون دولار! و فضل ٨٠٠ مليون طول وقت مبارك و مرسي و المجلس العسكري. ال ١٢ مليار دولار دول هم مساعدات الخليج .
المصيبه بقي ان في ٢٠١٤/٢٠١٥ المساعدات خلصت. بدل ما كان ١٢ مليار دولار نزل و بقي ٥ مليار دولار بس. يعني نزل ٧ مليار دولار بالمقارنه بسنه ٢٠١٣/٢٠١٤.

تجمع كل ده فوق بعضه يديلك ميزان المدفوعات في مصر.

يلا. هات قلم و ورقه و اله حاسبه و يلا نحسب.

اولا: المقارنه بسنه ٢٠١٣/٢٠١٤


الاستيراد زاد ٥ مليار.
التصدير نزل مليار.
النقل و قناه السويس زي ما همه.
السياحه زادت ٤ مليار دولار
التحويلات نزلت ٥ مليار دولار
يبقي المجموع بقي:
٥+١-٤+٥ = ٧ مليار دولار
يعني مصر بقت بتحتاج ٧ مليار دولار زياده عن سنه ٢٠١٣/٢٠١٤ عشان تقدر تكمل. طيب مصر بتحتاج في المتوسط ٧٠ مليار دولار بين الحج و الاستيراد و غيره. دلوقتي بقت تحتاج ٧٧ مليار دولار. يعني زياده ١٠٪. يبقي أكيد سعر الدولار لازم يزيد علي الأقل ١٠٪. طيب. الدولار كان سعره ٧,٥ جنيه 2014. زود عليه ١٠٪ حتوصل لسعر ٨,٢٠ جنيه 2015 . بسيطه جدا.

و عاده في الأحوال اللي زي دي في تضخم للجنيه المصري لان الحكومه عماله تطبع فلوس عشان تدفع عوايد تفريعه القناه .ونتوقع انه بحلول عام ٢٠١٧ التأثير التضخمي ده حيوصل ١٢٪ اللي هوه سعر الفايده علي سندات القناه لانه مشروع دون عايد. كل الفلوس المطبوعه دي فلوس رايحه.

زود بقي ١٢٪ كمان علي سعر الدولار حتوصل ان سعره حيبقي هيزيد عن 13 جنيه مع عام ٢٠١٧.

ثانيا: المقارنه بين ٢٠١٤/١٠١٥ بسنه مرسي ٢٠١٢/٢٠١٣



الاستيراد أكتر ٨ مليار دولار عن سنه مرسي
التصدير أقل ٢ مليار دولار عن سنه مرسي
السياحه زي ما هيه.
النقل زي ما هوه.
الخدمات كلها زي ما هيه.
الفارق ان المساعدات ٥ مليار دولار في ٢٠١٤/٢٠١٥ مقارنه ب ١ مليار في سنه مرسي.
يعني ٢٠١٤/٢٠١٥ اسوء بمقدار ٦ مليار دولار عن سنه مرسي! و اسوء ٧ مليار دولار عن سنه ٢٠١٣/٢٠١٤ اللي دخل فيها مصر ١٢ مليار دولار تحويلات حكوميه!

عرفنا ليه الدولار لازم يوصل ٨,٢٠ جنيه و بعدين ٩ جنيه في ظرف سنتين.


نكمل بقي عشان نفهم موضوع احتياطي البنك المركزي.

ماذا يحدث لسعر الدولار (3)




https://jawdablog.files.wordpress.co...ers1.jpg?w=670





الحساب المالي و الرأسمالي:


طيب الحسابات دي كلها بناءا علي ميزان المدفوعات. اللي هوه زي الحساب الجاري كده في البنك. بتحسب دخل لك دولارات قد ايه و خرج منك دولارات قد ايه. لكن انت طبعا ممكن تقترض و يجيلك دولارات من الاقتراض. و ممكن كمان يدخلك استثمارات اجنبيه تدخل دولارات البلد. او تخرج استثمارات اجنبيه تخرج دولارات من البلد. او ان السعوديه تديك وديعه بالدولار. او انك تأخذ الوديعه دي و تحط عليها من الفلوس اللي انت شايلها للزمن و تدفع أصل الدين اللي عليك. كل ده مش بيدخل في ميزان المدفوعات. بيدخل في حاجه تانيه اسمها “الحساب المالي و الرأسمالي”. و ده كمان البنك المركزي بينشره يعني حنحسبه و ندرسه كمان.

الفارق بين ميزان المدفوعات و الحساب المالي و الرأسمالي هو بالضبط الفرق بين حساب جاري في البنك و الوديعه او الأصول. الحساب الجاري داخل و طالع منه فلوس بدون تغيير في الأصول. يعني مثلا بتدفع فايده القروض من ميزان المدفوعات. السياح بيدفعوا فلوس من ميزان المدفوعات. إنما الحساب الراسمالي من اسمه كده انه تغيير في الاستثمار. يعني مستثمر يدخل او يطلع او انك تسدد القروض اللي عليك او انك تاخد قروض او بلد تحط عندك وديعه.


الفلوس من دول اخري. انواع:


نشرح شويه موضوع الوديعه من بلد تانيه الاول. لو يجيلك فلوس من بلد تانيه و تدخل في الميزانيه و انت مش مطالب بسدادها علي الأقل علي الورق او ان بلد تانيه تديك بترول او بنزين بسعر مخفض فده بيدخل في ميزان المدفوعات. و علي فكره ده شيئ مهين لأي دوله انها تأخذ الفلوس دي في ميزان المدفوعات. لانها في الأغلب بتيجي في احوال عجز عن سداد الالتزامات. على فكرة لا مرسي طلبها و لا مبارك عملها.

إنما لما دوله تديك قرض او تديك وديعه مطلوب سدادها فده بيدخل في الحساب المالي و الراسمالي. فهمنا الفرق؟

ايه اللي داخل و طالع في الحساب المالي و الراسمالي؟


الحساب الراسمالي ده كله بيتحكم فيه البنك المركزي. الزياده فيه هي زياده في احتياطي البنك المركزي. النقص فيه نقص في احتياطي البنك المركزي.

طيب نشوف ايه داخل و طالع من الحساب الراسمالي ده:

١- الاستثمارات.

فيه استثمارات مصريين بيعملوها في الخارج. مثلا رجل أعمال لما يحول فلوس عشان يشتري منتجع في سويسرا. دي فلوس استثمارات طالعه بره مصر.
بالعكس في كمان لما مستثمر اجنبي يدخل يستثمر في مصر. ده بيدخل استثمارات.
في نوعين من الاستثمار. استثمار مباشر. يعني يشتري ارض او مصنع او يبني مصنع. و فيه استثمار في أوراق ماليه. يعني يشتري اسهم في البورصه مثلا.
الدول بتفضل جدا الاستثمار المباشر. لان المستثمر اللي بيشتري اسهم النهارده ممكن يبيعها بكره. لكن اللي بيبني مصنع ده واحد قاعد معاك فتره طويله.

٢- القروض.

و دي عاده بنقسمها لقروض طويله الأجل و متوسطه و قصيره.
قصيره يعني تقترض كام شهر و ترجع الفلوس. طويله يعني تأخذ قرض و تسدده علي ٣٠ سنه مثلا. الدول بتحب القروض الطويلة لانها فيها ثبات و معناها انه في ثقه في قدره الدوله علي السداد علي مدي بعيد.

لما بتاخد قرض طبعا بتاخد فلوس فده معناه فلوس داخله البلد. لكن كمان القروض القديمه اللي ميعادها حل لازم تدفعها. زي ما شفنا الفايده بتتدفع من ميزان المدفوعات. أصل القرض لما يجي ميعاده بتدفعه من الحساب الراسمالي اللي هوه في الاخر بيصب في احتياطي البنك المركزي من الدولار.

لذلك في الحساب الراسمالي حنلاقي سطرين تحت القروض: سطر اسمه drawings يعني ما يدخلك من القرض الجديد. و سطر اسمه repayment يعني أصول القروض القديمه اللي ميعاد دفعها حل.

٣- الزياده و النقص في الأصول:

يعني مثلا لو عندك احتياطي دهب او عقارات تملكها و سعر الدهب نزل قصاد الدولار فلازم تقول ان قيمه أصولك نزلت. او لو سعر العقارات بتاعتك نزلت فنفس الكلام. ده مثلا ينطبق علي العقارات اللي الحكومه تملكها زي السفارات و القنصليات في الخارج و المتاحف و العقارات اللي وزاره الأوقاف تملكها. كل دي أصول سعرها بيتغير و لازم تقرير البنك المركزي يرصد التغير في الاسعار دي.

كمان لو في ودائع من دول تانيه لازم تتحسب في التغير في الأصول و الودائع.

سنه ٢٠١٤/٢٠١٥ البنك المركزي قال انه انسحب منه نص مليار دولار صافي مقارنه بدخول ٢ مليار دولار صافي في عام ٢٠١٣/٢٠١٤. و مقارنه بدخول ٦ مليار دولار صافي في عام ٢٠١٢/٢٠١٣. و بيقول ان السحب بتاع النص مليار دولار صافي ده راجع انه سدد مستحقات عليه لبعض الدول العربيه.



يعني ايه الكلام ده؟ نحاول نفهم.



يتبع

تابع



يعني ايه الكلام ده؟ نحاول نفهم.




دخل في سنه مرسي ٦ مليار دولار ودائع. ده غير القرض اللي شرحناه فوق. الوديعه بتدخل انها مستحقه عليك تسددها عند الطلب او حسب الاتفاق. القرض ليه فايده بتدفعها و أصول تسددها و هدف اخدت القرض عشانه زي مثلا تبني مدارس او تعمل مصانع او غيره.



الوديعه بتحطها معاك و تفضل مستحقه عليك.





في ٢٠١٣/٢٠١٤ دخل مره كمان ٢ مليار دولار ودائع صافيه.



في ٢٠١٤/٢٠١٥ عارفين انه دخل مصر ٦,٥ مليار دولار ودائع من السعوديه و الامارات ( المصدر ). و كمان دخل زيهم في ٢٠١٣/٢٠١٤. يعني في ٣ سنين دخل مصر ١٩ مليار دولار ودائع: ١٣ مع السيسي و ٦ مع مرسي.



طلع بره مصر أكيد ٤,٥ مليار في عام ٢٠١٣/٢٠١٤ لان الصافي في السنه دي كان ٢ مليار بس. كمان طلع بره مصر في ٢٠١٤/٢٠١٥ حوالي ٧ مليار دولار لان الصافي كان سالب نص مليار دولار. يعني طلع بره مصر حوالي ١١,٥ مليار دولار في سنتين. لو قلنا ان ٦ مليار منهم كانوا عشان يدفعوا فلوس وديعه قطر و تركيا يبقي أكيد في ٥,٥ مليار دولار راحوا في حاجات تانيه. طبعا ٤-٥ مليار دولار منهم فلوس تفريعه القناه اللي راحت الشركه الاماراتيه . و نص مليار او مليار او شيئ من هذا القبيل راحت لشركه جنرال اليكتريك عشان الكهربا و لشركات تانيه عشان تمن استيراد الغاز و تمن ايجار محطه الغاز (المصدر ) و هي نفذت نص العقد و اخدت نص الفلوس.



مقارنه ٢٠١٤/٢٠١٥ بعام ٢٠١٣/٢٠١٤ من حيث الاحتياطي:




يتبع

تابع


مقارنه ٢٠١٤/٢٠١٥ بعام ٢٠١٣/٢٠١٤ من حيث الاحتياطي:




الاستثمارات نزلت ٥ مليار دولار
مفيش تغيير في القروض
الأصول و الودائع نزلت حوالي ٢,٥ مليار
يعني احتياطي البنك المركزي نزل حوالي ٧,٥ مليار دولار.



مش معني كده ان الدولار ينزل. معناه انه قدره البنك المركزي علي السيطره علي نزول الدولار اقل بكتير. الدولار بيتحرك نتيجه لميزان المدفوعات بالأساس زي ما شرحنا قبل كده. الاحتياطي هو بس زي اسمه. احتياطي وقت الضروره لتجاوز مشكلات محدوده الامد. مشكله مصر مش محدوده الامد. لذلك دور الاحتياطي و نزوله تاثيره مرحلي بس و معناه ان الدولار ممكن يحصل فيه طفرات دون قدره البنك انه يسيطر عليها. وبالفعل دا حصل فى 2015/2016



مقارنه ٢٠١٤/٢٠١٥ بعام ٢٠١٢/٢٠١٣


الاستثمار اقل بحوالي ٥ مليار دولار
القروض اقل بحوالي ٢ مليار دولار
الأصول و الودائع اقل بحوالي ٦,٥ مليار دولار.
يعني سنه ٢٠١٤/٢٠١٥ اسوء من سنه مرسي بحوالي ١٣,٥ مليار دولار.





طيب المساعدات الخليجية راحت فين؟






افيه ١٢ مليار دولار راحوا عشان يسدوا ميزان المدفوعات في ٢٠١٣/٢٠١٤ و كمان ٥ مليار دولار فوقهم راحوا في الاستيراد في سنه ٢٠١٤/٢٠١٥. رقم كبير جدا. راحوا في الاستيراد اللي زاد.
و كمان ١٣ مليار دولار ودائع منهم ٦ رجعوا لقطر و تركيا و الباقي اشترينا بيه العتبه، أسف قناه السويس الجديده.





يعني ٣٠ مليار دولار راحوا في الهبل (مفيش وصف تاني).



المعروف انه مصر دخل لها حوالي ٤٠ مليار دولار من السعوديه و الامارات و غيرها (مصدر1 مصدر2 ). في الأغلب الجيش اخد ١٠ مليار من ال ٤٠ و موجودين في حساب خاص للصرف علي المشاريع الخاصه و مكافات خاصه لناس خاصه و شراء حاملات الطائرات (في بلد لا يوجد بها تصريف لمياه الأمطار حتي).




أوعي حد يضحك عليك.

الاسئله و الاجوبه المفيده في الدولار و الجنيه



https://jawdablog.files.wordpress.co...wers.jpg?w=670


لماذا يترنح الجنيه المصري الان امام الدولار

س: ليه الدولار زاد قوي الفترة دى دي؟



ج: لان مصر السنه دي بتصدر اقل و بتستورد اكثر و فلوس مساعدات الخليج اللي دخلت اقل و قناه السويس زي ما هي و مع ان السياحه اكثر شويه من السنه اللي فاتت، فالمجموع ان مصر دخلها دولارات اقل بحوالي ٦ مليار دولار عن السنه اللي فاتت. مصر في العاده بيدخلها حوالي ٦٠-٧٠ مليار دولار. يعني الدولارات اقل ١٠٪ تقريبا فلازم الدولار يزيد ١٠٪ من ٧,٥ جنيه ليوصل ٨,٢٥. وما زال يواصل الزيادة باضطراد غير مسبوق



س: طيب و ايه الحل؟


ج: علي المدي البعيد زياده التصدير و تقليل الاستيراد. و كتبنا ده قبل كده

علي المدي القصير ان الفلوس اللي فاضله من مساعدات الخليج اللي دخل و حسبنا انها حوالي ١٠ مليار دولارتتحط في تشجيع المصانع المصريه اللي قافله دلوقتي انها ترجع تشتغل تاني.

س: هل ممكن ان شركه صرافه تتحكم في الاقتصاد المصري؟


ج: مستحيل. اكبر شركه صرافه في مصر رأسمالها عده ملايين من الدولارات. نحن نتكلم عن ميزان مدفوعات داخل فيه ٧٠ مليار دولار و خارج منه ٨٠ مليار دولار تقريبا. يعني عشره الاف ضعف قدرات ايه شركه صرافه. لا حسن مالك و لا عشره زيه! هذا كلام استهبال هدفه تغييب وعيك . عشان تبتدي تأثر لازم تتكلم في مليار دولار علي الأقل.

س: ما تأثير انقطاع مساعدات الخليج؟


ج: تاثير ضخم جدا. الامارات و السعوديه الان يتحكمان في الاقتصاد المصري و سعر الجنيه. لما قطعوا ٦ مليار دولار كانوا بيدفعوها

س: ليه الدينار الكويتي غالي قوي؟ ده دليل ان اقتصادهم قوي جدا!


ج: مش ضروري. ممكن مصر بكره تطلع قرار ان كل الف جنيه مصري حنسميهم الجنيه المصري الجديد. و يبقي الجنيه المصري الجديد ده تمنه ١٢٥ دولار حته واحده. بس ده مش حيغير حاجه لا في ميزان المدفوعات و لا في احتياطي البنك المركزي و لا في الاقتصاد المصري.

تركيا و اسرائيل امثله لدول عملت موضوع الليره التركيه الجديده او الشيكل الاسرائيلي الجديد (اسمه new shekel). و هدفه ان مثلا لو رحت تشتري خضار من السوق متدفعش مليون شيكل او مليار ليره تركيه او ارقام عجيبه زي كده تخلي المواطن يتلخبط في الحساب. و عاده الدول بتعمل كده بعد لما يحصل تضخم كبير و بعدين يتم السيطره عليه.

كمان الين الياباني او اليوان الصيني كل ١٠٠ منهم باقل من دولار. مش معني كده ان اقتصادياتهم ضعيفه و لا حاجه.

العمله قويه او ضعيفه معناها قيمتها بالنسبه لسله عملات اخري او مقارنه بالدولار مقارنه بسنه أساس كانت نفس العمله مستخدمه فيه.
كون انها مائه ين او لا هذه اختيارات دول لنوعيه مفردات العمله التي تريد التعامل بها.

س: طيب احنا كمواطنين نعمل ايه؟



ج: احنا منقدرش ندي نصائح استثماريه. ليه؟ لان النصائح الاستثماريه تختلف حسب الشخص. يعني مثلا انت عاوز فلوسك تاني بعد سنه و لا ممكن تاخد مخاطره و متخذش فلوسك الا بعد ٢٠ سنه. كمان تختلف انت معاك كام؟ و ايه اللي تفضله. دي كلها حاجات محتاجه نقاش مع ناصح استثماري او financial advisor و دي وظيفه موجوده في العالم المتقدم كله.

معلش. ممكن نعيش زي العالم المتقدم و لو مره؟

س: طيب مصر رايحه علي فين؟


ج: بالسياسات الحاليه، ده لو أمكن اننا نقول عليها سياسات، رايحه في مهب الريح . لان الدولارات راحت في مشاريع دون عايد و ده بيعمل تضخم . و كمان المصانع عماله تقفل و الناتج الصناعي عمال يقل (المصدر ). و كمان المنطقه غير مستقره و السياحه لم تعود و لن تعود نتيجه عدم الاستقرار السياسي في مصر نفسها.



س: طيب المواطن العادي حيحس بايه؟



ج: زياده في الاسعار بنفس قيمه زياده الدولار. يعني ١٠٪. و كمان نتوقع تضخم ١٢٪ السنه الجايه لان ده نفسه سعر الفايده علي قناه السويس

و بالتالي تضخم ١٢٪ كل سنه تقريبا. يعني الاسعار تتضاعف خلال عده سنوات.

تابع



طيب ايه تأثير ده؟


تاثيره انه انا لو عاوز أزود اسعار الأسهم في مصر ممكن ادخل السوق شاري. أحط ميزانيه ١٠٠ مليون دولار مثلا و ادخل كل يوم بحوالي ٢٠ مليون دولار اشتري اسهم. و طبعا لان في واحد عاوز يشتري اسعار الأسهم حتزيد. و بالتالي ناس تانيه حتقلدني و تقول السوق بتعلي و انهم يدخلوا يعملوا فلوس. يعني بسبب صغر السوق المصريه فهي معرضه لمضاربات تحكميه في الاسعار. سهل جدا ان واحد غني او مجموعه أغنياء يتحكموا في اسعار البورصه المصريه. و أسهل اكثر بالنسبه مثلا لحكومه السعوديه او الامارات انها تتحكم في اسعار الأسهم المصريه. معني كده ان البورصه المصريه بتتاثر جدا بالمتغيرات السياسيه اكثر من اي بورصه تانيه في العالم. طبعا ده بالاضافه لكل المتغيرات الاقتصاديه و احوال الشركات نفسها اللي طبعا لازم تاثر علي سعر الأسهم في اي بورصه.

ده مدخل لازم نفهمه كويس جدا عن البورصه المصريه بالذات.

تاثير تراجع بورصه الصين



ناس كتير تقولك ان تراجع البورصه المصريه سببه هو تراجع الأسهم الصينيه. و ده بعضه حقيقي و بعضه مش حقيقي.

الرسم البياني فى المشاركة السابقة يورينا انه مفيش علاقه كبيره قوي علي مدي ال ٥ سنين اللي فاتوا بين البورصه المصريه و الصينيه او حتي الامريكيه.

يعني مثلا من يونيو ٢٠١٤ مع انتخاب السيسي بدأت الأسهم الصينيه في الصعود بشكل كبير جدا بينما بدأت الأسهم المصريه في التراجع بشكل كبير جدا برضه.

العكس حصل بين يونيو ٢٠١٣ و يونيو ٢٠١٤ . في يونيو ٢٠١٣ الأسهم المصريه بدأت الصعود بشكل كبير في حين ان الأسهم الصينيه فضلت زي ما هي.

نلاحظ ان الفتره الوحيده اللي كان فيها الأسهم الصينيه و المصريه ماشيين مع بعض هي من يناير ٢٠١١ الي يونيو ٢٠١٣. الاتنين كانوا بصفه عامه في أتجاه النزول. الغريب ان الناس اللي دلوقتي بيقولوا ان الأسهم بتنزل عشان الصين ماكانوش وقتها بيقولوا كده و كانوا بيقولوا عجله الاقتصاد و الاستقرار و الحقونا البورصه بتقع و كل الكلام ده.

نلاحظ كمان ان الناس اللي بتقول ان الصين موقعه العالم كله كلامهم مش سليم تماماً. لان زي ما احنا شايفين الأسهم الامريكيه مثلا نزلت مؤخراً فعلا بسبب الصين لكن بشكل بسيط جدا. يعني الأسهم الامريكيه زادت ٦٢٪ في ٥ سنين يعني ١٢٪ في السنه في حين الأسهم الصينيه زادت ٢٠٪ بس في ٥ سنين يعني ٤٪ في السنه و معظم الخساره كانت في الكام شهر الأخير.

قارن ده بالأسهم المصريه اللي فقدت ٤٥٪ من قيمتها يعني نزلت تقريبا النصف في خلال ٥ سنين.

الحقيقه انه من يناير ٢٠١١ حتي يونيو ٢٠١٣ الأسهم الصينيه نزلت بسبب تداعيات الازمه الاقتصاديه العالميه و هبوط اسعار المنازل في الصين. في نفس الفتره في مصر المشكله كانت بالأساس سياسيه.


المقارنه بين مرسي و السيسي



بعد انتخاب مرسي مباشره حدث تحسن سريع للبورصه المصريه و تفوقت حتي علي الصينيه لفتره بسيطه في اكتوبر ٢٠١٢ و بعدها مباشره بدأ التراجع. ممكن نربط بدايه التراجع بتشكيل جبهه القوي المدنيه و بدايه ظهور علاقتها مع الجيش و مداولات المحكمه الدستوريه العليا حوالين حل الجمعيه الدستوريه و اشتباكات ميدان التحرير بين أنصار و معارضي مرسي قبل احداث الاتحاديه و قبل اعلان مرسي الغير دستوري .

نفهم من ده ايه؟



يتبع

تابع


نفهم من ده ايه؟

عاده البورصه مؤشر لما هو قادم. ازاي؟ اولا في البورصات العالميه المتداولين عندهم اجهزه أبحاث تتنبأ بالتطورات الاقتصاديه و السياسيه القادمه و توجه الاستثمارات بناءا علي الأبحاث دي (المصدر ). في سوق صغيره زي مصر مفيش كلام من ده. اللي بيحصل ان كبار المستثمرين بيبقوا عندهم معلومات من مصادرهم الخاصه عن اتجاه ما هو قادم او بيبقوا عاوزين يضغطوا في اتجاهات معينه. يعني اي مستثمر سعودي في مصر في اكتوبر ٢٠١٢ أكيد فهم ان حكومته مش مع مرسي و أكيد عرف ان الأوضاع مش مضبوطه. و ممكن جدا كمان يكون ده بتوجيه من حكومته. نفس الكلام لكبار رجال الاعمال في مصر اللي أكيد قاريين الاتجاهات.

استمر التراجع من اكتوبر ٢٠١٢ حتي يونيو ٢٠١٣ و بعدها مباشره بدأ صعود البورصه المصريه لحد يونيو ٢٠١٤ و هو انتخاب السيسي. بعدها بدأ الانحدار. يعني قبل الصين و قبل البورصه السعوديه و قبل اسعار البترول و كل الكلام ده.


عكس انتخاب مرسي خالص. انتخاب السيسي خلي البورصه تنزل. ليه؟ لو نفتكر ان رجال الاعمال وقتها حسوا انهم انضحك عليهم و ان كل حاجه بقت في أيد القوات المسلحة عكس ما كانوا فاكرين.



طبعا وضح انه كل حاجه الجيش بياخدها و انه مفيش مكان لاستثمارات في مصر. مفيش قانون استثمار. مفيش رؤيه للدوله في الاستثمار. مفيش اهتمام برجال الاعمال زي ما مبارك عمل. الجيش واخد كل المناقصات (اسمع ممدوح حمزه ). و بعدين مشروع تفريعه القناه سحب كل الفلوس من السوق من غير اي عوايد و من غير اي تخطيط.



السؤال احنا حنعمل ايه؟

الخصخصه



https://jawdablog.files.wordpress.co...ctor.jpg?w=670


حنحاول نفهم الخصخصه حلوه و لا وحشه. و امتي تبقي حلوه و امتي لا. حتكتشف ازاي انك مضحوك عليك و الله و ان ممكن جدا الخصخصه تبقي حاجه عظيمه جدا لكن مش بطريقه مصر


ايه هي الخصخصه و ليه؟


تعريفها ان دوله او جهه حكوميه تبيع منشأه (في الأغلب شركه) تملكها لافراد او شركات مملوكه للأفراد.

ليه حكومه تبيع حاجه تملكها او بالاصح تملكها نيابه عن الشعب؟

الأسباب الطبيعيه هي ان وجود المنشأة (في اللغه الاقتصاديه اسمها أصول) دي في أيد ملكيه خاصه حيخليها:

١- تحقق أرباح اكثر
٢- الارباح دي تروح لعدد اكبر من الشعب.

سهله قوي. يعني الهدف الأساسي هو ان الأصل الموجود (شركه مثلا) يحقق أرباح اكثر و الارباح الأكثر تروح لناس اكثر. و بالتالي الاقتصاد ينتج احسن و عوايد الانتاج ده تروح لناس اكثر فبالتالي الفقر يقل و الانتاج يزيد.

ناخد الموضوع حاجه حاجه. الانتاج الأكثر الاول و بعدين نتكلم في توزيع عوايد الانتاج و ارباحه علي عدد اكبر من الناس.

طيب هل ده ممكن؟
يعني ازاي و ليه ان مالك خاص حينتج اكثر من الحكومه ذات نفسها؟

ده طبعا بيحصل في احوال كثيره:

١- ان المالك الجديد عنده تكنولوجيا مش موجوده عند الحكومه. يعني مثلا تبيع شركه النصر للسيارات مثلا لشركه تويوتا اليابانيه او فيات الإيطاليه. دول عندهم تكنولوجيا انتاج سيارات بالروبوتات و عندهم طرق متقدمه لمعالجه الحديد مثلا. لذلك بدل ما تنتج سياره تعبانه و تبوظ علي طول حتنتج سياره فيها تكنولوجيا اعلي و تصدرها للعالم و تعمل أرباح اكثر.

مش ضروري التكنولوجيا بس تبقي تكنولوجيا انتاج. ممكن تبقي تكنولوجيا اداره.

٢- المالك الجديد عنده رأسمال

و بالتالي حيدخل استثمارات جديده و يشتري مكن جديد و بالتالي ينتج اكثر و يعمل أرباح اكثر.

٣- المالك الجديد عنده أسواق جديده

يعني مثلا مصر بتنتج بسكويت الشمعدان لكن أقصي حاجه تصدره للسعوديه و ليبيا مثلا. تيجي شركه بريطانيه و تقول انا حاشتري المصنع و افتح له أسواق في أوروبا و امريكا مثلا. أسواق جديده معناها انتاج اكثر و أرباح اكثر.

لذلك الخصخصه في حد ذاتها مش حاجه وحشه لو اللي فات ده بيحصل.

طيب ازاي نبيع الشركه لمالك خاص و الارباح تروح لناس اكثر؟


يتبع

تابع



طيب ازاي نبيع الشركه لمالك خاص و الارباح تروح لناس اكثر؟

فهمنا ان الارباح ممكن تزيد.
بس ليه المالك الجديد مش حيحط كل الارباح في جيبه و خلاص و كده الفلوس راحت علي الحكومه؟


أرجوكم. مفيش حاجه اسمها جيب الحكومه. مفيش حكومه او دوله في العالم هدفها هو الربح الا في مصر حيث للجيش و الدوله شركات خاصه هدفها الربح !!!!! الكلام ده ملوش مثيل في العالم كله. هدف الحكومات و الدول من الناحيه الاقتصاديه هو اغتناء الشعوب.

طيب قبل الخصخصه الارباح كانت بتروح للحكومه و بعد كده للشعب. بعد الخصخصه بقت تروح بس لمالك خاص. ازاي يبقي فيه توزيع احسن علي ناس اكثر؟

دي فكره قديمه جدا عن الراسماليه. و هي إقطاعيه اكثر منها رأسماليه حديثه. و كله يعتمد علي شكل و عقد البيع بين الحكومه و المالك الجديد.

مثلا. احد اهم طرق البيع هي طرح المنشأة في البورصه في شكل اسهم. في الحاله دي عدد اكبر من الناس حيتملكها و بالتالي الارباح حتروح لعدد اكبر. كمان ممكن العقد يكتب ان العمال يملكوا جزء من الشركه. و بالتالي الارباح تروح لهم. و طبعا لو الارباح تزيد و العقد ينكتب او طريقه البيع انه الارباح تتوزع علي عدد كبير من حاملي الأسهم و العمال يبقي احنا خلينا قاعده كبيره من الناس يجيلها فلوس اكثر من برنامج الخصخصه.

طرق الخصخصه و اخطاء الحكومه المصريه في البيع


بصفه عامه في اربع طرق للخصخصه (المصدر ):

١- طرح الأسهم في البورصه. يعني نقسم الشركه لأسهم و نبيع الأسهم في البورصه. و شرحنا احنا البورصه قبل كده

٢- بيع الأصل بالكامل لمالك واحد. و ده الطريق اللي اتبعته الحكومات المصريه المتتابعه و اخبرها حكومه السيسي اللي باعت بسكو مصر في غفله من الزمن.

٣- طريقه الكوبونات. و فيها تتقسم الشركه لأسهم و تتوزع الأسهم علي كل مواطني الدوله بالتساوي.

٤- الخصخصه من أسفل. و فيها يتم تشجيع الأفراد انهم يبدأوا شركات جديده تنافس حتي الشركات الحكوميه. زي مثلا انهم يعملوا شركات اتوبيس تنافس الشركه الحكوميه و بمرور الوقت تقليل حجم الشركه الحكوميه في السوق.

الحكومه المصريه دائماً بتبيع الأصل كله لمالك واحد. و ده بيعمل مشاكل كثيره جدا جدا. ايه هي؟

١- بيفتح شبهات فساد. يعني اشمعني تبيع لفلان مش علان و هكذا. و بعض شبهات الفساد دي حقيقي. و للاسف اختيار الطريق ده سببه هو الفساد.

٢- بيحجم نشاط البورصه المصريه. يعني بدل ما يبقي في تبادل للاسهم من الشركه الجديده و يزيد حجم البورصه و الشركه الجديده تقدر تاخد رأسمال جديد من البورصه في المستقبل، كل ده مبيحصلش.

نشوف دول العالم اللي خصخصت عملت ايه؟



يتبع

تابع


نشوف دول العالم اللي خصخصت عملت ايه؟



خبراء الاقتصاد دائماً يقولوا ان طريقه بيع الأسهم في البورصه مناسبه بس للدول المتقدمه او الدول المتحولة (زي مثلا تركيا او ماليزيا او البرازيل. اللي هي دول مبقتش فقيره بس برضه مش غنيه لسه). ليه؟ لان طريقه بيع الأسهم في البورصه تحتاج ان يكون عندك بورصه فيها سيوله و فيها مشتري في البورصه فاهم و يقدر يثمن شركه جديده و يتعامل معاها. و الفكره ان المشتري ده مش موجود الا في دوله متقدمه او متحوله. و زي ما شرحنا قبل كده ثقافه المتعامل في البورصه اهم عامل لنجاح البورصه. كمان مينفعش تبيع شركه تمنها مليار جنيه مثلا في بورصه أقصي حجم للبيع فيها في اي يوم خمسين مليون. طبعا حتفشل.

لكن الحقيقه الصين بالتعاون مع جولدمان ساكس (شركه استثمار ضخمه في وول ستريت) طوروا اُسلوب ممتاز جدا للخصخصه و كان اول تطبيق ليه في سنه ١٩٩٧ في تخصيص شركه تيليكوم الصين (المصدر ).

عملوا ايه؟

١- الحكومه الصينيه باعت بس جزء من شركه تيليكوم الصين. مش كل الشركه. تقريبا ٢٠٪ من الشركه باعته و احتفظت بالباقي.

٢- مكانش وقتها بورصه شنغهاي موجوده زي دلوقتي. فطرحوا ال ٢٠٪ للبيع في بورصه هونج كونج و بورصه نيويورك.

٣- قبل ما ال ٢٠٪ يتباعوا في نيويورك و هونج كونج باعوا منهم حوالي ٥٪ لشركات استراتيجيه منها جولدمان ساكس نفسها.

ايه اهميه الكلام ده؟

١- لما الحكومه الصينيه تبيع بس جزء من الشركه فهي بالتالي لسه محافظه علي الملكيه في أيد الشعب و ده بيهدي المعارضه الداخليه. كمان بيطمن المشترين الجدد ان الحكومه الصينيه لسه موجوده و يهمها نجاح الشركه.

٢- بيبيع في بورصات عالميه فيها سيوله كبيره جدا. و بالتالي مشكله ان بورصه شنغهاي مش جاهزه مبقتش حجه.

٣- مفيش غش و لا فساد. لان السهم بيروح للي بيشتري بأعلي سعر. و كل شيئ قدام الناس.

٤- بيبيع جزء من الأسهم لشركات محدده بهدف استراتيجي. يعني لما جولدمان ساكس تحط ١٠٠ مليون دولار استثمار في الشركه الجديده العالم كله حيعرف ان جولدمان ساكس مش هابله


طيب ايه الفوايد علي الصين و علي المشتري من الطريقه دي؟



يتبع

تابع



طيب ايه الفوايد علي الصين و علي المشتري من الطريقه دي؟



بالنسبه للحكومه الصينيه:

١- رأسمال جديد بيدخل لشركه حكوميه. بيع ٢٠٪ من تيليكوم الصين عمل ٤ مليار دولار. الفلوس دي بتدخل للاداره و بتعمل بيها استثمارات جديده و تتوسع و بالتالي تشغل ناس اكثر و هكذا تدور عجله الانتاج الحقيقيه.
يعني الفلوس مش بتروح في جيب الحكومه او الفساد او عشان تسد عجز الموازنه !!!!!!
٢- ما زالت تملك ٨٠٪. و تقدر تبيع بمرور الوقت اجزاء اكثر و تدخل فلوس و استثمارات اكثر.

٣- الخصخصه دي في الصين فيها نقطه مهمه جدا. الشركات الصينيه زي شركات قطاع الاعمال المصريه زمان. يعني الشركه فيها مستشفي للموظفين و دار حضانه و بتدفع معاشات كثير للموظفين علي المعاش.

طبعا مستحيل اي مستثمر حيبقي عاوز يشتري شركه اتصالات فيها مستشفي للعمال و فيها عبء معاشات جديده. فالحكومه الصينيه بتعمل ايه. بتخلي الحاجات دي كلها في ال ٨٠٪ اللي هي لسه محتفظه بملكيتها. و بتاخذ جزء من عوايد البيع في البورصه و بتحطه في صندوق للعاملين لأداره المعاشات و التأمين الصحي و خلافه.

طيب بالنسبه للمستثمر بيستفاد ايه؟

١- بيشتري جزء من اكبر شركه اتصالات في الصين. يعني اكبر سوق في العالم. و بالتالي ارباحه حتزيد.

٢- بيحط استثمار و بيجي له عايد.

٣- سعر الشركه حيزيد و بالتالي سهمها تمنه يزيد و بالتالي ممكن يبيعه في المستقبل و يعمل أرباح اكثر.

السؤال طبعا هو ليه الحكومه المصريه مش بتتعلم. و السؤال ده مش لينا. لان الحقيقه انه محدش في مصر عاوز يتعلم أساسا. و كله فاكر ان مصر حماها الله و انه أذكي شعب و اهم شعب و خلافه.


https://jawdablog.files.wordpress.co...tor2.jpg?w=670

تطبيق الكلام ده علي مصر في المستقبل:


١- مش كل الخصخصه وحشه.

٢- لما تسمع خصخصه اسأل الاول. هل في تكنولوجيا جديده حتدخل؟ هل أسواق جديده؟ هل رأسمال جديد للشركه؟
لو مفيش اي حاجه من دي يبقي اي غش.

لو الفلوس داخله لسد عجز موازنه يبقي ده اسمه اي عك.

٣- شركات القطاع العام في مصر فاشله جدا. و تحتاج تكنولوجيا و رأسمال و أسواق. و مستحيل مستثمر يدخلها و يأخذ علي عاتقه معاشات الموظفين و نواديهم و خلافه. مستحيـــــل.

لذلك حل الصين ممكن و سهل. و ممكن تطبيقه في مصر بإعطاء روابط العمال كمان جزء من الأسهم ليصبحوا ملاك في الشركه.
و بالمناسبه الحل ده ممكن تطبيقه حتي في الجرايد و المجلات و الإذاعه و التلفزيون كمان.

٤- لازم تسأل مين اللي بيعمل برنامج الخصخصه؟ هل مثلا شركه زي جولدمان ساكس؟ و لا بيتعمل تحت الرصيف؟ في غرفه مظلمه مع مستثمر خليجي؟

دا موضوع الخصخصة

ازاي نطور مصر للطيران؟

https://jawdablog.files.wordpress.co..._air.jpg?w=670

ليه طيارين مصر للطيران هددوا انهم يمشوا. و ده تهديد أجوف اكثر من اي حاجه.

طيب لو احنا عاوزين نطور مصر للطيران بجد نعمل ايه؟

مطلوب منك اولا تبص علي الشركات الناجحه حوالينا و في العالم بيعملوا ايه و خذ منهم التجارب الناجحه. عمليه سهله المفروض. لكن طبعا في مصر تصبح عمليه معقده. ليه؟


انواع شركات الطيران الناجحه في العالم


النوع الاول هو اسمه النوع المتخصص او الناقل منخفض التكلفة.


ده ناقل بيركز في خط او مجموعه خطوط محدده ضامن ان فيها ركاب كتير جدا و يقدر يملأ الطياره. و ان كلهم ركاب مش مركز في الخدمه قوي قد ما هو عاوز يدفع اقل تمن ممكن.

طالما الناقل ده ضامن انه يملأ الطياره بالتالي ممكن ياخد تمن قليل من كل راكب و بيدي خدمه محدوده. يعني ميديش اكل علي الطياره مثلا. الشركات دي زي مثلا ساوث وست في امريكا اللي بتعتمد علي الركاب اللي رايحين اورلاندو مثلا عشان يزوروا ديزني ورلد (المصدر ).

الحقيقه مصر للطيران جواها شركه خفيه من النوع منخفض التكلفة ده هو تقريبا اللي بيصرف علي الباقي كله. الشركه دي اسمها الحج و العمره و موسم عوده المصريين في الخارج.

لذلك من مصلحه مصر للطيران انها تطلع شركه جديده تركز بس في التلات حاجات دي و انها تدي اقل اسعار للحج و العمره و المدرسين في الخليج.

لكن طبعا ده معناه ان مفيش بقي رحلات للاهل علي باريس و اليابان و كوالا لمبور. و بعدين شغل موسمي. و بعدين شغل كثير. و محدش له مصلحه في كده.



النوع التاني هو شركات الهب العملاقه


زي الامارات و القطريه و التركيه او اير فرانس او بريتيش اير وايز. و دي شركات عندها طيارات ضخمه و كتيره زي البوينج ٧٧٧ او الايرباس ٣٨٠. طيارات بتاخد ٣٥٠-٥٠٠ راكب. و الشركات دي بتاخد ركاب من الهند و الصين او افريقيا يقفوا في الهب (مركز التجميع) بتاعهم في دبي او الدوحه او اسطنبول و بعدين توديهم من هناك علي أوروبا او امريكا.

الشركات دي صعب جدا دلوقتي تنافسها. انت بتتكلم عن شركات عندها ٢٠٠-٣٠٠ طياره و اكثر كل طياره تمنها ١٥٠ مليون دولار (المصدر ). و عندها هب ناجح جدا.



النوع الثالث و هو شركات الهب الصغير او الميني هب



و دي شركات زي الاثيوبيه مثلا. دي شركات لقت انها متقدرش تنافس الامارات او اير فرانس و تشتري ٢٠٠ طياره تمن كل واحده ١٥٠ او ٢٠٠ مليون دولار. و بعدين معندهاش القدره انها تاخد بنزين ببلاش زي طيران دول الخليج مثلا.

عملت ايه الاثيوبيه.



يتبع

تابع


عملت ايه الاثيوبيه.


قالت انها حتركز في افريقيا و تبقي اكبر شركه في افريقيا. و انها تمد خطوط لكل افريقيا بطيارات صغيره بوينج ٧٣٧ بتشيل حوالي ١٦٠ راكب. و بعدين تجمع الناس من افريقيا عندها في أديس أبابا. و بعدين تحطهم في طياره متوسطه الحجم زي البوينج ٧٨٧ (بتشيل ٢٥٠ تقريبا) بس استهلاكها من الوقود قليل جدا (المصدر ). و تطلع بالركاب دول اللي جايين من كل افريقيا علي أوروبا او اسيا او امريكا. و بالتالي تقدر تنافس الامارات مثلا. لان الراكب النيجيري اللي عاوز يروح امريكا او أوروبا، صعب قوي يروح لحد الامارات و بعدين يرجع يطير لامريكا.

نفس الكلام ابتدأت الطيران المغربيه تقلده (المصدر).

و طبعا الاثيوبيه حققت ١٥٠ مليون دولار أرباح في عام ٢٠١٤ (موقع الشركة ). في حين ان مصر ام الدنيا بتخسر. و ملهاش دعوه بالسياحه لان مفيش سياحه بتروح اثيوبيا طبعا.



النوع الرابع و هي الشركات الوطنيه


و دي زي مصر للطيران. و دي شركات عايشه في الماضي ايام الستينات و ام كلثوم و مصر هي ام الدنيا. شركات تعتمد علي انها تنقل مواطنيها لكل دوله في العالم. و ده كلام بقي مش ممكن في العصر ده لان المواطنين دول عندهم اختيارات و يقدر يطير يروح دبي او باريس و من هناك يروح اي حته في العالم.

و طبعا النوع ده من الشركات عنده مستشفي و مصحه و حضانه للأطفال و معاشات لا مثيل لها الخ. حاجات ملهاش علاقه باداره شركه طيران ناجحه.

طبعا صعب جدا انك تلغي الحاجات دي. لكن ممكن تعمل زي ما الصينيين عملوا انك تبيع جزء بس من الشركه مثلا ٢٠٪ و تسيب الباقي مملوك للدوله (مش زي برنامج التخصيص بتاع مصر اللي كله بيتباع). لما تبيع ٢٠٪ بيدخلك رأسمال ممكن تشتري بيه طيارات جديده و لو خليت ال ٢٠٪ دول شركه جديده بتركز في الأمور المربحه حتلاقي سعر الشركه كلها يزيد و بالتالي الدوله تعمل فلوس كمان من الموضوع و بالتالي ممكن تحط الفلوس دي في صندوق معاشات للموظفين اللي حتحتاج نستغني عنهم بالضبط زي الصينيين لما عملوا (زى ما قلنا فى المشاركات السابقة).



النوع الخامس: شركات الاسواق الضخمه:


و دول مش موجودين الا في امريكا و الصين. شركات زي دلتا و امريكان في امريكا او تشاينا سوزرن او اير تشينا في الصين.
دي شركات عملاقه عندها ٦٠٠-٧٠٠ طياره و عندها سوق ضخمه جدا جدا للنقل الجوي جوه بلادها و عندها شبكات لنقل مواطنيها لجميع أنحاء العالم. دي بقي شركات وطنيه ناجحه بس ناجحه لان ضخامه السوق و كفاءه الاداره بتخليهم يقدروا يركزوا بس في نقل مواطنيهم اللي هم كتير و كفايه عن الحاجه حتي. دي شركات لا تستطيع ان تنافسها لان وضعها في سوقها انت لا تستطيع حتي ان تقترب منه.




الحل الأفضل لمصر للطيران


لذلك افضل شيئ لمصر للطيران ان تصبح شركتين في الحقيقه.
واحده تركز في الحج و العمره و عوده المدرسين. و تبيع الدوله ٢٠٪ من هذه الشركه في سوق رأس المال و تشتري بالعوائد طائرات جديده و تستخدم النموذج الصيني في الخصخصه.

و الشركه الثانيه تقلد الاثيوبيه و تعتمد علي تجميع الركاب من افريقيا و الدول العربيه المجاورة (بالذات المنطقه الغربيه في السعوديه القريبه من مصر و ليبيا و تونس و السودان و كل افريقيا) و نقلهم لاوروبا و امريكا و شرق اسيا. و يمكن استخدام ذات اُسلوب الخصخصه الصيني مع هذه الشركه ايضا.

في سنتين ستنتقل مصر للطيران للربح و تصبح شركه قويه جدا.

انواع الاقتصاد


https://jawdablog.files.wordpress.co...pg?w=670&h=446



النهارده حنتكلم عن انواع الاقتصاد و تأثير ده علي المجتمع و السياسه كمان.

النشاط الاقتصادي في الدنيا كلها ٤ انواع:

استخراج مواد من الارض (يعني زي الزراعه و الرعي و التنجيم)،

تحويل المواد من الارض لسلع تانيه (صناعه يعني)،

و خدمات (زي مثلا حلاق الشعر و البياع و عامل السياحه و السمسار)،

و أبحاث علميه .

طيب نفهم ايه كده.

النوع الاول زي الزراعه مثلا بنقول عليه نوع اولي. يعني انت بتطلع حاجه ربنا حطها في الارض و بتاخدها من غير ما تحولها لأي حاجه تانيه. يعني مثلا بتزرع و تطلع القمح او بتصطاد سمك مثلا.

النوع الثاني بنقول عليه ثانوي لانك بتحول اللي طلع من الارض لحاجه تانيه (ثانويه او ثانيه).

النوع الثالث و هو الخدمات مفيش فيه سلعه حقيقيه بتتباع. انت بتبيع خدمه زي حلاقه الشعر مثلا.

النوع الرابع و هو الأبحاث العلميه و تطوير التكنولوجيا.

ناخد مثال. حطيت بدور قطن في الارض و طلع قطن و بعت القطن. مكسبك من بيع القطن الخام هو مكسب اولي يدخل تحت النشاط الزراعي. طيب المحلج و المنسج اخد القطن و حوله لفوط و بنطلونات. ده نشاط صناعي او ثانوي. طيب الراجل اللي واقف في عمر أفندي بيبيع الفوطه القطن ده اسمه نشاط خدمي. طيب و الشركه اللي بتطور انواع جديده من البذور عشان تزود انتاج القطن ده يبقي اسمه نشاط علمي


امثله عمليه:


يتبع

تابع



امثله عمليه:


ناخد مثال كمان حيلخبطك شويه. المهندس مثلا اللي بيركب ابراج التليفون المحمول او بيصلح التليفون المحمول في مصر، ده اسمه نشاط ايه؟ حيبقي نشاط خدمي لانه ما أخدش حاجه و حولها لحاجه تانيه. هو استورد البرج و ركبه زي ما هوه. لم تحدث عمليه تحويليه او تصنيعيه. لكن المهندس اللي في امريكا و اخترع التليفون المحمول اسمه نشاط علمي و المهندس في الصين اللي بيشرف علي تصنيع الآي فون هناك ده اسمه نشاط تصنيعي او ثانوي.

مين أكتر واحد عمل فلوس في الدوره الاقتصاديه دي كلها؟ كلهم مهندسين. واحد في امريكا اخترع. واحد في الصين صنع. و واحد في مصر ركب؟

سهله جدا.

متوسط دخل المهندس في أبل هو ١٠٠ الف دولار (المصدر ).
متوسط دخل المهندس في الصين حوالي ٧٠ الف دولار (المصدر ). متوسط دخل المهندس في مصر حوالي 17 الف جنيه(المصدر ).

واضح طبعا مين أكتر مهندس عمل فلوس. مع ان ممكن جدا ان كلهم اتعلموا نفس التعليم مثلا. لذلك دائماً نقول ان أفضل الانشطه الاقتصاديه هي: البحث العلمي ثم التصنيع ثم النشاط الخدمي.

ليه النشاط العلمي ثم الصناعي ثم الخدمي بالترتيب من حيث الدخل؟

احنا هنا في بنقول ان اهم سوْال عاوزين القراء يسألوه هو ليه.

ليه المهندس في امريكا بياخد مره و نص قد المهندس اللي بيصنع الآي فون في الصين اللي بياخد ٥ مرات قد المهندس اللي بيركب برج المحمول في مصر؟ ليه؟

المسأله ببساطه عرض و طلب.

عمليه تصميم اي فون عمليه معقده جدا. حتي لو المهندس واخد نفس التعليم الاولي في مصر او الصين او امريكا مش حيقوم داخل مصمم اي فون علي طول. ده لازم شركه أبل تعلمه و يدخل دورات و حيعمل اخطاء و يتم تصحيحها لحد ما يقدر يصمم تليفون. عمليه بتاخد سنين. ايه اللي حصل في السنين دي؟ حصل استثمار في المهندس الامريكي. بنقول عليه رأسمال انساني او هيومان كابيتال. الاستثمار ده بملايين في كل مهندس. بعد الاستثمار ده صعب جدا ان شركه أبل تسيب المهندس ده. لازم تديله مرتب مجزي و تاخد بالها منه جدا لانه صعب تعويضه الا بضياع ملايين جديده.

نفس الحكايه و ان بدرجه اقل للمهندس المشرف علي تصنيع أبل في الصين. لكن المهندس المصري اللي بيركب برج المحمول مطلوب منه بس يمشي علي التعليمات و لو مش عاجبه في ٥٠ مهندس تانيين يقدروا يعملوا نفس الوظيفه. و الموضوع لا يحتاج لا خبره و لا استثمار. و بالتالي مفيش هيومان كابيتال.

طيب واحد يقول ما الصين تحاول تاخد التكنولوجيا و تتعلم من امريكا و خلاص. و طبعا ده اللي الصين بتحاول تعمله و عشان كده امريكا بتحدد و تمنع تصدير تكنولوجيا معينه. و ده بيخلي امريكا تبان انها بتستورد كتير من الصين لكن الحقيقه انه بدون النشاط العلمي الرباعي في امريكا، الصين متقدرش تشغل مهندسين التصنيع عندها اللي بياخدوا ٧٠ الف دولار عشان يعملوا اي فون يصدروه لامريكا.

كمان نلاحظ حاجه تانيه. نشاط البحث العلمي عدد اللي بيشتغلوا فيه محدود. يعني بنتكلم عن ١٠٠-١٠٠٠ واحد عشان يعملوا التصميم. طبعا خبرات ضخمه و تكنولوجيا عاليه. لكن عدد محدود. لكن بص كده علي عشرات الآلاف في الصين اللي بيشتغلوا في تصنيع الآي فون مثلا. و ده بنقول عليه ان التصنيع بيشغل ناس كتير جدا. بينما البحث العلمي بيشغل أعداد قليله. امريكا عدد سكانها ٣٠٠ مليون. الصين عدد سكانها مليار و 4٠٠ مليون. لذلك امريكا ممكن تركز في النشاط العلمي. الصين محتاجه تركز في النشاط الصناعي عشان تقدر تشغل الناس دي كلها.

نطبق الكلام ده علي السياحه و المولات:



يتبع

تابع



نطبق الكلام ده علي السياحه و المولات:


احنا بنسمع كتير ان السياحه و الاستثمار العقاري و المولات امل مصر. الكلام ده مش مضبوط. السياحه و السمسره و البيع في المولات عمل خدمي ممكن يكون جزء مهم من النشاط الاقتصادي المصري. لكن مش صح يكون الوحيد.

تعالوا نفهم ليه.

الدوره الاقتصاديه السياحيه فيها ايه؟ فيها أعداد كبيره من عمال النظافة و الطباخين و السفرجيه و الراقصات و الراقصين و الفواعليه اللي بيبنوا المباني. كل دول الخبرات المطلوبه منهم محدوده جدا.

محدوده لدرجه انه شويه شباب و شابات من روسيا بدون تعليم حقيقي بيجوا شرم الشيخ و ياخذوا المهن دي. مفيش استثمار انساني او هيومان كابيتال. و بالتالي مرتبات الناس دي كلها محدوده جدا و لا تنمو. و بسهوله ممكن تسريحهم. سهل جدا تنزل الصعيد و تلاقي الف واحد عاوز يشتغل عامل نضافه مثلا. و الموضوع حيحتاج تدريب بالكتير أسبوع.

طبعا ده لا يقارن بعامل في مصنع بيشتغل علي مكنه انتاج. ربما يحتاج سنه عشان يتقن العمل عليها. و كل ده تدريب و استثمار في هذا العامل.

نفس الكلام مثلا في مهنه مثل سمسار العقارات او الفواعلي اللي بيبني المدن الجديده. تدريب محدود و مفيش تراكم خبرات مهم.

طبعا في السياحه في عدد محدود من المديرين و المرشدين و المروجين السياحيين اللي بياخدوا مرتبات ضخمه لان لهم خبرات مهمه. مثلا المروج السياحي في ألمانيا اللي عنده علاقات مع الشركات الالمانيه ده واحد مهم. لكن انت بتتكلم عن أعداد محدوده جدا. غير التصنيع اللي حتي العامل علي المكنه ليه اهميه و صعب الاستغناء عنه.

و طبعا فيه مالك المنشآت السياحيه و صاحب المدينه الجديده اللي اخذ الارض من الجيش ببلاش تقريبا و عمل فلوس كتير. دول طبعا اقليه قليله و عدد محدود جدا بيحققوا أرباح ضخمه نتيجه علاقاتهم مع السلطات الحاكمه.

طيب ايه المشكله في الاقتصاد الخدمي ده؟

مشكلات كتيره قوي:

١- ان العدد الأكبر من الشعب حياخد فلوس قليله جدا. في مقابل قله قليله حتعمل فلوس كبيره جدا زي الرز.

٢- ان كل العمال دول محصلش اي استثمار فيهم و لا تدريب و لا حاجه. يعني حيفضلوا علي طول زي ما هم. و احنا طبعا شايفين ان عقود من الاستثمار السياحي في مصر و في المدن الجديده و لسه بنقول الشعب مش متعلم و مش مثقف.

٣- ان العمال في الاقتصاد الخدمي دول نتيجه انهم محصلش استثمار فيهم، ممكن بسهوله الاستغناء عنهم و استبدالهم.

التالته دي هي اسوء حاجه و هي قصد مقصود. ليه؟

في أوروبا في عام ١٨٤٨ حصلت ثورات زي ثوره يناير كده هزت كل أوروبا (المصدر ). الجيوش الاوروبيه قمعت الثورات دي . لكن بمرور الوقت أوروبا كلها بقت ديمقراطيه. ليه؟ لان ده كان وقت الثوره الصناعيه. العامل الاوروبي بقي مطلوب و حصل استثمار ضخم في تطويره عشان يقدر يشغل المكن الجديد. العامل ده بقي مثقف و متعلم و ابتدا يطالب بحقوقه. ابتدا يطلب إجازات و يطلب حقه في التصويت (أوروبا مكانش يقدر يصوت فيها الا ملاك الاراضي وقتها). و لان العامل ده صعب تغييره و استبداله، كل حكومات أوروبا استجابت للعامل الصناعي ده و أديته حقوقه.

احنا بنقول ان احد اهم أهداف الاستثمار في النشاط السياحي و الخدمي في مصر حتي من نتايج ما يطلق عليه مؤتمر مستقبل مصر(المصدر ) هو توجيه النشاط الاقتصادي المصري ليصبح كله خدمي و القضاء علي الصناعه المصريه حتي لا يستطيع العامل المصري المطالبه بحقوقه لانه ببساطه سهل استبداله.


فطبعا لازم تلاقي التصور لعاصمه القاهره الجديده هي مدينه بدون مصنع واحد (المصدر ).


وهى دى أنواع الاقتصاد

الميزان التجاري بين الدول



https://jawdablog.files.wordpress.co...ng?w=670&h=305


الميزان التجاري بين بلدين هو كل بلد بتصدر للتانيه بقد ايه و بتستورد منها بقد ايه.

مثلا. ناخد مصر و روسيا و هما بلدين كانوا في الأخبار كتير الفتره اللي فاتت.

روسيا بتصدر لمصر بحوالي ٢,٥ مليار دولار في السنه (المصدر ) و مصدر بتصدر لروسيا بحوالي نص مليار دولار في السنه. معني كده ان التوازن التجاري بين مصر و روسيا هو لصالح روسيا بالفرق بين الرقمين. يعني حوالي ٢ مليار دولار. الحقيقه مصر بتستورد من العالم أكتر بكتير من صادراتها بمليارات (المصدر ).

طيب ايه المشكله في كده؟

لما بلد تستورد أكتر بكتير من صادراتها معني كده ان مصادرها من العمله الصعبه حتخلص. لان دول العالم عايزه تصدر اما بعملتها او بالدولار او باليوان او الين او اليورو. و طبعا الغالبيه بتفضل تصدر و تاخد فلوسها بالدولار او اليورو لأنهم عملتين سهل تحويلهم لأي عمله تانيه في اي مكان في العالم و مقبول الدفع بهم في اي مكان في العالم تقريبا. فاكرين لما قلنا العمله هي نفسها سلعه تباع و تشتري؟

ايه اللي يخلي بلد تصدر حاجه و تاخد مقابلها سلعه بايره؟


https://jawdablog.files.wordpress.co...ng?w=670&h=307


طيب لما بلد تقل العمله الصعبه عندها يحصل ايه؟

يحصل انها متلقيش تشتري الحاجات اللي عاوزه تستوردها. و محدش يرضي يصدر لها. او يصدر لها و يطلب شروط كتيره. يعني يقول مثلا انا حاصدر لك و اخد فلوسي جنيه مصري من بتاعك بس مقابل كده انا حازود السعر مثلا ٣٠٪ لان الجنيه بتاعك ده مش مضمون و سعره بيقل و انا مبعرفش اصرفه. و بالتالي تضطر مصر انها تطبع جنيهات زياده عشان تلبي احتياج الاستيراد ده. فيقوم التضخم يزيد و سعر العمله يقل اكثر. فيقوم المصدر الأجنبي يزود السعر اكثر. فتحصل دوامه سيئه جدا للاقتصاد. و ده حصل لمصر في السبعينات و كان اسمه الاستيراد بدون تحويل عمله.

طيب واحد يسأل ليه طيب ليه مصر مش بتقع طالما بتستورد أكتر بكتير من صادراتها.

الاجابه ٣ حاجات. قناه السويس و السياحه و ربما أكتر اهميه تحويلات المصريين في الخارج. تحويلات المصريين في الخارج اكثر من السياحه و قناه السويس. و مع ذلك الكل مطنش عليهم (لاحظ التحويلات دي انخفضت ( المصدر ). دول بيدخلوا عمله صعبه بتعوض انعدام التوازن في الميزان التجاري.

طبعا السياحه واقعه و تحويلات المصريين في الخارج قلت . و ده اللي خلي الدولة تدور علي عشره من هنا و عشره من هناك.

لما بندخل السياحه و التحويلات و كل حاجه ملهاش علاقه بالاستيراد و التصدير يطلع لنا رقم جديد اسمه ميزان المدفوعات بدل الميزان التجاري.


يعني الميزان التجاري هو صادرات و واردات بس. ميزان المدفوعات هو كل مصادر العملات الصعبه اللي داخله و خارجه من البلد.


الضحك الإعلامي علي الدقون:


يتبع

تابع


الضحك الإعلامي علي الدقون:


في حاله مصر و روسيا الميزان التجاري لصالح روسيا بمقدار ٢ مليار دولار. لكن ميزان المدفوعات بين البلدين متساو و تقريبا صفر لان بيجي مصر حوالي ٣ مليون سايح روسي في السنه بيصرف كل واحد منهم حوالي ٦٠٠ دولار علي الاكل و الاقامه و الطيران و ده رقم منخفض جدا لأنهم بيقعدوا أسبوعين تقريبا .

لما واحد بقي يجي و يقول زي ما الصحافه المصريه قالت انه روسيا و مصر حيعملوا التبادل التجاري بينهم بالروبل و الجنيه المصري، يبقي ده اسمه اي كلام (المصدر ). ليه؟

لان معني كده ان كل سنه روسيا حتجمع من مصر ٢ مليار دولار بالجنيه المصري. يعني حوالي ١٤ مليار جنيه. في ٥ سنين حيبقوا ٧٠ مليار جنيه. روسيا حتعمل ايه بالجنيهات المصريه دي؟ اما انها تبيعهم في السوق العالمي تجيب دولارات يعني سعر الجنيه المصري حينزل في العالم. او انها تحطهم في البنوك في مصر و تطلب فايده عليهم! يعني مصر حتدفع لروسيا فايده. و طبعا الفايده علي الجنيه المصري ١٠٪ او اكثر. يعني مصدر دخل مش بطال لروسيا!


في حل كمان روسيا ممكن تعمله. انها تدي الجنيهات اللي معاها للسياح الروس اللي جايين مصر. كلام حلو علي الورق. ازاي ممكن تطبق ده؟ ان كل سايح رايح مصر يروح الاول وزاره روسيه يديها روبلات تديله جنيه. و. بعدين يدفع في روسيا للشركه السياحيه بالجنيه لان كل الدفع بيبقي عاده في روسيا. و الشركه السياحيه الروسيه تاخد الجنيهات دي و تديها للشركه المصريه. علي بال كل ده ما يحصل يكون الجنيه المصري نزل في السوق. يعني وقفت علي الشركه المصريه بالخسارة. و طبعا تكاليف الموظفين الروس اللي حيلموا الروبلات و يدوا جنيهات كل التكاليف دي حتدفعها مصر.

فطبعا كلام غير عملي و هدفه هو الضحك علي الناس!

اخيرا حيسأل واحد يقول طيب ما امريكا بتستورد من الصين اكثر بكثير من اللي بتصدره. ليه امريكا مش في مشكلتنا؟

لازم تفهم ان امريكا بتستورد من الصين معظمها حاجات الشركات الأمريكيه بتنتجها في الصين لان العماله في الصين أرخص. يعني الربح من التصدير ده بتعمله شركات امريكيه (المصدر ) و بتحتفظ هي بالمعرفه اللي بنقول عليها نو هاو. مش بس كده. الصين بتاخد أرباح كمان طبعا و بتاخدها بالدولار. اللي هو عمله امريكا. فتقوم الصين واخده الدولارات دي و حاطاها استثمارات في السوق الامريكي. ليه؟ لان مفيش سوق تانيه في العالم بحجم السوق الامريكي تقدر تستوعب الدولارات دي كلها. و مفيش بلد فيها أفكار للاستثمار بكفاءه الأفكار الأمريكيه. لذلك دائماً نقول العلاقه بين الاقتصادين الامريكي و الصيني علاقه عضويه صعب تحويلها لعداء.

لذلك لا حل امام بلد مثل مصر الا الانتاج. انتاج غذائنا و دوائنا و سلاحنا، او بعضه حتي. لا حل الا بالتصنيع و الانتاج. لا يوجد حل سحري.