|
منظر غير عاطفى..!!!!
السلام عليكم ورحمة الله وبركاته يارب تكونوا بخير وفى احسن حال مرة كنت راكبة الميكروباص وكنت قاعده جمب الشباك(اصلى بحب اقعد جمب الشباك:d) والميكروباص كان واقف وبعدين ببص من الشباك لقيت منظر:o واحد وواحدة مخطوبين هتقولولى عرفتى ازاى مش محتاجة ذكاء (كانوا لابسين دبل فى ايدهم اليمين:d) كانوا وافقين يتكلموا ويضحكوا ماشاء الله بصراحة صوتها كان اعلى من صوته لا واللى يغيظ انه كان مبسوط وبيضحك عادى:angry2: والناس فى الشارع حواليهم لا وكمان وهو ماشى لازم يسلم عليها طبعا السلام دا بياخد تقريبا خمس دقايق:bosyht9: فجأة لقيتها بتجرى وراه وتضربه على ضهره :d يانهار كروهات:o وهو بيضحك برده انا مش فاهمة دا راجل يعنى ولا ايه؟؟!!! طبعا استغربت منهم الاتنين:006et4: منها هى وتصرفاتها اللى لاتنم عن اى اخلاق عندها ومن الاستاذ اللى كان فرحان وهى صوتها اعلى من صوته وبتضربه فى الشارع طبعا دا مش المنظر الوحيد اللى شفته فيه اشكال والوان وبيكونوا ماشيين او قاعدين فى اماكن عامة فى وضع لا يليق (مناظر تكسف:() وبيكونوا مخطوبين انا ليه مركزة على مخطوبين دى لاننا طول عمرنا احنا البنات فيه جملة كدا تقريبا حفظناها:bosyht9: ان الشاب بيصاحب وبيمشى مع بنات ولما بيرتبط بيختار البنت المحترمة ياترى ايه هو مقياس الاحترام اليومين دول؟؟؟ ياترى ايه الفرق بين المخطوبين دول وبين اى اتنين ماشيين مع بعض؟؟ ان اهلهم عارفين:blush: طيب انا شايفة ان دا انيل ايه اهلهم دول اللى يسمحوا بكدا يعنى هما واثقين فى الشاب دا وفى بنتهم لدرجة انهم يخرجوا فى الخطوبة وبدون اى ارتباط شرعى طيب الشاب اللى بيخرج دا مع خطيبته وبيتصرفوا تصرفات مش لذيذة هو بيخاف عليها بجد؟؟ هو شايف ان هى دى اللى هتحافظ عليه وعلى اولاده؟؟ انا اعرف ان اللى بيخطب دا بيبقى بيخاف على خطيبته من عيون الناس حتى من نفسه ومش يحب يخليها ملفتة للانظار باى شكل ولا انا اللى قديمة والاحوال اتغيرت؟؟ .... كمان فيه حاجة بتغظنى جدا:angry2: احيانا بشوف شباب بيخطب البنت علشان يتمنظر بيها قدام الناس;) وتلاقى عروسة مولد ماشية جمبه:d بالميك اب اللى على وشها (على فكرة بقا شكلها بيبقا مش لذيذ خالص:bosyht9:) والله فيه بنات بيكون شكلها برئ جدا وبالميك اب دا بيضيع براءتهم وجمالهم ولا اللبس ياعينى لابسة ومش لابسة فى نفس الوقت وهو بسلامته ماشيلى فرحان اوى ورافع راسه فى السما:022yb4: وماشيين مشبكين ايدهم فى ايد بعض شئ غريب:bosyht9: انا عايزة اعرف فين الحياء؟؟؟؟؟ يعنى انهم مخطوبين دا يعطى ليهم الحق انهم يتصرفوا كدا والله حتى لو متزوجين مش من حقهم يعملوا كدا خلاص يعنى الحب مش مولع اوى علشان يوروه للناس المفروض يبقا فيه حياء من ربنا ومن نفسهم كمان اعتذر عالاطالة |
أهلا يا حبيبه عودنــــــــا مع حبيبه والمواضيع الجميله اولاً موضوع جميل أوى وحلوته فى لفته السلسه اللى احنا بنعشها فى الشارع بجد تعرفى الواحد المفروض يفرق بين المخطوبين والعادين يعنى ازاى ؟ من طريقه الكلام واللبس والمشيه والحاجات دى علشان زى ما انتى قولتى المفروض انه بيخاف عليها لانه بيحبها والكلمه اللى احنا عارفنها ان اللى بيشمى مع وحده استحاله يخطبها ولو حصل وخطبها بتبقى حاله نادره ولاسباب خاصه ، الفكره انى بقيت اشوف حاجه غريبه اوى ، واحد عايز يمشى مع واحده وهى مش راضيه يقوم يخطبها وبعدها يمشوا بقى ويعملوا كل اللى فى نفسهم وطبعا هى بتكون فاكره انها كبيره فى نظره وكمان هو بيحبها علشان خطبها وفجأه يسبها ويروح لحد تانى ، هو ده الشاب المصرى وهى دى أحدث طريقه ، هو لو واحد بيحب واحده وعايزها تكون مراته وام عياله يخليها تتكلم فى الشارع بصوت عالى اوى كده ، دى لما ترفع صوتها بالقلم على طوووووول ، ولبسها لازم يكون محترم علشان الناس تقول له انت عرفت تتختار واحده محترمه ، غير كده يبقى تسالي مش أكتر ، والمشكله ان الواحد بقى مش عارف يفرق بينهم ، جارتى اتخطبت لواحد طلب منها تقلع الطرحه ويرحوا يقعدوا فى مطروح اسبوع لوحدهم { ده كده عايز واحده محترمه تكون مثل مشرف للزوجه وتكون ام لاولاده } ؟ لا طبعا ، بجد بقت حاجه وحشه ، والوحش أكتر بقى لما تمشى فى الشارع وتلاقى البنات والشباب بيعموا حاجات وكأنهم قعدين فى البيت مش الشارع بجد بقت حاجه تقرف . موضوعك جميل اوى يا حبيبه ، حمدلله على السلامه ، معلش طولت عليكى تحياتى,,,,, |
|
اقتباس:
بالظبط يازوزا المقاييس اتغيرت تماما يعنى تبقى مش عارفه دلوقتى الشاب بيختار البنت على اساس ايه؟؟ شكلها ولا اخلاقها ولا اهلها وحكاية ان اللى بيمشى مع بنت دى مش بيخطبها اتغيرت دلوقتى .. بتغظنى جدا الحكاية دى البنت مش ترضى تكلمه قبل الخطوبة وبعد الخطوبة بيعملوا كل اللى نفسهم فيه بجد شئ مستفز جدا اصلا الخطوبة دى مش ارتباط شرعى ... وبالنسبة لشباب اللى بيطلبوا من البنات انهم يخلعوا الحجاب فى الفرح بجد انا بستحقرهم وكذلك بستحقر البنت اللى ترضى بكدا لان واضح جدا سبب طلبه دا عايزها تبقى فرجة للناس ويتمنظر بيها اصلا اللى زى دا لا عنده نخوة ولا ذرة اخلاق مرسى لمرورك الجميل زوزا نورتينى |
موضوع تحفة بجد بيعالج قضية منتشرة بشكل فظيع فى كل مجتمعنا المصرى ربنا يبارك فيكى ويهدينا جميعا
|
معلومه هامه يا حبيبه عشان مش تتصدمى
فى شباب من مواصفات البنات الى يخطبوها مش محجبه او محجبه حجاب شيك و انا اعرف ناس كتير كدا و منهم قرايبى للاسف يعنى واحد قريبى كل مواصقات انها تكون مش محجبه و لما لقى انه صعب طلب محجبه شيك |
موضوع راااااااااائع ومهم
|
و الله يا حبيبة .. انا عن نفسى .. لو ماشى مع مين فى الشارع .. لو امى نفسها و مجرد سمعت صوت .. بيركبنى ميت عفريت .. انا من النوع اللى (( معقد )) ايوه معقد .. و اظن المفروض الراجل فى الحالات دى يكون معقد .. يعنى مينفعش البنت صوتها يعلى (( صوت المرأة عورة )) .. و مينفعش تهزر مع خطيبها فى الشارع .. هى مهما راحت انثى .. و معنى انثى كبير .. لكن من خصائصها الحياء ...
- مننساش ان جنون المرأة يعتبر 90% من جمالها .. و انا اعشق جنون المرأة .. بس الجنون ده فى البيت بس ^^ - بخصوص المكياج .. انا كنت هخطب واحدة يعنى كنا ناويين و كنا خارجين مع عائلتها و عائلتى و يوم عائلى كبير بقى .. لقيتها جاية بمكياج و منزلة قصة من الطرحة !.. و الله و ما ليكى عليا حلفان .. رجعتها هى و اهلها البيت و شتمتها .. و بعديها بشهرين .. مكملناش مع بع .. لان انا مخطبش واحدة .. تنزل من مقامى الارض قدام اهلى .. ميمنعش انها لازم تكون جميلة .. بس تكون جميلة بطريقة معقولة من غير مكياج .. ده تلخيص لكل اللى انا عايز اقوله ! |
ابــــداااااااااااع ... تسلم ايد حضرتك :d
................. |
الحمد لله لسه فيه رجاله فى البلد
|
لانتحرم من مواضيعك الهادفه
وفعلا ضاع الحياء اختى...................... |
اقتباس:
وجزاك مثله شكرا لحضرتك عالمرور الجميل نورت |
اقتباس:
ويبارك فيكى حبيبتى اشكرك عالمرور الجميل نورتى سومة |
[center]يقول (الرافعى ) رحمه الله من كتابه وحى القلم
" فإني لجالسٌ ذات يوم وقد أقبلتُ على شأني من الكتابة، وبإزائي فتى رَيِّق الشباب ، في العمر الذي ترى فيه الأعين بالحماسة والعاطفة ، أكثر مما ترى بالعقل والبصيرة ، ناعمٌ أملدٌ تمَّ شبابه ولم تتم قوته ، كأنما نكصت الرجولة عنه إذ وافته فلم تجده رجلاً ... أو تلك هي شيمة أهل الظَّرف والقصف من شبان اليوم : ترى الواحد منهم فتعرف النضج في ثيابه أكثر مما تعرفه في جسمه ، و تأبى الطبيعة عليه أن يكون أنثى فيجاهد ليكون ضربًا من الأنثى " |
اقتباس:
امجد انت بتتكلم بجد؟ انت كنت حتخطب ؟ انت عندك كام سنه ؟ 19 سنه!!!!! يعنى سورى برضه لسه صغير مش عارف مسؤلياتك ووجوابتك وانت دلوقتى حتقولى اخطبها احسن ما امشى معاها صح؟ تفتكر لما حد يجى يسال الينت دى خطيبك شغال فين ترد تقول ايه؟ ترد تقول خطيب لسه فى 3 ثانوى ولا انت كنت اصغر من كده؟ بصراحه انا مش مقتنعه ان اهلها يوفقوا بطالب لسه فى المدرسه يخطب بنتهم وازاى بابك ومامتك يوفقوا يعملوا حاجه زى دى وازاى انت تسمح لنفسك انك تشغل نفسك بـ حب وخطوبه وجواز وكلام من ده ممكن اكون انا وانت وهو وهى وكلنا ساعات بنفكر فى الكلام ده بس مش بيكون شغلنا الشغال بيكون فتره معينه وصغيره وخلاص لكن لما تكون خاطب بيكون ده شغلك الشغال عموما ربنا معاك ويوفقك . |
| جميع الأوقات بتوقيت GMT +2. الساعة الآن 07:41 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.