كل ما تحب ان تعرفه عن ((كلية السياحة والفنادق))
 

التعريف بالكلية: هى كلية تدخل دراستها فى مجالات السياحة والفنادق و الارشاد السياحى .


أقسام الكلية: 1- الدراسات سياحية
2- الدراسات فندقية
3- الارشاد سياحى


شروط قبول الطالب بالكلية:1- ان يجتاز اختبار القدرات التى تعلن عنها الكلية بعد ظهور نتيجة التنسيق وترشيحة للكلية .

2-أن يكون الطالب حاصل على مجموع 70% (35 من 50 ) على الأقل فى اللغة الأجنبية الأولى .


3-يجوز قبول خريجى المدارس و المعاهد الفنية للسياحة والفنادق الذين يرغبون فى مواصلة دراستهم بكلية السياحة والفنادق بنسبة لا تزيد عن 10% من إجمالى عدد الطلاب المقبولين من حملة الثانوية العامة والمرشحين من قبل مكتب التنسيق فى نفس العام
ويشترط إجتيازهم إختبارات القدرات قبل التقدم لمكتب التنسيق مع مراعاة أن يكون الطالب حاصلاً فى الدبلوم المتخصص على مجموع 75% على الأقل، كما يشترط إجتياز الطالب إمتحان فى اللغات الأجنبية التى تعقدها الكلية حيث إن إجادة اللغات الأجنبية تعد شرطاً عاماً للقبول بالكلية .


نظام الدراسة:1- مدة الدراسة لنيل درجة البكالوريوس أربعة سنوات مقسمة إلى ثمانية فصول دراسية على أن تكون نتيجة السنة الدراسية وحدة واحدة تعلن فى نهاية العام.
2- يعتبر الطالب ناجحاً إذا حصل على 50% من مجموع درجات كل امتحان.
الطالب الذى يرسب فى أكثر من مقررين يبقى للإعادة .
3- فى بعض الجامعات زى جامعة الحلوان والمنصورة يكون التحصص فى القسم من السنة الاولى .

وفى البعض الاخر زى جامعة اسكندرية يكون التخصص فى القسم من السنة التانية على حسب تقديرات المواد .

مجموع الكلية: طبعا التنسيق بيختلف كل سنة ولكن كلية السياحة والفنادق عامة بتاخد :

- فى الادبى بتاخد من 86% لــ 90% تقريبا وممكن تزيد او تقل عن كدة حسب التنسيق .

- فى العلمى بتاخد من 88% لــ 91% تقريبا .
وممكن ترجعوا لموقع التنسيق عشان تتأكدوا اكتر .


نبذة عن الاقسام:1-الدراسات السياحية: هو قسم يقوم بدراسة علم السياحة و اعمال شركات السياحة وشركات الطيران وكل شىء يخص السياحة بجميع انواعها.


2-الدراسات الفندقية: تقوم الدراسة فيه على ثلاثة اشياء وهم :

الأول: إدارة الفنادق ويقوم الطلاب بتعلم كيفية إدارة المنتجعات السياحية - الأغذية والمشروبات - خدمة الغرف - المكاتب الأمامية.


ثانياً: الأغذية والمشروبات f&b يقوم الطلاب بدراسة قوائم الطعان وتقيمها - مراقبة الأغذية والمشروبات - كيفية الطهو الفندقى وأسسه.


ثالثاً: التسويق يقوم الطلاب بدراسة الإقتصاديات التسويقية لمختلفة المنشآت السياحية - عمل دراسة جدوى لإنشاء مشروع سياحى - دراسة النواجى المالية لإدارة المشاريع السياحية.


3-الارشاد السياحى:- تقوم الدراسة فى هذا القسم بتعريف الطلبة بجميع الحضارات المختلفة التى عاصرتها مصر كالحضارة الفرعونية والاسلامية .

- يقوم القسم بتعليم الطالب اللغة المصرية القديمة وطريقة كتابتها ومدى أهميتها فى شرح المعالم المصرية القديمة.

- يقوم القسم بإعداد رحلات دراسية تعليمية للطلبة لزيارة المواقع الأثرية المختلفة فى كافة أنحاء مصر (أسوان – الأقصر – القاهرة - ...) وتعليم الطلاب كيفية التعامل مع السائحين المصريين والأجانب كمرشدين سياحين وكيفية التواصل معهم فى الواقع العملى.

- ملحوظة : فى قسم الدراسات السياحية وقسم الدراسات الفندقية يتم تدريس لغتين طوال الاربع سنين يختارهم الطالب من بينهم اللغة الانجليزية اما فى قسم الارشاد السياحى فأغلب المواد باللغة الانجليزية بالاضافة الى اللغتين .

واضيف كمان ان اللغتين مبيدرسوش بعمق جامد اوى زى الكليات المتخصصة فى اللغات (زى كلية الالسن مثلا) ولكنها بتدرس اللغات كمقررات فرعية بجانب مقررات القسم اللى بتختاره وكمان انت لازم تعمق لغتك عن طريق الكورسات او اى حاجة تانية بقدر الامكان لانك لازم تتخرج من الكلية دى وانت معاك على الاقل انجلش .

التدريب الصيفى: - يقوم طلاب الكلية بالتدريب فى الصيف فى احدى شركات او مكاتب السياحة أو وكالات السفر او شركات الطيران بالنسبة لطلبة قسم الدراسات السياحية .

- وفى الفنادق او المطاعم او القرى السياحية بالنسبة لطلبة قسم الدراسات الفندقية .

- وزيارة الاماكن السياحية و الاثار المصرية والفرعونية بالنسبة لطلبة قسم الارشاد السياحى .

وعلى فكرة التدريب ده يعتبر فى كلية السياحة والفنادق مادة نجاح ورسوب ولكنها لا تضاف الى المجموع الكلى
عشان كده لازم تهتموا بالتدريب ده كويس وكمان بيديك خبرة عشان فرصتك فى التوظيف تكون اكتر لان معظم سوق العمل فى السياحة بيطلب الخبرة السابقة .

الجامعات التى تدخل فيها الكلية:- جامعة الاسكندرية - جامعة المنصورة - جامعة حلوان - جامعة المنيا - جامعة الفيوم - جامعة قناة السويس فرع الاسماعيلية - جامعة المنوفية (مدينة السادات) - جامعة جنوب الوادى فرع الاقصر .


مجالات عمل الخريجين: 1- خريجى قسم الدراسات السياحية: تتضمن : 1- شركات السياحة:
- قسم "Operation" تنفيذ البرامج السياحية.
- قسم السياحة الداخلية – قسم السياحة الدينية (الحج والعمرة).
- قسم السياحة الخارجية – قسم الحجز (برى– بحرى – طيران).
- قسم الطيران بالشركة او حجز تذاكر الطيران

2- شركات الطيران:
- حجز تذاكر الطيران.

3- في المطارات:
- الضيافة الجوية .


ويمكن ان يعملوا كمرشدين سياحيين اذا حصلوا على دبلومة ارشاد سياحى لمدة سنتين وممكن تبقى سنة واحدة زى دبلومة الارشاد اللى فى كلية سياحة وفنادق المنصورة
وعلى فكرة الدبلومة دى صعب ان حد ياخدها وكمان الحصول على رخصة الارشاد مش مضمونة اوى يعنى .


2- خريجى قسم الدراسات الفندقية: مطلوبين بشدة فى مصر و الدول العربية و بيترقوا بسرعة و مرتباتهم حلوة برضو و كل ما تثبت نفسك فى الفندق اللى انت بتشتغل فية بيعلى مرتبك وتحصل على منصب اكبر .
وعشان تتوظف بسرعة وبمرتب اكبر يفضل اللى معاهم خبرة سابقة ولغات وياريت تاخد الخبرات دى من وانت فى الكلية او فى التدريب الصيفى .


3- خريجى قسم الارشاد السياحى: بيشتغلوا مرشدين سياحين و ممكن يشتغلوا مدرسين فى اى لغة وخريجى هذا القسم بياخدوا رخصة الارشاد فور تخرجهم من الكلية وعلى فكرة الرخصة دى هى الاثبات الوحيد للمرشد السياحى انه مقيد فى نقابة المرشدين السياحيين .
اما بالنسبة لمرتباتهم فتبقى حسب اللغات اللى معاك وكل ما يبقى معاك لغة نادرة زى اليابانى او الصينى بتاخد فلوس اكتر وعالعموم مرتب المرشد السياحى بيتراوح ما بين (3000 الى 6000 جنية او اكتر ) وممكن تقل عن كدة لو معاكش لغة نادرة .

دبلوم الدراسات العليا : يمنح مجلس الجامعة بناء على إقتراح مجلس الكلية درجة دبلوم الدراسات العليا فى إحدى التخصصات الآتية:
1- السياحة
2- الفندقة
3- الإرشاد السياحى

شروط القيد بدبلوم الدراسات العليا : 1- أن يكون حاصلاً على مؤهل عال من إحدى جامعات جمهورية مصر العربية أو درجة معادلة من معهد عال معترف به.
2- يفضل من يعملون فى مجال السياحة والفندقة.
3- أن يجتاز بنجاح الإختبارات المقررة التى يقررها مجلس الكلية للتأكد من صلاحيته للدراسة.
4- مدة الدراسة لنيل أى دبلوم دراسات عليا سنتان جامعيتان فى أغلب الجامعات المصرية وقد تكون سنة واحدة فى جامعات اخرى
5- تقدم الطلبات في الموعد المحدد من كل عام.
__________________________________

ارجو انكم تكونوا عرفتوا كل حاجة عن الكلية .

اه يا جماعة الموضوع معجبكوش ولا اية ؟؟؟؟؟

لا والله الموضوع جامد جدا وانا فى سياحه انجلش حلوان
بصراحه الكليه حلوة اوى بس انا اتخنقت منها ومش طايقاها والله
معرفش حد فيها خالص وكمان مش هاهمه حاجه خالص من اللى بيتقال عشان كدة اتخنقت وبفكر احول منها

معقووووول هتحولى عشان مش عارفة حد فى الكلية ومش فاهمة من اللى بيتقال انتى اه اللى خلاكى تخشى انجلش اساسا مانا كنت عربى فى سنة اولى وجبت جيد جدا , هو الانجلش هيعملك اه يعنى ؟؟؟
و مادام بتقولى الكلية حلوة عايزة تحولى منها لية بقى ؟؟؟

مشكووووووووووووووور جدا جدا

العفوووووووووو

تسلم يا اسلام
انا لسه فى السنه الاولى
وان شاء الله هاختار قسم درسات سياحيه لسنه الجايه

ربنا يوفقك يا شريف وفعلا قسم دراسات سياحية قسم مميز لانة بيجمع بين التلات اقسام

الموضوع جامد اوي شكرااااااا
انا لسه اولي ربنا يسطر

موضوع اكثــــــــــــــر من رائـــــــــــــع

اشكرك الموضوع مفيـــد جدا بجد
اكثـر من رائع بالفعل

انا عاو اعرف اذا كان قسم الارشاد السياحى يدرس بالانجليزية فى جميع الجامعات وخاصة الفيوم ام لا وارجو الرد سريعا ؟

[quote=mohamed franchy;1318395]انا عاو اعرف اذا كان قسم الارشاد السياحى يدرس بالانجليزية فى جميع الجامعات وخاصة الفيوم ام لا وارجو الرد سريعا ؟[/quot السلام عليكم ازيكم عاملين ايه ؟؟ اللى انا عارفاه سياحه وفنادق جامعه حلوان عشان انا فيها فسم ارشاد بعض المواد بالانجلش مش كلها مثلا زى التاريخ بس مش عارفه النطام ايه فى جامعه الفيوم

قسم الارشاد السياحى الدراسة فية باللغة الانجليزية بالاضافة الى اللغات .

واكيد فى جامعة الفيوم الدراسة بالانجليزى فى قسم الارشاد

هو ممكن ادخل الكلية دى من علمى رياضة

يعنى مش درست تاريخ

اه طبعا ممكن تخش سياحة فنادق من علمى رياضة ومن علمى علوم كمان بس بشرط تجيب اعلى من 35 من 50 فى الانجليزى وتجيب مجموع الكلية فى التنسيق .

بس انا اللى اعرفه ان السياحة والفنادق فى العلمى بتاخد من مجموع عالى فى اواخر التمانينات واوائل التسعينات

ربنا يوفقك وتخش كلية سياحة

بس انا للاسف مش عارف حاجات كتير عن قبول حملة دبلوم السياحة والفنادق , بس هما بيدخلوا عادى كلية سياحة بس بأعداد محددة كل سنة مش عارف بقى السنة دى هتبقى قد ايه ؟

طيب هى بتاخد من كااااااااااااااااااااام؟

كلية السياحة والفنادق فى الادبى عمرها ما قلت عن 86% الا سنة 2005 خدت من 85.5%
اما فى العلمى فهى من 88% فيما فوق تقريبا .
بص عشان انا مش متاكد خد موقع التنسيق اهو : http://www.tansik.egypt.gov.eg وشوف الكلية خدت من كام السنين اللى فاتت فى العلمى والادبى

(( شكرا ليك يا مان على الموضوع الجامد ده بس انا عندى استفسار ضروروى جدا انا كنت السنه اللى فاتت فى تجاه انجليزى وحصلت ليا ظروف مدخلتش الامتحانات خالص فى الترمين وعايز احول كليه سياحه وفنادق المنصوره السنه دى ومجموعى هو 91.5 % ودرجتى بالانجليزى 46 ياتى ينفع ولا لا وايه المطلوب منى ولو ينفع اكلم الكليه ممكن تدينى النمره ؟

معلش الاسئله كتير بس انا بجد كانت حصلتلى ظروف السنه اللى فاتت :blush: ومستنى ردك يا مان علشان اعرف ان كان فى اوراق هسحبها دلوقتى ولا لا ؟ ))

ومشكور يا مان

انت مجموعك ودرجتك فى الانجليزى يعدوا اساسا شروط القبول بالكلية ما شاء الله يعنى .

ولما تحول لسياحة وفنادق المنصورة احتمال يعملوك انترفيو مع الطلبة الجديدة وهو سهل جدا .

اما بالنسبة للتنسيق فانت هتخش كلية سياحة وفنادق حسب مجموع الكلية السنة اللى انت خلصت فيها الثانوية .

وعشان تعرف معلومات اكتر ادخل هنا :
http://www.mans.edu.eg/facth/arabic/Default.HTM

واتصل بالكلية من هنا : http://www.mans.edu.eg/facth/arabic/CallUs.htm

على فكرة يا حماعة انا عايز اقول حاجة اللى ناوى يتخرج من الكلية دى ومش جامد فى اللغة وخاصة الانجلش يبقى احسن له ميدخلهاش وخصوصا قسم السياحة والارشاد لانة لازم تتخرج منهم وانت معالك لغة وخصوصا انجلش

انا لسه ادعيلى ادخلها وهى فى دماغى من زمان

انا مخلص 3 ثانوى وياريت يا اسلام تدينى اميلك ااتواصل معاك اكتر عشان مش عارف حاجة

يا mixway انا مش هعرف اقولك حاجة اكتر من اللى قولته فى الموضوع ولو عايز اى استفسار انا موجود , لان ايميلى مش هعرف اكتبهولك على المنتدى كده , وانت فعلا لو حابب مجال الكلية هتمشى فيها مية مية .

ويا hamadagoal عايز اقولك حاجة الاختبار سهل جدا بس للمذاكر انجليزى ومعلوماته ولو حتى محدوده عن الاماكن السياحية وكده وانا الصراحة مش هعرف اقولك انت ممكن تخش كلية سياحة ولا لأ ؟؟ لان دى بتبقى حاجة خاصة بالكلية وبياخدوا عدد معين كل سنة وانت مجموعك حلو مش وحش وبتقول بتفهم انجليزى يعنى جمد قلبك وروح كلية السياحة اللى فى بلدك واستفسر منهم هناك على نظامك هيبقى اه ؟؟

هما يمكن بيشدوا شوية على خريجى المعاهد السياحية والدبلومات فى اختبار اللغات وده حسب اللى سمعته , يعنى ذاكر شوية جمل او كلمات او اجابات ليها علاقة بالسياحة والاسئلة اللى قولتلك عليها وممكن يسألك اسئلة تانية ودى ترجع بالدكتور نفسه اللى هيسألك .

وطبعا انت لازم تروح كلية السياحة والفنادق اللى عندك , انت بتقول المطرية يعنى جامعة حلوان , للاسف انا بسمع هناك الاختبارات بتبقى صعبة شوية عشان كده ابقى ذاكر انجليزى على قد ما تقدر قصدى يعنى الاسلة العامة عن نفسك وهواياتك ودخلت الكلية ليه وحاجات تانية معلومات كده يعنى انت بتعدى فيه بخبرتك السابقة فى الانجليزى , بعنى انا روحت الاختبار وانا معتمد على الانجليزى بتاع الثانوية العامة وحفظت شوية اسئلة كده وخلاص .

بس هو اختبار معظم الناس بتعدى فيه .

وابقى اتصل بالكلية وشوف اه النظام ؟؟

واخر حاجة اقولهالك لازم تكون واثق فى نفسك .

طب يا اسلام انا لسة مرحتش الانترفيو ده عشان انا مكنتش اعرف

وانا مجموعي ممكن يدخلني

ده ممكن يسببلي مشكلة؟

يا جماعة متخافوش الانترفيو او الاختبار بعد الترشيح للكلية وهما هيدوكوا معاد تروحوا فيه الانترفيو بس ابقوا روحوا قدموا للكلية علطول بعد نتيجة التنسيق عشان تعرف معاد الانترفيو .

السنة اللى فاتت الانترفيو فى سياحة وفنادق المنصورة كان فى شهر 8 متقلقوش

السلام عليكم
انا بجد يا جماعة محتارة جدا ومش عارفة اعمل اية
انا لسة مخلصة ثانوى وكنت عاوزة ادخل كلية اللسن بس لاسف مجموعى مش مساعد على كدة ومش قدامى غير كلية التربية وكلية السياحة والفنادق بس انا بكرة التربية ومش عاوزة ادخلها ولا ادخل اى كلية من التجارة او الاداب او الحقوق لانى بجد الكليات دى كنت مستبعداها خالص خصوصا انى كنت علمى وكنت متفوقة جدا بس حصلت مشاكل وكدة المهم مش عاوزة اطول انا بس عاوزة اعرف اذا كانت الكلية دى ليها مستقبل ولا لايعنى ممكن اشتغل علطول ولا اية؟ وكمان عاوزة اعرف اية احسن قسمفيها ؟ وعاوزة حد يقولى ادخل تربية ولا سياحة بجد مش عارفة :(وهبقى سعيدة جدا لو حد قالى ميرسى ليك يا اسلام واسفى ان كنت طولت عليك

اهلا بك يا jeary

هى كلية السياحة والفنادق حلوة للى حابب مجالها وموادها .

وكلية التربية لو عايزة تبقى مدرسة فى اى مادة ادخليها , لكن سياحة وفنادق مجالاتها كتير وسهله كمان الا فى قسم الارشاد السياحى صعبة الا اللى بيفهم انجليزى وبيحب اللغة .

واحسن فسم فيها يعتبر - من وجهة نظرى - قسم الدراسات السياحية لانه ممكن تشتغل منه فى شركات السياحة فى جميعا اعمالها وكمان بتتخرج معاك لغة على الاقل انجليزى , وانتى وشطارتك ممكن تشدى حيلك وتتخرجى معاكى لغتين جامدة فيهم , وكمان ممكن تشتغلى فى شركات الطيران بس بتبقى عايز وقت شوية فى الخبرات وكده شوية كورسات و ICDL و كمان اى وظيفة عايز لغة وكمبيوتر بتتوظفى فيها فهو قسم جميل من نظرى مجالاته كتير يعنى .

اما بقى لو عايز تشتغلى مرشدة سياحية ادخلى قسم الارشاد بس هو دراسته صعبة تاريخ بالانجليزى ولغة مصرية قديمة وكمان يا عالم شغلتك كمرشدة مضمونة ولا لأ ؟؟ اما قسم الفنادق فهو انسب اكتر للولاد .

المهم فى الاخر شوفى نفسك هتعرفى تمشى نفسك فى انهى كلية ؟؟ بس سياحة وفنادق حلوة وبتتخرجى معاكى لغة بس عايز اقولك حاجة فى ناس بتتخرج معاها انجليزى بالعافية بس انتى المفروض سواء كنتى بتذاكرى الانجليزى او اللغات بالعافية او الكلية مش مهتمة باللغات شوية وده نادر فانتى المفروض تتخرجى معاكى انجليزى على الاقل .

ولو اتخرجتى من قسم الدراسات السياحية ومعكيش على الاقل انجليزى مش هتلاقى وظائف خالص لكن ولو اتخرجتى معاكى لغتين - من الاخر - مش هتتعبى فى التدوير على الشغل خالص ان شاء الله .

وابقى قوليلنا عملتى اه ,,,,,,,,,,,, ؟؟؟

ميرسى جدا يا اسلام بجد شكرا لحضرتك بس انا عندى سوال صغير انا اسفة
حضرتك بتقول ان لازم يكون معايا انجليزى على الاقل . طيب هى الكلية فيها انجليزى بس ولا اية؟يعنى اللغات التانية ادرسها برة الكلية فى كورسات ولا هى بردة فى الكلية؟ ودراسة اللغات فى الكلية كافية ولا لازم اكون باخد كورسات بردة؟شكرا ليك

لا متخافيش الكلية هتاخدى فيها انجليزى ولغة تانية ( ايطالى مثلا او فرنسى او اسبانى ) .

والصراحة كلية السياحة والفنادق مش هتعلمك لغة جامد اوى زى الكليات المتخصصة فى اللغات فقط ( زى كلية الالسن مثلا ) بس انتى المفروض تاخدى كورس عشان تقوى لغتك وخاصة الانجليزى لان اللغة شرط اساسى لخريج السياحة والفنادق وبجانب ده هتدرسى مقررات القسم اللى هتخصصى فيه .

والصراحة المعظم بياخد كورسات فى اللغات وخاصة الانجليزى

اما بقى لو عايزة تتخصصى فى اللغة فقط ادخلى تربية انجليزى .

طيب يا اسلام ايه الكورسات التانية اللي ممكن اخدها جنب الانجلش ولغة تانية

يا sosi خدى كورسات فى المواد اللى شايفاها صعبة والصراحة انا مش شايف اى مواد صعبة الا اللغة التانية وبعض مواد قسم الارشاد السياحى اما قسم الدراسات السياحية كل مواده معظمها سهل
وعموما المادة اللى مش فاهماها خدى فيها

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اعمل ايه
ياريت حد يرد عليا بسرعه

بسيطة روحى المعهد او ادخلى على موقع المعهد ان كان ليه موقع او اتصلى بأصاحبك فى المعهد ............

فى طرق كتييير يعنى

ميرسى
انا اجبت النتيجه خلاص
والحمد لله نجحت
:d:D:D:D

السلام عليكم
انا قبلت فى سياحه وفنادق الفيوم
وبس معرفش اى معلومات عن الانترفيو
عايزه اعرف هيبقى امتى ولو فى كورس فى الجامعه قبل الانترفيو زى الكليات الفنيه ولا لأ

اتصلى بالكلية هى مصدر المعلومات الصحيحة .