بوابة الثانوية العامة المصرية

بوابة الثانوية العامة المصرية (https://www.thanwya.com/vb/index.php)
-   مصر بين الماضى و الحاضر (https://www.thanwya.com/vb/forumdisplay.php?f=569)
-   -   حكاية ترعة المحمودية (https://www.thanwya.com/vb/showthread.php?t=741776)

محمد محمود بدر 10-02-2018 10:26 AM

حكاية ترعة المحمودية
 
أساتذتى الأفاضل رواد البوابة الكرام

نستعرض اليوم ونحكى حكاية ترعة المحمودية

وايه موضوع التطوير والردم اللى بيحصل لها

نبدأ على بركة الله




محمد محمود بدر 10-02-2018 10:30 AM

4 مرفق


مصادر الحكاية :


مدينة الاسكندرية :محمد صبحى عبدالحكيم

http://www7.0zz0.com/2018/02/10/11/714268850.jpg

عصر محمد على : عبدالرحمن الرافعى

http://www7.0zz0.com/2018/02/10/11/156248932.jpg

عصر اسماعيل ج1 : عبدالرحمن الرافعى

http://www7.0zz0.com/2018/02/10/11/734290619.jpg

الاسكندرية تاريخ ودليل : ا.م.فورستر

http://www7.0zz0.com/2018/02/10/11/764681864.jpg

محمد محمود بدر 10-02-2018 10:40 AM

1 مرفق
الحدوتة هتبدا دائما وابدا من عند الاسكندرية ..

هذه المدينة العظيمة من أول لحظة
وصراعات الامبراطوريات العظمى لامتلاكها والسيطرة عليها


http://www7.0zz0.com/2018/02/10/11/872114789.jpg


والناس لما تحب تبتدى بتاريخ الترعة ... بتحب تبدأ من اول مجىء العرب وبداية اضمحلال دور الاسكندرية عن ذى قبللما قرر عمرو بن العاص تجاهلها كعاصمة وبنى مدينة الفسطاط متبعا نصيحة عمر بن الخطاب الشهيرةواللى أثرت ف اغلب من جم بعده من حكام متسكنش مدينة يفصلنا عنك ويفصلك عننا نهر أو بحر وبالتالى تغاضى بن العاص عن الاسكندرية اللى كانت للغزاة القادمين من البحر المتوسط .. قريبة وحلوة ومفتاح لمصر كلها ...

ومشكلة الاسكندرية ف عهد العرب انها كانت بعيييدة اللى يروحها يقول يا غربتى ! زائد افتقارها للمياه العذبة ودى كانت مشكلة كبيرة اضف إلى ذلك صعوبة السير اليها اثناء الفيضان ولهذا اهملت

لكن أهلها ماذا كانوا يفعلون ف حكاية الشرب ورى الأرض وخلافه ؟؟


الحقيقة ان المية العذبة كانت بتوصل اسكندرية خلال العصر اليونانى الرومانى عن طريق ترعة قديمة اسمها "شديا" ثم ملاها الطمى ف فترة ما واندثرت وأعيد حفرها اكتر من ست مرات ف العهد العربى وأشهر من اعاد الحفر الظاهر بيبرس والسلطان الناصر محمد بن قلاوون

وتسمع اسامى كتير .. ترعة شديا .. نرعة الاسكندرية .. الخليج السكندرى .. الخليج الناصرىالخ المهم ف النهاية كان هناك شريان يأتى من فرع رشيد ليمتد الى الاسكندرية فيرويها وفى مرحلة انحسار الفيضان تخزن المياه ف صهاريج ودى كانت مشكلة دايما ..


ليه ؟؟


عشان دا خلى اسكندرية دايما عرضة لحصار من فيها وتعطيشهم ودا خلاها ف مرمى الهجوم من اى حد آت من البحر المتوسط
المهم .. اسكندرية بسبب عدة عوامل دورها تراجع واقتصر على انشطة محددة واهملها السلاطين المتتابعين على مصرالا فيما ندر



يتبع ....


محمد محمود بدر 10-02-2018 10:46 AM

4 مرفق
فيه بعض المؤرخين بيحبوا ينسبوا اضمحلال دور المدينة العريقة إلى الغزو العثمانى وفقط لكن الحقيقة ان نهايات العصر المملوكى كان ليها دور برضو تزامن مع اكتشاف رأس الرجاء الصالح واصرار السلاطين على جمع نفس الضرايب القديمة والمغالاة فيه فاالتجار طفشت طبعا



http://www7.0zz0.com/2018/02/10/11/722039892.jpg


وبيقولوا ان قنصوى الغورى لما راح يزور الثغر لقى فيه خراب واضح لكن كل دا كوم وبعد الاحتلال العثمانى كوووووم آخر

http://www7.0zz0.com/2018/02/10/11/701211087.jpg


ومش بس اسكندرية اللى هتعانى لأ مصر كلها الحقيقة العثمانلية دخلوا علينا بالخراب وعلى مدار قرون كان الضنك توغل ف كل الارجاء بنهاية 1798 كان عدد سكانها كام ألف بؤسااااء كدا وبيقولوا ان الفرنساوية لما دخلوا المدينة مشيوا فيها ساعات ملقوش فرن واحد فاتح وبيخبز !



http://www7.0zz0.com/2018/02/10/11/835529746.jpg


وهما 3 سنين والفرنسيس مشيوا من مصر .. وشوية صراعات داخلية مع الدولة العثمانية ممثلة فى واليها والامراء الأقوياء .. وهوب جه سى محمد على وبقى أكبر راس ف البلد بالتخلص من المنافسين وبخداع شعبها و اجبار العثمانلية على الموافقة على تنصيبه

http://www7.0zz0.com/2018/02/10/11/450848864.jpg


يتبع ...

محمد محمود بدر 10-02-2018 11:23 AM

الراجل الصراحة دخل علينا دخلة اللى هيا .. قلب البلد كلها بعينه وعرف مواطن الثروات والمكاسب وقرر أنه يستغلها لأقصى حد وابتدى يبنى ف دولته اللى تفضله له ولأولاده واحفاده فيما بعد واديها ف مشاريع لما تقطع نفس الشعب اديله مترحمووووش


http://www7.0zz0.com/2018/02/10/11/658993484.jpg

حد ييجى يقولى انت ظالم الراجل دا وهوه كويس دا كان شغال بسرعة اكتر من 3 مشاريع ف اليوم وكله عشان مصر حرام عليك

أرد أقوله مش عشان مصر دا عشانه هوه وذريته والله محاولته للأستقلال بدأت من اول يوم ولم تتوقف الا ف النهايات مضطرا




وانتوا عارفين انه كان بيتمحلس للأجانب عشان يساعدوه ف إرساء قواعد حكمه متداريا وراهم ومتحديا الدولة العثمانية على استحياء والأجانب اللى كان عددهم ميزدش عن اصابع اليد الواحدة قبل مجىء الفرنساويةبقى عددهم ييجى 5 الاف ف بدايات حكم محمد على

قوم ايه ؟



السكان كتروا وحركة التجارة والمية العذبة المخزنة ف الصهاريج سنويا مبقتش كفايةمحمد على كمان انتبه لأهمية الثغر ف حماية البلد من القادمين من اوروبازائد اهم حاجةانشاء ترسانة لصنع سفن لأسطولهبجانب الدور الأهم وهوه التجارة وعمليان نقل البضايع الخ...


والاهم من كل ما فات .. رغبته ف زيادة عدد الفدادين المزروعة وبالتالى زيادة محاصيل تنفعه وتنفع لاحتياجات جيشه اللى بيكونه للمحافظة على امبراطوريته الناشئةكل دى كانت اهداف الباشا وبالتالى انتبه لضرورة حفر ترعة هنعرفها لاحقا بـ .. ترعة المحمودية


http://www7.0zz0.com/2018/02/10/11/586279867.jpg




يتبع ....



محمد محمود بدر 10-02-2018 12:05 PM

1 مرفق
الشهادة لله ... محمد على كانت دماغه متكلفة .. مش زى سقط البلح اللى موجود حاليا يعنى العمل نفسه والفكرة ممكن تكون عظيمةبس الاشكالية ف شببها وليه اتعملت .. وكمان طريقة تنفيذها القذرة ودى مشكلتى معاه

الترعة اللى سميت المحمودية على اسم السلطان العثمانى اللى كان موجود وقتها .. محمود الثانى كان طولها حوالى 80 كيلو وشوف انتا تتكلف كام بقى ؟

فهل تفتكروا الباشا بقى شال هم الفلوس و الأيدى العاملة وأجورهم والقصص دى ؟!!



http://www10.0zz0.com/2018/02/10/12/666193161.jpg



الحقيقة هوه اهتم بحاجة واحدة بس .. انها تخلص وبسرعة عشان مصالحه اسم الله عليه متتعطلش الهدف كان انشاء فرع ملاحى "مكان ترعة الاسكندرية القديمة" يوصل بين اسكندرية وباقى مصر ويبدأ من فرع رشيد يصل الى الاسكندرية ويصب ف البحر المتوسط بالنهاية


http://www10.0zz0.com/2018/02/10/12/739137905.jpg


الحقيقة كان ممكن استعين بالجبرتى بس واخد كلامه وفقط بس الجدع بيحب محمد على زى منا بحبه تمااااامفقولت اشوف عبدالرحمن الرافعى المتمحلس للأسرة العلوية الحقيقة الراجل ابهرنى بتحريه الدقة واصراره على عدم التطبيل للحكاية

ليه بتقول كدا ؟اقولكم


أصل محمد على لم الفلاحين من قراهم وجرجرهم مربوطين بالحبال عشان يحفروا الترعة دى .. وفى ظروف زى الزفت صحيا وماديا ومعنويا


الجبرتى بيقول : " امر بجمع الرجال من القرى وهم مائة الف فلاح توزع على القرى والبلدان للعمل والحفر بالأجرة وبرزت الاوامر بذلك فارتبك امر الفلاحين ومشايخ البلاد لأن الامر برز بحضور المشايخ وفلاحيهم فشرعوا في التشهيل وما يتزودون به في البرية ..


ولا يدرون مدة الاقامة فمنهم من يقدرها بالسنة ومنهم باقل او اكثر" جاب الناس على ملا وشها متعرفش هتقعد قد ايه ولا تغيب لحد امتى وفيهم ناس سابت زرعها وعيالها وحالها محتالها واحنا لسه بنقول يا هادى اهو ..


والجبرتى بيقول ان العمل بدأ ف حفرها سنة 1817 ثم توقف لانشغال الباشا بالحروب الوهابية لكن عاد العمل تانى 1818 لحد 1820 لما خلصت

خلصت ازاى بقى ؟؟



بيقول اهو : "نزل الأمر لكشاف الأقاليم بجمع الفلاحين والرجال على حساب مزارع القدادين فيحصون رجال القرية المزارعين ويدفعون للشخص الواحد عشرة ريالات ويخصم له مثلها من المال وإذا كان له شريك وأحب المقام لأجل الزرع الصيفي أعطاه حصته وزاده عليها

حتى يرضي خاطره وزوده بما يحتاج إليه أيضاً وعند العمل يدفع لكل شخص قرش في كل يوم ويخرج أهل القرية أفواجاً ومعهم أنفار من مشايخ البلاد ويجتمعون في المكان المأمورين باجتماعهم فيه، ثم يسيرون مع الكاشف الذي بالناحية


ومعهم طبول وزمور وبيارق ونجارون وبناؤن وحدادون وفرضوا على البلاد التي فيها النخيل غلقاناً ومقاطف وعراجين وسلباً وعلى البنادر فؤوساً ومساحي شيء كثير بالثمن


وطلبوا أيضاً طائفة الغواصين لأنهم كانوا إذا تسفلوا في قطع الأرض في بعض المواضع منها ينبع الماء قبل الوصول إلى الحد المطلوب" واحنا لحد دلوقتى كويسين وحلوين والمسالة غرامات وفردة وخلاص

المشكلة ف الجاى


قالك اخر سنة حفر الباشا شدد على انهاء الحفر فعمل ايه بقى ؟؟


قالك : "أمر حكام الجهات بالأرياف بجمع الفلاحين للعمل فأخذوا في جمعهم فكانوا يربطونهم قطارات بالحبال وينزلون بهم المراكب وتعطلوا عن زرع الدراوي الذي هو قوتهم وقاسوا شدة بعد رجوعهم من المرة الأولى بعد ما قاسوا ما قاسوه


" ومات الكثير منهم من البرد والتعب وكل من سقط أهالوا عليه من تراب الحفر ولو فيه الروح" يا سلاااام ع الانسانيةاللى بيموت كانوا بيردموا عليه احنا لسه هنشيل وندفن !


واللى لسه فيه روح .. خسارة حتى يستنوا لما السر الالهى يطلع !

خلصنا زفت ؟ لأ لسسسسسه ..

بيقولك ايه بقى
" ولما رجعوا إلى بلادهم للحصيدة طولبوا بالمال وزيد عليهم عن كل فدان حمل بعير من التبن وكيلة قمح وكيلة فول وأخذ ما يبيعونه من الغلة بالثمن الدون والكيل الوافر"




يعنى اللى ملقاش رحمة ف الدنيا ومات .. ارتاح انما اللى عاش ورجع قريته طالبوه بالفردة والضريبة على الزرعة اللى هوه فاتها وراح يحفر ترعة الباشا ودفع برضو !!


وبيقولك ف الآخر راح الباشا مع ابنه ابراهيم وجوز بنته والكتخدا عشان يحضر اللمسات النهائية" حضر الباشا ومن معه من غيبتهم وقد انشرح خاطره لتمام الترعة وسلوك المراكب وسفرها فيها " قالك انشرح خاطره ..! يخى انشرحت ف جهنم شرايح شرايح زى اللانشون يا بعيد !

يتبع ...

محمد محمود بدر 10-02-2018 12:14 PM

2 مرفق
بس وبدأ السير ف الترعة"ولم يبق في شغل الترعة إلا الأمر اليسير وإصلاح بعض جسورها " الحكاية دى بقى كلفت كام كدا شاكب راكب بالصلاة على النبى ؟؟؟


ماديا عيب اما نتكلم ف فلوس يا مونشير دى محفورة حِبى كدا وببلاش تقريبالكن الارواح بقى هيا التكلفة الفادحة الجبرتى مقلش أرقام انما الرافعى هوه اللى بالرجوع لمصادر اجنبية والبحث قدر موت من 10 الى 12 ألف بنى آدم من واقع اكتر من 300 ألف نفر شارك ف عمليات الحفر


http://www10.0zz0.com/2018/02/10/12/542976108.jpg





وفى لمسة انسانية متعاطفة مع الشعب ضد النظام المنحط ودى نادرا ما تحصل من الرافعى تجاه الأسرة العلوية و محمد على تحديد االراجل - الرافعى يعنى - هيطلب منا نتذكر هذه التضحيات الكبيرةكل ما نعدى ع الترعة ونراها بقت حدائق غناء بها القصور وعمران الخ الخ الخ


ويذكرنا ببيت الشعر العظيم اللى بيقول :

وخفف الوطء ما اظن ... أديم الأرض الا من هذه الاجساد..

فعلا .. حقيقة







والحقيقة كمان .. ان التضحيات دى لم تذهب هباء فعلا وسيبك من محمد على الى مشروعه بالاستقلال وبناء امبراطورية لنفسه تلاشى وقعد ملوما محسورا ف قصره بالقلعة ينتظر الموت ونشوف المكاسب من هذه الترعة .. بعد ما بدأ السير فيها


التاريخ بيقول ان الاسكندرية ف العصر الحديث قبل ترعة المحمودية حاجة وما بعدها حاجة تانية المدينة انتعشت بعد ركود قرون و سحبت البساط التجارى من تحت اقدام رشيد و دمياطوالاجانب سكنوها بكثرة واهتموا بالتبعية بيها بعد مدة وخصوصا على جانبى الترعة



http://www10.0zz0.com/2018/02/10/12/723029768.jpg





محمد على ومن جاء بعده ادوا أراضى للحاشية والأعيان والأروبيين عشان يعمروا المكان و انتشرت القصور والبيوت الكبيرة و الحدائق .. والمصانع بعد فترة وجيزة


http://www10.0zz0.com/2018/02/10/12/906927331.jpg





وعدد الأفدنة المزروعة اللى كان أخره 5 الاف فدان كِبر ووصل ف نهايات عهد محمد على إلى 11545 فدان !



http://www10.0zz0.com/2018/02/10/12/885215594.jpg



يتبع ...


محمد محمود بدر 10-02-2018 12:20 PM

4 مرفق
و عدد سكان اسكندرية اللى كانوا بعد رحيل بونابرات بتاع 8 الاف نسمة حسب التقديرات سنة 1821 بعد نهاية الحفر كانوا 15 ألف نسمةسنة 1833 بقوا 40 ألف نسمةف 1848 بنهاية عصر محمد على يعنى ... بقوا 164 ألف وشوية .. ! وبعدها العداد بقى ف ازدياد

http://www10.0zz0.com/2018/02/10/12/426262604.jpg




والمجرى المائى دا سهل نقل بضايع تقيلة مكلفة زى الرز والقمح .. وبعد كدا الأسلحة والمعدات الخاصة بالجيش وأى حاجة محتاجة نقل ف اى وقت م السنة ... كله بقى متاح وتكلفة أقل !


http://www10.0zz0.com/2018/02/10/12/642073164.jpg



http://www10.0zz0.com/2018/02/10/12/132031740.jpg



http://www10.0zz0.com/2018/02/10/12/149946979.jpg



http://www10.0zz0.com/2018/02/10/12/212983970.jpg


يتبع...

محمد محمود بدر 10-02-2018 12:44 PM

5 مرفق


والترعة شجعت اجانب زى البارون اليونانى أنطونيادس يبنى قصر وحديقة غناء هتبقى بعد كدا من أشهر معالم المدينة وغيرها من حدائق ومتنزهات

http://www14.0zz0.com/2018/02/10/13/598961790.jpg


والاهتمام بالترعة واستخداماتها أدى الى الاهتمام بمينا الاسكندرية لانه بقى يستقبل مراكب طول الوقت وبالتالى سهل حركة السفر ومجىء الاجانب وبدء المشاريع والاستقرار ف المدينة وضخ الاموال بها م الآخر البلد انتعشت تجاريا وسياحيا واجتماعيا وكله


http://www14.0zz0.com/2018/02/10/13/892494124.jpg


حد يقولى طب ما محمد على حيلو اهو واسكندرية زهزهت .. واهو شوية خسارات مقابل مكاسب ونضحى عشان البلد وتحيا ماسر وكدا ؟!!


أقولكم لااااااا معلش .. الغاية لا تبرر الوسيلة ونطوا معايا قدام بعد موت عباس حلمى الاول ومسكان الوالى سعيد للحكم الترعة كانت حالها تدهور ومحتاجة للتطهير وازاحة الطمى المتراكم ومحدش شاله من سنين قوم ايه ؟؟


http://www14.0zz0.com/2018/02/10/13/773938443.jpg




سعيد نده لمسيو موجيل بك .. كبير المهندسين وقاله نطهرها بكام وازاى ؟ عملوا حسبة لقوا الطمى ف القاع بتاع 3 مليون متر مكعب وطول الترعة 80 كيلو متر والعامل يقدر يرفع متر ونص ف اليوم فكدا محتاجين 67 ألف عامل ف خلال شهر يخلص الشغل !




http://www14.0zz0.com/2018/02/10/13/478923750.jpg


وابعت يا بنى للمديريات تجمع انفار بعتوا 115 ألف عامل اتوزعوا على طول الترعة واتوزع عليهم فؤوس كل 5 عمال معاهم فاس واحد يحفر والتانى يلم الردم ف المقطف والتلاتة الباقيين يطلعوا الردم لجنب الترعة سعيد خلاهم يعبدوا طريق على جنب الترعة لنقل الردم قوم ايييه ؟




http://www14.0zz0.com/2018/02/10/13/738696283.jpg


يتبع...





محمد محمود بدر 10-02-2018 12:53 PM

5 مرفق
يسكت سعيد ؟ لأ جابلهم دكاترة .. للعمال يعنى يسهروا على رعايتهم وتطبيبهم وقت الشكوى من أى حاجة والترعة اتطهرت وكأنها تحفرت من جديد ف خلال 23 يوم بس يا ثاااامح محدش مات ولا نفر واحد والمرضى اللى اقعدهم العمل بعد شوية بتاع 5 ف الالف ..!

http://www14.0zz0.com/2018/02/10/13/876754841.jpg


بس يا سيدى .. الشغلانة تمت ف وقت أقصر من المطلوب بدون خساير ف الأراوح وبنظام واحترام لأدمية البنى آدم والهمة والنشاط دول أثاروا اعجاب الجميع لدرجة ان ديليسبس جالته فكرة حفر القناة السويس بمنتهى الأريحية واتشجع يعرضها على سعيد لما لقى ان العملية سهلة اهى !!


يعنى مكنلوش لزوم يموت اكتر من عشرة الاف روح اهو ..

وانا تقريبا خلصت .. لكن اكيد انتوا عارفين ليه بنحكى عن الترعة دى دلوقتى .. عارفة ان مفيش امل ف ان فضة المعداوى الزمن الحالى يفهموا او يقدروا لكن ناس تانية يمكن تقدر وتعرف

http://www14.0zz0.com/2018/02/10/13/647630766.jpg


الترعة دى عمرها تقريبا 200 عام بقت جزء من التاريخ وعبقه مش لازم كل حاجة يكونلها فايدة آنية .. كفاية ماضيها لوحده يديها الأهمية دا عشان بتوع وايه لازمتها نردمها وملهاش لازمة الخ

http://www14.0zz0.com/2018/02/10/13/269208049.jpg


والحقيقة كونك كنظام وجهاز ادارى مبتفهمش ف الجمال ولا تعرف تصونه ولا تعيد تجديد ما شاخ منه دا ميدكش الحق ف التبجح بإنك بتعمل للمصلحة دا ملوش غير معنى واحد انك ف مكان غلط متستاهلوش مكان يفترض بيه يحافظ .. بيهدر ويجرى ورا الفلوس وبس

ودا منظر الترعة حاليا


http://www14.0zz0.com/2018/02/10/13/116669073.jpg


http://www13.0zz0.com/2018/02/10/13/331777040.jpg


http://www13.0zz0.com/2018/02/10/13/736420412.jpeg








الترعة دى بشوية مجهود .. تبقى حاجة عظيمة .. لكن انتوا فين من العظمة انتوا حرامية غسيل تقطعوا الحبل من الناحيتين وتاخدوا الهدوم بالمشابك بالحبل وتجروا وتسيبوا السطوح فاضى ... دا تمامكم


يتبع...


محمد محمود بدر 10-02-2018 12:56 PM

5 مرفق


محمد محمود بدر 10-02-2018 12:58 PM

4 مرفق

محمد محمود بدر 10-02-2018 01:02 PM

اخيرا .. عشان طولنا عليكم الملاحظاااااات








1) محمد على هيفضل دائما وابدا مستبد المشاريع بتتعمل لرفعة شان المواطن البنى آدم وهذا الشخص معملش حاجة الا لرفعة نفسه وشأنه ولهذا ذهب كل هذا جفاء ف السنوات التالية مقعدش غير اللى فيه خير للناس وكفى








2) كان يحصل ايه لو طهرتوا الترعة دى ومشيتوا فيها مراكب للفسحة حتى بلاش النقل ؟ فيها ايه لما تبقى رئة لاهل اسكندرية بشوية الخضرة والزرع على الجانبين ينضفوا الجو ؟ كان يجرى ايه لما تحافظوا على التاريخ وتعرفوه للأجيال الجديدة ؟ كان يجرى ايه ؟ ايه ؟








3) كلمة المشاريع اللى بقت لبانة ف البوق دى عمال على بطال .. معلش ايه فايدة المشاريع اذا كانت بتاخد من لحم الشعب وتفقره ؟؟ استفدنا ايه لما منحسش غير بالضنك والغُلب ؟ عشان عيالكم ؟ محنا كدا مش هنعرف نعيش ولا عيال هييجوا حضرتك ؟ ولا هوه النصباية طلبت وخلاص








4) الناس التى يحلو لها انها تزنق حد جنب محمد على ف جملة واحدة وتقول انجازات وبتاع قصدكم تحشروهم ف زمرة المستبدين يعنى ماشى بس محمد على مينفعش يتقارن معاه اصلا متهزؤش الراجل ف تربته الاستبداد مقامات برضو








5) اخيرا .. لما بقرى خبر عن الترعة المحمودية وهيا بتتردم بحس ان الغلابة اللى اتجروا من قراهم من 200 سنة وطلعوا ف الروح وردموا عليهم قبل ما يموتوا حتى .. بيتردم عليهم تانى النهاردة بس مش لوحدهم احنا معاهم .. ولكى الله يا مصر والله








بس خلاص خلصنا ..




محمد محمود بدر 11-02-2018 08:42 PM

1 مرفق

محمد محمود بدر 14-02-2018 11:30 AM

1 مرفق
الموضوع عبارة عن ملف pdf فى المرفقات

الملف عبارة عن ملف باور بوينت على جوجل درايف




جميع الأوقات بتوقيت GMT +2. الساعة الآن 07:49 PM.

Powered by vBulletin® Version 3.8.11
Copyright ©2000 - 2024, Jelsoft Enterprises Ltd.