بوابة الثانوية العامة المصرية

قرب قرب قرب قرب
خدلك فكرة سريعة يا بيه
كحك يا هانم ؟! لحمة يا بيه ?!
كيلو اللحمة بسبعة جنيه
علبة كحك هدية عليه
شفتوا الريس حلو ازاى
داحنا حبايبه وضى عنيه
قرب قرب قرب قرب
خدلك فكرة سريعة يا بيه

شفتوا النشرة ؟ قالك ايه :
النور دايما بقى شغال
وبيقطع فى السنة تفاريح
والاعلام المصرى يا سادة
اصبح حر ورأيه صريح
والظالم اصبح مسجون
والمظلوم فارق زنزانته
والريس ياخوانا حبيبنا
وبنضرب امثال بعدالته
بصى يا هانم / بص يا بيه
شفتوا النشرة ؟ قالك ايه :
الارهاب مبقاش موجود
هما يومين وقضينا عليه
كلوا بفضل سيادة الريس
ادعوا الرب يبارك فيه
كل الشعب بياكل لحمة
وبياكل مانجا وتفاح
حلوا كمان مشكلة الزحمة
والتعبان أصبح مرتاح
بصى يا هانم / بص يا بيه
شفتوا النشرة ؟ قالك ايه :
كل مواطن جاب عربية
انسوا خلاص كلمة اتوبيس
والتعيين مبقاش بالكوسة
ولّى خلاص زمن التعريض
قبض الدولة يفيض ويكفى
والاسعار صبحت فى النازل
حتى المعبر بقى مفتوح
مبقاش بينا وبينهم عازل
بصى يا هانم / بص يا بيه
شفتوا النشرة ؟ قالك ايه :
لا تحرش ولا فوضى يا سادة
طول الوقت الوضع امان
لو قررت انك تتجوز
خدلك شقة من الاسكان
ومفاجاة نشرتنا الليلة
ان الشقة دى بالمجان
يلا اتجوز حقق حلمك
انسى خلاص زمن الحرمان
بصى يا هانم / بص يا بيه
شفتوا النشرة ؟ قالك ايه :
ساد العدل ف كل محافظة
قول رأيك وبكل صراحة
الحرية خلاص مكفولة
كل الشعب سعيد وف راحة
ظلم وقتــل الشعب المصرى
ماضى وفات وخلاص نسيناه
دلوقتى الشرطة بتحمينا
والحاكم بقى شعبه معاه
بصى يا هانم / بص يا بيه
شفتوا النشرة ؟ قالك ايه :
" كل السابق ذكره انساه "
المصابين دول قتــلـوا الشهدا
اما مبارك كان مظلوم
حتى الثورة طلعت حلم
عيش الواقع فوق م النوم !
.
.
.
.
.

‫#‏نشرة_الاخبار‬
‫
‫#‏محمود_النفراوى‬