ملتقى طب الأسنان 2014
 

يا جماعة مش هينفع كده أحنا اقل مشاركة عموما يا ريت نتكلم مع بعض و انا عندى تفاصيل كتير عن طب الاسنان و اى حد عنده سؤال هجاوب عليه ان شاء الله و عندى حاجات مهمة اكيد متعرفوهاش عن طب الاسنان بس لما يبقى عددنا كتير هنتكلم عن كل حاجة بالتفصيل:022yb4:

هل الغاء سنة اﻻعدادي فى القاهرة تقليص لعدد سنوات الدراسة ام تغيير للمناهج فقط

تقليص لعدد سنوات الدراسة هى نفس المناهج و لكن تم توزيعها على خمس سنوات

يعني افهم من كدا ان طب الاسنان فى القاهرة 4 سنين + سنة امتياز = 5 سنوات ؟

و هل لو هو كدا اقدر احول للقاهرة من الاسماعيلية و انا مجموعي جايبها و بطاقتي الفيوم ؟

طيب على كدا هي زي باقي الكليات لان اسماعيلية بسنة الامتياز 6 بردو و انا مقتنع بيها الا ان مسألة اللائحة الجديدة قلقتني شوية

و انا متشكر جدا جدا على الافادة بس كنت عايز استفسر بردو عما اذا كانت القضية ممكن تجيبلي اى درجات حتى ولو نص درجة لان الطب البشري راح مني عشان نص درجة

لا متقلقش كل الكليات تقريبا اتطبق عليها اللائحة دى فمش هتفرق
شكرا على ايه بس احنا اخوات , بص انا كمان زيك الطب راح منى على نص درجة للأسف بردو و عاملة تظلم و ربنا يسهل بس موضوع القضية ده بيطول أوى فيارب تجيلك من غير قضية و لو مجتش اعرف ان ده الخير ليك صدقنى و ربنا معاك

الحمد لله على كل حال ، و ربنا يكتبلك التوفيق و التفوق دايما ^_^

هو ليه القسم هنا مش نشيط ؟؟
وايه المناهج اللى هندرسها ؟؟؟

يا رب لينا كلنا

يا جماعة ؟
حد يعرف ايه هى مميزات الكلية دى و عيوبها ؟؟

أقولك مميزاتها وعيوبها

مميزاتها انها 5 سنين بس بالاضافة لسنة امتياز
ثانياً اسمك دكتور وبريستيج وحركات

ثالثاً الحمد لله شغلك مضمون سواء تتعين في الكلية لو أوائل أو تبدأ في مستوصف صغير لحد ما ربنا يكرمك وتفتح عيادة
رابعاً المناهج سهلة -نسبياً- بالنسبة لبشري وصيدلة


انا بقول نسبياً ... عشان المناهج برضه رخمة في أسنان بس مش زي بشري
يعني مثلاً احنا عندنا مواد من طب بشري بندرسها في اسنان
بس بندرس بطريقة مختصرة جدا ، بندرس اللي يفيدنا في حياتنا وفي تخصصنا ده



العيوب بقى
1- أسنان بصفة عامة مكلفة جداً جداً جداً فوق ما تتخيل خصوصاً آخر سنتين
يعني ممكن تدفعلك في السنة آلافات عشان الأدوات
2- فيه ناس شايفة ان 5 سنين دراسة وسنة امتياز كتير بالنسبة لصيدلة
3- أسنان القصر العيني بقى بصفة خاصة عيبها إنها حكومية ومش كل حاجة الجامعة بتوفرهالك وكراسي الدكاترة بتاعة الشغل قديمة ومتهالكة (بس اليومين دول بدأوا يجددوا العيادات)
لو انت استقريت في الآخر على طب أسنان .. يا ريت تبقى القصر العيني .. لأنك مش هتلاقي دكاترة بالكفاءة دي في أي حتة ... بالإضافة إن عدد المرضي اللي بيييجوا عندنا كل يوم عدد مهوووول الجامعات التانية كلها بتحسدنا عليه وهتشوف كل الحالات المختلفة وتقدر تتعلم صح بإذن الله
آخر حاجة هقولهالك .... صلي صلاة استخارة كذا مرة واستخير ربنا وبعد كده قرر ... وأول ما نتقابل إن شاء الله في مصر أو في فاقوس هشرحلك نظام الدراسة في أسنان بالكامل وكل التفاصيل اللي انت عايز تعرفها
ربنا يهديك للي فيه الخبر إن شاء الله
.
دى منقولة من احدى الصفحات

يا ريت توضحى ليا من البداية و حتة حتة
براحة عليا
اختك مش تعرف اى حاجة خالص

اممم
شكرا جزيلا ليكى
انا اسنان المنيا و ان شاء الله هحول طنطا
ممكن تشرحى ازاى هى مكلفة دى ؟؟!!