بخصوص النيو ستايج بتاعة حاسبات القاهرة
 

أولاً بسم الله الرحمن الرحيم
السلام عليكم و رحمة الله و بركاته
ثانياً : إيه هو النيو ستايج؟
ده ببساطة شديدة event أو نشاط أو حدث منظماه أسرة 180 درجة في كلية الحاسبات و المعلومات بجامعة القاهرة للطلبة الجداد الرايحين سنة أولى السنة دي. الحدث ده هيبقى عبارة عن 4 أيام تقريباً أو حاجة زي كده و هيعملوا فيه أنشطة و هتبقى أيام جميلة جداً على حسب شهادة ناس
امتى معاده و إزاي أحضره؟
المعاد لسه متحددش بس على الأغلب إن شاء الله هيبقى قبل الدراسة - شبه أكيد -. و عشان تحضره الأسرة عاملة انترفيو أو مقابلة كده دردشة يسألوك على شوية حاجات و على أساس كده هيختاروا عدد منكم عشان يحضر الحدث ده.
ليه ماينفعش الكل يحضره؟
عشان العدد على ما أظن. و لكن أحد المنظمين بيقول بناخد نسبة كبيرة من المتقدمين و احنا مش عايزين حاجات خارقة احنا عايزين شخصية معتدلة بس يعني إنسان عادي زينا كلنا
طب أعمل إيه عشان أحضر الانترفيو ده؟
تكلم أسرة 180 درجة 0160530746 أو تكلمهم على صفحتهم على الفيس أو على الجروب بتاعة الحدث http://www.facebook.com/groups/NewStage4/ ( و لو غلط أكتب لينك أرجو تنبيهي و حذف اللينك و يكتفى بذكر اسم الجروب new stage 4 ) و الحق كلمهم عشان فيه ناس كتير عملت الانترفيو معرفش آخر معاد امتى
طب هيحصل إيه لو محضرتش الانترفيو ولا النيو ستايج؟
ولا أي حاجة خالص. هتروح الكلية عادي خالص و تقدم عادي و مش هيبقى فيه أي تأثير.
ده نشاط عاملاه الأسرة مالوش علاقة بشئون الطلبة
المعلومات دي مش أكيدة 100% لأني مش في الأسرة بس اللي عايز يتأكد يكلم الأسرة
و ده لحاسبات القاهرة
السلام عليكم و رحمة الله و بركاته