|
نداااااااااء إلى جميع الأزهريين(صحوة الأزهر)
على فكرة انا ملاحظة ان معظم اللى بيعيبوا فى الأزهر فى جميع المشاركات أزهريين . أنا معاكم إن الأزهر فيه عيوب كتير بس والله إحنا فى ايدينا إننا نصلحها يعنى المصحح الظالم ممكن نستبدله باخر عادل هتقولوا ازااى؟ ببساطة إن الجيل بتاعنا لازم يخرج منه المعلم الناجح العادل لازم يخرج منه الطبيب الناجح ومهندسين ناجحين وصيادلة ناجحين .احنا كل شوية بنتكلم عن عيوب الأزهر وخلاص طب بص وشوف انت عملت ايه للأزهر وابدأ بنفسك وبالناس اللى حواليك حاول انك تكون مثال للطالب الازهرى الناجح وقدوة للناس فى جميع تصرفاتك . ايه رأيكم يا طلبة الأزهر وأنا معاكوا إننا نبدأ مع بعض حملة ونسميها حملة صحوة الأزهر باننا نكلم الناس عن مزايا الأزهر _و العيوب اتفقنا اننا ان شاء الله نصلحها سوا_ ونبدأ نعتز بكوننا من الأزهر .وعلى فكرة مش هنقدر نغير فكرة الناس عن الأزهر لو كانت وحشة غير لو احنا غيرنا فكرتنا عن الأزهر .وعن تجربة شخصية انا اتعاملت مع استاذ كان فكرته عن الأزهر مش كويسه خالص _وده كان بسبب بعض الطلبة اللى كانوا عنده_ولكنى اتعاملت معاه كأننى أنا الأزهر كله لأنى لو مش كويسة معاه هثبت الفكرة دى عندة كنت أحاول إنى أذاكر وأجيب الدرجات النهائية عنده ووالله عشان أثبت له أن الأزهر مش زى ما هو فاكر وبجد والله فى اخر السنة اقتنع هذا الأستاذ إن الأزهر فيه الحلو والوحش زى أى حاجة فيها الحلو والوحش. وملحوظة لبعض الطلبة اللى اتظلموا وجابوا مجموع مش حلو أوى إن ده بجد مش اخر الدنيا يمكن تبقى دكتور فى الكلية اللى تدخلها وتبقى أحسن من اللى دخلوا طب وصيدلة من غير ما يحققوا تفوق وساعتها بقى هتشكر المصحح اللى ظلمك لأنك لو كنت جبت مجموع عالى كنت دخلت طب ولا صيدلة وكنت بقيت زى أى واحد مركون ع الرف بجد بجد ربنا مقدر لكل واحد المكان اللى هيتفوق فيه بس استغلوه صح وعلى فكرة انا زيكوا ما جبتش مجموع عالى قوى بس ان شاء الله ناوية أثبت نفسى فى الكليه اللى أدخلها وإنى بإذن الله أبقى دكتورة فيها...إيه رأيكوا اننا نبدأ حملتنا حتى من مواضيعنا فى المنتدى ونشجع بعض وكل واحد يبدأ بنفسه لأن الأزهر إيه غير أنا وانت وهو وهى كلنا افراد متكاملين. وياريت لا نكون يد عون لتدمير الازهر لاننا كده هنكون بنفذ جزء كبير من مخطط تدمير الأزهر فاحذروا .ويللا بينا مع بعض إيد واحدة فى صحوة الأزهر...............(اسفة جدا على الإطالة ومعذرة على طريقة الكتابة إنها بالعامية بس أنا ما عنديش أسلوب الكتابة بس حبيت ان كلامى يوصل لكم) وجزاكم الله خيرا
|
انا منتظرة ردودكم وتعليقاتكم ويل ريت تقبلوا كلامى بصدر رحب
|
:)انا منتظرة ردودكم وتعليقاتكم ويا ريت تقبلوا كلامى بصدر رحب:)
|
ايه شكل الموضوع كده ما عجبكوش؟
|
انا والله يا حبيبتى للأسف مش ازهرية
بس صدقينى بتضايق اوى لما بلاقى حد بيعيب فى الأزهر صدقينى انا بتمنى كل لحظة كنت ابقى ازهرية بس الحمد لله على اى حال الازهر ده وسام فخر و شرف على صدر كل طالب فيه حتى لو فيه عيوب ده طبيعى لان مفيش حاجة كاملة بس بالعزيمة ممكن يبقى احسن ما حتى التعليم العادى فيه عيوب ده طبيعى برده اهم حاجة ان الواحد يحب المجال اللى هو فيه |
كلا مك والله صح بس الغريب اننا بنفضل نذكر العيوب ومش بنحاول نصلحها ليه مش عارفة؟ يعنى ظاهرة الغش دى فى ايد الطلبة انهم يلغوها!!!!!.واشكرك حبيبتى على مرورك.
|
اقتباس:
المشكلة كلها فى ضمايرنا يعنى من الاخر نجحت او لا فى الاخر مش هتتعين للاسف الحكومة دمرتنا معنويا يا حبيبتى بس لازم يكون عندنا عزيمة لاننا احنا امل مصر بس للاسف لازم نتغير وانا عن نفسى بتغير لوحدىى و بقول فى يوم من الايام كل واحد هيقول هبدأ بنفسى و كده هنقى احسن بس امتى ؟؟؟؟؟؟؟؟ الله اعلم !!!!!!!!!!! |
اللهم بلغنا رمضان
|
اقتباس:
|
انا اللى مضاينى
ازاى ولا ازهرى يرد على الموضوع ده كان نفسى اعرف بيفكروا ازاى و ايه اهتماماتهم |
السلام عليكم ورحنة الله وبركاته
.. اولا انا بشكرك ع الموضوع والفكرة المتميزة انا ازهريه والحمد لله اكيييد مميزات الازهر معايا حفظ القرآن والمواد الشرعيه واني اتعلمت العربي على اصوله ولله الحمد عيوبه اكيد مش زي مميزاته بس لما بنقولها بنحس انها كتيرة معظم المدرسين بينجحو ف الكليات بالغش ولذلك تأسيس التعليم مش كويس خالص .. كلمة الضمير انعدمت من قلوب معظم المدرسين .. ناسيين ان ربنا رقيب عليهم .. وناسيين انه كما تدين تدان .. حتى لما اتظلمنا في التصحيح وحبينا نعيد تصحيح المواد انا قولت ان دول اكيد ربنا بعتهم رحمة لينا بس لما روحت ولقيت نفس الامبالاة وعدم المساواة في العدل وفي الظلم حسيت ان الدنيا ضاقت بجد .. وان معدش فيه ناس كويسة .. والوقتي الحمد لله على كل حال انا حسه بكل واحد اتظلم في الازهر وحسه وعارفه هوا ليه بيقول كده عليه عشان لما يجيلو واحد زميله مكنش بيتعب اده وجايب مجمووووووع عاااااااالي اوي كسرة النفس دي مش سهله ابدا علينا .. انا طولت انا عارفه بس اعذريني اكيد انا حبه ابدا بنفسي و بكل اللي حواليا واغير فكرتهم عن الازهر واققولهم انه كويس مدام ضمايرنا كويسه وشكرا يا حبيبتي على الحمله المتميزة وربنا يجازيكي خير واسفه على الاطاله .. |
أختي زهرة الإسلام شكرا شكرا علي الموضوع الرائع بل أكثر من رائع والأسلوب وإن كان كما تقولين عامي إلا أنه نصيحة غالية من شخص مخلص يعتز بدينه يعتز بهذا الصرح الذي تعلم فيه
وجميعنا نقول أن العيوب في كل شيء فما من شيء في الدنيا كامل وإلي من يقول معلمي الأزهر ناجحين بالغش اتقوا الله وإن كنتم تعرفون معلما ضعيفا فقوموه بأنفسكم ولا تحكموا أحكاما عامة فتحية للأزهر وتحية لكل من يعشق الأزهر ولو لم أكن أزهريا لوددت أن أكون أزهريا لا لشيء إلا لأنه يدرس القرآن والحديث والتفسير والنحو وغيرها بجانب التاريخ والجغرافيا والفيزياء وغيرها |
اقتباس:
اخويا ايمن الوزير انا مقلتش ان كلهم ارجوك امعن النظر في كتابتي انا قولت معظمهم وانا بقول الكلام ده مش من فراغ ولا حاجه بالعكس انا ف المعهد بتاعي مدرسات نحو ميقدروش يفرقو بين نون النسوة ونون التوكيد ومدرسة اخرى طالبة سالتها سؤال ف حصتها قالتلها بقى انتي مش عارفه طب والله منا مجوباكي دي مش اخلاق مدرسة بالمعهد الازهري وغيرهم وغيرهم صدقني والله انا ولا بظلم حد ولا بفتري على حد بس معظمهم عندنا ناجحين فعلا بالغش واللي يدعم شهادتي دي ان خالتي مدرسة ايضا بالازهر وبتقولي ان زمايلها كانو بينجحو بالغش وهنبعد بعيد ليه ؟ انا ساكنه بجوار كلية الدراسات والله واهو يمين احاسب عليه بشوف الطالبات بيبرشمو ع المناديل وعلى اديهم وف الاخر تقولي اتق الله طبعا انا بتمنى التقى من الله بس انا مجربة الظلم ومبظلمش حد ارجوك عيد النظر ف اللي قلته وانا مش بقول كلام من فراغ وعلى النقيض اكيد موجود مدرسات ممتازات ويستحقن خير المنازل بس للاسف قليلين جدااا وشكرا سيدي .. تقبلــ تحيـاتيـــ : أزهريــةــ وفخورةـــ |
اخوانى الخطأ موجود عند البشر جميعا وليس المدرسون فى الازهر من نوع خاص بل ان الخطا موجود سواء عند المدرس الازهرى او مدرس التربية والتعليم واذا كان مدرس معندوش ضمير ومبيشرحش فالعيب على الطالب انه سكت عن حقة ولم يشكو هذا المدرس ياجماعة فيه بنت فى تانيسة ابتدائى ازهر منعت الغش فى المعهد بحاله وقامت قالت للمراقب مش عايزه غش وقالت للموجه المدرس ده بيغشش ياترى حد من الطلبه اللى مش عاجبهم الازهر وعمالين يتكلمو عمل كده ياترى مين كان ايجابى
عشان يبقى من حقه فعلا انه يتكلم حسبى الله ونعم اوكيل |
انا حسه بكل واحد اتظلم في الازهر وحسه وعارفه هوا ليه بيقول كده عليه
عشان لما يجيلو واحد زميله مكنش بيتعب اده وجايب مجمووووووع عاااااااالي اوي كسرة النفس دي مش سهله ابدا علينا والله يا smallangle انا من اكثر الناس اللى اتظلموا فى التصحيح ومش هوصفلك ازاى وبأى مدى بس والله اكيد خير فبجد انا حاسة بكل واحد او واحدة اتظلمت لكن ما زلت اعتز بالازهر كمؤسسه دينية ليس غير.واشكرك يا قمر على مرورك العطر |
| جميع الأوقات بتوقيت GMT +2. الساعة الآن 09:35 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.