[أسيل رزق]

السلام عليكم ورحمة الله وبركاته

طبعاً الموضوع باين من عنوانه
العرب بشكل عام بقوا فى قمة التفاهه و الهيافة و خصوصاً الشباب
فى وسط مشاكل فلسطين و الأقصى و إنفلونزا الخنازير و الناس اللى مش لاقية تاكل و لا لاقية بيت يلمهم
و إحنا همنا فى الكورة و يا ريت جت على الكورة و بس
إحنا بقينا بنفكر إزاى نضايق الفريق التانى و مجاش فى بالنا إن الفريقين عرب مسلمين
إزاى توصل الكراهية بينا و التعصب لدرجة السب بالدين و حرق الأعلام !!!
يمكن لغاية دلوقتى العداوة بدأت من الأخوة الجزائريين
بس أنا متوقعة إن الماتش هيبقى مدبحة بين الفريقين و الجمهورين
و طبعاً فى ناس كتير مصريين حالياً مستحلفين لو شافوا واحد جزائرى حتى لو ملهوش فى الكورة هيدبحوه
يا جماعة اللى عايزة أقوله إن لو هما غلطوا فينا فلازم نبين إن مصر شعبها محترم و إذا هما ماحترموش إسمنا ولا راعوا العروبة ولا الدين اللى جامع بينا و بينهم فلازم إحنا نحترم ده مش هقول علشان نبان إننا أحسن منهم بس .. لكن علشان ربنا كمان .. شىء مؤسف جداً إننا نخرس ديننا و نفسد علاقة بلدين ببعض علشان خاطر ماتش كورة
دا اسمه التخلف بعينه
مش هنقول غير ربنا يهدى الجميع .. و يا ريت الناس اللى هتروح الإستاد تشجع يا ريت بلاش سيكولوجية الكتاكيت اللى بتحصل فى المواقف دى .. يا ريت نشجع بإحترام و بأدب علشان إحنا محترمين و مؤدبين
و لفرض إن الإساءة لمصر إستمرت فلازم نتبع المقولة اللى بتقول دع العصافير تصوصو و القافلة تسير
هما يمكن بأفعالهم دى بيشغلونا عن الماتش علشان نهتم بالشتايم بدل تشجيع منتخبنا
أكيد كل همهم هو إستفزازنا فبلاش نديهم الفرصة دى و نرد عليهم بطريقة محترمة و هى إننا نرمى كل ده ورانا و نشجع بإحترام

و يا ريت اللى حصل ده يخلينا نشجع فريقنا بقوة أكبر بدل ما نفكر فى إختراع أغانى و ألحان كلها شتايم و تهزيق للإخوة الجزائريين
أرجو فعلاً إننا نراجع حسابتنا فى الموضوع ده و نبين للكل إننا شعب محترم و ماننزلش بالمستوى اللى هما نزلوا بيه و سواء إحنا كسبنا أو هما كسبوا فا ده شىء مايزعلش إحنا فى النهاية عرب مسلمين و لو الكورة هى اللى هتضيع و هتفسد علاقتنا ببعض يبقى نقول على الدنيا يا رحمن يا رحيم

أتمنى إن الموضوع ده يغير شىء من الإنتقام اللى ممكن يحصل يوم الماتش