[Toutaya]

السلام عليكم ،، إزيكوا جميعا يارب تكونوا بألف خير وكل عام وأنتم طيبين بمناسبة عيد الفطر المبارك

أنا السنة دي مخلصة ثانوية والحمد لله جاتلى طب الإسماعليه وهيا مش أول رغبه عندى بس كتبتها ف الرغبات

خايفه أوى من موضوع إنها مختلفة عن باقيت كليات الطب في مصر !

وحاسه إني ضايعه في وسط الكلام اللى بتقولوا ده في التوبيكات الخاصة بالنظام الأمريكي في طب الإسماعليه
أ
نا بجد حاسه إني مش فاهمة حاجة ..

فمعلش عندي كذا سؤال ليكوا عشان أفهم أكتر ..

بالنسبة للى بيدرسوا النظام العادى اللى موجود في كليات الطب العادية غير الإسماعليه :

هل فعلا النظام قائم على الحفظ ؟

وهل الكلية معتمدة ع الدروس بشكل كبير ؟

وهل الدراسة حاسس إنها بدائية مش مواكبه التعليم اللى بقا موجود برة مصر دلوقتى ؟

ولو خيروك بين كليتك ونظامها وبين نظام التعليم الأمريكي بتاع طب الإسماعليه ( بأمانه ) تختار ايه ؟

بالنسبة للجماعة اللى بيدروسوا في الإسماعليه :

دلوقتى نظام البلوكات اللى بتقولوا عليه ده مش بيلخبط ؟! يعني أقعد أدرس كل حاجة ف نفس الوقت مع بعضها لمشكلة

أرجع تانى أدرس كل حاجة مع بعضها لمشكلة تانية وهكذا ؟ .. طب أنا أزاى هتبقى الأفكار بتاعت كل ماده متسلسله في دماغي

إذا انا باخد منها حتة حتة وبلخبطها ف باقي المواد ؟

تاني حاجة .. ايه مشاكل دي اللى بتقولوا عليها واللى بتقولوا انها نظام دراستكو ؟ أمراض يعني ولا ايه ؟

( معلش هاتوا مثال على مشكلة علشان أفهم )

وإذا انتوا من سنة أولى بتدرسوا مشاكل مشاكل .. أومال فين الأساس اللى المفروض يكون عندكوا الأول

عشان تعرفوا تحلوا المشاكل دي ؟

ولما يكون لكل مشكلة حل اخر وهكذا ده مش بيعقد الموضوع وبيفرعه اكتر مما لو اخدناه ماده ماده زي بقيت الكليات ؟

كمان نظام عدم وجود كتب ! طب أنا أذاكر منين ؟! وهل المصدر الأجنبى ده أنا هفهم فيه من وانا في سنة أولى كده على طول ؟

مش المفروض يبقى فيه سنة إعدادى عشان نتأسس ولا ايه يا جماعه ؟

بأمانة الكلية فيها ميزة ولا التعليم التاني بتاع الكليات اللى في باقي مصر التقليدي أحسن ؟

أنا حقيقي متلخبطة اوى .. أنا متعلمة برة مصر والنظام اللى اتعلمت بيه بردو كان فيه مشاريع وكلام من ده وحجات كتيرة شبه الموضوع ده

بس النظام كان ليه سلبيات بردو

ياريت أفهم الله يرضى عنكوا حد يفهمنى ويجاوب على أسئلتى وشكرا جدا وآسفة على الإطالة وكل عام وانتم بخير