أولاً : أنا لما قلت نتناقش بهدوء واحترام قلت نتناقش مش تتناقش , يعني الكلام لك وليا , مش لك لوحدك .
ثانياً : شيء جميل انك ذكرت ايه اللي انت اتعلمته من مصر , وممكن نتناقش في رأيك .
1- طيبة النفس ولمة الأهل والود بين الناس .
بالله عليك فين الود اللي بين الناس , دلوقتي الجار مش عارف جاره " أنا أتكلم عن الغالبية مش الكل " , فين الصديق الصدوق , فين اللي ينصحك من غير ما يكون له مصلحة , فين الود في تعاملاتنا مع بعض ؟ في الشارع , في الجامعة , في المدرسة , في أماكن العمل المختلفة ؟!!
فين لمة الأهل , معظم أفراد الأسر لا تجتمع إلا في المناسبات , علي عكس زمان لما كان في دفء أسري ولمة للأهل بصحيح .
دا معظم الأولاد والبنات بيشوفوا أبوهم بالصدفة , ولو شافوه بيبقي لمجرد دقائق .
حتي الأم بعد خروجها للعمل , مبقتش فاضية لرعاية الأولاد كما كان !!
الغالبية دلوقتي في مصر حاجة من اثنين , إما عاطل أو بيجري وراء لقمة العيش نهاراً وليلاً .
كام واحد من الشباب والفتيات بيتناول الغداء مع أسرته ؟ بيفطر معاهم ؟ بيتعشي معاهم ؟ حتلاقي عدد قليل !!
الوقت الوحيد اللي تلاقي الأسرة الواحدة مجتمعة فيه هو وقت الافطار في شهر رمضان المبارك . أما بقية العام
تلاقي الغالبية كل واحد مع نفسه للأسف الشديد. الراجل بيشتغل وبيجري هنا وهنا عشان يقدر يوفر متطلبات بيته
ويلاحق علي ارتفاع الأسعار الجنوني , وزوجته ممكن تكون بتعمل أيضاً وترجع البيت متعبة ومنهكة , والأولاد كل واحد وراه درس في ميعاد مختلف عن الأخر , وأهو ممكن يشوفوا بعض قبل النوم لدقائق معدودة !!
تبقي فين هي لمة الأهل ؟؟
نيجي لطيبة النفس . لما يكون تعامل الناس مع بعضها البعض بغرض المصلحة , تبقي هنا طيبة نفس ؟؟ أرجع وأقول أنا لا أعمم , وانما أتكلم عن الغالبية , دا الواحد بيلاقي خناقة في الشارع ولا تجد أي شخص يتدخل لفضها
ويقولك وانا مالي , ماليش دعوة , ما ينوب المخلص الا تقطيع هدومه , وكلام من النوعية دي كتير , دا انت لو خبطت في واحد في الشارع وانت مش قاصدك , بيسمعك كلمتين في جنابك حتي لو اعتذرت له !!
التجار وأصحاب المحلات اللي بترفع الأساعر بمزاجها , عندهم طيبة نفس ؟؟
الطبيب اللي كل همه قيمة الكشف ويكتبلك كذا دواء بالشيء الفلاني , وان الدواء ده منفعش يمكن غيره ينفع , عنده طيبة نفس ؟؟
المدرس اللي كل همه الدرس الخاص , وحتي في الدرس الخاص كل همه هو تجميع المال , عنده طيبة نفس؟؟
دكتور الجامعة اللي يقعد في المحاضرة ساعة وتروح تلاقيه شرح 60 صفحة ومطلوب منك تذاكرها ويبقي همه بيع كتابه ومذكراته , وإلا النتيجة حتبقي وخيمة , عنده طيبة نفس ؟؟
الصنايعية اللي يصلح الحاجة وتبوظ قبل ما يروح بيته , واجرته بالشيء الفلاني , عنده طيبة نفس ؟؟
السادة المسئولين واللي واكلينها والعة وتخرب البلد ولا تروح في ستين داهية , عندهم طيبة نفس ؟؟
2- شهامة ورجولة أولادها .
انا وضحت جزء منها في ردي .
هي الشهامة والرجولة انك تلاقي حرامي بيسرق غيرك وتعمل نفشك مش واخد بالك عشان ما تأذيش نفسك ؟!!
هي الشهامة والرجولة انك تلاقي مصاب بين الحيا والموت وتقول مليش دعوة , أنا مش عايز أدخل في س و ج ووجع دماغ.
هي الشهامة والرجولة انك تعاكس البنات في الشارع والجامعة والعمل ؟؟
هي الشهامة والرجولة انك تلاقي معظم حريم مصر بينسوا يلبسوا هدوم لما يخرجوا من البيت , وكل بيت فيه بدل الراجل اتنين وتلاتة ؟!!
3- خير نيلها وأراضيها .
أراضي مصر الزراعية أصبحت علي وشك الانقراض , بتقل تدريجياً .
أنا حاولت أختصر علي قد ما أقدر , وحاولت ان الصورة تكون واضحة لك .
وزي ما قلت أنا اتكلمت عن غالبية مصر مش كلها .
|