انا كنت فى الكلية
اولا الكلية اكثر من رائعة فى التعامل والناس والطلبة والدكاترة يعني بلا غرور فارقة اوي عن اي كلية تانية مع الاحترام الشديد للجميع
ثانيا هي كلية وحيدة فى مصر وعدد الطلبة فى الفرقة الواحد قليل جدا بالمقارنة بباقي الكليات
ثالثا مش شرط انك تاخدي اقتصاد واحصاء فى ثانوي دي ملهاش دعوة بدي
رابعا بالنسبة للمجموع وانى مش متابع لأنى خريج ثانوية 2001 فانا الى متأكد منه انه الكلية الاعلى فى ادبي وعادة لا تقل عن 95 % وبتاخد اعلى شوية من علمي اعتقد 96 % " على أيامي"
هي 3 اقسام
قسم سياسة
قسم اقتصاد
قسم احصاء
والتخصص من سنة تانية ولازم تاخدي تخصص اضافي فى تالتة بحيث كل تيرم تاخدي مادة من التخصص الاضافي ده
والتخصصات الاضافية " إدارة - سياسة - اقتصاد - كمبيوتر - احصاء "
خريج سياسة واقتصاد بيشتغل فى البنوك وهيئة الاستثمار وزي حلاتي فى هيئة قناة السويس وطبعا ممكن تقدمي فى الخارجية .... مش عارف هي ميزة ولا عيب بس خريج سياسة واقتصاد بيشتغل فى اي حاجة واي مكان لو عنده مهارات كويسة لغة وكمبيوتر ومهارات شخصية
انا شايف انها سهلة مش صعبة بس ياريت يكون ليكي اهتمامات في السشياسة والاقتصاد فلو انتى مش مهتمة والموضوع تقيل على قلبك بلاش احسن خليكي فى السن
انا كنت قسم عربي
والقسم الانجليزي لازم يبقي مجموع الانجليزي فى الثانوية العامة لا يقل عن 45 من 50 تقريبا وطبعا بمصاريف خاصة اعتقد انها مش قليلة حاليا فى المتوسط 4 او 5 حاليا
وفى قسم فرنسي ومصاريفه اعلى اوي ولازم تكوني فى الفرنساوي كويسة اوي او خريجة مدرسة فرنساوي
فى وجهة نظري الاقسام كلها زي بعض لكن ميزة الانجليزي تقوية اللغة وفي مواد كتيرة مشتركة وكلنا بنحضر مع بعض
يارب اكون فيدتك
|