[Engineer ..]

المشاركة الأصلية كتبت بواسطة ENG.HAGAR

تمااام .. انا قولت كدة بردو
طيب انا بس رديت علشان اعرف تحبوا نجمع معلومات عن ايه تانى ..
انا شايفة ان اقتراح الباش مهندس طه فى بداية الموضوه اننا نجيب دروس عن المواد وكدة صعب يعنى ... احنا فى اجازة .. + لو درس تكون حاجات خفيفة كدة وده مش متوفر فى اعدادى ...
علشان كدة لو فى اقتراح تانى ياريت تقولوا علشان نحاول نستفيد بأكبر قدر ممكن
" مثلا لو افكار بسيطة عن تنظيم الوقت "
هنزلها ان شاء الله .....

طيب

بصي يا باش مهندسه وبصوا يا جماعة

أنا مش قصدي دروس بس احنا فعلاً ف أجازة

واللي هيعيش ياما يشوف ،،،،، غرضي والله اننا ندخل صح ونبتدي صح من أول يومممممم

منضيعش وقت خالص في التأقلم مع الوضع

أكيد عارفين أصحاب كتير فحكاية الجو الجامعي هتبقى بسيطه باذن الله

عايزين برناااااااااااااااامج لينا في الكلية عشان اللي نعرف نراجع موادنا مش بس نذاكرها

هنروح الكلية مثلاً 8 الصبح (على حسب المحاضرات أكيد )

أنا عن نفسي هنزل كل يوم 7

هنتقابل ونسلم على بعض وتمام وندخل القاعات عادي جداً

هنختار مكان للرؤية حلو قدام أو زي ما تحب

يكون معانا اسكتش مثلاً أو أي ورق نكتب فيه اللك بتاع الدكتور

ممنوع الكلام أثناء الشرح

ننزل نصلي الظهر ولو في محاضرات نحضررررر منروحش

لما نخلص
ننــ1ــجز
نــ2ــركب
نــــ3ـــرجع البيت

نبيّض المحاضرات ونرقمها ونسميها ونعلمها ونلمها في سلك كبير عشان يكون ده مرجع لينا أخر التيرم ولأي امتحان شفوي أو QUIZ

الكلام ده كده هخلص حوالي ع المغرب

اياك تنام من المغرب للعشا هتدوخ جامد

مانت يا معلم تكون نايم كويس بالليل ومريح جسمك وعنيك شوية

المهم هتصلي المغرب وترجع تتغدى

ايه ده هو أنا متغدتش أول ما رجعت ولا ايه ؟!!!

براحة بس عليّ

لو أكلت هيحصلك وخم ومش هتركز في اللي قاله الدكتور لأن الكلام هيكون لسه سخن و هيحل محله الأكل

يبقى تبيض المحاضرات وتبقى تصلي المغرب وتتغدى براحتك ويا سلام لو تصوم اتنين وخميس رائع

بعد ما تتغدى هتبتدي تذاكر بئه كويس جداً اللي أخدته وتربط باللي فات وتدون ملاحظاتك و كلمة الدكتور عنها و شكل ضحكته (على فكرة فكر نفسك بحاجات زي دي كان قاعد ازاي بيضحك ازاي دا لو بيضحك أصلاً )

العشا اذنت وما ذكرتش الا ربع المحاضرة !!!!!

انسى بئه اللكاعة بتاعت ثانوية عامة و مش هقولك حاول استخدم دماغك لأ انت أكيد لازم تستخدم دماغك في انك تنجز مواضيعك وتجيب المغزى من الكلام بسرعة ومع الوقت ، الغير كافي ، هتتمرن ع النقطة دي
صلى العشا وارجع ادي بوسة وداع للمحاضرات لغاية الساعة 10 أو 11 كده وبعد كده تسأل نفسك سؤال واحد بس
أنا دخل دماغي ايه النهارده ؟
في ناس دخل دماغها معلومات قيمة في الهندسة (المحاضرة)
في ناس حفظت المحاضرة صم (50% يعني مقبول يا باشا لو مفهمتهاش)
في ناس قربت المحاضرة من حياتها العملية وفكرت في مجهود السابقين من العلماء وقالت سبحان الله عقل مفكر ورب مدبر (امتياز باذن الله)
لا أعرف شئ في الهندسة اسمه خير الأمور الوسط

سألت نفسك ؟

بجد ؟

طب احلف كده ؟

مصدقك يا عم خلاص

الساعة كام دلوقتي بئه ؟

12 تمام أوي
لو عندك نت يا عم

بقول لو عندك هتغابى عليك اهدى

لو عندك وتعرف تتحكم في نفسك وانك متلعبش أو تدخل شات تضيع بيه مجهود يوم كامل ادخل وحضر نص ساعة بس للمحاضرة اللي بعد كده (اسأل الدكتور عن اسمها )
حوالي نص ساعة أو اللي يقدر يبقى ساعة يا سلام
يا سلام المعلم اللي يقرا ويكتب عناصر اشطه بجد

خلاص صدعتني نام
بس متنساش تجهز لبسك وورقك وأدواتك لليوم باذن الله
والله يا جماعة مع الأيام هتكسلوا تكووا قميص مش بهزر أنا شوفت بعيني اخواتي

المهم حضرتك كده هتصحى ع الفجر تصلي وتنام تاني لغاية 5،30 كده

وتصحى 5،30 بدون تفاهم تاخد دوش صيف بئه برد حر شتا أي حاجه تدخل تاخد دش اسمع الكلام واسكت

تظبط نفسك وياريت تنجززز يا باش مهندس
هتذاكر حاجة امبارح تاني ع السريع
قاعدة الفجر دي مراجعة مش مذاكرة يعني كده ضربنا عصفورين بحجر (اتصالات)

وربنا يوفقك وتبدأ من حيث البداية

أتمنى روتين محمد طه يعجبكوا