[أ/رضا عطيه]

كرسى العرش



سنة وشهرين وأنا قاعد وحيد غلبان وحواليَّا طوفان ورا طوفان
لاحد حاسس بيَّ ولا حد دارى بوحدتى ونفسى فى رئيس انسان


شايف الكل هيحرق الكل علشان نفسه ومناه يوصللِّى
وأنا اللى ملِّيت من كُتْر مالناس ظلمونى ومن كُتْر ماحصلِّى


أنا ذنبى إيه والبشر بتوعكم ولاد ستِّين فى سبعين و كمان تمانين
يضغط على نَفَسى ويقعد ويحلف ماهو قايم من مكانه ليوم الدين


زهقت منكم ومن أفعالكم ومن النفاق اللى شغَّال عمَّال على بطَّال
وزير داخل يعظَّم وصحفى خارج يعظَّم وكلهم هلِّيبة و رجال أعمال


استحملت كتير عشان البلد دى لأنها بلدى وشجرتى اتربَّت على خيرها
لكن لحد امتى هاسمع إهانتى وأنا مجرد كرسى والبلد بلدى وماليش غيرها



مش هسكت بعد النهارده وهاعْمل زى الشباب الجدعان اللى قاموا بالثورة
لاهَيْهِمِّنى جماعة ولاحزب ولاهخاف من عصابة مهما كان الهدف والمناورة



ماهى الأولاد دول أشرف ولاد وتاج الكرامة على رؤس كل المصريين
وأنا منتظركم فى قصر الرئاسة –- وناوى لكم على نيَّه لوكنتم غدَّارين
وان كان الإنسان مصرى والرمل كمان مصرى والهوى والشمس مصرى
نبقى كلنا مصريين ---



العنوان
كرسى العرش - قصر عابدين - بجوار الميدان