[To Be Is To Do]

" إمتحانات الثانويه إتسربت "

لو لقيت الجمله دى مكتوبه فى اى حته وفعلا لقيت الإمتحانات متسربه على النت وببلاش كمان

ممكن تدخل على عليها وتشوف الإمتحان فعلا ولا حتقول حرام
حتقبل انك تضيع تعب السنه كلها وفى الاخر تاخد ورقه عليها أسأله تحفظها وتدخل تبصمها وتطلع

على فكره امتحان الجبر والفراغيه السنه اللى فاتت انا لقيته على المنتدى هنا قبل ما اروح اللجنه ب ساعتين ... مردتش أبص عليه وروحت اللجنه وحليت مسأله فراغيه كامله غلط وكنت حالل الاختيارى بس ولما روحت بصيت على المنتدى لقيته ان ده فعلا الامتحان بالنص بصراحه اتضايقت جدا يا ريتنى كنت بصيت عليه قبل ما انزل " بس ربنا مش بيضيع تعب مجهود سنه على الفاضى حتى لو حليت غلط فى الورقه .. أهم حاجه إنك عملت إللى عليك وزاكرت طول السنه .... والمفاجأه إنى ألاقى نفسى مقفل ورقه الجبر والفراغيه

الخلاصه : حلك فى الورقه مش بيحدد درجتك دايما .. اكيد حلك سبب فى الدرجه بس أكيد برده تعبك الأيام دى ومزاكرتك بتتدخل فى الدرجه حتى لو كنت حالل غلط فى الورقه ... ربنا مش بيضيع تعبك هدر

فيه ناس كتير بتبقى حاله صح وفى الاخر بتتظلم فى التصحيح .. الناس دى اغلبيتها مش كلها بتبقى مش عامله اللى عليها وممكن تكون زاكرت قبل الامتحان بشهر بس يستحيل يتساووا باللى مزاكرين من شهر 8

بجد وعن تجربه والله ... اللى بيشد حيله وبيزاكر وبيعمل اللى عليه ربنا بيكرمه جامد جدا بس اهم حاجه اعمل اللى عليك الفتره الجايه ... لو كان حلك فى الورقه حلو ممكن تلاقى الدرجه اقل مما كنت متوقع ... متزعلش ... حتلاقى ربنا عوضهالك فى ماده تانيه بالزياده بس الماده التانيه دى انت زاكرتها اكتر فربنا مضيعش تعبك فيها هدر

ربنا معاكم