[ahmedelfangary]

الدرس التالت ::

الحمد لله رب العالمين والصلاة والسلام على أشرف الأنبياء والمرسلين ، وبعد ::
اتكلمنا الدروس اللي فاتت على التأهيل النفسي والديني .. أما الدرس ده هتكلم عن مرحلة المزاكرة الفعلية اللي هقسمها لتلت أقسام
1- ماقبل المذاكرة
2- مرحلة المذاكرة
3- ما بعد المذاكرة
أولا :: ما قبل المذاكرة ..
انتا قبل ما تزاكر لازم تكون عامل شوية حاجات صغيرين .. قبل اي حاجة لازم اكون مجهز المكان كويس جدا .. يكون مكان هادي ( مش بقول كلف نفسك ) وفر الظروف حسب المتوفر عندك ..
لازم يكون فيه مكتب تزاكر عليه .. ويكون ضهرك مرتاح وانتا بتزاكر .. ومتكونش منحني .. وحاول متزاكرش والحيطة في وشك .. علشان متدايقش بسرعة .. حاول يكون في تهوية كويسة علشان يكون في تجديد للهوا في الأوضة .. ومتتخنقش ..
حاول تزاكر بعيد عن السرير علشان متحسش بالنوم حتى لو لسا قايم لان وجود السرير جنبك .. ممكن يلعب دور في النوم .. اياك واياك تزاكر على السرير او على كنبة .. اياك .. لانك ربع ساعة بالكتير وهتنام وكده هيكون يوم ضاع .. لازم يكون المكان هادي جدا .. يعني مش تروح تزاكر قدام التلفزيون .. ربنا سبحانه وتعالى بيقول ( ما جعل الله لرجل من قلبين في جوفه ) .. معنى كده ان اتجاه تفكيرك واحد مش أكتر ..
حاول تعزل نفسك عن المشاكل .. يعني ملكش اي علاقة باللي بيحصل في البيت ( مش تنعزل ) لكن متعملش فيها الشهم .. انا مش بنكر الشهامة وتقعد تحل في مشاكل الناس .. ملكش دعوة بأي مشكلة .. يعني اعزل نفسك تماما عن المشاكل .. يعني المزاكرة حاجة والمشاكل حاجة .. احنا لازم ندي كل حاجة حقها والمشاكل ليها يوم ان شاء الله تتحل .. حاول تزاكر لوحدك .. لان لو هتزاكر مع غيرك هتكون سهرة مش مزاكرة .. زاكر لوحدك ( انا بفضل كده ) ..
المكتب لازم يكون فاضي وعليه الكتاب اللي هتزاكره .. والاقلام اللي بتحتاجها .. وياريت تكون الاقلام مريحة وسلسة في الكتابة .. يعني جهز كل ادواتك .. ومتحطش الكتب كلها قدامك .. علشان متحسش انك معملتش حاجة .. حطها على السرير او في الدرج او في اي مكان ..
حاول متسمعش اي حاجة وانتا بتزاكر .. او اسمع قرآن بس يكون الصوت واطي .. واياك تسمع أغاني .. لانها حرام .. حاول متحطش في بالك اي حاجة من الملهيات يعني متكنش قاعد تزاكر وانتا في بالك هتنزل تعلب شوية كده .. لأ انسا الملهيات والرغبات دي .. ومتحطش اي حاجة تشغلك جنبك .. يعني حاول تقفل الموبايل اثناء المزاكر .. او اي حاجة غيره .. وانتا عارف نفسك ..
ثق في قدراتك .. يعني متقولش انا مش بفهم انا مش بحفظ .. انا وانا .. انتا زيك زي اي شخص عبقري لكن العبرة بالاجتهاد واستغلال القدرات .. ومتخليش التجارب الفاشلة سابقا ئتأثر عليك سلبا .. بس خليها تأثر ايجابا بمعنى انها تخليك تزاكر اكتر وتزود جهدك في المزاكرة ..
لازم تكون نايم كويس .. ولو عندك اي مشكلة سواء في النظر او صداع او غيره لازم تعالجها .. ولازم تكون مشبع حاجاتك يعني تكون شبعان مش اوي يعني .. وحاول تبعد عن الوجبات اللي فيها دهون ..
حط في بالك انك بتتحدى اللي حواليك لو بيقولوا عليك فاشل .. وانك بتحقق امل اللي حواليك .. حط في بالك انك بتتحدى الكتاب ده .. قول لنفسك الكتاب ده هوا اللي هيحدد مصيري .. صدقني هتلاقي نفسم عايز تزاكر من غير ما توقف ..
اوعى تفكر في الامتحان خالص .. واوعى تفكر في النتيجة .. لكن اشتغل على الاتنين دول انك تحقق اعلى حاجة في ساعة حصولهم .. انتا تحط في بالك انك هتبذل اقصى جهدك .. وربنا ان شاء الله مش هيضيع مجهودك .. زي ما ربنا بيقول ( ان الله لا يضيع أجر من أحسن عملا ) ..
لازم متتوترش .. ومتشاركش مشاكلك مع حد يعني مش تيجي تقعد تزاكر ربع ساعة وتدايق وتروح مكلم صاحبك ( خصوصا التليفونات في شهر 2 بتكتر ) انا زهقان ان مش عارف ازاكر .. احنا قلنا قبل كده " كن نفسك " ..
اعرف ان الرقم اللي جنب العلامة دي (%) هوا اللي هيحدد مصيرك .. وحط في بالك انك هتجيب 100% مش اقل .. ومن الغلط انك تحط في بالك نسبة اقل من كده لانك غالبا هتجيب اقل من كده ..
لو تقدر تزاكر وفيه حد جنبك .. يكون احسن مش قصدي يزاكر معاك .. ويا سلام لو اكبر منك .. علشان متسرحش .. وبمناسبة السرحان .. أنا قولت تعزل نفسك عن العالم علشان متسرحش ..
حدد هدفك .. سواء وقتي أو بعيد المدى بالجداول .. يعني انتا هتقول انا رايح ازاكر الفصل الفلاني في المادة كزا .. وانا بزاكر علشان اجيب مجموع عالي وافرح اهلي واخدم بلدي وديني .. وتخلص نيتك .. وفي دعاء ممكن تقوله قبل المزاكرة هوا :

( اللهم لا سهل إلا ما جعلته سهلا وأنت تجعل الحزن إذا شئت سهلا )

ثانيا :: أثناء المزاكرة ..
أنا دلوقت هزاكر وفق الجدول اللي انا عامله .. بس فيه حاجة نتفق عليها .. نخلي وقت المزاكر مزاكرة والراحة راحة .. يعني انتا ممكن تزاكر ساعة ونص وتريح ربع ساعة .. بس تكون ساعة ونص صح .. ومتبصش للمزاكرة على انها كم وقت .. بصلها على انها كم وطريقة .. يعني العبرة بالانجاز مش الوقت .. يعني مش تقعدلي 8 ساعات وانتا بتزاكر في صفحتين .. هنتفق على حاجة ان معدل انجاز الساعة الواحدة هوا 4 صفحات او تلاتة وبرضه بقول ان ده متوقف على طبيعة المادة .. يعني ممكن تفهم فصل فيزيا بحالة في ساعة او ساعة ونص .. وممكن تقعد ساعة متخلصش صفحة .. لكن هيا متوقفة من صفحة لاخرى ومن مادة للتانية .. لكن اهم حاجة متسيبش الصفحة او الجزء غير لما تتقنها 100% .. حاول تتعامل مع الصفحة او الجزء انك مش هترجع ليها تاني .. ان دي اخر مرة تشوف فيها الصفحة دي ..
وعايزين نمشي بنظام السريع المفيد .. يعني انجز اكبر انجاز في اقل وقت بدون ما تضغط على نفسك او تضغط نفسك علشان ميكونش في ضغط على الذاكرة والدماغ .. لان لو حصل كده هيكون فيه عملية مسح عشوائي للحاجات دي .. وهتعمل حاجة اسمها الذاكرة المؤقتة .. وبمجرد ما هتقفل الكتاب هتنسى كل حاجة ..
انا عايز منك حاجة انك تشتري روزمة ورق سعرها تقريبا 25 جنيه مش اكتر .. ومزاكرتنا هتكون على الورق ده .. اي حاجة هتحفظها لازم تكتبها .. مش بقول تكتب الصفحة كلها في الورقة .. وان كنت افضل ده في مواد زي الجيولوجيا .. بس لازم تتعود على طريقة الامتحان .. تدرب على جميع انواع الأسئلة .. اوعى تسيب اي سؤال .. لازم تحل كل حاجة .. لازم تحل كتير جدا لان ده هوا اللي هيحدد مستواك وهيحدد انتا انجزت ولا لأ او اتقنت الجزء ده ولا لأ..
حاول تهتم بامتحانات الدروس .. لانها هتحدد مستواك .. مش معنى كده انك تحبط منها .. لأ .. تعرف غلطك وتصححه .. وتزود جهدك لو اخفقت .. ولو بتجيب درجات حلوة استمر وزود من جهدك ..
انا عارف ممكن في البداية يكون في صعوبة في المذاكرة .. او الحفظ او اي حاجة .. ده لو انتا مش متعود على المزاكرة باستمرار .. وفي ملحوظة كده .. احنا هنقسم اليوم لتلت اجزاء .. او تلت تمنيات .. اول 8 ساعات النوم واوعى تيجي عليهم .. وبعديهم 8 ساعات الدروس وان كنت بشوف دي كتير .. وحاول الدرس اللي مش محتاجه او مش مستفيد منه سيبه .. التمانية الاخرنيين دول هما اللي باقيين ليك علشان تشتغل فيهم .. يعني مفيش مجال تاخد منهم ..
اما المزاكرة الفعلية هتكون مقسمة لـ 4 أقسام ::
1- التصفح .. نظرة سريعة للجزء المطلوب في خمس دقايق بالكتير .. علشان تعرف انتا هتزاكر ايه .. مش معقولة هتدخل في حاجة انتا مش عارفها ..
2- الحفظ والاستيعاب .. يعني بمعنى اصح هتدخل في المنهج كده تحفظ وتفهم .. وانا بقول اوعى تحفظ بدون فهم .. يعني افهم الاول والحفظ يكون بالنسبالك يكون مجرد صيغة .. علشان تكسب المصحح .. لان بصراحة المصحح بيحب الكراسة اللي بتكون قريبة جدا من الكتاب .. واياك تحفظ بدون ما تفهم لانك بمعنى اصح هتكون زي اللي بيحفر في ميه ..
3- التسميع .. وقلنا التسميع ده هيكون على الورق الابيض .. وتكون بتتكلم وانتا بتسمع .. وفي مواد لازم فيها كده .. زي الانجلش علشان تعرف نطق الكلمة .. احنا مش مش عايزين لغة ورق ودي المشكلة لنقص الممارسة للغة .. احنا عايزين نتعلم لغة نعرف نتكلم بطلاقة ..
4- الحل .. وده المقياس الرئيسي .. حليت صح يبقى اتقنت .. محلتش .. مش تحبط بقا وتدايق .. وتقعد مكتئب .. لأ ارجع زاكر تاني وشوف غلطك ..
ومتحلش في الكتب علشان تحل كزا مرة .. واياك والحل الشفوي .. لازم تكتب علشان المعلومة تثبت في دماغك .. وحاول تعمل محاكاة لورقة الامتحان .. بس ده ميخلكش تزاكر التلخيصات اللي هيا عاملة المادة علل ومامعنى وعرف وكده .. لأ انتا تزاكر المادة كاملة من الكتاب ..
وزاكر من مصدر واحد .. يعني مش تقعد تزاكر عربي تمسك الاضواء تحلها وبعدين الامتحان وبعدين الرسالة وبعدين مذكرات فلان .. لأ .. وحد المصدر .. علشان تقدر توفق بين المواد كلها ..
متفكرش في الامتحان سهل ولا صعب .. بص انتا ملكش علاقة بكده .. انتا يهمك انه من الكتاب وانتا بتزاكر الكتاب .. واتعود على جميع أنواع الأسئلة .. واغلب الكتب بيكون فيها حاجة اسمها على ما افتكر مهارات التفكير العليا .. اوعا تسيبها .. لانها بتشغل مخك وبتعودك على انواع التفكير العليا .. ومتقعدش في السؤال ربع ساعة ..
وفي حاجة نسيت اقولها .. زاكر بالساعة يعني حط ساعة قدامك .. أو اشتري ستوب ووتش ( سعرها تقريبا 15 جنيه ) .. او ممكن تكون في الموبايل .. وشغلها .. وشوف انتا بتحل السؤال في كام دقيقة .. واعرف انتا هتقدر تحل السؤال في قد ايه .. ونسق بينه وبين وقت الامتحان .. وحاول توصل لوقت قياسي في الحل ..يعني اقل وقت ممكن ..
واوعا الوقت يخدعك .. ولو مادة اخدت وقت كتير وهتاخد وقت من المواد التانية .. خلي ليها وقت مخصص .. وابدأ المزاكرة بالمواد الصعبة اللي بتكرهها وخلي السهل او اللي بيتحبه علشان متتخنقش ..
انا كده خلصت جزئين من مرحلة المزاكرة الفعلية .. باقي جزء ما بعد المزاكرة ان شاء الله اخلصه البوست الجاي ..

واعذروني على التأخير وعدم التتابع ..
دعواتكم .. ربنا يوفقكم ..