الدرس الرابع :: المراجعة ::
ايه هيا المراجعة .. يمكن أغلب أو يكاد يكون الجميع فاكرين معنى المراجعة بتكون في آخر السنة أو في شهر 4 و 5 .. لا .. المراجعة في كل وقت .. يعني لما تخلص درس لازم تراجع .. ولما يكون عندك امتحان في الدرس لازم تراجع ولازم تراجع في أي وقت .. لازم تراجع أي جزء تنتهي منه بحيث تكون متقن ليه .. انا عاوزك لما تزاكر درس تلم بيه من جميع جوانبه .. تكون خبير في الدرس بمعنى أصح .. علشان لما يحاول يجيب سؤال فيه خدعة او لفة في الامتحان تكون انتا عارف هوا عايز ايه .. لانك عندك خلفية واسعة عن الموضوع ..
المراجعة تكون ازاي ؟؟
يمكن السؤال ده بيتوقف على طبيعة مزاكرتك .. لكن خلينا نمشي بمدأ .. زاكر ربع ساعة وحل ساعة .. ايوه بالزبط كده .. لان مراجعة او مزاكرة من غير حل كانك معملتش حاجة .. لان بينك وبين المادة ورقة الاسئلة .. فانتا ازاي هتتعامل مع حاجة انتا مش عارف طبيعتها ازاي او هيا بتحتاج منك ايه .. فلازم تحل اكبر قدر من الاسئلة .. وسيبك من اللي بيقولك تكرار ومش تكرار .. على فكرة كل ما تكتب المعلومة كتير كل ما يكون صعب تنساها ..
طيب المراجعة هتكون بالورقة والقلم .. مش بقولك اكتب الكتاب كله .. لا .. احنا مش بنحفظ وخلاص .. احنا بنفهم والحفظ بالنسبة لينا صيغة مش اكتر علشان المصحح يكون في صفنا .. وانا عارف انكم هتواجهوا ناس معاكم في الدروس خصوصا في الاحياء والجيولوجيا .. بيسمعوا الكتاب كله .. انا عايزك تنسى الكائنات دي .. احنا بنفهم الاول والحفظ بالنسبة لينا مجرد صيغة بس .. واياك تحفظ بدون متفهم لان بالطريقة دي معرض انك تنسى اللي حفظته بسهولة جدا .. وبكرر مرة تاني لازم تحل اكبر قدر من الاسئلة ولازم تكتب وانتا بتراجع لان اليد ليها ذاكرة .. وزي ماقال انس بن مالك رضي الله عنه ( يابني قيدوا العلم بالكتاب ) ..
يعني على سبيل المثال مادة زي الأحياء .. اللي في اعتقاد معظم الناس انها مادة الحفظ الاولى .. احب اقول ان الحفظ فيها لازم يكون مبني على فهم والا كده مش هيكون لمزاكرة أي لازمة .. وعايزك لما تراجع تستخدم الروابط بشكل كبير جدا .. لان المخ بيفتكر المواقف اكتر من العبارات او الحروف ..
ليه المراجعة لازم تكون بشكل مستمر ..
لان المخ لما بتدخل ليه معلومة بيحاول يشوف ليها مكان .. فهيحذف من الحاجات القديمة اللي عنده اللي انتا مش مثبتها كويس .. وهكذا .. فهتكون كانك في حلقة مفرغة ومش بتعمل حاجة غير انك بتتعب نفسك بالمزاكرة بدون ناتج ..
وكنت اتكلمت قبل كده على انكم ممكن تراجعو المنهج 3 او 4 مرات ..
خلينا نكون واقعيين شوية .. مراجعة 3 او 4 مرات ممكن جدا .. لكن الية المرات دي هتكون حسب موقفك من المزاكرة من اول السنة .. والطلاب في الحالة دي هنقسمهم 3 اقسام ::
1- النوع الاول : اللي شغال تمام من اول السنة .. ومثالي جدا في مزاكرته وبيراجع بشكل مستمر ..
2- النوع الثاني : اللي شغال نص نص .. وشوية يشتغل وشوية يقف وهكزا .. لكن نقدر نقول انه مابين النوع الاول والتالت ..
3- النوع الثالث : اللي ميعرفش أي حاجة عن المنهج "" تقدر تقول مفتحش كتاب "" ..
نيجي للنوع الأول ::
احب اقولك انك في الفترة دي تمام وربنا يوفقك ويوفق الجميع .. انتا دلوقت تعتبر ملك .. تعتبر في بر الامان .. بامكانك تراجع وتتقن قبل شهر خسمة .. وتحل كمان .. انا عايزك تفضل زي ما انتا ومينزلش مستواك .. عايزك تبذل كل جهدك لسه موصلناش نهاية الطريق .. واوعى تتغر وتتخدع بنفسك ..
النوع التاني ::
وضعك كويس نوعا ما .. مع انه وحش في نفس الوقت .. الوقت لسه معاك وبامكانك تعوض اللي فات وتجيب مجموع كمان وتدخل الكلية اللي انتا عايزها .. بس لازم مضيعش ثانية .. لازم تبذل مجهود خرافي ..
النوع التالت ::
صحصح معايا كده .. انتا النوع اللي عايزين نشتغل معاه كتير الفترة اللي جاية .. احب اقولك وضعك مش كويس .. لكن انتا بينك وبين بر الامان شعرة .. وانتا اللي بامكانك تغير مسار حياتك في الفترة دي .. الانواع التانية مش احسن منك .. بالعكس انتو قريبين جدا .. والفترة الجاية هيا اللي هتحدد .. واسال أي حد دخل ثانوية عامة على ان فترة المزاكرة الصح ابتدت من شهر 2 اللي هيا الفترة الحالية .. احنا النهارده يوم 9 فبراير .. يعني نعتبر اول الشهروباقي حوالي 2/3 من الشهر اضف ليهم 3 شهور يعني لو استغليت الفترة دي كويس جدا .. اوعدك انك هتجيب على الاقل 98.5 % .. بس تستغل الفترة دي كويس .. ومش نقعد نضيع في الوقت ونيجي في شهر 5 نقول عايز ااجل وعايز اعيد السنة ومش هجيب مجموع والكلام ده .. احنا لسه الوقت معانا ..
خطة المراجعة ..
الكلام الجاي موجه للنوع الاول والتاني ..
باقي في الشهر ده 21 يوم .. بامكانك تراجع فيهم 2/3 من المنهج في جميع المواد او على الاقل تكون مراجعة مبدئية ليك .. هنقسم المواد لمجموعتين .. هنراعي فيهم سهولة المادة وصعوبتها ومدى حبك ليه .. ولفرض ان المجموعتين دول ..
المجموعة الاولى ( عربي + e + جيوليوجيا + كيميا )
المجموعة الثانية (احياء + فيزياء + لغة تانية )
وهيكون فيه مادة مشتركة بين المجموعتين هتتكرر في جميع الايام ودي هتكون مادة انتا ضعيف فيها او مش بتحبها ..
هنقسم المجموعة الاولى على 4 ايام في الاسبوع وفي نفس الوقت هنقسمها في اليوم على مجموعتين .. وحاول متخليش مواد الحفظ مع بعضها ..
المجموعة الاولى ( عربي + كيميا ) المجموعة الثانية ( انجلش + جيولوجيا )
بالنسبة للمجموعة التانية هتتقسم كده :
المجموعة الاولى ( احياء + مادة مشتركة )
المجوعة الثانية ( فيزياء + لغة ثانية )
هنستمر بالنظام ده لنص شهر 3 وهنعتبر دي المراجعة الاولى ده ان لم تكن خلصت المراجعة دي في اخر 2 والكلام ده ليك تحديدا يا نوع واحد .. بعدين من نص 3 لغاية يوم 10/4 هتكون دي المراجعة التانية ودي لازم تكون متقنة جدا .. يعني لازم توصل لمرحلة الصم من كتر الحل مش من الحفظ .. بعدين لو تمكنت انك تخلي العشرين يوم الباقيين في الشهر تراجع فيهم مرة كمان يكون تمام جدا .. ده بالنسبة للنوع الاول .. وانتا يا نوع 2 لو مقدرتش استمر الى يوم 10/5 وبعدين ابدا ركز على المواد الاولى عندك في الجدول للجميع .. ومتتجاهلش المواد التانية خليها لو كل 3 ايام تراجع مادة على بعضها .. ومش هتكون صعبة بالعكس انتا هتلاقي نفسم بتسمع الكتاب من كتر ماحليت .. كده هنكون راجعنا تقريبا 3 مرات كل مادة ..
ولازم امتحانات الثانوية العامة معاك طول الفترة دي .. عند الامتحانات مجمعة من 95 لغاية 2014 ... حل كل دول .. اضافة لمراجعات الكتب .. وكل دول مش صعب .. بس نظم وقتك كويس وحافظ ع الثانية ..
وياريت كل الانواع تسمعني في الكلام الجاي ...
احنا شعارنا الفترة دي اكون او لا اكون .. هما 4 شهور يا اما انك هترتاح باقي حياتك او مش هترتاح خالص .. انا عارف ان الكلية مش هيا الحياة .. لكن في بلدنا انتا حياتك متوقفة على كده ..
قدر قيمة الوقت كويس .. متضيعش وقتك .. بلاش ندم على اللي فات كتير .. هلي ندمك دافع ليك انك تشتغل مش تكتئب ..
افتكر يوم النتيجة .. افتكر فرحة اهلك وانتا بتقول انا جبت المجموع الفلاني .. اتخيل نفسك وانتا بتكتب استمارة الرغبات وبتحط الكلية اللي نفسك فيها وانتا كلك ثقة وفرح .. اتخيل اهلك وهما فرحانين بيك وقرايبك واصحابك وهما بيباركولك ..
ربنا يوفقكم ..
واعتذر جدا عن التاخير والانقطاع ..
دعواتكم ..
__________________
~الّنجَاحُ غًاِلبًا مَا يَكُونُ نَتِيجَة لاتِّخَاذِ خُطْوَةٍ خَاطِئَةٍ فِي الاتِّجَاهِ الصَّحِيحِ~
|