[محمد محمود بدر]

سعر الدولار و ازاي البنك المركزي قلل سعره






ازاي البنك المركزي يقدر كده بقرار ينزل سعر الدولار. طيب طالما يقدر يعمل كده معملش كده من بدري ليه؟

الموضوع سهل جدا. احنا دائماً بننسي اللي قولناه في اول الحلقات. و هو ان الدولار و اي عمله الحقيقه هو سلعه زي بقيه السلع سعرها يخضع لآليات العرض و الطلب . رجعنا للكلام المكلكع. يعني ايه؟ يعني لو المعروض من سلعه كتير في السوق اكثر من الطلب عليها لازم سعرها ينزل. يعني لو ناس كتير معاها دولارات و عاوزه تبيعها في السوق اكثر من الطلب علي الدولارات دي فلازم سعر الدولار ينزل.زي بالضبط لو كان السوق فيه طماطم كتير أكتر من حاجه الناس فلازم التاجر ينزل سعر الطماطم عشان يبيع اللي معاه.

طيب حد يقول انتم حتجننونا ليه؟ مش انتم قلتم قبل كده ان موارد مصر من الدولار اقل من احتياجاتها ؟ و احنا كلنا عارفين ان في ازمه دولار. يبقي المفروض وفق كلام العرض و الطلب بتاعكم ده ان سعر الدولار يزيد مش يقل زي ما حصل.

جميل. تعالوا ندي مثال. المعلم محمد العسكري تاجر طماطم كبير في السوق. مشكله السوق السنه دي ان الجو حر قوي و الطماطم باظت في الارض و بالتالي المعروض من الطماطم قليل جدا و الإقبال عليها كتير فأسعار الطماطم زادت قوي. الناس بدأت تشتكي. و المعلم محمد العسكري بحكم انه تاجر كبير في السوق خاف ان الناس تدخل تكسر المحلات و تاخد الطماطم. قوم يعمل ايه. قرر انه ينزل سعر الطماطم جامد و يبيعها. طبعا الناس كلها بقت تشتري الطماطم من المعلم محمد العسكري بس. بقيه التجار مكنش قدامهم غير انهم كمان ينزلوا السعر لان المعلم محمد العسكري هو اكبر تاجر طماطم في السوق و عنده اكبر مخزون من الطماطم.

طيب ما المعلم محمد العسكري راجل طيب قوي اهوه. امال انتم زعلانين منه ليه؟ المشكله ان الكلام ده موقت و كمان بيخلي الحاله في السوق تبقي اسوء كمان في المستقبل. ليه؟

مشكله المعلم محمد العسكري ان الطماطم اللي معاه كميتها قليله و محدوده لان إمداد الطماطم قليل. و حتي دلوقتي لما بيعوز طماطم بيضطر يستلفها من المعلم حسن السعودي اللي هو تاجر كبير قوي في السوق اللي جنبنا. لكن حتي المعلم حسن السعودي برضه الطماطم عنده فيها مشكله. لذلك المعلم محمد المصري بيستلف طماطم مش بتاعته و بيديها للناس بسعر رخيص لكن مخزون الطماطم عمال يقل. و طبعا هوه فرض علي التجار كلهم ان يبيعوا بنفس سعره القليل لكن مش حيقدروا يستمروا كده كتير.

كمان العك ده حيعمل مصايب اقتصاديه قادمه في السوق. ازاي؟ طبعا في ناس شاطره و شايفه ان المعلم محمد العسكري مزنوق و عمال يبيع طماطم رخيصه عشان الناس متكسرش محله. حيعمل ايه الناس الشاطره دول؟ حيدخلوا يشتروا الطماطم الرخيصه اللي المعلم محمد العسكري عمال يبيعها و يخزنوها في تلاجات و لما المعلم محمد العسكري يخلص المخزون اللي عنده و ان المعلم حسن السعودي يزعل و يوقف تسليف طماطم زي ما حصل قبل كده فيدخل الناس الشاطره دول يبيعوا الطماطم اللي خزنوها بسعر عالي و يعملوا الفرق. بالعكس الناس دي حتتحكم في السوق و حتغلي تمن الطماطم جدا.


هل الناس دي وحشه؟ إطلاقا. هم بس بيستخدموا غباء المعلم محمد العسكري و انه مش فاهم ان مشكله الطماطم ان المعروض منها قليل و ان المعروض ده مش حيتحسن الا اذا انتجنا طماطم!
(اللي هوه يعني الدولار مش حينخفض بشكل دايم الا اذا مصر تحولت لدوله صناعيه منتجه. مش دوله تعتمد علي الخدمات السياحيه )

اللي عمله المعلم محمد العسكري هو الآي بنسميه short term dislocation. يعني السوق حصل فيه كسر مؤقت. ده مش بيغير من اساسيات السوق ان العرض اقل من الطلب. هو بس بيعمل تاثير مرحلي مؤقت

علي فكره الناس الشاطره دي اللي بتخزن الدولار دلوقتي عشان يضاربوا عليه هم بس بيستخدموا اليات السوق لمصلحتهم
الفرق بين المعلم محمد العسكري الحقيقي بتاع الدولار و المعلم العسكري بتاعنا بتاع الطماطم ان بتاع الطماطم بيشتغل في طماطم بتاعته. بتاع الدولار بيعمل أرباح من دولار هو ملك الشعب المصري.


دى حكاية الدولار