انا كطالب فى معهد العاشر ومن خلال دراستى فى المعهد اقدر اقلوكم على كل حاجة بالتفصيل الممل . بس انت فضيلي نفسك كدة
.. بسم الله
أولا : نظام الدراسة بالمعهد اللى هو نظام الساعات المعتمدة : الحقيقة النظام ده المفروض انو بيخلى الطالب حر نفسه ومتحكم فى كل حاجة يعنى 1- هوة اللى بيختار المواد اللى هيخدها
2- وهوة اللى بيختار الدكاترة
3- وهوة اللى بيختار مواعيد المحاضرات وايام الاجازة
4- وكمان بعد الميدترم لو جاب درجة وحشة ولقى نفسه مش هيقدر يكمل فى المادة او مش عجبه الدكتور او اي حاجة ممكن (يسحبها) والسحب معناه ان الطالب كأنه مسجلش المادة ولا خد فيهها حاجة ومش هتتحسبله فى التقدير (GPA) .
كل اللى فات ده جميل اوى صح .. انا عن نفسي لما سمعت الكلام ده قبل دخول معبد العاشر كنت فرحان اوى ان النظام ده موجود عندنا وانا اللى هختار كل حاجة براااحتى
لكن للأسف والندم الشديد .. الواقع مغاير تماما لكل المميزات المذكورة بالأعلى باستثناء رقم 4
وهقولك فى الاخر ليه .
هتقولى طب ازاي مش ده نظام امريكى واوروبي وبلا بلا بلا .... ؟! اقولك انا بقى اللى فيها :
أولا : التسجيل
فى بداية كل ترم هناك ما يعرف باسم التسجيل وما ادراك ما التسجيل ... التسجيل عبارة عن عمل جدول لنفسك تختار فيه المواد اللى عايز تدرسها والدكتور ومعاد المحاضرة وكل الكلام الجميل اللى قلناه فوق ده .
وبيتم عن طريق النت او بطريقة يدوية (ورق) .. التسجيل عن طريق النت بيتم من خلال سيرفر غريب وعجيب الشكل ! تحس انه من ايام كمبيوتر الصخرة
و لازم تحمل برامج معينة ومتصفح مخصوص لفتح هذا السيرفر اللعين . المتصفح ده اسمه net scape اغبى من internet explorer بكتيييير
. فطبعا السيرفر بيكون عطلان معظم الوقت
وتعد بقى تعمل ******* و restart للصبح وطبعا متعصب عشان انت مش قدامك غير ساعتين بس تسجل فيهم وكل مجموعة من الطلبة ليهم ساعتين فقط وده عشان السيرفر اللذيذ مبيستحملش عدد كبير يخش عليه ومع ذلك السيرفر بيديك error ومبيفتحش معاك .. وعلى هذا الحال لغاية مربنا يفرجها والسيرفر يفتح معاك ... فتتفاجئ بقى يا سيدى بأن مجموعات الدكاترة اللى انت عايز تسجل معاهم مغلقة
لان كل مجموعة بتاخد عدد معين من الطلاب (60 طالب مثلا) وبطبيعة الحال الطلاب بيسيبوا الدكاترة الصعبة (اللى بيسقطوا اكتر من نص الطلبة اللى معاهم) ويروحو للدكاترة ولاد الحلال اللى هما قليلين اوى عندنا عشان كدة المجاميع بتاعة الدكاترة الكويسين بتقفل وميبقاش قدامك غير الدكاترة اللى انت مش عيزهم .. واللى بيزود الطين بلة ان عدد المجموعات اساسا قليل بالنسبة لعدد طلاب المعهد .. ده غير ان فيه مواد بيحتكرها بعض الدكاترة يعنى غصب عنك هتسجلها معاه يا إما تأجلها بقى لأجل غير مسمى (لغاية لما الدكتور ده يمشى من المعهد او يحصله حاجة
) . وتنتهى فترة تسجيلك وتعد تلطم لانك معرفتش تسجل حاجة من العشرين يونت اللى المفروض تسجلهم ... طبعا الكلام ده بيبقى فى الاسبوع اللى قبل الدراسة مباشرة و اول اسبوع فى الدراسة بيفتحوا التسجيل بس كل واحد فى يومه بردو (يعنى انت مثلا ليك يوم التلات تسجل فيه فيمنفش تسجل فيوم تانى) وطبعا الناس كلها تقريبا مسجلتش لسة .. اللى سجل 15 يونت ده يبقى عالمى واللى سجل 12 واللى 5 واللى لسة مسجلش خالص اما عن الشخص اللى سجل العشرين يونت بتوعه فده بقى بنعمله حفلة صغيرة كدة عالضيق
.. فبتلاقى المعهد كله سايب الدراسة اللى بدأت وواقف عند مبنى التسجيل .. وطبعا عشان تفتح المجموعة اللى عايز تسجل فيها يطلع عينك .. كأنك فى مصلحة حكومية بالظبط .. بتجيب ورقة مخصوصة للموضوع ده اسمها ورقة فتح مجموعة وتملاها وتديها لرئيس القسم وهوة بقى على حسب مزاجه يمضيلك او ميمضيش انت وحظك بقى .. لو مضالك بتروح تقف فى طابور مبنى التسجيل عشان تدى الورقة للموظف ويسجلك المادة . هتعمل كدة فى كل المواد اللى انت عايز تفتحها وطبعا هتنجح فى فتح بعض المجاميع وتفشل فى اخرى وتضطر تسجل بقى اى مواد مع اي دكاترة وفى اى معاد عشان تملا جدولك وتسجل العشرين يونت اللى انت دافع فلوسهم مقدما .
وبعد انتهاء فترة التسجيل وضياع اول اسبوع او اسبوعين من الدراسة فى التسجيل .. ندخل بقى على مرحلة الدراسة نفسها .
مرحلة الدراسة
1- عدد المواد اللى بتخدها فى الترم الواحد حوالى 8 مواد او اكتر كمان .
2- مبتبقاش ملاحق بقى امتحانات طول الترم تقريبا من كويزات لميدترمات لشيتات ....
3- امتحانات الميدترم عندنا بتبقى وسط الدراسة عادى يعنى المحاضرات مش بتقف لالا بتدرس عادى خالص وتمتحن امتحان المادة فى المحاضرة بتعتها . يعنى مثلا : انت جدولك اليومى العادى عندك يوم الحد المحاضرة الاولى رياضة والتانية فيزيا والتالة انتاج .. وجت امتحانات الميدترم وامتحان الانتاج يوم الحد .. يبقى انت هتروح تاخد محاضرة رياضة وبعدين فيزيا وبعدين تروح تمتحن ميدترم الانتاج فى المحاضرة التالتة
4- ممكن يبقى عندك 2 او 3 ميدترم فى يوم واحد وحصلت معايا والله .
5- نظام الدرجات عندنا كل مادة 100 درجة متقسمين كالاتى : 30 ميدترم 30 اعمال سنة ودول فى ايد الدكتور بشكل كامل. و40 فينال . وده هنتكلم عليه فى الاخر .
6- عندنا مواد ثقافية وادارية وتجارية بالهبل ده غير بقى الــ8 كورسات بتوع التربية الرياضية (الألعاب) اللى مش موجودين فى اي حتة فى العالم ودول اجبارى وفيهم نظرى وعملى وميدترم وفينال وكل حاجة .. والله مبهزر الكلام ده بجد . وفيه ناس بتشيل المواد دى .
7- السحب بقى دى الحاجة الوحيدة اللى المعهد بيعملها صح لانه بيستفيد منها ماديا لأنك فى اول الترم بتدفع المصاريف بتاعة 20 يونت ولو سحبت مادة مبتخدش فلوسها ولا حاجة وهتضطر تسجلها تانى وتدفع فلوسها تانى وممكن السحب الكتير يأخرك فى التخرج فهتشرف بقى فى المعهد كام سنة زيادة كدة . فتلاقى المعهد بيفتح السحب لمدة اسبوع وبعدين يقفله وبعدين يفتحه تانى لمدة يومين
عشان اللى مسحبش يلحق يسحب
.
8- الفينال بقى : طبعا جدول الفينال مش بيبقى موحد عالكل لأن كل واحد مسجل مواد غير التانى فبتبقى الدنيا عك فى عك وتلاقى عندك 2 او 3 فينال في يوم واحد زي الميدترم (انا مرة كان جدولى فيه اربع مواد فى يومين ورا بعض يعني كل يوم مادتين ومادتين تقال ) والجديد فى الفينال بقى انك ممكن يبقى عندك مادتين فى نفس الوقت بالظبط
وسعتها بقى بتقدم طلب
انهم يأجلولك واحدة فيهم او يمتحنوك مع مجموعه تانية .
9- ضغط نفسي وعصبي طول الترم .
10- عندنا ترم تالت
وده بيبقى تدريب وممكن تسجل فيه مواد بردو بس 6 يونت بس .
انا كدة خلصت معلش طولت عليكو بس انا حبيت احكى عن كل حاجة بالتفصيل الممل عشان لو حد هيخش يبقى عارف هوة داخل على ايه ولو حد عنده اي استفسار انا تحت امره .. وربنا يوفق الجميع .