شوفوا ياجماعة .. خلينا نكون منطقيين ... أنا بدرس كمبيوتر لطلبة فى إعدادى على شكل مجموعات تقوية .. لكن أنا فى الأساس مش راجل تربوى أنا خريج نظم معلومات .. ولأنى فى بلد أرياف وأنا الوحيد فى القرية إللى شغلى كله فى صيانة الكمبيوتر والشبكات .. الأهالى والطلبة طلبوا منى السنة إللى فاتت إنى أدى دروس وفعلا بدأت السنة إللى فاتت .. المدرسة اللى فى القرية إللى أنا فيها الأول فى 3 إعدادى سنة 2012 كان شايل ملحق كمبيوتر .. وده خلى الناس تهتم بالمادة نسبيا .. لكن كمدرسين يهمهم فى المقام الأول دخل إضافى ودروس وخلافه .. ثانيا معظم المدرسين حاسين إن مادة الكمبيوتر دى بنت أختهم وبيضايقوا من موضوع عدم إهتمام الطلبة بيها .. والأهالى شايفنها عبء مادى جديد .. والطلبة شايفينها عبء إضافى عليهم .. انا ليا تحفظات كتير جدا على وضوع وتوزيع المناهج فى المرحلة الإعدادية يعنى أولى وتانية عمال تمط وتماطل فى حاجات تافهة وقلبتها نظرى .. وتصدمه فى تالتة ببرمجة ... سيبك بقى من الكلام ده كله إللى خارج الموضوع أنا الحمد لله رفعت المستوى عندى فى القرية لدرجة إن فيه طلبة عندى قفلوا الدرجة النهائية كتير ودى كانت أول مرة تحصل فى المدرسة ... لكن بالنسبالى متفائل جدا بمستقبل المادة .. أنا رؤيتى ويمكن تكون غير صحيحة لأنى خارج المطبخ التعليمى .. لكن رؤيتى إن الإهتمام بالمادة هيزيد أكتر فى السنين الجاية .. يعنى حاسس إن درجة الكمبيوتر هترتفع بشكل تدريجى ممكن تبقى 30 أو 40 درجة بدل 20 .. ومع الوقت الموضوع ده هيكون ضرورى ... أما بالنسبة للثانوى فالدرجة فى المستقبل ستضاف للمجموع وفى الحالة دى هتفتح باب رزق لناس كتير ... لكن الأهم علشان ربنا يكرمنا ياريت كل مدرس فى مدرسته يشتغل زى مابيشتغل فى لدرس ...أنا عن نفسى مهتم جدا فى الدرس بمستويات كل الطلبة يمكن علشان الأعداد قليلة وعندى وقت ... لكن برضه لو مدرسين المدرسة إشتغلوا صح .. صدقونى هيبقى ليهم إسم ويدوا دروس أكتر ... إسمك كمدرس فى المدرسة بيتعمل داخل المدرسة فإتقوا الله فى عملكم وفى أرزاقكم وأبشروا وتفاؤلوا بالخير تجدوه وعذرا للإطالة
|