اثناء مانتا هاتبقى ماشي في الجامعة هايقابلك عروض عن كورسات كتيرة فحت
تيجي تفتح بورشور تلاقي كاتبلك الدبلومة العبقرية الشاملة
كمبيوتر وانجليش وسوفت سكيلز وكل دا بـ 350 جنيه بس ويا بلاش !!
تفتح بورشور تانى تلاقي كاتبلك هدفنا هو وصولك لوظيفة احلامك
تفتح بورشور تالت يقولك غير حياتك في 3 ايام مع المحاضر مش عارف مين .. ومابين قوسين عرض خاص بـ 200 جنيه بس !
ودماغك بقى هاتبتدي تتقلب وتقول هوا ايه كمية العروض الرهيبة اللى قدامي دي ؟
عشان تبقو فاهمين بس .. الناس دي هدفها ربحى وشششش ولا شئ غير ذلك
وبيستغلو حاجة الطلبة وللاسف جهلهم في انهم يسوقو لكورسات زي دي
طبعا انا مش هاقول ان الكورسات دي غير مفيدة .. لاء هيا مفيدة طبعا بس مش بالقدر اللى يخليك تجري عليها وتدفع فيها فلوس زي دي
لان اولا انت هاتضيع وقتك في حاجة تعبانه .. ثانيا انت بتصرف فلوسك في حاجة انت مش هاتكمل فيها
وبالتالى لازم تحط في دماغك مبدأ هــــــام جدا
انا اى فلوس هادفعها في اي كورس دا لازم يضيفلى حاجة جديدة في مهاراتى وشخصيتى .. ولو ماضافش يبقى انا يا برمي فلوسي في الهوا يا انا اتقلبت
دي كانت بداية صغيرة كدا عشان بس نوضح النقطة دي منعا لعدم حدوث حيرة او احساس انك تايه ومش فاهم حاجة
موضوعنا النهارده بيتكلم عن حاجة هاتسمعوها كتير دا ان ماكنتوش سمعتوها اصلا ..
SOFT SKILLS
الكلمة دي انتشرت انتشار رهيب جدا لدرجة انها عملت هوس عن الناس
ووصلت لدرجة ان السوفت سكيلز دي بقت حاجة مهمة جدا
ولازم يتاخد فيها كورسات بالهبل عشان تبقى جامد
مع ان الوضع مختلف تمااااااااما
بس قبل مانخش في الجدل دا لازم نعرف يعنى ايه سوفت سكيلز اصلا ؟؟
بكل بساطة هيا مجموعة من المهارات اللى بيمتلكها الشخص بداخل شخصيته واللى بتميزه عن غيره .. ازاى ؟
كل شخص ربنا خلقه عنده عقل وقدر من الذكاء بيتعامل بيه
ودا معناه ان مافيش حد اسمه غبى .. لان مصطلح الغباء اصلا يعنى انتفاء صفة التمييز والعقلانية
وعشان كدا انت ماتقدرش تقول على الحيوان انه غبى .. ليه ؟ لان ربنا رزقه بالعقل ولكن نسبة الذكاء عنده لا تمثل شئ بالنسبة لذكاء الانسان
السؤال المطروح هنا .. هل كل انسان ذكي بيبقى ناجح في حياته ؟
مش شرط خااااالص .. مانتا عندك جون جراي دا هوا مؤلف كتاب من اشهر الكتب (men from mars & women from Venus)
والكتاب بيتكلم عن ازاى الراجل والمرأة يتعاملو مع بعض
ومع ذلك الراجل دا اتجوز اربع مرات وطلق !! هل دا معناه ان هوا ناجح في حياته ؟؟
مثال آخر .. اينشتاين كان راجل عبقري جدا لدرجة انه توصل لامكانية السفر عبر الزمن بشرط اختراع آلة تمشي بسرعة الضوء
ومع ذلك حياته الاجتماعية كانت فاشلة وطلق مراته ؟
هل دا معناه انه هوا ناجح في حياته ؟؟
اذن مصطلح النجاح هنا هو مصطلح نسبى
ايه اللى بيخلي النجاح هنا نسبى ؟ لان الاعتماد على الذكاء بس بدون اي عوامل مساعدة دا بيفشل علاقتك بالناس
ودا معناه ان الذكاء مش كل حاجة
الخلطة السحرية بقى اللى ناس مؤلفين وسيكولوجيين اكتشفوها
هيا خلط مهاراتك العقلية مع مهاراتك الاتصالية مع الاخرين
والامثلة كتيرة جدا في الحكاية دي ..
1- جمال عبد الناصر : مهاراته الاجتماعية والاتصالية مع الناس كانت عالية جدا ودا اللى حبب الناس فيه .. بالرغم من انه كعقل وذكاء ممكن يكون مش على المستوي المطلوب
2- اوبــاما : مالوش فيها وبطيـــخة !! ومع ذلك مهاراته الاتصالية عالية جداااااااا لدرجة خلت الناس تصدق تصريحاته لما كان في جامعة القاهرة وقعد يقول ويوعد وعلى اساس الوعود دي خد جايزة نوبل
اذن عشان تبقى بنى ادم ناجح في حياتك .. لازم تلعب على الوترين
وتر العقل اللى ربنا مديهولك .. ووتر مهاراتك الاجتماعية واتصالك مع الناس
المهارات الاجتماعية دي بقى زي ايـــه ؟؟
1- مهارات الاتصال (Communication) :
اتصال يعنى ان انت تبقى كونتاكت مع اي حد قدامك سواء بالكلام او بالاشارة او بالايماءات حتى .. بحيث ان انت تبقى مستعد لارسال شئ او استقبال شئ .. المهم يبقى فيه اتصال
والحد اللى انت بتتصل معاه دا ممكن يكون انت (intrapersonal communication)
او ممكن يكون حد تانى (interpersonal communication)
وعشان تبقى بتتصل كويس مع الاخرين لازم يبقى عندك 3 حاجات
- رسالة ذات هدف محدد انت عايز توصلها للطرف الاخر
(Good Speaker)
- بتسمع كويس من الطرف الاخر عشان تعرف ترد عليه
(Good Listener)
-طريقتك فى القاء الرسالة نفسها تكون كويسة ومعقولة
والحمدلله معظمنا عندنا اول حاجتين اللى هيا الرسالة اللى بتتقال والسماع الكويس .. لكن طريقة انك تقول الحاجة هيا دي بقى اللى عايزة تظبيط
وعشان تتظبط لازم تظبط حاجتين
- درجة صوتك (Tone of your voice)
ودي بتبقى على حسب المكان والموقف .. يعنى ماينفعش تبقى جوا شركة وتبقى بتتكلم مع مديرك مثلا بصوت عالى
او تبقى في حفلة وطالع تقول كلمة وتبقى بتهسهس فى المايك
- الاشارات الجسدية (body signals)
وعلى فكرة المسمى الصح ليها body signal مش body language
لان مافيش حاجة اسمها لغة جسد .. لان تعريف اللغة ذات نفسه هو عبارة عن مجموعة من الرموز او الحروف بتنطق او بتؤدى بطريقة معينة بحيث ان يتم الاتصال مع الناس من خلالها
ودا معناه ان كل لغة بتبقى منعزلة عن غيرها .. يعنى الـ I فى الانجليش غير الـ je فى الفرينش غير الـ soy فى الاسبانى
وبما ان الجسد دا حاجة موحدة بين البشر فامينفعش تقول لغة الجسد
لانك لو قولت لغة الجسد دا هايبقى معناه ان اى اشارة معينة هاتعملها بايدك او بجسمك هاتبقى موحدة في اي حتة في الدنيا
ودا شئ خاطئ لان فعلا الاشارات بتختلف من بلد لبلد .. يعنى لو طبطبت مثلا على كتف حد في مصر دا معناه ان انت بتثنى عليه وعايز تقوله جود جوب واستمر للامام مثلا
وعلى العكس لو عملتها لو واحد في ايطاليا دا معناه انك عايز تقوله انت شاب مش تمام ومشكوك فيك !!
وبالتااااالى هنا تنتفى صفة اللغة عن الجسد ودا لعدم وجود توحيد للاشارات بين كل البلدان
يبقى لما حد ييجي يتفزلك عليك ويقولك body language شوط فيه
ودا مش كلامي على فكرة .. دا كلام ناس باحثين وعلماء
بس مشكلتنا فى مصر اننا دايما مش اب تو ديت .. واي تحديث لمعلومة معينة بيجيلنا بعدها بفترة طويلة
فالمهم .. الـ Body Language دا شئ مهم عشان اثناء مانتا بتتكلم لازم بتستخدم اشارات وايماءات بتعملها بجسمك سواء بحركة ايدك او وقوفك او حركتك او حتى تعبيرات وشك (Faicial Exprestions) اللى بتبقى من اهم ما يمكن في توصيل رسالتك للناس
2- مهارات القيادة (Leadership) :
نابليون بونابارت قال جملة مشهورة اوي
" جيش من ارانب يقوده أسد افضل بكثير من جيش من الاسود يقوده ارنب "
ودا بيعكس قد ايه القائد دا شئ مهم جدا لان هوا اللى بيبقي فيه ايده سلطة القرار وهوا اللى بيوجه الدفة شمال ولا يمين
وعشان تبقى قائد كويس لازم يتوافر فيك كذا حاجة :
1- لازم يبقى عندك هدف وليك رؤية .. يعنى مثلا الثورة قامت بقالها فترة اهو وما زالت البلد متبهدلة ومانعرفش رايحة على فين
والسبب في دا مين ؟ مين اللى ماسك قيادة البلد دلوقتى ؟ المجلس العسكري صح ؟ طبقا للنظريات الادارية هانلاقي ان المشكلة الحقيقية فعلا في المجلس العسكري .. لا هيا فى اخوان ولا هيا في فلول ولا هيا في شعب
المشكلة في القيادة اللى ماعندهاش رؤية اصلا
2- لازم تبقى قادر على نقل الهدف بتاعك دا للناس التانية وتوضحهلهم بصورة سهلة وبسيطة .. زي مانا بعمل دلوقتى كدا :D
3- انك بخبرتك تهيأ الجو العام لاستقبال هدفك .. يعنى مثلا ماينفعش ابقى انا بقولك قوم صلى وانا اساسا مابركعهاش !!
طبعااااااا مش معنى انك قائد تبقى بتتنك على خلق الله .. بالعكس انت اه قائد بس اذا فشلت هايتحسب عليك وهايتقال في يوم من الايام ان فلان الفلانى فشل في كذا وكان هوا القائد
زي بالظبط هتلر بالرغم من انه كان قائد ناجح لفترة زمنية معينة بس اول ما وقع وخسر الحرب بقى قائد فاشل
طبعا الكلام في الليلدرشيب كتير جدا وفيه حاجات انا عمري ماهقدر اغطيها .. بس انصحكو بالقراية كتير في البوينت دي
3- المشاركة في الفريق (Teamwork) :
قبل مانتكلم لازم نوضح الفرق بين كلمة تيم وجروب
تيم يعنى مجموعة من الناس ليهم قائد وليهم رؤية وهدف محدد ولازم يوصلوله وكل عضو في الفريق دا بيبقى عنصر مهم وبيتحسب على الباقى
اما الجروب فهو عبارة عن مجموعة من الناس جمعهم الحظ والنصيب انهم مع بعض وبيقضو فترة معينة مع بعض وبعد كدا كل واحد بيروح لحاله
وعشان كدا انت في الكلية بيبقالك جروب مش تيم
اما لو كنت داخل في مشروع معين مكلفك بيه الدكتور ومعاك ناس فانتا كدا تبقى في تيم
التــيم عموما من احلى وامتع الحاجات اللى فعلا الواحد ممكن ياخد خبرة من خلالها .. لان انت مثلا معاك 10 زمايلك وعايزين تعملو مشروع معين
لازم تبقى عارف ومتأكد ان الكواليتي بتاعة المشروع لو عملتها لواحدك عمرها ماهاتبقى زي الكواليتي اللى بيشترك فيها 10
ليـــــــــه ؟؟
لان كل واحد من العشرة دول بيشارك بفكرة واتنين وتلاته
وبالتالى بيطلع افكار كتيرة جدا بتساهم في خروج المشروع بافضل شكل ممكن
دا غير ان لما انا اشارك بفكرة وغيري يشارك بفكرة .. انا نفسي بستفيد من فكرته وبتتضاف عندي من ضمن رصيد الخبرات
4- مهارات التفاوض والاقناع (Negotiation & Persuasion) :
مهارة التفاوض غير مهارة الاقناع لان ناس كتيرة بتخلط بينهم برده
بالرغم من انهم مرتبطين ببعض بس طبعا فيه فروق بينهم
التفاوض : هو انك تبقى معتنق فكرة معينة وبتتناقش مع غيرك اللى معتنق فكرة مضادة ليك .. وانت بتحاول توصل معاه لنقطة تعادل بينك وبينه بحيث ان انتا تبقى عملت مكسب ليك وفي نفس الوقت ماخسرتوش
الاقناع : هو انك تبقى معتنق فكرة معينة وبتتناقش مع غيرك اللى معتنق فكرة مضادة ليك .. وانت بتحاول ان انت تقنعه بفكرتك وتزيح عنه الفكرة اللى هوا مقتنعها
اذن مهارة الاقناع هيا اعلى رتبة من مهارة التفاوض .. واى حد عنده مهارة الاقناع بيبقى عنده مهارة التفاوض والعكس غير صحيح
عشان كدا تلاقي دائما وابدا اي حد بيشتغل في مجال الـ sales او الـ marketing بتبقى عنده مهارة التفاوض والاقناع دي عالية جداااا
في الانترفيو ممكن يفاجئك ويديك قلم ويقولك بيعلى القلم دا عشان يقيس عندك قدرة الاقناع دي
او يطلع سيجارة ويقولك انا مش عارف ابطل عادة التدخين دي ويسيب الانترفيو ويقعد يتكلم معاك في قضية التدخين عشان يشوف هل انت هاتقدر تقنعه بان التدخين حاجة وحشة ولا لاء
4- حل المشاكل (Problem Solving) :
شئ ممتع جدا ان يبقى فيه مشكلة وانت بتقعد تحلها
لان دماغك بتقعد تشتغل لغاية مابتجيب اخرها
ومهارة حل المشكلة دي بيتم اكتسابها بالخبرة
يعنى مثلا انت النهارده وقعت في مشكلة وتعبت عشان تحلها وفي الاخر اكتشفت الحل .. جيت بعد كدا وقعت في مشكلة شبيهة ليها في المستقبل
هاتحلها طبعاااااا .. لانك خدت خبرة سابقة
طبعا حوار حل المشاكل دا فيه طرق كتيرة
ويمكن من اشهرهم الـ mind mapping والـ drill down والـ brain storm ..
انا مش هاخوض في كل واحده واقعد اشرح فيها لان فعلا دي عايزة موضوع كااااامل عشان يتشرح .. بس حاولو تقرو في كل واحده فيهم وتدورو على النت هاتلاقو حاجات بالهبل
5- مهارة التحدث الحر (Free Speech) :
فيه معهد امريكي مش فاكر اسمه سأل الناس ايه اكتر حاجة بتخافو منها وكانت نتيجة الاحصائية حوالي 65% من الناس بيخافو من انهم يتكلمو قدام عدد كبير من الناس !!
المشكلة الرئيسية في خوف الشخص من انه يطلع يتكلم قدام الناس انه بيبقى عارف انه هايبقى فيه عيون كتيرة هاتبقى متركزة عليه هوا بس
ودا بيخليه يقلق لانه بيبقى حاطط في دماغه ان هوا ممكن يغلط او يقول كلمة تضحك الناس عليه او يعمل تصرف ويبقى محل سخرية من الجميع .. الخ الخ
مع اننا كل يوم بنتكلم مع اصحابنا وعادي جدااااااا .. يعنى مثلا كام مرة انت خرجت مع صحابك وكنتو كتير حوالي 10 مثلا وجيت في مرة قولت حاجة والعشرة كانو باصينلك ؟ هل عملولك حاجة ؟ عضوك ؟ ***وك ؟!
عااااااادي جدا مافيش اي مشكلة
طب بلاش نبصلها من منظور المحاضر .. نبصلها من منظور المشاهد
كام مرة انت حضرت محاضرة ؟ كتير ؟ هل لما الدكتور دخل بتقعد تتريق عليه عمال على بطال ؟ اه ممكن تتريق عليه مرة او اتنين بس لما بيخش في الشرح غصب عنك بتقعد تسمع لانك مهتم باللى هوا بيقوله
اذن المشكلة هنا بتكمن في ثقتك في نفسك .. زي بالظبط الشاب اللى بيبقى نفسه يكلم بنت ومش عارف يتعرف عليها ازاى وبيبقى قلقان اوي لما بيروح اول مرة يكلمها ومابيبقاش عارف يقول ايه !!
الحل الوحيد للمشكلة العويصة دي هيا زيادة الثقة في النفس والتمرين
والتمرين بييجي من خلال البريزنتيشنز الكتيرة والتحضير الكويس قبل البريزنتيشن
ولو عايز تظبط الحكاية دي عندك حط كاميرا في اوضتك وصور نفسك واعمل البريزنتيشن كأنك بتتكلم قدام الناس ولما تخلص افتح الفيديو واتفرج على نفسك وشوف ايه العيوب اللى انت عملتها وحاول تتفاداها .. وصور نفسك مرة تانية وتالته وهكذاااااااا
انا بالنسبالى اول مرة اعمل بريزنتيشن في حياتي كانت عن موضوع انفلونزا الخنازير وكانت بالانجليش كمان
وطبعا ماقولكوش كنت قلقان قد ايه ووشي محمر وايديا ساقعة وودانى سخنة وحاجة منيلة بستين نيلة
بس بمجرد ما قولت لنفسي اثبت واجمد وطلعت فعلا ووقفت واتكلمت ولاقيت الناس باصالى وقشطة مافيش حاجة دوووووووست
والحمد لله البريزنتيشن عدي على خير
طبعا اكيد كان فيه اخطاء زي عدم الحركة والتركيز على نقطة واحده وعدم الانتباه لتعبيرات الناس عشان اشوف انطباعاتهم والكلام دا
بس طبعا مع الوقت والتمرين والبريزنتيشنز الكتير الموضوع بيختلف والموضوع بيتحول معاك من انك كنت خايف لانك بتبقى حابب الموضوع واول مابتسمع كلمة بريزنيتشن بترشق فيه على طول
اللى عايز اقوله في نهاية موضوع السوفت سكيلز دا هوا كذا نقطة :
1- فيه فرق بين المهارة والموهبة .. لان المهارة انت بتكتسبها بالتعلم والممارسة والخبرة لكن الموهبة دي بتبقى ربنا رزقك بيها وحاجة جواك انت كدا كدا متفوق فيها زي الرسم والغنا والكتابة
وبالتالى حاول ماتسيبش مهارة الا اما تتعلمها او على الاقل تعرف عنها حاجة
2- خليك اجتماعى ودوس مع الناس واعمل صداقات كتير لان كل شخص انت بتعرفه بيزود فيك حاجة وبتستفيد منه بحاجة .. واوعى تبقى منعزل عن الناس لانك انت الخسران في الاخر
3- شارك في انشطة الكلية وماتقعدش في الكلية زي البطة مابتعملش حاجة غير القعدة مع صحابك والاكل والشرب ولعب الاونو
لان انشطة الكلية هيا اللى هاتفيدك فى تنمية المهارات اللى اتكلمنا عليها دي
4- كورسات التنمية البشرية كلها رغى فى رغى .. ليـــه ؟؟
كام واحد سمع لابراهيم الفقى ؟ كتييييييييييير طبعا
وكلنا معجبين بيه وراجل جامد وكل حاجة
بس هل احنا بنطبق الكلام اللى بيقوله ؟ لاء طبعا
يبقى اذن المشكلة كلها هنا بتكمن في كيفية تطبيق الكلام اللى بيتقال في الواقع العملى
انت بتحضر المحاضرة من دول ويقعد يشرح يعنى ايه مهارة اتصال ويعنى ايه مهارة انك تطلع وتتكلم قدام الناس وانت تبقى قاعد مستجم جدااااااا وبتقول يااااه دا ايه الكلام الجامد دا
بس صدقنى بمجرد مابتخرج من المحاضرة بتنسي الكلام لانك مابتحاولش تطبقه عملى
5- اقرا كتيـــر وحاول توسع من ثقافة نفسك واوعى توقف نفسك عند نقطة معينة وتقول خلاص بقى كفاية انا تعبت لان كل يوم بيظهر نظريات جديدة وتحديثات لنظريات قديمة
يعنى مثلا حتى تلك اللحظة في مادة الادارة هاتلاقو نفسكو بتدرسو النظرية التقليدية بتاعة فريدريك تيلور اللى اعتبر ان الانسان آلة .. مع ان النظرية دي عفى عليها الزمن من 80 سنة !!
لغاية ماتكتشفو بعد كدا ان فيه واحد اسمه هنري فايول طور نظرية تايلور وقال ان الانسان كائن حيوي ماينفعش يبقى آلة ولكن لازم نراعى اعتبارات اخري .. والنظرية دي برده عفى عليها الزمن من 70 سنة !!
وماتعرفوش ان فيه واحد ياباني اسمه ويليام اوشي جيه وضرب كل الكلام دا وعمل نظرية سماها نظرية Z وقال ان الموظف لو حسسته بالامان ودخلته من ضمن حلقة الانتاج بصورة مباشرة وحسسته بدا هايديك احلى شغل لانه انتمائه للشركة هايزيد
اللى عايز اقوله ان كتب الكلية لو هاتعتمد عليها لمعلوماتك العامة هاتتبهدل .. انت تعتمد عليها عشان الامتحان بس لكن لثقافتك انت عيش ع النت واقرا كتير
6- فيه حاجة لذيذة اوي انا بقيت اعملها .. كل فترة كدا بقول لنفسي انا لازم اعمل بحث عن حاجة معينة وبحضرلها كانى بالظبط هاعمل بريزنتيشن
وبترجم البحث دا انجليش وبعرف عنه اكبر قدر ممكن من المعلومات
الكلام دا هايفيدك في المستقبل لما تيجي تتكلم مع الناس في موضوع معين او حتى في حياتك العامة هايتقال عليك مثقف وفاهم وواعى
7- حاول تشترك في اي موديل من الموديلز الموجودة جوا الجامعة .. هاتتعرف من خلالها على ناس كتيرة سواء شباب او بنات دا زائد ان من خلالها السوفت سكيلز بتاعتك هاتعلى اوي اوي
فى البوست الجاي ان شاء الله هانعمل حاجة حلوة اوي
هانبتدي نرشح ايه هيا اهم المراكز اللى باذن الله هاناخد فيها الكورسات
اللى اتفقنا عليها خلال الفترة اللى فاتت دي
سواء انجلش او كمبيوتر
ونعمل جدول ظريف كدا نمشي عليه في الفترة الجايه
اشوفكو على خيــــــــر
يتبــــــــــــــع ،،،