لبست المريلة والحمد لله
اى خدمة هكون اول مشاركة واحكى عن انجازاتى انهاردة
للاسف انهاردة ماما وبابا خرجوا
واخويا الصغير كان فى المدرسة وتيتو كان معايا فى البيت وماما وبابا اتاخروا
وطبعا المفروض اننا عايزين ناكل
فتيتو اقترح اننا نجيب اى اكل تيك واى طبعا انا عملت فييها ابلة نظيرة وقلت لا نجيب اكل من برة لا (لانى عارفة انة هيجيب لى حاجة مش بحبها)
فقلت انا خلال ربع ساعة هعمل اكل
ودخلت على التلاجة ودورت ولقيت (كبدة) بس طبعا متجمدة فقلت استنى عليها شوية وتفك من التجميدة دة
وطبعا عملت البدع علشان تفك بسرعة
ورحت قلت الكبدة مش معقول هتتاكل كدة من غير حاجة جنبها قعدت افكر افكر وتفكيرى الهمنى انى اعمل جنبها رز(معرفش ازاى بقى المفروض مكرونة) وجبت الرز وقعدت انقية وكل شوية اقول لتيتو الرز دة كدة متنقى حلو وهو يقولى اه جميل انا جعان بقى
وبعدة كدة عملت الرز وسبحان الله مخدتش فى ايدى كتير غسلتة وعملتة ولاول مرة فى تاريخى اظبط المية بتاعة الرز وغطيت الرز وسيبتة على النار وشوية وهديت النار علية (معرفش لية بس انا كل اما اكون معدية من على المطبخ وماما بتعمل زر بتقولى هدى النار لعلية فعملت زيها)
دة الرز
الكبدة بقى فكت بس مش اوى يعنى
المهم قعدت ادور على الردة مش لاقيت قلت لتيتو الردة بتتجاب منين قالى معرفش قلت طب بقسمات مطحون حتى قالى انا مش هنزل لانى لو نزلت هنزل اجيب اكل من برة
انا قلت خلاص انا هتصرف
رحت قعدت اقطع الكبدة قطع صغننة لحد اما ايدى وجعتنى من السكينة وخلصت الكبدة وقلت طبعا هعملها اسكندرانى او شبيهة ليها
ومعرفش لية لفت نظرى ان فى فلفل اخضر رحت قلت اقطع فلفلاية واحدة بس معاها ودوقتها الاول طبعا لتكون مولعة وساعتها تيتو مش بعيد يرمينى من الشباك وطلعت نص نص رحت قطعتها معاها وحطيت بقى الخلطة اللى ماما كنت بشوفها بتعملها (بصل وتوم وفلفل وملح ) دة غير انى قعدت سنة بقشر بصل واخرج كل شوية من المطبخ مدمعة واقول طب فيها اية لما افرمة نا غاوية تعب بس تقولى اية بقى
والحمد لله حطيت محتويات الكبدة على النار وسيبتها لحد اما استوت
والرز طبعا خلص
وبعد اما الاكل خلص بدقايق لقيت ماما وبابا جم ماما قالت لنا معلش غصب عننا وقالت لنا عن سبب التاخير
وقالت لنا انتو مكلتوش لحد دلوقتى انا قلت لا لسة مكلناش فزعلت وصعبنا عليها
وقالت لى ما انا مش ساية بنت فى البيت انا سمعت كدة قلت والله يا ماما انا لسة مخلصة طبخ
ماما مش صدقتنى غير لما دخلت المطبخ ولاقيتى عملت اكل فعلاوخدى عندك بقى اول الغلطات
1_الرز اولا مكنش فية ملح
2_الكبدة عمر ما يتعمل زر جنبها المفروض مكرونة رغم انة كان فية مكرونة بس انا مش عارفة بقى اية اللى خلانى اعمل زر
انما الكبدة طلعت حلوة الحمد لله:D:D:D:D
دة غير انة حصل اتلافات فى المطبخ كالعادة تقريبا كوباية اتكسرت بس دى انا والله مشعارفة وقعت ازاى انا سمعت حاجة عملت دششش ببص ورايا لاقيت كوباية وقعت منين دة مش عارفة
وطبق صينى اتكسر واانا بغسل المواعين
(فدااااااااايا على رأى ماما) انا مش عارفة هيفضل فدايا كدة لحد امتى والله انا حاسة انى ماما اخر اما تزهق منى هتكسرنى انا بدل الحاجات اللى عملالة تتسكر بسببى
:D وانا اعمل اية المطبخ هو اللى معفرت
بس الحمد لله فى امل يا جيجو انى ابقى ست مطبخ
يالا يا جميل طولت عليكى علشان تعرفى بس ابداعات انتمتك