ازيكو يا دكاتره
دلوقتي مش هقول بنات بقي عشان بقي في ولاد 
بصو وانا بتصفح احد المنتديات لقيت الكلام ده
وحسيت انه هيفيدكو
بسم الله الرحمن الرحيم
انا فتحت الموضوع ده يا جماعه عشان لاحظت ان في طلبه داخله الكليه جديده في سنه اولي او في كانت في اقاليم وعاوزين يحولوا القاهره وحاسه انهم تايهين ومحتارين وبصراحه ده كان احساسنا كلنا قبل ماندخل الكليه
عشان كده انا هكلمكم هنا علي 4 نقط
اولا :- نظام الكليه
النظام هو الساعات المعتمده وهو نظام اوربي مش بيتطبق غير عندنا وزراعة القاهره وحاسبات سنه اولي
المهم النظام ده يتلخص ان كل ماده متحددلها ساعات معينه تتدرس فيها وليك مواد محدده كل تيرم ممكن تأجل منها اللي انت عاوزه لكن مش ممكن تزود عليها مواد من التيرم اللي بعده
يعني ليك حرية التسجيل والاختيار في المواد اللي انت عاوز تدرسها كل تيرم بس في حدود المواد اللي مسموح بيها كل تيرم بس
بشرط ان لا يزيد عدد ساعات التيرم عن 25 ساعه بس
لكن في حاجتين مهمين خلوا النظام ده بإجماع الاراء كلها انه نظام فاشل
اول حاجه ان في مواد مترتبه علي بعضها يعني مثلا تشريح واحد تدرسه في تيرم وتشريح 2 تدرسه في التيرم اللي بعده
ولو شيلت تشريح واحد يبقي تاخده التيرم اللي بعده " مش السنه اللي بعدها " ولازم لازم تأجل تشريح 2 لانه معتمد عليه
وممكن تشريح 2 يأجلك مواد تانيه السنه اللي بعدها
يعني لو شلت حاجه ممكن تأجلك مواد كتير
وممكن تفضل تأجل كده لحد ناتقعد اكتر من خمس سنين في الكليه
تاني حاجه بقي ان مفيش SUMMER COURSE يعني المواد اللي هتشيلها ماينفعش تاخدها في الصيف عشان كده هتأجل هتأجل
مفيش مفر
هو ده تقريبا ملخص النظام
ثانيا :- المواد والدراسه نفسها
مكدبش عليكم الدراسه صعبه وعاوزه مذاكره واهتمام
ومش كل الدكاتره كويسه " وده موجود في كل الكليات "
وعاوزه اقولكم ان مفيش حاجه سهله اصلا واللي عاوز ينجح ويبقي ليه مستقبل ومكانه في المجتمع لازم يستحمل الصعب ويعديها
لكن لو ذاكرت واهتميت وحضرت محاضرات هتلاقي الموضوع سهل شويه وهتمشي فيه
ثالثا :- العملي والحيوانات
طبعا في ناس كتير بتخاف من الحيوانات وان طبعا كنت واحده منهم
لكن صدقوني هتتعودوا عليهم شويه شويه وهتلاقوهم عسولين وامامير اوي وهتحبوهم وهتحبوا التعامل معاهم
يعني نا فاكره ان اول حيوان امسكه واتعامل معاه كان حصان وطبعا انتوا عارفين الحصان بيخوف وكبير وقوي ازاي
لكن دلوقتي انا بحب الخيول جدا جدا ومش بخاف منهم خالص
عاوزه اقول كمان ان العملي مهم اوي ولازم تهتموا بيه عشان مفيش دكتور بيطري شاطر الا اللي بيشتغل عملي حلو
رابعا :- الشغل
طبعا احنا مجالاتنا كتييييييييييييييييييييييير جدا
منها شركات الادويه - المعامل البيطريه - معامل التحاليل - الصيدليات - العيادات والمستشفيات البيطريه - وزارة الصحه والحجر - المزارع - مزارع الاسماك - معارض الادويه البيطريه - مصانع الاعلاف - المشاريع الحره وتربية الحيوانات - الجيش والشرطه والمطار
يعني الشغل كتيير اوي ومحدش يقلق منه بس انت تتشطر في الكليه وتحدد هدفك وربنا يعينك ان شاء الله
مش عارفه اقولكم ايه تاني
اخر حاجه هقولها حاولوا تحبوا الكليه عشان تمشوا فيها
ودي كلمة حق مني مش عشان احببكم في الكليه ولا حاجه
انا فعلا بحبها اوي وبحمد ربنا ان انا فيها وفعلا هي احسن من غيرها بكتير
وسيبك من اللي يقول عليك دكتور بهايم ولا الحاجات دي
ده اصلا جهل واحنا داخلين في كل حاجه في حياة الناس
ودلوقتي انا هقتبسلكم بعض الكلام من ناس قديمه في الكليه وانتوا تحكموا بقي في الاخر
monmonayaa "سنه اولي"
اقتباس انا على فكرة عايزة اقولكم انى الاول كان نفسى ادخل كلية صيدلة بس ربنا ما اردش وكنت كتبه بعدها طب بيطرى القاهرة..وهى دى اللى انا هدخلها ان شاء الله انا الاول مكنتش عارفه انها مليانه تخصصات كتير ومجالاتها كتير كنت فاكرة انها فى حد ذاتها تخصص لوحدها بس روحت الكليه وسالت طلبه ودكتور فى الجامعه اعرفه من بعيد
مش عارفه سبحان الله انا لقيت نفسى راضيه وحبيتها يمكن اكتر من الصيدله وبينى وبينكم لقيتها مراحتش بعيد بالعكس جواها برضه مجال الصيدله وحاجات تانيه كتير قلت يمكن لما ادرس احب حاجات تانيه اكتر...وربنا معايا بقى واكيد انتوا كمان معايا بالنصائح ...وجزاكم الله خيرا
طارق فحسب
اقتباس بجد انا اؤكدلك انك مستحيل تسمعى كلام من اى واحد فى الكلية وتحبطى ابداهو طبعا انا عاذرك لانك بتفكرينى بنفسى اول ما دخلت الكلية عشت كنت هاموت على صيدلة بس اهو اللى حصل
بصراحة عشت فى اكتئاب وزادت الطينة بلا وعييت بعد 3 ايام من الدراسة ورقدت فى السرير شهر كامل واللة
بس بجد بعد كدة الحمد للة حبيت الكلية بطريقة غريبة لانها بصراحة كدة احسن كلية فى مصر مع احترامى لباقى الكليات وربنا يوفقك
dr_desperado
اقتباس أنا بكتب الموضوع دا و بإختصار علشان شايف في ناس مأروفة من البيطري
أولا لكل واحد داخل كلية الطب الببيطري أحب أقولك إنك في إختيارك لأي كلية في الزمن دا بتختار أكل عيشك
مجالات الطب البيطري كتييييييييييييرة جدا
1_إنت بتدرس كذا مجال في الكلية .. سيبك من الدراسة المهم إن عاوز تعرف إن مجرد بتردس أكتر من حاجة فا دا بيوسع نطاق شغلك يعني مش هتقعد تدور على شغل كتير زي بعض الكليات
2_ هقولك على حاجة إحنا مش بنتمحك في كليات تانية لكن
إنت ممكن تشتغل شغل الصيدلة لإنك بتدرس pharma
و معروف على مستوى العالم إن شركات الأدوية في أي بلد ( و إسأل بنفسك ) هتلاقي فيها بيطريين شغالين و الحمد لله
طاب بلاش لحسن الصيدليين يزعلوا
مجال اللحوم قولي شركات الأغذية عددها قد إية
شركات الدواجن (بتكسب كتير و الفضل لله ) صناعة الدواجن مشاريع شاغله العالم و أكيد ليك دخل في الموضوع
مزارع الأسماك
التحاليل
الطب الشرعي
في حجات كتييييرة أوي
بس مش دي الميزة
الميزة إن عدد كليت الطب البيطري في الوطن العربي قليل جدا ... علشان كدة تلاقيهم على طول مطلوبين
عاوزك تحسبها كده لما تلاقي الكليات التانية عدد طلبها و الخريجين منها زي الرز و علشان يبدأ يشتغل عايز راس مال كبير و خبرة علشان يبأ لية إسم مشهور و الناس تبتدي تروحله يكون شعره إبيض
أنا مش بهاجم كليات تانية
لكن أنا بقول الحقيقة
خريج كلية طب بيطري و لله الحمد مع إنه بيطلع عينه في الدراسة لكن الحمد لله بيلاقي فرص عمل
و سيبك من اللي يقولك دي مهنة قذرة
يقول صلى الله علية وسلم( فيما معناه) عندما سئل أو في البهائم أجر ؟؟
قال نعم في كل ذي كبد رطبة أجر
أو كما قال صلى الله علية وسلم
و بعدين مفيش شغل مش متعب
و متعب و مؤرف بس أقدر أتكسب منه
يبأ الحمد لله
صدقني محدش لاقي النعمة دي إنك تكون مطلوب في أكتر من جهة
نسأل الله إنه يرزقنا و يقوي إيمننا بالله و بالقدر
قول الحمد لله
وفي كلام من ده كتيير اوي
لو تجولتوا في الساحه هتلاقوه
المهم دلوقتي لو في اي استفسار تاني عن الكليه
ياريت يتطتب في الموضوع ده واحنا هنرد عليه
ولو في اي حد تاني عنده رأي غير ده وبيكره الكليه وشايف انها وحشه برضه يقول عشان الصوره تبقي كامله
ويارب تكونو استفدتو ولو جزء صغير من الرد ده
وبالتوفيق ان شاء الله
__________________
Veterinarian and proud to be so
Veteriner ve gurur kadar olmak
Vétérinaire et fier de l'être
Veterinario e fieri di esserlo