ان لقيت كلام جميل عن كلية حاسبات و معلومات و هندسة ....كاتبه معيد فى قسم الحاسبات فى هندسة القاهرة
اقتباس:
|
ana kont 3ayz a5osh qesm 7asebat bs 2aloli en bto3 7asebat w ma3lomat bysht3'alo a7san mn mohndsen 7asebat w kaman en ay 7ad momkn ya5od course w yob2a mohndes computer w en mohndsen el computer entashro w msh bysht3'alo f ana 3ayz a3rf el kalam da sa7 wla eh ?
|
اقتباس:
معرفش موضوع ان حاسبات و معلومات بيشتغلوا اكتر ده. ما الناس عندنا بتتخرج و بتشتغل في شركات محترمة.
بالنسبة للفرق بينا و بينهم فهو فيه جزء كبير مشترك بس احنا بندخل اكتر في حتة الهاردوير و النظم المدمجة و كده و همة بيدخلوا اكتر في مفاهيم نظرية في علوم الحاسب.
(من باب الدقة ده الفرق اللي المفروض يبقى بينا و بينهم )
سيبك بقى من اسطوانة مهندسين الكمبيوتر اكتر من الهم على القلب و أي حد خريج أي كلية ياخدله كورسين يبقى مهندس كمبيوتر
خريج أي كلية اللي بياخد كورسات و السلام ممكن يلاقي مكان في قسم
it
في شركة بس صعب يلاقي مكان في شركة كمبيوتر محترمة
و ده بسبب:
* انه مش متشرب المفاهيم الأساسية للحاجة اللي هو شغال فيها لأن الكورس بيعلمك أدوات مش مفاهيم
* أن الدراسة الأكاديمية بتكسبك القدرة على التعلم الذاتي و ده مهم جدا في الشغل في حين ان الكورسات لا تكسبك هذه المهارة
أنا بتكلم من واقع تدريبي في شركة بترول اتدربت فيها على ايد مهندسين و ناس واخدة كورسات ... صدقني الفرق شااااااسع
لازم تعرف ان الكورسات ديه مكملة للدراسة في القسم مش بديلة عنه
يعني ايه ؟
فيه ناس فاكرة ان الدراسة في قسم حاسبات عبارة عن تجميعة للكورسات اللي في السوق و ده كلام غلط تماما
انت في القسم بتدرس مفاهيم عامة لا تتغير بتغير الأدوات اللي بتستخدمها و المفاهيم ديه هي اللي بتبني طريقة التفكير اللي مش موجودة عند اللي بياخد كورسات و السلام
علشان بقى تعمل المشاريع (أو تاخد شهادات تنفعك في الشغل) لازم تتعلم الأدوات الموجودة في السوق يا إما مع نفسك أو بكورسات
مثلا طالب قسم عمارة بيحتاج ياخد كورس أوتوكاد . أي حد يعرف أوتوكاد يبقى مهندس معماري ؟
لازم برده تعرف ان شغل مهندس الكمبيوتر مش بس انه يكتب برامج
كتابة البرامج دي بيحصل غيرها كلام كتير محدش بياخد باله منه
يعني تصميم السوفتوير
software design
ده مشكلة في حد ذاته و له أسس علمية بنتكلم عنها في 3 مقررات و مبنلحقش نغطيها كلها
حاجة زي البحث و التطوير
research & development
محتاجة واحد يقرا أوراق بحثية و يعرف المشاكل اللي فيها و يقدم حلول ليها و لازم يكون جامد في الرياضيات و في الأسس النظرية للحاجة اللي بيبحث فيها
الكورسات ملهاش مكان هنا
بعدين حنفرض جدلا انك ممكن تاخد كورسات بره و يبقى زيك زي مهندس الكمبيوتر تماما. ايه المشكلة ؟
متفكرش في الموضوع بطريقة
(أي حد ممكن يبقى بتاع كمبيوتر ... ادخل كمبيوتر ليه ؟)
انت عايز تبقى مهندس كمبيوتر (فعلا مش علشان الموضة) و لا لأ ؟
لو عايز فالمكان الطبيعي لتخريج مهندسين الكمبيوتر هو قسم حاسبات
وإلا لو مشينا بالمنطق ده فمحدش يدخل كلية الإعلام لأن ممكن أي حد يبقى إعلامي و محدش يدخل كلية التربية لأن ممكن أي حد يبقى مدرس و محدش يدخل كلية الآداب لأن أي حد ممكن يدرس الأدب و يبقى أديب و محدش يدخل كليات شرعية لأن ممكن أي حد يسمع دروس و يقرأ كتب و محدش يدخل فنون جميلة لأن أي حد ممكن يتعلم مع نفسه و يبقى فنان و هلم جرا
ينفع الكلام ده ؟
انت بتختار المكان اللي بتحبه و لا بتختار المكان اللي بيدرس حاجة ملهاش مصدر تاني ؟ مدخلتش طب أو صيدلة ليه طيب ؟
معلش انا طولت عليك بس انا عارف السؤال ده يعتبر مشكلة أبدية لكل من يفكر في دخول قسم حاسبات و أتمنى اني أكون ساعدت في الإجابة
|