امتحان النظري
ده اهم امتحان بقا وعليه اغلب الدرجات
الميعاد في شهر مايو الدور الاول
الدور التاني في سبتمبر
عليه على الاقل 40 % من درجات المادة
نظامه
زي امتحانات ثانوي كده
ورقة أسئلة وكراسة إجابة
تقرأ الاسئلة وتجاوب في الكراسة
أحيانا تكون اسئلة طويلة وتكتب فيها كل اللي تعرفه عن الموضوع
او اسئلة بسيطة اكتب تعريف او يطلم منك نقط محددة او اسامي بس
النجاح في ورقة التحريري من 30 % من قيمتها
يعني مثلا لو ورقة التشريح من 100 درجة
لو جبت فوق ال30 درجة
هتنجح في التحريري
لو مجموع درجات بقى في الشفوي والعملي واعمال السنة على دول هيخليك تجيب 60% اتبقى نجحت في المادة خلاص
وقلنا التقديرات قبل كده
ممتاز 85% فاكثر من مجموع الدرجات
جيد جدا من 75% الى اقل من 85% من مجموع الدرجات
جيد من 65% الى اقل من 75% من مجموع الدرجات
مقبول من 60% الى اقل من 65% من مجموع الدرجات
طيب لو شيلت مادة لا قدر الله
تمتحنها الدور التاني في شهر سبتمبر وأكتر تقدير بيتحسبلك فيه هو اعلى تقدير في المقبول
بمعنى
لو انت حليت كويس في الدور التاني وجبت مثلا 80 %
مش هيتحسبلك منهم غير 64.9% بس
لو شيلت طيب تاني في الدور التاني
هاتعدي السنة وتمتحنها تاني في سنة تانية مع امتحانات سنة تانية
طب لو مادتين
نفس الكلام بالظبط
لو اكتر من مادتين
دي بقا مشكلة
لو الدور التاني خلص ولسه معاك اكتر من مادتين
يبقى مش هتعدي لسنة تانية وهتخليك في اولى لغاية ماتعدي المواد دي
هتمتحن السنة اللي بعدها في المواد اللي شايلها دي ولو عديت وبقى معاك اقل من مادتين هاتروح تانية
ونفس النظام برضه
أعلى درجة في المقبول مش هاتعديها
في سنة تانية بقا لو معاك مادة واحدة بعد الدور التاني مش هتروح تالتة
لازم تخرج نضيف عشان تعدي
وفي تالتة مش طالع رابعة لو معاك مواد
رابعة وخامسة وسادسة عادي
اللي تشيله معاك السنة اللي بعدها
ملحوظة بقا مهمه قوي
التأجيل
يعني ايه ؟
ممكن تؤجل امتحان مادة او اتنين او حتى الاربع مواد لغاية امتحان الدور التاني او حتى لغاية السنة اللي بعدها
يعني ماتتدخلش الامتحان بتاع الدور الاول وتدخل الدور التاني او السنة اللي بعده
بتنزل الشئون تطلب التأجيل وهما بيدولك ورقة التاجيل تكتبها وخلاص
ميزة التاجيل ايه؟
بتاخد درجة المادة كاملة مش أعلى حاجة في المقبول زي اللي شايلين
فيه ناس بتأجل عشان تخفف ضغط امتحانات اخر السنة وتسهل الموضوع على نفسها
بس انا منصحش حد انه يؤجل حاجة
ماتضيعش الاجازة على نفسك وترهق نفسك اكتر من كده
ادخل اول مرة وخلاص
وكمان اللي بيأجل مش ليه دور تاني
لو شال المادة خلاص كده انتهت مش هايدخل امتحانات تاني فيها الا السنة اللي بعدها
طيب ممكن أؤجل في اي سنة كده عادي؟
ليك 3 مرات تأجيل بس في الكلية
كل دور بيعتبر مرة
يعني لو اجلت دور مايو 2009 مثلا 3 مواد او اربعة
ده يعتبر تأجيل مرة واحدة
بعد الـ 3 مرات دول
متعرفش تأجل تاني الا لو جبت شهادة من دكتور نفسي ان كان فيه ظروف عندك منعتك من الامتحان
نرجع للامتحان تاني
مكان الامتحان
نفس مكان امتحان اعمال السنة في القاعات برضه
الفترة بين كل امتحان والي بعده
من 7 -13 يوم حسب مجموعة الشفوي بتاعك
يعني المتوسط حوال 10 ايام تعيد فيهم على المادة
امتحان الشفوي
وده عليه بالكتير 20% من المادة
الدفعة بتتقسم مجموعات كل مجموعة هاتمتحن في يوم
بتروح اليوم بتاعك الساعة 9 الصبح
تطلع القسم وتشوف اللجنة بتاعتك مين الدكتور اللي هايمتحنكم وتقف عند المكتب بتاعه
ممكن تمتحن لجنة واحدة عند دكتور واحد او لجنتين عند دكتورين مختلفين
وماتقلقش من الشفوي
الاسئلة بتكون سهلة والدكاترة بيكونوا مقدرين ان انتم لسه في سنة اولى وهتاخدوا درجات كويسة ان شاء الله
وبكده يبقى عرفنا نظام الامتحانات
أي استفسار؟