[DPT-Blue Phoenix]

السلام عليكم و رحمة الله و بركاته
بسم الله الرحمن الرحيم

" ايه هو العلاج الطبيعى "

يمكن كتير جدا من الأهالى ميعرفش عن كلية و مهنة العلاج الطبيعى الا مجرد اسم الكلية الى بيوشوفها فى التنسيق قد الصيدلة فى التنسيق او اقل بنص درجة .. و اكبر مشكلة بتواجه المجال بس عدم معرفة الناس بيه لأنه مجال حديث فى العالم كله و داخل مصر قريب ..

طيب انا طالب ثانوى دلوقت محتاج اعرف هختار ايه محتاج اعرف عن كل الكليات و من ضمنهم العلاج الطبيعى ؟!

......

و عشان كدا انا هكون موجود مع اى استفسار بخصوص كلية العلاج الطبيعى Faculty Of Physical therapy or physiotherapy ..

و كل المعلومات هتلاقوها فى مواضيع سابقة انا كتبتها قبل كدا .. فى الموضوع دا هكلمكم باختصار عن الكلية ان شاء الله ..

............................................

1- يعنى ايه علاج طبيعى ؟!

العلاج الطبيعى هو مجال طبى او يعنى كلية طبية زى الطب البشرى و الأسنان و الصيدلة بس فى العلاج الطبيعى احنا مش بنستخدم الأدوية الكيميائية او العلاج الدوائى ولا الجراحة فى شغلنا لكن بنستعمل وسائل طبيعية و فيزيائية طبيعى يعنى فيزيائى عشان نقدر نعالج المريض و نعمله وقاية و نعمله تأهيل لوظيفة فقدها مثلا مش قادر يرفع ايده او عضلاته ضعفت بنبدأ نرجعله الوظيفة الى فقدها و دا جزأ لا تجزأ من مهنتنا غير اننا بنقيم حالة المريض بننصحه ايه الاوضاع و الحاجات الصحيحة الى يعملها فى حياته عشان يحافظ على صحته ..

......

2- الكلية دى ليها تكليف ولا لأ ؟!

الأول احب اقولك الكلية 6 سنين 5 سنين دراسة + سنة امتياز و بعد الامتياز فى التكليف فى المستشفيات الحكومية يعنى ليك شغل بعد الكلية و مرتباتها زى صيدلة كليتنا داخلة فى شريحة الكادر الطبى ب 500% .. غير ان فرص شغلها أحلى من صيدلة و حتى من الكليات الطبية فى اكتر من جاحة و هنقول دا بعد كدا ..

و على فكرة من سنة 3 بتبدأ تنزل مستشفيات و تدرب هناك فى المستشفيات على حالات عملية

...............................................

3- ايه طبيعة الدراسة فى الكلية ؟!

عندك 3 أنواع من المواد :-

1- المواد الطبية : الى بيدرسها الطب البشرى بس بدرجة اقل من كلية الطب البشرى .. زى التشريح و علم الانسجة و الفسيلوجى و الكيمياء الحيوية و علم الامراض و علم الادوية و غيرها ..

2- المواد العلاجية او مواد العلاج الطبيعى : زى الميكانيكا الحيوية الاختبارات و المقاييس العلاج اليدوى العلاج الكهربى العلاج المائى و غيرهم ..

3- مواد اضافية : زى الفيزياء الحيوية من علوم و علم النفس من آداب و قوانين و آداب المهنة و الأحصاء الطبى و الكتابة العلمية و غيرهم و دى برده مواد مهمة فى دراستك فمثلا علم النفس عشان تعرف ازاى تتعامل مع المرضى قوانين و اداب المهنة عشان تعرف حقوقك و واجباتك و غيرهم ..

.......................................

4- ايه اقسام الكلية و ايه المرضى الى بنتعامل معاهم ؟!

1- قسم العظام : مشاكل العصر كلها مشاكل الظهر و الرقبة و العود الفقرى بوجه عام و آلامه مشاكل المفاصل و خاصة خشونة الركبة و غيرها ..

2- قسم الأعصاب : و خاصة أمراض الشلل ناس كتير فاكرة ان ملهاش حل لا العلاج الطبيعى بيعالج مريض و يخليه يقدر يتحرك تانى

3- قسم الأطفال : لتأهيل الأطفال ذوى الأعاقات عشان لما يكبر يكون باذن الله طبيعى

4- قسم النساء و التوليد : للمشاكل الى بتقابل الست فى فترة الحمل و بعده مثلا آلام اسفل الظهر بسبب وزن البطن فترة الحمل او لو ولدت ولادة قيصيرية عضلات البطن بتضعف فبنعملها تقوية تانى عشان متسببش مشاكل جدا بعد كدا ..

5- قسم الباطنة و المسنين : لتأهيل و علاج كتير من المشاكل الباطنية و مشاكل التقدم بالسن ..

6- قسم الجراحة و الحروق : تأهيل قبل و بعد الجراحة و مشاكل الجلدية و تأهيلبعد استئصال او زراعة الأعضاء..

............

فى قسمين فى الكلية لمساعدة الطلاب مش اقسام تتخصص فيها يعنى ..

7- قسم العلوم الأساسية : دا بيهتم بالمواد الأساسية الى بتدرسها فى بداية الكلية

8- قسم الميكانيكا الحيوية : بيهتم بتدريس علم الميكانيكا و الحركة ..

.......

بتقدر كمان تتخصص فى اصابات الملاعب و دى بتجيب فلوس كتير جدا او ممكن تاخد دبلومات فى التغذية و تشتغل فى التغذية العلاجية و التخسيس و النحافة جنب شغلك الأساسى انما التخسيس و الحاجات دى مش شغلنا الاساسى دى مجرد حاجة اضافية ..

.............

5- مميزات الكلية عن باقى الكليات الطبية و خاصة الصيدلة لأنهم تقريبا نفس التنسيق ؟!

عدد خريجى العلاج الطبيعى عددهم قليل جدا و دا بيديلك فرصة شغل كويسة و انك تقدر تفتح فى اى مكان و تكسب كويس لأن العدد قليل على عكس الصيدليات الكتير الى بتلاقيها منتشرة مثلا او عدد خريجى الصيدلة او حتى باقى الكليات الطبية ..

بتقدر برده تشتغل فى الكليات الطبية ..

تقدر تفتح مركزين .. غير مميزات تانية كتير ..

.........................

7-و مش هكلمكم بقى عن ان العلاج الطبيعى هو طب المستقبل فعلا الناس كلها عايزة وسيلة علاج آمنة بدون آثار جانبية زى الأدوية الكيميائية او الجراحة و مشاكلها .. و العلاج الطبيعى بيكون بديل للجراحة فى حالات كتير جدا جدا و على عكس الجراحة بدون آثار جانبية طيب تعالوا نتعرف على وسائل العلاج ؟!

1- العلاج اليدوى : دا مهارات يديوية انت بتكتسبها من خلال دراستك فى الكية من دراسة علم العلاج اليدوى و التمارين العلاجية و الميكانيكا و غيرها من المواد و التطبيق بتقدر تعالج بيها مشاكل كتير جدا زى كل الاقسام الى قلناها فى بداية الموضوع .. انت متخيل انك تعالج مريض بايدك بس ؟!

2- العلاج الكهربى : دا باستخدام الأجهزة زى الليزر و الاشعة تحت الحمراء و فوق البنفسجية و الموجات القصيرة و التيارات الكهربية و طبعا المريض مش قاعد يتعذب ولا حاجة لا طبعا دى تيارات ضعيفة جدا مبيحسش بيهاىلكن بتعالجه و فى انواع كتير جدا منها و فى برده الموجات فوق الصوتية و موجات التصادم و غيرها كتير جدا يعنى العلاج الطبيعى بيستعل احدث الأجهزة احدث من اى مجال طبى و عندهابرده أجهزة للتشخيص أحدث أجهزة و اكتر مجال طبى بيستعمل أجهزة حديثة هو مجالنا ..

3 - العلاج المائى : من خلال دراستك لخواص الماء الفيزيائية و الحرارة و البرودة تقدر تستعمل دا فى علاج الات كتير جدا و يمكن من اشهر القواعد الى بنشتغل بيها قاعدة ارشميدس اكيد درستوها فى الفيزياء ..

....................

كليتنا من اسمها علاج طبيعى او علاج فيزيائى Physical therapy or physiotherapy .. بنعتمد فى شغلنا على علم الفيزياء الحيوية و الميكانيكا و العلاج اليدوى و غيرها .. بس الفرق اننا بنطبق دا عملى مش زى الثانوى ..

مش زى باقى الكليات الطبية الى كلها أحياء كتير لا كليتنا برده فيها متعة و حسابات و كله ..

...............

العلاج الطبيعى من احسن 100 وظيفة على مستوى العالم فى المرتبات و هى فى اخر ترتيب فى سنة 2015 المهنة 6 على مستوى العالم فى ترتيب المهن ..

................

8- ايه هى شهادة الدكتوراه المهنية فى العلاج الطبيعى DPT ؟!

Doctorate Of Physical Therapy

دى شهادة بتاخدها بعد ما تخلص كلية مدة الدراسة فيها سنتين و دى بتديك الحق ان المريض يجيلك على طول بدون ان الدكتور البشرى يحولك الحالة .. يعنى مش لازم الحالة تروح لدكتور بشرى الأول و بعدين تجيلك لأ تجيلك على طول مباشرة تعملها انت التشخيص و التقييم و كمان برنامج العلاج و الشهادة دى بالفعل بقت موجودة فى مصر دلوقت .. و انت بتتعمق فى المواد الطبية و العلاجية بشكل اكبر فى السنتين دول لأن زى ما قلنا الطب البشرى بيدرس بشكل أعمق فى المواد الطبية ..

انا بنصحك ايا كان مجموعك تدخل علاج طبيعى .. حتى لو اعلى من تنسيق الكلية هى العبرة مش بالتنسيق بقولك طب المستقبل

و الصور الى تحت هتوضحلك مثال على الأجهزة و الطرق الى بنستعملها فى شغلنا ..

اى استفسار تانى ان شاء الله انا تحت امركم و اتمنى اسمع استفسارتكم عن الكلية او المجال باذن الله فى الانتظار