[DPT-Blue Phoenix]

المشاركة الأصلية كتبت بواسطة دكتورة جوجوو

بجد مش عارفة اقوللك ايه ربنا يخليك يارب .. بص انا داخلة اولى كلية ان شاء الله مجموعي مجابش طب بشري ومحطمة نفسيا ومحبطة لان حلم حياتي اني ابقى دكتورة نسا وتوليد والسونار والمبايض والجو دا ودلوقتي انا محبطة وتعبانة ومقضياها عياط ودخلت صيدلة عين شمس لان اخواتي الاتنين فيها ولانها كلية كويسة وكدا بس انا مش مرتاحالها قلتلهم ف البيت انا هحول علاج طبيعي القاهرة معارضوش طبعا بس فضلوا يخوفوني من مستقبلها وانهم اسفة يعني مدلكاتية بس انا رافضة الفكرة دي ومن وانا صغيرة كنت بهرتل واقول هطلع دكتورة علاج طبيعي وعمري مافكرت ف طب الا السنة دي وف اخرها كمان ... انا كواحدة عندي عشق غير طبيعي للاحياء وبستمتع بيها بطريقة غريبة ومبحبش الكيميا ودا كان اول سبب لتفكيري ف علاج طبيعي حساها هتعوضني عن طب وانا كبنت مع انها غريبة شوية بحب التشريح لاني عااااااااشقة لدراسة جسم الانسان بكل صغيرة وكبيرة فيه فحابة التشريح جداااا عشان كدا قلت هدخل علاج طبيعي بس خايفة مش مستقبلها اوووي مش عاوزة ابقى دكتورة سمنة ونحافة ولا كاني مدربة ف جيم عاوزة ابقى دكتورة بجد عندي عقدة والله صيدلة حلوة وكله بس انا مش طموحي ابقى ف صيدلية ولا. شركة حتى قسم كلينيكال دا مش ضامناه ومش مجرباه ف حد فمرتاحة نفسيا لعلاج طبيعي صليت استخارة وكتبت صيدلة وجاتلي لكن مرة واحدة لقاني كارهاها بغباء وميالة لعلاج طبيعي انا دلوقتي مشكلتي كل ماخلاص اقرر التحويل احس اني بضيع صيدلة من ايدي خصوصا ان الكل بيقولوا صيدلة احسن العلاج الطبيعي انتي مش دكتورة ومالكيش فرص شغل بس من جوايا عايزاها خايفة اندم ع قراري دا بس فعلا حساها هتعوضني عن دراسة طب انا بحب ابقى ف عيادة واسمع مشاكل الناس ويفصفضولي واريحهم وكدا دا طموحي بعد ماطموح النسا والتوليد خلاص اتحطم وحطمني معاه عانزاك تحللي العقدة دي عشان خلاص لازم اقرر مفيش وقت وكل ما اقول لحد هسيب صيدلة واروح علاج يتصدم ويستغرب ّ .. وحاجة كمان معلش انا طموحي بردو ابقى دكتورة ف الجيش هل في وظيفة لدكاترة العلاج الطبيعي البنات ؟ وهشتغل ايه ؟ معلش طولت عليك بس ربنا عالم بحالتي النفسية عاملة ازاى ...

.........................

اولا احب اوضح نقطة نقطة توكلنا على الله :-

1- علاج طبيعى دكاترة بحكم محكمة واخد لقب دكتور .. طيب لقب اخصائى وممارس والحاجات دى تدرج مهنى يعنى بتتخرج ممارس لو اخدت ماجستير تبقى اخصائى وممكن توصل لحد استشارى وكدا زى بشرى بالظبط بيتخرج برده ممارس وبالماجسيتر بيتخصص وكدا ..

2- احنا ولا بتوع سمنة ونحافة ولا الكلام دا خالص السمنة والنحافة دى الجراحات الى بيعملوها دكاترة بشرى .. والادوية بعض دكاترة الباطنة بيشتغلوا فيها اما علاج طبيعى الى بيشتغلوا فى دا بيكونوا اخدوا دورات تغذية وبنشتغل اجهزة موجات فوق الصوتية وكدا انما دا مش مجالنا

3- مجالنا فى عظام - اعصاب - نساء وتوليد - جراحة وحروق وجلدية - باطنة وجهاز تنفسى وقلب ومسنين - اطفال ..

4- العلاج الطبيعى بيعالج امراض اساسا ملهاش علاج زى الشلل بانواعه زى اعاقات الاطفال وغيرها كتير جدا .. ولا تدليك ولا الكلام دا احنا بنعالج باحدث اساليب واجهزة وبدون آثار جانبية ..

5- معلش الصيدلى اخره صيدلية مع احترامنا للجميع الصيدلية بيشتغل فيها دلوقت واحد واخد دبلوم وخريج اى حاجة .. العلاج ممكن تفتحى مركزين والعلاج تانى اكتر كلية بتدرس مواد طبية بعد بشرى .. لكن احنا بندرس مواد العلاج الطبيعى كتيييييير جدااااااا ودا بشرى مش بيدرسها خالص ..

6- هتندمى لو سبتى الكلية هما بيقولوا صيدلة لانها قديمة وعلاج طبيعى حديثة محدش يعرف عنها حاجة سيبك منهم كلهم .. انا علاج واخويا صيدلى وبقولك ادخلى علاج طبيعى علاج طبيعى عدد قليل ونادر جدا على عكس الصيدلة كتروا جدا ومفيش اكتر من الصيدليات ..

7- طموحك دا عمرك ما هتحققيه فى صيدلة لكن هتقدرى تحققى دا فى علاج .. وعلى فكرة احنا بندرس عضلات وعظام واعصاب تفصيلا حتى عن الطب البشرى لان الجهاز الحركى دا تخصصنا الاساسى ..


وبالتفويق اى استفسار عن الكلية انا موجود اتفضلى