اقتباس:
المشاركة الأصلية كتبت بواسطة Mariam66
سلام عليكم
انا جديدة هنا ومعلش مش هقدر اكون معاكم طول السنة عشان انا عندي ادمان نت واول ما بيتفتح خلاص بنسى حاجة اسمها مذاكرة فاعذروني.
انا كان عندي سؤال بخصوص المذاكرة من كتاب الوزارة دلوقتي احنا لازم نذاكر منه عشان الإجابة النموذجية، طب انا المفروض اذاكر منه ازاي؟
بيكون معاه كتاب الأسئلة بس مش بيبقى مجاب وفي اسئلة بتبقى محتاجة اني اركب كلام من الفقرة دي على الفقرة دي، انا لما عملت كدة في تانية اعدادي باظ مجموعي بس لما جيت ذاكرت من الكتاب الخارجي طلعت إجابته هي الإجابة النموذجية لأنها بتبقى مترتبة.
وبعدين اسئلة كتاب الوزارة قليلة قوي مقارنة بالكتب الخارجية، معقولة هي دي بس اللي بيجي منها الامتحان؟ احنا طول السنين اللي فاتت كانت امتحاناتنا بتيجي من الكتب الخارجية ودلوقتي لو جيت اشتغل في كتاب خارجي في مادة الأحياء أو الجيولوجيا المواد اللي بيبقى فيها اسئلة مقالية يعني، اتجاهل كل الاسئلة اللي فيها واركز بس على الأسئلة اللي جمبها علامة كتاب المدرسة؟ حد فهم حرف؟😂
|
مفيش مشكلة في المذاكرة من الكتاب الخارجي اللهم إلا في إن الكتب الخارجية ساعات كتير بتحذف تفصيلات بين السطور، فعشان كده بيتقال دايما ذاكرو من كتاب المدرسة
فعشان كده ممكن تذاكري من أي مصدر بس الأول تطابقي محتواه مع محتوى كتاب المدرسة
+
كل مادة وليها أسلوب في المذاكرة من كتاب المدرسة
يعني : العربي : الأدب بيتذاكر من كتاب المدرسة قولاً واحداً
باقي الفروع ذاكريها من أي مصدر بس قبل ما تذاكري راجعي المصدر ده مع كتاب المدرسة واتأكدي إن مفيش حاجة ناقصة ... معاني المفردات اللي في كتاب المدرسة رقم 1 تتحفظ أول حاجة وبإتقان .
أظن كده مفيش مشاكل في العربي
إنجليزي فانتي بيبقى عندك نصين القراءة والاستماع بيبقو موجودين في الكتب الخارجية بالكلمات والملاحظات و.... اللي مش موجودة في كتاب المدرسة ، كذلك شرح الجرامر .. ولكن تدريبات الوورك بوك مهمة جداً ، وتدريبات لونجمان ، وهما كلهم على بعض مش كتير يعني فمش أزمة
كيمياء أسئلة كتاب المدرسة مع أدلة التقويم 95% هي الامتحان
الفيزياء فكتاب المدرسة أنا كنت بحفظ النظري منه !!
ومع ذلك فكنت بقابل أسئلة في نماذج الوزارة جديدة ومابتتجابش إلا من تفاصيل جوا التفاصيل في كتاب المدرسة زي مثلاً الأسئلة اللي إجابتها تتجاب من بيانات رسمة من الرسومات زي في الفيزياء الحديثة كده
__
طبعاً ماينفعش اللي بتقوليه إن أسئلة كتاب المدرسة القليلة هي بس اللي بييجي منها الامتحان .. بس احنا بنقول إن أسئلة كتاب المدرسة (مهمة)
طبعاً الكتب الخارجية مابتجيبش أسئلتها من بيتهم يعني ، ده بيجمعوا كتاب مدرسة على دليل تقويم على امتحانات ث.ع سابقة على نماذج تجريبية من سنين مختلفة على مثلاً أسئلة المؤلف يحطها أو يجيبها من مراجع أو دول عربية .
موضوع تركبي فقرة على فقرة ده أغتقد انتي قصدك على الأحياء
أنا أول درس في الأحياء كنت شايف الكلام ده ، بس ماكملتش بقى وحولت رياضة
بالتوفيق إن شاء الله ، وعارف إن إ<ابتي دي عشوائية وكلمة من الشرق على كلمة من الغرب ومش مفيدة ، بس أهو يمكن تطلعي بكلمة مفيدة يعني