[إبراهيم أبو ليفة]

مش فاهم يا مستر
ممكن تعيد الحته دي تاني ؟
لسان حالنا جميعاً في الموقف السياسي الآني مثلا احنا مع السعودية ولا السعودية معانا هما عاوزين مصر ولا مصر عاوزاهم، ايران عاوزه تاكل مين وتضحي بمين ،الدين سنه ولا شيعه ،الحرب داعش ولا مقاومه ،اليمن بحر احمر ولا خليج، قطر في دوري المظاليم ولا راقصه في شارع الهرم ،تركيا زعلت مين بالظبط واتقلبت عليها الدنيا ،طيب سوريا واقفه علي المحور ولا في كردستان ،طيب لبنان ستار اكاديمي ولا جايزه للفائز، العراق ذهب مع الريح ولا راح ولا جاشي ،الامارات يا عيني عليكي كان نفسي اعمل شوبنج في دبي .اسرائيل بالظبط بالظبط عامله زي الراجل اللي شكله كئيب وعجوز قاعد علي صخره اول شارعنا وعينه البارزه بتراقب كل الناس ومعاه عصايا في ايده محديش قادر يهوب ناحيته الكبار بس يمّسوا عليه ويصّبحوا والاطفال ممنوع الاقتراب لانه ممسوس هياخدك تحت الارض ..مصر بقي زي دوار عليتنا قديم قدم التاريخ له هيبه وكيان كلما قدم زادت قيمته اذا تحدث سمع له الجميع اذا صمت فلصمته معني اذا تحرك فبحساب اذا فكر فبتدّبر اذا غضب فكأن النار تمّيز من الغيظ .قول تاني يا مستر