[Elmicro.7aleeM]

بسم الله الرحمن الرحيم

الثانوية دى سنة بسيطة جداً والله متقلقيش ,, فيه بس حاجتين لازم نظبطهم

أولاً: الصلاة إن شاء الله تبقى رقم 1 قبل كل حاجة ,, وخاصة قيام الليل ولو بركة واحدة لأن فضلها عظيم جداً وبتلاقى يومك كله مظبوط وفيه بركة فـ كل حاجة وعن تجربة والله

ثانياً: بعد الفجر هناخد نص ساعة بس ,, هنقرأ الأذكار والجزء بتاعنا من القرآن ,, وننطلق فـ المذاكرة
-------------------------------------------
نيجى فـ الحياة العملية بقى

موضوع إخواتك ده بسيط إن شاء الله لأن ممكن تذاكرى فـ غرفة لواحدك أو هما يوطوا صوتهم شوية
-------------------------------------------
مادة الإنجليزى كلها بتتلخص فـ (حفظ كلمات+فهم قواعد) وركزى على القواعد فـ تانية لإن أغلبها فـ تالتة ,, دروس الريدنج تتقرأ مرة و2 ,, حلى كتير من كتابين 3 وخلى المدرس يصححلك عشان لو فى أخطاء تتعرفى عليها ,, إحفظى كلمات فـ كل المجالات (رياضة , إقتصاد, إعلام , سياسة ,,, ) عشان هتساعدك فـ الترجمة والبرجراف ,, والبرجراف دا سهل جداً والله (تحصيل كلمات وراوبط الجمل )
-------------------------------------------

رسومات الأحياء سهلة وحلوة جداً (خاصة بتاعت تالتة) ودى بتعتمد على المدرس وطريقة شرحه وتبسيطه للرسمة
-------------------------------------------
العربى بقى
أمره سهل والله ,, عندك التعبير دا فى ملحق بيجى مع كتاب الأضواء فيه مواضيع كتير وحلوة ,, يكفيكى قرائتها

البلاغة سهلة جداً جداً جداً مفيش فيها جديد ,, كلمتين وبيتحفظو

النحو: افهمى القاعدة كويس وطبقى عليها كتييييير ومن كتب كتيير وركزى على الثوابت (يعنى زى :الجمل بعد النكرات صفات وبعد المعارف أحوال ,, الإسم الواقع بعد إسم الإشارة لو نكرة يبقى خبر ولو معرف بـ أل يبقى بدل ) الحاجات دى
-------------------------------------------
الصُحاب

هتقابلى أشكال وألوان:
اللى تلاقيه ماشى يقول انا حليت 500 كتاب فيزياء ,, واللى يقول انا حليت مليون امتحان ثانوية والكلام دا كله ,, انا مذاكرتش انا مش فاهم انا مش عارف وتلاقيه طالع الأول عـ الجمهورية

ربنا يوفق الجميع ,, بس كبرى دماغك ومتسمعيش لحد حتى لو صاحبى وحبيبى ,, ربنا يباركلنا جميعاً ,, انا مع نفسى بس ومذاكرتى لنفسى ,, استعينوا على قضاء حوائجكم بالكتمان
-------------------------------------------

هى سنة مصيرية ومحتاجة جهد بس سهلة جداً إن شاء الله

ربنا ييسرلك الخير وبالتوفيق إن شاء الله