[medoash]

المشاركة الأصلية كتبت بواسطة Ahmed_Alex1

طيب هو حضرتك قلت انك فى طب بتشتغل فى تخصص واحد بس فى الأخر وده صحيح
بس فيه حاجة .. انت فى طب بتدرس كل التخصصات وبتشتغل كل التخصصات سواء اثناء سنة الدراسة او سنة الامتياز ، يعني بتبقى دارس وشايف التخصص قبل ما تتخصص فيه بقية عمرك .. عكس طب اسنان بختارها وانا ولا درستها ولا شفتها ولا مارستها من اول ثانوية عامة ، افرض معجبتنيش؟؟يبقى خلاص فضلت معايا طول عمري
عكس طب لو معجبنيش تخصص حيعجبني التانى من باطنات لجراحات لخلافه

والسؤال التاني طيب انا مجربتش ولا درست اى تخصص من تخصصات الطب البشري او طب الاسنان ،اقدر احدد على اساس ايه؟
الواحد لسة محتار برضه شوية
معلش لو طولت عليك

اه تمام منا قلت لحضرتك الفرق انك فى اسنان بتحدد فى الاول تخصصك بس فى طب الاخر ودا اختلاف جذرى

انتا ممكن تمشى فى طب بشرى وتوصل للاخر ويعجبك مثلا تخصص عيون ورمد وتلاقى نفسك مش عارف تحضر فيه عشان تقديرك وغصب عنك تحضر جلدية مثلا مع انك مش حاببها وممكن تدخل طب اصلا وتلاقى نفسك مخنوق من دراستها كلها على بعضها وممكن تدخل اسنان كذلك وتتخنق من الدراسة فيها ... يعنى كل حاجة واردة فى الكليات ويامة ناس بتسقط فى طب وطب اسنان وصيدلة عشان دخلت ولقت ان الكلية مش ماشية معاها خااااالص ... انا مش بخوفك الحالات دى قليلة بس كل حاجة واردة

انا ايام التنسيق كنت عاوز اخفف فى الدراسة فكنت كاتب صيدلة رغبة اولى بعدين قلت لا انا طول عمرى نفسى اطلع دكتور وعندى عيادة فقمت مغير الرغبة زكاتب طب رغبه اولى "كل دا اسنان مش فى دماغى تماما " بعدين رحت لدكتور بشرى جلدية كنت بكشف قبل قفل التنسيق بيومين فقالى انا كان نفسى اكتب اسنان بس دخلت طب وقالى اكتب اسنان عشان هتتعب اوى عبال اما تبقى دكتور بشرى وكذلك قريبتى فى طب قالتلى اكتب اسنان ففورا غيرت رغبتى وكتبت اسنان رغبة اولى .

انا حكتلك الحكاية دى عشان اوضحلك انى لفيت لفيت وفى الاخر كتبت الحاجة اللى متناسبة مع طموحى وتفكيرى يعنى انا عاوز ابقى دكتور كويس وفى نفس الوقت كنت عاوز دراسة مش تقيلة ووقت قصير عشان ابدأ حياتى المهنية بدرى واحقق طموحى وكدا كدا مش فارقه معايا اسنان من عيون من اى حاجة وعلى اساس كدا اخترت طب اسنان .

انتا بقى نفس الفكرة الاختيار صعب ومش هيحدده زى ما قلتلك غير طموحك هل انت زييى فى فكرى اللى قلته فوق مثلا فتكتب اسنان او انت شايف طموحك فى تخصص معين او على الاقل شايف نفسك مش ميال لتخصص طب الاسنان او ان مثلا والدك طبيب بشرى وعاوز تكمل شغله او لاى اعتبار اخر فتكتب طب

ونصيحتى ليك كأخ كبير .. ودى لحالتك انت .. انا شايفك محتار وما دام محتار يبقى مش فارقة معاك وطالما مش فارقة ادخل طب اسنان لانك لو دخلت طب وتعبت من طول الدراسة وصعوبتها والبهدلة هتقعد تأنب فى نفسك وتقول منا كنت دخلت اسنان وخلاص وانا اللى جبته نفسى وممكن تتعب

ولو انى بميل الى ان محدش يدخل اسنان عشان نعرف نشتغل ومحدش يقطع علينا