1- هل لو تم ضم المدة السابقة هل العلاوات هترجع تاني زي ما كانت ولا هترجع على مربوط الدرجه؟
سترجع مرة أخرى الى الاساسى وتعتبر المدة التى تم ضمها مدة عمل فعلى
2- ليه لما الازهر اتثبت اتثبتنا على قانون العاملين بادولة وليس على قانون الكادر
احنا تم تثبتنا على قانون الدولة وامتيازات { زى ما بيقولوا عليها } قانون الكادر لان قانون الكادر فيه كلام لسه وهو يشترط اجتياز الاكاديمية والاغلب منا لم يدخل بل الادهى من ذلك ان قانون الكادرة صدر فى 2008 أو 2007 وفيه نص صريح ويستثنى من هم على رأس العمل يعنى هم قالوا نهدى الناس بالتثبيت وماشيين يعدلوا واحدة واحدة علشان كده تجد الخبطة ال كنا فيها
3- ليه من يوم ما امتحنا الكادر في 2009 لحد شهر 4/2011 لم يتم صؤف المرحلة الثانية من الكادر
كده انا هسكت وهقولك كلمة اتقالت ليا من مسؤول كبير جدا فى المشيخة انت عاوز ايه تتثبتوا ولا تخبطوا
{طبعا ده ايام ما كنا بنروح نترمى امام المشيخة علشان نجيب التثبيت وطبعا فى ناس هنا انا اعدهم ابطال والله ولكن للأسف دائما الجبناء هم من يستفيدوا مش مهم الكلام ده الان لان كل واحد عارف بينه وبين نفسه هو ايه }
وبعدين قالى احنا ولاد النهاردة وال فات مات قولت طب فى 50 جنية بتخصم واحنا مش عارفين ليه قال دى ليك وهترجع من الشهر الجاى
فانا من يومها وكل ما اجيب سيرة الفلوس دى لا اجد رد
4- مش المرتب بتاع كل منطقة المفروض انه يبقى موحد ؟
اه موحد ولكن هناك بعض الموظفين ال بيحبوا يعملوا فيها انهم بيفهموا فبيبهدلوا الدنيا
الا ان فى بعض المناطق تصرف بدل غير موجود عند البعض
5- هل في حاجه اسمها حافز اداء غير حافز اثابة وهل بيتطبق ولا لاء
على فكرة الحافز ده احنا بنقبضه ولو فى ناس متابعه كويس كان فى تصريح غريب لشيخ الازهر قال فيه لو المالية اقرت اى شيء للتربية والتعليم الازهر هيصرف قبلهم وده بيحصل فعلا لاننا بنصرف من فلوس الموجودة بتاعة الازهر على مسؤلية شيخ الازهر ثم يصدر القرار وتوفر الاعتمادات وده ال حصل فى حافز الاداء احنا صرفناه وبعدها بكاااااااااام شهر مجلس النوام افتكر انه يطلع قرار خلصان وجاهز من كل شيء
حافز الاداء هو 125 %
6- يعني لو اتثبتنا هينضم لينا الخمس سنين اقدمية للمعاش (الجانب المالي ) واحتمال سنتين او 3 جانب ادبي الي هية الدرجات الثاثة والتانيو وهكذا
تمام فهم حضرتك بس لو فى حد اشتغل اكتر من المدة بتاعة الخمس سنوات تحسب معاشات وفقط
7-هل ممكن ان المدرسين في المناطق المختلفه اللي ليهم نفس المواصفات يتم توحيد الماليات والدرجات لديها؟
حضرتك أكيد تقصد محفظى القران الكريم لو كان فهمى ده صحيح أقول لحضرتك حاجة الاصل ان يكون الكل متساوى فى كل شيء ولكن دائما نحن نريد كل شيء جاهز
انا اختى محفظة قران ولما جه المرتب فى اول التعاقد كان بتاخد اجر محفظة وهى حاصلة على مؤهل عالى ازهرى روحت المنطقة وقدمت طلب وسوتها فى المرتب طبعا الموظف حب يعمل فيها انه ما ينفعش لما عرف انى فاهم وانه ده حقها وهو زى الباشا خلص الورق وكمان عملت ليها استمارة بصرف الشهور ال قبضتها ناقصه ولا فتح بقه بيحصل ان فى واحد يسمع كلمتين من موظف وتلاقيه فى قلب الكلام يرمى كلمة العقد هيتفسخ ال مش فاهم يقول ياحيط دارينى ويمشى وكأنه الحمد لله ربنا سترها وهو مش فاهم انه انضحك عليه
اما بعد التثبيت فالكل هيكون واضح امامه تعامل زى اى حد فى اى مكان فى مصر كلها
8- تتوقع امتى حال الازهر هيتعدل ؟؟؟؟؟؟؟؟؟؟؟؟؟؟؟؟؟؟؟؟؟
أتوقع ان ينصلح حال الازهر خلال الفترة ال بينية من 5 الى 8 سنوات وهذا التوقيت لاسباب
1 - نكون انتهينا من الجماعة ال فى المناصب الكبيرة ال خروجهم على المعاش بيكون من سن 65
2 - تغيير أغلب وكلاء الوزارة الذين تم غرسهم عن قصد لتعطيل مصالح المسلمين
3 ان يكون المعيين حديثا هم اصحاب اليد العليا فى معاهدهم وهم من خيرة شباب مصر وافضل نخبه التحقت بالتدريس بالازهر
4 الخوف من الجيل الذى لم يدرس المذاهب على ان يكون هو الانتكاسة بعد الصحة
اخوكم في الله
محمد انور متثبت (مسابقة 2006)بس لسه ما جليش رقم القرار ولا قرار بالمعهد
يوصل القرار باذن الله
ولك منى كل التحية