**أسئلة للرئيس عبد الفتاح السيسي عن تيران وصنافير**
في ١٤ أبريل ٢٠١٦ الرئيس السيسي عقد جلسة "حوار
مجتمعي" اتكلم فيها عن قضية تيران وصنافير بكلام شديد الوضوح والخطورة، وواجب على كل مصري، مؤيد أو معارض، يفكر ويسأل ويحاسب رئيسه.
*****
١-
قال الرئيس "في حد برضو قال: إسألوا كل الناس، طب والله سألت كل الناس...أقول تاني؟ كل البيانات وكل الوثايق متدينش إلا إن أنا أقول الحق دا بتاعهم. اللجان فنية متخصصة مش أي حد يعرف يتكلم فيها، وعملت ١١ جلسة.
يعني مفيش في وزارة الخارجية وطني؟ كلهم ناس مش كويسين بيبيعوا بلدهم؟ طيب. مفيش في المخابرات العامة وطني؟ وكلهم عاوزين يبيعوا بلدهم؟ طيب. مفيش في الجيش حد وطني؟ وكلهم مستعدين يبيعوا بلدهم؟ إنتو حاجة صعبة قوي، صعبة بجد.. دي بلدكو، ودول ناسكو.. لما تشككوا فيهم بالطريقة ديّت فاضل إيه تاني؟"
ده أخطر مقطع في كلام الرئيس أياً كانت احتمالات تفسيره:
الاحتمال الأول: كل ما قاله الرئيس دقيق تماماً، وفعلاً الخارجية والمخابرات والجيش، كلهم قالوا انها سعودية ومفيش وثائق تثبت العكس.
- ده معناه ان الرئيس يجب أن يحاسب اللي ضللوه علني قدام الشعب زي ما تسببو انه يقول الكلام ده علني، ونشوف سبب ضعف الكفاءة الرهيب ده!
- مثلاً ضمن أهم أدلة القضية اللي قدمها الدفاع خريطة من أطلس المساحة العسكرية .. ازاي الجيش مقالش للرئيس؟!
- ليه ممثل الحكومة مقدمش إطلاقاً أصلاً أي وثيقة للمحكمة في أول درجة؟!! وفي الدرجة الثانية أمام الإدارية العليا قدم وثائق ضعيفة جداً، منها خريطة فوجيء القاضي لما فتحها انها بتثبت إن الجزيرتين مصريتين يعني قدم بنفسه دليل كذبه!
- في المقابل فريق محامي الإدعاء اعتمد على وثائق وخرائط أغلبها من مصادر حكومية بحتة، زي دار الوثائق القومية، معقول محامين يلاقوا عند الحكومة نفسها اللي كل مؤسسات الدولة مش لاقياه؟؟
الاحتمال الثاني: كلام الرئيس كذب، مؤسسات الدولة أو أفراد فيها اعترضوا وقالوا إنها مصرية، وهناك معلومات من داخل وزارة الخارجية انه بالفعل الرأي المختص عندهم قال انها مصرية لكن تم اخفاؤه .. ده معناه ان الرئيس يكذب على شعبه في موضوع بأهمية أرض مصر! معناه انعدام كامل لأي ذرة ثقة في هذا الرئيس.
ياريت كل مصري يفكر بهدوء وبلا تعصب في الجملة دي والاحتمالين دول، ويقولنا لو شايف رأي تاني.
يتبع