[Crazy Pharma Boy]

سلام عليكم ورحمة الله


رغم اني مليش نفس ادخل المنتدى ولا اعمل مواضيع بس قولت اني افيدكم شوية يا جماعة بالذات طلبة الكُليات العملية " مش معناها طب وصيدلة بس لأ كل حاجا فيها سكاشن وشغل عملي "


ع العموم انا هديكم شوية نصايح

1- المُحاضرة او الدكتور اللي هتطلع منه صفر اليدين ومش هتفهم منه أي حاجا نصيحة أخوية لا تتعب دماغك ولا انتي كمان تتعبي دماغك وتحضروا ليه المُحاضرة لأنكم هتتخنقوا وهتكرهوا المادة ومش هتزاكروها لأن درجة التحصيل من كُتر الكُره هتصبح مُنعدمة

ومحدش يقولي انه هيفهم في كل المُحاضرات !! إستحالة ولو عبقري

لأن ساعات بتترزع 3 محاضرات ورا بعض فلو لاحظت ان التحصيل منكـ Zero فلخص واطلع من باب المُدرج

لو حاسس انهم هيقفلوا المُدرج اخلع يا معلم قبل المُحاضرة

2- مادة لا انتا عارف تزاكرها من كتاب الدُكتور ولا من ورق مكاتب التصوير والتلخيص ولا من ورق المُحاضرات فاسمعني يا بن الحلا هتروح تجيب من ناس صحابك ورق الكورسات بتاعت المادة ــ فهمت يا بونا خير وبركة فهمتي يا ستي اوكـ مفهمتوش نصيحة فوق الأخوية خُدلك كورس في المادة دي بدال ما تدبلر فيها وتشيلها ويبأى شكلك غلط !!

3- نصيحة للي بيحضروا المُحاضرات وبيزاكروا 99 ساعة في اليوم ــ لو انتا هتحضر المُحاضرة بالذات لُكليات طب وصيدلة واسنان وهندسة

قدامك اختيار من اتنين

الأول : تفهم المحاضرة وتركز مع الدكتور ومتكتبش اي حاجا

التاني : تكتب ورا الدكتور ومتحاولش تفهم لانك هتضيع وقت في الفهم هيضيع منك بعض الكلمات والسطور في الشرح

فانتا ارسالك على بر متبقاش بقلبين في وسط المُحاضرة

يا ابيض يا اسود على رأي مسرحية شاهد ما شافش حاجا

مبحبش الرمادي :D

4- نقي صحابك بجد !! اغلب صحاب الكُلية مصلحجية يعني بيحبوا مصلحتهم ويقعد يهيس وياك ويمشي ويتكلم ويا البنت دي وويا البنت دي وفي الأخر يلزق امتياز او جيد جداً وانتا تلبس يا عم الزبون في المادة

مش قولتلك سيبك من الحوار الحمضان دا

نصيحة بأى هنا : عايز تكلم بنات وتروش روش براحتك بس كل مُحاضرة تزاكرها بُمحاضرتها وكل سكشن بسكشنه

وكلم براحتك يكش تحب على نفسك رغم اني من ضد كلمة الحُب في اثناء الدراسة

بس انا مديك كل التساهيل اصل فيه شباب داخل الكليات فرحان بأى انفتاح وبنات وكلام عادي واديها يعمي تعارف وقضيها مزز

انا قولت بجد اللي عندي !!

بس هقول كدا

معرفة البنات في الكُلية احسن من الصبيان في الإستفادة من الورق او الشرح او غيره ــ الولاد بيبأوا نصهم ولاد ستين في سبعين مبيحبوش يدوا صحابهم كل حاجا

اما البنت كلمتين حلوين وهتاخد الورق يا معلم

ومتقولش بنت وحشة والحوار الحمضان دا لأ اعرف يا بني الوحشة بتجيب الحلوة

وخليك اتعرف على حريم كدا لغاية ما تسقط بإذن الله :D ههههههههههههه لأني بتريأ

بس حكاية ان البنات احسن من الصبيان دي بجد ــ هو انا مجربتش لاني لما يخلص الولاد ويتعدموا اللي في الدفعه اروح استلف من بنت :D

5- زاكر كل حاجا في وقتها متفكرش انك هتزاكر المادة قبل الاكزام بإسبوع هتخش تلزق امتياز او تقدير او تجيب مقبول

مزاكرة أول مرة بتحصل منها بنسبة تتراوح بين الــ 5 في المية والــ 30 في المية ــ ودا يا معلمي معناه ان المادة لزمتك وانك لبستها تمام وشلتها للسنة الجاية

انا قولت دا لاني معايا مواد من إعدادي صيدلة يعني مش بنصح من فراغ

فيه فرق لما تزاكر حاجا لأول مرة ولما تزاكرها لأكتر من مرة :D

انا كدا اوفرت

اي حد بأى في صيدلة عايز مني اي خدمات انا تحت امره

انا اقدر اديك ازاي تزاكر المادة وايه اللي يهمك فيهم وبس

ان شاء الله خير عن نفسي مكنتش بزاكر السنة اللي فاتت نهائي

بس بنصحكم بجد ياريت تزاكروا بضمير وحرام عليكم تضيعوا سنة كاملة من عمركم

صحة وفلوس ومصاريف ووقت وكل الكلام دا

سلام عليكم