حاسبات ومعلومات ولا هندسة خاصة ؟؟؟؟؟؟؟

[ايمان59]

سلام عليكم ...
لو سمحتوا يا جماعة انا فى قمة الحيرة ومش عارف اعمل ايه
انا كان نفسي ادخل هندسة لكن فرقت معايا على درجة .. المهم انا قدامى هندسة خاصة او حاسبات ومعلومات
انا عايز حد يقولى انهى الشغل بتاعة احسن مع العلم انى حابب المجالين عادى

ياريت اللى يرد يبرر الرد بتاعة لو سمحتو وربنا يجازيكوا خير ان شاء الله

متشكر جدا

[Eng.Mo'men]

هندسة شغلها موجود وحاسبات شغلها موجود ونفس المرتبات والوضع وكل حاجة بس فيه حاجتين هندسة معروفة للجميع انما حاسبات مش معروفة لانها جديدة فهتعاني شوية مع الناس واللى يقولك دا معهد واللى يقولك دا زي معهد اللاسلكي وزي معهد الحاسب الآلي واللى هيقولك دي زي تجارة بس على انضف المهم نفض للناس كلها لو عاوز تنجح فى حياتك والحاجة التانية هندسة ليها نقابة انما حاسبات لسة مشروع نقابة مهندسي البرمجيات شغال وعاوزين نقدمه فى مجلس الشعب القادم ان شاء الله عشان يتوافق عليه وبالتالي لقب خريج حاسبات لحد دلوقتي فى الورق الرسمي اخصائي حاسب آلي لحين انشاء النقابة ان شاء الله ,, مادام انت حابب المجالين يبقا حاسبات حكومي احسن طبعا من هندسة خاصة انما لو مش لاحق حكومي خالص خش هندسة خاصة ,, دي وجهة نظري وربنا يوفقك

[Ramy HEH]

أنا برده فى نفس الموضوع، فارق درجة عن هندسة ! :\
بس بعد اللى سمعته فى المنتدى هنا خصوصاً من Eng. Mo'men خلانى أتحمس للموضوع واحدة واحدة، المشكلة إن المجال جديد -بعد كده هتعرف إن دى ميزة- و احنا منعرفش عنه حاجة تقريباً، فحاول تقرا عن الكلية.. لو حسيت إنك ندمك من ضياع هندسة هيأثر عليك بعد كدة، تيقى هندسة خاص أحسن

صحابى اللى فى حاسبات كلهم مبسوطين فى الكلية، حتى لو شغل الكلية ساعات بيبقى أكتر من هندسة لكن بيبقى ممتع جداً لأن الموضوع بيتحول من حاجة مفروضة عليك عايز تخلص منها لهواية حاببها مش مجرد دراسة.

بالنسبة بقى لموضوع الشغل..
الموضوع ده فى إيد ربنا، بس المعروف إن خريجى حاسبات قليلين و فرص المجال ده كتييييييير
خريجى هندسة فى السنة بيوصل 18 ألف غير الجامعات الخاصة! في أقسام شغلها قليل قوى زى ميكانيكا و غيرها، فلو فى دماغك هندسة خاص لازم تعرف الأقسام الأول فى الجامعة اللى ناوى عليها.
عامةً أهم حاجة مجهود الواحد بعد توفيق ربنا طبعاً، و ازاى يستفيد من سنين الدراسة وصولاً للتقدير اللى بيفرق فى موضوع الشغل و خبرات اللى قبله فى المجال

صلاة الاستخارة و ارمي الموضوع على ربنا و إن شاء الله خير