رسالة إلى الرئيس ... من واحد غلبان

[بندق__2007]

كله يا ريس فى اللذيذ ..و أحوالنا قشطة و فى السليم
لا فيه لا رشوة و لا تمييز .. و البركة فيك قائد حكيم
و لا فيه مشاكل فى العيشة .. و لا فيه عبيد شغالة خيشة
عشان مش لاقيا اللضى .... و الله ده شعب فعلا لئيم

الشعب عايز بس ايه .... من ريس جدع أخلاق و رجولة
خلى الخمسة دولار بجنية ... و نزل دعم على الكاكولا
و الشعب برده مش عاجبه ... شعب ظالم ميعرفش ربه
سيبك يا ريس من ده كله .. كفاية ضحكتك العسولة

كفاية تطلع فى التليفزيون... تقولنا انك عايز تطور
و العمل بالنية يكون ... بس لو الشعب مش يتهور
الشعب هو السبب يا ريس ... هو اللى بيعك و بيليس
يا ناس بقى حلوا عن الراجل .. خلوا دماغه الحلوة تنور

ركز يا ريسنا و لا يهمك ... بس ركز بذمة و ضمير
و يعلن ابو اللى يفكر يسمك ... دا انتا لسه قدامك كتير
تخطط و تتكتك و تفاجئنا ... و اوعى يوم تفكر تفارقنا
بعدك يا ريس مين يدلعنا .. مين ينيمنا على الحرير

حبيبى قلبى يا مبارك ... يا منور كرسى الرياسة
احنا الشعب اللى بصدق اختارك .. و لو كان الكرسى بالوراثة
أمانة تسيب لنا عليه جمال ... نفتكرك بيه و على رأى اللى قال
" قاله يا بابى عايز ابقى ريس .. قاله لازمك كورس خباثة "