حسيت ان فيه حاجه غلط !!!

[To Be Is To Do]

" حسيت إن فيه حاجه غلط "
دي الجمله اللي فضلت ترن في وداني .. دي الجمله اللي ردت بيها صاحبتي لما سألتها : ليه بطّلتي تكتبي و تحطي تعليقات على جروب دفعتنا .؟
قالتلى : حسيت إن في حاجة غلط !
حاجة انا مش فاهمة بتحصل معايـا ازاي ؟!

ازاي ابقى مكسوفة حتى أرفع عيني في عين حد من زمايلنا في الجامعة ، !!
وهنا ع الجروب أتكلم معاه عادي .. ولايكات و كومنتات و انتِ عارفة كلامي بيقلب بهزار اوقات كتير ..
مابقدرش أسيطر هو بيطلع كده تلقائي

حسيت إنهم كده بقوا واخدين عليا اوووي ..

حسيت اني في فرق شاسع
بين صورتي في الجامعة وانا ماشية غاضة البصر و بالحجاب الكامل
و الحياء اني اتكلم مع حد منهم كلمة ويادوب في حدود الضروري جدااا ..
و بين شخصيتي على النت متفتّحة بتعامل مع الكل عادي و الهزار المعهود مني ممكن يفلت

ولما صاحبتنا نبهتنى للنقطه دى
استغربت ليه محدش من البنات كلمني قبلها ؟؟
و لقيت الاجابة انه الكل ما بيشوفش ده غلط .. بالعكس مبسوطين مني .. احنا زملا و الهزار ده مش زيادة عن اللزوم وعادي و كلنا محترمين

و احترت مين اللي صح ؟؟!!
انا كده متفتحة وكويسة و لا المفروض امسك تصرفاتي اكتر ؟
انا لو تغيرت ابقى متشددة ومحبكاها ولا ابقى مشيت صح ؟

بس لما رجعــت لكتاب التعليمات بتاعي اللي برجعله لما أتووه .. لقيته

بيقول: ان الاختلاط يكون لضرورة وبس .. مش تعاملات اجتماعية ع الفاضي

بيقول : ( فلا تخضَعنَ بالقول فيطمع الذي في قلبه مرض)
بيقول : ( ولا تتبعوا خطوات الشيطان )

لقيت اني مش مضطرة عشان دمي خفيف إني أظهر كده قدام الكل .. إن مش من حق حد يتعوّد عليــا لأننا في مرحلة شباب و الشيطان بيدخل لنا من مداخل محترمـة و يوصلنا لسكك تاااانية
ممكن حد قلبه يتعلق بشخصية إلكترونيـة و ده شفته كتيييير

وبما اني تلقائية جداا في تعاملاتي ومش عارفة اسيطر على تعليقاتي
ومش قادرة اسيب الفيسبوك نهائي

قررت اسيب الجروب فترة او اتابع من بعيد .. يعني من باب تهذيب النفس مش اكتر
و أركز على صفحتي مع صاحباتي بقى نقضيها هزار و لعب زي ما احنا عايزين
ودعيت ربنا يجنّبني شر فتن الدنيا و يبعدني عنها و يقدرني على فعل ما يرضيه

على فكرة انا دلوقتي مبسوووطة و بحمد ربنا كتير
لأني قدرت اتغلب على نفسي وأقفل باب للشيطان كان مفتوح ع البحري
في سبيل اني أرضي ربنا

و بعد الفترة اللي بعدتها دي .. رجعت ولاحظت اني بقيت آخد بالي اوي انا بكتب ايه و لمين قبل ما اكتبه .. و أراجع الكومنت قبل ما أحطه و اشوفه ينفع يتحط ولا لا ..

زي ما تقولي : " رجعت لأصلك يا جميل "
رجعت لشخصيتي الحقيقية مش شخصيتي الفيسبوكية

الصحبة الصالحة كانت الفرامل بتاعتي
والدعاء كان سلاحي

الحمد لله