صندوووووووووووووق الدنيا

[أ/رضا عطيه]

صندوق الثورة
قالوا ثورة قلنا مرحا وربنا يتمِّـــها على خير
وينصلح حال البلد لكل ولادها الغنى قبل الفقير
دلوقتى بيقولوا كانت دوره والثوار بينفِّــــذوا للغير
كلام فى كلام فى كلام كلام والسلام م الأمير والخبير
ولاعاد أمان ولا اطمئنان وضاع الخير من أهل الخير



صندوق الحظ
الثورة فى بلاد الناس بتعدل أمم قرون وقروووووون
واحنا ثورتين فى سنتين والتالته باتت فى الظنـــون
لا الغلبان انصلح حاله ولا الغلب صبح عنه مكنــون
يغنى للثورة دلوقتى ولا يلعنها ويقضيها كدا مرهون
شكله ياولداه فى البحر هيغامرعلى أمل يسافر أويهاجر
ويرجع للغربة يمسح بلاط الخواجه أو يغسل صحون



صندوق العجب

هى دى الدنيا ياصحبى فيها العجب أشكـــــــــال وألوان
الغنى يحفز الفقير ع الصبروالحكمة وكمان الاحســــان
وإن جه علي الغنى الدور يصبر- تلاقيه عامل زوغان
والفقير تتلوى معدته م الجوع ويعمل فيها عصام سلطان
ويقوله ياباشا
ماطرح مايسرى يمرى ويارب أشوفك دايما شبعــــان!!!!


صندوق الورق
(ليس تعميم ولكنه للبعض الذى يستغل حاجة الناس إليه )


هو الغنى بيحتاج الفقير فى إيه ؟
يزرع أرضه -يطبخ أكله - يسوق سيارته
عادى -أكل العيش فرض وواجب عليه
لكن لما زمام الأموربتيجى يوم فى إيديه
ويصبح صوته هو اللى يعلى الباشا أو يوطيه
بيتخللى الفقير عن حقه ليه ؟
وبيحرم نفسه م العدل ليه ؟
لو سألته إمتى أخر مرة الباشا قال لك كلمه حلوة
يقول لك فى الانتخابات
وساعتها كان هاين يحب على إيديه
طب بيتخللى عن حقه ليه ؟
وبيطول عصور السخرة والمذلة ليه ؟


صندوق الرحيل

هتقنعنى إنك بطل وعزيز قومك منذ القدم
هقولك فى الزمان دا أنا وانت ياصحبى مجرد رقم
رقم معدود فى مظاهرة -رقم مسجون فى مؤامرة
رقم بيتقدم فى مشاوره -رقم بيستخدم فى مناوره
المهم إنه رقم
رقم فى شهادة ميلاد -رقم بين الأولاد -
رقم متثبت فى وظيفه دخلها زى العدم
المهم انه رقم
شوف عدد اللى راحو وشوف عدد اللى جايين
علمهم عند ربنا لكنهم كانوا رقم وهيبقوا رقم
وغير التسامح و التراحم و الخير يا أهل الخير
ماهينفع أى رقم

شوف خير الأمم خرج منها كم صندوق
ونسينابعضهم ومش فاكرين غير الرقم
حتى الحسنات رقم والسيئات رقم
ورحمة ربنا وحدها القادرة ترحم وتغفر لكل رقم


اللهم أمين




شكرا جزيلا

[الأستاذة ام فيصل]

صنايق متنوعه من كل نواحي الحياة
وكل منها تعالج قضيه
حضرتك تمتلك فلسفه خاصة واحساس جميل وصادق
انت مبدع بكل معنى الابداع لانك تستنبط افكار رائعه
ربنا ييسر الامور وهو قادر على كل شيئ
تقبل تحياتي واعجابي بما يخطه قلمك