انا داخلة صيدلة بس مش حباها

[Nana_kh]

السلام عليكم ورحمة الله


انا الحمد لله جبت مجموع صيدلة


بس مكنش ده حلمىى انا كنت عيزة اددخل كلية تكنولوجيا حيوية وهى جامعة خاصة وقبلانى بس اهلى مش هيرضوا اتغرب ابدا وانا جيالى كلية كويسة


او ادخل علوم قسم جيولوجيا


عملت اختبار الميول المهنية وكان ميولى لمهنة بيولوجى 100فى المية ومهنة رسام يدوى 80 فى المية


ومدايقة انى داخلة كلية مش حباها


السنة اللى فاتت عشقت مادة الجيولوجيا ومادة الاحياء وكنت بمارس هواية الخط العربى حتى قبل الامتحان

وكنت بجيب درجات نهائية حتى ولو من غير مذاكرة

وجبت فيهم النهائية اخر السنة

والكيميا نقصت فيها درجة


والصراحة الكيميا انا بحبها بس مش ميولى اوى

عشان المستر ككان كويس جدا فحببنى فى المادة لكن كنت بمشى فيها بالعافية
ابأى مذاكرة ومش اجيب درجات مش بعرف اتحرك فيها اوى
غير لما اعصر دماغى واخد وقت طويل

فطبعا عشان الاهل لازم اكمل صيدلة

بس اعمل ايه طيب ؟؟

ععيزة ارتاح نفسيا مالتفكير

[elsayed desouky]

احمدي ربنا وخليكي في صيدلة فيه ناس غيرك بتدفع 50 الف جنيه علشان تدخلها وانت رافضاها وهي جاية لك ببلاش ؟ الاهم من كدا ان فكرك لم ينضج بعد واهلك اعلم منك بمستقبلك بحكم السن وخبرة الحياة لا تغلطي غلطتي فأنا ارتكبت نفس الحماقات دي ايام ثانوي وندمت حيث لا ينفع الندم ، في رأي الشخصي الصيدلة اتعملت علشان البنات بس اكتر من الشباب لانها خمس سنوات ومهنة محترمة واسمك دكتورة وهي كمان قريبة من بيولجي اللي انت بتحبيه ، اتمني تفكري من كلامي وتاخديه بمحمل الجد ولاتضيعي مستقبلك مقابل ميول بسيطة لا يقدرها مجتمعنا ولا تصلح الا في الدول المتقدمة
==============
وبالتوفيق ان شاء الله

[chealsawy]

احمدى ربنا فى ناس نفسها تدخل علوم ومش عارفه بسبب 1%

[Only Forward]

صلى صلاة استخارة و اللى ربنا يختاره ليكى اعمليه

[mohamed basiouny]

اتوكلي على الله
وصيدلة حلوة

[شيماء صقر محمد حسن]

صيدله جميله ومستقبلها كويس جدا للبنات توكلى على الله وادخلبيها بحب أنا بناتى الاثنين فى صيدله الاولى فى تلاته والثانيه اولى زيك اهم حاجه تحبيها لانها مش سهله علشان تعرفى تمشى فيها وربنا يوفقك

[madozz]

انا صيدلي .. والتعليقات اللي فوق دي اغلب اصحابها كانوا فاقدين للشئ ولذلك بيحبطوكي ..

انا في صيدلة علشان ما لحقتش طب .. واغلب اللي معايا في الكلية كده .. الوحيدين اللي نجحوا وحبوا المهنة معانا ورتبوا هم اللي دخلوها بمزاجهم وكانوا عايزين يكونوا فيها حاجة

صيدلة مستقبلها مش وحش .. ومش حلو .. صيدلة زيها زي اي كلية خلقها ربنا مهنة لها مليون سكة وسكة منها سكك بترفع ومنها سكك بتكسبك لقب بس .. تعيش وتموت علي اللقب

اختاري اللي بتحبيه واتعبي فيه وموتي نفسك علشانه .. علشان لما تفشلي فيه دافعك ان انتي الوحيدة اللي اختارتي ده وانك عارفة انك يستحيل هتنجحي في غيره هيجبرك تحاولي لغاية ما تلاقي نفسك في يوم جبتي 100 في المية من حلمك

اغلبنا بيعيش ويموت من غير لا افكار ولا مواهب .. والقليلين اللي بيكتشفوها ، المجتمع الفاشل بيحبطهم .. النادرين العظماء بقي هما اللي بيتحدوا مجتمعهم ومحيطهم واهلهم وبيقرروا هما عايزين ايه وعايزينه ازاي ! .. اتمنالك الخير وشدي حيلك علشان المشوار ايا كان ................. طويل

[elsayed desouky]

المشاركة الأصلية كتبت بواسطة madozz

انا صيدلي .. والتعليقات اللي فوق دي اغلب اصحابها كانوا فاقدين للشئ ولذلك بيحبطوكي ..

انا في صيدلة علشان ما لحقتش طب .. واغلب اللي معايا في الكلية كده .. الوحيدين اللي نجحوا وحبوا المهنة معانا ورتبوا هم اللي دخلوها بمزاجهم وكانوا عايزين يكونوا فيها حاجة

صيدلة مستقبلها مش وحش .. ومش حلو .. صيدلة زيها زي اي كلية خلقها ربنا مهنة لها مليون سكة وسكة منها سكك بترفع ومنها سكك بتكسبك لقب بس .. تعيش وتموت علي اللقب

اختاري اللي بتحبيه واتعبي فيه وموتي نفسك علشانه .. علشان لما تفشلي فيه دافعك ان انتي الوحيدة اللي اختارتي ده وانك عارفة انك يستحيل هتنجحي في غيره هيجبرك تحاولي لغاية ما تلاقي نفسك في يوم جبتي 100 في المية من حلمك

اغلبنا بيعيش ويموت من غير لا افكار ولا مواهب .. والقليلين اللي بيكتشفوها ، المجتمع الفاشل بيحبطهم .. النادرين العظماء بقي هما اللي بيتحدوا مجتمعهم ومحيطهم واهلهم وبيقرروا هما عايزين ايه وعايزينه ازاي ! .. اتمنالك الخير وشدي حيلك علشان المشوار ايا كان ................. طويل

=======================
مع احترامي لحضرتك يادكتور وكلامك فوق راسي من فوق ولكن
،، انتبه ،،،،
انت في عالم تالت وكلامك ده لا يصلح فيه ولكن يصلح في العالم المتقدم حارب وصمم وصر وخليك وراء حلمك كل هذه المفردات لا تصلح عندنا ولكن تصلح في الدول المتقدمة
وشكرا،،،،
===============
اختاري اللي بتحبيه واتعبي فيه وموتي نفسك علشانه
عفوا هذه الجملة لا تصلح في عالمنا بوجه عام ومصر علي وجهه الخصوص

[madozz]

بدون ما اذكر أمثلة لأفذاذ خرجوا من نفس العالم التالت اللي حضرتك فيه لإدارة مراكز حساسة جدا في العالم الأول ، مش بسبب عقلياتهم ولا مهارتهم ،ولكن بسبب حسن اختيارهم او الرضا بالاختيار اللي وقع عليهم .. وبذلوا المجهود اللائق مع ترتيب اولويات بالإضافة لدافع الطموح ورفض القيل والقال ...... هتلاقي أمثلة كتير أقلها مُعظم أصحاب شركات المالتي ميديا في تكنولوجيا الانترنت والاتصالات ..

التسليم بواقع في ايدك تبدّله باختيار أنسب ليك وأريح وهتقدر تلبي من خلاله احتياجاتك المادية والمعنوية وتستحمل عقباته .. قمة الفشل

انا اللي دفعني أكلم صاحبة التوبيك بالأسلوب ده .. حاجتين .. أولا ان عندها موهبة فعلية دللت علي وجودها بمش بالكلام فقط ولكن بالاختبارات والميول وجُمل توحي بالإصرار والاستغاثة .. ثانياً انها كتبت هنا علشان تسمع كلام مُغاير تماما للي بتسمعه من صحابها وقرايبها والبارتيتة المعروفة اللي بتقعد تبُخ في ودانك نفس الرتم اللي اتربينا عليه .. كلامي عموما مش للتأثير ولكن تلبية لرغبة صاحبة الموضوع انها تسمع كلام خارج الصندوق

نهاية .. هو انت هتضحي بايه علشان ايه !!!! .. يعني بعد ما دخلت كلية قمة وخدت لقب وبقيت دكتور ولا مهندس ولا ولا .. التعب واحد والمعاناة واحدة .. الفرق في تمييز مكتب التنسيق هو اللي صنعه .. انت في الكلية دي علشان تنسيقك رماك هناك وانا هنا علشان تنسيقي رماني هنا في كلية كل اللي اعرفه عنها انها لحقت مجموعي وترتيبها عالي في جدول مليان اسماء كليات ما اعرفش هاطلع ايه من معظمها !!! .. دَخْل مُعلِّم خبير حاليا افضل من دخل صيدلي باقي علي تكليفه وما فتحش صيدلية ولا سافر الخارج !!! .. وزي ما صيدلة فيها سُبل كتير ، باقي المهن برضه فيها سبل كتير المهم تدور صح..

فرق كبير بين انك تكافح علشان تحسّن وضعك من خلال واقع اتفرض عليك .. وبين انك تكافح علشان تنجز حلم اتحديت كتير علشانه ..!

[yoyo2012]

متدايقيش من اهلك و تحسبي انهم بيموتوا حلمك .. بس اهالينا نفسهم يحققوا احلامهم فينا نفسهم يرسموا مستقبلنا عشان نعيش مبسوطين ..
انا كنت دايما نفسي ف طب و انا زيك هدخل اولي صيدلة .. بس عشان امسك ف حلمي قررت ادخل قسم اكلينيكي عشان اقرب حاجه لطب واما نظامها يطبق صح هكون طبيب مساعد
احلامك جميلة اوي بس متسمعيش لصوت قلبك لوحده شغلي عقلك .. انتي عندك اصرار و طموح عالي احترمك عليه .. علي الاقل تفكيرك مش مادي و مفكرتيش ان ارباح صيدلة لو مقتدرة تفتحي صيدلية و غيره 400%
في الاول و الاخر بلاش تكوني مشتتة .. حبيبتي محدش هيعيش حياتك غيرك انتي .. انتي الي هتذاكري و هتشتغلي و تكسبي او " تخسري "
شوفي الخسارة الاقل فين
اقعدي مع نفسك قعدة و اطلعي لاهلك قولي قرارك ولو مين عارضك فهميه بكل هدوء
و لو كان قرارك ف صالح اهلك حاولي تثبتي نفسك ليهم انك مش قليلة و انك هتحققي حلمهم خديها تخدي
هيفرحوا بيكي اوي .. بالذات والدك هيكون اكتر حد عنده خبرات بس لو سمعتيله
ولو كان ضد رغبتهم احضني امك و اجبري خاطرها قوليلها ده حلمي و اوعديها انة تجيبي احسن تقدير
بس ف الحالة التانية لازم طموحك يخلي الحياة تخرج عن المالوف تبقي مش زي اي حد تبقي فريدة تموتي علي حلمك و طموحاتك
متخافيش انتي قدها .. انتي هتقدري تتخطي الموقف ده
صلي استخارة و اهدي
ربنا يوفقك

[Prayer]

المشاركة الأصلية كتبت بواسطة madozz

بدون ما اذكر أمثلة لأفذاذ خرجوا من نفس العالم التالت اللي حضرتك فيه لإدارة مراكز حساسة جدا في العالم الأول ، مش بسبب عقلياتهم ولا مهارتهم ،ولكن بسبب حسن اختيارهم او الرضا بالاختيار اللي وقع عليهم .. وبذلوا المجهود اللائق مع ترتيب اولويات بالإضافة لدافع الطموح ورفض القيل والقال ...... هتلاقي أمثلة كتير أقلها مُعظم أصحاب شركات المالتي ميديا في تكنولوجيا الانترنت والاتصالات ..

التسليم بواقع في ايدك تبدّله باختيار أنسب ليك وأريح وهتقدر تلبي من خلاله احتياجاتك المادية والمعنوية وتستحمل عقباته .. قمة الفشل

انا اللي دفعني أكلم صاحبة التوبيك بالأسلوب ده .. حاجتين .. أولا ان عندها موهبة فعلية دللت علي وجودها بمش بالكلام فقط ولكن بالاختبارات والميول وجُمل توحي بالإصرار والاستغاثة .. ثانياً انها كتبت هنا علشان تسمع كلام مُغاير تماما للي بتسمعه من صحابها وقرايبها والبارتيتة المعروفة اللي بتقعد تبُخ في ودانك نفس الرتم اللي اتربينا عليه .. كلامي عموما مش للتأثير ولكن تلبية لرغبة صاحبة الموضوع انها تسمع كلام خارج الصندوق

نهاية .. هو انت هتضحي بايه علشان ايه !!!! .. يعني بعد ما دخلت كلية قمة وخدت لقب وبقيت دكتور ولا مهندس ولا ولا .. التعب واحد والمعاناة واحدة .. الفرق في تمييز مكتب التنسيق هو اللي صنعه .. انت في الكلية دي علشان تنسيقك رماك هناك وانا هنا علشان تنسيقي رماني هنا في كلية كل اللي اعرفه عنها انها لحقت مجموعي وترتيبها عالي في جدول مليان اسماء كليات ما اعرفش هاطلع ايه من معظمها !!! .. دَخْل مُعلِّم خبير حاليا افضل من دخل صيدلي باقي علي تكليفه وما فتحش صيدلية ولا سافر الخارج !!! .. وزي ما صيدلة فيها سُبل كتير ، باقي المهن برضه فيها سبل كتير المهم تدور صح..

فرق كبير بين انك تكافح علشان تحسّن وضعك من خلال واقع اتفرض عليك .. وبين انك تكافح علشان تنجز حلم اتحديت كتير علشانه ..!

I agree with you.

[elsqa]

انا صيدلى ..... وكلية الصيدلة من اتقل الكليات فى دراستها ومعظمها كيمياء

صلى استخارة وتوكلى على الله وربنا يهديكى للخير

[شيماء صقر محمد حسن]

على فكره ناس كتير دخلو كليات مكنوش حبنها وابدعوا فيها زى احمد زويل كان نفسه يبقى دكتور والتنسيق دخلوا علوم وابدع وبقى عالم كبير فى مجاله واعرف بنت دخلت علوم وكان نفسها فى صيدله وتعبت نفسيا جدا لكن الحمد لله اتخرجت وبتفوق واتعينت معيده فى الكليه اللى كانت دخلها غصب عنها توكلى على الله وارضى اهلك وربنا هيرضيكى

[elsayed desouky]

المشاركة الأصلية كتبت بواسطة شيماء صقر محمد حسن

على فكره ناس كتير دخلو كليات مكنوش حبنها وابدعوا فيها زى احمد زويل كان نفسه يبقى دكتور والتنسيق دخلوا علوم وابدع وبقى عالم كبير فى مجاله واعرف بنت دخلت علوم وكان نفسها فى صيدله وتعبت نفسيا جدا لكن الحمد لله اتخرجت وبتفوق واتعينت معيده فى الكليه اللى كانت دخلها غصب عنها توكلى على الله وارضى اهلك وربنا هيرضيكى

============================
اتفق معك جدا جدا جدا في هذا الرأي وحضرتك قولتي كل اللي نفسي اقوله وازود عليه مثال حي لمسته بنفسي وهو
انا عندي ابن خالي جاب مجموع عالي ودخل طب اسكندرية وبعد شهر حول لكلية التربية لانه ماكنشي حابب الطب وخايف من الدم والجثث وكدا يعني ، المهم اهله غصبوا عليه ورجعوه كليه الطب المهم تفوق وجاب تقدير عالي وسكنوه سكن خاص في المدينة لتفوقه كمنحة من الجامعة وتقريبا كان بياخد فلوس كل شهر كحافز يعني المهم تفوق في دراستة وتخصص جراحة لانه تقديره النهائي كان كويس المهم اصبح جراح الان ومن الجراحين الناجحين كمان بعد ماكان كاره الكلية وعايز يحول

[linuxer9]

وفيها إيه لو دخلتي صيدلة ومارستي هواية أو مجال مفضل ليكي بعيدًا عن الصيدلة بعد أو أثناء دراستك ، احنا في عصرالمعرفة يعني سهل جدا أنك تتعلمي أي حاجة انتي عاوزاها سواء كان من الكتب والمكتبات أو من الإنترنت
أنت تعرفي كام واحد حواليكي اشتغل في مجال غير دراسته في الكلية وأصبح ناجح جدًا فيه